ប្រទេសវៀតណាម ៖ ក្រុមហ៊ុន Nestle វៀតណាមគ្រោងវិនិយោគក្នុងទឹកប្រាក់ចំនួន១០០លានដុល្លារអាមេរិក ដើម្បីជំរុញផលិតកម្មកាហ្វេក្នុងរោងចក្រ Tri An ឱ្យមានសមត្ថភាពលើសមុនទ្វេដង ដែលរោងចក្រនេះមានទីតាំងនៅខេត្ត Dong Nai ប្រទេសវៀតណាម ។ ការបង្កើនទឹកប្រាក់វិនិយោគនេះ បានធ្វើឱ្យតម្លៃការវិនិយោគសរុបក្នុងរោងចក្រកើនឡើងរហូតដល់៥០០លានដុល្លារអាមេរិក ។

ក្រុមហ៊ុន Nestle ឱ្យដឹងថា ការវិនិយោគទុននេះនឹងជួយផ្គត់ផ្គង់តម្រូវការកាហ្វេក្នុងស្រុក ដែលបានកើនឡើងខ្ពស់ជាបន្តបន្ទាប់ ។ លើសពីនេះ វានឹងផ្លាស់ប្តូរវៀតណាមឱ្យក្លាយជាប្រទេសផលិតកាហ្វេមានតម្លៃខ្ពស់ និងអាចផ្គត់ផ្គង់កាហ្វេសម្រាប់ទីផ្សារពិភពលោក នាថ្ងៃអនាគតផងដែរ ។ បច្ចុប្បន្ន រោងចក្រផលិតកាហ្វេឈ្មោះ Tri An បាននាំចេញកាហ្វេម៉ាក Nescafe, Nespresso, Starbucks និង Blue Bottle ទៅកាន់ប្រទេសចំនួន២៩ នៅលើពិភពលោក ។

Jacob Binu នាយកគ្រប់គ្រងទូទៅរបស់ក្រុមហ៊ុន Nestle វៀតណាមលើកឡើងថា គម្រោងនេះជាការបង្ហាញពីការប្តេជ្ញាចិត្តវិនិយោគរយៈពេលវែងរបស់ក្រុមហ៊ុន Nestle នៅវៀតណាម ។ លោកសង្ឃឹមថា នៅពេលចាប់ផ្តើមដំណើរការ សមត្ថភាពផលិតកាហ្វេរបស់រោងចក្រនឹងកើនឡើងទ្វេដង ហើយរោងចក្រនឹងអាចផលិតកាហ្វេផ្គត់ផ្គង់តម្រូវការអតិថិជនក្នុងស្រុក និងអាចទាញយកផលប្រយោជន៍ពីសក្តានុពលនាំចេញយ៉ាងមានប្រសិទ្ធភាព ។

នាយកគ្រប់គ្រងទូទៅរបស់ក្រុមហ៊ុន Nestle វៀតណាមរូបនេះរំពឹងថា វានឹងអាចជំរុញឱ្យវៀតណាមក្លាយជាប្រទេសផ្គត់ផ្គង់កាហ្វេ និងនាំចេញកាហ្វេមានតម្លៃខ្ពស់ទៅកាន់ទីផ្សារពិភពលោក ។

នៅឆ្នាំ១៩៩៣ ក្រុមហ៊ុន Nestle បានចាប់ផ្តើមបើកការិយាល័យតំណាងការលក់កាហ្វេនៅប្រទេសវៀតណាម ក្នុងទីក្រុងហូជីមិញ ។ រោងចក្រ Nestle Tri An បានដំណើរការនៅឆ្នាំ២០១៣ និងចាប់ផ្តើមផលិតកាហ្វេ Nescafe Dolce Gusto នៅឆ្នាំ២០១៨ ។

