ក្នុងរយៈពេល៨ ខែនៃឆ្នាំ២០២៣នេះ ប្រទេសជប៉ុនបានចំណាយថវិកាចំនួន៥៣ លានដុល្លារអាម៉េរិកដើម្បីនាំចូលក្តាមសេះសមុទ្រពីប្រទេសវៀតណាម ដែលចំនួនតួលេខនេះកើនឡើង៥១% បើធៀបនឹងរយៈពេលដូចគ្នាកាលពីឆ្នាំមុន។

សន្និសីទផ្សព្វផ្សាយស្តង់ដារនាំចេញទៅកាន់ប្រទេសជប៉ុននារសៀលថ្ងៃទី២៩ ខែកញ្ញា លោក Nguyen Hoai Nam អគ្គលេខាធិការរងសមាគមអ្នកនាំចេញ និងផលិតអាហារសមុទ្រ (VASEP) បានឱ្យដឹងថា ទីផ្សារជប៉ុនកំពុងពេញចិត្តគ្រឿងសមុទ្រវៀតណាមកាន់តែខ្លាំង។ នៅក្នុងបរិបទនៃការធ្លាក់ចុះសេដ្ឋកិច្ច អតិផរណា និងការថយចុះតម្រូវការអ្នកប្រើប្រាស់ ការនាំចេញអាហារសមុទ្រទៅកាន់ប្រទេសនេះមានការរំខានតិចតួច។
ប្រភពដដែលបានឱ្យដឹងទៀតថាក្នុងរយៈពេល ៨ខែដើមឆ្នាំនេះ ជប៉ុនបានចំណាយប្រាក់ជិត ១ពាន់លានដុល្លារដើម្បីនាំចូលគ្រឿងសមុទ្រពីប្រទេសវៀតណាម។ បច្ចុប្បន្ន អាម៉េរិក ចិន និងជប៉ុន គឺជាទីផ្សារធំជាងគេទាំង៣ ដែលនាំចូលគ្រឿងសមុទ្រពីវៀតណាមលើសពីតម្លៃកំណត់ ១ពាន់លានដុល្លារ។

ក្នុងចំណោមក្រុមគ្រឿងសមុត្រទាំង១៥ ដែលនាំចេញទៅប្រទេសជប៉ុន មាន៥ ក្រុមដែលមានកំណើនវិជ្ជមាន ជាមួយនឹងការកើនឡើងនៃប្រាក់ចំណូលពី ៦-៥០% ក្នុងរយៈពេលដូចគ្នាក្នុងឆ្នាំ ២០២២។ ក្នុងចំណោមនោះ ក្តាមសេះ គឺជាផលិតផលដែលមានកំណើនគួរឱ្យចាប់អារម្មណ៍បំផុតរបស់វៀតណាម។ ជាក់ស្តែងក្នុងរយៈពេល៨ ខែនៃឆ្នាំនេះ ការនាំចេញក្តាមទៅកាន់ប្រទេសជប៉ុនបានឈានដល់ ៥៣ លានដុល្លារកើនឡើង ៥១% ធៀបនឹងរយៈពេលដូចគ្នាក្នុងឆ្នាំ ២០២២ ដែលស្មើនឹង ៥.៥% នៃតម្លៃនាំចេញសរុប។

តំណាងសមាគមអ្នកនាំចេញ និងផលិតអាហារសមុទ្រ បាននិយាយថា ជប៉ុនចូលចិត្តក្តាមវៀតណាម ដោយសារគុណភាពរបស់វាខ្ពស់ ទំនិញត្រូវបានធានាមិនបំពុលដោយថ្នាំអង់ទីប៊ីយោទិច និងបាក់តេរីបង្កជំងឺ។ ក្រៅពីជប៉ុន អាម៉េរិក និងចិនក៏ចូលចិត្តក្តាមពីវៀតណាមដែរ។ លើសពីនេះក៏មានការព្យាករណ៍ថាការនាំចេញក្តាមនេះនឹងមានការកើនឡើងបន្តទៀតសម្រាប់ថ្ងៃបុណ្យសំខាន់ៗ ដូចជាបុណ្យណូអែល និងថ្ងៃឆ្លងឆ្នាំ។

