ប្រទេសហ្វ៊ីលីពីន ៖ អាជ្ញាធរបានស៊ើបអង្កេតភ្នាក់ងារសន្តិសុខម្នាក់ដែលធ្វើការក្នុងការិយាល័យសុវត្ថិភាពដឹកជញ្ជូន (OTS) ប្រទេសហ្វ៊ីលីពីន ដោយសារមានការចោទប្រកាន់ថា ភ្នាក់ងារសន្តិសុខរូបនេះបានលួចប្រាក់ពីភ្ញៀវទេសចរចិនម្នាក់ចំនួន៣០០ដុល្លារអាមេរិក នៅអគារអ្នកដំណើរក្នុងអាកាសយានដ្ឋាន Ninoy Aquino International កាលពីពេលកន្លងមក ។

កាលពីថ្ងៃទី១៨ ខែកញ្ញា ឆ្នាំ២០២៣ ការិយាល័យសុវត្ថិភាពដឹកជញ្ជូន (OTS) លើកឡើងថា ពួកគេអាចកំណត់អត្តសញ្ញាណភ្នាក់ងារសន្តិសុខរូបនេះបានហើយ ហើយកំពុងតែប្រមូលភស្តុតាង ។ លើសពីនេះ ការិយាល័យសុវត្ថិភាពដឹកជញ្ជូនបានសហការជាមួយអាកាសយានដ្ឋានអន្តរជាតិ Manila និងភ្នាក់ងារសន្តិសុខអាកាសចរណ៍ ដែលស្ថិតនៅក្រោមបញ្ជារបស់ប៉ូលិសជាតិហ្វ៊ីលីពីនផងដែរ ។

ការិយាល័យសុវត្ថិភាពដឹកជញ្ជូន (OTS) បន្តថា ពួកគេនឹងដាក់ទោសភ្នាក់ងារសន្តិសុខខាងលើ ប្រសិនបើការចោទប្រកាន់ជាការពិត ។ ហេតុការណ៍នេះមិនបានឆ្លុះបញ្ចាំងពីក្រមសីលធម៌របស់ភ្នាក់ងារសន្តិសុខដែលធ្វើការនៅការិយាល័យសុវត្ថិភាពដឹកជញ្ជូនទាំងអស់ទេ ហើយភ្នាក់ងារសន្តិសុខទាំងអស់គោរពតាមក្រមសីលធម៌ការងាររបស់ពួកគេ ។

វីដេអូហេតុការណ៍នេះត្រូវបានផ្សព្វផ្សាយក្នុង Twitter របស់សារព័ត៌មាន CNN ហ្វ៊ីលីពីន ។ គេឃើញថា ក្នុងវីដេអូនេះភ្នាក់ងារសន្តិសុខស្ត្រីម្នាក់យកប្រាក់ដាក់ចូលមាត់របស់ខ្លួន ហើយព្យាយាមលេបចូលក្នុងពោះ បន្ទាប់មក នាងក៏ផឹកទឹកតាមក្រោយ ។ ប៉ុន្តែនាងបានបដិសេធចំពោះការចោទប្រកាន់ទាំងអស់ ។ ទោះយ៉ាងណា នាងត្រូវបានគេបញ្ឈប់ពីតួនាទីក្នុងអំឡុងពេលស៊ើបអង្កេត ។

សារព័ត៌មានចុះផ្សាយថា ប្រាក់ដែលភ្នាក់ងារសន្តិសុខព្យាយាមលេបចូលក្នុងពោះ គឺជាប្រាក់ដែលនាងបានលួចពីអ្នកដំណើរជនជាតិចិន ដែលបានមកកាន់អាកាសយានដ្ឋាន Ninoy Aquino International ។

ហេតុការណ៍នេះបានធ្វើឱ្យរដ្ឋាភិបាលហ្វ៊ីលីពីនមិនពេញចិត្តទេ ដោយសាររដ្ឋាភិបាលកំពុងប្រឹងប្រែងផ្សព្វផ្សាយពីវិស័យទេសចរណ៍ និងអញ្ជើញភ្ញៀវទេសចរបរទេសឱ្យធ្វើដំណើរមកកម្សាន្តនៅប្រទេសហ្វ៊ីលីពីន ហើយអាកាសយានដ្ឋានមានតួនាទីសំខាន់សម្រាប់ទទួលភ្ញៀវទេសចរបរទេស ៕

