ប្រទេសថៃ ៖ បច្ចុប្បន្ន សំរាមជាច្រើនប្រភេទត្រូវបានគេបោះចោលនៅលើវាលស្មៅខាងក្រោយវត្តព្រះធាតុ ឃុំប្រាក់ទូឆ័យ ស្រុកព្រះនគរស្រីអយុធ្យា ដែលធ្វើឱ្យប៉ះពាល់ដល់បរិវេណប្រាសាទបុរាណរបស់ខេត្ត ។ បរិវេណនេះ គឺជាផ្លូវថ្មើរជើងទៅកាន់កន្លែងបុរាណផ្សេងទៀត ដែលមានភ្ញៀវទេសចរធ្វើដំណើរទៅមកជាប្រចាំ ។ ពលរដ្ឋរស់នៅក្នុងតំបន់បានស្នើឱ្យអាជ្ញាធរជួយដោះស្រាយបញ្ហាសំរាមនេះជាបន្ទាន់ ដើម្បីកុំឱ្យប៉ះពាល់ដល់វិស័យទេសចរណ៍ ។

បញ្ហាសំរាមទាំងនេះមកពីភ្ញៀវទេសចរជាអ្នកបោះចោលខ្លួនឯង ព្រមទាំងអ្នករស់នៅក្នុងតំបន់ផងដែរ ។ លើសពីនេះ តែងមានក្រុមយុវវ័យមកអង្គុយជក់បារីនៅលើផ្លូវជាញឹកញាប់ រហូតដល់ភ្ញៀវទេសចរមិនហ៊ានដើរឆ្លងកាត់ ។ អភិបាលខេត្តព្រះនគរស្រីអយុធ្យាធ្លាប់បានជូនដំណឹងជាច្រើនលើកឱ្យពលរដ្ឋថៃ និងភ្ញៀវទេសចរទាំងអស់ជួយគ្នាថែរក្សាអនាម័យនៅបរិវេណប្រាសាទបុរាណ ប៉ុន្តែនៅតែមានការចោលសំរាមជាហូរហែ ។

ក្រុមអ្នកសារព័ត៌មាន Thai PBS បានដើរត្រួតពិនិត្យមើលបរិវេណនៅក្បែរៗនោះឃើញថា ខ្វះខាតធុងសំរាមដាក់នៅចំណុចនីមួយៗ ។ កន្លងមក អ្នកលេងបណ្តាញសង្គមបានចែកចាយរូបភាពសំរាម និងសម្លៀកបំពាក់ ដែលគេបានបោះចោលនៅបរិវេណចេតិយព្រះស័ង្ខាបាត់ រហូតដល់បាត់បង់សោភ័ណភាព និងមិនគួរឱ្យមើលទេ ។ ប៉ុន្តែក្រោយមក ភ្នាក់ងារសម្អាតបានប្រមូលសំរាមចេញពីបរិវេណនេះរួចអស់ហើយ ។

ពាក់ព័ន្ធនឹងការចោលសំរាមផ្តេសផ្តាសនៅបរិវេណប្រាសាទបុរាណ ពលរដ្ឋរស់នៅខេត្តអយុធ្យាបានសម្តែងក្តីបារម្ភថា វានឹងប៉ះពាល់ដល់វិស័យទេសចរណ៍ ក្នុងឋានៈប្រាសាទបុរាណនេះជាសម្បត្តិបេតិកភណ្ឌពិភពលោក ។ ប្រសិនបើបញ្ហាចោលសំរាមកាន់តែរាលដាលច្រើនជាងនេះ ប្រាសាទបុរាណអាចត្រូវបានគេដកចេញពីសម្បត្តិបេតិកភណ្ឌពិភពលោក ។ ហេតុនេះ ពលរដ្ឋសំណូមពរឱ្យស្ថាប័នពាក់ព័ន្ធជួយដោះស្រាយបញ្ហានេះ ដោយអនុវត្តវិធានការតឹងរ៉ឹង និងដោះស្រាយជាបន្តបន្ទាប់ ៕ ប្រភព ៖ Thai PBS

