ភ្នំពេញ៖ កាលពីថ្ងៃសុក្រទី១០ខែវិច្ឆិកានេះ តាមការលើកឡើងរបស់មន្ត្រីជាន់ខ្ពស់ និងអ្នកជំនាញនៃកម្ពុជាបាននិយាយថា ពាណិជ្ជកម្មកម្ពុជា-ចិន នៅតែមានសភាពរឹងមាំ ស្របពេលដែលសេដ្ឋកិច្ចពិភពលោកកំពុងធ្លាក់ចុះ ដោយសារកាលពីពេលកន្លងទៅនេះ កម្ពុជានិងចិនបានចុះកិច្ចព្រមព្រៀង២ជាមួយគ្នា គឺកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ Regional Comprehensive Economic Partnership និងកិច្ចព្រមព្រៀងពាណិជ្ជកម្មសេរីកម្ពុជា-ចិន Cambodia-China Free Trade Agreement។

បើតាមតួលេខចេញផ្សាយដោយអគ្គនាយកដ្ឋានគយនិងរដ្ឋាករកម្ពុជា បានឲ្យដឹងថា ពាណិជ្ជកម្មទំនិញរវាងកម្ពុជានិងចិនបានកើនឡើងដល់១០ពាន់លានដុល្លារក្នុងរយៈពេល១០ខែដំបូងនៃឆ្នាំ២០២៣ កើនឡើង៤,៦ភាគរយពីមួយឆ្នាំទៅមួយឆ្នាំ។ រីឯ ទំហំពាណិជ្ជកម្មអន្តរជាតិសរុបរបស់កម្ពុជាវិញ មានតម្លៃ 38.66 ពាន់លានដុល្លារក្នុងរយៈពេល 10 ខែដំបូងនៃឆ្នាំនេះ បានធ្លាក់ចុះ 3.1ភាគរយពី 39.9 ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ តាមរបាយការណ៍ក៏បានបញ្ជាក់ទៀតថា ប្រទេសចិននៅតែជាដៃគូពាណិជ្ជកម្មធំជាងគេរបស់កម្ពុជា បន្ទាប់ពីសហរដ្ឋអាមេរិក វៀតណាម ថៃ និងជប៉ុន។

លោក ប៉ែន សុវិជាតិ រដ្ឋលេខាធិការនិងជាអ្នកនាំពាក្យក្រសួងពាណិជ្ជកម្មកម្ពុជា បានមានប្រសាសន៍ថា តាមរយៈកិច្ចព្រមព្រៀងនៃប្រទេសយើងទាំង២ បានផ្តល់ការជំរុញដល់កំណើនពាណិជ្ជកម្មយ៉ាងពិតប្រាកដ។ លោកបានបន្តថា ជាមួយនឹងកិច្ចព្រមព្រៀងពាណិជ្ជកម្មសេរីកម្ពុជា-ចិននេះ ធ្វើឲ្យការនាំចេញផលិតផលដែលផលិតនៅកម្ពុជាទៅកាន់ប្រទេសចិន ដែលទទួលបាននូវពន្ធអនុគ្រោះជាច្រើន។ លោកក៏បានបន្តថា ប្រទេសចិនគឺជាទីផ្សារដ៏ធំមួយរបស់ប្រទេសកម្ពុជា ជាពិសេសសម្រាប់ការនាំចេញផលិតផលកសិកម្មដ៏មានសក្តានុពលរបស់កម្ពុជា ដូចជា អង្ករ ចេកលឿង ស្វាយ វែង និងម្រេច ជាដើម។

