ក្រុមហាម៉ាស់បានស្នើឱ្យប្រទេសអ៊ីស្រាអែលដោះលែងអ្នកទោសប៉ាឡេស្ទីនសរុបចំនួន៦.០០០នាក់ដែលត្រូវបានឃុំខ្លួននៅអ៊ីស្រាអែល ដើម្បីដោះដូរជាមួយចំណាប់ខ្មាំងនៅតំបន់ Gaza Strip ។ ចំណែកកងទ័ពអ៊ីស្រាអែលប្រកាសថា មានមនុស្សត្រូវបានគេចាប់ធ្វើជាចំណាប់ខ្មាំងចំនួន១៩៩នាក់ ដែលជាចំនួនខ្ពស់ជាងការរំពឹងទុក ។

លោក ខាឡិក មេសាល (Khaled Meshaal) ជាមេដឹកនាំរបស់ក្រុមហាម៉ាស់នៅប៉ាឡេស្ទីននិយាយថា ក្រុមចំណាប់ខ្មាំងដែលក្រុមហាម៉ាស់ចាប់ខ្លួន ក្នុងនោះក៏មានមន្ត្រីជាន់ខ្ពស់របស់កងកម្លាំងការពារអ៊ីស្រាអែលនៅ Gaza ផងដែរ ។ ការលើកឡើងរបស់មេដឹកនាំក្រុមហាម៉ាស់នេះ គឺក្រោយពីក្រុមហាម៉ាស់ម្នាក់បាននិយាយទៅកាន់សារព័ត៌មាន Sky News ថា ខ្លួនមិនដឹងថា តើមានចំណាប់ខ្មាំងប៉ុន្មាននាក់ដែលនៅរស់រានមានជីវិតនោះទេ ក្រោយពីអ៊ីស្រាអែលវា.យប្រហា.រតាមផ្លូវអាកាសយ៉ាងខ្លាំង ។

ចំណែកលោក បាសេន ណេម (Basem Naim) ជាប្រធានផ្នែកនយោបាយ និងទំនាក់ទំនងអន្តរជាតិរបស់ក្រុមហាម៉ាស់បញ្ជាក់ថា លោកមិនជ្រាបពីចំនួនចំណាប់ខ្មាំងច្បាស់លាស់ទេ ក្រោយពីការទម្លាក់គ្រា.ប់បែ.កយ៉ាងខ្លាំងក្លារបស់អ៊ីស្រាអែលមកលើតំបន់ Gaza ។ លោកបន្តថា ក្រុមហាម៉ាស់ដែលគ្រប់គ្រងតំបន់ Gaza នឹងដោះលែងក្រុមចំណាប់ខ្មាំងទាំងអស់ នៅពេលអ៊ីស្រាអែលបញ្ឈប់ការវា.យប្រហា.រមកលើតំបន់ Gaza ។

ជាមួយគ្នានេះ ក្រុមហាម៉ាស់សង្ឃឹមថា នៅពេលនោះ ចំណាប់ខ្មាំងនៅតែមានជីវិត ។ កងពលតូចរបស់ Kassam ជាកងកម្លាំងប្រដាប់អាវុធរបស់ហាម៉ាស់បានប្រកាសកាលពីថ្ងៃទី១៦ ខែតុលា ឆ្នាំ២០២៣ ថា ចំណាប់ខ្មាំងចំនួន៩នាក់បានស្លា.ប់ក្រោយការវា.យប្រហា.ររបស់អ៊ីស្រាអែល ហើយកាលពី៣ថ្ងៃមុននេះ ចំណាប់ខ្មាំងបានស្លា.ប់ចំនួន១៣នាក់ រួមទាំងជនបរទេស៤នាក់ទៀត ។