ប្រទេសថៃ ៖ នៅថ្ងៃទី២៥ ខែកញ្ញា ឆ្នាំ២០២៣ គឺជាថ្ងៃដំបូងដែលប្រទេសថៃចាប់ផ្តើមអនុវត្តវិធានការលើកលែងទិដ្ឋាការ (Free Visa) សម្រាប់ទាក់ទាញភ្ញៀវទេសចរចិន និងកាហ្សាក់ស្ថានឱ្យមកកម្សាន្តនៅប្រទេសថៃ ហើយនាយករដ្ឋមន្ត្រីថៃ លោក សេដ្ឋា ថាវីស៊ិន បានធ្វើដំណើរទៅទទួលភ្ញៀវទេសចរចិននៅអាកាសយានដ្ឋានសុវណ្ណភូមិដោយផ្ទាល់ ។ ចំណែកក្រុមហ៊ុនឯកជនបានស្នើឱ្យរដ្ឋាភិបាលដំឡើងកម្មវិធី PromptPay ដើម្បីទូទាត់ប្រាក់តាមប្រព័ន្ធអេឡិចត្រូនិក ។

ប្រទេសថៃបានកំណត់វិធានការលើកលែងទិដ្ឋាការ (Free Visa) សម្រាប់ទាក់ទាញភ្ញៀវទេសចរចិន និងកាហ្សាក់ស្ថាន ដោយអនុវត្តចាប់ពីថ្ងៃទី២៥ ខែកញ្ញា ឆ្នាំ២០២៣ រហូតដល់ថ្ងៃទី២៩ ខែកុម្ភៈ ឆ្នាំ២០២៤ សរុបមានរយៈពេល៥ខែ ។

លោក សេដ្ឋា ថាវីស៊ិន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ ព្រមទាំងមន្ត្រីមកពីស្ថាប័នផ្សេងៗបានធ្វើដំណើរមកកាន់អាកាសយានដ្ឋានសុវណ្ណភូមិ ដើម្បីទទួលស្វាគមន៍ភ្ញៀវទេសចរចិន ដោយការប្រគល់កម្រងផ្កា និងវត្ថុអនុស្សាវរីយ៍ដល់ភ្ញៀវទេសចរចិន ដែលបានធ្វើដំណើរតាមជើងហោះហើរ Thai Air Asia X និងជើងហោះហើរ XJ 761 ពីទីក្រុងសៀងហៃ មកកាន់អាកាសយានដ្ឋានសុវណ្ណភូមិ ចំនួន៣៦៧នាក់ ។

ចំណែកក្រសួងដឹកជញ្ជូន និងក្រុមហ៊ុនផ្តល់សេវាកម្មការទូទាត់ប្រាក់ពីប្រទេសចិន បានត្រៀមខ្លួនរួចរាល់នៅអាកាសយានដ្ឋាន ដោយក្រុមហ៊ុនជឿថា វិធានការលើកលែងទិដ្ឋាការ (Free Visa) នឹងទាក់ទាញភ្ញៀវទេសចរចិន និងកាហ្សាក់ស្ថាន មកកាន់ប្រទេសថៃ និងបង្កើនការចំណាយនៅថៃជាង២០% ។ លើសពីនេះ ពួកគេបានស្នើឱ្យរដ្ឋាភិបាលដំឡើងកម្មវិធី PromptPay សម្រាប់ហាងលក់ដូរផ្សេងៗទទួលការទូទាត់ប្រាក់តាមរយៈ E-wallet ផងដែរ ។

