បរទេស៖ ហាងស្រាអូស្ត្រាលីមួយកន្លែងរងការផាកពិន័យយ៉ាងច្រើន បន្ទាប់ពីផ្សព្វផ្សាយការចែកភេសជ្ជៈមិនគិតថ្លៃតាមទំហំអាវទ្រនាប់ បង្កការមិនពេញចិត្តពីសំណាក់ប្រជាពលរដ្ឋជាច្រើន។

យោងតាមការចុះផ្សាយរបស់គេហទំព័រ Daily Mail កាលពីថ្ងៃទី ២៤ ខែតុលាថា កន្លែងកម្សាន្តមួយដែលមានឈ្មោះថា “Woolshed on Hindley” នៅទីក្រុង Adelaide ភាគខាងត្បូងប្រទេសអូស្ត្រាលី ត្រូវបានពិន័យដោយអាជ្ញាធរ បន្ទាប់ពីហាងនេះបានផ្សព្វផ្សាយឱ្យអតិថិជនជាស្ត្រីដោះអាវទ្រនាប់ចេញ ដើម្បីទទួលបានភេសជ្ជៈឥតគិតថ្លៃតាមទំហំអាវ មានន័យថាបើទំហំអាវធំទទួលបានភេសជ្ជៈកែវធំ ប៉ុន្តែបើទំហំអាវតូចទទួលបានភេសជ្ជៈកែវតូច។

តាមស្លាកសញ្ញារបស់ហាងមានសរសេរថា Cup A ទទួលបានភេសជ្ជៈ ១ កែវ ភេសជ្ជៈ B ២ និងភេសជ្ជៈ ៣ C ដោយមានសារសរសេរនៅលើនោះថា «កាន់តែធំកាន់តែល្អ»។ ទោះជាយ៉ាងណាក៏ដោយ កន្លែងកម្សាន្តនោះត្រូវបានផាកពិន័យ ៣,៨៩៧ ដុល្លារ សម្រាប់ការផ្សព្វផ្សាយនោះ ព្រោះវាបានបំពានបទប្បញ្ញត្តិសម្រាប់ការផ្សព្វផ្សាយកន្លែង កម្សាន្ត។ យោងតាមអាជ្ញាធរក៏បានរកឃើញថាហាងនេះមិនមានកាមេរ៉ា CCTV ដែលអាចប្រើប្រាស់បាននោះទេ។ ដូច្នេះ ការផ្សព្វផ្សាយផ្អែកលើយេនឌ័រ រួមទាំងការផ្សព្វផ្សាយដែលប្រឆាំងនឹងមនុស្ស មិនត្រឹមតែមិនស្របតាមការរំពឹងទុករបស់សហគមន៍ប៉ុណ្ណោះទេ ប៉ុន្តែវាគឺជាការបំពាន។

គួរបញ្ជាក់ដែរថា ការផ្សព្វផ្សាយនេះត្រូវបានលុបចោលភ្លាមៗ ហើយម្ចាស់ហាងនេះក៏បានបង្ហោះសារសុំទោសជាសារធារណៈដល់មនុស្សគ្រប់គ្នា ដោយបញ្ជាក់ថា ការផ្សព្វផ្សាយនេះមិនមានចេតនារើសអើងដល់ស្ថាប័នរបស់ប្រជាពលរដ្ឋតាមមធ្យោបាយណាមួយឡើយ៕

ហុងកុង៖ កាលពីថ្ងៃអង្គារទី២៤ខែតុលានេះ សារព័ត៌មានរបស់រដ្ឋចិនបានរាយការណ៍ថា សភាជាតិរបស់ប្រទេសចិនបានបានអនុម័តច្បាប់ទាក់ទងទៅនឹងការពង្រឹងប្រព័ន្ធអប់រំទៅកាន់សាធារណៈជន ជាពិសេសគឺកុមារឲ្យមានឧត្តមគតិស្នេហាជាតិ ដើម្បីបញ្ជៀសនូវបញ្ហាមួយចំនួន ពិសេសកុំឲ្យកើតឡើងនូវប្រវត្តិសាស្រ្តច្រំដែលនៃ«លទ្ធិបដិវត្ត»របស់ចិននាសម័យមុន និងរក្សាបាននូវឯកភាពជាតិ។