រូបស្វា NFT (Non-fungible token) ដែលល្បីខ្លាំង កាលពីប៉ុន្មានឆ្នាំមុននោះ ពេលនេះ បានធ្លាក់ថ្លៃខ្លាំងជាង៩៥% ដែលធ្វើឱ្យតម្លៃរូបស្វាខ្លះ សល់មិនដល់១០០ដុល្លារ។កាលដើមឡើយ រូបស្វាNFTនេះ ត្រូវបានគេរំពឹងថានឹងមានតម្លៃរាប់លានដុល្លារ នៅក្នុងពិភព Metaverse ក៏ប៉ុន្តែមកទល់ពេលនេះលោក Mark Zuckerberg ស្ថាបនិកក្រុមហ៊ុន Meta នៅតែមិនទាន់សម្រេចចេញជាផ្លូវការនៅគម្រោង Metaverse នៅឡើយនោះទេ។

កត្តានេះ បានធ្វើឱ្យរូបទាំងនៅក្នុង NFT មិនថារូបស្វា ឬរូបអ្វីផ្សេងនោះទេ បានធ្លាក់ថ្លៃជាងខ្លាំង ដែលជំរុញឱ្យអ្នកវិនិយោគមួយចំនួនដែលបានទិញរូបស្វានោះ ក្នុងតម្លៃរាប់មុឺនដុល្លារ សម្តែងការខកចិត្តជាខ្លាំង។NFT (Non-fungible token) ជាទ្រព្យកម្មសិទ្ធឌីជីថល ដែលមិនមាននរណាអាចក្លែងបន្លំបាន ក្នុងការរក្សាកម្មសិទ្ធផ្ដាច់មុខនេះ NFT ត្រូវបានប្រើប្រាស់នៅលើ បច្ចេកវិទ្យាដ៏សុក្រឹត Blockchain ហើយ Ethereum blockchain ជាបច្ចេកវិទ្យាដ៏ពេញនិយមបំផុតមួយ ក្នុងទីផ្សារ NFT។

សូមបញ្ជាក់ផងដែរថា NFT មានទម្រង់ជាស្នាដៃសិល្បៈ ដូចជារូបថត វីដេអូ តន្ត្រី Itemsហ្គេម កាត Memes ជាដើម៕

ប្រភព៖ business insider

ក្រុមហ៊ុន Aon និង TELUS Health ជាក្រុមហ៊ុនធានារ៉ាប់រងបានបង្ហាញលទ្ធផលស្ទង់មតិមួយពាក់ព័ន្ធនឹងសុខភាពផ្លូវចិត្ត ដែលបណ្តាលមកពីការបំពេញការងារ និងកត្តាផ្សេងទៀត រកឃើញថា បុគ្គលិកធ្វើការនៅតំបន់អាស៊ីបានប្រឈមនឹងបញ្ហាសុខភាពផ្លូវចិត្តយ៉ាងខ្លាំង ។

គេបានស្ទង់មតិបុគ្គលិកធ្វើការចំនួន១៣.០០០នាក់ក្នុងប្រទេសចំនួន១២ នៅតំបន់អាស៊ី បង្ហាញថា បុគ្គលិកនៅអាស៊ីរហូតដល់៨២% ប្រឈមនឹងការធ្លាក់ខ្លួនឈឺដោយសារសុខភាពផ្លូវចិត្ត ចាប់ពីកម្រិតមធ្យមរហូតដល់កម្រិតខ្ពស់ ក្នុងនោះបុគ្គលិក៤៧% មានបញ្ហាសុខភាពផ្លូវចិត្តកម្រិតមធ្យម ហើយ៣៥% ទៀតមានបញ្ហាសុខភាពផ្លូវចិត្តកម្រិតខ្ពស់ ។ ប្រសិនបើប្រៀបធៀបជាមួយទិន្នន័យដែលគេធ្លាប់ស្ទង់មតិកាលពីឆ្នាំ២០២១ បង្ហាញថា បុគ្គលិកមានភាពតានតឹងកើនឡើងរហូតដល់៥១% ។

ចំណែកមូលហេតុធ្វើឱ្យបុគ្គលិកនៅតំបន់អាស៊ីប្រឈមនឹងបញ្ហាសុខភាពផ្លូវចិត្ត ដោយសារមកពីកត្តាជាច្រើនយ៉ាង ដូចជា ភាពមិនប្រាកដប្រជាផ្នែកសេដ្ឋកិច្ច, ការចំណាយក្នុងជីវភាពប្រចាំថ្ងៃកើនឡើង, ថ្លៃថែទាំសុខភាពកើនឡើង, បម្រែបម្រួលអាកាសធាតុ និងអស្ថេរភានយោបាយ ។

