យោងតាម QQ ព័ត៌មានចុះបញ្ជីអាជីវកម្មថ្មីៗបានបង្ហាញពីអាណាចក្រអាជីវកម្មរបស់ តារាសម្តែងស្រី Zhao Lusi។ ក្រុមហ៊ុនថ្មីមួយដែលមានឈ្មោះថា «Zhao De Zhu (Beijing) – Management Consulting Partnership (Limited Partnership)»ត្រូវបានបង្កើតឡើងជាផ្លូវការនៅថ្ងៃទី ២៦ ខែធ្នូ ខណៈ Zhao Lusi កាន់តួនាទីជាដៃគូគ្រប់គ្រង។

ការផ្លាស់ប្តូរនេះបានបង្កឱ្យមានការចង់ដឹងចង់ឃើញពីសាធារណជនភ្លាមៗអំពីតារាល្បីៗ ដែលចាប់ផ្តើម ក្រុមហ៊ុនផ្ទាល់ខ្លួន ក៏ដូចជារបៀបដែលពួកគេដំណើរការអាជីវកម្មដែលជាធម្មតាដំណើរការដោយគ្រួសារ។ព័ត៌មានសាធារណៈបង្ហាញថា វិសាលភាពអាជីវកម្មដែលបានចុះបញ្ជីរួមមាន៖ ការគ្រប់គ្រងអាជីវកម្ម សេវាកម្មរចនាវិជ្ជាជីវៈ ការរៀបចំសកម្មភាពផ្លាស់ប្តូរវប្បធម៌ និងសិល្បៈជាដើម។ គេព្យាករណ៍ថា នេះគឺជាក្រុមហ៊ុនមួយដែលដំណើរការលើគំរូដើមទុនទាប។ ទោះជាយ៉ាងណាក៏ដោយ អ្វីដែលទាក់ទាញចំណាប់អារម្មណ៍យ៉ាងខ្លាំងនោះគឺរចនាសម្ព័ន្ធភាគហ៊ុនរបស់ក្រុមហ៊ុន និងឈ្មោះដែលបង្កប់ន័យរបស់វា។
អ្នកលេងអ៊ីនធឺណិតបានកត់សម្គាល់ឃើញយ៉ាងឆ្លាតវៃថាឈ្មោះក្រុមហ៊ុន «Zhao De Zhu » ស្តាប់ទៅស្រដៀងនឹង «Zhao Lusi» ។ ការប្រែក្លាយឈ្មោះអ្នកគាំទ្រទៅជាឈ្មោះក្រុមហ៊ុនត្រូវបានចាត់ទុកថាជាជំហានដ៏ឆ្លាតវៃ ដែលជួយភ្ជាប់សិល្បករជាមួយអ្នកគាំទ្ររបស់នាង។
ទាក់ទងនឹងរចនាសម្ព័ន្ធភាគហ៊ុន Zhao Lusi កាន់កាប់ភាគហ៊ុនត្រឹមតែ ១% ប៉ុណ្ណោះនៅក្នុង Zhao Dezhu។ ផ្ទុយទៅវិញ នៅក្រុមហ៊ុនគ្រប់គ្រងសហគ្រាស Chengdu Ma Ning ពីមុនរបស់នាង តារាស្រីរូបនេះបានកាន់កាប់ភាគហ៊ុន ៩៩%។
ទោះជាយ៉ាងណាក៏ដោយ ការតាមដានរចនាសម្ព័ន្ធកម្មសិទ្ធិបង្ហាញថា ក្រុមហ៊ុន Fufu De Zhao Chengdu ពិតជាមានភាគហ៊ុន ៩០% ជាកម្មសិទ្ធិរបស់លោក Zhao Jun ដែលជាឪពុករបស់ Zhao Lusi។ គំរូ «ក្រុមហ៊ុនគ្រួសារដែលមានភាគហ៊ុនគ្រប់គ្រង + ភាពជាម្ចាស់កម្មសិទ្ធិរបស់តារាល្បីៗ» នេះត្រូវបានទទួលស្គាល់យ៉ាងឆាប់រហ័សដោយអ្នកជំនាញក្នុងឧស្សាហកម្ម។
គំរូនេះជៀសវាងហានិភ័យផ្ទាល់ខ្លួន ខណៈពេលដែលក្នុងពេលដំណាលគ្នាធានាថាគ្រួសារមានអំណាចដាច់ខាត ដោយមាន Zhao Lusi ដើរតួជាដៃគូគ្រប់គ្រងដើម្បីគ្រប់គ្រងយ៉ាងតឹងរ៉ឹងនូវដំណើរការធ្វើការសម្រេចចិត្តជាក់ស្តែង។

