ប្រទេសចិន៖ ទីក្រុងប៉េកាំងបានសម្តែងការមិនពេញចិត្តជាខ្លាំង នៅពេលដែលប្រជាជនចិនរងគ្រោះ និងរងរបួសពាក់ព័ន្ធនឹងការប្រយុទ្ធគ្នារវាងយោធាមីយ៉ាន់ម៉ា និងក្រុមឧទ្ទាមនៅតំបន់ក្បែរព្រំដែនជាមួយប្រទេសចិន។
យោងតាមគេហទំព័រ Myanmar-Now ដែលបានរាយការណ៍នៅថ្ងៃទី៨ ខែវិច្ឆិកាថ្មីៗនេះថា ប្រទេសចិនមានការមិនពេញចិត្តយ៉ាងខ្លាំងចំពោះការកើនឡើងនៃជម្លោះប្រដាប់អាវុធ រវាងកងទ័ពរដ្ឋាភិបាលមីយ៉ាន់ម៉ា និងក្រុមឧទ្ទាមរបស់មីយ៉ាន់ម៉ា នៅភាគខាងជើងនៃតំបន់ក្បែរព្រំដែនចិន ដែលធ្វើឱ្យប៉ះពាល់សុវត្ថិភាពរបស់ប្រជាជនចិន។

ប្រព័ន្ធផ្សព្វផ្សាយក្នុងស្រុកមីយ៉ាន់ម៉ា ក៏បានឱ្យដឹងទៀតថា ជនជាតិចិនចំនួន ២ នាក់បានបាត់បង់ជីវិត និងមួយចំនួនទៀតបានរងរបួស បន្ទាប់ពីយោធាមីយ៉ាន់ម៉ាបានបាញ់ផ្លោងកាំភ្លើងធំមួយគ្រាប់ទៅលើតំបន់ព្រំដែនចិននិងមីយ៉ាន់ម៉ា។
លោក Wang Wenbin អ្នកនាំពាក្យក្រសួងការបរទេសចិន បាននិយាយថា ទីក្រុងប៉េកាំងនឹងធ្វើអន្តរកម្មយ៉ាងតឹងរ៉ឹងជាមួយភាគីពាក់ព័ន្ធ ក៏ដូចជាកំពុងតាមដានយ៉ាងដិតដល់នូវស្ថានភាពជម្លោះនៅភាគខាងជើងនៃប្រទេសមីយ៉ាន់ម៉ា។

លោក Wang Wenbin ក៏បានសង្កត់ធ្ងន់ដែរថា “បច្ចុប្បន្នប្រទេសចិនបានស្នើឱ្យភាគីពាក់ព័ន្ធក្នុងជម្លោះនៅភាគខាងជើងប្រទេសមីយ៉ាន់ម៉ា បញ្ឈប់ជាបន្ទាន់ និងចាត់វិធានការទប់ស្កាត់រាល់ស្ថានភាពដែលបង្កគ្រោះថ្នាក់ដល់អាយុជីវិត និងទ្រព្យសម្បត្តិរបស់ប្រជាជនចិននៅក្នុងតំបន់ព្រំដែនពិភពលោក”។ ដូច្នេះ ប្រទេសចិននឹងចាត់វិធានការដ៏ចាំបាច់ដើម្បីការពារអាយុជីវិត និងទ្រព្យសម្បត្តិពលរដ្ឋរបស់ខ្លួន។

គួរបញ្ជាក់ដែរថា រដ្ឋ Shan នៅក្នុងប្រទេសមីយ៉ាន់ម៉ាដែលស្ថិតនៅតំបន់ជាប់ព្រំដែនជាមួយប្រទេសចិន គឺជាកន្លែងនៃការប្រយុទ្ធគ្នារវាងកងទ័ពរដ្ឋាភិបាលមីយ៉ាន់ម៉ា និងក្រុមជនជាតិភាគតិចឧទ្ទាម។ តំបន់នេះក៏ជាជម្រករបស់ក្រុមឧទ្ទាម ដែលបានប្រយុទ្ធជាមួយយោធាអស់ជាច្រើនទសវត្សរ៍ ដើម្បីស្វ័យភាព និងការគ្រប់គ្រងធនធានធម្មជាតិ៕