ប្រទេសដែលមានបុគ្គលិកធ្លាក់ខ្លួនឈឺដោយសារជំងឺផ្លូវចិត្តច្រើនបំផុត រួមមាន ៖ កូរ៉េខាងត្បូង៤៤%, ម៉ាឡេស៊ី៤២%, ជប៉ុន៤១%, ហុងកុង៤០% និងថៃ២៩% ។ លទ្ធផលស្ទង់មតិបង្ហាញទៀតថា ក្រុមហ៊ុនជាច្រើននៅអាស៊ីគ្មានជំនួយសម្រាប់បុគ្គលិកមានភាពតានតឹង ឬមានបញ្ហាសុខភាពផ្លូវចិត្តទេ ។ ដូច្នេះ វានឹងអាចក្លាយជាបញ្ហារ៉ាំរ៉ៃនាថ្ងៃអនាគត ៕ ប្រភព ៖ Nation World News

ប្រទេសចិន៖ យោងតាមប្រភពព័ត៌មាន CNN ដែលបានរាយការណ៍កាលពីថ្ងៃទី ២០ ខែកញ្ញាថា Yang Wang U8 ដែលជាម៉ាករថយន្តអគ្គិសនីដ៏ប្រណីតរបស់ក្រុមហ៊ុន BYD នឹងបើកដំណើរការនៅក្នុងប្រទេសចិននៅខែតុលា ឆ្នាំ២០២៣។ រថយន្តប្រភេទ SUV នេះត្រូវបានបំពាក់ដោយម៉ូទ័រអគ្គិសនីចំនួន ៤ ដែលមានកម្លាំងសរុប ១.១៩៧ សេះ ជាមួយនឹងល្បឿនអតិបរមា ២០០ គីឡូម៉ែត្រ/ម៉ោង ។ Yang Wang U8 មានសមត្ថភាពអណ្តែតលើទឹកជ្រៅបានរយៈពេល ៣០ នាទី ហើយរំកិលទៅមុខក្នុងល្បឿន ៣ គីឡូម៉ែត្រក្នុងមួយម៉ោង។ ក្រុមហ៊ុន BYD បានសង្កត់ធ្ងន់ថា សមត្ថភាពរបស់ Yang Wang U8 គឺសម្រាប់តែពេលមានអាសន្នប៉ុណ្ណោះ ដូចជាទឹកជំនន់ជាដើម ដោយអ្នកមិនគួរបើកបរឆ្លងកាត់បឹង ឬទន្លេដើម្បីតែលេងសើចនោះទេ។

Yang Wang U8 មានពីរកំណែគឺ Premium Edition និង Off-road Master Edition។ កំណែ Premium Edition នឹងត្រូវបានដាក់លក់មុនគេ ហើយត្រូវបានគេដឹងថាប្រគល់ជូនអតិថិជននៅខែតុលា។ រីឯ Off-road Master នឹងចេញលក់នៅពេលក្រោយ ដោយសារតែវាមានលក្ខណៈពិសេសបន្ថែមពីផ្លូវ Off-Road និងវែងជាងមុន រួមជាមួយជណ្តើរចំហៀងសម្រាប់ងាយស្រួលឡើងដល់ដំបូល។ ម៉ូដែលទាំងពីរនេះមានតម្លៃលក់ដូចគ្នាគឺ ១៥០,០០០ ដុល្លារ ដែលធ្វើឱ្យ U8 ក្លាយជារថយន្តអគ្គិសនីថ្លៃបំផុតនៅក្នុងប្រទេសចិន។

រថយន្តអគ្គិសនីអណ្តែតទឹក Yang Wang U8 មានប្រវែង ៥.៣១៩ មីលីម៉ែត្រ, ទទឹង ២,០៥០ មីលីម៉ែត្រ, កម្ពស់ ១,៩៣០ មីលីម៉ែត្រ, បាតកង់ ៣,០៥០ មីលីម៉ែត្រ, ទម្ងន់សរុបគឺ ៣.៩៨៥គីឡូក្រាម និងមានតែ ៥ កៅអីប៉ុណ្ណោះ។ រថយន្តនេះ ត្រូវបានបង្កើតឡើងនៅលើវេទិកា e4 ជាមួយនឹងប្រព័ន្ធគ្រប់គ្រងតួធារាសាស្ត្រ Disus-P ដែលអនុញ្ញាតឱ្យកម្ពស់ត្រូវបានកើនឡើង ឬបន្ថយរហូតដល់ ១៥០ មីលីម៉ែត្រ។

