Zealandia គឺជាទ្វីបថ្មីនៅលើពិភពលោក ដែលគេបានរកឃើញតាំងពីឆ្នាំ២០១៧ មកម៉្លេះ ។ ប៉ុន្តែក្រុមអ្នកវិទ្យាសាស្ត្រទើបតែប្រមូលផ្តុំទិន្នន័យ និងបង្កើតផែនទីរបស់ទ្វីបថ្មីនេះរួចរាល់ ដើម្បីឱ្យពិភពលោកដឹងថា ទ្វីបថ្មីមានលេខរៀងទី៨ នេះ មានផ្ទៃដីរហូតដល់៩៥% បានលិចនៅក្រោមទឹកសមុទ្រ ។

ទ្វីប Zealandia មានទំហំតូច និងស្តើងខ្លាំងណាស់ បើធៀបនឹងទ្វីបផ្សេងៗចំនួន៧ទ្វីបនៅលើពិភពលោក ។ អ្នកជំនាញលើកឡើងថា វាបានបំបែកចេញពីមហាទ្វីបបុរាណឈ្មោះ Gondwana កាលពីរាប់លានឆ្នាំមុន ។ ផ្ទៃដីរបស់ទ្វីបនេះប្រមាណពី៩៤% ដល់៩៥% គឺស្ថិតនៅក្រោមទឹកសមុទ្រ ដោយសារថ្មរវាងព្រំប្រទល់ទ្វីបផ្សេងទៀតមានអាយុកាលខុសគ្នា ទើបធ្វើឱ្យអ្នកវិទ្យាសាស្ត្រអាចបញ្ជាក់ថា វានៅដាច់ពីគ្នា ។

របាយការណ៍បានបញ្ជាក់ទៀតថា ទ្វីប Zealandia មានរូបរាងខុសធម្មតា ហើយវាមានទំហំស្តើងបែបនេះ អាចដោយសារទ្វីបអង់តាក់ទិកបានពង្រីកទំហំ រហូតដល់មានស្នាមប្រេះ ។ ដូច្នេះ វាបានធ្វើឱ្យទ្វីប Zealandia កាន់តែស្តើងជាងមុន ។

ទោះយ៉ាងណា នៅមានអាថ៌កំបាំងផ្សេងទៀតដែលអ្នកវិទ្យាសាស្ត្រពុំបានដឹង ដូចជា ហេតុអ្វីបានជាទ្វីប Zealandia មិនបំបែកចេញពីគ្នា ហើយក្លាយជាទ្វីបតូចៗ ព្រោះវាស្តើងស្រាប់ទៅហើយ ។ ប៉ុន្តែមើលទៅ ហាក់ដូចជាត្រូវចំណាយពេលយូរទៀតដើម្បីបង្ហាញពីអាថ៌កំបាំងទាំងអស់ ហើយបច្ចុប្បន្ន អ្នកវិទ្យាសាស្ត្រទើបទទួលបានជោគជ័យក្នុងដំណាក់កាលដំបូង គឺការបង្កើតផែនទីទ្វីប ។

Andy Tulloch ជាអ្នកធរណីវិទ្យាមកពី New Zealand Crown Research Institute GNS Science ប្រាប់ថា ៖ «វាពិតជាពិបាកខ្លាំងណាស់ ទម្រាំគេអាចរកឃើញទ្វីបនេះ ដោយសារវាស្ថិតនៅក្រោមទឹកសមុទ្រក្នុងជម្រៅរហូតដល់២គីឡូម៉ែត្រ ។ ការចេញទៅស្រាវជ្រាវទ្វីបបែបនេះមានការលំបាកណាស់ ព្រោះការជិះនាវាស្រាវជ្រាវក្នុងតំបន់ គឺត្រូវចំណាយពេលវេលាយូរ, ចំណាយប្រាក់ និងត្រូវព្យាយាមផងដែរ» ៕ ប្រភព ៖ chiangmai news