ប្រទេសថៃ ៖ កាលពីថ្ងៃទី៧ ខែវិច្ឆិកា ឆ្នាំ២០២៣ គេសង្កេតឃើញពលរដ្ឋរស់នៅខេត្តពិជិត ប្រទេសថៃ នាំគ្នាយកយានជំនិះទៅចាក់ប្រេងនៅតាមស្ថានីយចាក់ប្រេងនានាតាំងពីព្រឹកព្រលឹម រហូតដល់ប្រេងសរុបប្រមាណជាង១ម៉ឺនលីត្រអស់ពីស្តុក ។ បុគ្គលិកបម្រើការក្នុងស្ថានីយចាក់ប្រេងមួយកន្លែងនិយាយថា ប្រេងសម្រាប់លក់ឱ្យអតិថិជននៅពេលនេះមិនគ្រប់គ្រាន់ទេ ដោយសារអតិថិជនមកចាក់ប្រេងច្រើន ។

ស្ថានការណ៍ដូចគ្នានេះ ក៏បានកើតឡើងនៅស្ថានីយចាក់ប្រេងនៅស្រុកមឿងកំផែងពេជ្រ ផងដែរ ។ អតិថិជននិយាយថា ខ្លួនបានយកម៉ូតូទៅចាក់ប្រេងនៅតាមស្ថានីយចាក់ប្រេងចំនួន៣កន្លែងហើយ ប៉ុន្តែស្ថានីយចាក់ប្រេងទាំងនេះប្រាប់ថា ប្រេងលក់អស់ពីស្តុកហើយ តាំងពីតម្លៃប្រេងធ្លាក់ចុះមក ។

ចំណែកនៅខេត្តពិស្នុលោក បុគ្គលិកធ្វើការនៅក្នុងស្ថានីយចាក់ប្រេងប្រាប់ថា ពេលតម្លៃប្រេងនៅប្រទេសថៃធ្លាក់ចុះបែបនេះ ការទិញប្រេងមកស្តុកទុកនៅស្ថានីយចាក់ប្រេង គឺត្រូវកក់មុនជាច្រើនថ្ងៃ ។ ចំណែកការដឹកជញ្ជូនប្រេងមានសភាពយឺតយ៉ាវ ប៉ុន្តែបុគ្គលិកធ្វើការក្នុងស្ថានីយចាក់ប្រេងរូបនេះជឿថា វានឹងប៉ះពាល់ត្រឹមរយៈពេលខ្លីប៉ុណ្ណោះ ។

ដូចគ្នានេះ នៅខេត្តមហាសារ៉ាខាម ពលរដ្ឋបានយកយានជំនិះរបស់ពួកគេទៅចាក់ប្រេងនៅតាមស្ថានីយចាក់ប្រេងជាច្រើនកន្លែងនៅស្រុកមឿងមហាសារ៉ាខាម រហូតដល់ស្ថានីយចាក់ប្រេងមួយចំនួនបិទស្លាកប្រកាសថា ប្រេងអស់តាំងពីម៉ោង៩ព្រឹកម៉្លេះ ។ ហេតុនេះ អតិថិជនចង់ចាក់ប្រេង ត្រូវរង់ចាំរហូតដល់ពេលល្ងាច ព្រោះស្ថានីយចាក់ប្រេងនឹងដឹកប្រេងមកបំពេញស្តុកនៅម៉ោង៥ល្ងាច ។

ចំណែកនៅទីក្រុងបាងកក អតិថិជនជាច្រើននាក់បានទៅចាក់ប្រេងនៅតាមស្ថានីយចាក់ប្រេងមួយចំនួនតាំងពីព្រលឹម ។ អតិថិជនទាំងនេះប្រាប់ថា វិធានការបញ្ចុះតម្លៃប្រេង បានជួយសម្រាលបន្ទុកដល់ជីវភាពរស់នៅរបស់ពួកគេច្រើន ហើយពួកគេបានសំណូមពរឱ្យរដ្ឋាភិបាលថៃបញ្ចុះតម្លៃប្រេងបែបនេះរហូតតទៅ។

រីឯភាគីពាក់ព័ន្ធបានលើកឡើងពីវិធានការបញ្ចុះតម្លៃប្រេងសាំង ដោយការកាត់បន្ថយពន្ធប្រេងសាំងថា វានឹងប៉ះពាល់ដល់ប្រាក់ចំណូលរបស់រដ្ឋាភិបាលប្រមាណ៩០០លានបាតក្នុង១ខែ ។ ការបញ្ចុះតម្លៃប្រេងលើកនេះនឹងមានរយៈពេល៣ខែ ហើយប្រាក់ចំណូលសរុបរបស់រដ្ឋាភិបាលនឹងបាត់បង់ប្រមាណ២ពាន់៧រយលានបាត ៕ ប្រភព ៖ ThaiPBS North