រថយន្ត SUV អគ្គិសនីក៏ត្រូវបានបំពាក់ដោយកញ្ចក់ចំនួន ៣ កាមេរ៉ា ១៣ កាំ រ៉ាដា ultrasonic ១២ និងរ៉ាដារលក ៥ មីលីម៉ែត្រ រួមជាមួយបច្ចេកវិទ្យាជំនួយការបើកបរកម្រិតខ្ពស់ ADAS កម្រិត ២។ U8 គាំទ្រ ១០០ kW DC fast charging សាក ៣០-៨០% ក្នុងរយៈពេល ១៨ នាទី។ ដូច្នេះហើយបច្ចុប្បន្នក្រុមហ៊ុន BYD មានហាងចំនួន ៦០ កំពុងសាងសង់នៅក្នុងទីក្រុងចំនួន ៤០ ហើយគ្រោងនឹងបើកហាងចំនួន ៩០ បន្ថែមទៀតនៅចុងឆ្នាំនេះ៕
ប្រភព៖vnexpress

រដ្ឋធានីសេអ៊ូល៖ ដំណើរទស្សនកិច្ចរបស់មេដឹកកូរ៉េខាងជើង នៅក្នុងប្រទេសរុស្ស៊ី បានបង្កឲ្យមានការព្រួយបារម្ភយ៉ាងខ្លាំងពីលោកខាងលិច និង សម្ពន្ធមិត្ត ខណៈកូរ៉េខាងត្បូង បានព្រមាន អំពីរដ្ឋាភិបាលរបស់គាត់ នឹងមិននៅស្ងៀម ប្រសិនបើក្រុងព្យុងយ៉ាងលក់អាវុធទៅឲ្យរុស្ស៊ី ព្រោះវានឹងបង្កការគំរាមកំហែងយ៉ាងធ្ងន់ធ្ងរបំផុត ហើយរំលោភលើដំណោះស្រាយរបស់អង្គការសហប្រជាជាតិ

សារព័ត៌មាន CNA បានចេញផ្សាយ កាលពីព្រឹក ថ្ងៃសុក្រ ទី២២ ខែកញ្ញា ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានចេញបញ្ជាឲ្យបង្កើនទំនាក់ទំនងការទូតបន្ថែមទៀត ជាមួយនឹងរុស្ស៊ី ក្រោយដំណើរទស្សនកិច្ចរបស់គាត់ កាន់រដ្ឋធានីមូស្គូ នៃប្រទេសមហាអំណាចនុយក្លេអ៊ែរកំពូលរបស់ពិភពលោក។ សកម្មភាពរបស់លោក គីម បានកើតឡើង ស្របពេលសហរដ្ឋអាមេរិក និង កូរ៉េខាងត្បូង ជាសម្ពន្ធមិត្ដដ៏ជិតស្និទ្ធមួយនៅអាស៊ីបូព៌ារបស់ក្រុងវ៉ាស៊ីនតោន បានព្រមាន ថា រាល់កិច្ចសហប្រតិបត្ដិការយោធាណាមួយ នឹងនាំមកនូវគ្រោះថ្នាក់ និង មានផលវិបាកដ៏ធ្ងន់ធ្ងរ។

បើតាមទីភ្នាក់ងារសារព័ត៌មាន គ្រប់គ្រង ដោយរដ្ឋ កូរ៉េខាងជើង KCNA បានរាយការណ៍ កាលពីថ្ងៃសុក្រ (ទី២២ ខែកញ្ញា) ថា នៅក្នុងកិច្ចប្រជុំ នៃការិយាល័យនយោបាយ កាលពីថ្ងៃពុធ (ទី២០ ខែកញ្ញា) លោកប្រធាន គីម បានរៀបចំការងារ អភិវឌ្ឍទំនាក់ទំនងទ្វេភាគី ដល់កម្រិតខ្ពស់ជាថ្មីបន្ថែមទៀត ដើម្បីបង្កើនជោគជ័យ សម្រាប់ដំណើរទស្សនកិច្ចរបស់គាត់ កាលពីពេលថ្មីៗនេះ។

លោក យូន ស៊ុក-យូល (Yoon Suk-Yeol) ប្រធានាធិបតីកូរ៉េខាងត្បូង បានថ្លែង នៅចំពោះមុខមហាសន្និបាតអង្គការសហប្រជាជាតិ កាលពីថ្ងៃពុធ (ទី២០ ខែកញ្ញា) ថា សកម្មភាពណាមួយរបស់សមាជិក នៃក្រុមប្រឹក្សាសន្តិសុខ អង្គការសហប្រជាជាតិ គេចចេញពីបទដ្ឋានអន្តរជាតិ នឹងនាំមកនូវគ្រោះថ្នាក់។ ក្រុងសេអូល និង សម្ពន្ធមិត្តរបស់ខ្លួន នឹងមិនអង្គុយនៅស្ងៀម ជុំវិញកិច្ចព្រមព្រៀងលក់គ្រឿងសព្វាវុធ រវាងក្រុងព្យុងយ៉ាង និង ក្រុងមូស្គូ នោះឡើយ។ បញ្ហានេះ នឹងបង្កនូវការគំរាមកំហែងយ៉ាងខ្លាំង មិនត្រឹមតែអ៊ុយក្រែន ប៉ុណ្ណោះទេ ប៉ុន្ដែថែមទាំងបង្កការគំរាមកំហែង មកលើប្រទេសកូរ៉េខាងត្បូង ផងដែរ។