រីឯលោក គិន ភា អគ្គនាយកវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា បានយល់ស្របដែរថា តាមរយៈកិច្ចព្រមព្រៀងទាំង២ខាងលើ បានធ្វើឲ្យមានសន្ទុះយ៉ាងខ្លាំងរវាងពាណិជ្ជកម្មកម្ពុជា-ចិន បើទោះបីជាមានភាពមិនប្រាកដប្រជានិងមានការធ្លាក់ចុះនៃសេដ្ឋកិច្ចសកលក៏ដោយ ។ ទាំងនេះវាបានសបញ្ចាក់ឲ្យឃើញពីភាពល្អប្រសើរនៃកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងកម្ពុជា និងចិន ខណៈកំពុងមានការបើកទីផ្សារថ្មីសម្រាប់ផលិតផលកម្ពុជាទៅកាន់ប្រទេសចិនផងដែរ។ លោកបានបន្ថែមថា តាមរយៈគម្រោង «គំនិតផ្តួចផ្តើមខ្សែក្រវាត់ និងផ្លូវ» (BRI) របស់ចិន ដែលបានសម្រេចជោគជ័យនៅកម្ពុជារួចរាល់ហើយដែរ គឺតំបន់សេដ្ឋកិច្ចពិសេសក្រុងព្រះសីហនុ និងផ្លូវល្បឿនលឿនភ្នំពេញ-ព្រះសីហនុ បានជំរុញកំណើនពាណិជ្ជកម្មរបស់កម្ពុជាជាមួយប្រទេសចិន និងពិភពលោកទាំងមូលផងដែរ។

លោកសំ សឿន អ្នកវិភាគគោលនយោបាយនៃរាជបណ្ឌិត្យសភាកម្ពុជា មានប្រសាសន៍ថា គំនិតផ្តួចផ្តើមខ្សែក្រវាត់ និងផ្លូវ របស់ចិននេះ បានដើរតួនាទីយ៉ាងសំខាន់ក្នុងការពង្រឹងទំនាក់ទំនងពាណិជ្ជកម្មរវាងចិន និងកម្ពុជា។ ម៉្យាងវិញទៀត តាមកិច្ចព្រមព្រៀងជាដៃគូរសេដ្ឋកិច្ចនៅក្នុងតំបន់ បានធ្វើឱ្យប្រសើរឡើងនូវហេដ្ឋារចនាសម្ព័ន្ធ និងសមត្ថភាពភ័ស្តុភារ ដែលនាំកម្ពុជាបានក្លាយជាគោលដៅទាក់ទាញសម្រាប់វិនិយោគិនអន្តរជាតិ និងធុរកិច្ច ដែលកំពុងស្វែងរកពង្រីកវត្តមានរបស់ពួកគេនៅក្នុងតំបន់។ ការកើនឡើងទំហំពាណិជ្ជកម្មទ្វេភាគីបានធ្វើឱ្យសេដ្ឋកិច្ចចម្រុះមានកាន់តែច្រើននៅកម្ពុជា និងបានជួយកម្ពុជាក្នុងការអភិវឌ្ឍវិស័យថាមពល ទូរគមនាគមន៍ ហិរញ្ញវត្ថុ ភស្តុភារ ទេសចរណ៍ និងកសិកម្មផងដែរ៕ Xinhua

បរទេស៖ ប្រទេសចិននឹងចាប់ផ្តើមសាងសង់បន្ទប់ពិសោធន៍សម្រាប់ធ្វើការស្រាវជ្រាវទឹកសមុទ្រជ្រៅរលកខ្យល់ខ្នាតធំដំបូងគេរបស់ពិភពលោកដែលមានទទឹង ១៦,០០០ ម៉ែត្រការ៉េ ដោយរំពឹងថានឹងបញ្ចប់នៅចុងឆ្នាំ ២០២៦។
យោងតាមប្រភពព័ត៌មាន China Daily ដែលបានចុះផ្សាយនៅថ្ងៃទី១០ ខែវិច្ឆិកាថា មន្ទីរពិសោធន៍ទឹកជ្រៅរលកខ្យល់ទ្រង់ទ្រាយធំបានចាប់ផ្តើមសាងសង់នៅទីក្រុងឆ្នេរសមុទ្រ Dalian ខេត្ត Liaoning ភាគឦសានប្រទេសចិន។ គម្រោងនេះមានផ្ទៃដីសរុប ១៦,០០០ ម៉ែត្រការ៉េ និងជាន់ផ្ទាល់ដី ៨,១០០ ម៉ែត្រការ៉េ ដោយរំពឹងថានឹងបញ្ចប់នៅចុងឆ្នាំ ២០២៦។

