ប្រទេសចិន ៖ សារព័ត៌មានបរទេសផ្សាយថា មាន YouTuber ជនជាតិចិនដ៏ល្បីល្បាញបានថតវីដេអូជាច្រើនបង្ហាញអំពីជីវិតរបស់ខ្លួន ដែលរស់នៅតាមជនបទស្រុកស្រែចម្ការយ៉ាងសាមញ្ញ និងមានអ្នកតាមដានរហូតដល់២០លាននាក់ ។ មនុស្សភាគច្រើនដែលបានមើលវីដេអូរបស់ YouTuber នេះ ពួកគេក៏ទទួលបានគំនិតផ្សេងៗ និងយកទៅអនុវត្តតាមទៀតផង ។

ក្រោយពី YouTuber ខាងលើបានបង្ហោះវីដេអូមួយចូលក្នុងបណ្តាញសង្គម ដែលបង្ហាញពីជីវិតជាកសិកររស់នៅជនបទជាមួយក្រុមគ្រួសារ និងមានអ្នកចូលមើលរហូតដល់២០លាននាក់ ប៉ុន្តែត្រូវបានអ្នកលេងបណ្តាញសង្គមម្នាក់លើកឡើងថា គ្រប់យ៉ាងដែលគេគ្រប់គ្នាឃើញនេះ គឺជារូបភាពបោកប្រាស់ប៉ុណ្ណោះ ។ អ្នកលេងបណ្តាញសង្គមរូបនេះនិយាយថា YouTuber នេះបានថតវីដេអូកុហកអ្នកមើល ហើយសូម្បីតែគ្រួសារ និងអ្នកជិតខាង ក៏កុហកដែរ ។ ពួកគេមិនមែនជាគ្រួសារ និងអ្នកជិតខាងពិតប្រាកដទេ ។

គូស្នេហ៍ជា YouTuber ដ៏ល្បីល្បាញនេះឈ្មោះ Xiao Chunhua និង Niu Aifang បានថតវីដេអូជាច្រើនបង្ហោះក្នុងបណ្តាញសង្គម ដែលបង្ហាញពីជីវិតរស់នៅបែបសាមញ្ញនៅតំបន់ជនបទឆ្ងាយពីទីប្រជុំជន ។ ពួកគេបានថតវីដេអូបង្ហាញឱ្យគេឃើញថា ពួកគេមានអ្នកជិតខាងដែលមានវ័យចំណាស់, ពួកគេធ្វើផ្ទះពីដុំឥដ្ឋដោយខ្លួនឯង និងចិញ្ចឹមជ្រូក និងគោទៀតផង ។

ហេតុនេះ ធ្វើឱ្យមនុស្សភាគច្រើនតាមដាន និងចូលចិត្តមើលពីការរស់នៅយ៉ាងសាមញ្ញរបស់ពួកគេ ។ លើសពីនេះ ពួកគេក៏បានលក់ទំនិញតាមអនឡាញ និងរកប្រាក់ចំណូលបានរហូតដល់២លានយាន់ឯណោះពីការ Live លក់ទំនិញតាមអនឡាញ ។ ហេតុនេះ ការថតវីដេអូផ្សេងៗរួមផ្សំទាំងការលក់ទំនិញអនឡាញផង ធ្វើឱ្យពួកគេរកប្រាក់ចំណូលបានជាង២៦លានយាន់ ។

ប៉ុន្តែអ្នកលេងបណ្តាញសង្គមម្នាក់បានចែកចាយព័ត៌មានថា អ្នកទាំងពីរនេះមិនមែនជាអ្នកស្រែចម្ការនោះទេ ហើយឈ្មោះ Xiao Chunhua ក៏មិនមែនជាឈ្មោះពិតប្រាកដដែរ ។ ការពិត រូបគេឈ្មោះ Zhang Shui គឺជាម្ចាស់ក្រុមហ៊ុនមួយដែលបានចុះបញ្ជី និងប្រើប្រាស់ដើមទុនរហូតដល់៥ម៉ឺនយាន់ឯណោះ ។ ជីវិតពិតប្រាកដរបស់ពួកគេ គឺជាអ្នកមានទ្រព្យសម្បត្តិស្តុកស្តម្ភ និងរស់នៅបែបស៊ីវិល័យ ។

