នៅថ្ងៃទី២ ខែមករា Jennie សមាជិក BLACKPINK បានចូលរួមជាភ្ញៀវកិត្តិយសដំបូងក្នុងកម្មវិធី ថ្មីរបស់សិល្បការិនីជើងចាស់ Lee Hyori របស់ទូរទស្សន៍ KBS ដែលនឹងចាក់ផ្សាយថ្ងៃទី៥ មករា។ នេះជាសកម្មភាពទោលផ្លូវការដំបូងរបស់ Jennie ចាប់តាំងពីបង្កើតទីភ្នាក់ងារផ្ទាល់ខ្លួនរបស់នាង ខណៈតារាចម្រៀងរូបនេះក៏បានបង្ហើបពីមូលហេតុនៃការបង្កើតក្រុមហ៊ុនផ្ទាល់ខ្លួនដោយសម្រេចចិត្តមិនបន្តកុងត្រាបុគ្គលជាមួយក្រុមហ៊ុន YG ។
Jennie បានពន្យល់ថានាងចង់បន្តសកម្មភាពជាក្រុមជាមួយ YG ដោយសារតែភាពជាដៃគូ រយៈពេល ៧ ឆ្នាំរបស់ពួកគេ ប៉ុន្តែនៅពេលដែលនិយាយអំពីសកម្មភាពផ្ទាល់ខ្លួនរបស់នាង នាងចង់មានសេរីភាព និងផាសុកភាពជាងមុន។ «ខ្ញុំចង់ធ្វើសកម្មភាពជាក្រុមជាមួយក្រុមហ៊ុនដែលខ្ញុំបាននៅជាមួយអស់រយៈពេលប្រាំពីរឆ្នាំ ប៉ុន្តែខ្ញុំចង់មានសេរីភាព និងផាសុកភាពជាងមុននៅក្នុងសកម្មភាពផ្ទាល់ខ្លួនរបស់ខ្ញុំ ដូច្នេះខ្ញុំបានបង្កើតក្រុមហ៊ុនមួយដែលមានឈ្មោះថា OA ដោយយកចិត្តទុកដាក់។ ខ្ញុំនឹងធ្វើការជាមួយក្រុមការងារដែលខ្ញុំបាននៅជាមួយជាយូរមកហើយ។ ខ្ញុំចង់ធ្វើគ្រប់សកម្មភាពរបស់ខ្ញុំដោយសេរី»។ នេះជាការលើកឡើងរបស់ Jennie ។
សមាជិក BLACKPINK រូបនេះបានបន្តថា នាងពិតជាដឹងគុណចំពោះអ្វីទាំងអស់ដែលនាងបានរៀននៅ YG Entertainment ហើយបានពន្យល់ថានាងត្រូវបានបំផុសគំនិតឱ្យបង្កើតក្រុមហ៊ុនផ្ទាល់ខ្លួនរបស់នាង នៅពេលដែលនាងចាប់ផ្តើមសួរថា នាងពិតជាចង់ធ្វើអ្វីដោយខ្លួនឯងនាពេលអនាគត។
Jennie បាននិយាយថា «ខ្ញុំបានរៀនច្រើនណាស់នៅ YGហើយដោយសារវាជាក្រុមហ៊ុនដែលខ្ញុំចាប់ផ្តើមជាសិក្ខាកាមតាំងពីដំបូងមក ខ្ញុំមានច្រើនណាស់ដែលខ្ញុំអាចធ្វើបាន និងរៀន ដូច្នេះខ្ញុំបានសួរខ្លួនឯងថា ‘តើអ្នកអាចធ្វើអ្វីបានដោយខ្លួនឯងនៅក្នុង អនាគត?’ ខ្ញុំបានគិតថា ‘ចូរយើងប្រឈមមុខនឹងវាដោយភាពក្លាហាន»។ ជាមួយគ្នានេះដែរ Jennie ក៏បានបង្ហាញពីអត្ថន័យនៃឈ្មោះក្រុមហ៊ុនរបស់នាងគឺ ‘ODD ATELIER’ ហៅកាត់ថា OA ដោយ Jennie បានពន្យល់ថា «វាមានចេតនាក្នុងការធ្វើបានល្អ ទោះបីជាផ្លូវរបស់ខ្ញុំចម្លែក និងខុសពីអ្នកដទៃក៏ដោយ»។
គួរបញ្ជាក់ថា Jennie បានបង្ហាញស្លាកសញ្ញា ODD ATELIER របស់នាងជាផ្លូវការនៅថ្ងៃទី ២៣ ខែធ្នូ ឆ្នាំ ២០២៣ ដោយបង្ហាញថានាងបានបង្កើតក្រុមហ៊ុនដើម្បី «ទាក់ទាញការយកចិត្តទុកដាក់ក្នុងវិធីខុសពីអ្វីដែលធម្មតា ឬរំពឹងទុក»៕