ការត្រៀមខ្លួនទទួលភ្ញៀវទេសចរ គឺក្រោយពីរដ្ឋាភិបាលថៃបានប្រកាសអនុវត្តវិធានការលើកលែងទិដ្ឋាការ (Free Visa) ហើយក្រសួងគមនាគមន៍បញ្ជាក់ថា អាកាសយានដ្ឋានទាំងអស់ត្រៀមទទួលភ្ញៀវទេសចរចិន និងកាហ្សាក់ស្ថាន ជាពិសេស នៅខែតុលា ឆ្នាំ២០២៣ ព្រោះវាត្រូវនឹងពិធីបុណ្យជាតិរបស់ចិន ។ ក្រសួងគមនាគមន៍សង្ឃឹមថា នឹងមានជើងហោះហើរពីប្រទេសចិនកើនឡើង ពីជាមធ្យម៧២ជើងក្នុង១ថ្ងៃ មកស្មើនឹង៩៦ជើងក្នុង១ថ្ងៃ ខណៈចំនួនអ្នកដំណើរនឹងកើនឡើងពី៩.៦៨០នាក់ក្នុង១ថ្ងៃ មកស្មើនឹង១៨.៦៥៦នាក់ក្នុង១ថ្ងៃ ។

ការជួយសម្រួលក្នុងការទូទាត់ប្រាក់តាមរយៈ E-wallet ជាពិសេស ភ្ញៀវទេសចរចិន ដោយសារនៅប្រទេសចិនជំរុញការទូទាត់ប្រាក់តាម E-wallet នៅលើទូរស័ព្ទស្មាតហ្វូន ។ ក្រុមហ៊ុនផ្តល់សេវាកម្មទូទាត់ប្រាក់ឌីជីថលតាមរយៈ Alipay Plus និយាយថា បានបើកកន្លែងទូទាត់ប្រាក់សម្រាប់ភ្ញៀវទេសចរចិន ប្រមាណ៥សែនកន្លែងនៅប្រទេសថៃ ដូចជា នៅតាមហាងលក់ទំនិញតូចធំ និងនៅអាកាសយានដ្ឋាន ។

លើសពីនេះ ក្រុមហ៊ុននឹងត្រៀមពង្រីកកន្លែងទូទាត់ប្រាក់បន្ថែមទៀតនៅតាមហាងលក់ទំនិញក្នុងតំបន់ និងទីប្រជុំជន ។ ដូច្នេះ ក្រុមហ៊ុនបានពិភាក្សាជាមួយធនាគារជាតិ និងអាជ្ញាធរទេសចរណ៍ថៃ ដើម្បីតភ្ជាប់ប្រព័ន្ធ Alipay Plus និង PromptPay ឱ្យហាងលក់ទំនិញថៃអាចទូទាត់ប្រាក់តាមរយៈ E-wallet របស់ចិន ។ ក្រុមហ៊ុនជឿថា បើអាចធ្វើបាន វានឹងជួយពង្រីកហាងលក់ទំនិញក្នុងស្រុក និងក្លាយជាប្រយោជន៍សម្រាប់ហាងលក់ទំនិញ ក្រុមហ៊ុន និងសេដ្ឋកិច្ចថៃ ៕ ប្រភព ៖ Thai PBS

សត្វបក្សី នៅលើផែនដីរបស់យើង គឺមានរាប់លានប្រភេទឯណោះ ដែលវាសុទ្ធតែមានលក្ខណៈពិសេសផ្សេងៗគ្នា ដោយបក្សីខ្លះអាចហើរខ្ពស់ៗបាន ហើយខ្លះទៀតក៏អាចសម្លឹងបានឆ្ងាយ និងបក្សីខ្លះក៏បំបៅដោះកូន រីឯបក្សីខ្លះទៀតក៏អាចចាប់ចំណីក្នុងទឹកបានទៀតផង ប៉ុន្តែទោះជាយ៉ាងណាក៏ដោយ បក្សីដែលអាចហើរថយក្រោយបានគឺកម្រណាស់។ ដូច្នេះហើយ តើបក្សីប្រភេទណាដែលមានសមត្ថភាពហើរថយក្រោយបាន?

