ប្រទេសថៃ ៖ នៅថ្ងៃទី១៩ ខែមករា ឆ្នាំ២០២៤ សមត្ថកិច្ចប្រទេសថៃបានប្រមូលកម្លាំងចូលរំដោះក្មេងស្រីម្នាក់ និងចាប់ខ្លួនមនុស្ស៤នាក់ពាក់ព័ន្ធនឹងករណីថតវីដេអូក្មេងស្រីលក់តាមអនឡាញ តាមសាលដីការបស់តុលាការ ។ ពួកគេបានបង្កើតទីតាំងថតវីដេអូខុសច្បាប់ចំនួន៤កន្លែង ក្នុងនោះមានទីតាំងនៅទីក្រុងបាងកក និងខេត្តប៉ាធុមថានី ។ រីឯក្មេងស្រីដែលពួកគេបបួលមកថតនេះ គឺនាងមានអាយុត្រឹមតែ១៦ឆ្នាំប៉ុណ្ណោះ ។

ជនល្មើសទាំង៤នាក់បានបបួលក្មេងស្រីខាងលើមកថតជារូបភាពសន្លឹក ឬថតវីដេអូ ហើយពួកគេពុំបានបិទបាំងផ្ទៃមុខរបស់នាងទេ ។ បន្ទាប់មក ពួកគេក៏យករូបភាព និងវីដេអូរបស់នាងទៅលក់នៅតាមអនឡាញ ។ ហេតុនេះ សមត្ថកិច្ចបានចោទប្រកាន់ពួកគេពីបទជួញដូរមនុស្ស ។

តាមរយៈការសួនាំក្មេងស្រីរងគ្រោះឱ្យដឹងថា នាងបានជួបមិត្តភក្តិក្នុងក្លិបរាត្រី Heaven នៅម្តុំរាំងស៊ីត ហើយមិត្តភក្តិក៏បបួលនាងមកធ្វើការ និងសន្យាថា នឹងផ្តល់ប្រាក់ឱ្យនាង ។ ប៉ុន្តែនាងមិនដឹងថា ជនល្មើសបានយករូបភាព និងវីដេអូនាងទៅលក់ និងផ្សព្វផ្សាយតាមអនឡាញទេ ។ នាងប្រាប់ថា នៅមានមិត្តរបស់ពួកនាងជាច្រើននាក់ទៀតដែលធ្វើដូចនាងដែរ ។

ចំណែកក្រុមជនល្មើសបានទទួលសារភាពកំហុស ហើយត្រូវសមត្ថកិច្ចចោទប្រកាន់ចំនួន៥ករណី គឺ ៖
១-គ្រប់គ្រងបណ្តាញផ្សព្វផ្សាយអនា.ចា.រក្មេង ដើម្បីស្វែងរកផលប្រយោជន៍ផ្លូ.វ.ភេ.ទសម្រាប់ខ្លួនឯង ឬអ្នកដទៃ
២-បញ្ជូនរូបភាពអា.ស.អា.ភៀ.សរបស់កុមារទៅឱ្យអ្នកដទៃ
៣-ថតវីដេអូដើម្បីលក់, នាំចេញ និងផ្សព្វផ្សាយតាមអនឡាញ
៤-នាំចូល និងផ្សព្វផ្សាយរូបភាពមិនល្អចូលក្នុងប្រព័ន្ធកុំព្យូទ័រ ដែលមនុស្សទូទៅអាចចូលមើលបាន
៥-បានប្រព្រឹត្តបទល្មើសជួ.ញដូ.រមនុស្ស និងកេងប្រវ័ញ្ចខុសច្បាប់លើកុមារ ដើម្បីផលិត ឬផ្សព្វផ្សាយរូបភាពតាមអនឡាញចំពោះបុគ្គលមានអាយុលើស១៥ឆ្នាំ ប៉ុន្តែមិនដល់១៨ឆ្នាំ ។

តាមរយៈការស៊ើបអង្កេតបង្ហាញថា ពួកគេបានបង្កើតវែបសាយវីដេអូអា.សអា.ភៀ.សនៅប្រទេសថៃ និងមានអ្នកតាមដានរហូតដល់ជាង១លាននាក់ ។ ពួកគេបានផលិតវីដេអូអ.នា.ចា.រកុមារ និងលក់តាមអនឡាញក្នុងតម្លៃចាប់ពី១៥០បាត ទៅ៧៩៩បាត ដោយបានបែងចែកសមាជិកជាច្រើនប្រភេទ ដូចជា ៖ សមាជិកប្រចាំថ្ងៃ, សមាជិកប្រចាំខែ និងសមាជិកយូរឆ្នាំ ហើយមានសមាជិកនៅក្នុងក្រុមប្រមាណ១ម៉ឺននាក់ ។ ហេតុនេះ សមត្ថកិច្ចសន្និដ្ឋានថា ពួកគេទទួលបានប្រាក់ចំណូលមិនក្រោម១សែនបាតក្នុង១ខែពីការប្រមូលប្រាក់ពីសមាជិកទាំងនេះ ។

