ប្រទេសថៃ ៖ វិធានការលើកលែងទិដ្ឋាការ (Free Visa) សម្រាប់ភ្ញៀវទេសចរចិន និងកាហ្សាក់ស្ថានមកកម្សាន្តនៅប្រទេសថៃ គិតចាប់ពីថ្ងៃទី២៥ ខែកញ្ញា ឆ្នាំ២០២៣ បានធ្វើឱ្យការធ្វើដំណើររបស់ភ្ញៀវទេសចរមកកាន់ប្រទេសថៃមានភាពអ៊ូអរ ជាពិសេស ភ្ញៀវទេសចរចិន ។ គេសង្កេតឃើញថា នៅចុងខែកញ្ញា ឆ្នាំ២០២៣ ភ្ញៀវទេសចរចិនបានកក់សំបុត្រយន្តហោះធ្វើដំណើរពីទីក្រុងឈឺងទូ មកកាន់កោះសាមុយពេញអស់ហើយ ដោយសារវាជាថ្ងៃបុណ្យជាតិ និងជាថ្ងៃឈប់សម្រាកយូរថ្ងៃនៅប្រទេសចិន ។ក្រុមហ៊ុនអាកាសចរណ៍ចិនលើកឡើងថា ប្រទេសចិនមានថ្ងៃឈប់សម្រាកច្រើន ទើបធ្វើឱ្យភ្ញៀវទេសចរចិននាំគ្នាមកលេងនៅប្រទេសថៃ ខណៈប្រទេសថៃប្រើវិធានការលើកលែងទិដ្ឋាការ (Free Visa) ដើម្បីទាក់ទាញភ្ញៀវទេសចរចិន ។ ទោះយ៉ាងណា ក្រុមហ៊ុនអាកាសចរណ៍ចិនរង់ចាំតាមដានស្ថានការណ៍ធ្វើដំណើររបស់ភ្ញៀវទេសចរបន្ទាប់ពីពេលនេះ ជាពិសេស នៅថ្ងៃធម្មតា បើភ្ញៀវទេសចរចិនធ្វើដំណើរមកលេងប្រទេសថៃកើនឡើង ខាងក្រុមហ៊ុននឹងត្រៀមជើងហោះហើរដើម្បីទទួលកំណើនភ្ញៀវទេសចរ ។

ទោះយ៉ាងណា ក្រុមហ៊ុនអាកាសចរណ៍ចិនបានសំណូមពរឱ្យរដ្ឋាភិបាលថៃប្រកាស និងមានវិធានការធ្វើឱ្យភ្ញៀវទេសចរចិនមានទំនុកចិត្តថា ការមកកម្សាន្តនៅប្រទេសថៃមានសុវត្ថិភាព ព្រោះកន្លងមក មានព័ត៌មានថា ជនជាតិចិនត្រូវបានគេចាប់ខ្លួន រហូតធ្វើឱ្យពួកគេភ័យខ្លាច ។ ពួកគេតែងតែសួរអំពីរឿងនេះ មុននឹងសម្រេចចិត្តធ្វើដំណើរមកកម្សាន្តនៅប្រទេសថៃ ។

គួរបញ្ជាក់ថា កោះសាមុយ គឺជាកោះមានទំហំធំលំដាប់ទី២ របស់ប្រទេសថៃ បន្ទាប់ពីកោះភូកេត ។ កោះនេះមានទីតាំងស្ថិតនៅខេត្តស៊ូរ៉ាត់ថានី ហើយកាលពីឆ្នាំ២០១៨ មានភ្ញៀវទេសចរមកកម្សាន្តនៅកោះនេះ រហូតដល់ជាង២លាននាក់ ។

