ជប៉ុន៖ ក្រុមហ៊ុនផលិតរថយន្តរបស់ជប៉ុនបានប្រកាសថា ខ្លួននឹងប្រមូលរថយន្តចំនួន ១.១ លានគ្រឿងនៅទូទាំងពិភពលោកឱ្យត្រឡប់មកវិញ ដោយសារការរកឃើញភាពមិនប្រក្រតីទៅលើរថយន្ត ក៏ព្រោះតែឧបករណ៍ចាប់សញ្ញាចរន្តខ្លីដែលបណ្តាលឱ្យពោងសុវត្ថិភាពមិនត្រូវបានដាក់ពង្រាយដូចដែលបានរចនា។

យោងតាមគេហទំព័រអន្តរជាតិ The Business Times ដែលបានចុះផ្សាយនៅថ្ងៃទី២១ ខែធ្នូថា ក្រុមហ៊ុន Toyota បានប្រកាសប្រមូលរថយន្តស៊េរីឆ្នាំ ២០២០-២០២២ នៅទូទាំងពិភពលោករួមមានម៉ូដែល Toyota Avalon, Camry, Corolla, RAV4, Highlander, Sienna Hybrid, Lexus ES250, ES300H, ES350, RX350 model ។ ដូច្នេះក្នុងចំណោមរថយន្តដែលខូចខាតជាង ១,១ លានគ្រឿងនេះ គឺមានមួយលានគ្រឿងនៅទីផ្សារអាមេរិក និងសល់ប៉ុន្មានគ្រឿងទៀតគឺនៅក្នុងទីផ្សារអឺរ៉ុប និងអាស៊ី។

ការរកឃើញភាពមិនប្រក្រតីទៅលើប្រភេទម៉ូដែលរថយន្តទាំងនេះ អាចបណ្តាលឱ្យឧបករណ៍ចាប់សញ្ញា Occupant Classification System (OCS) បរាជ័យ។ OCS គឺជាឧបករណ៍ចាប់សញ្ញាទម្ងន់ដែលដាក់នៅក្រោមកៅអី សម្រាប់វាស់ភាពតានតឹងនៃខ្សែក្រវ៉ាត់កៅអី ដើម្បីកំណត់ថាតើកុមារដែលអង្គុយនៅលើកៅអីនោះពាក់ខ្សែក្រវ៉ាត់ ឬគ្រាន់តែដាក់វត្ថុធ្ងន់នៅលើកៅអី។ នៅពេលវិភាគទិន្នន័យ នឹងមានភ្លើងសញ្ញានៅលើផ្ទាំងគ្រប់គ្រង ដើម្បីឱ្យអ្នកបើកបរដឹងថា តើពោងសុវត្ថិភាពកៅអីអ្នកដំណើរត្រូវបានបិទ ឬបើក។ ដូច្នេះនៅពេលឧបករណ៍ចាប់សញ្ញានេះមិនដំណើរការ វាអាចបង្កគ្រោះថ្នាក់ដល់មនុស្សនៅក្នុងរថយន្ត ក៏ដូចជាអាចបណ្តាលឱ្យស្លាប់ ឬរបួសក្បាល ក និងឆ្អឹងខ្នងផងដែរ។

ទោះជាយ៉ាងណាក៏ដោយ ក្រុមហ៊ុនបានរកឃើញសៀគ្វីខ្លីនៅក្នុងឧបករណ៍ចាប់សញ្ញា OCS ដែលបណ្តាលឱ្យប្រព័ន្ធដំណើរការមិនត្រឹមត្រូវ ហើយបង្កហានិភ័យនៃការមិនដាក់ពង្រាយ ដូចដែលបានរចនាឡើងក្នុងករណីមានគ្រោះថ្នាក់។ ហេតុនេះហើយ ក្រុមហ៊ុនជប៉ុននឹងចាប់ផ្តើមជូនដំណឹងដល់ម្ចាស់យានយន្តនៅទូទាំងពិភពលោក ដើម្បីប្រមូលរថយន្តមកវិញនៅខែកុម្ភៈ ឆ្នាំ២០២៤ ក៏ដូចជាត្រួតពិនិត្យឧបករណ៍ចាប់សញ្ញាឱ្យបានត្រឹមត្រូវឡើងវិញផងដែរ៕

