ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃបានលើកឡើងអំពីការត្រៀមផែនការទុក ប្រសិនបើគម្រោងខ្ចីប្រាក់ចំនួន៥សែនលានបាតរបស់គណបក្សភឿថៃ មិនទទួលបានការយល់ព្រមពីការិយាល័យក្រុមប្រឹក្សារដ្ឋ (Office of The Council of State) ទេនោះ ។ លោកនាយករដ្ឋមន្ត្រីថ្លែងថា មិនមែនមានតែគណបក្សភឿថៃនោះទេដែលបារម្ភ ប៉ុន្តែគ្រប់គ្នាបារម្ភថា តើគោលនយោបាយនេះនឹងទៅជាយ៉ាងណា? ជាពិសេស ពលរដ្ឋរស់នៅតាមខេត្ត និងបញ្ហាផលិតផលក្នុងស្រុកសរុប (GDP) មិនបានកើនឡើងយូរមកហើយ ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា លោកធ្លាប់បាននិយាយរួចហើយថា ប្រទេសថៃកំពុងមានវិបត្តិសេដ្ឋកិច្ច ហើយប្រទេសថៃចាំបាច់ត្រូវជំរុញសេដ្ឋកិច្ច ដោយគោលនយោបាយការផ្តល់ប្រាក់ចំនួន១ម៉ឺនបាតឱ្យពលរដ្ឋ តាមរយៈគម្រោង «Digital Wallet» ។ លោកមានទំនុកចិត្តថា វាជាគោលនយោបាយដ៏សំខាន់មួយសម្រាប់ជួយជំរុញសេដ្ឋកិច្ចថៃ ។

ចំណែកករណីលោក Chaithawat Tulathon មេដឹកនាំគណបក្សកាវក្លៃ មិនបានប្រឆាំងនឹងគោលនយោបាយផ្តល់ប្រាក់ឱ្យពលរដ្ឋម្នាក់១ម៉ឺនបាត ប៉ុន្តែមេដឹកនាំគណបក្សកាវក្លៃលើកឡើងថា ប្រសិនបើរដ្ឋាភិបាលដំណើរការគម្រោងនេះបន្តទៀត គួរតែរៀបចំផែនការទុក លោក សេដ្ឋា ថាវីស៊ីន បញ្ជាក់ថា លោកមិនចង់ប្រាប់ថា មានផែនការបម្រុងទុកអ្វីខ្លះទេ ប៉ុន្តែយើងបំពេញការងារដោយអនុវត្តតាមវិធានការជាច្រើន ដើម្បីជំរុញសេដ្ឋកិច្ចជាតិ ។

លោកនាយករដ្ឋមន្ត្រីបន្តថា បច្ចុប្បន្ន យើងផ្តោតលើការចែកប្រាក់ឱ្យពលរដ្ឋ តាមរយៈគម្រោង «Digital Wallet» ។ កន្លងមក រដ្ឋាភិបាលបានបង្ហាញពីគោលជំហរច្បាស់លាស់ដើម្បីជំរុញសេដ្ឋកិច្ច និងមានដំណាក់កាលច្បាស់លាស់ ព្រមទាំងរង់ចាំស្តាប់មតិយោបល់របស់ការិយាល័យក្រុមប្រឹក្សារដ្ឋ បន្ទាប់មក យើងនឹងស្នើសុំការអនុម័តពីរដ្ឋសភា ។

រីឯករណីដែលគណបក្សកាវក្លៃសង្ឃឹមថា ចង់ឱ្យរដ្ឋាភិបាលត្រួតពិនិត្យដោយមិនលម្អៀងនោះ លោកនាយករដ្ឋមន្ត្រីថៃលើកឡើងថា គ្មានការលម្អៀងទេ ហើយលោកសូមបញ្ជាក់ថា នឹងទទួលយកការផ្តល់មតិយោបល់ទាំងអស់ ហើយបើមានអ្វីកើតឡើង យើងនឹងអាចដោះស្រាយបាន ។ លោកជឿជាក់ថា គម្រោង «Digital Wallet» មានភាពច្បាស់លាស់ និងស្តាប់យោបល់ពីគ្រប់ភាគី ហើយក៏សូមអរគុណនូវបំណងល្អរបស់គណបក្សកាវក្លៃផងដែរ ៕ ប្រភព ៖ beartai BRIEF