ទោះបីជាការនាំចេញក្តាមសមុទ្រនេះមានការកើនឡើងក្តី ការនាំចេញគ្រឿងសមុត្រសំខាន់ៗចំនួន៨ របស់វៀតណាមទៅកាន់ប្រទេសផ្សេងទៀតបានធ្លាក់ចុះពី ៨-៣០% បើធៀបនឹងរយៈពេលដូចគ្នាកាលពីឆ្នាំមុន។ ដូច្នេះហើយក្នុងរយៈពេល៩ខែដំបូងនៃឆ្នាំនេះ ការនាំចេញគ្រឿងសមុទ្រសម្រេចបានត្រឹមតែជាង៦.៦ពាន់លានដុល្លារប៉ុណ្ណោះ ពោលគឺធ្លាក់ចុះ ២២% បើធៀបនឹងរយៈពេលដូចគ្នាក្នុងឆ្នាំ២០២២៕

ប្រទេសប្រេស៊ីល ៖ នេះគឺជារូបភាពរបស់ហ្វូងត្រីរាប់រយក្បាលដែលបានងា.ប់ពាសពេញទន្លេ នៅក្នុងតំបន់អាម៉ាហ្សូនរបស់ប្រទេសប្រេស៊ីល ក្រោយពីប្រឈមនឹងសីតុណ្ហភាពទឹកកើនឡើងខ្ពស់ និងកម្រិតទឹកស្រកចុះ ខណៈប្រទេសប្រេស៊ីលមានបញ្ហាខ្វះខាតទឹកស្អាតដោយសារគ្រោះរាំងស្ងួត ។ អាជ្ញាធរប្រេស៊ីលជឿជាក់ថា នេះគ្រាន់តែជាចំណុចចាប់ផ្តើមរបស់គ្រោះមហន្តរាយប៉ុណ្ណោះ ។

រដ្ឋាភិបាលប្រេស៊ីលត្រៀមបញ្ជូនមន្ត្រីមកជួយសង្គ្រោះពលរដ្ឋក្នុងតំបន់អាម៉ាហ្សូន ចំនួន១១ម៉ឺន១ពាន់នាក់ ដែលទទួលរងផលប៉ះពាល់ដោយសារគ្រោះរាំងស្ងួត ។ កម្រិតទឹកស្រកចុះ និងក្តៅខ្លាំងពេក ក្រៅពីធ្វើឱ្យត្រីងា.ប់ហើយ វាក៏បានប៉ះពាល់ដល់ការធ្វើដំណើរតាមផ្លូវទឹក, បរិមាណអាហារ និងទឹកស្អាតផងដែរ ដោយសារពលរដ្ឋរស់នៅក្នុងតំបន់នេះបរិភោគត្រីក្នុងទឹកទន្លេសម្រាប់ចិញ្ចឹមជីវិត ។

អ្នកនាង ឃែរ៉ូឡៃ ស៊ីល្វា ជាអាជីវករនិយាយថា ៖ «វាពិបាកណាស់ ដោយសារមានជាតិពុលនៅក្នុងទឹក ហើយយើងចាំបាច់ត្រូវប្រើប្រាស់ទឹកនេះសម្រាប់ងូត ។ កន្លងមក យើងធ្លាប់ផឹកទឹកនេះបាន ប៉ុន្តែនៅពេលវាមានជាតិពុល យើងមិនអាចផឹកបានទៀតទេ ។ ដូច្នេះ ឪពុករបស់ខ្ញុំបានធ្វើដំណើរទៅកាន់ទីក្រុង ដើម្បីទិញទឹកយកមកប្រើប្រាស់» ។

ចំណែកភ្នាក់ងារការពារសុវត្ថិភាពពលរដ្ឋដាស់តឿនថា គ្រោះរាំងស្ងួតបានកើតឡើងដោយសារបាតុភូតអេនីណូ និងពិភពលោកក្តៅ ហើយវាអាចប៉ះពាល់ដល់ការរស់នៅរបស់មនុស្ស រហូតដល់៥សែននាក់នៅតំបន់អាម៉ាហ្សូន ។

