តារាចម្រៀង ពេជ្រ សោភា បានចេញមុខប្រកាសដល់អ្នកគាំទ្ររៃអង្គាសប្រាក់ជួយម្នាក់១ដុល្លារដើម្បី Vote ដល់ ចន សុទីម៉ា ក្នុងការប្រកួត Miss Universe លើកទី៧២ លើទឹកដី El Salvador ។ តារាចម្រៀងរូបនេះបានលើកឡើងទៀតថាទោះឈ្នះដោយសារលុយក៏យកដែរសំខាន់ប្រទេសតូចតែមានបេះដូងធំ។ ឆ្លើយតបទឹកចិត្តដ៏ប្រពៃនេះ ចន សុទីម៉ា បានអរគុណទៅដល់ ពេជ្រ សោភា ចំពោះការជួយខ្លួនផងដែរ។
នៅល្ងាចថ្ងៃទី១៦ វិច្ឆិកា លើបណ្តាញសង្គមរបស់ ពេជ្រ សោភា បានសរសេរថា «ចូលរួមម្នាក់ 1$ ដើម្បីវូតអោយ Miss Universe Cambodia John Sotima» ។ ជាមួយគ្នានេះដែរ ចន សុទីម៉ា បានសរសេរអរគុណដល់ តារាចម្រៀងរូបនេះវិញថា «អគុណបងសម្រាប់ការជួយដល់ប្អូន»។
មិនត្រឹមតែបង្ហោះអំពាវនាវដល់ប្រជាជនជួយម្នាក់១ដុល្លារ ដល់ការVote ដល់ ចន សុទីម៉ា ប៉ុណ្ណោះទេ តែអ្នកនាង ពេជ្រ សោភា បានLiveនៅលើហ្វេកប៊ុកបន្ថែមទៀតដើម្បីឱ្យអ្នកស្នេហាវិស័យបវរកញ្ញាជួយ Vote ដល់ ចន សុទីម៉ា ដើម្បីឈ្នះលើការVote ផងដែរ។ ក្នុងការ Live នោះតារាចម្រៀង ពេជ្រ សោភា បាននិយាយប្រសិនជាយើងជួយគ្នា សុទីម៉ា ដឹងតែចូល TOP មួយទំហឹង ហើយកុំប្រើភាសាថាប្រកួតឈ្នះដោយសារលុយ។
ពេជ្រ សោភា បានលើកឡើងថា ឈ្នះដោយសារលុយក៏យកឱ្យតែឈ្នះ គឺឡូយបែបហ្នឹងឱ្យតែមានលុយVote ស្រុកយើងគឺបែបនេះប្រទេសតូចតែបេះដូងធំ។
នេះមិនមែនជាលើកទី១ទេ ដែល ពេជ្រ សោភា ជួយជ្រោមជ្រែងលើវិស័យបវរកញ្ញា ជាក់ស្តែងកាលពីកន្លងទៅ ក៏បានជួយដល់ ប៉ូគឹមថេង សុធីតា កាលប្រកួត Miss grand International 2021 ផងដែរហើយពេលនោះ សុធីតា គឺបានឈ្នះលើការ Vote ក្រោមការសាមគ្គីពីអ្នកគាំទ្រជួយគ្នារហូតទទួលជ័យជម្នះ។
សូមបញ្ជាក់ថា បេក្ខភាព ចន សុទីម៉ា អ្នកគាំទ្រកម្ពុជារំពឹងខ្ពស់ថានាងនឹងបើកទ្វារប្រទេសកម្ពុជាចូលTopក្នុងការប្រកួត Miss Universe ក្នុងថ្ងៃផ្តាច់ព្រ័ត្រដែលប្រព្រឹត្តទៅនៅយប់ថ្ងៃទី១៨ ខែវិច្ឆិកា ត្រូវនឹងព្រឹកថ្ងៃទី១៩ ខែវិច្ឆិកា ពេលវេលានៅកម្ពុជា៕
