ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ីបានចេញគោលនយោបាយលើកទឹកចិត្តឱ្យក្រុមហ៊ុនថៃចូលមកវិនិយោគនៅទីក្រុងថ្មីរបស់ឥណ្ឌូណេស៊ី ឈ្មោះ Nusantara ។ ទីក្រុង Nusantara ស្ថិតនៅខេត្តកាលីម៉ាន់តាន់ នឹងក្លាយជាទីក្រុងមានទំហំធំជាងទីក្រុងហ្សាកាតា រហូតដល់៤ដង ។ ហេតុនេះ រដ្ឋាភិបាលរំពឹងថា ទីក្រុងថ្មីនឹងសម្ពោធជាផ្លូវការនៅឆ្នាំ២០២៤ ។

លោក Agung Wicaksono អនុប្រធាននាយកដ្ឋានហិរញ្ញវត្ថុ និងការវិនិយោគរបស់ Nusantara National Capital Authority លើកឡើងថា ទីក្រុង Nusantara នឹងដើរតួនាទីលើសពីទីក្រុងថ្មី ដោយវានឹងក្លាយជាមជ្ឈមណ្ឌលនៃកំណើនសេដ្ឋកិច្ចទាំងក្នុងប្រទេសឥណ្ឌូណេស៊ី ក៏ដូចជាតំបន់អាស៊ីអាគ្នេយ៍ ។ រដ្ឋាភិបាលឥណ្ឌូណេស៊ីនឹងសាងសង់ការិយាល័យរដ្ឋាភិបាលនាពេលឆាប់ៗនេះ ព្រមទាំងអភិវឌ្ឍន៍ឱ្យក្លាយជាទីក្រុងអច្ឆរិយៈ និងមាននិរន្តរភាព ។ លើសពីនេះ រដ្ឋាភិបាលនឹងអញ្ជើញវិនិយោគិនថៃចូលមកអភិវឌ្ឍន៍ទីក្រុង រួមទាំងក្រុមហ៊ុនជាច្រើនទៀតមកពីប្រទេសជប៉ុន ម៉ាឡេស៊ី និងសិង្ហបុរី ។

ចាប់ពីឆ្នាំ២០១៧ រហូតដល់ឆ្នាំ២០២២ វិនិយោគិនថៃបានវិនិយោគចំនួន១.៥០០គម្រោងនៅទូទាំងប្រទេសឥណ្ឌូណេស៊ី ។ ទោះយ៉ាងណា មានក្រុមហ៊ុនមកពីប្រទេសផ្សេងៗចំនួន២៨៤ បានចាប់អារម្មណ៍ចង់មកវិនិយោគនៅទីក្រុង Nusantara រួមទាំងក្រុមហ៊ុនរបស់សិង្ហបុរី ចំនួន២៧, ជប៉ុន ចំនួន២៥ និងម៉ាឡេស៊ី ចំនួន១៩ ។

លោក Agung Wicaksono បន្តថា រដ្ឋាភិបាលនឹងលើកទឹកចិត្ត និងទាក់ទាញក្រុមហ៊ុនបរទេសឱ្យចូលមកវិនិយោគក្នុងផ្នែកឧស្សាហកម្មមួយចំនួន រួមមាន ៖ ថាមពលកកើតឡើងវិញ, ទូរគមនាគមន៍, ផ្នែកអចលនទ្រព្យ, ការគ្រប់គ្រងទឹក, ហេដ្ឋារចនាសម្ព័ន្ធបច្ចេកវិទ្យា, ហេដ្ឋារចនាសម្ព័ន្ធពាណិជ្ជកម្ម, ការសម្របសម្រួលផ្នែកវេជ្ជសាស្ត្រ, ការសម្របសម្រួលសង្គម និងមធ្យោបាយសាធារណៈ, ការអប់រំ និងតំបន់ឧស្សាហកម្មបៃតង ។

ការលើកទឹកចិត្តនេះ នឹងគ្របដណ្តប់លើការបន្ធូរបន្ថយពន្ធសម្រាប់ការវិនិយោគផ្នែកឧស្សាហកម្មគោលដៅផងដែរ ដូចជា ហេដ្ឋារចនាសម្ព័ន្ធ និងសេវាកម្មសាធារណៈសម្រាប់រយៈពេល៣០ឆ្នាំ រួមទាំងការកាត់បន្ថយពន្ធ៣៥០% សម្រាប់ការវិនិយោគផ្នែកស្រាវជ្រាវ និងអភិវឌ្ឍន៍ ។