លោក Lyu Lin អនុប្រធានសាលាវិស្វកម្មហេដ្ឋារចនាសម្ព័ន្ធ នៃសាកលវិទ្យាល័យបច្ចេកវិទ្យា Dalian បាននិយាយថា គ្រឿងបរិក្ខារ និងជាកត្តាសំខាន់ដែលត្រូវតែយកមកពិចារណាក្នុងការរចនា និងប្រតិបត្តិការនៃវិស្វកម្មនៅឈូងសមុទ្រ។

មន្ទីរពិសោធន៍នេះក៏នឹងផ្តល់នូវលក្ខខណ្ឌស្រាវជ្រាវ ក៏ដូចជាអភិវឌ្ឍន៍លំដាប់ទីមួយ រួមជាមួយសេវាកម្មបច្ចេកទេសគុណភាពខ្ពស់សម្រាប់តម្រូវការជាតិសំខាន់ៗ ដូចជាការអភិវឌ្ឍន៍ធនធានប្រេង និងឧស្ម័ននៅសមុទ្រជ្រៅ ការប្រើប្រាស់ថាមពលកកើតឡើងវិញនៅឈូងសមុទ្រ និងការសាងសង់ស្ពានឆ្លងកាត់សមុទ្រធំៗ ហេដ្ឋារចនាសម្ព័ន្ធដឹកជញ្ជូនជាដើម។

ទោះជាយ៉ាងណា ការអភិវឌ្ឍន៍ធនធានប្រេង និងឧស្ម័ននៅសមុទ្រជ្រៅក៏ជាតម្រូវការដ៏សំខាន់មួយរបស់ប្រទេសផងដែរ។ កាលពីខែឧសភា សាជីវកម្មប្រេងឈូងសមុទ្រជាតិចិន (CNOOC) បានប្រកាសថា ខ្លួនបានបញ្ចប់ការដំឡើងផ្នែកអណ្តែតទឹកនៃកន្លែងខួងអណ្តូងប្រេង ១៥,០០០ តោន ដែលនេះជាកន្លែងខួងយកប្រេងធំបំផុតរបស់ចិន ដោយមានប្រវែង ៩៥ ម៉ែត្រ និងទទឹង ៤០ ម៉ែត្រ ផ្ទៃរបស់ Rig គឺស្មើនឹងទីលានបាល់បោះចំនួន ៩៕

បរទេស៖ ការប្រើប្រាស់ក្នុងស្រុកមានកម្រិតអន់ ដូច្នេះទើបក្រុមហ៊ុននាំចេញរថយន្តអគ្គិសនី និងបន្ទះសូឡារបស់ចិនព្យាយាមកាត់បន្ថយតម្លៃ ខណៈដែលលោកខាងលិចកំពុងព្រួយបារម្ភថាអាជីវកម្មក្នុងស្រុករបស់ពួកគេនឹងពិបាកក្នុងការប្រកួតប្រជែង។

ថ្មីៗនេះ សហរដ្ឋអាមេរិកបានដាក់ពន្ធលើបន្ទះសំណប៉ាហាំងដែលនាំចូលពីប្រទេសចិន និងប្រទេសផ្សេងៗទៀត បន្ទាប់ពីបានកំណត់ថាក្រុមហ៊ុនផលិតដែកទាំងនោះបានលក់ឱ្យពួកគេក្នុងតម្លៃទាប។ ទន្ទឹមនឹងនេះ កាលពីខែកញ្ញាសហភាពអឺរ៉ុបបានប្រកាសពីការស៊ើបអង្កេតប្រឆាំងនឹងការឧបត្ថម្ភធន ដោយសារការព្រួយបារម្ភថាប្រទេសចិនកំពុងបញ្ចុះតម្លៃរថយន្តអគ្គិសនីដែលមានតំលៃថោក។