ក្រុមហ៊ុន Nestle បានវិនិយោគទុនរកស៊ីនៅប្រទេសវៀតណាម ស្មើទឹកប្រាក់ជិត៨៣០លានដុល្លារអាមេរិក ដោយមានរោងចក្រផលិតកាហ្វេចំនួន៤កន្លែង ក្នុងនោះរោងចក្រ៣កន្លែងមានទីតាំងស្ថិតនៅខេត្ត Dong Nai ។ ក្រៅពីនេះ ក្រុមហ៊ុនក៏មានមជ្ឈមណ្ឌលចែកចាយទំនិញ២កន្លែងទៀត ៕

ប្រទេសថៃ៖ រដ្ឋាភិបាលរបស់ប្រទេសថៃគ្រោងនឹងចេញទិដ្ឋាការពិសេសដែលអនុញ្ញាតឱ្យអ្នកទេសចរបរទេសណាដែលចង់រៀន Muay Thai ស្នាក់នៅរយៈពេល ៩០ ថ្ងៃ ក្នុងគោលបំណងដើម្បីលើកកម្ពស់អំណាចទន់របស់ប្រទេស។

នៅថ្ងៃទី១៥ ខែមករា ឆ្នាំ២០២៤ លោក Pimol Srivikorn ទីប្រឹក្សានាយករដ្ឋមន្ត្រីថៃ ដែលជាប្រធានអនុគណៈកម្មាធិការសកម្មភាពទាក់ទងនឹងកីឡា បាននិយាយថា ដើម្បីសម្រេចបាននូវគោលដៅនេះ រដ្ឋាភិបាលត្រៀមនឹងចេញទិដ្ឋាការពិសេសរយៈពេល ៩០ ថ្ងៃ សម្រាប់ភ្ញៀវទេសចរបរទេសក្នុងការរៀនប្រដាល់ថៃ ដោយទិដ្ឋាការទេសចរណ៍បច្ចុប្បន្ន ភ្ញៀវទេសចរអាចស្នាក់នៅក្នុងប្រទេសថៃបានត្រឹមតែ ៦០ ថ្ងៃប៉ុណ្ណោះ។

លោកបានបន្តថា ទិដ្ឋាការស្រដៀងគ្នានេះក៏នឹងត្រូវផ្តល់ជូនដល់ភ្ញៀវទេសចរបរទេសដែលចង់រៀនរបាំបុរាណ តន្ត្រី ឬធ្វើម្ហូបថៃ ដែលត្រូវបានចុះបញ្ជីក្នុងចំណោមធាតុនៃថាមពលទន់របស់ប្រទេសថៃ។ ផែនការនេះបានទទួលការឆ្លើយតបជាវិជ្ជមានពីអ្នកនិយមលេងអ៊ីនធឺណិតជាច្រើន ដោយបានហៅវាថាជាគំនិតដ៏ល្អមួយក្នុងការផ្សព្វផ្សាយទេសចរណ៍ និងវប្បធម៌ថៃដោយមិនចំណាយបន្ថែម។

លោក Pimol Srivikorn ក៏បានបន្តទៀតថា បច្ចុប្បន្នរដ្ឋាភិបាលកំពុងកំណត់ស្តង់ដារសម្រាប់កន្លែងហាត់ប្រាណ Muay Thai និងរៀបចំវគ្គបណ្តុះបណ្តាល ដោយជួយជនបរទេសដែលមានចំណាប់អារម្មណ៍ក្នុងក្បាច់គុននេះជ្រើសរើសវគ្គសិក្សាសមរម្យទូទាំងប្រទេស ហើយអ្នកបង្ហាត់ Muay Thai ក៏នឹងទទួលបានការគាំទ្រពីរដ្ឋាភិបាលផងដែរ ប្រសិនបើពួកគេចង់បង្រៀននៅបរទេស។