លើសពីនេះ ឪពុក-ម្តាយ និងអ្នកជិតខាងដែលគេបានឃើញក្នុងវីដេអូនោះ គឺជាអ្នកសម្តែងទេ ។ ពួកគេបោកប្រាស់ទាំងអស់ គឺដូចជាការថតកុនអីចឹង ហើយពួកគេធ្វើបែបនេះក្នុងគោលបំណងស្វែងរកផលប្រយោជន៍ដាក់ខ្លួនតែប៉ុណ្ណោះ ។

ក្រោយពីការចែកចាយព័ត៌មានការពិតក្នុងបណ្តាញសង្គម បានធ្វើឱ្យអ្នកតាមដានទាំងអស់មិនពេញចិត្តយ៉ាងខ្លាំង ថែមទាំងនិយាយរិះគន់ថា ពួកគេខកចិត្តណាស់ដែល YouTuber ចិនដ៏ល្បីល្បាញធ្វើបែបនេះ កុហកសូម្បីតែឪពុក-ម្តាយ និងអ្នកជិតខាង ។ កន្លងមក មានមនុស្សជាច្រើននាក់បានតាមដានវីដេអូរបស់ពួកគេ ហើយយកគំនិតផ្សេងៗទៅធ្វើតាមទៀតផង ៕

ប្រទេសថៃ៖ តុលាការថៃបានកាត់ទោសបុរសម្នាក់ដែលរិះគន់របបរាជានិយមឱ្យជាប់ពន្ធនាគារ ៥០ ឆ្នាំ ជាការកាត់ទោសធ្ងន់បំផុតមិនធ្លាប់មានក្រោមច្បាប់ប្រមាថព្រះមហាក្សត្រ។

កាលពីថ្ងៃទី១៨ ខែមករា ឆ្នាំ២០២៤ សាលាឧទ្ធរណ៍ក្នុងទីក្រុងឈៀងរ៉ៃ ភាគខាងជើងប្រទេសថៃ បានកាត់ទោសលោក Mongkol Thirakot អាយុ ៣០ឆ្នាំ ពីបទបង្ហោះហ្វេសប៊ុកប្រមាថព្រះរាជវង្ស ដោយសាលាដំបូងបានកាត់ទោសលោក មង្គល ឱ្យជាប់ពន្ធនាគារ ២៨ ឆ្នាំ។ ទោះជាយ៉ាងណា ក្នុងដំណើរការនៃបណ្តឹងឧទ្ធរណ៍ គាត់ត្រូវបានរកឃើញថាមានពិរុទ្ធបទល្មើសបន្ថែមចំនួន ១១។

យោងតាមក្រុមមេធាវីថៃដើម្បីសិទ្ធិមនុស្ស (TLHR) បាននិយាយនៅក្នុងសេចក្តីថ្លែងការណ៍មួយថា សាលាឧទ្ធរណ៍បានកាត់ទោស Mongkol Thirakot ឱ្យជាប់ពន្ធនាគារ ២២ឆ្នាំបន្ថែម តាមមាត្រា ១១២ នៃក្រមព្រហ្មទណ្ឌ ចំពោះការបង្ហោះចំនួន ២៧ លើគណនីហ្វេសប៊ុកផ្ទាល់ខ្លួន បូករួមនឹងទោស ២៨ ឆ្នាំ ដែលតុលាការសាលាដំបូងបានកំណត់កាលពីមុន ដូច្នេះទោសជាប់ពន្ធនាគារសរុបរបស់គាត់គឺ ៥០ ឆ្នាំ។