កោះសាមុយមានឈ្មោះល្បីល្បាញនៅលើពិភពលោក ហើយភ្ញៀវទេសចរថៃ និងបរទេស បានដាក់ឈ្មោះកោះនេះថា «កោះឋានសួគ៌នៅកណ្តាលឈូងសមុទ្រថៃ» ដោយសារកោះនេះសម្បូរទៅដោយធនធានធម្មជាតិ, ទេសភាពស្រស់ស្អាត, ទឹកសមុទ្រថ្លា, ឆ្នេរខ្សាច់ពណ៌ស និងមានដើមដូងនៅតាមឆ្នេរសមុទ្រ ។ ក្រៅពីមានធម្មជាតិមាត់សមុទ្រដ៏ទាក់ទាញហើយ នៅមានទឹកជ្រោះត្រជាក់ស្ទើរពេញមួយឆ្នាំ ព្រមទាំងតំបន់ទេសចរណ៍បង្ហាញពីសិល្បៈវប្បធម៌របស់អ្នកស្រុក ដូចជា វត្តអារ៉ាមនានា និងចេតិយឡែមស ៕ ប្រភព ៖ Thai PBS

ប្រទេសថៃ ៖ អ្នកនាំពាក្យរដ្ឋាភិបាលថៃលើកឡើងថា លោក សេដ្ឋា ថាវីស៊ិន នាយករដ្ឋមន្ត្រីបានត្រឡប់មកដល់ប្រទេសថៃវិញហើយ ក្រោយពីលោកបានទៅចូលរួមកិច្ចប្រជុំមហាសនិ្នបាតអង្គការសហប្រជាជាតិ (United Nations General Assembly-UNGA) លើកទី៧៨ នៅទីក្រុងញូវយ៉ក សហរដ្ឋអាមេរិក ។ លោកនាយករដ្ឋមន្ត្រីទទួលបានជោគជ័យក្នុងការទាក់ទាញក្រុមហ៊ុនបច្ចេកវិទ្យាធំៗមកវិនិយោគទុននៅប្រទេសថៃ ហើយលោកក៏បានពិភាក្សាជាមួយ FIFA World Cup ដើម្បីជំរុញឱ្យប្រទេសថៃធ្វើជាម្ចាស់ផ្ទះការប្រកួតបាល់ទាត់ពិភពលោកនៅឆ្នាំ២០៣២ ។

កាលពីថ្ងៃទី២៤ ខែកញ្ញា ឆ្នាំ២០២៣ លោក សេដ្ឋា ថាវីស៊ិន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានធ្វើដំណើរមកដល់ប្រទេសថៃ ក្រោយពីលោកបានទៅចូលរួមកិច្ចប្រជុំមហាសនិ្នបាតអង្គការសហប្រជាជាតិ លើកទី៧៨ នៅទីក្រុងញូវយ៉ក សហរដ្ឋអាមេរិក ។ លោក ឆ័យ វ៉ាត់ឆារុង (Chai Watcharong) អ្នកនាំពាក្យទីស្តីការនាយករដ្ឋមន្ត្រី បានលើកឡើងពីការប្រកាសលទ្ធផលការចូលរួមកិច្ចប្រជុំរបស់លោកនាយករដ្ឋមន្ត្រី ។

លោក សេដ្ឋា ថាវីស៊ិន នាយករដ្ឋមន្ត្រីថៃ បានថ្លែងអំណរគុណដល់ក្រសួងការបរទេស និងមន្ត្រីផ្សេងៗ ដែលជួយឱ្យភារកិច្ចនេះសម្រេចបានជោគជ័យ ។ ដូច្នេះ ការប្រជុំលើកនេះ លោកបានជួបជាមួយមេដឹកនាំប្រទេសជាច្រើន ហើយលោកបានថ្លែងសុន្ទរកថាក្នុងអង្គប្រជុំចំនួន៥លើក ។