សត្វបក្សីដែលមានសមត្ថភាពហើរថយក្រោយបានគឺ បក្សីហាំមីងបឺដ (Hummingbird) គឺជាអម្បូរសត្វបក្សីដែលមានលក្ខណៈពិសេសដ៏គួរឱ្យចាប់អាម្មណ៍ និងមានសមត្ថភាពយ៉ាងអស្ចារ្យ។ យោងតាមតាមការស្រាវជ្រាវផ្នែកជីវសាស្ត្ររបស់បក្សីហាំមីងបឺដ គឺគេបានរកឃើញថាពពួកបក្សីនេះមានដើមកំណើតដំបូងនៅទ្វីបអាមេរិក។ ពួកវាមិនត្រឹមជាពពួកបក្សីដែលផ្លាស់ប្តូរទីជម្រកតាមរដូវកាល និងមានទំហំតូចជាងគេប៉ុណ្ណោះទេ តែវាក៏ជាសត្វបក្សីតែមួយគត់លើផែនដីដែលអាចហើរថយក្រោយបានផងដែរ។ បក្សីហាំមីងបឺដទទះស្លាបក្នុងទម្រង់ដូចទៅនឹងរាងលេខ ៨ ដែលនាំឱ្យពួកវាអាចហើរថយក្រោយបានដោយងាយ។

ល្បឿននៃការទទះស្លាបរបស់សត្វបក្សីហាំមីងបឺដ អាចឈានដល់ ២០០ ដងក្នុងមួយវិនាទី ហើយចង្វាក់បេះដូងរបស់ពួកវាបានលោតដល់ ១,២៦០ ដងក្នុងមួយនាទី។ ការទទះស្លាបមហាសែនលឿនដូច្នេះហើយ ទើបធ្វើឱ្យបក្សីនេះបញ្ចេញសំឡេងរំញ័រនៅពេលហើរ និងត្រូវបានគេដាក់ឈ្មោះឱ្យថា «Hummingbird» តែម្តង។

ការធ្វើសកម្មភាពដ៏រហ័សបែបនេះបានជួយឱ្យរាងកាយពួកវាធ្វើប្រតិកម្មមេតាបូលីសិម (Metabolism) ដែលជាកត្តានាំឱ្យពពួកបក្សីប្រភេទនេះអាចមានអាយុវែងផងដែរ។ អម្បូរបក្សីហាំមីងបឺដញីមួយក្បាលធ្លាប់ត្រូវគេកត់ត្រាថារស់នៅបានរហូតដល់អាយុ ១២ ឆ្នាំឯណោះ។ សម្រាប់ក្រុមបក្សីហាំមីងបឺដនៅទ្វីបអាមេរិកខាងជើង គឺអាចរស់នៅបានជាមធ្យមចន្លោះពី ៣-៥ ឆ្នាំ៕

បរទេស៖ ថ្មីៗនេះ មហាសេដ្ឋី Elon Musk បានអំពាវនាវជាសាធារណៈដល់តារាល្បីៗដូចជា Taylor Swift ឱ្យជួយបង្ហោះមាតិកានៅលើបណ្តាញសង្គម X ក្នុងបរិបទនៃប្រាក់ចំណូលរបស់វេទិកានេះធ្លាក់ចុះ។

បន្ទាប់ពីតារាចម្រៀង Taylor Swift បានប្រកាសពីការចេញអាល់ប៊ុមរបស់នាងឡើងវិញកាលពីដើមសប្តាហ៍នេះ Elon Musk បានសរសេរនៅលើបណ្តាញសង្គម X ថា “ខ្ញុំណែនាំអ្នកឱ្យបង្ហោះវីដេអូចម្រៀង ឬការប្រគុំតន្ត្រីផ្ទាល់នៅលើវេទិកានេះ”។ ការបង្ហោះរបស់មហាសេដ្ឋីវ័យ ៥២ឆ្នាំរូបនេះ បានទាក់ទាញអ្នកចូលមើល ១.១ លានដង ជិត ៧ ពាន់ Like និងជាង ១.១ ពាន់ Comment ប៉ុន្តែមិនមានការឆ្លើយតបពីកំពូលតារាពិភពលោក Taylor Swift នោះទេ។