យោងតាមភ្នាក់ងារសារព័ត៌មាន Xinhua បានឲ្យដឹងថា ច្បាប់អប់រំឧត្តមភាពស្នេហាជាតិនេះត្រូវបានផ្តល់ការធានាបាននូវនិតិវិធីជាតិនិយម ព្រោះថាមនុស្សមួយចំនួនបានភ្លេចនូវស្មារតីស្នេហាជាតិជាបណ្តើរៗហើយ។ ភ្នាក់ងារស៊ីហ័រក៏បានបន្តទៀតថា ច្បាប់នេះត្រូវបានតាក់តែងឡើងក្នុងគោលបំណងអប់រំឆ្ពោះទៅរកឧត្តមភាពស្នេហាជាតិ ដោយគោរពទៅនឹង ប្រវត្តិសាស្រ្តនិងវប្បធម៌ជាប្រពៃណីរបស់ប្រទេសដទៃនិងបំផុសគំនិតក្នុងការទទួលបាននូវសមិទ្ធផលដ៏អស្ចារ្យពីអរិយធម៌ផ្សេងៗផងដែរ។

យោងទៅតាម China Daily បានបញ្ជាក់ដែរថា ច្បាប់នេះបានអនុវត្តវិធានការទៅលើក្រុមមនុស្សផ្សេងៗរួមមានទាំងមន្ត្រីរាជការ កម្មករ អ្នកភូមិ កុមារ ជាពិសេសគឺរដ្ឋបាលនៅទីក្រុងហុងកុង និង ម៉ាកាវ ក៏ដូចជាតៃវ៉ាន់ជាដើម។

សូមរំលឹកផលដែរថា៖ ច្បាប់ឧត្តមគតិស្នេហាជាតិនេះគឺ ផ្តោតលើការបណ្តុះស្មារតីស្រលាញ់ជាតិទៅកាន់ប្រជាពលរដ្ឋ ជាពិសេសគឺកុមារនិង ក្រុមគ្រួសារ(ព្រោះគ្រួសារនឹងដើរតួនាទីយ៉ាងសំខាន់នៅក្នុងការអប់រំកូនចៅគេឲ្យស្រលាញ់មាតុភូមិ) ច្បាប់នេះក៏ជាការបើកចិត្តទូលាយទៅកាន់ពិភពលោក ប្រកាន់ភ្ជាប់នូវហេតុផលច្បាស់លាស់ អត់ធ្មត់ និងបើកចំហរ គោរពទៅនឹងអត្តសញ្ញាណក៏ដូចជាវប្បធម៌អរិយធម៌របស់ជាតិដទៃជាដើម។ ច្បាប់នេះនឹងដាក់ឲ្យអនុវត្តជាផ្លូវការចាប់ពីនៅថ្ងៃទី១ខែមករាឆ្នាំ២០២៤នេះតទៅ ដែលទណ្ឌកម្មសម្រាប់ដាក់ទោសក្នុងច្បាប់នេះមានដូចជា ការប្រមាថទង់ជាតិរបស់ប្រទេស ការសួរដេញដោលរករឿងវីរជននៃបក្សកម្មុនីសនិងសកម្មភាពផ្សេងៗទៀតផងដែរ៕
CAN News

ប្រទេសថៃ ៖ កាលពីថ្ងៃទី២៥ ខែតុលា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានចូលរួមកិច្ចប្រជុំតុមូល ព្រមទាំងថ្លែងសុន្ទរកថាក្នុងកម្មវិធី «AMCHAM’s Annual General Meeting» នៅសណ្ឋាគារ The Athenee Hotel នាទីក្រុងបាងកក ។ ក្នុងឱកាសនោះ លោកលើកឡើងថា នៅពេលលោកចូលរួមកិច្ចប្រជុំសភាពាណិជ្ជកម្មអាមេរិកប្រចាំប្រទេសថៃ «AMCHAM Thailand» លោកបានផ្តល់នូវទំនុកចិត្តដល់ក្រុមហ៊ុនអាជីវកម្ម និងវិនិយោគិនអាមេរិកថា ថៃបើកប្រទេសហើយ ហើយវាជាពេលវេលាដ៏ល្អ និងសមរម្យបំផុតសម្រាប់វិនិយោគិនអាមេរិកគួរមកវិនិយោគនៅថៃ ។