ជាការឆ្លើយតប មន្ត្រីចិនបាននិយាយថា ក្រុមហ៊ុនផលិតរបស់ប្រទេសកំពុងប្រកួតប្រជែងដោយស្មើភាព ហើយផលិតផលរបស់ពួកគេកំពុងទទួលបានចំណែកទីផ្សារនៅបរទេស ដោយសារតែពួកគេមានភាពទាក់ទាញសម្រាប់អ្នកទិញ។ ដូច្នេះ ទីក្រុងប៉េកាំងបានថ្កោលទោសការស៊ើបអង្កេតរថយន្តអគ្គិសនីរបស់សហភាពអឺរ៉ុបថាជា “ទង្វើការពារដោយឥតលាក់លៀម” ដែលនឹងរំខានដល់ខ្សែសង្វាក់ផ្គត់ផ្គង់រថយន្តពិភពលោក។ទោះជាយ៉ាងណា បច្ចុប្បន្នដ្ឋាភិបាលក្នុងតំបន់នៃប្រទេសចិនបានឧបត្ថម្ភធនដល់អាជីវកម្មដើម្បីលើកកម្ពស់ពាណិជ្ជកម្មបរទេស រួមទាំងការរៀបចំជើងហោះហើរធម្មនុញ្ញផងដែរ។ ពួកគេក៏បានអំពាវនាវឱ្យធនាគារផ្តល់ប្រាក់កម្ចីដល់ក្រុមហ៊ុនដែលចង់ពង្រីកប្រតិបត្តិការនៅក្នុងប្រទេសដែលចូលរួមក្នុងកម្មវិធីខ្សែក្រវ៉ាត់ និងផ្លូវ។

កន្លងទៅ កាលពីខែកញ្ញាក្រុមហ៊ុនផលិតថាមពលពន្លឺព្រះអាទិត្យនៅអឺរ៉ុបបានផ្ញើលិខិតមួយច្បាប់ទៅកាន់អាជ្ញាធរសហភាពអឺរ៉ុប ដោយអំពាវនាវឱ្យជួយសម្អាតសារពើភ័ណ្ឌដើម្បីទប់ស្កាត់រលកនៃការក្ស័យធនដែលបណ្តាលមកពីការធ្លាក់ចុះនៃតម្រូវការ និងការប្រកួតប្រជែងរបស់ចិនកាន់តែខ្លាំងក្លា។ អ្នកនាំពាក្យសហភាពអឺរ៉ុបបាននិយាយថា ភ្នាក់ងារនិយតកម្មកំពុងតាមដានយ៉ាងដិតដល់ ប៉ុន្តែមិនទាន់ធ្វើការសម្រេចចិត្តនៅឡើយ។

ទោះជាយ៉ាងណាក៏ដោយ ទំនិញអតិរេករបស់ចិននៅតែមានចំណុចវិជ្ជមាន រួមទាំងសក្តានុពលក្នុងការជួយកាត់បន្ថយអតិផរណាផងដែរ។ បច្ចុប្បន្នទំនិញចិនអតិរេកជាច្រើនកំពុងត្រូវបានស្វែងរកយ៉ាងអន្ទះសារ ដោយរថយន្តអគ្គិសនី អាគុយ និងបន្ទះស្រូបពន្លឺព្រះអាទិត្យដែលមានតម្លៃថោកពីប្រទេសចិន អាចជួយសហរដ្ឋអាមេរិក និងប្រទេសផ្សេងទៀតសម្រេចបាននូវគោលដៅកាត់បន្ថយឧស្ម័នផ្ទះកញ្ចក់៕

ប្រទេសចិន ៖ កសិកររស់នៅតំបន់ Jiangxi ប្រទេសចិន បានអភិរក្សបច្ចេកទេសផលិតតែបែបប្រពៃណីឈ្មោះ «Gougunao» ដែលមានអាយុកាលរាប់សតវត្សមកហើយ និងបន្សល់ទុកអស់៨ជំនាន់ផងដែរ ។ ការផលិតតែតាមបច្ចេកទេសនេះឃើញថា វាមានគុណភាពល្អ និងអាចឆ្លើយតបចំពោះតម្រូវការអតិថិជន ។