គួរបញ្ជាក់ដែរថា Muay Thai បានក្លាយជាការពេញនិយមនៅក្នុងប្រទេសជប៉ុន កូរ៉េខាងត្បូង រុស្ស៊ី និងសហរដ្ឋអាមេរិក។ យោងតាមក្រសួងទេសចរណ៍ និងកីឡា គិតត្រឹមខែមេសា ឆ្នាំ ២០២៣ មានមជ្ឈមណ្ឌលហ្វឹកហ្វឺន Muay Thai ប្រហែល ៤,០០០ កន្លែងនៅលើពិភពលោក ហើយមានជនបរទេសប្រហែល ៦០,០០០-៧០,០០០ នាក់មក ប្រទេសថៃ ដើម្បីរៀនក្បាច់គុននេះ។ ដូច្នេះអ្នកប្រដាល់ Muay Thai ជាច្រើនដែលប្រកួតនៅប្រទេសថៃក៏ជាជនបរទេសដែរ៕

ប្រទេសចិន៖ មនុស្សយន្តឆ្លាតវ័យ Mobile Aloha របស់សាកលវិទ្យាល័យស្ទែនហ្វដ ត្រូវបានគេសរសើរថាមានជំនាញខ្ពស់ក្នុងការបំពេញការងារស្មុគស្មាញផ្សេងៗ បើប្រៀបធៀបទៅនឹងមនុស្សយន្តមុនៗ ដូចជាការចម្អិនអាហារយ៉ាងស្ទាត់ជំនាញ ក៏ដូចជាធ្វើការយ៉ាងរលូន និងរហ័សរហួនបំផុតក្នុងកិច្ចការងារផ្ទះ។

កាលពីពេលថ្មីៗនេះ សាកលវិទ្យាល័យ Stanford បានណែនាំមនុស្សឆ្លាតវ័យ Mobile Aloha ដែលត្រូវបានរចនាឡើងដើម្បីរៀនប្រតិបត្តិការដូចមនុស្សពិតៗ។ នេះគឺជាលទ្ធផលបន្ទាប់ពីបីខែនៃការអភិវឌ្ឍន៍ដោយអ្នកវិទ្យាសាស្ត្រកុំព្យូទ័រជនជាតិចិនពីរនាក់ និងនិស្សិតបញ្ចប់ការសិក្សា Zipeng Fu និង Tony Zhao ។

បច្ចុប្បន្ន Mobile Aloha កំពុងទាក់ទាញចំណាប់អារម្មណ៍យ៉ាងខ្លាំងពីពិភពបច្ចេកវិទ្យា ក៏ដូចជាមានការចាប់អារម្មណ៍ខ្លាំងពីបណ្តាញសង្គមក្នុងប្រទេសចិនផងដែរ ដោយសារសមត្ថភាពរបស់វាក្នុងការសម្របសម្រួលចលនាយ៉ាងរលូន។ ជំនួសឱ្យការប្រាស្រ័យទាក់ទងជាមួយវត្ថុយោងទៅតាមកូអរដោនេដែលបានរៀបចំទុកជាមុន មនុស្សយន្តនេះក៏អាចធ្វើសមកាលកម្មចលនារបស់វាតាមរយៈប្រព័ន្ធមេកានិកពិសេស ដោយហេតុនេះផ្តល់ទិន្នន័យសម្រាប់គំរូ AI ដើម្បីរៀន និងផលិតឡើងវិញនូវសកម្មភាពប្រកបដោយភាពត្រឹមត្រូវខ្ពស់។

អ្នកជំនាញពីរនាក់គឺ Fu និង Zhao បាននិយាយថា ពួកគេនឹងបង្កើតកម្មវិធីក្រោមការណែនាំរបស់សាស្ត្រាចារ្យនៅសាកលវិទ្យាល័យ Stanford ហើយបានផ្គុំ Hardware ដោយខ្លួនឯងដើម្បីសន្សំសំចៃថ្លៃដើម ប៉ុន្តែទោះជាយ៉ាងណាក៏ដោយ សម្រាប់មនុស្សយន្តឆ្លាតវ័យនេះជាទូទៅមានតម្លៃ ៣២,០០០ ដុល្លារអាមេរិក។ បន្ថែមពីលើការចម្អិនអាហារ និងជំនួយការងារផ្ទះ អ្នកវិទ្យាសាស្ត្រក៏សង្ឃឹមដែរថានឹងអាចអនុវត្តបច្ចេកវិទ្យារបស់ Mobile Aloha បន្ថែមទៀតលើផ្នែកផ្សេងៗនៃជីវិតនាពេលអនាគត៕