លោក សេដ្ឋា ថាវីស៊ិន បានជួបជាមួយមេដឹកនាំប្រទេសសំខាន់ៗ និងជួបនាយកគ្រប់គ្រងក្រុមហ៊ុនធំៗដូចជា Tesla, Google, Microsoft, Citibank និងក្រុមហ៊ុនជាច្រើនទៀត ហើយក្រុមហ៊ុនទាំងនេះចាប់អារម្មណ៍មកវិនិយោគនៅប្រទេសថៃ ។ ដូច្នេះ លោកនាយករដ្ឋមន្ត្រីនឹងគាំទ្រឱ្យក្រុមហ៊ុនទាំងនេះមកវិនិយោគនៅថៃកាន់តែច្រើន ហើយប្រទេសថៃបែងចែងជា២ផ្នែក គឺក្រុមហ៊ុនបច្ចេកវិទ្យា និងក្រុមហ៊ុនហិរញ្ញវត្ថុ ។ លើសពីនេះ លោកនាយករដ្ឋមន្ត្រីក៏បានពិភាក្សាជាមួយនាយកទីផ្សារមូលបត្រក្រុងញូវយ៉កដែលមានសក្តានុពលខ្លាំង ហើយលោកនឹងព្យាយាមជំរុញឱ្យឆ្នាំ២០២៣ យ៉ាងហោចណាស់ មានក្រុមហ៊ុនថៃមួយបានវិនិយោគ ។

លោកនាយករដ្ឋមន្ត្រីបានពិភាក្សាជាមួយនាយកប្រតិបត្តិ FIFA World Cup និងជជែកពីការជំរុញឱ្យប្រទេសថៃធ្វើជាម្ចាស់ផ្ទះការប្រកួតបាល់ទាត់ពិភពលោកនៅឆ្នាំ២០៣២ ឬ៩ឆ្នាំខាងមុខ ។ លើសពីនេះ លោកនាយករដ្ឋមន្ត្រីក៏បានស្នើឱ្យ FIFA World Cup ជួយគាំទ្របាត់ទាត់ប្រទេសថៃផងដែរ ដែលកាលពីមុន FIFA World Cup ធ្លាប់ឧបត្ថម្ភប្រាក់ចំនួន២៥ម៉ឺនដុល្លារអាមេរិកក្នុង១ឆ្នាំ មកស្មើនឹង២លានដុល្លារអាមេរិកក្នុង១ឆ្នាំ ។

ចុងក្រោយ លោក សេដ្ឋា ថាវីស៊ិន នាយករដ្ឋមន្ត្រី បានប្រកាសពីគោលជំហរប្រទេសថៃ ក្នុងឋានៈជាប្រទេសគោរពលទ្ធិប្រជាធិបតេយ្យ ដែលមានព្រះមហាក្សត្រជាប្រមុខ រួមទាំងលើកកម្ពស់វិស័យកសិកម្មថៃ ក៏ដូចជាឱ្យពលរដ្ឋទទួលបាននូវសេវាសុខភាពសាធារណៈកាន់តែប្រសើរ ។ ជំហ៊ានបន្ទាប់ លោកនាយករដ្ឋមន្ត្រីនឹងទៅចូលរួមកិច្ចប្រជុំ APEC នៅរដ្ឋសាន់ហ្វ្រេនស៊ីស្កូ អំពីប្រធានបទគាំទ្រការធ្វើពាណិជ្ជកម្ម ការវិនិយោគ និងការអភិវឌ្ឍសេដ្ឋកិច្ច ព្រមទាំងមានក្រុមហ៊ុនជាច្រើនចូលរួមប្រជុំផងដែរ ៕ ប្រភព ៖ Thansettakij

បរទេស៖ វេជ្ជបណ្ឌិតនៅសាកលវិទ្យាល័យ Maryland School of Medicine សហរដ្ឋអាមេរិក បានធ្វើការវះកាត់ប្តូរបេះដូងជ្រូក ចូលទៅក្នុងរាងកាយរបស់អ្នកជំងឺដែលកំពុងស្លាប់ ដើម្បីពន្យារអាយុជីវិត។ នេះគឺជាអ្នកជំងឺទីពីរក្នុងពិភពលោកដែលបានវះកាត់ដោយប្រើវិធីនេះ ហើយលទ្ធផលគឺវិជ្ជមានខ្លាំង។