្រទេសកូរ៉េខាងត្បូង ៖ កាលពីថ្ងៃទី៧ ខែវិច្ឆិកា ឆ្នាំ២០២៣ សារព័ត៌មាន BBC របស់ប្រទេសអង់គ្លេសរាយការណ៍ថា អាជ្ញាធរប្រទេសកូរ៉េខាងត្បូងកំពុងប្រញាប់ស្វែងរកមធ្យោបាយ ដើម្បីគ្រប់គ្រងការរីករាលដាលនៃសត្វសង្កើច ក្រោយពីមានសេចក្តីរាយការណ៍ថា វាបានរាតត្បាតនៅតំបន់ចំនួន១៧ របស់កូរ៉េខាងត្បូង ដូចជា ទីក្រុងសេអ៊ូល, ទីក្រុងប៊ូសាន និងទីក្រុងអ៊ីនឆន ជាដើម ។ បច្ចុប្បន្ន ប្រទេសកូរ៉េខាងត្បូងបានរៀបចំថវិកាប្រមាណ៥០០លានវ៉ុន និងបង្កើតក្រុមការងារមួយដើម្បីធ្វើការទប់ស្កាត់ការរាតត្បាតនៃសត្វសង្កើច ។

នៅទីក្រុងសេអ៊ូល គេបានបញ្ជូនអាជ្ញាធរឱ្យចុះត្រួតពិនិត្យនៅតាមទីកន្លែងសាធារណៈប្រមាណ៣.២០០កន្លែង ក្នុងនោះមានដូចជា សណ្ឋាគារ និងអាងហែលទឹក ដើម្បីពិនិត្យមើលបញ្ហាអនាម័យនៅតាមទីកន្លែងនីមួយៗ និងគ្រប់គ្រងការរាតត្បាតរបស់សត្វប្រភេទនេះ ។

ប្រទេសកូរ៉េខាងត្បូងបានប្រទះឃើញសត្វសង្កើចជាច្រើនក្បាលលើកដំបូងនៅសាកលវិទ្យាល័យមួយក្នុងទីក្រុងដេហ្គូ កាលពីខែកញ្ញា ឆ្នាំ២០២៣ ។ ក្រោយមក គេក៏ប្រទះឃើញវារាតត្បាតនៅតាមតំបន់ផ្សេងៗយ៉ាងតិច១៧តំបន់ ក្នុងនោះវាបានរាតត្បាតនៅតាមបន្ទប់ស្នាក់នៅរបស់ភ្ញៀវទេសចរផងដែរ ។ ការរាតត្បាតរបស់សត្វសង្កើចបានធ្វើឱ្យពលរដ្ឋកូរ៉េខាងត្បូងចាប់ផ្តើមបារម្ភ ហើយពួកគេបានចៀសវាងទៅកាន់រោងភាពយន្ត និងមិនប្រើប្រាស់សេវាកម្មរថយន្តសាធារណៈ ។

បើទោះជាសត្វសង្កើចមិនចម្លងមេរោគក៏ដោយ ប៉ុន្តែបើវាខាំអ្នកណាម្នាក់ នឹងធ្វើឱ្យអ្នកនោះមានអាការៈរមាស់ធ្ងន់ធ្ងរ ។ ហេតុនេះ ការអេះដើម្បីបន្ថយអាការៈរមាស់ នឹងធ្វើឱ្យកើតដំបៅនៅលើរាងកាយ និងចម្លងមេរោគបាន ។

ក្រៅពីប្រទេសកូរ៉េខាងត្បូង សត្វសង្កើចក៏បានរាតត្បាតនៅប្រទេសបារាំង និងអង់គ្លេសផងដែរ ហើយព័ត៌មាននេះបានធ្វើឱ្យពលរដ្ឋនៅប្រទេសទាំងពីរភ័យខ្លាច ។ អ្នកជំនាញមកពីគណៈកម្មការសុខភាព និងអនាម័យជាតិប្រទេសបារាំងនិយាយថា បញ្ហានេះបានកើតឡើងស្ទើរគ្រប់កន្លែងទៅទូទាំងពិភពលោក ។ មូលហេតុចម្បង គឺដោយសារការធ្វើដំណើររបស់មនុស្ស ហើយពួកគេបានស្នាក់នៅក្នុងបន្ទប់រយៈពេលខ្លីៗ ទើបសត្វសង្កើចមកជាមួយតាមរយៈកាបូប ឬសម្ភារៈផ្សេងៗ ៕ ប្រភព ៖ Mono News