ចំណែកក្រុមប្រឹក្សាវិនិយោគប្រទេសថៃ (The Board of Investment of Thailand) លើកឡើងថា ប្រទេសថៃមានឱកាសវិនិយោគជាច្រើននៅទីក្រុង Nusantara ជាពិសេស ផ្នែកសេដ្ឋកិច្ចឌីជីថល, ហេដ្ឋារចនាសម្ព័ន្ធ, ប្រព័ន្ធសេវាសុខភាព ព្រមទាំងផ្នែកសណ្ឋាគារ និងសេវាកម្ម ៕ ប្រភព ៖ AEC connect

ឆ្នាំនេះ ភ្ញៀវទេសចរអាចរីករាយនឹងរដូវស្លឹកឈើជ្រុះរបស់ជប៉ុន ដោយអាចមើលទេសភាពដ៏ស្រស់ស្អាតនៃស្លឹកឈើពណ៌លឿង និងក្រហម ចាប់ពីពាក់កណ្តាលខែតុលាដល់ពាក់កណ្តាលខែធ្នូ។
យោងតាមទីភ្នាក់ងារផ្សព្វផ្សាយទេសចរណ៍ជប៉ុន (JNTO) បានឱ្យដឹងថា រដូវស្លឹកឈើជ្រុះគឺជាពេលវេលាដ៏ល្អបំផុតសម្រាប់ដំណើរកម្សាន្តទៅកាន់ប្រទេសជប៉ុន ដោយសារអាកាសធាតុ “មិនក្តៅពេក ឬមិនត្រជាក់ពេក” ងាយស្រួលសម្រាប់សកម្មភាពទេសចរណ៍ទាំងអស់តាមប្រតិទិន។ JNTO បានធ្វើការណែនាំកន្លែងដ៏ពេញនិយមចំនួន ៤ ក្នុងទីក្រុងរបស់ប្រទេសជប៉ុន ដែលអ្នកទេសចរអាចធ្វើដំណើរបាននាពេលខាងមុខ។

១.សាប៉ូរ៉ូ (Sapporo)៖ Sapporo ស្ថិតនៅក្នុងខេត្ត Hokkaido ប្រទេសជប៉ុន ដែលជាទីក្រុងមានស្លឹកឈើពណ៌លឿង និងក្រហមដំបូងបំផុតក្នុងរដូវស្លឹកឈើជ្រុះ។ ភ្ញៀវទេសចរនៅទីនេះអាចរីករាយនឹងទេសភាពធម្មជាតិផ្លាស់ប្តូរពណ៌ បរិយាកាសរដូវស្លឹកឈើជ្រុះដោយការដើរលេង បោះជំរុំ ឬទស្សនាឧទ្យានជាតិ ជម្រាលភ្នំ និងប្រភពទឹកក្ដៅ។

២.ហ៊ីរ៉ូស៊ីម៉ា (Hiroshima)៖ ឧទ្យានអនុស្សាវរីយ៍សន្តិភាពហ៊ីរ៉ូស៊ីម៉ា ប្រាសាទហ៊ីរ៉ូស៊ីម៉ា ឬឧទ្យាន Momijidani គឺជាកន្លែងដ៏ពេញនិយមបំផុតសម្រាប់ភ្ញៀវទេសចរ ដើរកំសាន្ត ឬមើលស្លឹកជ្រុះ ជាមួយខ្យល់អាកាសធម្មជាតិ។ បរិវេណនៅទីនេះ គឺត្រូវបានដាំដោយដើមឈើជាច្រើន ដូច្នេះនៅពេលដែលស្លឹកឈើផ្លាស់ប្តូរពណ៌ ទិដ្ឋភាពក៏ពោរពេញទៅដោយពណ៌លឿង និងក្រហមផងដែរ។

៣.តូក្យូ (Tokyo)៖ នៅទីក្រុងតូក្យូ ស្លឹកឈើចាប់ផ្តើមផ្លាស់ប្តូរពណ៌ចាប់ពីចុងខែវិច្ឆិកា។ ដូច្នេះ ការមកដល់រដ្ឋធានីរបស់ប្រទេសជប៉ុននៅពេលនេះ អ្នកទេសចរអាចគយគន់ ស្លឹកឈើជ្រុះបង្កើតជាកម្រាលព្រំពណ៌មាសធម្មជាតិ នៅកន្លែងសាធារណៈជាច្រើន។