យោងតាមវេជ្ជបណ្ឌិត Muhammad Mohiuddin នៅសាកលវិទ្យាល័យ Maryland School of Medicine បានឱ្យដឹងថា បុរសដែលបានវះកាត់នោះ គឺជាទាហានជើងចាស់នៃកងទ័ពជើងទឹកអាយុ ៥៨ ឆ្នាំដែលស្ទើរតែស្លាប់ដោយសារជំងឺខ្សោយបេះដូងខណៈពេលដែលបញ្ហាសុខភាពផ្សេងទៀតធ្វើឱ្យគាត់មានលក្ខណៈសម្បត្តិគ្រប់គ្រាន់សម្រាប់ការប្តូរបេះដូង។ វេជ្ជបណ្ឌិត Muhammad ក៏បានបន្តទៀតថា វាជាអារម្មណ៍ដ៏អស្ចារ្យមួយដែលបានឃើញបេះដូងជ្រូកធ្វើការនៅក្នុងខ្លួនមនុស្សដោយជោគជ័យ ហើយមនុស្សអាចនឹងរស់រានមានជីវិតឡើងវិញដូចធម្មតា។

លោក Faucette ដែលជាអ្នកជំងឺវះកាត់ បាននិយាយថា «គាត់អាចគ្រវីក្បាលបានហើយ អស្ចារ្យណាស់ នេះជារឿងមិនគួរឱ្យជឿ និងវេទមន្តខ្លាំងណាស់»។ កាលពីមុន មន្ទីរពេទ្យជាច្រើននៅ East Coast បានបដិសេធមិនផ្តល់ការប្តូរសរីរាង្គដល់គាត់ ប៉ុន្តែឥឡូវនេះគាត់អាចដកដង្ហើមបានធម្មតា និងនៅជាមួយគ្រួសាររបស់គាត់បានដូចមុន។

កាលពីឆ្នាំមុន ក្រុមវេជ្ជបណ្ឌិតមកពីសាកលវិទ្យាល័យ Maryland School of Medicine ក៏បានធ្វើការវះកាត់ប្តូរបេះដូងជ្រូកដំបូងបង្អស់របស់ពិភពលោកលើបុរសផ្សេងទៀតផងដែរ ប៉ុន្តែការវះកាត់មានប្រសិទ្ធភាពត្រឹមតែ ២ ខែប៉ុណ្ណោះ។ ទោះជាយ៉ាងណាក៏ដោយ យោងតាមវេជ្ជបណ្ឌិតបាននិយាយថា ការប្តូរបេះដូងលើកដំបូងនេះ បានធ្វើឱ្យយើងយល់កាន់តែច្បាស់អំពីការវះកាត់នេះ ហើយពួកយើងសង្ឃឹមថាលើកនេះ អព្ភូតហេតុពិតជានឹងកើតឡើង៕
ប្រភព៖cafef.com

ប្រទេសវៀតណាម ៖ លោក Vu Hong Thanh ប្រធានគណៈកម្មាធិការសេដ្ឋកិច្ចវៀតណាមបានថ្លែងក្នុងសន្និសីទសារព័ត៌មាន «2023 Vietnam Socio-Economic Forum» ថា ប្រទេសវៀតណាមមានអនាគតភ្លឺស្វាង ស្របពេលសេដ្ឋកិច្ចពិភពលោកជួបវិបត្តិ ។

នៅឆ្នាំ២០២៣ សេដ្ឋកិច្ចវៀតណាមមានស្ថេរភាព ហើយអត្រាអតិផរណាជាទូទៅស្ថិតនៅក្រោមការគ្រប់គ្រងមានត្រឹមតែ៣,១% ប៉ុណ្ណោះ ក្នុងរយៈពេល៨ខែដំបូងនៃឆ្នាំ២០២៣ ។ ចំណែកបំណុលសាធារណៈ បំណុលបរទេស និងបំណុលរដ្ឋាភិបាល ក៏វៀតណាមអាចគ្រប់គ្រងបានដែរ រួមទាំងភាពជឿជាក់មកលើប្រទេសវៀតណាម ក៏ល្អប្រសើរ ។

កាលពីឆ្នាំ២០២២ វៀតណាមគឺជាប្រទេសតែមួយគត់ក្នុងតំបន់អាស៊ីអាគ្នេយ៍ ដែល Moody’s បានចាត់ចំណាត់ថ្នាក់ថា វៀតណាមជាប្រទេសគួរឱ្យជឿជាក់ ។ ហេតុនេះ ចាត់ទុកថា វៀតណាមមានសេដ្ឋកិច្ចល្អប្រសើរ ខណៈសេដ្ឋកិច្ចពិភពលោកកំពុងធ្លាក់ចុះ ។