កូរ៉េខាងត្បូង៖ G-Dragon ដែលត្រូវបានគេស្គាល់ថាជា KING OF K-POP របស់កូរ៉េខាងត្បូង កំពុងស្ថិតនូវក្រោមការស៊ើបអង្កេតពីបទប្រើប្រាស់គ្រឿងញៀនខុសច្បាប់។

យោងតាមប្រភពព័ត៌មាន Dispatch ដែលបានចុះផ្សាយកាលពីរសៀលថ្ងៃទី៦ ខែវិច្ឆិកាថា តារាចម្រៀងវ័យ ៣៥ឆ្នាំរូបនេះ បានទៅប៉ុស្តិ៍ប៉ូលីស Nonhyeon ក្នុងតំបន់ Gangnam តាមការកោះហៅពីអាជ្ញាធរ ដោយក្នុងពេលនោះ G-Dragon បានបង្ហាញខ្លួនជាមួយនឹងស្លៀកសំលៀកបំពាក់ពណ៌ខ្មៅ អមដោយវ៉េនតាប្រណិត Jacques Marie Mage ដែលមានតម្លៃជាង ១,៣០០ ដុល្លារ។ មិនយូរប៉ុន្មានវេនតាទាំងនេះត្រូវបានលក់ដាច់គ្មានសល់រហូតដល់អស់ស្តុក នៅលើប្រព័ន្ធអនឡាញ។

G-Dragon ដែលជាប្រធានក្រុមរបស់ Big Bang ត្រូវបានជាប់ពាក់ព័ន្ធពីបទប្រើប្រាស់គ្រឿងញៀនខុសច្បាប់កាលពីថ្ងៃទី២០ ខែតុលាកន្លងទៅ ប៉ុន្តែតារារូបនេះមិនត្រូវបានគេឃុំខ្លួននោះទេ។ នៅក្នុងប្រព័ន្ធផ្សព្វផ្សាយថ្មីៗនេះ G-Dragon បាននិយាយថា គាត់មិនបានប្រើប្រាស់គ្រឿងញៀនអ្វីទេ ហើយគាត់នឹងសម្របសម្រួលតាមការស៊ើបអង្កេតដើម្បីទទួលបានលទ្ធផលក្នុងពេលឆាប់ៗនេះ ដោយអ្នកគាំទ្រជាច្រើនក៏ជឿជាក់ដែលថា តារាចម្រៀងរូបនេះមិនបានប្រព្រឹត្តិខុសអ្វីនោះទេ។

គួរបញ្ជាក់ដែរថា កាលពីខែឧសភា ឆ្នាំ ២០១១ G-Dragon ត្រូវបានគេរកឃើញប្រើកញ្ឆានៅប្រទេសជប៉ុន ហើយបានធ្វើតេស្តវិជ្ជមានក្នុងខែកក្កដាឆ្នាំដដែល បន្ទាប់មកទទួលបានការកាត់ទោសព្យួរ។ ក្រៅពី G-Dragon សមាជិកបីនាក់ទៀតរបស់ Big Bang ដូចជា Seung Ri, TOP, និង Daesung ក៏ជាប់ពាក់ព័ន្ធក្នុងរឿងអាស្រូវទាក់ទងនឹងសារធាតុហាមឃាត់នេះផងដែរ។ ទោះជាយ៉ាងណាក៏ដោយ បច្ចុប្បន្ន G-Dragon កំពុងស្ថិតក្នុងការសង្ស័យ នឹងត្រូវបានហាមមិនឱ្យចាកចេញពីប្រទេស ដោយរង់ចាំការស៊ើបអង្កេតជាមុនសិន។