យោងតាម TLHR នេះគឺជាការកាត់ទោសដាក់ពន្ធនាគារធ្ងន់បំផុតដែលត្រូវបានផ្តល់ឱ្យទាក់ទងនឹងឧក្រិដ្ឋកម្មនៃការប្រមាថព្រះមហាក្សត្រដែលបានបញ្ជាក់នៅក្នុងមាត្រា ១១២ នៃក្រមព្រហ្មទណ្ឌ។ Mongkol Thirakot គឺជាម្ចាស់ហាងលក់សម្លៀកបំពាក់អនឡាញ ត្រូវបានចាប់ខ្លួនកាលពីខែមេសា ឆ្នាំ២០២១ ក្នុងពេលតវ៉ាទាមទារកំណែទម្រង់ព្រះមហាក្សត្រ ក៏ដូចជាផ្តួចផ្តើមគំនិតឱ្យមានការលុបចោលច្បាប់ប្រមាថព្រះមហាក្សត្រកាលពីឆ្នាំ២០២០-២០២១។

គួរបញ្ជាក់ដែរថា ប្រទេសថៃ ជាប្រទេសដែលមានច្បាប់ស្តីពីការប្រមាថព្រះមហាក្សត្រតឹងរ៉ឹងបំផុតក្នុងពិភពលោក។ បន្ទាប់ពីចលនាតវ៉ាឆ្នាំ ២០២០ ប្រទេសនេះរឹតបន្តឹងច្បាប់ប្រមាថព្រះមហាក្សត្រ និងបង្កើនការដោះស្រាយអ្នកបំពាន។ អាជ្ញាធរថៃបានកាត់ទោសសកម្មជនចំនួន ២៥០ នាក់ពីបទរំលោភលើមាត្រា ១១២ និងដាក់គុកមេដឹកនាំចលនាជាច្រើនរួមទាំងមេធាវីសិទ្ធិមនុស្ស Anon Numpa ផងដែរ៕

បរទេស៖ ក្មេងស្រីអាយុ ៤ ឆ្នាំម្នាក់ឈ្មោះ Zara មកពីសាធារណរដ្ឋឆេកបានបង្កើតប្រវត្តិសាស្ត្រដោយក្លាយជាមនុស្សក្មេងបំផុតមិនធ្លាប់មាន សម្រាប់ការឡើងលើភ្នំ Everest ដែលជាភ្នំខ្ពស់បំផុតនិងគ្រោះថ្នាក់បំផុតលើពិភពលោក។

យោងតាម Mirror News បានឱ្យដឹងថា ក្មេងស្រីដែលមានឈ្មោះថា Zara បានធ្វើដំណើរទៅកាន់ជំរុំមូលដ្ឋាននៅកម្ពស់ ៥,៣៦៤ ម៉ែត្រពីលើនីវ៉ូទឹកសមុទ្រ ដែលមានប្រហែល ៥០% ប៉ុណ្ណោះនៃអុកស៊ីសែនតិចជាងកម្រិតទឹកសមុទ្រ។ មានន័យថា ប្រសិនបើនរណាម្នាក់មិនអាចស្រូបយកកម្ពស់បែបនេះបាន ពួកគេនឹងមានហានិភ័យខ្ពស់នៃការរងរបួសពីកម្ពស់ផងដែរ ឬអាចធ្ងន់ធ្ងរបណ្តាលឱ្យស្លាប់បានទៀតផង។

ទោះជាយ៉ាងណាក៏ដោយ ឥឡូវនេះ Zara បានកាន់កំណត់ត្រាពិភពលោកក្លាយជាមនុស្សក្មេងបំផុតក្នុងការយកឈ្នះ Everest Base Camp ក្នុងប្រទេសនេប៉ាល់ដោយជោគជ័យហើយ។ ទោះបីជាការឡើងលើកំពូលភ្នំ Everest Base Camp ត្រូវការកម្លាំងរាងកាយច្រើនក៏ដោយ ក៏ Sara អាយុ ៤ ឆ្នាំ និងបងប្រុសរបស់នាង David Shifra អាយុ ៧ ឆ្នាំ អមដោយឪពុករបស់ពួកគេនិងរីករាយជាមួយទេសភាពដ៏ស្រស់ស្អាតនៅលើកំពូលភ្នំ។