នៅត្រីមាសទី២ ផលិតផលក្នុងស្រុករបស់វៀតណាម (GDP) បានកើនឡើង៤,១៤% និងខ្ពស់ជាងត្រីមាសទី១ ដែលស្មើត្រឹមតែ៣,២៨% ប៉ុណ្ណោះ ។ ចំណែកការបង្កើតអាជីវកម្មថ្មី ស្មើជាង១៤.០០០កន្លែងកាលពីខែសីហា ឆ្នាំ២០២៣ កើនឡើង១៨% បើធៀបពីមួយឆ្នាំទៅមួយឆ្នាំ ។ ចាប់ពីដើមឆ្នាំ២០២៣ រហូតដល់ខែសីហា ឆ្នាំ២០២៣ មានអាជីវកម្មបង្កើតថ្មីសរុបចំនួន១០៣.៧០០កន្លែង កើនឡើង២,៣% ខណៈការលក់រាយសរុបសម្រាប់ទំនិញ និងសេវាកម្ម កើនឡើង៧,៦% នៅខែសីហា ។

ក្រសួងផែនការ និងវិនិយោគបង្ហាញថា សេដ្ឋកិច្ចវៀតណាមកំពុងងើបឡើងវិញ បើទោះជារយៈពេលខ្លីនេះពុំទាន់ឃើញការផ្លាស់ប្តូរឆាប់រហ័សក្តី ។ ក្រៅពីនេះ សេដ្ឋកិច្ចវៀតណាមកំពុងប្រឈមនឹងបញ្ហាមួយចំនួនដូចជា ការវិនិយោគ និងពាណិជ្ជកម្មធ្លាក់ចុះ ហើយវៀតណាមចាំបាច់ត្រូវតែដោះស្រាយបញ្ហានេះ រួមទាំងការពិបាកទទួលបានប្រាក់កម្ចី ។

ចំណែកអនុប្រធានគណៈកម្មាធិការសេដ្ឋកិច្ចវៀតណាមឈ្មោះ Nguyen Duc Hien លើកឡើងថា ប្រទេសវៀតណាមមិនអាចសម្រេចគោលដៅសេដ្ឋកិច្ចមួយចំនួនបានទេ នៅឆ្នាំ២០២៣ ដូចជា ផលិតភាពការងារ ។ ហេតុនេះ ក្នុងរយៈពេលវែង វៀតណាមត្រូវជំរុញផលិតភាពការងារជាចម្បង ៕ ប្រភព ៖ AEC connect

បរទេស៖ រូបសំណាកព្រះពុទ្ធបដិមាសំរិទ្ធជប៉ុន ដែលស្ថិតនៅសារមន្ទីក្នុងរដ្ឋកាលីហ្វ័រញ៉ាសហរដ្ឋអាមេរិក ទម្ងន់ ១១៣ គីឡូក្រាម និងមានតម្លៃ ១,៥ លានដុល្លារ ត្រូវបានគេលួចយកភ្លាមៗក្នុងរយៈពេលមិនដល់ ២៥ នាទី។
យោងតាមគេហទំព័រ Tribune News Service បានឱ្យដឹងថា ហេតុការណ៍នេះកើតឡើងនៅម៉ោងប្រហែល ៣ ទៀបភ្លឺនាថ្ងៃទី ១៨ ខែកញ្ញា នៅឯសាលតាំងបង្ហាញ Barakat លើវិថី La Cienega ទីក្រុង Los Angeles រដ្ឋកាលីហ្វ័រញ៉ា សហរដ្ឋអាមេរិក។ គិតត្រឹមថ្ងៃទី២៤ ខែកញ្ញា អត្តសញ្ញាណ និងមូលហេតុរបស់ចោរ នៅមិនទាន់រកឃើញនៅឡើយទេ។

