នាង ដាវីន មានប្រវត្តិតស៊ូខ្លាំងមុនក្លាយជាតារាចម្រៀងមានជីវិតដូចសព្វថ្ងៃ

នាង ដាវីន ដែលជាអតីត TOP4 នៅក្នុងកម្មវិធីលំដាប់ពិភពលោក Cambodian Idol រដូវកាលទី៤ មានប្រវត្តិតស៊ូយ៉ាងខ្លាំងនៅក្នុងឆាកជីវិតទម្រាំអាចមានឈ្មោះបោះសំឡេងនៅក្នុងអាជីពសិល្បៈក្លាយជាតារាចម្រៀងម្នាក់ក្នុងផលិតកម្មធំនៅស្រុកខ្មែរ។

ក្នុងបទសម្ភាសន៍កម្មវិធី 3Fun ដែលបានចាក់ផ្សាយកាលពីពេលថ្មីៗនេះ នាង ដាវីន បានរៀបរាប់ប្រវត្តិរបស់ខ្លួនឆ្លងកាត់ការលំបាកជាច្រើននៅក្នុងជីវិត ទាំងធ្លាប់ធ្វើជាអ្នកលាងចាន រត់តុតាមរោងការ និងការងារជាច្រើនទៀតពោលគឺធ្វើអ្វីក៏បានឱ្យតែជាអំពើសុចរិតហើយបានប្រាក់យកមកចាយវាយ។ មិនទាន់ធំដឹងក្តីឪពុកក៏ត្រូវស្លាប់ចោលនៅស្រុកគេ មានម្តាយធ្វើការរោងចក្ររហូតដល់ធ្លាក់ខ្លួនឈឺ នាង ដាវីន បានប្រឹងប្រែងពុះពារគ្រប់ឧសបគ្គគ្រប់បែបយ៉ាង ទោះបីជាត្រូវគេងនៅក្នុងលូក៏ដោយ។

តារាចម្រៀងរូបនេះបានរៀបរាប់ថា មានពេលមួយលោកខ្វះលុយខ្លាំងបានតេសុំម្តាយចំនួន១៥ដុល្លារ ប៉ុន្តែម្តាយរបស់លោកមានតែ២ម៉ឺនរៀលប៉ុណ្ណោះនៅក្នុងខ្លួនហើយថែមទាំងផ្ញើលុយនោះឱ្យកូនទៀតធ្វើឱ្យលោកស្រក់ទឹកភ្នែកភ្លាមៗនៅពេលទៅដកលុយ។ ជាកូនអ្នកខេត្តកំពង់ស្ពឺ នាង ដាវីន បាននិយាយថាពេលមកបន្តការសិក្សានៅរាជធានីភ្នំពេញក្នុងឆ្នាំ២០១៨ គឺលោកមានលុយតែ៤ម៉ឺនរៀលប៉ុណ្ណោះ។ អ្វីដែលជាការលំបាកនិងជាការចងចាំដែលមិនអាចបំភ្លេចបាន នាង ដាវីន ថាគឺពេលវេលាដែលហូបត្រីខ១កំប៉ុងមានគ្នារហូតដល់៨នាក់។

អ្វីៗត្រូវបានផ្លាស់ប្តូរគឺនៅពេលលោកបានចូលរួមប្រកួតក្នុងកម្មវិធីប្រលងចម្រៀងនិងបានក្លាយទៅជាបេក្ខជនជើងខ្លាំងម្នាក់នៅក្នុងកម្មវិធី។ ក្រោយមកលោកមានកេរ្តិ៍ឈ្មោះបោះសំឡេង រកប្រាក់បានច្រើនអាចមានលទ្ធភាពចិញ្ចឹមម្តាយនិងផ្គត់ផ្គង់ការរៀនសូត្ររបស់ប្អូនៗបានទាំងដែលពីមុនលោកមិនដែលគិតថាខ្លួនឯងនឹងមានឡានជិះនោះទេ៕