ក្រុមអ្នកស្រាវជ្រាវរបស់អង្គការ NASA បាននិយាយថា ត្រី បង្គា និង tardigrades អាចជាសត្វដំបូងគេដែលរស់នៅលើឋានព្រះច័ន្ទ និងភពអង្គារជាមួយនឹងមនុស្ស។ ដោយសារអង្គការ NASA គ្រោងនឹងសាងសង់លំនៅឋានអចិន្ត្រៃយ៍នៅលើឋានព្រះច័ន្ទនៅចុងសតវត្សន៍ ហើយបន្តដោយការនាំយកមនុស្សទៅរស់នៅលើភពអង្គារក្នុងរយៈពេល ១០ ២០ ឆ្នាំខាងមុខ។ ដូច្នេះនៅពេលដែលយើងបង្កើតមូលដ្ឋានក្រៅភព មនុស្សនឹងត្រូវនាំយកមកជាមួយនូវប្រព័ន្ធអេកូឡូស៊ី រួមទាំងសត្វផងដែរ។

យ៉ាងណាមិញ សត្វអាចជួយបំពេញការងារសំខាន់ៗដូចជា ការចិញ្ចឹមក្នុងរន្ធតូចៗសម្រាប់ជាអាហារ ក៏ដូចជាជួយស្វែងរកវិធីដោះស្រាយវិទ្យុសកម្មទៀតផង។ ទោះជាយ៉ាងណាក៏ដោយ នេះគ្រាន់តែជាការលើកឡើងរបស់ក្រុមអ្នកស្រាវជ្រាវប៉ុណ្ណោះ ប៉ុន្តែមិនទាន់មានអ្វីជាក់លាក់នោះទេថាសត្វទាំងអស់នេះអាចរស់នៅលើឋានព្រះច័ន្ទ និងលើភពព្រះអង្គារបានឬមិនបាន ដោយសារប្រព័ន្ធអេកូឡូស៊ីក្រៅភពគឺមានភាពស្មុគស្មាញ ហើយច្បាស់ណាស់ ទំនាញអាចជាឧបសគ្គដ៏ធំមួយ។

លោក Christopher McKay អ្នកវិទ្យាសាស្ត្រភពផែនដីនៅមជ្ឈមណ្ឌលស្រាវជ្រាវ Ames របស់ NASA បាននិយាយថា “បញ្ហាសំខាន់គឺការថយចុះទំនាញផែនដី” ។ ទំនាញរបស់ព្រះច័ន្ទ និងភពអង្គារ គឺត្រឹមតែ ១/៦ និង ១/៣ នៃផែនដីប៉ុណ្ណោះ។ លំនៅឋានអាចសាងសង់បានតាមសីតុណ្ហភាព សម្ពាធ និងបរិយាកាសដែលធ្លាប់រស់នៅលើផែនដី ប៉ុន្តែមិនមានវិធីផ្លាស់ប្តូរទំនាញផែនដីឡើយ។

លោក McKay បានបន្តទៀតថា ការប្រែប្រួលទំនាញផែនដីអាចប៉ះពាល់ដល់ការលូតលាស់សាច់ដុំ និងឆ្អឹង ដែលធ្វើឱ្យសត្វនៅក្រៅភពមិនអាចឈរ ឬដើរបានធម្មតា។ នៅក្នុងលក្ខខណ្ឌទាំងនេះ សត្វតូចៗដូចជាកណ្តុរ និងប្រភេទសត្វក្នុងទឹកទំនងជាជម្រើសដ៏ល្អបំផុត ដោយសារវាមានភាពធន់ជាង។ នេះយោងតាមរបាយការណ៍ឆ្នាំ ២០២០ របស់សាកលវិទ្យាល័យ South Australia និង International Space University ក្នុងប្រទេសបារាំង សត្វល្អិតក៏ជាសត្វចិញ្ចឹមដែលអាចឋិតឋេរបាននៅក្នុងលំហផងដែរ។