សមត្ថកិច្ចបានបញ្ជូនជនល្មើសទាំង៤នាក់មកកាន់ស្ថាប័នគ្រប់គ្រងស្ថិតនៅក្រោមក្រសួងមហាផ្ទៃ ដើម្បីធ្វើកំណត់ហេតុចាប់ខ្លួន មុនពេលធ្វើសន្និសីទសារព័ត៌មាន ។ លោក Ornsit Samphantharat នាយកស្ថាប័នគ្រប់គ្រងបានសហការជាមួយស្ថាប័នពាក់ព័ន្ធក្នុងការធ្វើសន្និសីទសារព័ត៌មាន ស្តីពីការចាប់ខ្លួនក្រុមជួញដូរមនុស្ស ៕

បរទេស៖ វិស័យថាមពលកកើតឡើងវិញរបស់អូស្ត្រាលីមានការរីកចម្រើនយ៉ាងខ្លាំងដោយសារការរួមបញ្ចូលគ្នានៃបច្ចេកវិទ្យាឈានមុខគេលើពិភពលោក ធនធានធម្មជាតិ យន្តការគោលនយោបាយ និងឱកាសវិនិយោគ។
ថាមពលកកើតឡើងវិញ គឺជាថាមពលដែលបានមកពីធនធានធម្មជាតិតាមរង្វាស់ពេលវេលារបស់មនុស្ស។ ដូច្នេះធនធានដែលអាចកកើតឡើងវិញរួមមាន ពន្លឺព្រះអាទិត្យ ខ្យល់ ចលនាទឹក និងកំដៅក្នុងផែនដី។

អូស្ត្រាលីគឺជាប្រទេសដែលផលិតថាមពលពន្លឺព្រះអាទិត្យដ៏ធំបំផុតរបស់ពិភពលោកជាមួយនឹងថាមពល 1.1 kW (1,166W) ក្នុងមនុស្សម្នាក់ នេះបើយោងតាម វិទ្យាស្ថាន Photovoltaic របស់អូស្ត្រាលីក្នុងឆ្នាំ ២០២២។ លើសពីនេះ ថាមពលខ្យល់ដ៏ទំនើបនៅឆ្នេរសមុទ្រក៏កំពុងលេចចេញជាឧស្សាហកម្មថ្មីមួយនៅក្នុងប្រទេសអូស្ត្រាលីផងដែរ។ ជាងនេះទៅទៀត ឧស្សាហកម្មអ៊ីដ្រូសែននៅក្នុងប្រទេសនេះក៏កំពុងរីកចម្រើនយ៉ាងឆាប់រហ័សជាមួយនឹងបច្ចេកវិទ្យាផលិតកម្មអ៊ីដ្រូសែនកម្រិតខ្ពស់ដែលត្រូវបានបង្កើតឡើងដោយអាជីវកម្ម។

ចំណែកជីវថាមពលក៏ជាតំបន់មួយទៀតដែលអូស្ត្រាលីកំពុងផ្តល់ដំណោះស្រាយបច្ចេកវិទ្យាឈានមុខគេលើពិភពលោក។ បច្ចេកវិជ្ជាទាំងនេះមានចាប់ពីការផលិតសម្ភារៈជីវសាស្ត្រកម្រិតខ្ពស់រហូតដល់ការអភិវឌ្ឍន៍គម្រោងដុតសំរាមដើម្បីបង្កើតអគ្គិសនី។ ចំពោះការផ្ទុកថាមពលវិញក៏ជាបច្ចេកវិទ្យាដ៏សំខាន់មួយសម្រាប់ថាមពលកកើតឡើងវិញ ធ្វើឱ្យប្រសើរឡើងនូវការប្រកួតប្រជែងថាមពលកកើតឡើងវិញ និងជ្រៀតចូលដោយការសម្របសម្រួលការផ្គត់ផ្គង់ថាមពលនៅទូទាំងបណ្តាញ កាត់បន្ថយបន្ទុកខ្ពស់បំផុត និងអនុញ្ញាតឱ្យអ្នកផ្គត់ផ្គង់គ្រប់គ្រងការផ្គត់ផ្គង់ និងតម្រូវការកាន់តែប្រសើរ។

ហេតុនេះហើយ អូស្ត្រាលីមានបំណងចង់ក្លាយជាមហាអំណាចនៃបច្ចេកវិទ្យាថាមពលកកើតឡើងវិញ ដោយសារប្រទេសនេះមានធនធានធម្មជាតិដ៏សម្បូរបែប ដែលស័ក្តិសមសម្រាប់ការអភិវឌ្ឍថាមពលកកើតឡើងវិញ ដោយរដ្ឋាភិបាលអូស្ត្រាលីមានបំណងបង្កើនសមាមាត្រនៃថាមពលកកើតឡើងវិញដល់ ៨២% នៅឆ្នាំ ២០៣០។ ដូច្នេះបច្ចេកវិទ្យាថាមពលកកើតឡើងវិញឈានមុខគេជាច្រើនត្រូវបានបង្កើតឡើងនៅក្នុងប្រទេសនេះ និងបានអនុវត្តទូទាំងពិភពលោក៕

