អាមេរិក៖ លោកយាយ DOROTHY HOFFNER ដែលជនជាតិអាមេរិកម្នាក់ មានអាយុ ១០៤ ឆ្នាំបានបញ្ចប់ការលោតឆ័ត្រយោងពីរដងជាមួយគ្រូរបស់គាត់នៅកម្ពស់ ៤,១០០ ម៉ែត្រ។ លោកយាយ Hoffner បានលោតពីជើងមេឃជាលើកដំបូងនៅឯកន្លែង Skydive Chicago ទីក្រុង Ottawa រដ្ឋ Illinois កាលពីថ្ងៃទី ១ ខែតុលា។ នៅពេលនោះ Hoffner បានជំរុញឱ្យមគ្គុទ្ទេសក៍ទេសចរណ៍អាជីពម្នាក់ឱ្យទៅជាមួយគាត់។

នៅពេលដែលទ្វារខាងក្រោយនៃយន្តហោះ Skyvan បើក គាត់ហាក់ដូចជាស្ងប់ស្ងាត់ និងមានទំនុកចិត្តលើខ្លួនឯង ដោយលោតចេញពីយន្តហោះ ហើយធ្លាក់ដោយសេរីក្នុងទីតាំងមានស្ថេរភាព ក្បាលពោះបែរមុខទៅដី ដែលធ្វើឱ្យមិត្តភក្តិរបស់គាត់បានអបអរនៅខាងក្រោម។ ការលោតមានរយៈពេល ៧ នាទី នៅពេលដែលគាត់ និងគ្រូរបស់គាត់ចុះមកលើស្មៅយ៉ាងទន់ភ្លន់ ដោយកាន់ស៊ុមជំនួយរបស់គាត់ ហើយជួយគាត់ក្រោកឈរឡើងដើម្បីឆ្លើយនឹងអ្នកសារព័ត៌មាន។ លោកយាយ Hoffner បាននិយាយថា “អាយុគ្រាន់តែជាតួរលេខប៉ុណ្ណោះ វាអស្ចារ្យណាស់សម្រាប់ខ្ញុំ ហើយវាក៏ជាលើកដំបូងរបស់ខ្ញុំដែរ។

ទោះជាយ៉ាងណាក៏ដោយលោកយាយ Hoffner មិនមែនជាបុគ្គលទីមួយដែលលោតឆ័ត្រយោងនោះទេ។ នៅក្នុងខែឧសភា ឆ្នាំ ២០២២ លោកយាយ Rut Larsson អាយុ ១០៣ ឆ្នាំ បានធ្វើការលោតពីរដងដោយជោគជ័យនៅទីក្រុង Motala ប្រទេសស៊ុយអែត ហើយក៏ទទួលបាននូវកំណត់ត្រាពិភពលោកហ្គីណេសសម្រាប់មនុស្សចាស់បំផុតដែលមិនធ្លាប់មានផងដែរ។ ប៉ុន្តែបច្ចុប្បន្នកំណត់ត្រាពិភពលោកថ្មីមួយនេះ បានទៅលើលោកយាយ Hoffner ដែលមានអាយុ ១០៤ ឆ្នាំឈានចូល ១០៥ ឆ្នាំក្នុងខែធ្នូ។

Hoffner បានរស់នៅក្នុងទីក្រុង Chicago សហរដ្ឋអាមេរិក អស់ជាច្រើនទសវត្សរ៍មកហើយ គាត់មិនដែលរៀបការ និងមានកូនដូចគេទេ គាត់ចូលចិត្តជីវិតរស់នៅម្នាក់ឯង ហើយកាលពីគាត់នៅក្មេងគាត់ គាត់គឺជាបុគ្គលិកក្រុមហ៊ុនទូរគមនាគមន៍ Illinois Bell៕
ប្រភព៖vnexpress