ប្រទេសចិន ៖ នំសែនព្រះខែ បន្លែ និងផ្លែឈើជាច្រើនមុខបានលក់ដាច់ជាបន្តបន្ទាប់ក្នុងរដូវកាលសែនព្រះខែនៅប្រទេសចិន ឬ Mid-Autumn Festival ។ គេសង្កេតឃើញថា មានពលរដ្ឋចិនជាច្រើននាក់បាននាំគ្នាមកឈរតម្រង់ជួររង់ចាំទិញនំសែនព្រះខែដ៏សែនឆ្ងាញ់ នៅតាមបណ្តាហាងនានា ។

គេបានធ្វើនំសែនព្រះខែតាមរូបមន្តដើម គឺមានស្នូលសាច់, សណ្តែក និងស៊ុតប្រៃ ហើយនំទាំងនេះទទួលបានការពេញនិយមនៅទីក្រុងសៀងហៃ ។ ហាងលក់នំសែនព្រះខែមួយចំនួនបានប្រឹងប្រែងធ្វើនំនេះឡើងឱ្យមើលទៅទាន់សម័យ ដើម្បីឱ្យយុវជនជំនាន់ថ្មីចាប់អារម្មណ៍ ។ ចំណែកហាងលក់នំសែនព្រះខែមួយកន្លែងនៅទីក្រុងប៉េកាំងរំពឹងថា នៅឆ្នាំ២០២៣ នឹងអាចលក់នំសែនព្រះខែបានច្រើនជាងឆ្នាំមុនៗ ខណៈការលក់បន្លែ និងផ្លែឈើ ក៏បានកើនឡើងខ្ពស់ដូចគ្នាដែរ ។

អ្នកនាង Shi Yan នាយករងហាង Beijing Daoxiangcun និយាយថា ៖ «យោងតាមទិន្នន័យឃើញថា ចំនួនការលក់នំសែនព្រះខែនៅឆ្នាំ២០២៣នេះ នឹងកើនឡើងយ៉ាងពិតប្រាកដ បើធៀបនឹងឆ្នាំ២០២២» ។

រោងចក្រផលិតនំសែនព្រះខែនៅខេត្តក្វាងទុង បានដំឡើងគ្រឿងម៉ាស៊ីនផលិតទាំងអស់ ដើម្បីបង្កើនការផលិតនំសែនព្រះខែឱ្យទាន់តម្រូវការរបស់អតិថិជន ។ រីឯការិយាល័យគយប្រចាំខេត្តក្វាងទុងបញ្ជាក់ថា ចាប់ពីខែឧសភា ឆ្នាំ២០២៣ រហូតដល់ថ្ងៃទី២០ ខែកញ្ញា ឆ្នាំ២០២៣ តម្លៃការនាំចេញនំសែនព្រះខែរបស់ចិន គឺស្មើជាង៥១លានយាន់ ។

នៅឆ្នាំ២០២៣ មានការបន្ថែមថ្ងៃឈប់សម្រាកនៅប្រទេសចិន គឺចាប់ពីថ្ងៃទី២៦ ខែកញ្ញា រហូតដល់ថ្ងៃទី៦ ខែតុលា ឆ្នាំ២០២៣ ហើយប្រទេសចិននឹងប្រារព្ធពិធីបុណ្យជាតិ គឺថ្ងៃទី១ ខែតុលា ។ រីឯពិធីបុណ្យសែនព្រះខែ ប្រទេសចិនបានប្រារព្ធធ្វើនៅថ្ងៃទី២៩ ខែកញ្ញា ហើយវាជាពិធីបុណ្យមួយដែលក្រុមគ្រួសារជនជាតិចិនបានចំណាយពេលនៅជុំគ្នា ៕ ប្រភព ៖ TNN World