ប្រទេសថៃ ៖ កន្លងមក លោក Suriya Jungrungruangkit រដ្ឋមន្ត្រីក្រសួងគមនាគមន៍ប្រទេសថៃ មានគំនិតថា នឹងដំឡើងពន្ធប្រេងសាំងនៅតាមស្ថានីយចាក់ប្រេងក្នុងទីក្រុងបាងកក និងបរិវេណជុំវិញ ដើម្បីលើកទឹកចិត្តឱ្យពលរដ្ឋងាកមកប្រើប្រាស់មធ្យោបាយធ្វើដំណើរសាធារណៈច្រើនជាងមុន ។ លើសពីនេះ វាជាការយកប្រាក់បានពីការប្រមូលពន្ធដាក់ក្នុងមូលនិធិ ដើម្បីគាំទ្រការចំណាយតាមគោលការណ៍រថភ្លើងអាកាស ចំនួន២០បាត ។

ចំណែកលោក Peeraphan Saleerathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលលើកឡើងថា លោកពុំបានជ្រាបពីករណីនេះទេ ព្រោះការដំឡើងពន្ធប្រេងឥន្ធនៈ គឺស្ថិតនៅលើរដ្ឋាភិបាល ។ ប៉ុន្តែសម្រាប់ខ្លួនលោក នឹងមិនដំឡើងពន្ធទេ ពីព្រោះក្រសួងថាមពលមានវិធានការកាត់បន្ថយពន្ធ ហើយលោកសូមបញ្ជាក់ថា នៅពុំទាន់មានការទាក់ទង ឬការជូនដំណឹងពីក្រសួងគមនាគមន៍ទេ ។

លោក Peeraphan Saleerathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពល លើកឡើងថា ៖ «នៅមានវិធីផ្សេងជាច្រើនទៀត ហើយការដំឡើងពន្ធប្រេងនឹងបង្កបញ្ហា និងទុក្ខលំបាកដល់ពលរដ្ឋ ខណៈរដ្ឋាភិបាលកំពុងតែបារម្ភអំពីបញ្ហានេះ ។ ដូច្នេះ យើងអាចពិភាក្សាគ្នាបាន តែពុំទាន់មានការពិភាក្សានៅឡើយទេ» ។

លោករដ្ឋមន្ត្រីក្រសួងថាមពលបន្តថា ការដំឡើងពន្ធប្រេងឥន្ធនៈនឹងធ្វើឱ្យអ្នករស់នៅទីក្រុងបាងកក និងបរិវេណជុំវិញមិនពេញចិត្តទេ ។ ហេតុនេះ ត្រូវតែទៅសួរលោក Suriya Jungrungruangkit រដ្ឋមន្ត្រីក្រសួងគមនាគមន៍ ព្រោះលោកមិនមែនជាអ្នកចង់ដំឡើងពន្ធប្រេងឥន្ធនៈទេ ។

នៅពេលអ្នកសារព័ត៌មានសួរថា តើការដំឡើងពន្ធប្រេងឥន្ធនៈ គឺជាការប្រឆាំងនឹងគោលនយោបាយរបស់លោក Peeraphan រដ្ឋមន្ត្រីក្រសួងថាមពល ឬយ៉ាងណា ខណៈលោកចង់ជួយសម្រាលបន្ទុកពលរដ្ឋ? លោក Peeraphan លើកឡើងថា ៖ «រដ្ឋមន្ត្រីគ្រប់រូបអាចកំណត់គោលនយោបាយបាន តែអ្វីដែលពាក់ព័ន្ធគ្នា គឺត្រូវពិភាក្សាគ្នាថា តើគួរអនុវត្តបែបណា» ៕ ប្រភព ៖ Mono News