បរទេស៖ យោងតាមការចុះផ្សាយរបស់ Interesting Engineering កាលពីថ្ងៃទី ២ ខែតុលា បានឱ្យដឹងថា ទីភ្នាក់ងារស្រាវជ្រាវ និងនវានុវត្តន៍របស់ចក្រភពអង់គ្លេស (UKRI) បានផ្តល់ថវិកាចំនួន ១០៣ លានដុល្លារដល់ Central Laser Facility (CLF) នៃក្រុមប្រឹក្សាវិទ្យាសាស្ត្រ និងបច្ចេកវិទ្យា ដើម្បីសាងសង់ម៉ាស៊ីនឡាស៊ែរដ៏មានឥទ្ធិពលបំផុតរបស់ពិភពលោក ដែលគម្រោងនេះមានឈ្មោះថា Vulcan ២០-២០។

Vulcan ២០-២០ មានសមត្ថភាពផលិតកាំរស្មីឡាស៊ែរបឋមដែលផ្តល់ថាមពល ២០ ប៉េតាវ៉ាត់ (PW) និង ៨ ធ្នឹមថាមពលខ្ពស់បំផុតសរុប ២០ គីឡូស៊ូល (KJ) ដែលធ្វើឱ្យវាភ្លឺជាងមួយពាន់លានដងនៃកាំរស្មីភ្លឺបំផុតរបស់ពន្លឺព្រះអាទិត្យនៅក្នុងវាលខ្សាច់សាហារ៉ា។ ដោយអនុញ្ញាតឱ្យមានការពិសោធន៍ថ្មីៗនៅក្នុងផ្នែកសំខាន់ៗដូចជា ការស្រាវជ្រាវថាមពលកកើតឡើងវិញ នឹងត្រូវបានប្រើសម្រាប់គោលបំណងជាច្រើន ហើយភាគច្រើនប្រើជារូបវិទ្យាប្លាស្មា។ រូបវិទ្យាប្លាស្មា ត្រូវបានផលិតនៅពេលដែលរូបធាតុជួបប្រទះនឹងលក្ខខណ្ឌធ្ងន់ធ្ងរ ដូចជាសីតុណ្ហភាពខ្ពស់ ឬសម្ពាធ។

សាស្រ្តាចារ្យ John Collier នាយកនៃ CLF បាននិយាយថា “ពេលវេលាបានមកដល់ហើយសម្រាប់ឡាស៊ែរថ្មី Vulcan ដើម្បីធ្វើកំណែទម្រង់ដ៏សំខាន់បន្ទាប់របស់វា នឹងត្រៀមខ្លួនជាស្រេចដើម្បីបម្រើអ្នកវិទ្យាសាស្ត្រជំនាន់ថ្មី ដោយធានាថាចក្រភពអង់គ្លេសនឹងរក្សាតួនាទីឈានមុខគេក្នុងវិស័យនេះ”។
ដូច្នេះ គម្រោងសាងសង់ម៉ាស៊ីនឡាស៊ែរ Vulcan ២០-២០ នឹងមានរយៈពេល ៦ ឆ្នាំ។ ឡាស៊ែរថ្មីនឹងជួយអ្នកស្រាវជ្រាវឱ្យយល់កាន់តែច្បាស់អំពីវិស័យវិទ្យាសាស្ត្រជាច្រើន រួមទាំងបាតុភូតតារាសាស្ត្រដូចជា supernovae និងពន្លឺព្រះអាទិត្យ ក៏ដូចជាសក្តានុពលថាមពលស្អាតនៃប្រតិកម្មលាយឡំដោយឡាស៊ែរ៕
ប្រភព៖vnexpress

ប្រទេសថៃ ៖ កាលពីថ្ងៃទី៣ ខែតុលា ឆ្នាំ២០២៣ មានហេតុការណ៍បា.ញ់ប្រហា.រមួយនៅ ស្យ៉ាម ប៉ារ៉ាហ្គន (SIAM PARAGON) ស្ថិតនៅទីក្រុងបាងកក ប្រទេសថៃ ដែលក្មេងប្រុសបង្កហេតុទើបតែមានអាយុ១៤ឆ្នាំប៉ុណ្ណោះ ហើយហេតុការណ៍នេះបណ្តាលឱ្យមានអ្នករងរបួសចំនួន៦នាក់ និងស្លាប់២នាក់ ។ ក្រោយមក សមត្ថកិច្ចអាចចាប់ខ្លួនក្មេងប្រុសបង្កហេតុបាន និងបញ្ជូនទៅសាកសួរនៅស្ថានីយប៉ូលិសប៉ាក់ថុមវ៉ាន់ ។