ចុងក្រោយ កងទ័ពអាកាសប្រេស៊ីលត្រៀមបញ្ជូនកងកម្លាំងជំនាញរបស់រដ្ឋាភិបាលផ្នែកផ្លូវអាកាសទៅកាន់រដ្ឋអាម៉ាសូណាស់ និងរដ្ឋអេឃ័រ ព្រមទាំងមានទឹកស្អាត, ម្ហូបអាហារ, ថ្នាំសង្កូវ និងសម្ភារៈផ្សេងៗទៅចែកជូនពលរដ្ឋ ។ លើសពីនេះ រដ្ឋាភិបាលនឹងបែងចែកប្រាក់ចំនួន១៤០លានដុល្លារអាមេរិកសម្រាប់ស្តារទន្លេ និងអភិវឌ្ឍន៍កំពង់ផែក្នុងតំបន់នេះ ដើម្បីអាចធ្វើដំណើរទៅមកបាន បើទោះជាកម្រិតទឹកស្រកចុះក្តី ៕ ប្រភព ៖ TNN World

LISA សមាជិកក្រុម BLACKPINK បានបង្កើតព្រឹត្តិការណ៍ដ៏សំខាន់ដែលមិនអាចប្រៀបផ្ទឹមបាននៅក្នុងប្រវត្តិសាស្ត្រ K-pop ដោយសម្រេចបាននូវស្នាដៃដែលមិនមានតារា K-pop ផ្សេងទៀតសម្រេចបានរហូតមកដល់បច្ចុប្បន្ន។

Lisa ត្រូវបានទទួលស្គាល់ដោយអ្នកជំនាញក្នុងឧស្សាហកម្មថាជាតារា K-pop ដែលមានកិត្តិយសបំផុតក្នុងទសវត្សរ៍នេះដោយបានគ្រប់គ្រងលើតារាងតន្ត្រីសំខាន់ៗ ទទួលបានតំណែងកំពូលនៅលើវេទិកាដូចជា YouTube, Spotify និង iTunes ត្រឹមតែបទចម្រៀងពីរបទរបស់នាង និងទទួលបានពានរង្វាន់អន្តរជាតិ។
មកទល់ពេលនេះ Lisa ទទួលបានកំណត់ត្រាពិភពលោកហ្គីណេសទី៨ ដែលជាតួលេខខ្ពស់បំផុតមិនធ្លាប់មានដោយសិល្បករអាស៊ី ខណៈចំណាត់ថ្នាក់លេខ២ គឺបានទៅលើ PSY ម្ចាស់បទល្បីទូទាំងពិភពលោក« gangnam style» ដែលកាន់កំណត់ត្រានេះចំនួន៥។

កំណត់ត្រាពិភពលោកហ្គីណេសទាំង៨របស់ Lisa រួមមាន៖
– អ្នកឈ្នះពានរង្វាន់ K-pop ទោលដំបូងគេក្នុងកម្មវិធី MTV Video Music Awards
– អ្នកឈ្នះពានរង្វាន់ K-pop ទោលដំបូងគេនៅក្នុងកម្មវិធី MTV Europe Music Awards
– អាល់ប៊ុមដំបូងរបស់តារាចម្រៀង K-pop ទោលដែលមានអ្នកចូលមើលដល់ទៅ ១ពាន់លានដងនៅលើ Spotify
– តារា K-pop ទោលលឿនបំផុតដែលមានអ្នកចូលមើល ១ ពាន់លានដងលើ Spotify ខាងអ្នកចម្រៀងស្រី
– អ្នកតាមច្រើនវីដេអូចម្រៀងថ្មីដែលបានចេញផ្សាយពីសិល្បករទោលក្នុងរយៈពេល ២៤ម៉ោងនៅលើ YouTube
– វីដេអូចម្រៀងដែលមានអ្នកមើលច្រើនបំផុតក្នុងរយៈពេល២៤ម៉ោងដោយសិល្បករ K-pop ទោល។
– មានអ្នកតាមដានច្រើនជាងគេនៅលើ Instagram សម្រាប់សិល្បករ Kpop
– បទ K-pop ដំបូងរបស់សិល្បករទោលដែលមានអ្នកចូលមើល ១ ពាន់លានដងនៅលើ Spotify
បន្ថែមពីលើនេះនៅក្នុងខែកញ្ញា Lisa បានក្លាយជាសិល្បករតន្ត្រីអាស៊ីដ៏មានឥទ្ធិពលបំផុតនៅសហរដ្ឋអាម៉េរិក និងទូទាំងពិភពលោកជាប់ចំណាត់ថ្នាក់ទី៤ តាមពី Selena Gomez, Taylor Swift និង Justin Bieber ៕