នេះមិនមែនជាលើកទីមួយទេដែលក្រុមគ្រួសាររបស់ Zhao Lusi បានប្រថុយប្រថានចូលទៅក្នុងសកម្មភាពអាជីវកម្ម។ នាង និងឪពុករបស់នាងក៏បានសហការជាមួយអាជីវកម្មជាច្រើនទៀតដូចជា Fufu De Zhao Chengdu, Maning Chengdu Enterprise Management Co., Ltd. ជាដើម។ នៅក្នុងក្រុមហ៊ុននេះ Ma Ning ដែល Zhao Lusi កាន់កាប់ភាគហ៊ុន ៩០% ហើយឪពុករបស់នាងបម្រើការជាតំណាងផ្នែកច្បាប់ ធ្វើប្រតិបត្តិការក្នុងវិស័យលក់តាមអ៊ីនធឺណិត ដែលធ្លាប់ធ្វើឱ្យមានការសង្ស័យថា Zhao Lusi នឹងផ្លាស់ប្តូរការផ្តោតអារម្មណ៍របស់នាងទៅការលក់តាមអ៊ីនធឺណិត។

បច្ចុប្បន្ននេះ ក្រុមហ៊ុនដែលទើបបង្កើតថ្មី គឺក្រុមហ៊ុន Zhao Lusi ផ្តោតលើការគ្រប់គ្រង និងវប្បធម៌ ដោយបំពេញបន្ថែមលើវិស័យអាជីវកម្មពីមុនរបស់ខ្លួន ដែលបង្ហាញថា Zhao Lusi និងក្រុមគ្រួសាររបស់នាងកំពុងវិនិយោគលើវិស័យចម្រុះ។ ការសម្រេចចិត្តរបស់ Zhao Lusi ក្នុងការបង្កើតក្រុមហ៊ុនផ្ទាល់ខ្លួនរបស់នាងបានបង្កឱ្យមានប្រតិកម្មចម្រុះ។

អ្នកគាំទ្រអបអរសាទរតារាស្រីរូបនេះ ដោយមើលឃើញថាវាជាព្រឹត្តិការណ៍ដ៏សំខាន់មួយដែលបង្ហាញពីការបំបែកខ្លួនរបស់នាងចេញពីការរឹតបន្តឹងរបស់ក្រុមហ៊ុនគ្រប់គ្រងចាស់របស់នាងដោយបានផ្លាស់ប្តូរនាងពីបុគ្គលិកទៅជាថៅកែ និងបង្កើនស្វ័យភាពរបស់នាងនៅក្នុងអាជីពរបស់នាង។ ផ្ទុយទៅវិញ ទស្សនិកជនដែលស្រឡាញ់ភាពយន្តមួយចំនួនមានការព្រួយបារម្ភថា នាងនឹងប្តូរការផ្តោតអារម្មណ៍របស់នាងទៅលើអាជីវកម្ម ដោយហេតុនេះកាត់បន្ថយការវិនិយោគរបស់នាងលើការសម្តែង និងភាពយន្តបន្តិចម្តងៗ៕

បទឈប់បា.ញ់ភ្លាមៗរយៈពេល 72ម៉ោងរវាងកម្ពុជានិងថៃ គិតត្រឹមម៉ោង១២ថ្ងៃត្រង់ ថ្ងៃទី៣០ ខែធ្នូ ឆ្នាំ២០២៥នេះត្រូវបានផុតកំណត់ហើយ តែទោះជាយ៉ាងណាក៏ដោយ ចំពោះការដោះលែងទាហានកម្ពុជាទាំង 18រូប នៅតែគ្មានការឆ្លើយតបពីភាគីនៅឡើយ ខណៈរដ្ឋមន្រ្តីការពារជាតិថៃបដិសេធការធ្វើអត្ថធិប្បាយជាមួយអ្នកសារព័ត៌មាន។

យោងតាមការចេញផ្សាយរបស់សារព័ត៌មានក្នុងស្រុករបស់ថៃនៅមុនពេលថ្ងៃត្រង់នេះបានឲ្យដឹងថា លោក ណាត់ថាផុល ណាត់ផានិច រដ្ឋមន្រ្តីការពារជាតិថៃ បានបដិសេធមិនផ្ដល់សម្ភាសន៍ជាមួយអ្នកសារព័ត៌មានទាក់ទងនឹងការដោះលែងទាហានខ្មែរទាំង18នាក់។ ឆ្លើយតបនឹងសំណួរទាំងនេះ លោក ណាត់ថាផុល បានត្រឹមតែនិយាយថា៖ «នៅពេលថ្ងៃត្រង់នេះយើងនឹងបានដឹងហើយ» ប៉ុណ្ណោះ។