រីឯសារព័ត៌មាន Sky News រាយការណ៍បន្ថែមថា កងទ័ពអ៊ីស្រាអែលបានវា.យប្រហា.រនៅជិតតំបន់ Rafah ជាច្រកព្រំដែនរវាងតំបន់ Gaza ជាមួយប្រទេសអេហ្ស៊ីប ៕ ប្រភព ៖ TNN World

បរទេស៖ ក្រុមហ៊ុន Rolls-Royce របស់ចក្រភពអង់គ្លេស គ្រោងនឹងកាត់បន្ថយការងាររហូតដល់ ២,៥០០ កន្លែងនៅចុងឆ្នាំ ២០២៤ ខណៈដែលក្រុមហ៊ុនរថយន្តអគ្គិសនីស៊ុយអែតបានប្រកាសក្ស័យធន់ នេះបើយោងតាមសារព័ត៌មាន The Guardian ដែលបានរាយការណ៍កាលពីថ្ងៃទី ១៧ ខែតុលា។

ក្រុមហ៊ុន Rolls-Royce បានបញ្ជាក់ថា ខ្លួននឹងស្នើឱ្យកាត់បន្ថយតួនាទី ២,៥០០ នៅទូទាំងពិភពលោក ដែលចំនួននេះស្មើនឹង ៦% នៃកម្លាំងការងារពាក់កណ្តាលនៅក្នុងចក្រភពអង់គ្លេស។ នាយកប្រតិបត្តិថ្មីរបស់ក្រុមហ៊ុន Rolls-Royce បាននិយាយថា ការកាត់បន្ថយការងារគឺជាជំហានមួយនៃដំណើរផ្លាស់ប្តូររយៈពេលជាច្រើនឆ្នាំរបស់ខ្លួន ដើម្បីកសាងរថយន្ត Rolls-Royce ដែលមានដំណើរការខ្ពស់ ការប្រកួតប្រជែង ធន់ និងរីកចម្រើន។ ដូច្នេះ Rolls-Royce មានបំណង ចង់រៀបចំក្រុមហ៊ុនឡើងវិញដូចជា ហិរញ្ញវត្ថុ ច្បាប់ និងធនធានមនុស្ស ដោយផ្តល់នូវការគាំទ្ររួមគ្នាដើម្បី “លុបការចម្លង” និង “សម្រេចបាននូវប្រសិទ្ធភាពកាន់តែច្រើន”។

ទោះជាយ៉ាងណាក៏ដោយ នៅថ្ងៃដដែលនោះ ក្រុមហ៊ុនរថយន្តអគ្គិសនីស៊ុយអែត Volta Trucks ក៏បានសម្រេចចិត្តប្រកាសក្ស័យធន់ ដែលនាំឱ្យបុគ្គលិកបាត់បង់ការងារចំនួន ៦០០ នាក់នៅចក្រភពអង់គ្លេស។ ចំណែកឯអ្នករុករករ៉ែ និងពាណិជ្ជករ Glencore ដែលចុះបញ្ជីនៅក្នុងទីក្រុងឡុងដ៍ក៏មានគម្រោងបិទអណ្តូងរ៉ែទង់ដែងក្រោមដីចំនួន ៣ របស់ខ្លួននៅ Mount Isa ក្នុងរដ្ឋ Queensland សម្រាប់ចុងឆ្នាំ ២០២៥ ផងដែរ។

អ្នកជំនាញរបស់ចក្រភពអង់គ្លេសបាននិយាយថា បរិយាកាសសេដ្ឋកិច្ចបច្ចុប្បន្ន គឺមានការប្រកួតប្រជែងគ្នាយ៉ាងខ្លាំង ដែលជំរុញឱ្យមានការធ្លាក់ចុះនៅក្នុងទីផ្សារមួយចំនួន ហើយអតិថិជនបានផ្អាក ឬពន្យារពេលការងារ។ ហេតុនេះហើយ ការកាត់បន្ថយការងារបានកើតឡើងចំពេលមានភាពមិនប្រាកដប្រជាលើទស្សនវិស័យសម្រាប់សេដ្ឋកិច្ចពិភពលោក ក៏ដូចជាក្តីបារម្ភអំពីវិបត្តិសេដ្ឋកិច្ចដ៏មានសក្តានុពលនៅចក្រភពអង់គ្លេសនាពេលខាងមុខផងដែរ៕