៤.អូសាកា (Osaka)៖ នៅទីក្រុង Osaka ចាប់ផ្តើមមានស្លឹកឈើក្រហមចាប់ពីដើមខែធ្នូ។ សីតុណ្ហភាពនៅតំបន់នេះ ប្រែប្រួលចន្លោះពី ៨-១២ អង្សាសេ ដូច្នេះអ្នកទេសចរគួរតែយកចិត្តទុកដាក់ជ្រើសរើសសំលៀកបំពាក់ឱ្យបានសមរម្យ។ អ្នកទស្សនាអាចគយគន់ទេសភាពរដូវស្លឹកឈើជ្រុះ និងថតរូបនៅទីតាំងលេចធ្លោមួយចំនួនដូចជា ឧទ្យាន Minoo ឧទ្យាន Hoshida ប្រាសាទ Osaka ឬដើមឈើ Midosuji ginkgo ជាដើម៕
ប្រភព៖vnexpress

ប្រទេសអង់គ្លេស ៖ សារព័ត៌មានអង់គ្លេសចុះផ្សាយថា នាយករដ្ឋមន្ត្រីអង់គ្លេស លោក Richie Sunak កំពុងពិចារណាចេញវិធានការហាមលក់បារីឱ្យយុវជនជំនាន់ថ្មី ។ ប្រសិនបើការហាមឃាត់នេះទទួលបានជោគជ័យ អង់គ្លេសនឹងក្លាយជាប្រទេសទី២ នៅលើពិភពលោក បន្ទាប់ពីប្រទេសនូវែលសេឡង់ ដែលហាមពលរដ្ឋជក់បារី ។

អ្នកនាំពាក្យរដ្ឋាភិបាលអង់គ្លេសបានផ្តល់សម្ភាសន៍ជាមួយសារព័ត៌មានរ៉យទ័រថា រដ្ឋាភិបាលមានគោលបំណងឱ្យពលរដ្ឋអង់គ្លេសទាំងអស់កាត់បន្ថយ ឬបញ្ឈប់ការជក់បារីកាន់តែច្រើន ហើយរដ្ឋាភិបាលសង្ឃឹមថា នឹងអាចសម្រេចគោលដៅនៅឆ្នាំ២០៣០ ។ ក្រៅពីការហាមលក់បារីឱ្យយុវជនជំនាន់ថ្មីហើយ វិធានការនេះបានរួមបញ្ចូលទាំងការចែកឧបករណ៍ឈប់ជក់បារីដោយឥតគិតថ្លៃផងដែរ ។ លើសពីនេះ នឹងមានការផ្តល់រង្វាន់លើកទឹកចិត្តដល់ស្ត្រីមានផ្ទៃពោះឱ្យឈប់ជក់បារីទៀតផង ។

សារព័ត៌មាន The Guardian ចុះផ្សាយថា វិធានការរបស់អង់គ្លេសស្រដៀងគ្នានឹងច្បាប់របស់នូវែលសេឡង់ ដែលបានប្រកាសកាលពីឆ្នាំ២០២២ គឺហាមលក់បារីគ្រប់ប្រភេទឱ្យពលរដ្ឋ ដែលកើតក្រោយថ្ងៃទី១ ខែមករា ឆ្នាំ២០០៩ ។ ក្រៅពីនេះ នូវែលសេឡង់បានកាត់បន្ថយហាងលក់បារីពីចំនួន៦.០០០កន្លែង មកស្មើត្រឹម៦០០កន្លែងប៉ុណ្ណោះ រួមទាំងកាត់បន្ថយបរិមាណសារធាតុនីកូទីនក្នុងការផលិតបារីផងដែរ ។

ការចេញវិធានការហាមលក់បារីឱ្យយុវជនជំនាន់ថ្មី គឺក្នុងគោលបំណងកាត់បន្ថយចំនួនអ្នកជំងឺផ្សេងៗដែលបណ្តាលមកពីការជក់បារី ដូចជា ជំងឺមហារីក និងជំងឺគាំងបេះដូងជាដើម ។ ហេតុនេះ ប្រទេសអង់គ្លេសត្រូវចំណាយថវិកាផ្នែកសុខភាពសាធារណៈរាប់លានដុល្លារអាមេរិកក្នុង១ឆ្នាំ សម្រាប់ការព្យាបាលជំងឺ ៕ ប្រភព ៖ TNN Health