យោងតាម Business Insider បានឱ្យដឹងថា ទោះបីជា Musk ខំប្រឹងបន្តផ្សព្វផ្សាយក៏ដោយ ក៏វេទិកានេះកំពុងប្រឈមមុខនឹងការលំបាកជាច្រើន។ បច្ចុប្បន្ន X បានបាត់បង់ពាក់កណ្តាលនៃប្រាក់ចំណូលផ្សាយពាណិជ្ជកម្មរបស់ខ្លួន។ ស្ថានភាពរបស់ X គឺអាក្រក់ណាស់ដែលធ្វើឱ្យ Musk ត្រូវតែអំពាវនាវដល់តារាល្បីៗគ្រប់កម្រិតដើម្បីបង្ហោះនៅលើវេទិកា។

បន្ទាប់ពីទទួលបាន Twitter ក្នុងខែតុលា ឆ្នាំ ២០២២ លោក Musk បានផ្លាស់ប្តូរបណ្តាញសង្គម ដោយគាត់បានបណ្តេញបុគ្គលិកជាច្រើន និងបានប្តូរឈ្មោះវេទិកានេះទៅជា X។ មហាសេដ្ឋីរូបនេះ ក៏បានសរសេរនៅលើបណ្តាញសង្គម X កាលពីខែមុនថា យើងប្រហែលជាបរាជ័យដូចមនុស្សជាច្រើនបានទាយទុកជាមុន។ ប៉ុន្តែទោះជាយ៉ាងណាក៏ដោយ ខ្ញុំនឹងព្យាយាមឱ្យអស់ពីសមត្ថភាព ដើម្បីឱ្យបណ្តាញសង្គមមួយនេះរីកចម្រើនឡើងវិញ និងក្លាយជាបណ្តាញដ៏ល្អមួយ៕
ប្រភព៖vnexpress

បរទេស៖ មេដឹកនាំកូរ៉េខាងជើង លោក គីម ជុងអ៊ុន បានសន្យាជំរុញកិច្ចសហប្រតិបត្តិការជាមួយប្រទេសចិន នៅក្នុងលិខិតមួយផ្ញើជូនប្រធានាធិបតី ស៊ី ជីនពីង។
លោក គីម ជុងអ៊ុន បានសរសេរនៅក្នុងលិខិតនោះថា “ខ្ញុំជឿជាក់ថា ទំនាក់ទំនងសហប្រតិបត្តិការ និងមិត្តភាពរវាងកូរ៉េខាងជើង និងចិននឹងអភិវឌ្ឍជាលំដាប់ ស្របតាមតម្រូវការនៃយុគសម័យថ្មី និងបំណងប្រាថ្នារបស់ប្រជាជនទាំងពីរនាពេលអនាគត” ។

យោងតាមទីភ្នាក់ងារសារព័ត៌មាន KCNA ដែលបានរាយការណ៍កាលពីថ្ងៃទី២៤ ខែកញ្ញាថា លិខិតនោះគឺជាការឆ្លើយតបទៅនឹងការអបអរសាទរដែលលោក ស៊ី ជីនពីង ផ្ញើជូនលោក គីម ជុងអ៊ុន ក្នុងឱកាសនៃការប្រារព្ធទិវាជាតិរបស់ប្រទេសកូរ៉េខាងជើងកាលពីខែមុន។ ក្នុងលិខិតនេះ ប្រធានាធិបតីចិនបានបង្ហាញឆន្ទៈក្នុងការពង្រឹងទំនាក់ទំនងយុទ្ធសាស្ត្រ និងកិច្ចសហប្រតិបត្តិការកម្រិតការងារជាមួយកូរ៉េខាងជើង។
ប្រឈមមុខនឹងស្ថានភាពថ្មី ប្រទេសចិនបានត្រៀមខ្លួនរួចជាស្រេចក្នុងការពង្រឹងការផ្លាស់ប្តូរយុទ្ធសាស្ត្រជាមួយកូរ៉េខាងជើង ពង្រឹងកិច្ចសហប្រតិបត្តិការសេដ្ឋកិច្ច និងអភិវឌ្ឍទំនាក់ទំនងទ្វេភាគីស្របតាមតម្រូវការនៃសម័យកាល នាំមកនូវអ្វីដែលល្អបំផុតសម្រាប់ប្រជាជននៃប្រទេសទាំងពីរ និងរួមចំណែកដល់សន្តិភាពក្នុងតំបន់។