បរទេស៖ ការបំផ្ទុះគ្រាប់បែកនៅក្នុងព្រឹត្តិការណ៍រំលឹកខួបកំណើតរបស់ព្យាការី Mohammed ក្នុងទីក្រុង Balochistan ភាគនិរតីនៃប្រទេសប៉ាគីស្ថានកាលពីថ្ងៃទី ២៩ ខែកញ្ញា បានសម្លាប់មនុស្សយ៉ាងហោចណាស់ ៥២ នាក់។
យោងតាមលោក Abdul Razzaq Sasoli មន្ត្រីក្នុងតំបន់បានពិពណ៌នាថា នៅពេលមនុស្សរាប់រយនាក់បានធ្វើក្បួនដង្ហែរចេញពីព្រះវិហារ Madina ឆ្ពោះទៅកាន់ផ្លូវ Al Falah ស្រុក Mastung មានជនអាថ៌កំបាំងម្នាក់បានធ្វើសកម្មភាពបំផ្ទុះគ្រាប់បែក។ លោក ក៏បានបន្តទៀតថា “បុរសម្នាក់នោះបានបំផ្ទុះវានៅជិតឡានរបស់អគ្គនាយករងប៉ូលីស”។

ទោះជាយ៉ាងណាក៏ដោយ គ្មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះឡើយ។ ការបំផ្ទុះគ្រាប់បែកនៅក្នុងព្រឹត្តិការណ៍នេះ បានធ្វើឱ្យមនុស្ស ៥២ នាក់ស្លាប់ និង ៥៨ នាក់ទៀតរងរបួស។ មន្ត្រីសុខាភិបាលក្នុងស្រុក Abdul Rasheed បាននិយាយថា ចំនួនអ្នកស្លាប់អាចនឹងកើនឡើង ដោយសារតែមនុស្សជាច្រើនកំពុងស្ថិតក្នុងស្ថានភាពធ្ងន់ធ្ងរ។

មន្ត្រីប៉ាគីស្ថានបានចេញសេចក្តីជូនដំណឹងបន្ទាន់មួយ ដោយអំពាវនាវឱ្យប្រជាជនបរិច្ចាគឈាម។ រដ្ឋមន្ត្រីក្រសួងមហាផ្ទៃលោក Sarfraz Bugti បានរិះគន់ថា “នេះគឺជាទង្វើដ៏ឃោរឃៅបំផុត” ដូច្នេះប្រទេសនឹងប្រារព្ធពិធីកាន់ទុក្ខរយៈពេលបីថ្ងៃ ដើម្បីចូលរួមរំលែកទុក្ខដល់ជនរងគ្រោះ។ ការបំផ្ទុះគ្រាប់បែកនេះបានកើតឡើងក្នុងបរិបទនៃជម្លោះបន្តនៅតំបន់ព្រំដែនភាគខាងលិចប៉ាគីស្ថាន ដោយក្រុមសកម្មប្រយុទ្ធជាច្រើនប្រកួតប្រជែងដណ្តើមយកទឹកដី និងធនធានរ៉ែនៅក្នុងតំបន់។

គួររំលឹកដែរថា ប្រទេសប៉ាគីស្ថាន កាលពីឆ្នាំ២០២១ ធ្លាប់មានការទម្លាក់គ្រាប់បែកដោយសារការវាយប្រហារដោយហឹង្សាចាប់តាំងពីក្រុមតាលីបង់បានដណ្តើមអំណាចឡើងវិញនៅប្រទេសជិតខាងអាហ្វហ្គានីស្ថាន។ ប៉ុន្តែរដ្ឋាភិបាលប៉ាគីស្ថានក៏បានបង្រ្កាប និងស្តារសណ្តាប់ធ្នាប់ឡើងវិញ៕
ប្រភព៖vnexpress

បរទេស៖ វីរុស Metapneumo (hMPV) ដែលជាមេរោគរលាកសួតចំពោះមនុស្ស កំពុងរីករាលដាលយ៉ាងឆាប់រហ័សនៅក្នុងរដ្ឋ New South Wales នៃប្រទេសអូស្ត្រាលី។