បរទេស៖ យោងតាមស្ថិតិពីក្រុមហ៊ុនស្រាវជ្រាវទីផ្សារ TrendForce កាលពីថ្ងៃទី២៥ ខែកញ្ញា បានឱ្យដឹងថា ក្រុមហ៊ុន Nvidia ទទួលបានប្រាក់ចំណូល ១១,៣៣២ ពាន់លានដុល្លារក្នុងត្រីមាសចុងក្រោយនេះ ដែលវាកើនឡើង ៦៨.៣% បើធៀបនឹងត្រីមាសទីមួយនៃឆ្នាំ ២០២៣។ ក្នុងអំឡុងពេលដូចគ្នា ប្រាក់ចំណូលរបស់ក្រុមហ៊ុន Qualcomm បានថយចុះ ៩.៧% មកនៅត្រឹម ៧,១៧៤ ពាន់លានដុល្លារ។ ដូច្នេះ បច្ចុប្បន្ននេះក្រុមហ៊ុន Nvidia ក៏បានវ៉ាដាច់ដៃគូប្រកួតប្រជែងរបស់ខ្លួនជាច្រើនដូចជា Broadcom, AMD និង MediaTek ដើម្បីក្លាយជាក្រុមហ៊ុនរចនាបន្ទះឈីបដែលមានប្រាក់ចំណូលខ្ពស់បំផុតក្នុងពិភពលោក។

មូលហេតុដែល Nvidia បានក្លាយជាក្រុមហ៊ុនរចនាបន្ទះឈីបដ៏ធំបំផុតរបស់ពិភពលោក គឺដោយសារការនាំចេញដ៏ធំនៃប្រព័ន្ធ HGX ដែលមានប្រសិទ្ធភាពខ្ពស់។ លើសពីនេះ ផ្នែកគាំទ្រហ្គេម និងរូបភាពរបស់ក្រុមហ៊ុនក៏បានអភិវឌ្ឍយ៉ាងខ្លាំងផងដែរ បន្ទាប់ពីបានចេញលក់ផលិតផលថ្មីៗជាបន្តបន្ទាប់ បច្ចុប្បន្នក្រុមហ៊ុននេះមានចំណែកទីផ្សាររហូតដល់ ២៩.៧%។ ទន្ទឹមនឹងនេះដែរក្រុមហ៊ុន Qualcomm ដែលជាគូប្រជែងដ៏ធំរបស់ Nvidia បានកាត់បន្ថយប្រាក់ចំណូល ដោយសារតែតម្រូវការសម្រាប់ស្មាតហ្វូន Android មានការថយចុះ។ បើទោះបីជាមាន Apple ចុះហត្ថលេខាលើកិច្ចសន្យាទិញបន្ទះឈីបបណ្តាញវិជ្ជមានក៏ដោយ ក៏វាមិនអាចជួយកែលម្អស្ថានភាពអាជីវកម្មរបស់ក្រុមហ៊ុន Qualcomm នោះទេ។

ទោះជាយ៉ាងណាក៏ដោយ ថ្មីៗនេះក្រុមហ៊ុន Nvidia គ្រោងនឹងដឹកជញ្ជូនបន្ទះឈីប H១០០ ចំនួន ១.៥ ទៅ ២ លានបន្ទះនៅឆ្នាំ ២០២៤ ដែលខ្ពស់ជាងគោលដៅក្នុងឆ្នាំនេះ ៥០០,០០០ ដង។ ក្រុមហ៊ុនក៏បានព្យាករណ៍ផងដែរថាតម្រូវការសម្រាប់បន្ទះឈីបម៉ាស៊ីនមេ AI នឹងកើនឡើងជិត ៥០% ក្នុងរយៈពេល ៥ ឆ្នាំខាងមុខ។ នៅសហរដ្ឋអាមេរិក ក្រុមហ៊ុនផ្តល់សេវាកុំព្យូទ័រលើពពកដូចជា Microsoft, Amazon និង Google ក៏កំពុងផ្លាស់ប្តូរការផ្តោតអារម្មណ៍លើការអភិវឌ្ឍន៍របស់ពួកគេទៅការកសាង ហេដ្ឋារចនាសម្ព័ន្ធ AI ផងដែរ៕
ប្រភព៖vnexpress