យោងតាមសារមន្ទី រូបសំណាកដែលចោរលួចនោះ គឺជាព្រះពុទ្ធបដិមាគង់ មានព្រះសិរសាលើក្បាល កំពស់ប្រហែល ១២១ សង់ទីម៉ែត្រ។ រូបសំណាកនេះត្រូវបានគេបោះចោលក្នុងសម័យអេដូក្នុងប្រទេសជប៉ុន (១៦០៣-១៨៦៧) ហើយប្រហែលជាត្រូវបានបូជានៅក្នុងប្រាសាទមួយ។ បន្ទាប់មក រូបសំណាកនេះក៏ត្រូវបានទិញដោយលោក Fayez Barakat កាលពី ៥៥ ឆ្នាំមុន ហើយត្រូវបានរក្សាទុកនៅក្នុងទីធ្លាខាងក្រោយអស់រយៈពេលជាច្រើនឆ្នាំ។

ខណៈពេលដែលប៉ូលីស Los Angeles កំពុងស៊ើបអង្កេត បុគ្គលិកសារមន្ទីបានពិនិត្យមើលកាមេរាសុវត្ថិភាព ដោយសង្កេតឃើញថា ចោរបានទៅលេងសារមន្ទីនេះច្រើនដងហើយ ដែលមុខរបស់ចោរមិនត្រូវបានឃើញនោះទេ ដោយសារគាត់ពាក់ម៉ាស និងពាក់អាវមានមួកបាំងមុខ។ ចោរបានចតឡាននៅផ្លូវចូលបន្ទប់តាំងបង្ហាញ យករទេះមកវាយបំបែកផ្នែកខាងក្រោមនៃទ្វារបន្ទាប់មកចូលទៅក្នុងឃ្លាំង។ ក្នុងឃ្លាំងមានរូបសំណាក់ជាច្រើន ប៉ុន្តែគោលដៅរបស់ចោរគឺរូបសំណាកព្រះពុទ្ធដ៏ធ្ងន់ដែលមានតម្លៃរហូតដល់ ១,៥ លានដុល្លារ ដែលដំណើរការទាំងមូលនេះចំណាយពេលតិចជាង ២៥ នាទី។

លោក Paul Henderson នាយកសារមន្ទី បាននិយាយថា នេះគឺជាបេសកកម្មដែលបានគិតទុកជាមុន។ លោកក៏បានបន្តទៀតថា រូបសំណាកព្រះពុទ្ធបដិមាសំរិទ្ធគឺជាកំណប់ដ៏កម្ររបស់ប្រវត្តិសាស្ត្រ ទោះជាយ៉ាងណាក៏ដោយ យើងនឹងខិតខំស្វែងរកតម្រុយបន្ថែមទៀត។ ដូច្នេះហើយ បច្ចុប្បន្នប៉ូលីសកំពុងស្វែងរកវីដេអូតាមដានបន្ថែមទៀតពីអាជីវកម្មជិតខាង ហើយគ្រោងនឹងប្រមូលភស្តុតាងបន្ថែមទៀតពីកន្លែងកើតហេតុនៅសប្តាហ៍ក្រោយ នេះបើយោងតាម KTLA៕
ប្រភព៖cafef.com

ប្រទេសឡាវ ៖ ប្រទេសថៃ និងឡាវបានប្រជុំពិភាក្សាគ្នាអំពីវិធានការទាក់ទាញភ្ញៀវទេសចរបរទេស តាមរយៈការតភ្ជាប់ផ្លូវទេសចរណ៍ និងពន្លឿនការសាងសង់ស្ពានមិត្តភាពថៃ-ឡាវ ទី២ នៅស្រុកប៉ាកឈុំ ខេត្តឡឺយ ។ វិធានការលើកលែងទិដ្ឋាការ (Free Visa) សម្រាប់ភ្ញៀវទេសចរចិន និងកាហ្សាក់ស្ថានមកកាន់ប្រទេសថៃ ក៏ធ្វើឱ្យប្រទេសឡាវទទួលបានផលប្រយោជន៍ផងដែរ ។