យោងតាមប្រភពព័ត៌មាន Australian Broadcasting corporation ដែលបានរាយការណ៍នៅថ្ងៃទី២៨ ខែកញ្ញាថា ចាប់តាំងពីដើមខែកញ្ញា រហូតដល់ថ្ងៃទី ២០ កញ្ញា មានករណីវិជ្ជមានសរុបចំនួន ១,១៦៨ ករណីដែលឆ្លងមេរោគរលាកសួត Metapneumo (hMPV)។ ទោះជាយ៉ាងណាក៏ដោយ ថ្មីៗនេះយោងតាមអ្នកជំនាញ បាននិយាយថា មិនមែនមានតែរដ្ឋ New South Wales ទេដែលឆ្លងវីរុសនេះ សូម្បីតែក្នុងរដ្ឋផ្សេងៗទៀតក៏មានឆ្លងមេរោគ (hMPV) ផងដែរ។

hMPV គឺជាមេរោគដែលមានរោគសញ្ញាមិនខុសពីជំងឺផ្តាសាយធម្មតានោះទេ។ រោគសញ្ញារបស់វាក៏ស្រដៀងទៅនឹង COVID-១៩ ផងដែរ ដែលជាវីរុស syncytial ផ្លូវដង្ហើម (RSV) នឹងមានលក្ខណៈហ្សែនស្រដៀងទៅនឹង hMPV។ hMPV ជាធម្មតាច្រើនតែកើតមានឡើងនៅរដូវរងារ និងរដូវផ្ការីក។ ចំពោះកុមារតូចៗ មនុស្សចាស់ និងមនុស្សដែលមានប្រព័ន្ធការពាររាងកាយខ្សោយ គឺងាយនឹងកើតជំងឺនេះធ្ងន់ធ្ងរបំផុត។ ទោះជាយ៉ាងណាក៏ដោយ វីរុស hMPV មិនអាចសម្លាប់មនុស្សបានភ្លាមៗទេ ប៉ុន្តែវាអាចបណ្តាលឱ្យអ្នកជំងឺរលាកសួតធ្ងន់ធ្ងរ។

ដូច្នេះហើយ បច្ចុប្បន្ននេះ មេរោគរលាកសួត hMPV នៅតែបន្តរីករាលដាលនៅក្នុងប្រទេសអូស្ត្រាលី ដោយមិនទាន់មានវ៉ាក់សាំងណា ឬវិធីសាស្ត្រផ្លូវការដើម្បីព្យាបាលជំងឺដែលបណ្តាលមកពីវីរុស hMPV នោះទេ៕
ប្រភព៖cafef.com

ប្រទេសជប៉ុន ៖ ពលរដ្ឋជប៉ុនបានប្រមូលផ្តុំគ្នាតវ៉ានៅតំបន់អាជីវកម្មទីក្រុងតូក្យូ ដើម្បីប្រឆាំងនឹងរដ្ឋាភិបាលសម្រេចបង្កើនថវិកាផ្នែកយោធា នៅពេលពលរដ្ឋមួយចំនួនប្រឈមនឹងការលំបាក និងអតិផរណាកើនឡើងខ្ពស់ ដែលបានប៉ះពាល់ដល់ជីវភាពរស់នៅប្រចាំថ្ងៃ ។ ពលរដ្ឋជប៉ុនបានសំណូមពរឱ្យរដ្ឋាភិបាលបញ្ឈប់អនុវត្តយុទ្ធសាស្ត្រការពង្រីកកងកម្លាំងយោធារបស់សហរដ្ឋអាមេរិក ហើយងាកមកប្រើប្រាស់ថវិកាទាំងនេះសម្រាប់អភិវឌ្ឍន៍សេដ្ឋកិច្ចរបស់ប្រទេស ។

ស្ត្រីជប៉ុនម្នាក់បានមកតវ៉ានិយាយថា ៖ «បច្ចុប្បន្ន តម្លៃទំនិញបានកើនឡើងខ្ពស់នៅប្រទេសជប៉ុន ហើយពលរដ្ឋមានជីវភាពក្រលំបាកកើនឡើង ។ ហេតុនេះ នៅមានផ្នែកជាច្រើនទៀតដែលរដ្ឋាភិបាលអាចចំណាយថវិកាជួយពលរដ្ឋបាន ។ ខ្ញុំគិតថា វាជាការខុសឆ្គងដែលរដ្ឋាភិបាលត្រូវចំណាយថវិកាទាំងនេះលើផ្នែកការពារប្រទេស» ។