បរទេស៖ មនុស្សយន្ត ដែលត្រូវបានបង្កើតឡើងដោយក្រុមហ៊ុន Robotiz3d នៃសាកលវិទ្យាល័យ Liverpool អាចជួយជួសជុលស្នាមប្រេះលឿនជាងមនុស្ស ៧០% និងការពាររន្ធប្រហោងធំៗ ដោយជួយសន្សំប្រាក់របស់រដ្ឋក្នុងការជួសជុលផ្លូវប្រចាំឆ្នាំ។

កាលពីថ្ងៃទី១៤ ខែមករា ឆ្នាំ២០២៤ យោងតាមគេហទំព័រអន្តរជាតិ Daily Mail បានឱ្យដឹងថា មនុស្សយន្តជួសជុលផ្លូវដំបូងបង្អស់របស់ពិភពលោកនឹងចាប់ផ្តើមដំណើរការនៅលើដងផ្លូវនៃទីក្រុង Hertfordshire ប្រទេសអង់គ្លេសក្នុងរយៈពេលពីរបីខែខាងមុខនេះ ដើម្បីសាកល្បងបច្ចេកវិទ្យាជួសជុលដោយស្វ័យប្រវត្តិ។

ARRES PREVENT ដែលជាមនុស្សជួសជុលផ្លូវដំបូងបង្អស់របស់ពិភពលោក បានប្រើប្រាស់បញ្ញាសិប្បនិម្មិត ដើម្បីស្វែងរក ចាត់ថ្នាក់ និងបំពេញស្នាមប្រេះដោយស្វ័យប្រវត្តិ។ ប្រសិនបើការសាកល្បងទទួលបានជោគជ័យ មនុស្សយន្តនេះអាចប្រើប្រាស់យ៉ាងសកម្ម និងជួសជុលស្នាមប្រេះ ក៏ដូចជាអាចដោះស្រាយផ្លូវដែលលំបាកៗបានយ៉ាងលឿនផងដែរ។ នេះអាចធ្វើឱ្យការថែទាំផ្លូវមានតម្លៃថោក រួមទាំងមានប្រសិទ្ធភាពខ្ពស់ និងលឿនជាងការប្រើប្រាស់ថាមពលរបស់មនុស្ស។

មនុស្សយន្ត ARRES PREVENT គឺជាផលិតផលសហការរវាងក្រុមហ៊ុន Robotiz3d និងអ្នកជំនាញនៅសាកលវិទ្យាល័យ Liverpool និងក្រុមប្រឹក្សាវិស្វករផ្លូវហាយវេ Hertfordshire ។ មនុស្សយន្តនេះចាប់ផ្តើមផលិត និងអភិវឌ្ឍន៍នៅឆ្នាំ ២០២០ ដែលជាយានជំនិះជួសជុលផ្លូវដោយស្វ័យប្រវត្តិតែមួយគត់នៅលើពិភពលោក។ ទោះបីជាវាស្ថិតក្នុងដំណាក់កាលសាកល្បងបឋមក៏ដោយ វានឹងដំណើរការលើផ្លូវពិតៗនៅចុងឆ្នាំនេះ។

អ្នកនាំពាក្យក្រុមប្រឹក្សាខោនធី Hertfordshire បាននិយាយថា មនុស្សយន្តនឹងគាំទ្រកម្លាំងការងារដែលមានស្រាប់របស់ពួកគេ ហើយគោលបំណងរបស់យើងគឺប្រើប្រាស់មនុស្សយន្ត AI នេះជាមួយមនុស្ស មិនមែនជំនួសវាទេ ដោយវានឹងស្វែងរក ក៏ដូចជាជួសជុលស្នាមប្រេះនៅលើផ្លូវដោយស្វ័យប្រវត្តិ ខណៈពេលដែលក្រុមអ្នកបច្ចេកទេសធ្វើការងារផ្សេងទៀត រួមទាំងចំណាយថវិការតិចក្នុងការប្រើប្រាស់វាទៀតផង។