G-Dragon គឺជាតារាចម្រៀងរបស់កូរ៉េខាងត្បូង អ្នកនិពន្ធបទចម្រៀង និងផលិតករឈានមុខគេ។ គាត់បានបង្ហាញខ្លួនជាលើកដំបូងនៅឆ្នាំ ២០០៦ ក្នុងនាមជាអ្នកដឹកនាំក្រុម Big Bang ។ លើសពីនេះ G-Dragon បានបង្កើតអាជីពទោលរបស់គាត់ជាមួយនឹងអាល់ប៊ុមជាបន្តបន្ទាប់ដូចជា Heartbreaker, GD & TOP … ក៏ដូចជាត្រូវបានអ្នកគាំទ្រសរសើរថាជា “ស្តេច Kpop” ដោយសារតែភាពជោគជ័យ និងឥទ្ធិពលរបស់គាត់នៅក្នុងតន្ត្រី និងពិភពម៉ូដ៕

ប្រទេសថៃ ៖ វាជាដំណឹងល្អសម្រាប់កសិករនៅប្រទេសថៃ គឺពួកគេនឹងទទួលបានប្រាក់ឧបត្ថម្ភពីរដ្ឋាភិបាល ក្នុង១គ្រួសារចំនួន១.០០០បាតសម្រាប់ផ្ទៃដីស្រែ១រ៉ៃ ។ រដ្ឋាភិបាលនឹងចាប់ផ្តើមផ្តល់ប្រាក់ឧបត្ថម្ភនេះ ចាប់ពីខែវិច្ឆិកា ឆ្នាំ២០២៣ តទៅ ។ លើសពីនេះ រដ្ឋាភិបាលក៏មានវិធានការគ្រប់គ្រងតម្លៃអង្ករកុំឱ្យធ្លាក់ចុះផងដែរ ។

លោក Chulphan Amornwiwat អនុរដ្ឋមន្ត្រីក្រសួងហិរញ្ញវត្ថុប្រទេសថៃ បានលើកឡើងអំពីការផ្តល់ប្រាក់ឧបត្ថម្ភដល់កសិករក្នុង១គ្រួសារចំនួន១.០០០បាត គឺសម្រាប់អ្នកមានផ្ទៃដីស្រែចំនួន១រ៉ៃ ថា នៅថ្ងៃទី១០ ខែវិច្ឆិកា ឆ្នាំ២០២៣ គណៈកម្មការគ្រប់គ្រងគោលនយោបាយស្រូវអង្ករជាតិ នឹងរៀបចំកិច្ចប្រជុំមួយដើម្បីពិចារណារឿងនេះ ។ ក្រសួងហិរញ្ញវត្ថុ, ក្រសួងកសិកម្ម និងក្រសួងពាណិជ្ជកម្ម នឹងបញ្ជាក់ក្នុងកិច្ចប្រជុំអំពីហេតុផល ដើម្បីឱ្យកសិករទទួលបានប្រាក់ឧបត្ថម្ភចំនួន១.០០០បាតសម្រាប់ផ្ទៃដីស្រែ១រ៉ៃ ។ បន្ទាប់មក នឹងមានការស្នើមកកាន់កិច្ចប្រជុំគណៈរដ្ឋមន្ត្រីក្នុងរយៈពេលពី១សប្តាហ៍ ទៅ២សប្តាហ៍ ហើយរំពឹងថា ប្រាក់ឧបត្ថម្ភនេះនឹងចាប់ផ្តើមផ្តល់ឱ្យកសិករ នៅខែវិច្ឆិកា ឆ្នាំ២០២៣ ។

លោក Chulphan Amornwiwat អនុរដ្ឋមន្ត្រីក្រសួងហិរញ្ញវត្ថុបន្តថា រដ្ឋាភិបាលបានកំណត់កសិករគោលដៅស្មើជាង៤លានគ្រួសារ ក្នុងនោះរដ្ឋាភិបាលនឹងជួយឧបត្ថម្ភប្រាក់ដល់ពួកគេក្នុង១គ្រួសារចំនួន១.០០០បាត សម្រាប់ផ្ទៃដីស្រែ១រ៉ៃ ។ កសិករ១គ្រួសារដែលនឹងទទួលបានប្រាក់ឧបត្ថម្ភ គឺត្រូវមានផ្ទៃដីស្រែមិនលើសពី២០រ៉ៃ (ឬមិនលើស៣ហិកតា) ។ ជំហានដំបូង ការផ្តល់ប្រាក់ដល់កសិករ គឺនឹងអនុវត្តចាប់ពីខែវិច្ឆិកា ឆ្នាំ២០២៣ រហូតដល់ថ្ងៃទី៣០ ខែកញ្ញា ឆ្នាំ២០២៤ ។