លោក ថាវី សឺមភក្តីគុណ (Thawee Sermphakdhikul) អភិបាលខេត្តឡឺយ ព្រមទាំងមន្ត្រីរដ្ឋាភិបាលផ្សេងទៀតបានប្រជុំជាមួយអភិបាលក្រុងវៀងចន្ទន៍ លោក ខាំផែន ស៊ីធីដាំផា (Khamphan Sithidampha) នៅប្រទេសឡាវ ពាក់ព័ន្ធនឹងបញ្ហាសន្តិសុខនៅតាមព្រំដែនថៃ-ឡាវ រវាងខេត្តឡឺយ និងក្រុងវៀងចន្ទន៍ ។ ភាគីទាំងពីរបានពិភាក្សាគ្នាក្រោមប្រធានបទផ្សព្វផ្សាយពីវិស័យទេសចរណ៍ ការផ្លាស់ប្តូរវប្បធម៌ និងកិច្ចសហការផ្នែកសេដ្ឋកិច្ច សង្គម និងសន្តិសុខ ។

ក្រោយពីរដ្ឋាភិបាលថៃសម្រេចចិត្តអនុម័តវិធានការលើកលែងទិដ្ឋាការ (Free Visa) សម្រាប់ទាក់ទាញភ្ញៀវទេសចរចិន និងកាហ្សាក់ស្ថាន ប្រទេសឡាវក៏បានរៀបចំគម្រោងអភិវឌ្ឍន៍តំបន់ព្រំដែនរបស់ទីក្រុងម៉ឺន និងទីក្រុងវៀងចន្ទន៍ ។ ការអភិវឌ្ឍនៅតំបន់ព្រំដែននេះ ក្នុងគោលបំណងទទួលភ្ញៀវទេសចរធ្វើដំណើរមកកាន់ប្រទេសឡាវជាបន្តបន្ទាប់ ដោយសារវិធានការលើកលែងទិដ្ឋាការរបស់ថៃ ។

លោក ថាវី សឺមភក្តីគុណ លើកឡើងថា ទីក្រុងម៉ឺនស្ថិតនៅមិនឆ្ងាយពីស្រុកប៉ាកឈុំប៉ុន្មានទេ ។ ដូច្នេះ វាអាចក្លាយជាច្រកតភ្ជាប់តំបន់ទេសចរណ៍ល្បីៗនៅខេត្តឡឺយ និងទីក្រុងវៀងចន្ទន៍ ដូចជា តំបន់ទេសចរណ៍ចាប់ពីស្រុកឈៀងខាន់-ស្រុកប៉ាកឈុំ ខេត្តឡឺយ រហូតដល់ទីក្រុងវ៉ាងវៀង-ទីក្រុងហ្វឿង ប្រទេសឡាវ ។ លោកបន្តថា ប្រទេសឡាវមានច្រកឆ្លងកាត់ព្រំដែនប៉ុណ្ណោះអាសន្នប៉ុណ្ណោះនៅបរិវេណព្រំដែន ហើយរដ្ឋាភិបាលថៃនឹងសុំកិច្ចសហការពីប្រទេសឡាវ ដើម្បីឱ្យច្រកឆ្លងកាត់ព្រំដែនបណ្តោះអាសន្ននេះក្លាយជាច្រកព្រំដែនជាផ្លូវការនៅចុងឆ្នាំ២០២៣ ។

ក្រៅពីនេះ ខេត្តឡឺយក៏មានគម្រោងសាងសង់ស្ពានមិត្តភាពថៃ-ឡាវ ទី២ នៅស្រុកប៉ាកឈុំ ខេត្តឡឺយផងដែរ ដើម្បីជួយជំរុញវិស័យទេសចរណ៍ ពាណិជ្ជកម្ម ការវិនិយោគ និងផ្នែក Logistics ។ ចំណែកស្ពានមិត្តភាពថៃ-ឡាវ ទី១ ស្ថិតនៅខេត្តឡឺយ គឺបានតភ្ជាប់រវាងស្រុកថាលី និងទីក្រុងគែនថាវ ប្រទេសឡាវ ៕ ប្រភព ៖ AEC connect