ហេតុនេះហើយ ដើម្បីធ្វើអាណានិគមលើព្រះច័ន្ទ ឬភពអង្គារអ្នកស្រាវជ្រាវកំពុងបង្វែរការយកចិត្តទុកដាក់របស់ពួកគេទៅ tardigrades ដែលជាសត្វដ៏តូច និងមានអាយុវែងនេះ បង្ហាញពីសមត្ថភាពក្នុងការទប់ទល់នឹងលក្ខខណ្ឌធ្ងន់ធ្ងរ រួមទាំងកំដៅ និងត្រជាក់ខ្លាំង វិទ្យុសកម្ម និងការខ្វះចន្លោះ។ បេសកកម្មកន្លងមកបានបង្ហាញថា ពួកវារស់បានរយៈពេល ១២ ថ្ងៃនៃការប៉ះពាល់នឹងកន្លែងទំនេរ ហើយអាចបន្តពូជបានដោយគ្មានផលប៉ះពាល់អវិជ្ជមាននៃការហោះហើរក្នុងលំហ។

ទោះបីជាមិនបានចូលរួមដោយផ្ទាល់នៅក្នុងប្រព័ន្ធអេកូឡូស៊ីរបស់មនុស្សក៏ដោយ ការសិក្សាអំពីសត្វ tardigrades នៅក្នុងលំហអាចបង្ហាញពីរបៀបដែលពួកគេស៊ូទ្រាំនឹងលក្ខខណ្ឌធ្ងន់ធ្ងរដូចជាវិទ្យុសកម្ម ដោយហេតុនេះសត្វទាំងនោះត្រូវបានគេរំពឹងថានឹងអាចរស់រានមានជីវិត ក៏ដូចជានឹងក្លាយជាប្រភពអាហារដ៏មានប្រសិទ្ធភាព និងសម្បូរប្រូតេអ៊ីនជាងសត្វពាហនៈ៕

យោងតាមការបកប្រែក្រៅផ្លូវការដែលក្រុមការងារផ្សាយទទួលបានពីប្រទេសថៃ ដែលបានចុះផ្សាយពីកម្ពុជាឱ្យដឹងថា រដ្ឋាភិបាលប្រទេសថៃត្រៀមចរចាពីតំបន់ប្រេងត្រួតស៊ីគ្នាក្នុងដែនសមុទ្រជាមួយប្រទេសកម្ពុជា ។

កាលពីថ្ងៃទី១១ ខែមករា ឆ្នាំ២០២៤ សារព័ត៌មានថៃឈ្មោះ Thansettakij រាយការណ៍ថា រដ្ឋាភិបាលថៃបញ្ជាក់ថា នឹងត្រៀមចរចាពីតំបន់ប្រេងត្រួតស៊ីគ្នាក្នុងដែនសមុទ្រជាមួយកម្ពុជា ដោយនាយករដ្ឋមន្ត្រីរបស់ប្រទេសទាំងពីរនឹងពិភាក្សាគ្នា នៅថ្ងៃទី៧ ខែកុម្ភៈ ឆ្នាំ២០២៤ ។ ការពិភាក្សាគ្នានេះក្នុងគោលបំណងស្វែងរកដំណោះស្រាយ និងទទួលស្គាល់ពីពលរដ្ឋនៃប្រទេសទាំងពីរ ក៏ដូចជាបង្កើនសុវត្ថិភាពថាមពល ។

ការចរចាអំពីតំបន់ប្រេងត្រួតស៊ីគ្នាក្នុងដែនសមុទ្ររវាងប្រទេសថៃ និងកម្ពុជា (Overlapping Claims Areas – OCA) គឺជាគោលនយោបាយសំខាន់របស់រដ្ឋាភិបាល និងបានដំណើរការទៅមុខជាលំដាប់ ក្រោយពីលោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានបញ្ជាក់ពីការត្រៀមខ្លួនស្តាប់ និងពិភាក្សាជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសសម្តេចធ្វើដំណើរមកប្រទេសថៃជាផ្លូវការ នៅថ្ងៃទី៧ ខែកុម្ភៈ ឆ្នាំ២០២៤ ។