លោក Liang Huaping អ្នកផលិតតែតាមបច្ចេកទេសបុរាណឱ្យដឹងថា លោកបានចាប់ផ្តើមរៀនសូត្រពីវិធីបេះស្លឹកតែ តាំងពីលោកមានអាយុ១២ឆ្នាំ និងរៀនឆុងទឹកតែពេលលោកអាយុ១៨ឆ្នាំ ។ ចំពោះការជ្រើសរើសស្លឹកតែ គឺត្រូវល្អិតល្អន់បន្តិច យើងត្រូវយកស្លឹកណាដែលគ្មានដង្កូវស៊ី ឬសត្វល្អិតបំផ្លាញ ។ ម្យ៉ាងទៀត យើងមិនត្រូវបេះស្លឹកតែនៅថ្ងៃណាមានភ្លៀងធ្លាក់ ឬថ្ងៃក្តៅខ្លាំងទេ ហើយត្រូវជ្រើសយកស្លឹកណាល្អជាងគេជាង៦ម៉ឺនសន្លឹក ដើម្បីទទួលបានតែស្ងួតចំនួន៥០០ក្រាម ។

តំបន់ Jiangxi គឺជាកន្លែងផលិតតែបៃតងដ៏សំខាន់របស់ប្រទេសចិន ហើយតំបន់នេះក៏ជាកន្លែងដាំដុះតែជាច្រើនប្រភេទដ៏ល្បីល្បាញផងដែរ ។ ចំណែកតែប្រភេទ Gougunao ត្រូវឆ្លងកាត់ដំណាក់កាលហាលឱ្យស្ងួត ចាប់ពី៣ឆ្នាំ រហូតដល់៥ឆ្នាំឯណោះ ។ ក្រោយហាលតែស្ងួតហើយ ត្រូវឆ្លងកាត់ដំណាក់កាលផលិតចំនួន៨ ទៀត ។

លោក Liang Huaping និយាយថា លោកត្រូវទុកដាក់ស្លឹកតែទាំងនេះនៅទីកន្លែងស្ងួត, មានខ្យល់ចេញ-ចូលល្អ និងមិនចង្អៀតខ្លាំងពេក ។ សីតុណ្ហភាពក្នុងឧបករណ៍សម្រាប់ដាក់ស្លឹកតែ គួរស្មើប្រមាណ៣៦០អង្សារសេ ព្រោះបើសីតុណ្ហភាពខ្ពស់ពេកអាចធ្វើឱ្យស្លឹកតែស្ងួត ហើយបើសីតុណ្ហភាពទាបខ្លាំងពេកអាចធ្វើឱ្យស្លឹកតែគ្មានរសជាតិតាមតម្រូវការអតិថិជន ។ ចំណុចសំខាន់បំផុត ត្រូវគ្រប់គ្រងសីតុណ្ហភាពស្លឹកតែ រហូតដល់ប្រាកដចិត្តថា ស្លឹកតែបានឆ្លងកាត់ដំណាក់កាលត្រួតពិនិត្យគ្រប់លក្ខខណ្ឌ និងល្អិតល្អន់ ហើយប្រយ័ត្នមិនឱ្យវាមានសំណើម ។

ចំណែកការវាយតម្លៃគុណភាពរបស់តែ «Gougunao» នឹងធ្វើឡើងផ្អែកតាមកត្តាសំខាន់ៗចំនួន៤ ដូចជា ៖ ពណ៌, ក្លិន, រសជាតិ និងរូបរាង ។ ហេតុនេះ ស្លឹកតែ ត្រូវមានក្លិនក្រអូប និងរសជាតិផ្អែមបន្តិច ។ មរតកដ៏មានតម្លៃរបស់ស្លឹកតែ នៅតំបន់ Jiangxi បានកើតឡើងកាលពីជាង២.០០០ឆ្នាំមុន និងបន្តមកដល់សម័យរាជវង្សឈីន ៕ ប្រភព ៖ China face

ប្រទេសជប៉ុន ៖ កាលពីដើមខែវិច្ឆិកា ឆ្នាំ២០២៣ ការិយាល័យឧតុនិយមជប៉ុនរាយការណ៍ថា មានកោះថ្មីមួយទៀតបានផុសឡើងចេញពីសមុទ្រនៅបរិវេណឆ្នេរសមុទ្រនៃកោះ Iwo Jima របស់ប្រទេសជប៉ុន ។ កោះថ្មីដែលមិនទាន់មានឈ្មោះនេះ បានកើតឡើងដោយសារការផ្ទុះភ្នំភ្លើងនៅបាតសមុទ្រ ។