គួរបញ្ជាក់ដែរថា រដ្ឋាភិបាលអង់គ្លេសបានចំណាយប្រាក់ ៣.៦ ពាន់លានដុល្លារអាមេរិក ដើម្បីជួសជុលផ្លូវនៅក្នុងតំបន់ភាគខាងកើត ភាគអាគ្នេយ៍ ភាគនិរតី និងទីក្រុងឡុងដ៍ជារៀងរាល់ឆ្នាំ ដោយសារផ្លូវនៅទីនោះតែងតែជួបការខូចខាតដូចជាមានស្នាមប្រេះ ឬមានប្រហោងធំៗជាដើម។ ហេតុនេះហើយ ការប្រើប្រាស់មនុស្សយន្ត ARRES នឹងជួយកាត់បន្ថយពេលវេលា ក៏ដូចជាមានតម្លៃថោកជាងការប្រើប្រាស់ថាមពលមនុស្ស ៩០% ដែលអាចជួយសន្សំសន្សំប្រាក់របស់រដ្ឋបានរាប់លានដុល្លារក្នុងការជួសជុលផ្លូវប្រចាំឆ្នាំ៕

ប្រទេសថៃ ៖ សំបកកង់ គឺជាផ្នែកមួយដ៏សំខាន់របស់យានជំនិះគ្រប់ប្រភេទ ដូចជា ៖ រថយន្ត, ម៉ូតូ និងយន្តហោះ ។ តើដឹងឬទេថា កាលពីឆ្នាំ២០២២ កន្លងមក ថៃ គឺជាប្រទេសនាំចេញសំបកកង់យ៉ាងច្រើនទៅក្រៅប្រទេស ស្ថិតក្នុងលំដាប់ទី២ លើពិភពលោក ដោយទឹកប្រាក់ការនាំចេញស្មើរហូតដល់២៣ម៉ឺន១ពាន់លានបាតឯណោះ ។ ហេតុអ្វីបានជាថៃក្លាយជាប្រទេសផលិតសំបកកង់ដ៏ច្រើនរបស់ពិភពលោក?

កត្តាសំខាន់ៗដែលធ្វើឱ្យប្រទេសថៃក្លាយជាទីតាំងផលិតសំបកកង់ដ៏ធំនៅលើពិភពលោក គឺ ៖
-ថៃជាប្រទេសផលិតជ័រកៅស៊ូដ៏ច្រើននៅលើពិភពលោក និង
-ជ័រកៅស៊ូនៅប្រទេសថៃមានតម្លៃថោក

ប្រទេសថៃបានផលិតជ័រកៅស៊ូច្រើនបំផុតនៅលើពិភពលោក ដោយសារអាកាសធាតុ និងបរិស្ថាននៅថៃអំណោយផលក្នុងការដាំដើមកៅស៊ូ ។ ហេតុនេះ ជ័រកៅស៊ូ គឺជាវត្ថុធាតុដើមដ៏សំខាន់ក្នុងដំណើរការផលិតសំបកកង់ ។ ពលរដ្ឋថៃនៅតាមបណ្តាខេត្តនានាបានដាំដើមកៅស៊ូនៅលើផ្ទៃដីជាច្រើនហិកតា ដោយសារពួកគេអាចលក់ជ័រកៅស៊ូនៅកន្លែងទទួលទិញជ័រក្បែរចម្ការកៅស៊ូ និងពុំចាំបាច់យកទៅលក់នៅកន្លែងឆ្ងាយ ។