លោក Chai Watcharong មន្ត្រីនាំពាក្យការិយាល័យនាយករដ្ឋមន្ត្រីថៃលើកឡើងថា លោកនាយករដ្ឋមន្ត្រីថៃបានត្រៀមខ្លួនពិភាក្សាជាមួយកម្ពុជា ដើម្បីស្វែងរកដំណោះស្រាយពាក់ព័ន្ធនឹងបញ្ហាដែលប្រទេសថៃ និងកម្ពុជា អះអាងពីភាពជាកម្មសិទ្ធិលើតំបន់ប្រេងត្រួតស៊ីគ្នា (Overlapping Claims Areas – OCA) ។ ប្រទេសទាំងពីរនឹងឈរលើគោលការណ៍ច្បាប់អន្តរជាតិ និងប្រើប្រាស់ប្រយោជន៍រួមគ្នាពីធនធានធម្មជាតិនៅបាតសមុទ្រ ។ ហេតុនេះ វាមានសក្តានុពលខ្ពស់ផ្នែកសេដ្ឋកិច្ច ។

រដ្ឋាភិបាលថៃជឿជាក់ថា វានឹងជួយលើកកម្ពស់គុណភាពជីវិតរបស់ពលរដ្ឋទាំងពីរប្រទេស និងបង្កើនសុវត្ថិភាពថាមពលផងដែរ ។ លោក Srettha Thavisin នាយករដ្ឋមន្ត្រីថៃ នឹងព្យាយាមស្វែងរកដំណោះស្រាយមួយ ដែលមានការទទួលស្គាល់ពីពលរដ្ឋទាំងពីរប្រទេស ក៏ដូចជាជំរុញកិច្ចសហការជិតស្និទ្ធរវាងគ្នាទៅវិញទៅមក ។

លោក Chai Watcharong មន្ត្រីនាំពាក្យការិយាល័យនាយករដ្ឋមន្ត្រីថៃបន្តថា លោកនាយករដ្ឋមន្ត្រី Srettha Thavisin ជឿជាក់ថា មិត្តភាព និងការអនុវត្តគោលនយោបាយការបរទេសប្រកបដោយភាពស្និទ្ធស្នាលជាមួយប្រទេសទាំងអស់ នឹងធ្វើឱ្យភាគីទាំងពីរឈានដល់ការធ្វើកិច្ចព្រមព្រៀងមួយដើម្បីផលប្រយោជន៍រួមគ្នាដល់ប្រទេសទាំងពីរ និងពលរដ្ឋថៃ និងកម្ពុជា ។ រដ្ឋាភិបាលថៃនឹងពន្លឿនការចរចាករណីតំបន់ប្រេងត្រួតស៊ីគ្នាក្នុងដែនសមុទ្ររវាងថៃ និងកម្ពុជា ព្រមទាំងនាំយកធនធានធម្មជាតិនៅតំបន់ប្រេងត្រួតស៊ីគ្នាមកចែករំលែកដើម្បីប្រើប្រាស់ជាប្រយោជន៍ ។

ប្រទេសថៃជឿជាក់ថា វានឹងក្លាយជាឱកាសមួយទៀតក្នុងការដោះស្រាយបញ្ហាតម្លៃថាមពលនៅប្រទេសថៃ ដោយសារឧស្ម័ននៅតំបន់ប្រេងត្រួតស៊ីគ្នានេះ នឹងធ្វើឱ្យប្រទេសថៃអាចផលិតអគ្គិសនីក្នុងតម្លៃថោកជាងមុន, ជួយកាត់បន្ថយការចំណាយរបស់ពលរដ្ឋថៃ និងបង្កើនសមត្ថភាពការប្រកួតប្រជែងរបស់ប្រទេសថៃផងដែរ ។

មុននេះ លោក Panpree Phitthanukorn ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសថៃលើកឡើងថា បញ្ហាតំបន់ប្រេងត្រួតស៊ីគ្នារវាងថៃ និងកម្ពុជា គឺជាបញ្ហាដែលប្រទេសទាំងពីរបានចរចាគ្នាអស់រយៈពេលយូរមកហើយ ។ ប៉ុន្តែបច្ចុប្បន្ន ពុំទាន់ប្រាកដចិត្តថា តើភាគីណានឹងលើកឡើងពីបញ្ហានេះ? ប្រសិនបើកម្ពុជាលើកឡើងពីបញ្ហានេះ គឺយើងត្រូវយកមកពិចារណា និងរង់ចាំឱ្យលោកនាយករដ្ឋមន្ត្រីទាំងពីររូបពិភាក្សាគ្នាជាមុនសិន ។ បន្ទាប់មក វាជាកាតព្វកិច្ចរបស់ក្រសួងត្រូវចាត់វិធានការបន្តទៀត ។