ប្រទេសថៃ ៖ ពលរដ្ឋជាច្រើននាក់បានប្រមូលផ្តុំគ្នាមកតវ៉ាករណីកសិដ្ឋានមួយកន្លែងបានដាំកញ្ឆានៅលើផ្ទៃដីជាង៤០រ៉ៃ (ឬស្មើជាង៦ហិកតា) ស្ថិតនៅឃុំសាមឺងនឿ ស្រុកសាមឿង ខេត្តឈៀងម៉ៃ ប្រទេសថៃ ។ ពួកគេលើកឡើងថា ការដាំកញ្ឆានៅក្បែរទីប្រជុំជនបានធ្វើឱ្យពលរដ្ឋ និងកុមារនៅក្នុងមជ្ឈមណ្ឌលអភិវឌ្ឍន៍កុមាររងផលប៉ះពាល់ដោយសារក្លិន និងសំឡេងអស់រយៈពេលជាច្រើនខែ ។

បុរសមកតវ៉ាម្នាក់និយាយថា ៖ «បច្ចុប្បន្ន អ្នកស្រុករស់នៅទីនេះបានរងផលប៉ះពាល់ ដោយសារតែគេយកកញ្ឆាមកដាំក្នុងភូមិ ។ លើសពីនេះ ក៏មានសំឡេងរំខានទាំងថ្ងៃ ទាំងយប់ ហើយនៅពេលកញ្ឆាចេញផ្កា វាបញ្ចេញក្លិនថែមទៀត ។ អ្នករស់នៅឆ្ងាយពីកសិដ្ឋានដាំកញ្ឆាប្រមាណ៥០០ម៉ែត្រ សុទ្ធតែរងផលប៉ះពាល់ទាំងអស់» ។

រីឯស្ត្រីមកតវ៉ាម្នាក់ទៀតប្រាប់ថា ៖ «ការដាំដុះកញ្ឆានៅក្នុងភូមិនេះ យើងព្រួយបារម្ភអំពីសុខភាពក្មេងៗនៅក្នុងមណ្ឌលថែទាំ ហើយវានឹងបង្កផលប៉ះពាល់រយៈពេលវែងទៅមុខទៀតដល់ពួកគេ» ។

កាលពីខែកញ្ញា ឆ្នាំ២០២៣ ភ្នាក់ងារគ្រប់គ្រងបរិស្ថានប្រចាំឃុំសាមឺងនឿ ធ្លាប់ទទួលពាក្យបណ្តឹងពីអ្នកភូមិ ។ ភ្នាក់ងារនេះក៏បានធ្វើការត្រួតពិនិត្យ ដោយហៅអ្នកដាំកញ្ឆាមកចរចា និងយល់ព្រមដោះស្រាយបញ្ហារួមគ្នា ។ ប៉ុន្តែរហូតមកដល់បច្ចុប្បន្ន នៅតែកើតបញ្ហាជាបន្តបន្ទាប់ ។

លោក ប្រាក់ជួប ឡាចៃ នាយកភ្នាក់ងារគ្រប់គ្រងបរិស្ថានប្រចាំឃុំសាមឺងនឿ លើកឡើងថា លោកមិនអាចចាត់វិធានការតាមផ្លូវច្បាប់ជាមួយខាងកសិដ្ឋានដាំកញ្ឆាបានទេ ដោយសារប្រទេសថៃចាត់ទុកថា កញ្ឆាមិនមែនជាថ្នាំញៀន ឬកញ្ឆាសេរី ។ ម្យ៉ាងទៀត ពួកគេពុំបានសុំការអនុញ្ញាតដាំដុះកញ្ឆាទេ ។