នៅក្នុងដំណើរទស្សនកិច្ច នៅរុស្សី កាលពីប៉ុន្មានថ្ងៃមុនេះ លោក គីម ជុងអ៊ុន មេដឹកនាំកូរ៉េខាងជើង បានជួបជាមួយនឹងប្រធានាធិបតី លោក វ៉្លាឌីមៀ ពូទីន ខណៈកំពុងតែធ្វើដំណើរ ទៅកាន់តំបន់ដាច់ស្រយាល នាភាគខាងកើត ប្រទេសរុស្ស៊ី និង បានពិនិត្យមើលកន្លែងបច្ចេកវិទ្យា និង យោធារបស់រដ្ឋាភិបាលក្រុងមូស្គូ។ ភាគីទាំង២ បានលើកឡើង អំពីកិច្ចសហប្រតិបត្ដិការ លើវិស័យការពារជាតិ។ ប៉ុន្ដែទាំងរុស្ស៊ី និង កូរ៉េខាងជើង មិនបញ្ជាក់ឲ្យបានច្បាស់នោះឡើយ។

ក្រុមអ្នកសង្កេតការណ៍ បានអះអាង ថា លោក គីម អាចនឹងដឹកជញ្ជូនគ្រាប់រំសេវ ដើម្បីបំពេញឃ្លាំងអាវុធរបស់លោក ពូទីន ដែលស្ទើរតែខ្សោះ អស់ពីកន្លែងស្ដុក ដើម្បីគាំទ្រដល់កិច្ចខិតខំប្រឹងប្រែង ធ្វើសង្គ្រាមរបស់គាត់ នៅក្នុងប្រទេសអ៊ុយក្រែន ជាថ្នូរនឹងការទទួលបានមកវិញនូវបច្ចេកវិទ្យាអាវុធទំនើបៗ និង ជំនួយសេដ្ឋកិច្ច ពីក្រុងមូស្គូ ខណៈក្រុងព្យុងយ៉ាង កំពុងតែប្រឈមមុខនឹងបញ្ហាសេដ្ឋកិច្ចដ៏ធ្ងន់ធ្ងរ។

សហរដ្ឋអាមេរិក កូរ៉េខាងត្បូង និង សម្ពន្ធមិត្ត បានព្រមាន ថា រុស្ស៊ី និង កូរ៉េខាងជើង នឹងត្រូវបង់ថ្លៃការាតបង់ ប្រសិនបើប្រទេសទាំង២នេះ បន្តកិច្ចព្រមព្រៀងលក់គ្រឿងសព្វាវុធ ដោយបំពានទៅលើសេចក្តីសម្រេច នៃក្រុមប្រឹក្សាសន្តិសុខរបស់អង្គការសហប្រជាជាតិ ហាមឃាត់ការធ្វើពាណិជ្ជកម្មអាវុធ ជាមួយនឹងកូរ៉េខាងជើង ខណៈរុស្ស៊ី ជាសមាជិកអចិន្ត្រៃយ៍ នៃក្រុមប្រឹក្សាសន្តិសុខអង្គការសហប្រជាជាតិ ក៏បានបោះឆ្នោតគាំទ្រ លើសេចក្តីសម្រេចរបស់ UNSC ផងដែរ។

ក្រុមអ្នកជំនាញ បានប៉ាន់ប្រមាណ ថា កូរ៉េខាងជើង និង រុស្ស៊ី ទំនងជាបានពិភាក្សាគ្នា អំពីកិច្ចព្រមព្រៀងផ្ទេរគ្រឿងសព្វាវុធ ដែលត្រូវបានហាមឃាត់ និង វិធានការសហប្រតិបត្តិការផ្សេងៗទៀត នៅក្នុងអំឡុងដំណើរទស្សនកិច្ច រយៈពេល៦ថ្ងៃរបស់លោក គីម កាលពីសប្តាហ៍មុន។ ប្រទេសទាំងពីរ បានយកចិត្តទុកដាក់យ៉ាងខ្លាំង ចំពោះការបង្កើនទំនាក់ទំនង រវាងរដ្ឋាភិបាលក្រុងមូស្គូ និង ក្រុងព្យុងយ៉ាង ខណៈប្រទេសទាំង២នេះ កំពុងតែរួមគ្នា ប្រឈមមុខរៀងៗខ្លួន ជាមួយលោកខាងលិច។