បរទេស៖ Truth Social ដែលជាវេទិកាប្រព័ន្ធផ្សព្វផ្សាយសង្គមដ៏ទំនើបមួយដែលបង្កើតឡើងដោយអតីតប្រធានាធិបតីសហរដ្ឋអាមេរិក Donald Trump បានខាតបង់ប្រាក់ចំនួន ៧៣ លានដុល្លារ ចាប់តាំងពីដាក់ឱ្យប្រើប្រាស់នៅក្នុងឆ្នាំ ២០២២ មកម្លេះ។

យោងតាមគេហទំព័រ CNBC News ដែលបានចុះផ្សាយកាលពីថ្ងៃទី១៤ ខែវិច្ឆិកាថា Truth Social ដែលបង្កើតឡើងដោយក្រុមហ៊ុនប្រព័ន្ធផ្សព្វផ្សាយ និងបច្ចេកវិទ្យារបស់អាមេរិក Trump Media & Technology Group បានខាតបង់ប្រាក់ចំនួន ៧៣ លានដុល្លារ គិតចាប់ពីឆ្នាំ២០២២ រហូតមកដល់បច្ចុប្បន្ន។

នៅខែកុម្ភៈ ឆ្នាំ២០២២ បណ្តាញសង្គម Truth Social បានខាតបង់ ៧៣ លានដុល្លារឯណោះ ដោយសារមិនសូវមានអ្នកប្រើប្រាស់បណ្តាញសង្គមនេះ។ នៅថ្ងៃទី១៣ ខែវិច្ឆិកា ត្រឹមដំណាច់ឆ្នាំ ២០២២ ក្រុមហ៊ុន TMTG របស់ Donald Trump ក៏បានខាតបង់លើសពី ៥០ លានដុល្លារផងដែរ ហើយនៅពាក់កណ្តាលដំបូងនៃឆ្នាំ ២០២៣ ក្រុមហ៊ុនមួយនេះ ក៏បានបាត់បង់ ២៣ លានដុល្លារបន្ថែមទៀត ដោយ TMTG បាននិយាយថា ក្រុមហ៊ុនរបស់ខ្លួនអាចនឹងប្រឈមជាមួយការបិទ។

ទោះជាយ៉ាងណាក៏ដោយ ក្រុមហ៊ុនធំៗមួយចំនួនរបស់សហរដ្ឋអាមេរិក មានបំណងចង់បញ្ចូលក្រុមហ៊ុនរបស់លោកត្រាំជាមួយក្រុមហ៊ុនខ្លួន ដើម្បីអាចរ៉ាប់រងចំពោះបំណុល និងបន្តប្រតិបត្តិការ។ ទន្ទឹមនេះ ក្រុមហ៊ុន Digital World Acquisition Corporation ក៏បានដាក់សំណើទៅគណៈកម្មការមូលបត្រអាមេរិក (SEC) ដើម្បីច្របាច់បញ្ចូលក្រុមហ៊ុនរបស់លោកត្រាំ ជាមួយខ្លួនផងដែរ។

គួរបញ្ជាក់ដែលថា បច្ចុប្បន្នអតីតប្រធានាធិបតីសហរដ្ឋអាមេរិក Donald Trump កំពុងប្រឈមមុខនឹងការស៊ើបអង្កេតឧក្រិដ្ឋកម្មមួយចំនួនដូចជា គម្រោងកែប្រែលទ្ធផលបោះឆ្នោតឆ្នាំ២០២០, ការបង់ប្រាក់ឱ្យតារាអាសអាភាស និងការប្រើប្រាស់ឯកសារសម្ងាត់របស់រដ្ឋាភិបាលមិនត្រឹមត្រូវជាដើម ខណៈពេលដែលលោកកំពុងដឹកនាំការបោះឆ្នោតក្នុងចំណោមបេក្ខជនប្រធានាធិបតីនៃគណបក្សសាធារណរដ្ឋឆ្នាំ ២០២៤៕