លោក ប្រាក់ជួប ឡាចៃ និយាយថា ៖ «ភ្នាក់ងាររបស់យើងគ្មានអំណាចគ្រប់គ្រាន់ដើម្បីឱ្យកសិដ្ឋាននេះឈប់ដាំកញ្ឆា ឬអនុញ្ញាតឱ្យដាំកញ្ឆាឬអត់ ។ បញ្ហាសំខាន់ គឺរដ្ឋាភិបាលបានអនុញ្ញាតឱ្យដាំកញ្ឆា ទើបមានបញ្ហារហូតមកដល់បច្ចុប្បន្ន ។ ដូច្នេះ បើចង់ដោះស្រាយបញ្ហានេះ ត្រូវតែដោះស្រាយបញ្ហាពីខាងលើចុះមកក្រោម ហើយរដ្ឋាភិបាលគួរតែមានច្បាប់ច្បាស់លាស់ថា តើអនុញ្ញាតឱ្យដាំកញ្ឆាក្នុងកម្រិតណា ឬអាចដាំកញ្ឆាឆ្ងាយពីទីប្រជុំជនប៉ុន្មានគីឡូម៉ែត្រ» ។

បច្ចុប្បន្ន ផលប៉ះពាល់ដោយសារកសិដ្ឋានដាំកញ្ឆាបានកើតឡើងជាច្រើនកន្លែងនៅខេត្តឈៀងម៉ៃ ។ កន្លងមក ពលរដ្ឋដែលរងផលប៉ះពាល់ធ្លាប់បានដាក់ពាក្យបណ្តឹងទៅស្ថាប័នពាក់ព័ន្ធជាច្រើនលើក ប៉ុន្តែគ្មានដំណោះស្រាយបញ្ហានេះទេ ៕ ប្រភព ៖ Thai PBS News

កាលពីពេលថ្មីៗ ក្រសួងវប្បធម៌ថៃបានអះអាងថា ខ្លួនកំពុងតែរៀបចំសំណើរដាក់បញ្ចូលសម្លៀកបំពាក់ប្រពៃណីថៃទៅក្នុងបញ្ជីបេតិកភណ្ឌវប្បធម៌អរូបីដ៏មានកិត្យានុភាពរបស់អង្គការយូណេស្កូ។

ក្រោមគំនិតផ្តួចផ្តើមរបស់លោក Kowit Pakamart អគ្គនាយកនៃនាយកដ្ឋានផ្សព្វផ្សាយវប្បធម៌ គ្រោងនឹងដាក់ឈុតបុរាណ
ថៃក្នុងបញ្ជីរបស់អង្គការយូណេស្កូ ព្រមទាំងបង្ហាញពីភាពអស្ចារ្យដែលមិនអាចប្រៀបផ្ទឹមបាននៃសម្លៀកបំពាក់ប្រពៃណីថៃនីមួយៗ។ គម្រោងការនេះត្រូវបានរៀបចំឡើងដោយបានចងក្រងព័ត៌មានអំពីឈុតបុរាណថៃគ្រប់ទម្រង់ ក៏ដូចជានិទានរឿងដំណាលអំពីវប្បធម៌ដ៏សម្បូរបែបរបស់ថៃតាមរយៈឈុតនីមួយៗទៀតផង។

លោកក៏បានគូសបញ្ជាក់ពីការរចនា ទាំងការប៉ាក់ឌិន និងលក្ខណៈពិសេសប្លែក មិនច្រឡំគេរបស់ឈុតបុរាណថៃ ដោយបង្ហាញពីសិល្បៈហត្ថកម្មដែលមិនអាចប្រៀបផ្ទឹមបាន ហើយឈុតប្រពៃណីថៃនីមួយៗសុទ្ធតែបានឆ្លុះបញ្ចាំងពីទំនៀមទម្លាប់របស់តំបន់ផ្សេងៗគ្នានៅក្នុងប្រទេសថៃ។