កូរ៉េខាងជើង នឹងស្វែងរកជំនួយពីរុស្ស៊ី ដើម្បីបញ្ចប់នូវការអភិវឌ្ឍប្រព័ន្ធអាវុធ ប្រកបដោយបច្ចេកវិទ្យាជាន់ខ្ពស់ ដូចជា ផ្កាយរណបចារកម្ម នាវាមុជទឹក ដើរដោយថាមពលនុយក្លេអ៊ែរ និង មីស៊ីលរយៈចម្ងាយឆ្ងាយដ៏មានឥទ្ធិពល។ បញ្ហានេះ ក៏ដោយសារតែមេដឹកនាំកូរ៉េខាងជើង លោក គីម ចង់ធ្វើឲ្យឃ្លាំងអាវុធរបស់គាត់ កាន់តែទំនើប ដើម្បីទទួលបានសម្បទាន កាន់តែច្រើន ពីសហរដ្ឋអាមេរិក និង កូរ៉េខាងត្បូង នៅក្នុងការចរចាគ្នា៕

ប្រទេសថៃ ៖ វិស័យទេសចរណ៍នៅខេត្តឡាំប៉ាង ប្រទេសថៃបានត្រឡប់មកអ៊ូអរឡើងវិញ ខណៈបច្ចុប្បន្ន ភ្ញៀវទេសចរចិន និងតៃវ៉ាន់បាននាំគ្នាជិះរទេះសេះកម្សាន្តនៅជុំវិញខេត្ត ហើយធ្វើឱ្យពលរដ្ឋថៃក្នុងតំបន់ទទួលបានប្រាក់ចំណូលមិនក្រោម១.០០០បាតក្នុង១ថ្ងៃ សម្រាប់រទេះសេះ១គ្រឿង ។ លើសពីនេះ វាក៏បានជួយជំរុញដល់វិស័យទេសចរណ៍នៅខេត្តឡាំប៉ាង និងសេដ្ឋកិច្ចប្រទេសថៃផងដែរ ។

ពលរដ្ឋថៃជាច្រើននាក់រស់នៅខេត្តឡាំប៉ាងនិយាយថា ពួកគេសប្បាយចិត្តណាស់ ដោយសារភ្ញៀវទេសចរចិនចាប់ផ្តើមធ្វើដំណើរមកកាន់ប្រទេសថៃ ហើយភ្ញៀវទេសចរទាំងនេះបានធ្វើដំណើរមកកាន់បណ្តាខេត្តភាគខាងជើង រួមទាំងខេត្តឡាំប៉ាងផងដែរ ។ ក្រៅពីនេះ នៅមានភ្ញៀវទេសចរតៃវ៉ាន់ជាច្រើននាក់ទៀតបានធ្វើដំណើរមកខេត្តឡាំប៉ាង ដើម្បីជិះរទេះសេះកម្សាន្ត ។

កាលពីថ្ងៃទី១៩ ខែកញ្ញា ឆ្នាំ២០២៣ គេបានឃើញភ្ញៀវទេសចរចិន និងតៃវ៉ាន់ជិះរថយន្តទេសចរណ៍ធ្វើដំណើរពីអាកាសយានដ្ឋានខេត្តឈៀងម៉ៃ ឆ្ពោះមកកាន់ខេត្តឡាំប៉ាង ហើយពួកគេចាប់អារម្មណ៍ជិះរទេះសេះទស្សនាជុំវិញខេត្ត ។ ភ្ញៀវទេសចរចិនជាង១០០នាក់បាននាំគ្នាជិះរទេះសេះជាង៣០គ្រឿងនៅកន្លែងផ្តល់សេវាកម្មរទេះសេះ នៅបរិវេណខាងមុខសារមន្ទីរឡាំប៉ាង ។

ការបង្ហាញមុខរបស់ភ្ញៀវទេសចរចិន និងតៃវ៉ាន់ បានជំរុញឱ្យវិស័យទេសចរណ៍នៅខេត្តឡាំប៉ាងត្រឡប់មកអ៊ូអរឡើងវិញ ហើយធ្វើឱ្យពលរដ្ឋក្នុងតំបន់អាចទទួលបានប្រាក់ចំណូលមិនក្រោម១.០០០បាតក្នុង១ថ្ងៃ សម្រាប់អ្នកមានរទេះសេះ១គ្រឿង ។ ចំណែកភោជនីយដ្ឋាន, ហាងលក់វត្ថុអនុស្សាវរីយ៍ និងហាងលក់របស់របរផ្សេងៗ ក៏ចាប់ផ្តើមលក់ដាច់ដូចគ្នាដែរ ៕ ប្រភព ៖ mgronline