ចំណែកអ្នកតវ៉ាផ្សេងទៀតបញ្ជាក់ថា ប្រទេសជប៉ុនគួរតែបញ្ឈប់ការបង្កើនកងកម្លាំងយោធា ហើយងាកមករៀនសូត្រពីប្រវត្តិសាស្ត្រការឈ្លានពានរបស់ជប៉ុននាពេលកន្លងមក ដែលបានបង្កគ្រោះថ្នាក់ដល់មនុស្សម្នានៅតំបន់អាស៊ី ។

ការប្រឆាំងនឹងការបង្កើនថវិកាយោធានេះ មិនបានកើតឡើងតែនៅប្រទេសជប៉ុននោះទេ គេសង្កេតឃើញថា សមាជិកគណបក្ស Republican មានមតិរិះគន់ និងប្រឆាំងចំពោះការចំណាយប្រាក់ដ៏ច្រើនមហាសាលទៅលើសង្គ្រាមនៅអ៊ុយក្រែន ក្រោយពីលោកប្រធានាធិបតីសហរដ្ឋអាមេរិក ចូ បៃដិន បានប្រកាសផ្តល់ជំនួយផ្នែកយោធាដល់ប្រទេសអ៊ុយក្រែន ចំនួន១២៨លានដុល្លារអាមេរិក ។

សមាជិកសភាមកពីគណបក្ស Republican ចំនួន២៨រូបបានឯកភាពគ្នាលើលិខិត១ច្បាប់ ដើម្បីប្រឆាំងនឹងការផ្តល់ថវិកាឱ្យប្រទេសអ៊ុយក្រែនបន្ថែមទៀត ។ នៅក្នុងលិខិតនេះបញ្ជាក់ថា ពលរដ្ឋអាមេរិកមានសិទ្ធិដឹងថា តើប្រាក់របស់ពួកគេត្រូវបានចំណាយទៅលើអ្វីខ្លះ ៕ ប្រភព ៖ TNN World

ប្រទេសថៃ ៖ លោក វិថ័យ រតនៈកន (Withai Rattanakorn) នាយកធនាគារអមស៊ីន (Government Savings Bank) របស់ប្រទេសថៃលើកឡើងថា ធនាគារអមស៊ីន នឹងមិនដំឡើងអត្រាការប្រាក់កម្ចីទេ ហើយធនាគារនឹងរក្សាអត្រាការប្រាក់កម្ចីឱ្យបានយូរបំផុត តាមអ្វីដែលធនាគារអាចធ្វើបាន ។ ការរក្សាអត្រាការប្រាក់កម្ចីនៅដដែលនេះ គឺដើម្បីជួយសម្រាលបន្ទុកការចំណាយប្រចាំថ្ងៃរបស់ពលរដ្ឋថៃ ក្នុងអំឡុងពេលសេដ្ឋកិច្ចកំពុងងើបឡើងវិញ ។ ប៉ុន្តែធនាគារអមស៊ីន នឹងដំឡើងអត្រាការប្រាក់បញ្ញើឱ្យខ្ពស់ជាងមុន ។

លោក វិថ័យ រតនៈកន នាយកធនាគារអមស៊ីន បន្តថា បើទោះជាកាលពីថ្ងៃទី២៧ ខែកញ្ញា ឆ្នាំ២០២៣ គណៈកម្មការគោលនយោបាយហិរញ្ញវត្ថុបានសម្រេចបង្កើនអត្រាការប្រាក់គោលពី០,២៥% ទៅ២,៥០% ក្នុង១ឆ្នាំ ហើយមានធនាគារពាណិជ្ជកម្មមួយចំនួនចាប់ផ្តើមផ្លាស់ប្តូរអត្រាការប្រាក់របស់ពួកគេក្តី ក៏ប៉ុន្តែធនាគារអមស៊ីន នៅតែរក្សាអត្រាការប្រាក់កម្ចីដូចមុន ។

ធនាគារអមស៊ីន នឹងរក្សាអត្រាការប្រាក់កម្ចីចំនួន៣ប្រភេទ រួមមាន ៖
១-អត្រាការប្រាក់កម្ចីសម្រាប់អតិថិជនធំៗ
២-អត្រាការប្រាក់កម្ចីសម្រាប់អតិថិជនធំៗប្រភេទប្រាក់បន្ថែម
៣-អត្រាការប្រាក់កម្ចីសម្រាប់អតិថិជនតូចៗ