ទន្ទឹមនឹងនេះ គណៈរដ្ឋមន្ត្រីថៃបានអនុម័តវិធានការពន្យារពេលការលក់អង្ករផងដែរ ក្នុងគោលបំណងមិនឱ្យតម្លៃអង្ករធ្លាក់ចុះ ក្នុងនោះនឹងឱ្យកសិករដែលមានជង្រុកស្រូវប្រមូលផលស្រូវជាមុន ។ រដ្ឋាភិបាលនឹងផ្តល់កម្ចីចំនួន១២.០០០បាតក្នុង១តោន និងផ្តល់ប្រាក់ថ្លៃការទុកដាក់ស្រូវចំនួន១.៥០០បាតក្នុង១តោនសម្រាប់រយៈពេល៥ខែ ។

លើសពីនេះ រដ្ឋាភិបាលនឹងផ្តល់ប្រាក់កម្ចីដល់ស្ថាប័នកសិកម្មឱ្យទិញស្រូវក្នុងតម្លៃនាំមុខទីផ្សារ ដោយចាប់ផ្តើមពីស្រូវពូជផ្កាមិ្លះក្នុងតម្លៃ១២.២០០បាតក្នុង១តោន ។ នៅពេលលក់ស្រូវ បើទទួលបានប្រាក់ចំណេញ នឹងធ្វើការបែងចែកប្រាក់ចំណេញឱ្យកសិករផងដែរ ៕ ប្រភព ៖ 3Plus News

ជាការពិតណាស់ អ្នកដែលចូលចិត្តខាងធ្វើអាជីវកម្ម (ការរកស៊ី) គឺសុទ្ធតែជាមនុស្សដែលមានទំនោរទៅរកឯករាជ្យភាព និងសេរីភាពហិរញ្ញវត្ថុ។ ដូច្នេះហើយ ប្រសិនបើអ្នកមានបំណងចង់បើកអាជីវកម្មជាលើកដំបូង ឬពង្រីកអាជីកម្មអ្នកឲ្យបានប្រសើរជាងមុន កុំបារម្ភអី! ខាងក្រោមនេះគឺជាយុទ្ធសាស្រ្តទាំង៥ ក្នុងការបើកអាជីវកម្មនិងបង្កើនប្រាក់ចំណេញជាអតិបរមា៖

១ ស្វែងយល់ពីការប្រកួតប្រជែងនៅលើទីផ្សារ៖ អ្នកគួរតែធ្វើការស្រាវជ្រាវនិងស្វែងយល់ពីដៃគូរប្រកួតប្រជែងអ្នកឲ្យបានល្អិតល្អន់បំផុត។ មិនមែនជាការចម្លងគ្នាទេ ប៉ុន្តែគឺជាគំនិតច្នៃប្រឌិត ភាពប្លែកនៃផលិតផលនិងសេវាកម្មរបស់អ្នកក្នុងការផ្តល់ទៅកាន់អតិថិជន។ អ្នកត្រូវតែដឹងពីចំណុចសំខាន់នៃផលិតផលរបស់អ្នក ត្រូវដឹងថាតើអតិថិជនរបស់អ្នកចង់បានអ្វីជាពិសេស? តើកត្តាអ្វីខ្លះជាហេតុបណ្តាលឲ្យផលិតផលរបស់អ្នកអាចវ៉ាដាច់នៅក្នុងការប្រកួតនៅលើទីផ្សារបាន? ជាពិសេសគឺអ្នកត្រូវផ្តោតលើតម្លៃធ្វើយ៉ាងណាឲ្យថោកបំផុតតាមដែលអាចធ្វើទៅបានប្រកបដោយគុណភាព និងការប្រមូលសិនផ្សេងៗ។