ប្រទេសម៉ាឡេស៊ី ៖ លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ីលើកឡើងថា រដ្ឋាភិបាលនឹងចាប់ផ្តើមអនុវត្តគោលនយោបាយហាមឃាត់ការនាំចេញរ៉ែកម្រទៅក្រៅប្រទេស ដើម្បីចៀសវាងការស្វែងរកផលប្រយោជន៍ និងការពារការបាត់បង់ធនធានធម្មជាតិ ។ គោលនយោបាយនេះធ្វើឱ្យម៉ាឡេស៊ីក្លាយជាប្រទេសចុងក្រោយគេ ដែលហាមឃាត់ការនាំចេញរ៉ែសំខាន់ បើទោះជាប្រទេសនេះពុំបានបង្ហាញថា នឹងអនុវត្តនៅពេលណាក្តី ។

តាមទិន្នន័យរបស់ការិយាល័យស្ទង់មតិភូមិសាស្ត្រអាមេរិក កាលពីឆ្នាំ២០១៩ បង្ហាញថា ប្រទេសម៉ាឡេស៊ីមានបរិមាណរ៉ែកម្រក្នុងចំនួនតិចតួចត្រឹមតែ៣ម៉ឺន Metric Tons ប៉ុណ្ណោះ ខណៈប្រទេសចិនមានបរិមាណរ៉ែកម្ររហូតដល់៤៤លានតោន ។

ទោះយ៉ាងណា ការហាមឃាត់របស់ម៉ាឡេស៊ី ដោយសារទីផ្សារពិភពលោកកំពុងស្វែងរកប្រភពរ៉ែកម្រផ្សេងទៀតក្រៅពីប្រទេសចិន ដើម្បីកាត់បន្ថយការពឹងផ្អែកលើចិនខ្លាំងពេក ខណៈចិនបានផលិតរ៉ែកម្រផ្សេងៗដ៏ធំបំផុតនៅលើពិភពលោក ។ ហេតុនេះ គេបានប្រើប្រាស់វាយ៉ាងទូលំទូលាយនៅក្នុងបន្ទះឈីប Semiconductor, រថយន្តអគ្គិសនី និងសម្ភារៈយោធា ។

លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ីបញ្ជាក់ថា រដ្ឋាភិបាលនឹងគាំទ្រការអភិវឌ្ឍឧស្សាហកម្មរ៉ែពិបាករកនៅម៉ាឡេស៊ី ។ ដូច្នេះ វានឹងផ្តល់លទ្ធផលវិជ្ជមានដល់សេដ្ឋកិច្ចក្នុងប្រទេស ហើយការហាមឃាត់ការនាំចេញរ៉ែទាំងនេះ នឹងទាញយកផលប្រយោជន៍ជាតិខ្ពស់បំផុត ។ ម៉ាឡេស៊ីរំពឹងថា ឧស្សាហកម្មរ៉ែកម្រនឹងមានចំណែកគាំទ្រផលិតផលក្នុងស្រុកសរុប (GDP) រហូតដល់២ពាន់លានដុល្លារអាមេរិកនៅឆ្នាំ២០២៥ ព្រមទាំងផ្តល់ការងារធ្វើប្រមាណ៧.០០០តួនាទី ។

តាមទិន្នន័យរបស់ការិយាល័យគយប្រទេសចិនបង្ហាញថា ការហាមនាំចេញរ៉ែរបស់ម៉ាឡេស៊ីអាចធ្វើឱ្យប៉ះពាល់ដល់ចិន ដែលចិនបាននាំចូលរ៉ែកម្រពីម៉ាឡេស៊ីប្រមាណ៨% ចាប់ពីខែមករា ដល់ខែកក្កដា ឆ្នាំ២០២៣ ។ លើសពីនេះ វានឹងប៉ះពាល់ដល់បណ្តាក្រុមហ៊ុនចិននៅម៉ាឡេស៊ីទៀតផង ។

កាលពីដើមឆ្នាំ២០២៣ ប្រទេសចិនបានប្រកាសរឹតបន្តឹងការនាំចេញលោហៈមួយចំនួន ដែលបានប្រើប្រាស់យ៉ាងទូលំទូលាយក្នុងឧស្សាហកម្ម Semiconductor ហើយត្រូវបានភាគីផ្សេងៗមើលឃើញថា វាជាវិធានការសងសឹកសម្រាប់ការដាក់កម្រិតលក់បច្ចេកវិទ្យារបស់អាមេរិកទៅឱ្យចិន ។ គេបារម្ភថា ចិននឹងដាក់កម្រិតការនាំចេញរ៉ែសំខាន់ៗផ្សេងទៀត រួមទាំងរ៉ែកម្រផងដែរ ៕ ប្រភព ៖ AEC connect