ដោយឡែកបើតាម លោកស្រី បាន ស្រីមុំ អភិបាលខេត្តប៉ៃលិន គឺមកដល់ម៉ោងនេះក្នុងនាមអាជ្ញាធរ លោកស្រីនៅមិនទាន់ទទួលបានពត៍មាន អំពីយុទ្ធជន១៨រូបនោះទេ។ តែទោះជាយ៉ាងណា លោកស្រីបានស្នើកុំឲ្យមានជួបជុំបង្កជាបញ្ហាចលាចលនៅទីតាំងព្រំដែនជាឲ្យសោះ ត្រូវបន្តរក្សាភាពស្ងៀមស្ងាត់ ហើយក្នុងនាមរដ្ឋបាលខេត្ត នឹងផ្តល់ពត៍មានពិតជូនបងប្អូនដើម្បីជ្រាប និងដើម្បីចូលរួមទទួលស្វាគមន៍បងប្អូនយុទ្ធជនយើង ទាំងអស់គ្នានៅពេលវេលាច្បាស់លាស់។

គួរជម្រាបថា នៅត្រង់ចំណុចទី១១នៃសេចក្ដីប្រកាសរួមកិច្ចប្រជុំពិសេសលើកទី៣ GBC បានគូសបញ្ជាក់យ៉ាងច្បាស់ថា “ស្របតាមស្មារតីនៃសេចក្ដីប្រកាសរួមទីក្រុងគូឡាឡាំពួ ចុះថ្ងៃទី២៦ ខែធ្នូ ឆ្នាំ២០២៥ យោធិនកម្ពុជាចំនួន១៨រូបនឹងត្រូវបញ្ជូនត្រឡប់មកកម្ពុជាវិញ បន្ទាប់ពីបទឈប់បាញ់ត្រូវបានគោរពយ៉ាងពេញលេញក្នុងរយៈពេល៧២ម៉ោង”។

តែយ៉ាងណាមិញ គិតមកត្រឹមពេលនេះគឺហួសរយៈពេល72ម៉ោងហើយ យើងនៅតែមិនទាន់មានព័ត៌មានទាក់ទងនឹងការដោះលែងកងទ័ពកម្ពុជាទាំង១៨នាក់នៅឡើយទេ៕

គណៈកម្មការចម្រុះខណ្ឌសីមាព្រំដែនគោក JBC កម្ពុជាបានផ្ញើកំណត់ទូតទៅ JBC ថៃ ដោយស្នើកោះប្រជុំជាបន្ទាន់មួយនៅសប្តាហ៍នេះ ឬសប្តាហ៍ក្រោយ ដើម្បីពិភាក្សា និងបន្តការងារវាស់វែង និងបោះបង្គោលព្រំដែនរវាងប្រទេសទាំងពីរ។ ការស្នើរប្រជុំបន្ទាន់នេះ ធ្វើឡើងក្រោយបទឈប់បា.ញ់ភ្លាមៗនៅនឹងកន្លែងត្រូវបានអនុម័ត ហើយកម្ពុជាមិនទទួលស្គាល់ការកែប្រែខ្សែព្រំដែនណាមួយដោយការប្រើប្រាស់កម្លាំងឡើយ។

យោងតាមសេចក្តីប្រកាសព័ត៌មានរបស់រដ្ឋលេខាធិការដ្ឋានកិច្ចការព្រំដែន JBC ភាគីកម្ពុជាបានស្នើសុំឱ្យមានកិច្ចប្រជុំដើម្បីបន្តវឌ្ឍនភាពការងារវាស់វែង និងការបោះបង្គោលបណ្តោះអាសន្ននៅលើទីតាំងជាក់ស្តែងក្នុងកំណាត់រវាងបង្គោលព្រំដែនលេខ ៤២-៤៧ ដែលស្ថិតនៅក្នុងតំបន់ភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ និងចន្លោះបង្គោលលេង ៥២-៥៩ ក្នុងភូមិសាស្ត្រឃុំបឹងរាំង និងឃុំកំរៀង ស្រុកកំរៀង ខេត្តបាត់ដំបង។