ម៉្យាងវិញទៀត លោកអគ្គនាយក Kowit បានសង្កត់ធ្ងន់ថា ការស្លៀកពាក់បែបប្រពៃណីថៃ មិនមែនគ្រាន់តែជាជម្រើសនៃម៉ូដប៉ុណ្ណោះទេ ប៉ុន្តែវាគឺជាមោទនភាពជាតិ មានន័យថាវាជាបទដ្ឋានមួយដែលបង្កប់អត្ថន័យយ៉ាងជ្រាលជ្រៅនៅក្នុងសង្គមថៃ។

បើយោងទៅតាមកាសែតបាងកកប៉ុស្តិ៍បានរាយការណ៍ថា ឈុតបុរាណថៃបានដើរតួនាទីយ៉ាងសំខាន់ក្នុងការបង្ហាញមោទនភាពដ៏អស្ចារ្យដែលមាននៅក្នុងប្រពៃណីនិងវប្បធម៌ថៃ ហើយវាជាសក្ខីភាពបញ្ជាក់ពីការរស់នៅរបស់ជនជាតិថៃគ្រប់ជំនាន់។

ដូច្នេះដើម្បីពង្រឹងសំណើនេះទៅកាន់អង្គការយូណេស្កូ លោកសាស្ត្រាចារ្យរង សៅថាន ផុកឡាដ នៃវិទ្យាស្ថានស្រាវជ្រាវ Thai Khadee បានបង្ហើបថា ពួកគាត់បានទទួលការគាំទ្រពីនាយកដ្ឋានផ្សព្វផ្សាយវប្បធម៌ ដើម្បីចងក្រងនូវទិន្នន័យយ៉ាងលម្អិតអំពីសម្លៀកបំពាក់ប្រពៃណីថៃ។ ក្រុមសិក្សាស្រាវជ្រាវកំពុងតែខិតខំប្រឹងប្រែងប្រមូលព័ត៌មានយ៉ាងសកម្មអំពីឈុតបុរាណនីមួយៗ ក៏ដូចជាទៅពិភាក្សាជាមួយអ្នកជំនាញខាងវប្បធម៌ប្រពៃណី ទាក់ទងនឹងសម្បត្តិបេតិកភណ្ឌនេះផងដែរ។

គួរបញ្ជាក់ផងដែរថា កាលពីពេលថ្មីៗនេះថៃក៏បានដាក់ «សង្រ្កាន្ត Songkran» ចូលទៅក្នុងបញ្ជីបេតិកភណ្ឌវប្បធម៌អរូបីដោយអង្គការយូណេស្កូដោយជោគជ័យផងដែរ។ ខណៈនៅពេលនេះ ប្រទេសថៃកំពុងត្រៀមខ្លួនទទួលពានរង្វាន់មួយទៀតពីអង្គការយូណេស្កូចំពោះការទទួលស្គាល់ជាផ្លូវការនៃសម្លៀកបំពាក់ប្រពៃណីថៃ ហើយវាគឺជាការរួមចំណែកដ៏មានសំខាន់ក្នុងការចែករំលែកសិល្បៈវប្បធម៌នេះទៅកាន់មនុស្សជាតិគ្រប់រូបនៅលើសកលលោក៕

ប្រទេសថៃ ៖ សមត្ថកិច្ចនៅខេត្តឧត្តរថានី ប្រទេសថៃ បានចាប់ខ្លួនបុរសម្នាក់ភ្លាមៗដោយសារតែដើរកាន់ធ្នូនៅតាមទីសាធារណៈ និងបង្កការភ័យខ្លាចដល់អ្នកដទៃ ។ ក្នុងអំឡុងពេលសមត្ថកិច្ចបម្រុងចាប់ខ្លួន បុរសនេះកំពុងតែដើរសំដៅទៅកាន់លំនៅឋានរបស់អភិបាលខេត្តឧត្តរថានី ។ នេះបើតាមការចុះផ្សាយរបស់សារព័ត៌មានថៃ កាលពីថ្ងៃទី២១ ខែធ្នូ ឆ្នាំ២០២៣ ។