ឥណ្ឌូនេស៊ី៖ យោងតាមរដ្ឋមន្ត្រីកោះបាលី បាននិយាយថា ខ្លួននឹងប្រមូលពន្ធចំនួន ១៥០,០០០ រូពី (ស្មើនឹង ១០ ដុល្លារអាមេរិក) ក្នុងមនុស្សម្នាក់ លើភ្ញៀវទេសចរបរទេសទាំងអស់ ក្នុងគោលបំណងប្រើប្រាស់សម្រាប់កម្មវិធីគ្រប់គ្រងគុណភាពកាកសំណល់ និងការអភិរក្សវប្បធម៌នៅកោះបាលី។ លេខាធិការក្រសួងទេសចរណ៍ និងសេដ្ឋកិច្ចច្នៃប្រឌិត Ni Wayan Giri Adnyani បាននិយាយថា ក្រសួងគាំទ្រការសម្រេចចិត្តរបស់រដ្ឋមន្ត្រីកោះបាលីក្នុងការដាក់ពន្ធលើវិស័យទេសចរណ៍ ហើយនឹងជួយអនុវត្តគោលនយោបាយនេះឱ្យបានឆាប់តាមដែលអាចធ្វើទៅបាន។

បច្ចុប្បន្ន កោះបាលីនៅក្នុងប្រទេសឥណ្ឌូនេស៊ីបានក្លាយជាគោលដៅទេសចរណ៍ដ៏ពេញនិយមបំផុតរបស់ពិភពលោក ជាមួយនឹងការកែលម្អ ការគ្រប់គ្រងកាកសំណល់ រួមជាមួយគុណភាពបរិស្ថាន និងកម្មវិធីអភិរក្សវប្បធម៌។អភិបាលស្តីទីនៃកោះបាលី Mahendra Jaya ក្នុងជំនួបជាមួយលេខាធិការក្រសួងទេសចរណ៍ និងសេដ្ឋកិច្ចច្នៃប្រឌិតឥណ្ឌូនេស៊ី Ni Wayan Giri Adnyani នៅទីក្រុង Denpasar បាននិយាយថា រដ្ឋាភិបាលក្នុងតំបន់នឹងប្រើប្រាស់ប្រាក់ដែលប្រមូលបានពីពន្ធទេសចរណ៍សម្រាប់សកម្មភាពអភិរក្ស និងអភិវឌ្ឍន៍កោះបាលីបន្តទៀត។

ដូច្នេះហើយ ថ្មីៗនេះកោះបាលីក៏កំពុងរឹតបន្តឹងបទប្បញ្ញត្តិសម្រាប់ភ្ញៀវទេសចរដែលមកទស្សនាកោះនេះ បន្ទាប់ពីឧប្បត្តិហេតុជាបន្តបន្ទាប់ដែលអ្នកទេសចរ មិនគោរពវប្បធម៌ហិណ្ឌូ មិនគោរពភាពបរិសុទ្ធនៃព្រះវិហារ វត្តអារាម ការគោរពបូជា និងនិមិត្តសញ្ញាសាសនា ការស្លៀកសម្លៀកបំពាក់មិនសមរម្យនៅតាមទីសាធារណៈ រួមជាមួយអាកប្បកិរិយាមិនគួរសមនៅទីសាធារណៈ និងបង្កឱ្យមានកាកសំណល់លើបរិស្ថានក្នុងកោះបាលីជាដើម។

ទោះជាយ៉ាងណាក៏ដោយ យោងតាមទិន្នន័យពីរដ្ឋាភិបាលខេត្តបាលី យ៉ាងហោចណាស់មានអ្នកទេសចរបរទេសចំនួន ៣.៤ លាននាក់បានមកលេងកោះបាលីគិតត្រឹមខែសីហាឆ្នាំនេះ ដោយជនជាតិអូស្ត្រាលីគឺជាក្រុមអ្នកទេសចរច្រើនជាងគេនៅកោះបាលី។ រដ្ឋាភិបាលគ្រោងនឹងស្វាគមន៍ភ្ញៀវទេសចរបរទេសសរុបចំនួន ៥.៥ លាននាក់ទៅកាន់កោះបាលីនៅចុងឆ្នាំ ២០២៣ នេះ៕
ប្រភព៖cafef.com