ក្រៅពីនេះក្រុមការងារក៏នឹងពិភាក្សាអំពីការចុះវាស់វែង និងបោះបង្គោលបណ្ដោះអាសន្នលើដីជាក់ស្ដែងលើកំណាត់ខ្សែព្រំដែនចន្លោះបង្គោលព្រំដែនលេខ ៣៣-៣៧ (តំបន់បឹងត្រកួន) តំបន់ច្រកទ្វាអន្តរជាតិថ្មដា តំបន់អូរភ្លុកដំរី តំបន់ព្រំដែនច១ និងតំបន់ព្រំដែនផ្សេងទៀត។ ព្រមទាំងបញ្ជូនក្រុមវាស់វែងចម្រុះ ដើម្បីចុះអនុវត្តការងារវាស់វែង និងខណ្ឌសីមាលើដីជាក់ស្ដែង នៅកំណាត់ខ្សែព្រំដែនចន្លោះបង្គោលព្រំដែនដែលបានឯកភាពគ្នា (ខ្សែព្រំដែនដើរតាមផ្លូវទឹក និងខ្សែព្រំដែនជាបន្ទាត់ត្រង់) ដោយអនុវត្តតាមស្មារតីនៃកំណត់ហេតុកិច្ចប្រជុំលើកទី៦ របស់គណៈកម្មការចម្រុះខណ្ឌសីមាព្រំដែនគោក (JBC) ចុះថ្ងៃទី១៥ ខែមិថុនា ឆ្នាំ២០២៥។

បញ្ជាក់ជូនជនរួមជាតិ និងសាធារណជនជាថ្មីថា គណៈកម្មការចម្រុះខណ្ឌសីមា និងបោះបង្គោលព្រំដែនគោក (ភាគីកម្ពុជា) ប្រកាន់ខ្ជាប់យ៉ាងម៉ឺងម៉ាត់នូវជំហររបស់ខ្លួនក្នុងការការពារខ្សែព្រំដែនអន្តរជាតិកម្ពុជា-ថៃ ដូចដែលបានទទួលមរតកពីគណៈកម្មការកំណត់ព្រំដែនរវាងឥណ្ឌូចិន និងសៀម ដោយគោរពយ៉ាងពេញលេញនូវច្បាប់អន្តរជាតិ គោលការណ៍នៃភាពមិនអាចកែប្រែបាននៃព្រំដែន (Uti possidetis juris) អនុសញ្ញា និងសន្ធិសញ្ញាបារាំង-សៀម ផែនទី និងកំណត់ហេតុ (procès-verbaux) របស់គណៈកម្មការខណ្ឌសីមាព្រំដែនរវាងឥណ្ឌូចិន និងសៀម ព្រមទាំងរាល់កិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នា»។

សេចក្តីប្រកាសព័ត៌មានបានបន្ថែមថា JBC ភាគីកម្ពុជានឹងបន្តធ្វើការងារវាស់វែង និងបោះបង្គោលព្រំដែនជាមួយ JBC (ភាគីថៃ) ឱ្យបានឆាប់បំផុត ក្នុងគោលបំណងសម្រេចបាននូវសន្តិភាពយូរអង្វែងនៅតាមបណ្តោយព្រំដែន។ រដ្ឋលេខាធិការដ្ឋានកិច្ចការព្រំដែនសង្កត់ធ្ងន់ថា៖ «JBC ភាគីកម្ពុជានឹងមិនទទួលស្គាល់ការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ»៕

(ភ្នំពេញ)៖ ក្រសួងការពារជាតិកម្ពុជាបានធ្វើការច្រានចោលទាំងស្រុងចំពោះការផ្សព្វផ្សាយរបស់ភាគីថៃ នៅថ្ងៃទី២៩ ខែធ្នូ ដែលថា ”កងទ័ពថៃបានរកឃើញយានគ្មានមនុស្សបើក(UAV) ជាង ២៥០គ្រឿងហោះចេញពីកម្ពុជាចូលមករំលោ.ភក្នុងដែនអធិបតេយ្យរបស់ថៃ”។

យោងតាមសេចក្ដីប្រកាសព័ត៌មាននាយប់ថ្ងៃដដែល ក្រសួងការពារជាតិបានធ្វើការបញ្ជាក់ថា កម្ពុជាសូមធ្វើការបដិសេធចំពោះការផ្សព្វផ្សាយរបស់ភាគីថៃ នៅថ្ងៃទី២៩ ខែធ្នូ ឆ្នាំ២០២៥នេះ ដែលបានលើកឡើងថា ”ខ្លួនរកឃើញយានគ្មានមនុស្សបើក(UAV) ជាង ២៥០គ្រឿងហោះចេញពីកម្ពុជាចូលមករំលោភក្នុងដែនអធិបតេយ្យរបស់ថៃ”។

