ចន សុទីម៉ា លេចធ្លោមិនធម្មតាក្នុងកម្មវិធី Miss Universe លើកទី៧២ នៅឯ El Salvador

កញ្ញា ចន សុទីម៉ា Miss Universe Cambodia 2023 ធ្វើឱ្យមានការចាប់អារម្មណ៍យ៉ាងខ្លាំងពីទស្សនិកជន អ្នករៀបចំកម្មវិធី Miss Universe ប្រទេសជិតខាងពោលសរសើរថាស្អាត ក្នុងការប្រកួតនៅឯ El Salvador។ បវរកញ្ញាចក្រវាលកម្ពុជាឆ្នាំនេះមហាជនសរសើរមិនដាច់ពីមាត់ថាមានសម្រស់ស្អាតខ្លាំងថែមទាំងលេចធ្លោមិនធម្មតា ឯកម្ពស់ទៀតសោតមិនចាញ់គេនោះទេ។

បេក្ខភាពតំណាងប្រទេសកម្ពុជាកញ្ញា ចន សុទីម៉ា កំពុងបំពេញបេសកកម្មយ៉ាងមមាញឹកក្នុងកម្មវិធី Miss Universe 2023 លើកទី៧២ ប្រកបដោយភាពទាក់ទាញមិនធម្មតា ពោលគឺ សុទីម៉ា លេងមួយចាស់ដៃបង្កព្យុះភ្លៀងក្នុងកម្មវិធីតែម្តង។ ការរៀបចំខ្លួនក្នុងរយៈពេលប៉ុន្មានថ្ងៃមកនេះ សុទីម៉ា ទទួលបានការចាប់អារម្មណ៍ខ្លាំងពីអ្នកគាំទ្រវិស័យបវរកញ្ញាជាមួយពាក្យសរសើរថា សុទីម៉ា តុបតែងខ្លួនបានស្អាត និងសមជាមួយកម្មវិធីមើលទៅគឺស្រស់ស្អាតតែម្តង។

អ្វីដែលកាន់តែចាប់អារម្មណ៍នោះ បវរកញ្ញាកម្ពុជារូបនេះបានប្រាប់អ្នកគាំទ្ររបស់ខ្លួនថាដោយសារតែនាងស្លៀកពាក់បានស្អាតត្រូវបានអ្នករៀបចំកម្មវិធី Miss Universe ហៅទៅថតនៅមុខកាមេរ៉ាតែម្តងដែលធ្វើឱ្យនាងរំភើបចិត្តជាខ្លាំង។ លើសពីនេះផងដែរ សូម្បីតែអ្នកគាំទ្រវិស័យបវរកញ្ញាជាជនជាតិថៃក៏បានពោលសរសើរសម្រស់ ចន សុទីម៉ា ថាស្រស់ស្អាតផងដែរ។ ចំពោះរូបថតមួយសន្លឹកឈរទន្ទឹមគ្នារវាងបវរកញ្ញាកម្ពុជា , វៀតណាម អូស្តា្រលី សិង្ហបុរី ឃើញថាកម្ពស់របស់ ចន សុទីម៉ា មិនចាញ់គេនោះទេ។ ជារួមអ្នកគាំទ្រ បានពោលសរសើរថា ចន សុទីម៉ា ពិតជាស័ក្តិសមណាស់ក្នុងការប្រកួតតំណាងឱ្យប្រទេសកម្ពុជាឆ្នាំនេះថែមទាំងមានភាពលេចធ្លោគួរឱ្យកត់សម្គាល់ និងសង្ឃឹមរួមទាំងជូនពរឱ្យ ចន សុទីម៉ា មានឱកាសចូលTOPនៃកម្មវិធីប្រកួត Miss Universe 2023 នេះ។

គួរបញ្ជាក់ថា វគ្គផ្តាច់ព្រ័ត្រ កម្មវិធី Miss Universe 2023 នឹងប្រព្រឹត្តទៅនៅថ្ងៃទី១៨ ខែវិច្ឆិកា ខាងមុខដែលមានបេក្ខភាពចូលរួមប្រមាណ៨៥នាក់៕