សូមបញ្ជាក់ថា រាល់អត្ថន័យនៃការផ្សាយខាងលើ គឺជាខ្លឹមសារបកប្រែទាំងស្រុងពីការចុះផ្សាយរបស់ភាគីថៃ ដែលបានផ្សាយនៅក្នុងបណ្តាញសង្គមរបស់ខ្លួនតែម្ខាងប៉ុណ្ណោះ ៕

ប្រទេសចិន ៖ សារព័ត៌មានបរទេសបានរាយការណ៍ពីទីក្រុងប៉េកាំង ប្រទេសចិន កាលពីថ្ងៃទី១៦ ខែមករា ឆ្នាំ២០២៤ ថា អ្នកនាង Mao Ning អ្នកនាំពាក្យក្រសួងការបរទេសចិនលើកឡើងថា លោក Nong Rong អនុរដ្ឋមន្ត្រីក្រសួងការបរទេសចិន បានអញ្ជើញលោក Jaime FlorCruz ឯកអគ្គរដ្ឋទូតហ្វីលីពីន មកចូលជួបពិភាក្សាអំពីការលើកឡើងរបស់ប្រធានាធិបតីហ្វីលីពីន ។

ការអញ្ជើញលោក Jaime FlorCruz ឯកអគ្គរដ្ឋទូតហ្វីលីពីន មកចូលជួបអនុរដ្ឋមន្ត្រីក្រសួងការបរទេសចិន ដើម្បីបង្ហាញពីការព្រួយបារម្ភ និងតវ៉ាជាផ្លូវការពាក់ព័ន្ធនឹងការលើកឡើងរបស់ប្រធានាធិបតីហ្វីលីពីន លោក Ferdinand Marcos Jr. ដែលមានឥទ្ធិពលលើលទ្ធផលបោះឆ្នោតរបស់តៃវ៉ាន់ ។ ប្រទេសចិនសូមឱ្យរដ្ឋាភិបាលហ្វីលីពីនលើកឡើងដោយមានហេតុផល ។

កាលពីថ្ងៃទី១៥ ខែមករា ឆ្នាំ២០២៤ ប្រធានាធិបតីហ្វីលីពីន លោក Ferdinand Marcos Jr. បានបង្ហាញក្តីរីករាយជាមួយលោក Lai Ching-te ដែលទទួលបានជ័យជម្នះយ៉ាងងាយស្រួលក្នុងការបោះឆ្នោត កាលពីថ្ងៃទី១៣ ខែមករា កន្លងមក ។ លោក Lai Ching-te ត្រៀមទទួលតំណែងជាប្រធានាធិបតីថ្មីរបស់តៃវ៉ាន់ នៅថ្ងៃទី២០ ខែឧសភា ឆ្នាំ២០២៤ ។ ជាមួយគ្នានេះ លោកប្រធានាធិបតីហ្វីលីពីនបានលើកឡើងពីទំនាក់ទំនងយ៉ាងជិតស្និទ្ធជាមួយរដ្ឋាភិបាលតៃប៉ិថ្មីផងដែរ ។

អ្នកនាង Mao Ning អ្នកនាំពាក្យក្រសួងការបរទេសចិនលើកឡើងថា ការលើកឡើងរបស់លោកប្រធានាធិបតីហ្វីលីពីន គឺល្មើសនឹងគោលការណ៍ប្រទេសចិនតែមួយ និងជាការបំពាននឹងកិច្ចការផ្ទៃក្នុងរបស់ចិនផងដែរ ។ ហេតុនេះ រដ្ឋាភិបាលក្រុងប៉េកាំងសូមដាស់តឿនរដ្ឋាភិបាលក្រុងម៉ានីលថា កុំលេងជាមួយភ្លើងឱ្យសោះរឿងទឹកដីតៃវ៉ាន់ និងកុំបញ្ជូនសញ្ញាមិនត្រឹមត្រូវទៅកាន់កងកម្លាំងបែងចែកទឹកដីរបស់តៃវ៉ាន់ ។