លោក វិថ័យ រតនៈកន នាយកធនាគារអមស៊ីន បន្ថែមទៀតថា ៖ «យើងបានទទួលគោលនយោបាយពីរដ្ឋាភិបាលថៃរួចហើយ គឺធនាគារអមស៊ីន នឹងត្រៀមខ្លួនជួយសម្រាលបន្ទុកការចំណាយប្រចាំថ្ងៃរបស់ពលរដ្ឋយ៉ាងពេញទំហឹង ដោយការរក្សាអត្រាការប្រាក់កម្ចីដូចមុនឱ្យបានយូរបំផុត ។ ការមិនដំឡើងអត្រាការប្រាក់កម្ចី នឹងផ្តល់ប្រយោជន៍ដល់អតិថិជនដែលបានខ្ចីប្រាក់ពីធនាគារយើងខ្ញុំ សរុបចំនួន៦លាននាក់ ។ លើសពីនេះ អត្រាការប្រាក់កម្ចីរបស់ធនាគារអមស៊ីន នាពេលបច្ចុប្បន្ន គឺទាបជាងអត្រាការប្រាក់កម្ចីរបស់ធនាគារពាណិជ្ជកម្មផ្សេងទៀត ។ ចំណែកអត្រាការប្រាក់បញ្ញើវិញ ធនាគារនឹងដំឡើងឱ្យអតិថិជនឱ្យស្របតាមតម្លៃទីផ្សារបន្តទៀត» ៕ ប្រភព ៖ Thansettakij

បរទេស៖ យោងតាមប្រភពព័ត៌មាន Wall Street Journal (WSJ) ដែលបានរាយការណ៍កាលពីទី ២៨ ខែកញ្ញាថា បច្ចុប្បន្នប្រទេសរុស្ស៊ីកំពុងប្រឈមមុខនឹងការខ្វះខាតថាមពលក្នុងស្រុក ដែលបណ្តាលឱ្យវិមានក្រឹមឡាំងបានហាមឃាត់ការនាំចេញប្រេងម៉ាស៊ូត និងប្រេងសាំងក្នុងខែនេះ។
មូលហេតុនៃការខ្វះខាតប្រេងឥន្ធនៈយ៉ាងធ្ងន់ធ្ងរបែបនេះ គឺដោយសារតែប្រទេសរុស្ស៊ី ដំបូងឡើយផ្តោតតែលើការនាំចេញប្រេងទៅបរទេសប៉ុណ្ណោះ ដែលធ្វើឱ្យអាជីវកម្មប្រេងក្នុងស្រុកទទួលបានប្រាក់ចំណេញទាបជាងការនាំចេញ រហូតដល់ប្រឈមមុខនឹងអតិផរណាខ្ពស់ ប្រាក់រូប្លទន់ខ្សោយ កង្វះកម្លាំងពលកម្ម រួមទាំងជម្លោះជុំវិញតុល្យភាពប្រាក់ចំណេញ និងស្ថិរភាពនៃទីផ្សារថាមពលក្នុងស្រុក។

ដូច្នេះហើយ ក្រុមហ៊ុនប្រេងថ្មីៗនេះបានទទួលប្រាក់រាប់ពាន់លានដុល្លារពីការទូទាត់របស់រដ្ឋាភិបាលក្នុងកិច្ចខិតខំប្រឹងប្រែងមួយដើម្បីលើកទឹកចិត្តឱ្យពួកគេលក់ប្រេងឥន្ធនៈបន្ថែមទៀតនៅក្នុងប្រទេស។ ទោះជាយ៉ាងណាក៏ដោយ តម្លៃប្រេងក្នុងប្រទេសរុស្ស៊ីនៅតែបន្តកើនឡើង បើទោះជាហាមឃាត់ការនាំចេញក៏ដោយ។
ប្រធានាធិបតីរុស្ស៊ីលោក វ្ល៉ាឌីមៀ ពូទីន បានអំពាវនាវឱ្យរដ្ឋាភិបាលមានប្រតិកម្ម “ឱ្យបានឆាប់” ចំពោះការកើនឡើងនៃតម្លៃប្រេងឥន្ធនៈក្នុងស្រុក ខណៈដែលតម្លៃប្រេងសាំងលក់ដុំបន្តកើនឡើងយ៉ាងខ្លាំង។