តាមក្រសួង រាជរដ្ឋាភិបាលកម្ពុជា កងកម្លាំងកម្ពុជា បានបញ្ជាក់ពីការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ សុចរិតក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួនបំផុតសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ដែលភាគីទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត ដើម្បីឆ្ពោះទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព សន្តិភាព ស្ថិរភាព និងសុវត្ថិភាពជូនប្រជាពលរដ្ឋដែលរស់នៅតាមបណ្តាយព្រំដែនប្រទេសទាំងពីរ។

ជាមួយគ្នានេះ ក្រសួងការពារជាតិកម្ពុជា ព្រមទាំងរដ្ឋបាលខេត្តជាពិសេសបណ្តាខេត្តជាប់ព្រំដែនកម្ពុជា-ថៃ បានចេញសេចក្តីណែនាំ ពង្រឹង និងហាមឃាត់មិនឱ្យធ្វើសកម្មភាពបង្ហោះយានគ្មានមនុស្សបើក(ដ្រូន)គ្រប់ប្រភេទយ៉ាងម៉ឺងម៉ាត់បំផុត និងគ្មានការបង្ហោះដ្រូននេះកើតឡើងឡើយ៕

(ភ្នំពេញ)៖ ក្រសួងការពារជាតិកម្ពុជា នៅថ្ងៃទី៣០ ខែធ្នូ ឆ្នាំ២០២៥ បានចេញសេចក្ដីណែនាំ ស្ដីពីការហាមឃាត់ការប្រើប្រាស់ដ្រូនគ្រប់ប្រភេទនៅក្នុងប្រទេស ជាពិសេសហាមដាច់ខាតការបង្ហោះដ្រូននៅតំបន់តាមបណ្ដោយព្រំដែន ដើម្បីធានាសុវត្ថិភាពសាធារណ។

យោងតាមសេចក្ដីណែនាំខាងលើ ដើម្បីធានាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈជូនបងប្អូនប្រជាពលរដ្ឋ និងយោធិននៃកងយោធពលខេមរភូមិន្ទក្នុងកាលៈទេសៈដ៏លំបាកនេះ ក្រសួងការពារជាតិ សូមធ្វើការណែនាំ ដូចខាង ក្រោម ៖

១.ហាមដាច់ខាតការប្រើប្រាស់អាកាសយានគ្មានមនុស្សបើក (ដ្រូន) គ្រប់ប្រភេទ ដោយគ្មានការអនុញ្ញាត នៅ ក្នុងរាជធានី ខេត្ត ជាពិសេសបណ្តាខេត្តជាប់ព្រំដែនដែលមានដូចជាខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តប៉ៃលិន ។

២.ជនណាដែលបំពាន ឬប្រើប្រាស់អាកាសយានគ្មានមនុស្សបើក (ជ្រួន) ដោយគ្មានការអនុញ្ញាតពីក្រសួង ការពារជាតិ នឹងត្រូវទទួលទោសតាមច្បាប់កំណត់។

៣.អគ្គបញ្ជាការដ្ឋាន បញ្ជាការដ្ឋានកងទ័ពជើងអាកាស បញ្ជាការដ្ឋានការពារអាកាស ដោយសហការជាមួយ កងរាជអាវុធហត្ថលើផ្ទៃប្រទេស ព្រមទាំងរដ្ឋបាលរាជធានី ខេត្ត និងអាជ្ញាធរមូលដ្ឋាន ត្រូវបង្កើនការយកចិត្តទុកដាក់ ត្រួតពិនិត្យការប្រើប្រាស់អាកាសយានគ្មានមនុស្សបើក (ជ្រួន) ដើម្បីធានាឲ្យបាននូវសន្តិសុខ សុវត្ថិភាព សណ្តាប់ ធ្នាប់ និងរបៀបរៀបរយសាធារណៈ។ ក្នុងករណីចាំបាច់អង្គភាពទ័ពអាចឆ្លើយតប រួមទាំងការប្រើប្រាស់ប្រព័ន្ធប្រឆាំង ជ្រួន (Anti-Drone System) ។

តាមរយៈសេចក្តីណែនាំនេះ ក្រសួងការពារជាតិរំពឹងថាគ្រប់ស្ថាប័ន កងឯកភាពចំណុះក្រសួងការពារជាតិ អគ្គបញ្ជាការដ្ឋាន នៃកង យោធពលខេមរភូមិន្ទ និងរដ្ឋបាលរាជធានី ខេត្ត ត្រូវធ្វើការផ្សព្វផ្សាយឱ្យបានទូលំទូលាយ និងសហការអនុវត្តឱ្យបាន ម៉ឺងម៉ាត់ និងមានប្រសិទ្ធភាពខ្ពស់បំផុត៕