ក្រោយការវា.យប្រហា.រគ្នារវាងក្រុមហាម៉ាស់ និងប្រទេសអ៊ីស្រាអែល បានធ្វើឱ្យ Gaza Strip ក្លាយជាតំបន់មួយគ្មានអគ្គិសនីប្រើប្រាស់ ហើយពលរដ្ឋត្រូវរស់នៅក្នុងភាពងងិត, អត់ឃ្លាន, ខ្វះខាតស្បៀងអាហារ, ទឹក និងប្រេងឥន្ធនៈ ។ ហេតុនេះ ពួកគេបានបរិភោគអាហារដោយសន្សំសំចៃបំផុត ខណៈស្បៀងអាហារជិតអស់ពីស្តុកគ្រប់ទីកន្លែង ។

លោក ម៉ូហាម៉េត អាល់អាក់យាល ជាអ្នកដុតនំប៉័ងនៅតំបន់ Gaza Strip មានគំនិតដុតនំប៉័ងក្នុងឡបុរាណមួយដោយប្រើប្រាស់អុស និងយកនំប៉័ងចែកឱ្យពលរដ្ឋរស់នៅទីក្រុងខាន យូនិស ស្ថិតនៅភាគខាងត្បូងតំបន់ Gaza Strip បានបរិភោគដើម្បីរស់រានមានជីវិត ។ លោកនិយាយថា ៖ «ហាងរបស់ខ្ញុំទទួលស្វាគមន៍មនុស្សគ្រប់គ្នា ហើយយើងបានចែកនំប៉័ងឱ្យពួកគេហូប ។ ពេលនេះ ហាងមួយចំនួនបានបិទទ្វារ ហើយយើងមិនអាចធ្វើភីសាទេ ។ នេះជាឡដុតនំដែលអាចដំណើរការដោយមិនចាំបាច់ប្រើអគ្គិសនី ព្រោះវាជាឡបុរាណ ដែលមានអាយុប្រមាណពី៧០ឆ្នាំ ទៅ៨០ឆ្នាំ» ។ចំណែកលោក ម៉ូហាប់ម៉េត ឈីរ៉ាប់ ធ្វើការនៅហាងនំប៉័ងបញ្ជាក់ថា ពលរដ្ឋនៅតំបន់ Gaza Strip ហាក់ត្រូវគេបញ្ជូនឱ្យទៅរស់នៅក្នុងសម័យបុរាណកាលពី៦០ឆ្នាំមុន ហើយអ៊ីស្រាអែលមិនសល់អ្វីដើម្បីឱ្យពួកគេប្រើប្រាស់ទេ ។ លោកនិយាយថា ៖ «ពួកគេមិនអាចដុតនំប៉័ងនៅផ្ទះបានទេ ទើបនាំគ្នាមកហាងនៅទីនេះ ។ ហាងរបស់យើងដុតនំដោយប្រើប្រាស់អុស ដែលមិនចាំបាច់ប្រើអគ្គិសនី និងប្រេងឥន្ធនៈ ។ អរគុណ ព្រះជាម្ចាស់សម្រាប់រឿងនេះ ហើយមនុស្សម្នាត្រូវរស់នៅដូចសម័យ៦០ឆ្នាំមុនអីចឹង ព្រោះអ៊ីស្រាអែលអត់នៅសល់អ្វីសម្រាប់ឱ្យយើងប្រើប្រាស់បានទេ» ។