នៅថ្ងៃដដែល កម្លាំងសមត្ថកិច្ចបានចុះទៅត្រួតពិនិត្យក្នុងលំនៅឋានរបស់ជនបង្កហេតុ ដែលស្ថិតនៅតំបន់បាងឃែ ទីក្រុងបាងកក ។ បន្ទាប់មក សមត្ថកិច្ចបានចូលត្រួតពិនិត្យក្នុងបន្ទប់ដេករបស់ជនបង្កហេតុ ហើយប្រទះឃើញគ្រា.ប់កាំភ្លើ.ងជាច្រើនគ្រាប់ និងផ្ទាំងក្រដាស់សម្រាប់បា.ញ់១ផ្ទាំងផងដែរ ។ ដូច្នេះ សមត្ថកិច្ចក៏បានប្រមូលឧបករណ៍សម្រាប់ទុកធ្វើជាភស្តុតាង ។

តាមការសាកសួរអាណាព្យាបាលរបស់ជនបង្កហេតុឱ្យដឹងថា ពួកគាត់មិនដឹងថា កូនប្រុសយកគ្រាប់កាំភ្លើ.ង និងផ្ទាំងស៊ីបមកពីកន្លែងណាទេ ព្រោះតាមធម្មតា កូនប្រុសរស់នៅក្នុងផ្ទះមួយកន្លែងទៀតនៅតំបន់សាថន ។ ចំណែកជនបង្កហេតុឆ្លើយថា ខ្លួនមានបញ្ហាស្តាប់មិនសូវច្បាស់ល្អ ហើយខ្លួនតែងភ័យខ្លាចមានមនុស្សមកធ្វើបាបគ្រប់ពេលវេលា ។ ចំណែកកាំភ្លើ.ង និងគ្រាប់ដែលខ្លួនយកទៅបាញ់ប្រហា.រនៅហាងទំនើបនោះ គឺខ្លួនទិញតាមអនឡាញក្នុងតម្លៃជាង១ម៉ឺនបាត ។

ទោះយ៉ាងណា តាមការបញ្ជាក់ពីឪពុកម្តាយឱ្យដឹងថា កូនប្រុសញៀននឹងការលេងហ្គេមយ៉ាងខ្លាំង ប៉ុន្តែពុំធ្លាប់មានប្រវត្តិព្យាបាលជំងឺផ្លូវចិត្តទេ ។ ក្រៅពីនេះ មានសេចក្តីរាយការណ៍ថា នៅក្នុងទូរស័ព្ទដៃរបស់ជនបង្កហេតុមានវីដេអូហ្វឹកហាត់ពីរបៀបដាក់គ្រាប់កាំភ្លើ.ងទៀតផង ។ មុនពេល ជនបង្កហេតុចូលមកបា.ញ់ប្រហា.រក្នុងហាង គឺជនបង្កហេតុបានផ្ញើរូបភាពពីរបៀបដាក់គ្រាប់កាំភ្លើ.ងទៅឱ្យមិត្តភក្តិក្នុងអនឡាញ ។

គួរបញ្ជាក់ថា កាលពីវេលាម៉ោង៤និង១៥នាទីល្ងាចថ្ងៃទី៣ ខែតុលា ឆ្នាំ២០២៣ មានហេតុការណ៍ឆោឡោបានកើតឡើងនៅ SIAM PARAGON ដោយសារមានសំឡេងគ្រាប់កាំភ្លើងពី៤គ្រាប់ ទៅ៥គ្រាប់ ហើយធ្វើឱ្យពលរដ្ឋថៃ និងភ្ញៀវទេសចរបរទេសដែលកំពុងដើរទិញអីវ៉ាន់ក្នុងផ្សារនាំគ្នារត់យករួចខ្លួន ។ អាជ្ញាធរប្រចាំតំបន់បានប្រកាសឱ្យមនុស្សទាំងអស់ប្រយ័ត្នខ្លួន ព្រោះជនបង្កហេតុកាន់កាវុ.ធ ។