នៅឆ្នាំ២០២២ ការផលិតជ័រកៅស៊ូធម្មជាតិរបស់ប្រទេសថៃ ស្មើនឹង៤លាន៨សែនតោន កើនឡើងដល់៣៤% នៃផលិតកម្មជ័រកៅស៊ូនៅទូទាំងពិភពលោក ។ កត្តាមួយទៀត ដែលធ្វើឱ្យថៃក្លាយជាប្រទេសផលិតជ័រកៅស៊ូ និងនាំចេញសំបកកង់ដ៏ច្រើនទៅកាន់ពិភពលោក ដោយសារជ័រកៅស៊ូនៅថៃមានតម្លៃថោក បើធៀបនឹងប្រទេសផ្សេងៗ ដែលផលិតជ័រកៅស៊ូមានគុណភាពដូចគ្នា ។

ហេតុនេះ វាធ្វើឱ្យជ័រកៅស៊ូថៃមានសមត្ថភាពប្រកួតប្រជែង និងជាតម្រូវការរបស់ប្រទេសនានា ។ ប្រទេសថៃមានវត្ថុធាតុដើមសំខាន់ រួមទាំងការចំណាយថ្លៃដើមថោក ទើបធ្វើឱ្យក្រុមហ៊ុនផលិតសំបកកង់ជាច្រើនជ្រើសរើសប្រទេសថៃ ធ្វើជាទីតាំងផលិតសំបកកង់សំខាន់របស់ពួកគេ ដើម្បីលក់សំបកកង់នៅថៃ និងនាំចេញទៅកាន់ប្រទេសនានា ។

ចំណែកក្រុមហ៊ុនផលិតសំបកកង់ម៉ាកល្បីៗមានដូចជា ៖ ក្រុមហ៊ុន Michelin, Bridgestone, Goodyear, Maxxis, Sumitomo និងក្រុមហ៊ុន Yokohama បានជ្រើសរើសប្រទេសថៃ ធ្វើជាទីតាំងផលិតសំបកកង់ប្រចាំតំបន់អាស៊ាន ។ ក្រៅពីនេះ នៅមានក្រុមហ៊ុនសំបកកង់រថយន្តរបស់ថៃឈ្មោះ Deestone ក៏បានផលិតសំបកកង់ផងដែរ ដោយសារយល់ឃើញថា ថៃជាប្រទេសផលិតជ័រកៅស៊ូដ៏ច្រើនបំផុតអស់រយៈពេលយូរមកហើយ ប៉ុន្តែពុំទាន់មានម៉ាកសំបកកង់ជារបស់ថៃទេ ។

រោងចក្រផលិតសំបកកង់បានសាងសង់ឡើងជាច្រើនកន្លែងនៅប្រទេសថៃ ទើបធ្វើឱ្យពេលកន្លងមក ថៃក្លាយជាប្រទេសនាំចេញសំបកកង់ស្ថិតក្នុងលំដាប់ទី២ លើពិភពលោក ។ បើតាមទិន្នន័យការនាំចេញសំបកកង់របស់ថៃ គឺស្មើទឹកប្រាក់ជាង២៣ម៉ឺន១ពាន់លានបាត នៅឆ្នាំ២០២២ ហើយប្រទេសថៃស្ថិតនៅក្រោមប្រទេសចិនតែមួយប៉ុណ្ណោះ ។

គេអាចសរុបបានថា ក្រុមហ៊ុនផលិតសំបកកង់ទាំងអស់អាចបន្ថែមតម្លៃដល់វត្ថុធាតុដើមពីជ័រកៅស៊ូ និងលក់ទំនិញក្នុងតម្លៃខ្ពស់ជាងថ្លៃដើម ។ គេសង្កេតឃើញថា ពលរដ្ឋថៃដែលរស់នៅតាមបណ្តាខេត្តបានដាំកៅស៊ូនៅលើផ្ទៃដីជាច្រើនហិកតា ដោយសារមានកត្តាងាយស្រួលជាច្រើន ដូចជា ៖ ពួកគេអាចលក់ជ័រកៅស៊ូនៅទីតាំងទទួលទិញក្បែរចម្ការកៅស៊ូ ឬស្ថិតនៅមិនឆ្ងាយពីភូមិ ហើយមានរោងចក្រផលិតសំបកកង់ជាច្រើនកន្លែង ដែលមានទីតាំងនៅប្រទេសថៃ ៕