សារព័ត៌មានបរទេសរាយការណ៍ថា មាននារីបម្រើការនៅលើយន្តហោះម្នាក់បានចែករំលែកបទពិសោធន៍របស់នាងនៅក្នុងបណ្តាញសង្គម ព្រមទាំងផ្តាំផ្ញើថា ពេលចូលសម្រាកក្នុងសណ្ឋាគារ យើងមិនគួរមើលរំលងក្រោមគ្រែទេ ។ គួរតែពិនិត្យមើលនៅក្រោមគ្រែសម្រាកដើម្បីសុវត្ថិភាព និងចៀសវាងហេតុការណ៍មិនល្អនឹកស្មានពុំដល់ ។

នារីរូបនេះបានបង្ហោះសារក្នុងបណ្តាញសង្គមថា នាងជាបុគ្គលិកបម្រើការនៅលើយន្តហោះរបស់ក្រុមហ៊ុនអាកាសចរណ៍ European Airlines ហើយនាងមានបទពិសោធន៍ចូលសម្រាកក្នុងសណ្ឋាគារជាច្រើនកន្លែងនៅទូទាំងពិភពលោក ។ នាងបានសង្កត់ធ្ងន់លើសុវត្ថិភាពផ្ទាល់ខ្លួនថា នៅពេលអ្នករាល់គ្នាចូលសម្រាកក្នុងសណ្ឋាគារ រឿងដំបូងដែលត្រូវធ្វើមុនគេនោះ គឺការបោះដបទឹកចូលទៅក្រោមគ្រែ ដើម្បីឱ្យប្រាកដចិត្តថា តើបន្ទប់នេះមានសុវត្ថិភាពសម្រាប់ស្នាក់នៅដែរឬទេ?

នាងពន្យល់ថា ការបោះដបទឹកចូលទៅក្រោមគ្រែ គឺជាវិធីមួយដើម្បីឱ្យយើងអាចដឹងយ៉ាងងាយថា តើមានអ្នកណាម្នាក់សម្ងំលាក់ខ្លួននៅក្រោមគ្រែដែរឬអត់? ព្រោះនៅពេលបោះដបទឹកចូលក្រោមគ្រែ បើគ្មានអ្វីនៅក្រោមនោះទេ ដបទឹករបស់យើងនឹងរមៀលទៅជ្រុងម្ខាងទៀត ។ ប៉ុន្តែបើវាមិនរមៀលមកជ្រុងម្ខាងទៀតទេ មានន័យថា មានអ្នកណាម្នាក់សម្ងំនៅក្រោមគ្រែ ហើយចាប់ដបទឹករបស់យើងទុក ពេលនោះ គឺយើងកំពុងស្ថិតក្នុងស្ថានការណ៍អាក្រក់បំផុត ។ ដូច្នេះ នាងសូមណែនាំឱ្យអ្នករាល់គ្នាប្រញាប់ចេញពីបន្ទប់ និងទូរស័ព្ទទាក់ទងទៅខាងសន្តិសុខសណ្ឋាគារភ្លាមៗ ។

ក្រៅពីនេះ ពេលយើងបោះដបទឹកចូលក្រោមគ្រែនឹងធ្វើឱ្យយើងដឹងថា តើបន្ទប់ក្នុងសណ្ឋាគារស្អាតមានអនាម័យដែរឬអត់ ព្រោះបើគេមិនបានសម្អាតបន្ទប់គ្រប់កន្លែងទេ នៅក្រោមគ្រែនឹងសម្បូរធូលី និងភាពកខ្វក់ ។ លើសពីនេះ នៅក្រោមគ្រែអាចជាកន្លែងរស់នៅរបស់សត្វផ្សេងៗ ដូចជា ស្រមោច, កន្លាត និងសង្កើចផងដែរ ដែលធ្វើឱ្យអ្នកចូលសម្រាកឆ្លងមេរោគបាន ។

ចុងក្រោយ នារីបម្រើការលើយន្តហោះនិយាយថា នៅក្រោមគ្រែក្នុងបន្ទប់សណ្ឋាគារ ក៏អាចជាកន្លែងដែលអ្នកណាម្នាក់លាក់ទុករបស់របរខុសច្បាប់ ។ ដូច្នេះ ការពិនិត្យមើលនៅក្រោមគ្រែពេលយើងចូលសម្រាកក្នុងបន្ទប់សណ្ឋាគារ គឺជាវិធីដំបូងជួយឱ្យយើងអាចការពារខ្លួនបានយ៉ាងមានប្រសិទ្ធភាព ៕ ប្រភព ៖ khaosod