លោក សេដ្ឋា ថាវីស៊ីន នាយករដ្ឋមន្ត្រីថៃថ្លែងថា ៖ «ខ្ញុំបានផ្តល់នូវទំនុកចិត្តថា ប្រទេសថៃមានចំណុចអ្វីខ្លះដែលទាក់ទាញការវិនិយោគ ដូចជា សិទ្ធិពិសេសផ្នែកពន្ធ, ថាមពលស្អាត រួមទាំងការផ្តល់ភាពងាយស្រួលក្នុងការរស់នៅប្រទេសថៃ ដូចជា អាចឱ្យកូនចូលរៀននៅសាលារៀនអន្តរជាតិ, ប្រព័ន្ធព្យាបាលសុខភាព គឺប្រទេសថៃមានមន្ទីរពេទ្យល្អៗជាច្រើនកន្លែង» ។

ការវិនិយោគលើរថយន្តអគ្គិសនី (EV) ប្រទេសថៃបានស្ថិតក្នុងលំដាប់ទី១ ដែលមានរោងចក្ររថយន្តអគ្គិសនី និងប្រើប្រាស់រថយន្តអគ្គិសនីក្នុងអត្រាកើនឡើងខ្ពស់ ។ លោកនាយករដ្ឋមន្ត្រីបានប្រាប់ទៅសមាជិកសភាពាណិជ្ជកម្មអាមេរិកថា ថៃបានគាំទ្រការដំឡើងរថយន្តអគ្គិសនីរហូតមក ប៉ុន្តែលោកមិនប្រាកដចិត្តថា ថៃនឹងផ្តល់សិទ្ធិប្រយោជន៍ផ្នែកពន្ធយូរកម្រិតណា ។ ម្យ៉ាងទៀត ថៃនឹងពិនិត្យមើលវិនិយោគិនចាស់ផងដែរ គឺជប៉ុន ដែលថៃចាត់ទុកថា គឺជាប្រទេសវិនិយោគធំក្នុងរយៈពេល៥០ឆ្នាំ ទៅ៦០ឆ្នាំ ។

ចំណែកទិសដៅកំណើនសេដ្ឋកិច្ចប្រទេសថៃក្នុងរយៈពេល២ខែ ទៅ៣ខែនោះ លោកនាយករដ្ឋមន្ត្រីថៃថ្លែងថា លោកពិបាកនិយាយ ព្រោះបច្ចុប្បន្ន មានកើតសង្គ្រាមនៅប្រទេសអ៊ីស្រាអែល ។ ដូច្នេះ ប្រទេសថៃត្រូវតែតាមដានឱ្យដិតដល់ ប៉ុន្តែរដ្ឋាភិបាលក៏បានប្រឹងប្រែងអស់ពីសមត្ថភាពហើយ ដូចជា វិធានការរយៈពេលខ្លី រហូតដល់រយៈពេលវែង ។ ចំណែកវិស័យទេសចរណ៍វិញត្រូវមើលថា តើសង្គ្រាមនៅអ៊ីស្រាអែលនឹងកាន់តែធ្ងន់ធ្ងរដែរឬទេ ? ប្រសិនបើវាធ្ងន់ធ្ងរ គឺនឹងប៉ះពាល់ដល់វិស័យទេសចរណ៍ថៃ ព្រោះថៃនឹងឈានចូលរដូវកាលទេសចរណ៍នៅចុងឆ្នាំ២០២៣ ។

លោកនាយករដ្ឋមន្ត្រីបន្តថា តាមរយៈការជជែកជាមួយក្រុមហ៊ុនអាជីវកម្មឃើញថា គ្រប់គ្នាមិនបានគិតពីចំណុចអវិជ្ជមានទេ ហើយមានក្រុមហ៊ុនមួយចង់មកសាងសង់រោងចក្រនៅថៃពាក់ព័ន្ធនឹងការស្រាវជ្រាវ និងការអភិវឌ្ឍ ហើយក្រុមហ៊ុននេះបានជជែកជាមួយលោករឿងសិទ្ធិពិសេសផ្នែកពន្ធ ។ ដូច្នេះ លោកឆ្លើយថា បើលោកធ្វើដំណើរទៅចូលរួមកិច្ចប្រជុំ APEC នៅអាមេរិកក្នុងខែវិច្ឆិកា ឆ្នាំ២០២៣ លោកនឹងជជែកគ្នាបន្តទៀត ៕ ប្រភព ៖ nation