២ កំណត់មូលដ្ឋានអតិថិជនគោលដៅ៖ ការវិភាគផលិតផលរបស់អ្នកដោយផ្តោតទៅលើអតិថិជនគោលដៅ ដោយស្វែងយល់ពីអ្វីដែលពួកគេចង់បានបំផុត ដែលមិនមែនផ្អែកទៅលើការចូលចិត្តរបស់អ្នកទៅលើផលិតផលរបស់ខ្លួនឯងនោះទេ។ ម៉្យាងវិញទៀតត្រូវស្វែងយល់ឲ្យច្បាស់ពីទីតាំងភូមិសាស្រ្ត (កម្រិតប្រាក់ចំណូលនិងបុគ្គលិកលក្ខណៈរបស់អតិថិជន) និងអត្រានិកូលសាស្រ្ត(ដូចជាអាយុ ភេទ ជនជាតិ) ដើម្បីកំណត់ចំនួនជាក់លាក់នៃអតិជនគោលដៅរបស់អ្នក។ ចូរបង្កើតគំរូប្រាក់ចំណូលរបស់អ្នកនិងវិភាគថា តើនរណាខ្លះដែលធ្លាប់ទិញផលិតផលរបស់អ្នកពីមុន? ហើយពួកគេទាំងនោះអាចនឹងត្រឡប់មកទិញវិញម្តងទៀតដែរឬទេ?

៣ បង្កើតផែនការអាជីវកម្ម៖ នៅក្នុងផែនការអាជីវកម្មគឺអ្នកអាចរៀបរាប់យ៉ាងលម្អិតអំពីគម្រោង ចាប់ផ្តើមពីការកំណត់កញ្ចប់ថវិការរបស់អ្នក រហូតដល់យុទ្ធសាស្រ្តទីផ្សារដើម្បីទទួលបានអតិថិជនជាដើម។ ជំហានស្នូលនៃផែនការអាជីវកម្មនោះគឺជាការវិភាគតម្លៃភាគហ៊ុនរបស់អ្នកទាំងមូល។ អ្នកត្រូវសិក្សាពីលំហូរនៃសាច់ប្រាក់ ដូចជាចេះប៉ាន់ប្រមាណការចំណាយ ប្រាក់ចំណូល ក៏ជាប្រាក់បន្ថែមផ្សេងៗ។ អ្នកក៏ត្រូវតាមដានពីអ្វីគ្រប់យ៉ាងនៅក្នុងក្រុមហ៊ុនរបស់អ្នកដូចគ្នាដូចជា ដឹងពីតម្លៃឧបករណ៍ប្រើប្រាស់ ពេលវេលាពលកម្ម ឬការធ្វើទីផ្សារជាដើម។ បន្ទាប់មក អ្នកត្រូវគណនាចំណូលនិងចំណាយរបស់អ្នកជាចាំបាច់។

៤ សិក្សាអំពីការផ្លាស់ប្តូរនៅក្នុងបរិបទសង្គម៖ អ្នកប្រាកដជាមិនចង់លក់ផលិតផលណាដែលបាត់បង់ប្រជាប្រិយភាពទៅហើយនោះទេ។ អ្នកត្រូវក្រឡេកទៅមើលលើបរិបទបែបណាក្នុងសង្គមបច្ចុប្បន្នដែលមនុស្សចូលចិត្តជាទូទៅ ជាងផ្តោតទៅលើការធ្វើអាជីវកម្មតែមួយមុខ។ ឧទាហរណ៍ប្រព័ន្ធផ្សព្វផ្សាយក្នុងបណ្តាញសង្គម ដូចជា Facebook , IG ជាដើម សុទ្ធជាវិធីក្នុងការទំនាក់ទំនងជាមួយនឹងមនុស្សសម័យថ្មី អ្នកអាចទាញយកប្រយោជន៍ពីវានៅក្នុងការធ្វើជំនួញ ដូចជាការលក់ផលិតផល Online តាមរយៈការ Post ការ Live ជាដើម បូករួមជាមួយនឹងសិល្បៈនៅក្នុងការលក់របស់អ្នក។

៥ ត្រូវច្នៃប្រឌិតអ្វីដែលថ្មីៗជានិច្ច៖ អាជីវកម្មរបស់អ្នកមិនគួរនៅស្ងៀមទ្រឹងឬដដែលៗពេកនោះទេ ព្រោះផលិតផល៨០%នៅលើទីផ្សារបច្ចុប្បន្នគឺខុសពីផលិតផលកាលពី៥ឆ្នាំមុន។ដូច្នេះ អ្នកត្រូវតែចេះសម្របខ្លួននិងបត់បែបគ្រប់កាលៈទេសៈ ប៉ុន្តែនៅតែរក្សាភាពប្រាកដប្រជាជាមួយនឹងផលិតផលរបស់អ្នកដដែល ដោយគ្រាន់តែមានការវិវត្តិបន្តិចបន្តួចឬច្រើនឲ្យស្របជាមួយនឹងទីផ្សារបច្ចុប្បន្ន ក៏ដូចជាបំពេញបន្ថែមនូវតម្រូវការអតិថិជនរបស់អ្នកផងដែរ។