លោកប្រធានាធិបតីពូទីនបាននិយាយថា “យើងនឹងពឹងផ្អែកលើការពិតចំពោះវិធានការណ៍ដែលបានស្នើឡើងនឹងមានប្រសិទ្ធភាព” ដោយអំពាវនាវឱ្យរដ្ឋាភិបាលសហការកាន់តែជិតស្និទ្ធជាមួយក្រុមហ៊ុនប្រេងដើម្បីបញ្ចុះតម្លៃសម្រាប់អ្នកប្រើប្រាស់។

យោងតាមទីភ្នាក់ងារព័ត៌មាន Reuters បានឱ្យដឹងថា រុស្ស៊ី គឺជាប្រទេសនាំចេញប្រេងដ៏ធំបំផុតមួយរបស់ពិភពលោក ដូច្នេះការហាមឃាត់ការនាំចេញប្រេងរបស់រុស្ស៊ីអាចធ្វើឱ្យប្រទេសដែលនាំចូលមួយចំនួនដូចជា ប្រេស៊ីល ទួរគី អាហ្វ្រិកខាងជើង និងខាងលិច ព្រមទាំងបណ្តាប្រទេសនៅក្នុងតំបន់ឈូងសមុទ្រ កំពុងប្រឈមនឹងការខ្វះខាតប្រេងយ៉ាងខ្លាំងផងដែរ៕
ប្រភព៖cafef.com

ប្រទេសឡាវ ៖ ធនាគារកណ្តាលប្រទេសឡាវ និងក្រុមហ៊ុន SORAMITSU ដែលប្រកបអាជីវកម្មផ្នែកបច្ចេកវិទ្យាហិរញ្ញវត្ថុរបស់ប្រទេសជប៉ុន បានទទួលជោគជ័យក្នុងការសាកល្បងប្រើប្រាស់ប្រាក់គីបឌីជីថល ។ វាជាគំរូដើមនៃរូបិយប័ណ្ណឌីជីថលដើម្បីបង្កើនការគ្របដណ្តប់ផ្នែកហិរញ្ញវត្ថុក្នុងចំណោមពលរដ្ឋ ដែលមិនទាន់មានលទ្ធភាពទទួលបានសេវាកម្មហិរញ្ញវត្ថុនៅប្រទេសឡាវ ។

នៅឆ្នាំ២០២០ ក្រុមហ៊ុន SORAMITSU បានទទួលជោគជ័យលើការសហការជាមួយធនាគារជាតិនៃប្រទេសកម្ពុជា ដោយការចេញរូបិយប័ណ្ណឌីជីថលដំបូងគេរបស់កម្ពុជា ហៅថា «Bakong» ។ បើគិតចាប់ពីការដាក់ឱ្យដំណើរការកម្មវិធីនេះនៅកម្ពុជាមក មានអ្នកប្រើប្រាស់ Bakong ប្រមាណ៨លាន៥សែននាក់ និងមានបរិមាណប្រតិបត្តិការប្រមាណ១ម៉ឺន៥ពាន់លានដុល្លារអាមេរិក ។ ការប្រើប្រាស់បច្ចេកវិទ្យានេះបានធ្វើឱ្យពលរដ្ឋខ្មែរងាកមកទូទាត់ថ្លៃទំនិញ និងសេវាកម្មផ្សេងៗតាមរយៈការស្កេន QR Code ទាំងនៅកម្ពុជា និងនៅប្រទេសក្នុងតំបន់អាស៊ានផងដែរ ។