ការធ្វើដំណើរដ៏គួរឱ្យខ្លាចនោះគឺពោរពេញទៅដោយបញ្ហាប្រឈម រួមទាំងសីតុណ្ហភាពធ្លាក់ចុះដល់ -២៥ អង្សាសេនៅជំរំមូលដ្ឋាន Everest។ ទោះបីជាមានស្ថានភាពធ្ងន់ធ្ងរក៏ដោយ ក៏ឪពុករបស់ Zara បានសង្កត់ធ្ងន់លើសារៈសំខាន់នៃការធ្វើឱ្យមានការប្រែប្រួលយ៉ាងប្រុងប្រយ័ត្ន ការត្រួតពិនិត្យការតិត្ថិភាពនៃអុកស៊ីសែនក្នុងឈាមរបស់កូនគាត់ជាប្រចាំ និងដំណើរការបន្តិចម្តងៗ ដើម្បីប្រាកដថាពេលធ្វើដំណើរកូនៗរបស់គាត់អាចសម្របខ្លួនទៅនឹងលក្ខខណ្ឌកម្ពស់ខ្ពស់។

ទោះជាយ៉ាងណាក៏ដោយ យោងតាមគណនី Instagram ក្រោមឈ្មោះបងប្រុសរបស់នាងបានបញ្ជាក់ពីភាពជោគជ័យនៃបេសកកម្ម ហើយក៏បានបង្ហោះរូបភាពដ៏គួរឱ្យភ្ញាក់ផ្អើលនៃការផ្សងព្រេងដ៏អស្ចារ្យរបស់គ្រួសារផងដែរ។ សារព័ត៌មានដដែលបានបន្ថែមថា បច្ចុប្បន្នក្រុមគ្រួសារកំពុងធ្វើការវិលត្រឡប់ពីជំរំមូលដ្ឋានវិញក្នុងរយៈពេលមួយសប្តាហ៍បន្ទាប់៕

ប្រទេសឥណ្ឌា ៖ កាលពីថ្ងៃទី១៨ ខែមករា ឆ្នាំ២០២៤ សារព័ត៌មានបរទេសរាយការណ៍ថា ខាងមន្ទីរពេទ្យបានជូនដំណឹងទៅកាន់គ្រួសារបុរសឥណ្ឌាម្នាក់ថា គាត់បានស្លា.ប់ហើយ ហើយមន្ទីរពេទ្យឱ្យគ្រួសារនាំសពរបស់គាត់ទៅធ្វើបុណ្យនៅស្រុកកំណើត ។ ប៉ុន្តែក្នុងអំឡុងពេលដឹកសពនៅតាមផ្លូវ ស្រាប់តែរថយន្តបើកធ្លាក់ក្នុងជង្ហុក ហើយធ្វើឱ្យសពអាចដកដង្ហើមបានឡើងវិញ ។

សារព័ត៌មានឥណ្ឌារាយការណ៍ថា រឿងរ៉ាវមិនគួរឱ្យជឿនេះបានកើតឡើងទៅលើលោក Darshan Singh Brar ជនជាតិឥណ្ឌា អាយុ៨០ឆ្នាំ ហើយនៅថ្ងៃទី៤ ខែមករា ឆ្នាំ២០២៤ គ្រូពេទ្យបានប្រើប្រាស់ឧបករណ៍ជំនួយផ្លូវដង្ហើមដល់លោកតាក្នុងមន្ទីរពេទ្យមួយកន្លែងនៅរដ្ឋហារៀណា ។ ប៉ុន្តែក្រោយមក គ្រូពេទ្យក៏សម្រេចចិត្តដកឧបករណ៍ជំនួយផ្លូវដង្ហើមចេញ ដោយគ្រូពេទ្យប្រាប់សាច់ញាតិថា លោកតាស្លា.ប់ហើយ ។