អាមេរិក៖ ក្រុមហ៊ុន Tesla របស់ Elon Musk កំពុងជ្រើសរើសវិស្វកររាប់សិបនាក់សម្រាប់គម្រោង Tesla Bot ដើម្បីបង្កើនល្បឿននៃវឌ្ឍនភាព ក៏ដូចជាធ្វើពាណិជ្ជកម្មក្នុងរយៈពេលបីឆ្នាំខាងមុខ។យោងតាមគេហទំព័រ Business Insider ដែលបានចុះផ្សាយនៅថ្ងៃទី៧ ខែវិច្ឆិកាថា មនុស្សយន្ត Tesla នេះនឹងមានតម្លៃតិចជាង ២០,០០០ ដុល្លារអាមេរិក ដោយតម្លៃនេះនឹងថោកជាងតម្លៃរថយន្តរបស់ក្រុមហ៊ុន។ ដូច្នេះ ដើម្បីធ្វើឱ្យផែនការក្លាយជាការពិតក្នុងពេលឆាប់ៗនេះ លោក Musk បានកំពុងជ្រើសរើសមុខតំណែងចំនួន ៥០ បន្ថែមទៀតសម្រាប់គម្រោង Tesla Bot ដែលត្រូវបានគេស្គាល់ថាជា Optimus ដោយមុខតំណែងភាគច្រើនគឺជាវិស្វករគ្រប់គ្រងមនុស្សយន្ត ការរួមបញ្ចូលប្រព័ន្ធ និងវិស្វកររចនា។

បច្ចុប្បន្ន Tesla កំពុងពន្លឿនគម្រោងនេះ ខណៈដែលដៃគូប្រកួតប្រជែងមួយចំនួនក៏បានចាប់ផ្តើមសាកល្បងមនុស្សយន្តស្រដៀងគ្នានេះផងដែរ។ Optimus ដែលជាមនុស្សយន្តរបស់ Tesla មានកម្ពស់ ១៧៣ សង់ទីម៉ែត្រ ទម្ងន់ ៥៧ គីឡូក្រាម និងត្រូវបានបំពាក់ដោយអេក្រង់នៅលើមុខរបស់គាត់ដើម្បីបង្ហាញព័ត៌មាន។ វាអាចឡើងដល់ល្បឿនអតិបរមា ៨ គីឡូម៉ែត្រក្នុងមួយម៉ោង ដឹកទំនិញ ២០ គីឡូក្រាម លើកទម្ងន់ ៦៨ គីឡូក្រាម និងកាន់ទម្ងន់ ៤,៥ គីឡូក្រាមដោយអាវុធវែង រួមទាំងមានការយល់ឃើញអំពីពិភពលោកជុំវិញតាមរយៈកាមេរ៉ាចំនួន ៨ និងកុំព្យូទ័រ Full Self Driving ។

Optimus ក៏មានសមត្ថភាពសង្កេតប្រព័ន្ធគ្រប់គ្រងដៃ ក៏ដូចជាសមត្ថភាពក្នុងការរៀបចំប្លុកប្លាស្ទិកពណ៌ដោយដៃ និងអាចធ្វើចលនាយោគៈមួយចំនួន។ ទោះជាយ៉ាងណាក៏ដោយ ដៃគូប្រកួតប្រជែងមួយចំនួនរបស់ Tesla បច្ចុប្បន្នកំពុងសាងសង់រោងចក្រនៅ Oregon ដើម្បីផលិតមនុស្សយន្ត Digit ដោយគំរូមនុស្សយន្តនេះកំពុងត្រូវបានសាកល្បងនៅមជ្ឈមណ្ឌលស្រាវជ្រាវ និងអភិវឌ្ឍន៍របស់ក្រុមហ៊ុន Amazon ក្បែរទីក្រុង Seattle ខណៈដែល Tesla មិនទាន់បញ្ជាក់ទីតាំងផលិតមនុស្សយន្តច្បាស់លាស់នៅឡើយទេ៕