យោងតាមទិន្នន័យនៅខែឧសភា ឆ្នាំ២០២៣ របស់ World Instant Noodles Association បង្ហាញថា ចិន គឺជាប្រទេសដែលបានបរិភោគមីកញ្ចប់ច្រើនបំផុតនៅឆ្នាំ២០២២ គឺស្មើចំនួន៤៥.០៧០លានចាន ហើយវាបានកើនឡើងចំនួន១.០៨០លានចាន បើធៀបនឹងឆ្នាំ២០២១ ដែលស្មើត្រឹមតែ៤៣.៩៩០លានចាន ។ បន្ទាប់មក គឺប្រទេសឥណ្ឌូណេស៊ីបានបរិភោគមីនៅឆ្នាំ២០២២ ស្មើនឹង១៤.២៦០លានចាន ។

ប្រទេសចំនួន១០ ដែលបានបរិភោគមីច្រើនបំផុតលើពិភពលោក ប្រទេសខ្លះពាក់ព័ន្ធនឹងចំនួនពលរដ្ឋជាកត្តាសំខាន់ ហើយប្រទេសឥណ្ឌា ចិន អាមេរិក ឥណ្ឌូណេស៊ី និងប្រេស៊ីល ស្ថិតក្នុងចំណោម១០ប្រទេសដំបូង ដែលមានពលរដ្ឋច្រើនបំផុតលើពិភពលោក ។

ចំណែកប្រទេសថៃស្ថិតក្នុងលំដាប់ទី៩ ក្នុងចំណោមប្រទេសបានបរិភោគមីច្រើនបំផុតនៅឆ្នាំ២០២២ គឺស្មើចំនួន៣.៨៧០លានចាន ។ ចំនួននេះស្របនឹងទីផ្សារមីកញ្ចប់របស់ថៃនៅឆ្នាំ២០២២ ដែលមានតម្លៃប្រមាណ២ម៉ឺនលានបាត កើនឡើង១% ផ្នែកបរិមាណ និងកើនឡើងពី៦% ទៅ៧% ផ្នែកតម្លៃ បើធៀបនឹងឆ្នាំ២០២១ ។

គេរំពឹងថា ទីផ្សារមីកញ្ចប់របស់ថៃនៅឆ្នាំ២០២៣ នឹងរីកចម្រើនជាបន្តបន្ទាប់ផ្នែកតម្លៃ ។ កាលពីថ្ងៃទី២៤ ខែសីហា ឆ្នាំ២០២២ នាយកដ្ឋានពាណិជ្ជកម្មផ្ទៃក្នុងនៃក្រសួងពាណិជ្ជកម្មថៃបានអនុញ្ញាតឱ្យមីកញ្ចប់ចំនួន៣ប្រភេទ គឺម៉ាម៉ា, វ៉ៃវៃ និងយាំយាំ អាចដំឡើងថ្លៃលក់មិនលើសពី១បាតក្នុង១កញ្ចប់ ឬអាចលក់មិនលើសពី៧បាតក្នុង១កញ្ចប់ ។

ប្រទេសបរិភោគមីកញ្ចប់ច្រើនបំផុតលើពិភពលោក រួមមាន ៖
១-ចិន បរិភោគមីកញ្ចប់ចំនួន៤៥.០៧០លានចាន
២-ឥណ្ឌូណេស៊ី បរិភោគមីកញ្ចប់ចំនួន១៤.២៦០លានចាន
៣-វៀតណាម បរិភោគមីកញ្ចប់ចំនួន៨.៤៨០លានចាន
៤-ឥណ្ឌា បរិភោគមីកញ្ចប់ចំនួន៧.៥៨០លានចាន
៥-ជប៉ុន បរិភោគមីកញ្ចប់ចំនួន៥.៩៨០លានចាន
៦-អាមេរិក បរិភោគមីកញ្ចប់ចំនួន៥.១៥០លានចាន
៧-ហ្វីលីពីន បរិភោគមីកញ្ចប់ចំនួន៤.២៩០លានចាន
៨-កូរ៉េខាងត្បូង បរិភោគមីកញ្ចប់ចំនួន៣.៩៥០លានចាន
៩-ថៃ បរិភោគមីកញ្ចប់ចំនួន៣.៨៧០លានចាន
១០-ប្រេស៊ីល បរិភោគមីកញ្ចប់ចំនួន២.៨៣០លានចាន ៕

ប្រភព ៖ beartaiBRIEF