ប្រទេសចិន គឺជាសម្ព័ន្ធមិត្តប្រពៃណី និងដើរតួនាទីយ៉ាងសំខាន់ក្នុងសេដ្ឋកិច្ចកូរ៉េខាងជើង។ កាលពីដើមខែនេះ គណៈប្រតិភូជាន់ខ្ពស់ចិនដឹកនាំដោយឧបនាយករដ្ឋមន្ត្រី Liu Guozhong បានទៅបំពេញទស្សនកិច្ចនៅទីក្រុងព្យុងយ៉ាងក្នុងឱកាសខួបលើកទី ៧៥ នៃឯករាជ្យភាពរបស់ប្រទេសកូរ៉េខាងជើង។

កន្លងមកកាលពីខែកក្កដា សមាជិកការិយាល័យនយោបាយ និងជាអនុប្រធានរដ្ឋសភាចិន លោក Li Hongzhong ក៏បានដឹកនាំគណៈប្រតិភូទៅទីក្រុងព្យុងយ៉ាង ដើម្បីចូលរួមពិធីដង្ហែរក្បួនយោធារំលឹកខួបលើកទី ៧០ នៃការបញ្ចប់សង្គ្រាមកូរ៉េ ផងដែរ៕
ប្រភព៖vnexpress

រដ្ឋធានីកៀវ៖ សង្គ្រាមរបស់ប្រធានាធិបតីរុស្ស៊ី លោក វ៉្លាឌីមៀ ពូទីន នៅក្នុងអ៊ុយក្រែន ដែលជាប្រទេសជិតខាង និង ធ្លាប់រួមរស់នៅជាមួយគ្នា នានាសម័យសហភាពសូវៀត ចាប់តាំងពីថ្ងៃទី២៤ ខែកុម្ភៈ ឆ្នាំ២០២២ រហូតមកដល់ពេលនេះ បានធ្វើឲ្យសហរដ្ឋអាមរិក និង សម្ពន្ធមិត្តរបស់ក្រុងវ៉ាស៊ីនតោន ទាំងនៅតំបន់អឺរ៉ុប និង អាស៊ី ខាតបង់លុយរួចមកហើយ សរុបប្រហែលជាង២២០ពាន់លានដុល្លារ ហើយអាចនឹងអស់លុយបន្ដទៅទៀត។

សារព័ត៌មានរបស់អង់គ្លេស Daily Mail បានចេញផ្សាយ កាលពីពេលថ្មីៗនេះ ថា សហរដ្ឋអាមេរិក បានចេញមុខយ៉ាងខ្លាំង នៅក្នុងសង្គ្រាមរបស់ក្រុងមូស្គូ ប្រឆាំងនឹងក្រុងកៀវ ហើយក្រុងវ៉ាស៊ីនតោន បានដើរអូសទាញសម្ពន្ធមិត្តរបស់ខ្លួន ឲ្យមកជួយគាំទ្រដល់អ៊ុយក្រែន ទាំងជំនួយមនុស្សធម៌ និង យោធា សម្រាប់លើកទឹកចិត្តដល់កងទ័ពការពារទឹកដីរបស់ប្រទេសអឺរ៉ុបខាងកើតមួយនេះ ដើម្បីទប់ទល់នឹងការឈ្លានពានរបស់កម្លាំងទាហានរុស្ស៊ី។

បច្ចុប្បន្ន លោក វ៉ូឡូឌីមៀរ ហ្សេឡែនស្គី (Volodymyr Zelensky) ប្រធានាធិបតីអ៊ុយក្រែន កំពុងតែពុះពារនឹងការលំបាកយ៉ាងខ្លាំង សម្រាប់បញ្ចុះបញ្ចូលដល់ប្រទេសជិតខាង និង សម្ពន្ធមិត្តលោកខាងលិច ដើម្បីជួយគាំទ្រដល់រដ្ឋាភិបាលរបស់គាត់ ខណៈសង្គ្រាមកំពុងតែបន្ដឆាបឆេះយ៉ាងខ្លាំង។