ក្រោយមក សាច់ញាតិក៏បានដឹកសពលោកតាត្រឡប់ទៅធ្វើបុណ្យនៅទីក្រុងកាណាល ដែលជាទីកន្លែងកំណើតរបស់លោក ។ ប៉ុន្តែក្នុងអំឡុងពេលរថយន្តកំពុងដឹកសពនៅតាមផ្លូវ រថយន្តក៏បើកធ្លាក់ជង្ហុកយ៉ាងខ្លាំង ហើយធ្វើឱ្យលោកតាអាចកម្រើកដៃ និងមានជីពចរ ។ ហេតុនេះ សាច់ញាតិបានស្រែកប្រាប់អ្នកបើកបររថយន្តឱ្យបើករថយន្តត្រឡប់ទៅមន្ទីរពេទ្យជាបន្ទាន់ ។

ពេលទៅដល់មន្ទីរពេទ្យ គ្រូពេទ្យប្រាប់ថា លោកតាបានរស់ឡើងវិញហើយ ។ ក្រោយមក សាច់ញាតិក៏បានបញ្ជូនលោកតាទៅព្យាបាលនៅមន្ទីរពេទ្យមួយកន្លែងទៀតនៅទីក្រុងនីស៊ិង ហើយគ្រូពេទ្យក៏បញ្ជូនលោកតាទៅព្យាបាលនៅមន្ទីរពេទ្យក្នុងទីក្រុងកាណាល បន្តទៀត ។

សាច់ញាតិរបស់លោកតា Darshan Singh Brar រៀបរាប់ថា ៖ «យើងដឹងថា លោកតាបានស្លាប់នៅមន្ទីរពេទ្យ ហើយយើងក៏ដឹកសពគាត់តាមរថយន្តពេទ្យ ដើម្បីធ្វើពិធីបុណ្យតាមប្រពៃណី ។ ក្រោយមក យើងបានជូនដំណឹងទៅសាច់ញាតិទាំងអស់ និងអ្នកភូមិឱ្យដឹងពីការស្លាប់របស់គាត់ ហើយយើងក៏បានត្រៀមអុសសម្រាប់ដុតសពទៀតផង» ។

គ្រូពេទ្យនៅទីក្រុងកាណាល លើកឡើងថា ៖ «យើងមិនអាចប្រាប់បានថា អ្នកជំងឺស្លា.ប់ហើយបែរជារស់ឡើងវិញ នៅពេលសាច់ញាតិបញ្ជូនមកកាន់មន្ទីរពេទ្យ ដោយសារគាត់អាចដកដង្ហើមបាន និងមានជីពចរ ។ យើងមិនដឹងថា តើមានអ្វីកើតឡើងទេនៅមន្ទីរពេទ្យផ្សេង? វាអាចជាកំហុសបច្ចេកទេស» ។

បើទោះជាលោកតា Darshan Singh Brar អាចដកដង្ហើមបានក៏ដោយ ប៉ុន្តែគ្រូពេទ្យតម្រូវឱ្យគាត់ព្យាបាលខ្លួនបន្តទៀតនៅមន្ទីរពេទ្យ ខណៈជំងឺរបស់គាត់នៅតែធ្ងន់ធ្ងរ ដោយសារគាត់មានរោគសញ្ញាឆ្លងមេរោគនៅលើដើមទ្រូង ៕

បរទេស៖ អ្នកនិយមលេងអ៊ីនធឺណិតជាច្រើនមានការភ្ញាក់ផ្អើលយ៉ាងខ្លាំង ក្រោយដឹងថាថ្លៃបណ្ណាការរបស់ព្រះអង្គម្ចាស់ប្រ៊ុយណេនិងព្រះនាងតិចខ្លាំង ដែលធ្វើឱ្យពួកគេស្រឡាំងកាំង និងជជែកវែកញែកពេញបណ្តាញសង្គម។