វៀតណាម៖ បច្ចុប្បន្ន ការខ្វះខាតទឹកស្អាតនៅទីក្រុងហាណូយមានចន្លោះពី ១ ទៅ ២ ម៉ឺនម៉ែត្រគូបក្នុងមួយថ្ងៃ អស់រយៈពេលជាងកន្លះខែមកហើយនៅក្នុងតំបន់មួយចំនួន បើតាមការចុះផ្សាយរបស់គេហទំព័រ The Vietnam Post។

យោងតាមគណៈកម្មាធិការប្រជាជនទីក្រុងហាណូយ បានបញ្ជាក់កាលពីថ្ងៃទី ២៥ ខែតុលាថា កង្វះខាតទឹកស្អាតក្នុងមូលដ្ឋាននៅតំបន់ជាច្រើននៅតែកើតមានឡើងដដែល។ ដូច្នេះ ក្នុងរដូវក្តៅឆ្នាំ ២០២៤ ទីក្រុងហាណូយអាចនឹងប្រឈមជាមួយការខ្វះខាតទឹកប្រហែល ៥ ម៉ឺនម៉ែត្រគូបក្នុងមួយថ្ងៃ ដែលប្រមូលផ្តុំនៅភាគខាងលិច និងនិរតី។ មូលហេតុចម្បងនៃការខ្វះខាតទឹកស្អាតគឺដោយតម្រូវការទឹកស្អាតច្រើនហួសពីការគ្រោងទុក ហើយទីក្រុងបានកាត់បន្ថយការទាញយកប្រភពទឹកពីក្រោមដី។

ដើម្បីធានាតម្រូវការប្រើប្រាស់ទឹកស្អាតសម្រាប់ឆ្នាំបន្តបន្ទាប់ ទីក្រុងតម្រូវឱ្យក្រុមហ៊ុន Duong River និងក្រុមហ៊ុនទឹកស្អាត Song Da រៀបចំដំណោះស្រាយដើម្បីដំណើរការសមត្ថភាពទំនេរកើនឡើង ២០% បើប្រៀបធៀបនឹងថ្ងៃនេះតាមពេលវេលា និងបច្ចេកទេសអនុញ្ញាត។ ទោះជាយ៉ាងណាក៏ដោយ អ្វីៗមិនដូចផែនការដែលទីក្រុងរៀបចំនោះទេ មូលហេតុគឺនៅពេលរៀបចំវិនិយោគ ទឹកទន្លេ Da បានធ្លាក់ចុះទាបពេក បង្កការលំបាកដល់ប្រភពទឹក។ ដូច្នេះក្រុមហ៊ុន Duong River បានដំឡើងស្ថានីយ៍បូមទឹកស្រែនៅឆ្នាំ ២០២០ និងស្ថានីយ៍បូមទឹកសង្គ្រោះបន្ទាន់នៅឆ្នាំ ២០២៣ ដើម្បីអាចយកទឹកឆៅពីទន្លេដា ចូលទៅក្នុងប្រឡាយនាំទៅដល់រោងចក្រផលិតស្អាត Song Da ។

គួរបញ្ជាក់ដែរថា បច្ចុប្បន្ននេះ សមត្ថភាពផ្គត់ផ្គង់ទឹកស្អាតសរុបរបស់ទីក្រុងហាណូយគឺ ១.៥ លានម៉ែត្រគូប ប៉ុន្តែផលិតកម្មជាក់ស្តែងក្នុងឆ្នាំ ២០២៣ គឺត្រឹមតែ ១.៣ លានម៉ែត្រគូបក្នុងមួយថ្ងៃប៉ុណ្ណោះ។ ក្នុងនោះទឹកក្រោមដីមាន ៧៧០.០០០ ម៉ែត្រគូប ទឹកលើផ្ទៃមាន ៧៥០.០០០ ម៉ែត្រគូប។ រីឯបណ្តាញផ្គត់ផ្គង់ទឹកជនបទមានសមត្ថភាពរចនាស្ថានីយ៍នីមួយៗពី ៣០០ – ១,០០០ ម៉ែត្រគូបក្នុងមួយថ្ងៃ៕