ក្រោយមក ក្រសួងការបរទេសហ្វីលីពីនបានចេញសេចក្តីថ្លែងការណ៍មួយបញ្ជាក់ថា ប្រទេសហ្វីលីពីនប្រកាន់ខ្ជាប់នូវគោលការណ៍ប្រទេសចិនតែមួយ ។ សេចក្តីថ្លែងការណ៍នេះបានបញ្ជាក់ពីការលើកឡើងរបស់លោកប្រធានាធិបតីហ្វីលីពីនថា វាជាការផ្តល់ភាពសំខាន់សម្រាប់ផលប្រយោជន៍រួមគ្នារវាងហ្វីលីពីនជាមួយតៃវ៉ាន់ ខណៈមានពលរដ្ឋហ្វីលីពីនធ្វើការនៅតៃវ៉ាន់ ប្រមាណ២សែននាក់ ៕

ប្រទេសថៃ ៖ អ្នកដំណើរនៅលើយន្តហោះភ្ញាក់ផ្អើលយ៉ាងខ្លាំង ពេលឃើញពស់វារនៅផ្នែកខាងលើនៃកន្លែងដាក់អីវ៉ាន់ ហើយគ្មានអ្នកណាម្នាក់ដឹងថា តើពស់ឡើងលើយន្តហោះដោយរបៀបណាទេ ។ ហេតុការណ៍នេះបានកើតឡើងនៅលើយន្តហោះរបស់ក្រុមហ៊ុនអាកាសចរណ៍មួយ ដែលបានចេញដំណើរពីអាកាសយានដ្ឋានក្នុងទីក្រុងបាងកក មកកាន់ខេត្តភូកេត ។

នារីអ្នកដំណើរម្នាក់បានថតវីដេអូនេះលើកឡើងថា យន្តហោះរៀបនឹងចុះចតនៅអាកាសយានដ្ឋានក្នុងខេត្តភូកេត ហើយបុគ្គលិកយន្តហោះតម្រូវឱ្យអ្នកដំណើរទាំងអស់អង្គុយនៅតាមកៅអីរៀងៗខ្លួន និងដាក់ខ្សែក្រវ៉ាត់ឱ្យបានត្រឹមត្រូវ ។ ពីដំបូង នាងបានអង្គុយដោយស្ងាត់ស្ងៀម ពីព្រោះយន្តហោះត្រៀមចុះចត ហើយឃើញអ្នកអង្គុយក្បែរនាងមានអាការៈប្លែកៗ ។ ហេតុនេះ នាងសួរថា តើកើតអី? ពួកគេប្រាប់ថា ពស់នៅលើក្បាលនាង ។

ក្រោយមក បុគ្គលិកបម្រើការក្នុងយន្តហោះក៏បានមកជួយអន្តរាគមន៍ភ្លាមៗ ។ ពីដំបូង បុគ្គលិកបម្រើការក្នុងយន្តហោះព្យាយាមឱ្យពស់នេះវារចូលក្នុងដបទឹកតូចមួយ ប៉ុន្តែដោយសារពស់ពុំព្រមវារចូលដប ទើបគាត់យកថង់មកច្រកពស់វិញ ។

ស្ត្រីអ្នកដំណើរម្នាក់ដែលបានថតវីដេអូពស់បង្ហោះក្នុងបណ្តាញសង្គម បាននិយាយតាមទូរស័ព្ទប្រាប់សារព័ត៌មានថា ៖ «អ្នកដំណើរអង្គុយក្បែរខ្ញុំប្រាប់ថា មានពស់វារនៅលើក្បាលខ្ញុំ ។ ពេលនោះ គឺជាពេលដែលយន្តហោះកំពុងត្រៀមចុះចត ហើយអ្នកដំណើរទាំងអស់ពុំអាចងើបពីកៅអីរបស់ខ្លួនបានទេ បើទោះជាយើងខ្លាចក៏ដោយ ។ ហេតុនេះ យើងក៏បានស្រែកហៅបុគ្គលិកបម្រើការក្នុងយន្តហោះឱ្យមកជួយចាប់ពស់» ។