ស្នាដៃ “Paulette Jourdain” ដែលគូរដោយវិចិត្រករ Amedeo Modigliani ជនជាតិអ៊ីតាលីពណ៌នានារីម្នាក់ដែលមានឈ្មោះដូចគ្នានឹងខ្លួនត្រូវបានគេរំពឹងថានឹងឈានដល់ ៤៥ លានដែលជាតម្លៃខ្ពស់បំផុតក្នុងការដេញថ្លៃ។ The Value បាននិយាយថា រូបបញ្ឈរនេះគឺស្ថិតនៅក្នុងការដេញថ្លៃរបស់គូស្នេហ៍មហាសេដ្ឋីចិន Liu Yiqian និង Wang Wei ដែលធ្វើឡើងនៅដើមខែតុលានៅ កន្លែងលក់ និងដេញថ្លៃស្នាដៃសិល្បៈ Sotheby’s ទីក្រុងហុងកុង ។

គំនូរនេះត្រូវបានគូរក្នុងឆ្នាំ ១៩១៩ ជាមួយនឹងថ្នាំផ្ទាំងក្រណាត់ទំហំ 100.3×65.4 សង់ទីម៉ែត្រ។ រូបគំនូរនេះធ្លាប់ជាផ្នែកមួយនៃបណ្តុំផ្ទាល់ខ្លួនរបស់ A. Alfred Taubman ត្រូវបានលក់ទៅឱ្យគូស្នេហ៍មហាសេដ្ឋីចិនខាងលើនៅ Sotheby’s ទីក្រុងញ៉ូញ៉ក ក្នុងឆ្នាំ២០១៥ ក្នុងតម្លៃ ៤២.៨លានដុល្លារ។

Paulette Jourdain គឺជាគំនូរចុងក្រោយរបស់វិចិត្រករ Modigliani ។ គំរូប្រភេទ Paulette កើតនៅទីក្រុងឆ្នេរសមុទ្រតូចមួយនៃភាគពាយព្យប្រទេសបារាំង ហើយបានមកទីក្រុងប៉ារីសនៅដើមឆ្នាំ ១៩១៩ ។ នារីក្នុងគំនូរនេះបានរស់នៅក្នុងផ្ទះល្វែងរបស់បុរសម្នាក់ឈ្មោះ Zborowski ហើយបានជួប Modigliani នៅទីនេះ។

Amedeo Modigliani (១៨៨៤ -១៩២០) គឺជាវិចិត្រករ និងជាងចម្លាក់ជនជាតិអ៊ីតាលី ដែលធ្វើការភាគច្រើននៅប្រទេសបារាំង។ គាត់ធ្លាប់មានការតាំងពិព័រណ៍អន្តរជាតិជាច្រើននៅទីក្រុងប៉ារីស ទីក្រុងឡុងដ៍ ហ្សូរីច និងញូវយ៉ក។ កេរ្តិ៍ឈ្មោះរបស់ Modigliani ត្រូវបានបង្កើតឡើងនៅពេលបង្កើតគំនូរ Paulette Jourdain ។

វិចិត្រកររូបនេះបានស្លាប់នៅអាយុ ៣៥ឆ្នាំនៅទីក្រុងប៉ារីសដោយសារជំងឺរលាកស្រោមខួររបេងដោយបន្សល់ទុកស្នាដៃប្រហែល ៣៥០ ដែលភាគច្រើនត្រូវបានបង្ហាញនៅសារមន្ទីរសិល្បៈ Dallas និង London។ គំនូររបស់វិចិត្រកររូបនេះពេលនៅរស់រានមានជីវិតគ្រាន់តែគូរដើម្បីដូរបាយប៉ុណ្ណោះ។ ប៉ុន្តែបន្ទាប់ពីមរណភាពរបស់លោកស្នាដៃរបស់គាត់ច្រើនតែស្ថិតក្នុងចំណោមគំនូរដែលមានតម្លៃថ្លៃបំផុត និងមានតម្លៃបំផុតគ្រប់ពេលវេលា។ ជាក់ស្តែង នៅឯ Sotheby’s ទីក្រុងញ៉ូយ៉ក ក្នុងឆ្នាំ២០១៨ រូបគំនូរស្ត្រីអាក្រាតកាយលើគ្រែដែលគូរដោយវិចិត្រករអ៊ីតាលីរូបនេះបានក្លាយជាផ្ទាំងគំនូរដែលមានតម្លៃថ្លៃបំផុតមួយនៅក្នុងប្រវត្តិសាស្ត្រ ដោយលក់នៅក្នុងការដេញថ្លៃបានចំនួន ១៥៧,២លានដុល្លារ៕