ជាមួយគ្នានេះ លោក ចូ បៃដិន (Joe Biden) ប្រធានាធិបតីសហរដ្ឋអាំមេរិក កំពុងតែប្រឈមមុខនឹងសំណើកញ្ចប់ជំនួយយោធាថ្មី សម្រាប់ប្រទេសអ៊ុយក្រែន មានទំហំទឹកប្រាក់ ២៤ពាន់លានដុល្លារបន្ថែមទៀត។ បញ្ហានេះ កំពុងតែក្លាយជាប្រធានបទ ជជែកវែកញែកយ៉ាងក្តៅគគុក នៅក្នុងសភារបស់សហរដ្ឋអាមេរិក។ ស្របគ្នានេះដែរ សមាជិកសភា មកពីគណបក្សសាធារណរដ្ឋ កំពុងតែលើកឡើង អំពីថវិកាគួរតែចំណាយ លើការបង្កើនដល់បញ្ហាសន្តិសុខ នៅតាមព្រំដែនរបស់សហរដ្ឋអាមេរិកល្អជាង ខណៈមានក្តីបារម្ភ អំពីអំពើពុករលួយ នៅក្នុងប្រទេសអ៊ុយក្រែន។

ក្រុមមន្រ្ដីជំនាញជាច្រើន មកពីអង្គការសហប្រជាជាតិ ក៏ដូចជា ធនាគារពិភពលោក និង មន្រ្ដីជំនាញរបស់អ៊ុយក្រែន ធ្លាប់លើកឡើង កាលពីចុងឆ្នាំ២០២២ ថា សង្គ្រាមរបស់រុស្ស៊ី បានបង្កបំផ្លិចបំផ្លាញដល់ប្រទេសអ៊ុយក្រែន គិតជាទឹកប្រាក់ មានទំហំជាង៤០០ពាន់លានដុល្លារ ខណៈសង្គ្រាមកំពុងតែបន្ដឆាបឆេះយ៉ាងខ្លាំង រកពន្លឺចរចាសន្ដិភាព មិនទាន់ឃើញ។

ដោយឡែក បណ្ដាប្រទេសលោកខាងលិច និង សម្ពន្ធមិត្ត ជាអ្នកជួយផ្គត់ផ្គង់គ្រឿងសព្វាវុធ និង ជំនួយមនុស្សធម៌ គាំទ្រដល់អ៊ុយក្រែន គិតត្រឹមថ្ងៃទី៣១ ខែកក្កដា ឆ្នាំ២០២៣ រួមមាន៖
១-សហភាពអឺរ៉ុប បានផ្ដល់ជំនួយ ចំនួន៨៤,៨ពាន់លានដុល្លារអាមេរិក
២-សហរដ្ឋអាមេរិក ចំនួន ៦៩,៥ ពាន់លានដុល្លារ
៣-អាល្លឺម៉ង់៖ ២០,៩ ពាន់លានដុល្លារ
៤-ចក្រភពអង់គ្លេស ចំនួន ១៣,៨ ពាន់លានដុល្លារ
៥-ន័រវែស ចំនួន ៧,៤ ពាន់លានដុល្លារ
៦-ជប៉ុន ចំនួន ៦,៥ ពាន់លានដុល្លារ
៧-កាណាដា ចំនួន ៥,៤ ពាន់លានដុល្លារ
៨-ប៉ូឡូញ ចំនួន ៤,៣ ពាន់លានដុល្លារ
៩-ហូល្លង់ដ៍ ចំនួន ៤,១ ពាន់លានដុល្លារ
១០-ដាណឺម៉ាក ចំនួន ៣,៨ ពាន់លានដុល្លារអាមេរិក៕