ក្រោយវីដេអូពស់នៅលើយន្តហោះបានបង្ហោះក្នុងបណ្តាញសង្គម មហាជនបានសរសើរបុគ្គលិកបម្រើការក្នុងយន្តហោះរូបនេះ ដែលអាចដោះស្រាយបញ្ហាបានភ្លាមៗ ពីព្រោះកន្លងមក ក្រុមហ៊ុនអាកាសចរណ៍ពុំបានហ្វឹកហាត់បុគ្គលិកពីជំនាញចាប់ពស់នៅលើយន្តហោះទេ ។ ប៉ុន្តែគ្រប់គ្នាសួរថា តើពស់ឡើងលើយន្តហោះបានដោយរបៀបណា? ឬអ្នកដំណើរលួចយកពស់ឡើងលើយន្តហោះ? ដោយសារបើតាមការសង្កេតរបស់អ្នកដំណើរឃើញថា ពស់នេះគ្មានពិសទេ វាអាចជាពស់ដែលគេចិញ្ចឹម ៕

ប្រទេសកូរ៉េខាងជើង ៖ មេដឹកនាំប្រទេសកូរ៉េខាងជើង លោក គឹម ជុងអ៊ុន បានប្រកាសផ្តាច់ទំនាក់ទំនងជាមួយប្រទេសកូរ៉េខាងត្បូង ហើយលោកបញ្ជាក់ថា ការបង្រួបបង្រួមជាតិរវាងប្រទេសកូរ៉េទាំងពីរមិនអាចទៅរួចទេ ។ លើសពីនេះ លោកនឹងបិទស្ថាប័នចំនួន៣កន្លែង ដែលធ្វើការពាក់ព័ន្ធនឹងការបង្រួបបង្រួមជាតិកូរ៉េ ហើយលោកនឹងលុបចោលការធ្វើដំណើរទេសចរណ៍រវាងប្រទេសទាំងពីរផងដែរ ។

សារព័ត៌មាន KCNA របស់ប្រទេសកូរ៉េខាងជើងរាយការណ៍ថា នៅពាក់កណ្តាលខែមករា ឆ្នាំ២០២៤ នេះ លោក គឹម ជុងអ៊ុន បានស្នើឱ្យមានការកែប្រែរដ្ឋធម្មនុញ្ញ និងផ្លាស់ប្តូរឋានៈប្រទេសកូរ៉េខាងត្បូងឱ្យក្លាយជារដ្ឋនៅដាច់ដោយឡែកពីកូរ៉េខាងជើង ។ មេដឹកនាំកូរ៉េខាងជើងលើកឡើងថា បើទោះជាកូរ៉េខាងជើងមិនស្វែងរកសង្គ្រាម ប៉ុន្តែកូរ៉េខាងជើងមិនបានតាំងចិត្តចៀសវាងទេ ។

ការប្រកាសបែបនេះរបស់មេដឹកនាំកូរ៉េខាងជើង កើតឡើងក្នុងអំឡុងពេលទំនាក់ទំនងរវាងប្រទេសកូរ៉េខាងជើង និងកូរ៉េខាងត្បូងកាន់តែធ្លាក់ចុះ ហើយកូរ៉េខាងជើងបានសាកល្បងបាញ់មីស៊ីលជាច្រើនលើកច្រើនសារ ។ មេដឹកនាំកូរ៉េខាងជើងបានអំពាវនាវទៀតថា នឹងកំណត់ឱ្យកូរ៉េខាងត្បូងក្លាយជាសត្រូវលំដាប់ទី១ និងជាសត្រូវគ្មានថ្ងៃផ្លាស់ប្តូរក្នុងរដ្ឋធម្មនុញ្ញ ព្រមទាំងកំណត់ឱ្យទឹកដីកូរ៉េខាងជើងនៅដាច់ដោយឡែកពីកូរ៉េខាងត្បូង ។ លោក គឹម ជុងអ៊ុន លើកឡើងថា សង្គ្រាមនឹងបំផ្លាញកូរ៉េខាងជើង និងធ្វើឱ្យកូរ៉េខាងជើងចាញ់អាមេរិក ។

ចំណែកអតីតរដ្ឋមន្ត្រីក្រសួងការបរទេសអាមេរិកបាននិយាយទៅកាន់អ្នកវិទ្យាសាស្ត្រនុយក្លេអ៊ែរថា ស្ថានការណ៍រវាងប្រទេសកូរ៉េទាំងពីរនៅពេលនេះកាន់តែធ្ងន់ធ្ងរជាងមុន និងធ្ងន់ធ្ងរជាងកាលពីមិថុនា ឆ្នាំ១៩៥០ ទៅទៀត ។ គេមិនដឹងថា តើមេដឹកនាំប្រទេសកូរ៉េខាងជើងកំណត់ផែនការ និងសម្រេចចិត្តបែបណាទេ ៕