តាមកាមេរ៉ាសុវត្ថិភាពបង្ហាញថា ក្មេងប្រុសបង្កហេតុបានពាក់ស្រោមដៃ និងពាក់ស្បែកជើងកីឡាពណ៌ខ្មៅ ហើយបានដើរកាន់កាំភ្លើងនៅ SIAM PARAGON នៅបរិវេណជាន់ទី៣ ។ ក្នុងហេតុការណ៍នេះបណ្តាលឱ្យមានអ្នករងរបួសចំនួន៦នាក់ គឺមានទាំងជនជាតិថៃ និងជនបរទេសត្រូវបានបញ្ជូនទៅកាន់មន្ទីរពេទ្យ និងមានអ្នកស្លាប់ចំនួន២នាក់ គឺជនជាតិចិនស្លា.ប់នៅកន្លែងកើតហេតុ និងស្ត្រីមីយ៉ាន់ម៉ាបានស្លា.ប់នៅមន្ទីរពេទ្យ ៕   ប្រភព ៖ mgronline

រាជធានីបាងកក៖ ក្មេងទំនើងម្នាក់ ទើបនឹងមានអាយុ១៤ឆ្នាំ មានឪពុកម្ដាយជាសាស្រ្ដា បានបាញ់ប្រហារ បណ្ដាលឲ្យមនុស្សស្លាប់ និង រងរបួសជាច្រើននាក់ កាលពីវេលាម៉ោងប្រហែលជាង៤ល្ងាច ថ្ងៃអង្គារ ទី៣ ខែតុលា ឆ្នាំ២០២៣ នៅក្នុងផ្សារដ៏ទំនើបបំផុត Siam Paragon (សៀមផារ៉ាហ្គន) ស្ថិតក្នុងទីក្រុងបាងកក ប្រទេសថៃ។

គេហទំព័ររបស់បណ្ដាញទូរទស្សន៍ CNN បានចេញផ្សាយ កាលពីរាត្រី ថ្ងៃអង្គារ ទី៣ ខែតុលា ថា ប៉ូលិសថៃ បានចាប់ខ្លួនជនសង័្សយម្នាក់ អាយុ១៤ឆ្នាំ ដែលជាអ្នកដើរចូលទៅបាញ់រះ នៅក្នុងផ្សារទំនើបសៀមផារ៉ាហ្គន។ នៅក្នុងឧបទ្ទវហេតុនោះ បានបណ្ដាលឲ្យស្រ្ដី២នាក់បាត់បង់ជីវិត ហើយក្នុងចំណោមស្រ្ដីរងគ្រោះទាំងនេះ មានម្នាក់ ជាជនជាតិចិន និង ម្នាក់ទៀតជាជនជាតិមីយ៉ាន់ម៉ា ឬ ភូមា។ ដោយឡែកមនុស្សចំនួន៥នាក់ផ្សេងទៀត បានរងរបួស ហើយត្រូវបានបញ្ជូនទៅកាន់មន្ទីរពេ្យ ។

បើតាមលោកឧត្ដមសេនីយ៍ ថរសាក់ សុខវីមល (Torsak Sukvimol) អគ្គស្នងការប៉ូលិសជាតិថៃ បានឲ្យដឹង ថា យុវជនរូបនេះ ត្រូវបាននាំទៅកាន់ប៉ុស្តិ៍នគរបាល Pathumwan (ផាធូមម៉ាន់) ដើម្បីសួរចម្លើយ។ ប៉ុន្តែអារម្មរណ៍របស់គេ កំពុងតែស្ថិតក្នុងស្ថានភាពច្របូកច្របល់ ដោយសារតែគេនិយាយ ថា គេបានឮសំឡេង ប្រាប់គេឲ្យបាញ់មនុស្ស។