បុរសដើរកាន់ធ្នូ បាននិយាយមកកាន់សមត្ថកិច្ចថា ៖ «ខ្ញុំគ្មានបំណងធ្វើបាបសមត្ថកិច្ច ខ្ញុំមិនបានដាក់សម្ពាធអ្នកណាម្នាក់ ហើយខ្ញុំក៏គ្មានបំណងធ្វើបាបរាងកាយអ្នកណាទេ ។ ខ្ញុំជាកីឡាករ ហើយខ្ញុំចង់មកហ្វឹកហាត់បាញ់ធ្នូនៅទីនេះ ។ ខ្ញុំសូមទោស ខ្ញុំគ្មានចេតនាធ្វើបាបអ្នកណាទេ តែអ្នកបានកាន់អាវុធរត់សំដៅមករកខ្ញុំ ខ្ញុំត្រូវតែការពារខ្លួន» ។

សមត្ថកិច្ចលើកឡើងថា បើចង់ហ្វឹកហាត់បាញ់ធ្នូ ហេតុអ្វីមិនទៅហ្វឹកហាត់នៅតារាងបាញ់ធ្នូ? ពីព្រោះការមកហាត់បាញ់ធ្នូនៅទីសាធារណៈបែបនេះបានបង្កការភ័យខ្លាចដល់សាធារណជនទូទៅ ។ បន្ទាប់មក សមត្ថកិច្ចបានចាប់ខ្លួនបុរសនេះបញ្ជូនទៅកាន់ស្ថានីយប៉ូលិសប្រចាំខេត្តឧត្តរថានី និងចោទប្រកាន់ពីបទកាន់កាប់អាវុ.ធនៅទីសាធារណៈ ឬទីប្រជុំជន ។

តាមការសាកសួររបស់សមត្ថកិច្ចឱ្យដឹងថា បុរសដើរកាន់ធ្នូនេះឈ្មោះ វេន ។ កាលពីថ្ងៃទី២០ ខែវិច្ឆិកា ឆ្នាំ២០២៣ បុរសខាងលើធ្លាប់បានដើរកាន់ធ្នូនៅម្តុំសាលារៀមួយកន្លែង ខណៈសាលារៀននេះកំពុងរៀបចំកម្មវិធីប្រកួតកីឡាសិស្ស ។ ពេលនោះ បុរសដដែលបានបាញ់ធ្នូសំដៅទៅលើគ្រូបង្រៀន និងបណ្តាលឱ្យភ្ញាក់ផ្អើលពេញសាលារៀន ។

បើទោះជាគាត់កាន់ធ្នូក្តី ប៉ុន្តែគេចាត់ទុកថា វាជាអាវុធ និងត្រូវដាក់ទោសតាមផ្លូវច្បាប់ ។ រីឯអ្នករត់ហាត់ប្រាណនៅក្នុងតំបន់បារម្ភថា នឹងគ្មានសុវត្ថិភាព ដោយពួកគេនិយាយថា បើចង់ហាត់បាញ់ធ្នូ គួរតែទៅហាត់នៅតារាងបាញ់ធ្នូ ពីព្រោះវាជាកន្លែងបិទជិទ និងមិនបង្កគ្រោះថ្នាក់ដល់អ្នកដទៃ ៕ ប្រភព ៖ amarin news

វៀតណាម៖ ឧទ្យានព្រៃឈើ Chuong Duong ដែលពីមុនគឺជាកន្លែងចាក់សំរាមទំហំជិត ៩,០០០ ម៉ែត្រការ៉េ ត្រូវបានសម្អាតដោយប្រជាពលរដ្ឋដោយដាំដើមឈើ ដំឡើងភ្លើង និងដំឡើងម៉ាស៊ីនហាត់ប្រាណ។