អ្នកស្រី Alice Walton បានជាប់លេខ២ ជា«មនុស្សស្រី»ដែលមានទ្រព្យសម្បត្តិច្រើនបំផុតលើលោក និងជាប់លេខរៀងទី១៧ជាសេដ្ឋីនៅទូទាំងពិភពលោកប្រចាំឆ្នាំ២០២៣។

យោងតាមការចុះផ្សាយរបស់ទស្សនាវត្តី Bloomberg គឺបានកត់ត្រាសេដ្ឋីជាច្រើននៅជុំវិញពិភពលោកប្រចាំឆ្នាំ២០២៣ ហើយក៏បានរកសេដ្ឋីនីដែលមានទ្រព្យសម្បត្តិច្រើនលំដាប់កំពូលមួយរូបដែរគឺ អ្នកស្រី Alice Walton ដែលជាអ្នកស្នងមរតករបស់ក្រុមហ៊ុនយក្ស «Walmart»។

លោកស្រី Alice Walton វ័យ ៧៤ ឆ្នាំ ជនជាតិអាមេរិក គឺជាកូនស្រីតែម្នាក់គត់របស់ស្ថាបនិក Walmart គឺលោក Sam Walton ។ ក្នុងអាជីពការងាររបស់នាង គឺនាងបានផ្តោតយ៉ាងសំខាន់ទៅលើការថែរក្សាសិល្បៈ លើកកម្ពស់ការអប់រំ និងបង្កើតឱកាសជំរុញសេដ្ឋកិច្ចសម្រាប់មនុស្សទាំងអស់គ្នា ជាជាងធ្វើការនៅក្រុមហ៊ុនយក្សWalmart។ ជាងនេះទៅទៀត នាងតែងតែលេចវត្តមាននៅក្នុងសប្បុរធម៌ធំៗជាច្រើនទៀតផងដែរ។

យោងតាមទស្សនាវដ្តី Bloomberg បានឲ្យដឹងទៀតថា ទ្រព្យសម្បត្តិសុទ្ធរបស់ លោកស្រី Alice Walton គិតត្រឹមខែវិច្ឆិកា ឆ្នាំ ២០២៣ ត្រូវបានគេប៉ាន់ប្រមាណថាមានចំនួន ៧១ពាន់លានដុល្លារ។ ម៉្យាងវិញទៀត នាងបានជាប់ក្នុងតារាងជាស្ត្រីដែលមានបំផុតរបស់ពិភពលោកតាំងពីឆ្នាំ២០១៥មកម្លេះ។

ក្នុងឆ្នាំ ២០១១ នាងបានបើកសារមន្ទីរសិល្បៈ Crystal Bridges នៅស្រុកកំណើតរបស់នាងនៅ Bentonville រដ្ឋ Arkansas សហរដ្ឋអាមេរិក។ សារមន្ទីរនេះផងដែរផងដែរគឺបង្កើតឡើងនៅក្នុងគោលបំណងលើកកម្ពស់ការបណ្តុះបណ្តាល ការប្រមូលផ្តុំសិល្បៈចម្រុះ ទាំងការពិព័ណ ការបង្រៀន ការសម្តែង និងគ្រប់គ្នាអាចចូលរួមបានដោយឥតគិតថ្លៃ។

នៅឆ្នាំ ២០២២ ក៏បានបង្កើតវិទ្យាស្ថានសុខភាពសាធារណៈដ៏ធំមួយ ហើយបានប្តូរឈ្មោះទៅជាសាលាវេជ្ជសាស្ត្រ Alice L. Walton ។ សាលានេះផងដែរគឺបង្កើតឡើងក្នុងគោលបំណងដើម្បីលើកកម្ពស់សុខមាលភាព និងសុខភាពរបស់មនុស្សគ្រប់រូបៗដោយឥតគិតថ្លៃ ដែលទៅទទួលសេវានៅទីនោះផងដែរ៕