កាលពីថ្ងៃទី១៨ ខែមករា ឆ្នាំ២០២៤ យោងតាមគេហទំព័រអន្តរជាតិមួយបានឱ្យដឹងថា ពិធីរៀបអភិសេករយៈពេល ១០ ថ្ងៃរបស់ព្រះអង្គម្ចាស់ប្រ៊ុយណេ Abdul Mateen និងព្រះនាង Anisha Rosnah Binti Adam ចាប់ពីថ្ងៃទី ៧ មករា រហូតដល់ថ្ងៃទី ១៦ មករា បានធ្វើឱ្យមនុស្សជុំវិញពិភពលោករំភើប ក៏ដូចជាចាប់អារម្មណ៍ទៅនឹងពិធីមង្គលការរបស់ទ្រង់ទាំងពីរយ៉ាងខ្លាំង។

ប៉ុន្តែអ្វីដែលកាន់តែគួរឱ្យចាប់អារម្មណ៍បំផុតទៅលើពិធីមង្គលការដ៏អស្ចារ្យនេះ គឺថ្លៃបណ្តាការដែលព្រះអង្គម្ចាស់ Martin បានប្រគល់ឱ្យព្រះនាង Anisha Rosnah Binti Adam គឺត្រឹមតែ ១០០០ ដុល្លារប្រ៊ុយណេប៉ុណ្ណោះ (ប្រមាណ ២១២ ដុល្លារអាមេរិក)។ តម្លៃតិចតួចនៃគូស្វាមីភរិយា ដែលមិនសមស្របនឹងឋានៈរបស់គាត់ បណ្តាលឱ្យមានការជជែកវែកញែកបន្តិច។ អ្នកខ្លះនិយាយថាព័ត៌មានអាចមិនពេញលេញ និងមិនពិត។ អ្នកខ្លះទៀតក៏និយាយថាហេតុអ្វីបានជារាជវង្សអ្នកមានខ្លាំងពូកែឱ្យអំណោយថ្លៃបណ្តាការដែលមានតម្លៃតិចជាងរបស់ក្នុងវាំងទៅវិញ។

ទោះជាយ៉ាងណាក៏ដោយ តាមពិតទៅ ថ្លៃបណ្តាការចំនួន ២១២ ដុល្លារអាមេរិក គ្រាន់តែជាចំណែកតូចមួយនៃការចំណាយលើអាពាហ៍ពិពាហ៍សរុបប៉ុណ្ណោះ។ ជាការពិតណាស់ ការប្រារព្ធពិធីមង្គលការរយៈពេល ១០ ថ្ងៃជាប់ៗគ្នាមានតម្លៃជាង ១០០ លានដុល្លារអាមេរិក ហើយនោះមិនរាប់បញ្ចូលតម្លៃនៃគ្រឿងអលង្ការរាប់មិនអស់ដែលផ្តល់ឱ្យកូនក្រមុំនោះទេ។ ម្យ៉ាងទៀតថ្លៃបណ្ណាការអាចគ្រាន់តែជារឿងវប្បធម៌ប៉ុណ្ណោះ ដូច្នេះហើយ បរិមាណនេះមិនត្រូវបានគេចាត់ទុកថាច្រើន ឬតិចនោះទេ។

គួរបញ្ជាក់ដែរថា ពិធីមង្គលការដ៏ធំប្រចាំអាស៊ីនេះបានរៀបចំឡើងយ៉ាងអធិកអធម ដោយក្នុងថ្ងៃនីមួយៗប្រព្រឹត្តិទៅខុសៗគ្នា និងបានរៀបរាប់ពិធីផ្សេងៗគ្នា ក៏ដូចជាមានការអញ្ជើញចូលរួមយ៉ាងគគ្រឹកគគ្រេងរាប់ចាប់ពីលំដាប់ខ្សែររាជរង្សានុវង្ស អ្នកដឹកនាំប្រទេសធំៗ ជួររដ្ឋមន្រ្តីទាំងក្នុងនិងក្រៅប្រទេសជាច្រើនផងដែរ។