កោះផុសចេញពីទឹកសមុទ្រនេះ ត្រូវបានថតដោយកងកម្លាំងស្វ័យការពារដែនសមុទ្ររបស់ជប៉ុន កាលពីថ្ងៃទី១ ខែវិច្ឆិកា ឆ្នាំ២០២៣ ។ ក្នុងរូបភាពនេះបានបង្ហាញពីការផ្ទុះភ្នំភ្លើងនៅបាតសមុទ្រ និងបន្សល់ទុកនូវផេះពណ៌ខ្មៅនៅលើកោះ ។

បច្ចុប្បន្ន កោះថ្មីត្រូវបានរាប់ជាកោះមួយក្នុងចំណោមប្រជុំកោះ Ogasawara ។ ការិយាល័យឧតុនិយមជប៉ុនបានកត់ត្រាការផ្ទុះភ្នំភ្លើងនៅក្នុងតំបន់នេះតាំងពីឆ្នាំ២០២២ មកម៉្លេះ ប៉ុន្តែវិទ្យាស្ថានស្រាវជ្រាវគ្រោះរញ្ជួយដីប្រចាំសាកលវិទ្យាល័យតូក្យូបញ្ជាក់ថា ការផ្ទុះភ្នំភ្លើងរហូតកើតជាកោះ ទើបតែកើតឡើងកាលពីថ្ងៃទី៣០ ខែតុលា ឆ្នាំ២០២៣ ។

ចំណែកអ្នកជំនាញនិយាយថា កោះនេះប្រហែលជានៅមិនយូរទេ ។ លោក Usui Yuji អ្នកវិភាគផ្នែកភ្នំភ្លើងរបស់ការិយាល័យឧតុនិយមជប៉ុនឱ្យដឹងថា ការផ្ទុះភ្នំភ្លើងនៅបរិវេណនេះបានធ្លាក់ចុះ ហើយកោះទើបតែកើតនេះ ក៏បានស្រុតចុះបន្តិចផងដែរ ដោយសារផ្ទាំងថ្មបានបាក់ជាកំណាត់ៗ ហើយវាអាចអណ្តែតដោយងាយ ។

លោក Usui Yuji អ្នកវិភាគផ្នែកភ្នំភ្លើងបន្តថា កោះថ្មីនេះនឹងអាចនៅបានយូរ ប្រសិនបើវាកើតពីកំអែលភ្នំភ្លើង ឬអ្វីមួយដែលរឹងមាំជាងថ្មភ្នំភ្លើង ។ យើងគ្រាន់តែចង់អភិវឌ្ឍន៍វា ប៉ុន្តែកោះនេះអាចនៅមិនបានយូរទេ វានឹងបាត់ទៅវិញហើយ ។

នៅប្រទេសជប៉ុនធ្លាប់មានហេតុការណ៍ផ្ទុះភ្នំភ្លើងនៅបាតសមុទ្រ និងគ្រោះរញ្ជួយដី ហើយបង្កើតបានជាកោះថ្មីៗ ។ ជាក់ស្តែង កាលពីឆ្នាំ២០១៣ ការផ្ទុះភ្នំភ្លើងនៅ Nishinoshima ក្នុងមហាសមុទ្រប៉ាស៊ីហ្វិកភាគខាងត្បូងទីក្រុងតូក្យូ បានបង្កើតជាកោះថ្មី ហើយកោះថ្មីនេះបានពង្រីកខ្លួនជាបន្តបន្ទាប់ ។ ចំណែកនៅប្រទេសប៉ាគីស្ថាន ក៏មានកោះតូចៗផុសឡើងពីបាតសមុទ្រផងដែរ ក្រោយពីកើតគ្រោះរញ្ជួយដីកម្រិត៧.៧វ៉ិចទ័រនៅឆ្នាំដដែល ៕ ប្រភព ៖ pptvhd