ជនសង័្សយរូបនេះ ធ្លាប់ទទួលការព្យាបាលបញ្ហាសុខភាពផ្លូវចិត្ត កាលពីអតីតកាល នៅមន្ទីរពេទ្យរេចាវីធី (Rajavithi) ។ ប៉ុន្តែលោកឧត្ដមសេនីយ៍ ថរសាក់ សុខវីមល អគ្គស្នងការប៉ូលិសជាតិថៃ បានអះអាង ថា គាត់មិនចង់និយាយលម្អិតបន្ថែមទៀតទេ ដោយសារតែជនសង្ស័យ ជាអនីតិជន។

លោកអគ្គស្នងការប៉ូលិសជាតិថៃ បានបញ្ជាក់ ថា មនុស្សពីរនាក់ ត្រូវបានសម្លាប់ នៅក្នុងឧបទ្ទវហេតុនេះ។ ប៉ុន្ដែរបាយការណ៍មុននេះ បានអះអាងអំពីចំនួនអ្នកស្លាប់ កើនឡើងដល់៣នាក់ រួមមាន ស្ត្រីជនជាតិចិនម្នាក់ អាយុ៣៤ឆ្នាំ បានស្លាប់នៅជាន់ផ្ទាល់ដី នៃមជ្ឈមណ្ឌលលក់ទំនិញ និង ស្រ្ដីម្នាក់ទៀត មកពីប្រទេសមីយ៉ាន់ម៉ា បានរងរបួសធ្ងន់ ហើយបានស្លាប់ ក្រោយពេលបញ្ជូលទៅសង្គ្រោះ នៅក្នុងមន្ទីរពេទ្យប៉ូលិសអគ្គ (Police General)។ ដោយឡែកអ្នករងរបួស ត្រូវបានបញ្ជូនទៅកាន់មន្ទីរពេទ្យអនុស្សាវរីយ៍ស្ដេចចូឡាឡុងកន (King Chulalongkorn Memorial)។ រីឯស្ត្រីម្នាក់ ត្រូវបានគេបាញ់ចំក្បាល ហើយស្ថានភាពរបួសរបស់នាង ត្រូវបានគេចាត់ទុក មានសភាពធ្ងន់ធ្ងរ។ ចំណែកបុរស២នាក់ទៀត ជាជនជាតិថៃ និង ស្ត្រីជនជាតិចិនម្នាក់ រងរបួសតិចតួច។

ដោយឡែក ផ្សារនេះបិទទ្វារ ប៉ុន្តែក៏មានមនុស្សជាច្រើន នៅខាងក្នុង ដោយភាគច្រើន ជាមន្រ្ដីប៉ូលិស និង អ្នកកាសែត។

លោក ចាដា ថៃសេត (Chada Thaiset) អនុរដ្ឋមន្ត្រី ក្រសួងមហាផ្ទៃ ដែលបច្ចុប្បន្នដឹកនាំការបង្រ្កាបដ៏ល្បី លើឥស្សរជនដ៏មានឥទ្ធិពល បានធ្វើដំណើរទៅដល់កន្លែង ដែលជនសង្ស័យកំពុងតែត្រូវបានឃុំខ្លួន ហើយបានចាប់ផ្តើមសួរចម្លើយគេ នៅនឹងមុខកាមេរ៉ា។

លោកឧត្តមសេនីយ៍ អគ្គស្នងការប៉ូលិសជាតិថៃ បានព្រមានជាបន្តបន្ទាប់ ថា ជនសង្ស័យ មានសិទ្ធិមួយចំនួន នៅក្នុងនាមជាអនីតិជន ហើយក្នុងចំណោមពួកគេ មានសិទ្ធិសាកសួរ នៅចំពោះមុខទីប្រឹក្សា។

ជនសង្ស័យ ត្រូវបានគេរាយការណ៍ ថា ជាសិស្ស នៃសាលារៀនឯកជនមួយ ស្ថិតក្នុងទីក្រុងបាងកក ហើយមានឪពុកម្តាយ ជាសាស្ត្រាចារ្យ។ នៅពេលប៉ូលិសឆែកឆេរបន្ទប់របស់ក្មេងជំទង់នោះ នៅក្នុងផ្ទះរបស់គេ រកឃើញគ្រាប់រំសេវ ជាច្រើនគ្រាប់៕