ពលរដ្ឋភាគច្រើននៅតំបន់ Gaza Strip បានហូបនំប៉័ងជាអាហារចម្បង ប៉ុន្តែម្សៅផលិតពីស្រូវសាឡីសម្រាប់ធ្វើជាគ្រឿងផ្សំសំខាន់នោះជិតអស់គ្រប់ទីកន្លែង ហើយវាអាចគ្រប់គ្រាន់សម្រាប់តែ១សប្តាហ៍ទៀតប៉ុណ្ណោះ ។ ម្យ៉ាងទៀត នៅពេលគ្មានអគ្គិសនីប្រើប្រាស់ ឧស្សាហកម្មផលិតម្សៅពីស្រូវសាឡី មិនអាចដំណើរការបានទេ ។

សារព័ត៌មានបរទេសរាយការណ៍ថា អ្នករស់នៅតំបន់ Gaza Strip ត្រូវបរិភោគអាហារដោយសន្សំសំចៃបំផុត ហើយមនុស្សមួយចំនួនបរិភោគអាហារតែ១ពេលប៉ុណ្ណោះក្នុង១ថ្ងៃ ដោយពួកគេព្យាយាមឱ្យក្មេងៗបរិភោគឱ្យឆ្អែត ។ ចំណែកគម្រោងម្ហូបអាហារពិភពលោក ក៏បានបញ្ជូននំប៉័ងទៅកាន់កន្លែងខ្លះនៅតំបន់ Gaza Strip ផងដែរ ។ គេសង្កេតឃើញពលរដ្ឋនាំគ្នារង់ចាំការបើកច្រកព្រំដែនរ៉ាហ្វា ដែលតភ្ជាប់រវាងតំបន់ Gaza Strip ជាមួយប្រទេសអ៊ីហ្ស៊ីប ដើម្បីបញ្ជូនស្បៀងអាហារមកឱ្យពួកគេបន្ថែមទៀត ៕ ប្រភព ៖ TNN World

បរទេស៖ បុរសជនជាតិអាហ្វ្រិកម្នាក់ឈ្មោះ Callitxe Nzamwita អាយុ ៧១ ឆ្នាំបានរស់នៅក្នុងផ្ទះដាច់ស្រយាលមួយដែលហ៊ុំព័ទ្ធដោយរបងកម្ពស់ ៤.៥ ម៉ែត្រអស់រយៈពេល ៥៥ ឆ្នាំមកហើយ ដោយសារតែភាពស្និទ្ធស្នាលជាមួយស្ត្រីធ្វើឱ្យគាត់ភ័យខ្លាច។
លោក Callitxe Nzamwita បានសំងំលាក់ខ្លួននៅក្នុងផ្ទះតាំងពីគាត់មានអាយុត្រឹមតែ ១៦ ឆ្នាំមកម្លេះ នៅពេលដែលគាត់មានភាពភ័យខ្លាចចំពោះស្ត្រីគឺខ្លាំងពេកមិនអាចទ្រាំបាន។ គាត់មិនអាចឈរនៅក្បែរសមាជិកភេទផ្ទុយបានទេ កត្តានេះធ្វើឱ្យលោក Callitxe បដិសេធមិនរៀបការជារៀងរហូត ហើយបានសង់របងឈើជុំវិញផ្ទះដ៏សមរម្យរបស់គាត់ នឹងមិនបានដើរចេញក្រៅផ្ទះតាំងពីពេលនោះមក។ ដោយលោក Callitxe បាននិយាយថា រាល់ពេលដែលលោកបានឃើញស្ត្រីម្នាក់ពីចម្ងាយ លោកនឹងរត់ចូលទៅក្នុងផ្ទះហើយចាក់សោរខ្លួនឯងនៅក្នុងបន្ទប់របស់លោកគ្រប់ពេលវេលា។