ពលរដ្ឋឡាវប្រមាណ៧០% នៃចំនួនពលរដ្ឋឡាវសរុបជាង៧លាននាក់ គឺគ្មានធនាគារទេ ហើយពួកគេនៅតែចាយវាយក្រដាសប្រាក់សម្រាប់ទិញទំនិញ និងសេវាកម្មផ្សេងៗ ។ ហេតុនេះ នៅពេលប្រទេសឡាវសាកល្បងប្រើប្រាស់ប្រាក់គីបឌីជីថលនឹងជួយឱ្យពលរដ្ឋអាចទូទាត់ប្រាក់ ឬផ្ទេរប្រាក់តាមរយៈការស្កេន QR Code បាន មិនថាពួកគេមានបញ្ជីធនាគារឬក៏អត់ ។ លើសពីនេះ វានឹងជួយកាត់បន្ថយការចំណាយលើការផ្ទេរប្រាក់ពីក្រៅប្រទេសទៀតផង ។ ដូច្នេះ ការផ្ទេរប្រាក់ផ្សេងៗស្មើប្រមាណ២% នៃផលិតផលក្នុងស្រុកសរុប (GDP) របស់ប្រទេសឡាវនៅឆ្នាំ២០២១ ឬស្មើប្រមាណ៤៣៥លានដុល្លារអាមេរិក ដែលបានធ្វើឱ្យការផ្ទេរប្រាក់ក្លាយជាប្រភពចំណូលសំខាន់សម្រាប់សេដ្ឋកិច្ចឡាវ ។

ការឆ្លងរាតត្បាតនៃជំងឺកូវីដ-១៩ គឺជាកត្តាជំរុញឱ្យប្រទេសជាច្រើនក្នុងតំបន់អាស៊ីអាគ្នេយ៍ឈានមកកាន់សង្គមឌីជីថល និងធ្វើឱ្យ E-commerce ព្រមទាំងសេវាកម្មផ្នែកហិរញ្ញវត្ថុផ្សេងៗរីកចម្រើនយ៉ាងឆាប់រហ័ស ។ ទោះយ៉ាងណា ប្រទេសឡាវមិនអាចប្រើប្រាស់ប្រយោជន៍ពីបច្ចេកវិទ្យាពេញលេញទេ ដោយសារខ្វះខាតការវិនិយោគផ្នែកហេដ្ឋារចនាសម្ព័ន្ធឌីជីថល ។

នៅឆ្នាំ២០២០ តាមរបាយការណ៍របស់មជ្ឈមណ្ឌលការសិក្សាយុទ្ធសាស្ត្របញ្ជាក់ថា មានពលរដ្ឋឡាវត្រឹមតែ៤៣% ប៉ុណ្ណោះ ដែលអាចប្រើប្រាស់អ៊ីនធើរណេតបាន ។ ក្រៅពីនេះ ពលរដ្ឋឡាវជាច្រើននាក់គ្មានសមត្ថភាពប្រាក់ថ្លៃសេវាអ៊ីនធើរណេតមានតម្លៃខ្ពស់ទេ ។ សេវាអ៊ីនធើរណេតនៅឡាវមានតម្លៃជាមធ្យមប្រមាណ៥៣ដុល្លារអាមេរិកក្នុង១ខែ ខណៈសេវាអ៊ីនធើរណេតនៅកម្ពុជាមានតម្លៃជាមធ្យមប្រមាណ៣៣ដុល្លារអាមេរិកក្នុង១ខែ ។

ប្រសិនបើប្រទេសឡាវអាចតភ្ជាប់បណ្តាញឌីជីថលជាមួយប្រទេសចិន, កម្ពុជា និងប្រទេសផ្សេងៗនៅក្នុងតំបន់ វានឹងជួយបង្កើនការទូទាត់ថ្លៃទំនិញឆ្លងកាត់ព្រំដែន និងអភិវឌ្ឍន៍ពាណិជ្ជកម្ម ។ ចំណែកប្រទេសវៀតណាម និងហ្វីលីពីន ក៏កំពុងសិក្សាពីលទ្ធភាពនៃការប្រើប្រាស់ប្រាក់ឌីជីថលរបស់ធនាគារកណ្តាលដូចគ្នាដែរ ៕ ប្រភព ៖ AEC connect