នៅថ្ងៃទី២០ ខែធ្នូ ប្រជាពលរដ្ឋជាច្រើននាក់នៅហាណូយបានស្ម័គ្រចិត្តចុះទៅសួនព្រៃក្បែរមាត់ទន្លេក្រហម ហើយចាប់ផ្តើមរើសសំរាម និងបោសស្លឹកឈើជ្រុះ ដោយស្ត្រីម្នាក់បាននិយាយថា ពួកគេបានស្ម័គ្រចិត្តចុះទៅសួនសម្អាតពីរដងក្នុងមួយថ្ងៃ ដូច្នេះប្រសិនបើយើងឃើញន្លែងណាកខ្វក់ យើងនឹងសម្អាតវា មិនចាំបាច់មានអ្នកណាមករំលឹកយើងទេ។

ស្ត្រីម្នាក់នោះក៏បានបន្តទៀតថា “ឧទ្យាននេះគឺជាសម្បត្តិសាធារណៈ” ហេតុនេះហើយ យើងគួរតែបោសសម្អាតជារៀងរាល់ថ្ងៃ ក៏ដូចជាដាំដុះរុក្ខជាតិបៃតងឱ្យបានច្រើន ដើម្បីប្រែក្លាយកន្លែងចាក់សំរាមដ៏កខ្វក់នេះទៅជាឧទ្យានព្រៃឈើដ៏ស្រស់ស្អាតសម្រាប់អ្នកទេសចរ។

ឧទ្យានព្រៃឈើ Chuong Duong ឬសួនព្រៃឈើនៅមាត់ទន្លេក្រហម ពីមុនតំបន់នេះជាកន្លែងប្រមូលសំរាម និងទឹកស្អុយ ក៏ដូចជាមានក្លិនស្អុយ និងមានមូស រួមទាំងមានសត្វល្អិតជាច្រើនផងដែរ។ កន្លែងនេះក៏ធ្លាប់ជាកន្លែងសម្រាប់អ្នកញៀនថ្នាំ និងមនុស្សមិនល្អជាច្រើនមកជួបជុំគ្នាធ្វើឱ្យអ្នកស្រុកមិនហ៊ានចូលមកទៀតផង។

ទោះជាយ៉ាងណាក៏ដោយ អតីតកន្លែងចាក់សំរាមនេះបច្ចុប្បន្នក្លាយជាតំបន់បៃតង ដែលពោរពេញទៅដោយសួនព្រៃឈើ សួនកុមារ កន្លែងហាត់ប្រាណ កីឡា និងសួនកម្សាន្តប្រកបដោយផាសុកភាព។ ជាពិសេសតំបន់នេះក៏មានសត្វស្លាបធ្វើចំណាកស្រុកហោះហើរឆ្លងកាត់ បង្កើតបានជាប្រព័ន្ធអេកូឡូស៊ីចម្រុះផងដែរ។

លោក Nguyen Tieu Quoc Dat នាយកសួនកម្សាន្ត Thinks ដែលជាអង្គភាពរៀបចំគម្រោងបានមានប្រសាសន៍ថា ដំបូងឡើយប្រជាជនមានការព្រងើយកន្តើយ ប៉ុន្តែនៅពេលដែលយើងសម្អាតកាកសំណល់ជាង ២០០ តោន និងចាក់ដី ប្រជាពលរដ្ឋជាច្រើនក៏បានស្ម័គ្រចិត្តចុះទៅសួនជួយសម្អាត ក៏ដូចជាដាំដុះព្រៃឈើ រៀបចំភ្លើងពណ៌ ស្រោចទឹករុក្ខជាតិជាដើម។ ដូច្នេះការអភិវឌ្ឍនេះក៏ដោយសារការរួមសាមគ្គីគ្នាផងដែរ ប្រសិនបើយើងធ្វើតែម្ខាង ក៏វាមិនល្អដូចសព្វថ្ងៃនេះដែរ៕