ប្រទេសថៃ ៖ ក្រសួងពាណិជ្ជកម្មបានបង្ហាញតួលេខការនាំចេញទំនិញសំខាន់ៗរបស់ប្រទេសថៃ នៅខែកញ្ញា ឆ្នាំ២០២៣ ថា ការនាំចេញបានកើនឡើង២,១% ហើយវាកើនឡើងជាបន្តបន្ទាប់សម្រាប់ខែទី២ ជាប់ៗគ្នា ដែលស្មើនឹងទឹកប្រាក់២៥.៤៧៦លានដុល្លារអាមេរិក ឬស្មើ៨៨៨.៦៦៦លានបាត ។ កំណើននេះបានធ្វើឱ្យការនាំចេញទំនិញរបស់ថៃក្នុងរយៈពេល៩ខែនៃឆ្នាំ២០២៣ ស្មើនឹង២១៣.០៦៩លានដុល្លារអាមេរិក ។

ទំនិញសំខាន់ៗចំនួន១០មុខរបស់ថៃ ដែលបាននាំចេញក្នុងរយៈពេល៩ខែនៃឆ្នាំ២០២៣ រួមមាន ៖
១-ឧបករណ៍អេឡិចត្រូនិក តម្លៃការនាំចេញស្មើនឹង ៣៤.២៥៨ លានដុល្លារអាមេរិក
២-យានជំនិះ និងគ្រឿងបន្លាស់ តម្លៃការនាំចេញស្មើនឹង ២៩.៩៦៣ លានដុល្លារអាមេរិក
៣-សម្ភារៈអគ្គិសនី តម្លៃការនាំចេញស្មើនឹង ២២.១៩៩ លានដុល្លារអាមេរិក
៤-ត្បូង និងគ្រឿងអលង្ការ តម្លៃការនាំចេញស្មើនឹង ១១.២៧៨ លានដុល្លារអាមេរិក
៥-ផលិតផលកៅស៊ូ តម្លៃការនាំចេញស្មើនឹង ១០.០០១ លានដុល្លារអាមេរិក
៦-គ្រាប់ផ្លាស្ទិក តម្លៃការនាំចេញស្មើនឹង ៩.៩៤៤ លានដុល្លារអាមេរិក
៧-សម្ភារៈសំណង់ តម្លៃការនាំចេញស្មើនឹង ៨.១៣៦ លានដុល្លារអាមេរិក
៨-បន្លែស្រស់ និងផ្លែឈើ តម្លៃការនាំចេញស្មើនឹង ៨.០៧៨ លានដុល្លារអាមេរិក
៩-ប្រេងឥន្ធនៈ តម្លៃការនាំចេញស្មើនឹង ៧.១៦៩ លានដុល្លារអាមេរិក
១០-គ្រឿងម៉ាស៊ីន តម្លៃការនាំចេញស្មើនឹង ៦.៥៨៤ លានដុល្លារអាមេរិក

បើទោះជាការនាំចេញក្នុងរយៈពេល៩ខែដំបូងនៃឆ្នាំ២០២៣ នៅតែអវិជ្ជមាន៣,៨% ប៉ុន្តែក្រសួងពាណិជ្ជកម្មថៃបានវាយតម្លៃថា បើវាធ្វើឱ្យការនាំចេញអវិជ្ជមាននៅឆ្នាំ២០២៣ ត្រឹមតែ១% ក្នុងរយៈពេលនៅសេសសល់របស់ឆ្នាំ២០២៣ គឺប្រទេសថៃត្រូវជំរុញការនាំចេញទំនិញក្នុងរយៈពេលនៅសេសសល់នេះ ឱ្យស្មើទឹកប្រាក់ចំនួន២៣.៨២៧លានដុល្លារអាមេរិកក្នុង១ខែៗ ។

លោក Phumitham Wechachai ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មប្រទេសថៃ នឹងធ្វើជាប្រធានកិច្ចប្រជុំអំពីគោលនយោបាយជាមួយមន្ត្រីទូតពាណិជ្ជកម្មនៅជុំវិញពិភពលោក រួមទាំងវាយតម្លៃទិសដៅការនាំចេញសម្រាប់ខែនៅសល់របស់ឆ្នាំ២០២៣ នៅថ្ងៃទី៣ ខែវិច្ឆិកា ឆ្នាំ២០២៣ ។ លើសពីនេះ ក្រសួងពាណិជ្ជកម្មក៏មានគម្រោងទប់ទល់ជាមួយស្ថានការណ៍សង្គ្រាមរវាងប្រទេសអ៊ីស្រាអែល និងក្រុមប្រដាប់អាវុធហាម៉ាស់ផងដែរ បើមានសភាពកាន់តែធ្ងន់ធ្ងរជាងនេះ ៕ ប្រភព ៖ Thansettakij