ប្រទេសឥណ្ឌូណេស៊ី ៖ គោលនយោបាយគាំទ្ររថយន្តអគ្គិសនីរបស់ប្រទេសឥណ្ឌូណេស៊ីបានទាក់ទាញវិនិយោគិននៅលើពិភពលោក ឱ្យចូលមកប្រទេសនេះកាន់តែច្រើន ។ អ្នកជំនាញមើលឃើញថា រឿងនេះអាចជំរុញការវិនិយោគក្នុងឧស្សាហកម្មរថយន្តនៅតំបន់អាស៊ីអាគ្នេយ៍ផងដែរ ។

តាមរបាយការណ៍របស់ ASEAN Briefing បង្ហាញថា ប្រទេសឥណ្ឌូណេស៊ីសម្បូរទៅដោយធនធានរ៉ែ ដែលមានសារសំខាន់សម្រាប់ការផលិតថ្មរថយន្តអគ្គិសនី ដូចជា ទង់ដែង និងនីកែល ហើយឥណ្ឌូណេស៊ីជាប្រទេសនាំចេញនីកែលដ៏ច្រើនបំផុតលើពិភពលោក ស្មើនឹង២២% របស់នីកែលសរុបទូទាំងពិភពលោក ។ ក្រៅពីនេះ ឥណ្ឌូណេស៊ីបានព្យាយាមទាក់ទាញក្រុមហ៊ុន Tesla ដោយសង្ឃឹមថា នឹងយកកត្តាមានប្រៀបផ្នែកធនធានធម្មជាតិ ដើម្បីអភិវឌ្ឍន៍ប្រទេសរបស់ខ្លួនក្លាយជាមជ្ឈមណ្ឌលផ្គត់ផ្គង់រថយន្តអគ្គិសនីដ៏សំខាន់លើពិភពលោក ។

គោលដៅរបស់ឥណ្ឌូណេស៊ីដើម្បីក្លាយជាមជ្ឈមណ្ឌលផលិតថ្មរថយន្តអគ្គិសនីលើពិភពលោក ហាក់ដូចជាទទួលបានការគាំទ្រយ៉ាងខ្លាំងក្នុងរយៈពេលប៉ុន្មានឆ្នាំកន្លងមកនេះ ។ គេសង្កេតឃើញ ក្រុមហ៊ុនផលិតរថយន្តនៅអាស៊ី ដូចជា ក្រុមហ៊ុន Toyota និង Hyundai ក៏បានជះប្រាក់វិនិយោគរាប់លានដុល្លារអាមេរិក ដើម្បីពង្រីករោងចក្រផលិតរថយន្តអគ្គិសនីនៅឥណ្ឌូណេស៊ីផងដែរ ។

តាមរបាយការណ៍វិនិយោគអាស៊ានឆ្នាំ២០២២ បង្ហាញថា ការផលិតថ្មរថយន្តអគ្គិសនីបានបង្កើតសមាមាត្រការវិនិយោគដោយផ្ទាល់ពីប្រទេសផ្សេងៗមកកាន់តំបន់អាស៊ីអាគ្នេយ៍ ចាប់ពីឆ្នាំ២០១៩ ដល់ឆ្នាំ២០២១ បានយ៉ាងច្រើនមហាសាល ជាពិសេស នៅប្រទេសឥណ្ឌូណេស៊ី, ម៉ាឡេស៊ី និងថៃ ។

ទោះយ៉ាងណា ការរីកចម្រើនផ្នែកឧស្សាហកម្មរថយន្តអគ្គិសនីនៅឥណ្ឌូណេស៊ី នឹងមានឥទ្ធិពលដល់ប្រទេសជិតខាង ។ Maybank មើលឃើញថា ការបើកឱ្យចូលប្រើប្រាស់វត្ថុធាតុដើមសំខាន់ៗរបស់ថ្មរថយន្តអគ្គិសនីនៅឥណ្ឌូណេស៊ី គឺអាចទាក់ទាញការវិនិយោគបន្ថែមទៀតយ៉ាងច្រើន និងអាចជួយឱ្យតំបន់អាស៊ានអាចប្រើប្រាស់រថយន្តអគ្គិសនីយ៉ាងឆាប់រហ័ស និងមានតម្លៃថោក ៕ ប្រភព ៖ AEC connect