នៅពេលដែលសមាជិកគ្រួសាររបស់លោក Nzamwita បានទទួលមរណភាពអស់ទៅ បុរសវ័យ ៧១ ឆ្នាំរូនេះនៅតែបន្តលាក់ខ្លួនរហូតមកដល់បច្ចុប្បន្ន ប៉ុន្តែទោះជាយ៉ាងណាក៏ដោយមានស្ត្រីនៃសហគមន៍ម្នាក់តែងតែមើលថែគាត់ ដោយបានបោះរបស់របរគ្រប់ប្រភេទដូចជាអាហារ និងសំលៀកបំពាក់ចូលទៅក្នុងទីធ្លាផ្ទះរបស់គាត់ ទោះបីជាគាត់មិនបានបើកទ្វារឱ្យគេចូល ប៉ុន្តែគាត់នៅតែប្រើរបស់ដែលគេឱ្យគាត់។ ស្ត្រីអ្នកជិតខាងម្នាក់បាននិយាយថា គាត់កម្របានឃើញបុរសវ័យ ៧១ ឆ្នាំម្នាក់នេះចាកចេញពីផ្ទះតាំងពីគាត់នៅក្មេងមកម្លេះ។

យោងតាមវេជ្ជបណ្ឌិតដែលបានធ្វើរោគវិនិច្ឆ័យលោក Callitxe Nzamwita បានឱ្យដឹងថា បុរសអាហ្វ្រិកវ័យ ៧១ ឆ្នាំម្នាក់នេះបានកើតជំងឺរោគស្ត្រីដែលជាលក្ខខណ្ឌដ៏កម្រមួយ។ ហេតុនេះហើយមនុស្សប្រុសដែលកើតរោគស្ត្រី តែងមានរោគសញ្ញាដូចជា មានការភ័យស្លន់ស្លោ តឹងទ្រូង បែកញើស ចង្វាក់បេះដូងលោតញាប់ ពិបាកដកដង្ហើម ហើយថែមទាំងមានរោគសញ្ញានៃការឈឺពោះ ឬអស់កម្លាំង ដួលសន្លប់ជាដើម៕

ប្រទេសថៃ ៖ ក្រោយពីថ្ងៃទី១១ ខែកញ្ញា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានថ្លែងគោលនយោបាយនៅរដ្ឋសភា និងចាប់ផ្តើមបំពេញការងារថ្ងៃដំបូងរបស់លោកក្នុងកិច្ចប្រជុំគណៈរដ្ឋមន្ត្រី ។ លោក សេដ្ឋា ថាវីស៊ីន លើកឡើងថា លោកនឹងបំពេញការងារដោយមិនខ្លាចនឿយហត់ ។

ខាងក្រុមនេះ គឺជាការងារសំខាន់ៗចំនួន៥ របស់លោក សេដ្ឋា ថាវីស៊ីន នាយករដ្ឋមន្ត្រីថ្មី ៖
១-កាត់បន្ថយការចំណាយក្នុងជីវភាពរស់នៅ ៖ ជំហានដំបូង រដ្ឋាភិបាលថៃនឹងបញ្ចុះតម្លៃអគ្គិសនី, បញ្ចុះតម្លៃហ្គាសសម្រាប់ចម្អិនអាហារ និងបញ្ចុះតម្លៃប្រេងម៉ាស៊ូត ដោយតម្លៃមិនលើសពី៣០បាតក្នុង១លីត្រ ។

២-ទាក់ទាញវិនិយោគិននៅលើពិភពលោក ៖ លោក សេដ្ឋា ថាវីស៊ីន បានធ្វើដំណើរទៅចូលរួមកិច្ចប្រជុំសមាជអង្គការសហប្រជាជាតិ ហើយលោកបានជជែកជាមួយនាយកគ្រប់គ្រងក្រុមហ៊ុនធំៗដូចជា លោក Elon Musk, ក្រុមហ៊ុន Microsoft, Google និងក្រុមហ៊ុនជាច្រើនទៀត ។