ក្នុងរយៈពេល ១០ ថ្ងៃនេះ ពិធីមួយដែលទទួលបានការចាប់អារម្មណ៍ខ្លាំងបំផុតជុំវិញពិភពលោក គឺពិធីសច្ចាប្រណិធានធ្វើឡើងនៅថ្ងៃទី ១១ ខែមករា ឆ្នាំ ២០២៤ ដែលជាពិធីបង្ហាញភក្តីភាពរបស់ព្រះអង្គចំពោះព្រះនាង នៅឯព្រះវិហារឥស្លាមដ៏ធំមួយនៃប្រទេសប្រុយណេ។ ជាមួយនេះព្រះនាងបានស្លៀកសម្លៀកបំពាក់ប្រពៃណីដ៏ល្អប្រណិត ដែលបំពាក់ទៅដោយគ្រឿងអលង្ការការមាសបុរាណភ្លឺចែងចាំង និងពិធីវិញប្រារព្ធតាមទំនៀមទម្លាប់បុរាណប្រ៊ុយណេយ៉ាងខ្ជាប់ខ្ជួនបំផុត៕

ប្រទេសថៃ ៖ កាលពីថ្ងៃទី១៧ ខែមករា ឆ្នាំ២០២៤ លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃបានសរសេរសារក្នុងបណ្តាញសង្គម ក្រោយពីលោកជួបជាមួយលោក Bernard Mensah ប្រធានធនាគារអន្តរជាតិអាមេរិក ក្នុងអំឡុងពេលកិច្ចប្រជុំ World Economic Forum (WEF) ប្រចាំឆ្នាំ២០២៤ នៅទីក្រុងដាវ៉ូស ប្រទេសស្វីស ។

លោក Srettha Thavisin នាយករដ្ឋមន្ត្រីថៃបញ្ជាក់ថា ធនាគារអន្តរជាតិអាមេរិក គឺជាធនាគារធំមួយនៅលើពិភពលោក និងមានសាខានៅប្រទេសថៃ ។ ធនាគារនេះបានគាំទ្រការវិនិយោគរបស់ក្រុមហ៊ុនថៃនៅក្រៅប្រទេស និងជំរុញការវិនិយោគពីបរទេសនៅប្រទេសថៃ ។ ធនាគារនេះបានស្នើឱ្យប្រទេសថៃរៀបចំ Road Show ផងដែរ ដើម្បីបង្ហាញទិដ្ឋភាពរួមនៃការវិនិយោគទាំងអស់ ។

បន្ទាប់មក លោកនាយករដ្ឋមន្ត្រីថៃ ក៏បានលើកឡើងពីការពិភាក្សាជាមួយនាយកគ្រប់គ្រងក្រុមហ៊ុន Telenor ថា ៖ «ក្រុមហ៊ុន Telenor មានទំនុកចិត្តលើសក្តានុពលប្រទេសថៃ ។ បើតាមការពិភាក្សាជាមួយនាយកក្រុមហ៊ុននេះឃើញថា យើងត្រូវតែលើកកម្ពស់ Startup និងផ្តល់ឱ្យសហគ្រិនទទួលបាននូវគំនិតច្នៃប្រឌិតថ្មីៗដែលជាផ្នែកសំខាន់ និងកសាងមូលដ្ឋាននៃសេដ្ឋកិច្ចឌីជីថល ។ លើសពីនេះ យើងនឹងជំរុញ Startup របស់ថៃឱ្យទទួលបានជោគជ័យកម្រិត Unicorn ផងដែរ ។ រីឯក្រុមហ៊ុន Telenor រីករាយនឹងគាំទ្រ Startup របស់ថៃ» ។