បរទេស៖ ក្រុមហ៊ុន Samsung អាចនឹងបង្ហាញ Samsung Gauss ដែលជាម៉ូដែលបង្កើតដោយ AI ជាមួយនឹងមុខងារឆ្លាតវៃជាច្រើន ដែលរំពឹងថានឹងត្រូវបានដាក់បញ្ចូលទៅក្នុងឧបករណ៍របស់ក្រុមហ៊ុននាពេលខាងមុខនេះ។
យោងតាមគេហទំព័រ CNBC ដែលបានចុះផ្សាយនៅថ្ងៃទី៩ ខែវិច្ឆិកាថា ម៉ូដែល AI Samsung Gauss គឺជាបណ្តុំនៃ AI ជំនាន់ថ្មី ដែលបម្រើសម្រាប់គោលបំណងផ្សេងៗ។ ជាពិសេស Gauss Language គឺជាគំរូភាសាសំយោគដែលអាចសរសេរអ៊ីមែល និងបកប្រែខ្លឹមសារណាមួយ ក៏ដូចជាអនុញ្ញាតឱ្យការគ្រប់គ្រងឧបករណ៍ឆ្លាតវៃដើម្បីកែលម្អបទពិសោធន៍អ្នកប្រើប្រាស់។ Gauss ក៏អាចបង្កើត កែសម្រួល និងអាប់ដេតរូបភាពបានយ៉ាងរហ័សដោយគ្រាន់តែបញ្ចូលអត្ថបទដូចជា Dall-E របស់ OpenAI ជាដើម។

បច្ចុប្បន្ន Samsung Gauss ត្រូវបានប្រើប្រាស់នៅខាងក្នុង ដើម្បីបង្កើនផលិតភាពបុគ្គលិក។ AI នេះក៏ត្រូវបានពង្រីកទៅកាន់ផលិតផល Samsung ជាច្រើនផ្សេងទៀតផងដែរ ដើម្បីផ្តល់នូវបទពិសោធន៍ថ្មីៗសម្រាប់អ្នកប្រើប្រាស់នាពេលអនាគត។ ជាមួយនឹងការចាប់ផ្តើមនៃគំរូឆ្លាតវៃសិប្បនិម្មិតថ្មី Samsung អាចជាក្រុមហ៊ុនផលិតស្មាតហ្វូនដំបូងគេនៅលើពិភពលោកដែលរួមបញ្ចូល AI ជំនាន់ថ្មីទៅក្នុងឧបករណ៍។

កាលពីខែតុលា លោក Daniel Araujo អនុប្រធានអាជីវកម្មទូរស័ព្ទរបស់ក្រុមហ៊ុន Samsung បាននិយាយថា AI ដែលបង្កើតឡើងនៅក្នុងឧបករណ៍ចល័តអាចទៅដល់អ្នកប្រើប្រាស់នៅឆ្នាំក្រោយ។ យោងតាម ក្រុមហ៊ុន Engadget ការដំណើរការ AI ជំនាន់ថ្មីនៅលើឧបករណ៍ជំនួសឱ្យតាមរយៈពពកដូចជា ChatGPT អាចក្លាយជាអត្ថប្រយោជន៍បន្ថែមសម្រាប់ឧបករណ៍ Samsung ។

ទន្ទឹមនឹងនោះ Apple ដែលជាគូប្រជែងដ៏ធំរបស់ Samsung មិនបានប្រកាសអំពីម៉ូដែល AI ណាមួយឡើយ។ កាលពីខែមុន នាយកប្រតិបត្តិ Tim Cook បាននិយាយថា គាត់កំពុង “ដំណើរការការងារ” នៅក្នុងវិស័យ AI ប៉ុន្តែបានបដិសេធមិនផ្តល់ព័ត៌មានលម្អិតនោះទេ។ ទោះជាយ៉ាងណាក៏ដោយ បច្ចុប្បន្នក្រុមហ៊ុនផលិតបន្ទះឈីបស្មាតហ្វូន និងទូរសព្ទចល័តមួយចំនួនក៏កំពុងចូលរួមក្នុងរលកនៃការនាំយក AI សិប្បនិម្មិតទៅកាន់ទូរស័ព្ទផងដែរ៕