ប្រទេសឡាវ ៖ អាកាសយានដ្ឋានអន្តរជាតិថ្មីដែលស្ថិតនៅខេត្តបរកែវ (Bokeo) ភាគខាងជើងប្រទេសឡាវ នឹងត្រៀមបើកដំណើរការនៅចុងឆ្នាំ២០២៣ នេះ ។ គម្រោងសាងសង់អាកាសយានដ្ឋានអន្តរជាតិបរកែវ បានវិនិយោគក្នុងទឹកប្រាក់សរុបចំនួន១៧៥លានដុល្លារអាមេរិក ដែលទទួលបានការគាំទ្រពីក្រុមហ៊ុន Greater Bay Area Investment and Development ។

គម្រោងសាងសង់អាកាសយានដ្ឋានអន្តរជាតិថ្មីនេះ បានចាប់ផ្តើមតាំងខែកញ្ញា ឆ្នាំ២០២០ ហើយចាប់ពីពេលនោះមក គម្រោងសាងសង់បានវិវឌ្ឍន៍ទៅមុខជាលំដាប់ ក្នុងនោះបានបញ្ចប់ការសាងសង់ផ្លូវ Runway និងព្រលានសម្រាប់ឱ្យយន្តហោះចុះចត ។ បច្ចុប្បន្ន នៅក្នុងអាកាសយានដ្ឋានថ្មី នៅសល់តែការតុបតែងលម្អផ្សេងៗ ដូចជា ការរៀបចំផ្នែកខាងក្នុង និងការដាក់សម្ភារៈចាំបាច់សម្រាប់ផ្តល់ភាពងាយស្រួលមួយចំនួន ។

អាកាសយានដ្ឋាន «បរកែវ» របស់ឡាវមានទីតាំងស្ថិតនៅចំណុចយុទ្ធសាស្ត្រជិតតំបន់សេដ្ឋកិច្ចពិសេសត្រីកោណមាស ហើយអាកាសយានដ្ឋានថ្មីនឹងត្រៀមទទួលភ្ញៀវទេសចរជាតិ និងអន្តរជាតិក្នុងចំនួនច្រើន ជាពិសេស ភ្ញៀវទេសចរចិន ។ អាកាសយានដ្ឋាននេះសាងសង់ឡើងដើម្បីឱ្យយន្តហោះធំៗអាចចុះចតបាន ដូចជា Boeing 747 និង Airbus 320 ដោយរដ្ឋាភិបាលឡាវបានផ្តល់សិទ្ធិឱ្យវិស័យឯកជនសាងសង់ រចនាម៉ូដ និងគ្រប់គ្រងសេវាកម្ម (BOT) ជាមួយសម្បទានរយៈពេល៥០ឆ្នាំ ។

ទោះយ៉ាងណា នៅពេលសាងសង់រួចរាល់ អាកាសយានដ្ឋាននេះនឹងចាប់ផ្តើមដំណើរការទទួលភ្ញៀវទេសចរជាតិ និងអន្តរជាតិមកកម្សាន្តនៅប្រទេសឡាវ នាចុងឆ្នាំ២០២៣ ។ នេះចាត់ទុកថា គឺជាការបោះជំហានទៅមុខដ៏សំខាន់សម្រាប់ខេត្តបរកែវ ប្រទេសឡាវ ព្រមទាំងជាការតភ្ជាប់ទំនាក់ទំនងជាមួយប្រទេសនានាក្នុងតំបន់ ក៏ដូចជាពិភពលោកផងដែរ ៕ ប្រភព ៖ AEC connect

បរទេស៖ ភពអង្គារបានផ្លាស់ទីនៅពីក្រោយព្រះអាទិត្យ ដែលធ្វើឱ្យ NASA ពិបាកក្នុងការទំនាក់ទំនងជាមួយមនុស្សយន្តរុករកអស់រយៈពេលជាច្រើនសប្តាហ៍។