៣-ជំរុញការទំនាក់ទំនងជាមួយប្រទេសនានា ៖ លោក សេដ្ឋា ថាវីស៊ីន បានធ្វើដំណើរទស្សនកិច្ចទៅកាន់ប្រទេសកម្ពុជា, ព្រុយណេ, ម៉ាឡេស៊ី, សិង្ហបុរី, ហុងកុង និងចិន ចាប់ពីថ្ងៃទី១៦ ដល់ថ្ងៃទី១៩ ខែតុលា ឆ្នាំ២០២៣ ។ លើសពីនេះ លោកនាយករដ្ឋមន្ត្រីថៃ ក៏មានគម្រោងជួបជាមួយលោកប្រធានាធិបតីចិន ស៊ី ជិនពីង ផងដែរ ដើម្បីពិភាក្សាអំពីគម្រោង «ខ្សែក្រវ៉ាត់១ ផ្លូវ១ ឬ One Belt one Road» ហើយលោកមានគម្រោងធ្វើដំណើរទៅកាន់ប្រទេសអារ៉ាប៊ី សាអូឌីត ដើម្បីចូលរួមកិច្ចប្រជុំ ASEAN-GCC Economic Cooperation (GCC) ។

៤-ជួយកសិករផ្អាកការសងបំណុលធនាគារ ៖ រដ្ឋាភិបាលថៃបានប្រកាសឱ្យកសិករផ្អាកសងបំណុលធនាគាររយៈពេល៣ឆ្នាំ, បង្កើនប្រាក់ចំណូលកសិករ, ជំរុញ Soft Power, ដោះស្រាយបញ្ហាគ្រោះរាំងស្ងួតដោយសារបាតុភូតអេលនីណូ ។ លោក សេដ្ឋា ថាវីស៊ីន លើកឡើងថា លោកនឹងជំរុញឱ្យជីវភាពពលរដ្ឋថៃបានល្អប្រសើរជាងមុន ហើយក៏មានការអញ្ជើញនាយកគ្រប់គ្រងធនាគារប្រទេសថៃមកចូលរួមពិភាក្សាផងដែរ ។

៥-ជំរុញវិស័យទេសចរណ៍ ៖ គោលនយោបាយចម្បងក្នុងការជំរុញវិស័យទេសចរណ៍ គឺការលើកលែងទិដ្ឋាការសម្រាប់ភ្ញៀវទេសចរចិន និងកាហ្សាក់ស្ថាន ដើម្បីជួយឱ្យសេដ្ឋកិច្ចប្រទេសថៃល្អប្រសើរឡើង គឺអនុវត្តចាប់ពីថ្ងៃទី២៥ ខែកញ្ញា ឆ្នាំ២០២៣ រហូតដល់ខែកុម្ភៈ ឆ្នាំ២០២៤ ។ លើសពីនេះ រដ្ឋាភិបាលថៃក៏មានគោលនយោបាយផ្តល់ប្រាក់ឱ្យពលរដ្ឋថៃក្នុងម្នាក់ចំនួន១ម៉ឺនបាតផងដែរ ។

នៅពេលលោក សេដ្ឋា ថាវីស៊ីន ឡើងកាន់តំណែងជានាយករដ្ឋមន្ត្រីប្រទេសថៃ លោកបានជួបនឹងហេតុការណ៍ធំៗដូចជា ការបា.ញ់ប្រហា.រនៅ Siam Paragon, ទឹកជំនន់នៅភាគខាងជើងប្រទេសថៃ និងសង្គ្រាមនៅប្រទេសអ៊ីស្រាអែលជាមួយប៉ាឡេស្ទីន ។ ភាគីនានាកំពុងសង្កេតមើលថា តើរដ្ឋាភិបាលរបស់លោក សេដ្ឋា ថាវីស៊ីន នឹងដោះស្រាយរឿងរ៉ាវទាំងអស់នេះដោយរបៀបណា ? ប្រភព ៖ chiangmai news