លោកនាយករដ្ឋមន្ត្រីថៃ ក៏បានលើកឡើងពីការជួបជាមួយលោក James Quincey នាយកក្រុមហ៊ុន Coca-Cola ដែលជាក្រុមហ៊ុនភេសជ្ជៈធំបំផុតនៅលើពិភពលោក និងជាម្ចាស់ ឬមានលិខិតអនុញ្ញាតផ្នែកភេសជ្ជៈជាង២០០ម៉ាក ហើយក្រុមហ៊ុននេះបានដំណើរការនៅប្រទេសថៃ តាំងពីឆ្នាំ១៩៩០ មកម៉្លេះ ។ ក្រុមហ៊ុន Coca-Cola បានផ្តល់ភាពសំខាន់លើនិរន្តរភាព និងពិភាក្សាអំពីប្រធានបទប្រើប្រាស់ដបផ្លាស្ទិក ដើម្បីចៀសវាងការបំពុលបរិស្ថាន ។

ក្រុមហ៊ុន Coca-Cola មានគម្រោងបង្កើនការវិនិយោគនៅប្រទេសថៃ ហើយថៃត្រៀមខ្លួនដើម្បីក្លាយជាមជ្ឈមណ្ឌលក្នុងតំបន់ (Regional Hub) ពីព្រោះបច្ចុប្បន្ន រដ្ឋាភិបាលថៃមានគោលនយោបាយជំរុញពាណិជ្ជកម្ម និងការវិនិយោគ ព្រមទាំងធ្វើឱ្យការដឹកជញ្ជូនទំនិញរវាងប្រទេសជិតខាងមានភាពងាយស្រួល ដូចជា ៖ បញ្ហាពន្ធគយ និងផ្នែកផ្សេងៗ ។

ក្រៅពីនេះ ក្រុមហ៊ុន Coca-Cola ក៏បានលើកឡើងពីគំនិត Water Resilience គឺជាការបញ្ជូនទឹកត្រឡប់ទៅកាន់ធម្មជាតិវិញ ដែលមានបរិមាណច្រើនជាងបរិមាណប្រើប្រាស់ ដើម្បីឱ្យធម្មជាតិមានតុល្យភាព ។ លោកនាយករដ្ឋមន្ត្រីថៃយល់ព្រមឱ្យក្រុមការងាររបស់ក្រុមហ៊ុននេះចូលមកសិក្សាស្រាវជ្រាវ ដើម្បីធ្វើគម្រោងសាកល្បងនៅប្រទេសថៃ ។

ចុងក្រោយ លោកនាយករដ្ឋមន្ត្រីថៃបានជួបជាមួយលោក Marcus Wallenberg នាយកក្រុមហ៊ុន SAAB និងជានាយកគណៈកម្មការធនាគារ Skandinaviska Enskilda Banken (SEB) ដែលជាធនាគារជួរមុខរបស់ប្រទេសស៊ុយអែត ។ លោកនាយករដ្ឋមន្ត្រីថៃថ្លែងថា ការជួបជាមួយលោក Marcus Wallenberg ចាត់ទុកថា ជាជំនួបមួយគួរឱ្យចាប់អារម្មណ៍ ពីព្រោះលោកជាអ្នកជំនួញមានសមត្ថភាពខ្ពស់ ហើយលោកជាប្រធានក្រុមហ៊ុនធំៗជាច្រើននៅប្រទេសស៊ុយអែត ដែលប្រកបអាជីវកម្មលើផ្នែក SAAB ABB AstraZeneca ។

ក្រៅពីនេះ លោក Marcus Wallenberg បានធ្វើជំនួញក្នុងបណ្តាញលក់យន្តហោះ និងនាវាងូតទឹកផងដែរ ហើយលោករីករាយគាំទ្រ និងពិចារណាបង្កើនការវិនិយោគលើផ្នែកផ្សេៗនៅប្រទេសថៃ ៕