យោងតាមគេហទំព័រ IFL Science ដែលបានរាយការណ៍កាលពីថ្ងៃទី១៤ ខែវិច្ឆិកាថា យានអវកាស Rovers និងកប៉ាល់ជុំវិញភពអង្គារបានបាត់សញ្ញាអស់រយៈពេលជាច្រើនសប្តាហ៍ ដោយសារតែផែនដីមិនអាចទាក់ទងជាមួយភពក្រហមបាន មានន័យថាភពអង្គារបានផ្លាស់ទីនៅពីក្រោយព្រះអាទិត្យ ដែលនាំឱ្យមានការរំខានដល់ការបញ្ជូនសញ្ញារវាងយានជំនិះ និង NASA នៅលើផែនដី។ ដូច្នេះ NASA បានបញ្ឈប់ការទាក់ទងជាមួយយានអវកាសរបស់ខ្លួននៅថ្ងៃទី១១ ខែវិច្ឆិកា រហូតដល់ថ្ងៃ២៥ ខែវិច្ឆិកា ទើប NASA បន្តអាប់ដេតស្ថានភាពខ្លីៗពីយាន Rover ឡើងវិញក្នុងអំឡុងពេលស្ថិតនៅលើភពអង្គារ។

នៅពេលដែលភពអង្គារនៅជិតព្រះអាទិត្យពេក សញ្ញាវិទ្យុដែលបញ្ជូនរវាងភពទាំងពីរអាចធ្វើដំណើរឆ្លងកាត់ Corona ដែលជាស្រទាប់ឧស្ម័នអ៊ីយ៉ូដក្តៅខ្លាំងនៅផ្នែកខាងក្រៅនៃព្រះអាទិត្យ។ នេះអាចរំខានដល់សញ្ញាដែលធ្វើដំណើរពីផែនដី និងពីភពអង្គារ ដែលនាំឱ្យបាត់បង់ទិន្នន័យ និងអាកប្បកិរិយាចម្លែកដែលអាចគំរាមកំហែងដល់យានរ៉ូវ័រ។

ទោះជាយ៉ាងណាក៏ដោយ មនុស្សយន្តរុករក និងយានអវកាសដែលធ្វើដំណើរជុំវិញគន្លងនឹងមិនបញ្ឈប់ប្រតិបត្តិការទេ ដោយពួកវានៅតែបន្តប្រមូលទិន្នន័យសម្រាប់ការបញ្ជូននៅពេលក្រោយ។ ដូច្នោះហើយ ក្រុមត្រួតពិនិត្យបេសកកម្មរបស់ NASA បានចំណាយពេលជាច្រើនខែក្នុងការរៀបចំបញ្ជីការងារដែលត្រូវធ្វើសម្រាប់យានជំនិះទាំងអស់។

គួរបញ្ចាក់ដែរថា មនុស្សយន្ត Perseverance and Curiosity របស់ NASA នឹងនៅលើភពអង្គារដដែល ដោយបន្តតាមដានការផ្លាស់ប្តូរស្ថានភាពផ្ទៃភពអង្គារ អាកាសធាតុ និងវិទ្យុសកម្ម ខណៈដែលឧទ្ធម្ភាគចក្រ Ingenuity នឹងប្រើប្រាស់កាមេរ៉ាពណ៌ដើម្បីសិក្សាចលនាខ្សាច់។ នៅក្នុងគន្លងតារាវិថី យានអវកាស Mars Reconnaissance និង Odyssey នឹងថតរូបផ្ទៃភពអង្គារ ខណៈដែលយានអវកាស MAVEN នឹងប្រមូលទិន្នន័យស្តីពីអន្តរកម្មរវាងបរិយាកាសនៃភពក្រហម និងព្រះអាទិត្យ៕

កញ្ញា Nguyen Thuc Thuy Tien (ង្វៀន ធុកធុយធៀន) ដែលជាអតីតម្ចាស់ជ័យលាភី Miss Grand International 2021 បានចេញមុខបកស្រាយជាផ្លូវការ ជុំវិញពាក្យចចាមអារ៉ាមពាក់ព័ន្ធនឹងអំពើពេស្យាចារ។ ជាមួយគ្នានេះអតីតបវរកញ្ញារូបនេះទើបតែឈ្នះបណ្តឹងលើសំណុំរឿងជម្លោះលើកិច្ចសន្យាខ្ចីប្រាក់ ដែលភាគីដើមបណ្តឹងទាមទារចំនួន១.៥ពាន់លានដុង។

នៅលើបណ្តាញផ្ទាល់ខ្លួនរបស់កញ្ញា Thuy Tien នារសៀលថ្ងៃទី១៤ វិចិ្ឆកា បានចេញមកបកស្រាយជាលើកដំបូងពីពាក្យចចាមអារ៉ាមអំពីនាងដែលលេចលើបណ្ដាញសង្គមនាពេលថ្មីៗនេះពាក់ព័ន្ធនឹងអំពើពេស្យាចារដោយនាងបានអះអាងថាគឺជារឿងមិនពិត និងមានចេតនាដឹកនាំមតិសាធារណៈបង្ខូចកេរ្តិ៍ឈ្មោះ។
នៅក្នុងការបង្ហោះរបស់ Thuy Tien បានបញ្ជាក់ថា ពាក្យចចាមអារ៉ាមទាំងនេះមិនពិត និងជាសកម្មភាពបំភាន់មតិសាធារណៈដោយចេតនា។ Miss Grand International 2021 បាននិយាយថា យោងតាមការសន្និដ្ឋានរបស់នាយកដ្ឋាននគរបាលព្រហ្មទណ្ឌនៃក្រសួងសន្តិសុខសាធារណៈនាងមិនពាក់ព័ន្ធអំពើពេស្យាចារនេះទេ។

ពាក្យចចាមអារ៉ាមអំពី Thuy Tien បានកើតឡើងចាប់តាំងពីពេលដែលអាជ្ញាធរបានបំផ្លាញបទល្មើសពេស្យាចារដែលមានការចូលរួមពីតារាចម្រៀង និងតារាបង្ហាញម៉ូតល្បីៗជាច្រើននាក់នៅក្នុងកម្មវិធី showbiz របស់វៀតណាមកាលពីដើមខែវិច្ឆិកា។ មេខ្លោងនៃអំពើពេស្យាចារនេះគឺ Huynh Thanh Thuan ដែលធ្វើការជាអ្នកផាត់មុខ និងអ្នកប្រឹក្សាស្ទីលផ្ទាល់ខ្លួន (stylist) ព្រមទាំងមានទំនាក់ទំនង និងធ្លាប់រួមការងារជាមួយសិល្បករល្បីៗជាច្រើនក្នុងកម្មវិធី showbiz។ នៅពេលដែលមេខ្លោងត្រូវបានចាប់ខ្លួន រូបភាពរបស់កញ្ញា Thuy Tien ជាមួយបុគ្គលនេះ បានលេចឡើងនៅលើបណ្តាញសង្គម អមដោយពាក្យចចាមអារ៉ាមអវិជ្ជមានជាច្រើន។
Thuy Tien បាននិយាយថា រូបថតដែលថតជាមួយគ្នាមានតាំងពីឆ្នាំ ២០១៩ មកម្ល៉េះ ទោះជាយ៉ាងណាក៏ដោយ ការប្រើប្រាស់រូបថតកាលពី ៤ ឆ្នាំមុន thuy Tien ថាជាផែនការរៀបចំមួយដើម្បីបង្ខូចកេរ្តិ៍ឈ្មោះមុនពេលសវនាការឧទ្ធរណ៍ក្នុងគោលបំណងអាក្រក់។ ដូច្នេះហើយទើបនាង និងក្រុមហ៊ុនគ្រប់គ្រងមិននិយាយអ្វីឡើយក្នុងរយៈពេលប៉ុន្មានថ្ងៃកន្លងមកនេះ ដើម្បីកុំឱ្យហេតុការណ៍កាន់តែធ្ងន់ធ្ងរឡើង។

ជុំវិញបញ្ហាតាមអ៊ីនធឺណិត និងការបញ្ចេញមតិផ្សេងៗអតីតបវរកញ្ញាវៀតណាមរូបនេះបាននិយាយថា នាង និងក្រុមហ៊ុនគ្រប់គ្រងបានធ្វើការជាមួយនាយកដ្ឋានព័ត៌មាន និងទំនាក់ទំនងទីក្រុងហូជីមិញ ដើម្បីដោះស្រាយបញ្ហាជាមួយភាគីពាក់ព័ន្ធ រួមទាំងនៅលើបណ្តាញទំនាក់ទំនងសង្គម៖ Facebook, Tiktok និង Youtubeជាដើម៕