នៅឯប្រទេសជប៉ុន ឪពុកម្តាយគ្រប់រូបយល់ដឹងយ៉ាងខ្លាំងអំពីការចិញ្ចឹមបីបាច់កូនឲ្យមានអាកប្បកិរិយាកិរិយាល្អ ជាពិសេសគឺទៅលើវិន័យនិងសណ្តាប់ធ្នាប់ ហើយវាក៏ជាអ្វីដែលសង្គមជប៉ុនចង់បានបំផុតដើម្បីភាពសុខដុមរមនាក្នុងប្រទេស។

ប្រសិនបើក្មេងគ្រប់រូបរៀនអំពីការតម្រង់ជួរបានយ៉ាងល្អ នោះពិភពលោកនឹងកាន់តែមានភាពប្រសើរឡើង ព្រោះថានឹងគ្មានការកេញប្រវ័ញ្ចឬជិះជាន់គាប់សង្កត់លើអ្នកដទៃ ចេះឲ្យតម្លៃ គោរព សាមគ្គីគ្នា។ មនុស្សម្នានឹងរៀនអំពីភាពអត់ធ្នត់ក្នុងជីវិត ការរងចាំ ការគ្រប់គ្រងអារម្មណ៍ ភាពស្មោះត្រង់ សណ្តាប់ធ្នាប់ វិន័យល្អក្នុងនាមជាមនុស្សជាតិ ក៏ដូចជាគោរពពេលវេលា (មកមុនបានមុនជាដើម)។

ការតម្រង់ជួរក៏អាចចាត់ទុកថាជាវប្បធម៌របស់ប្រទេសជប៉ុនមួយដែរ។ ក្មេងៗជប៉ុននឹងត្រូវបង្រៀនឲ្យចេះតម្រង់ជួរតាំងពីរៀនថ្នាក់មត្តេយ្យមកម្លេះ គឺក្នុងគោលបំណងឲ្យក្មេងៗទាំងនោះបានលត់ដំខ្លួនឯង គោរពសិទ្ធអ្នកដទៃ ការអត់ធ្មត់ និងការសហការគ្នាជាធ្លង់មួយជាដើម។

ការលត់ដំខ្លួនពីក្មេងរបស់ជនជាតិជប៉ុន គឺពិតជាបានផ្សារភ្ជាប់ជាមួយនឹងសង្គមរបស់ពួកគេ នៅពេលដែលធំឡើង ពួកគេនឹងប្រកាន់ខ្ជាប់នូវវិន័យដ៏ល្អ ពោលគឺភាពអត់ធ្មត់និងការរងចាំ ប្រកបដោយភាពស្ងត់ស្ងាត់។ កន្លងមក ប្រជាជនជប៉ុនបានអនុវត្តអាកប្បកិរិយានេះយ៉ាងខ្ជាប់ខ្ជួន ហើយវាក៏បានក្លាយទៅជាវប្បធម៌របស់ពួកគេទៅហើយ មិនថានៅក្នុងកាលៈទេសៈណាទេ គឺពួកគេនៅតែបង្ហាញការគោរពចំពោះអ្នកដទៃដោយធ្វើការរង់ចាំបានយ៉ាងមានរបៀបនិងស្ងៀមស្ងាត់បំផុត។

ជាក់ស្តែង ការកើតមានការរញ្ជួយដីនិងរលកយក្សស៊ូណាមិក្នុងឆ្នាំ ២០១១ បន្ទាប់ពីអ្វីៗបានល្អប្រសើរវិញហើយ ប្រជាជនជប៉ុនគ្រប់រូបបាននាំគ្នាសម្រុកទៅទិញសម្ភារៈ បន្លែ ផ្លែឈើ និងសម្លៀកបំពាក់ ដែលបានធ្វើឲ្យមានការស្ទះកកកុញពេញទីក្រុង ប៉ុន្តែទោះជាយ៉ាងណាពួកគេនៅតែបានតម្រង់ជួរ ឈរបន្តកន្ទុយគ្នាយ៉ាងយកចិត្តទុកដាក់ រក្សាបាននូវស្ងប់ស្ងាត់ និងគ្មានភាពរញ៉េរញ៉ៃ។ ម៉្យាងវិញទៀត ការរងចាំក្នុងជួរដ៏សែនយូរ បានធ្វើឲ្យប្រជាជនជប៉ុនភាគច្រើនមានគំនិតច្នៃប្រឌិតក្នុងការបំបាត់ភាពអផ្សុក ដូចជាការអានសៀវភៅខណៈពេលរងចាំជួរជាដើម។

តួយ៉ាង ប្រទេសនៅប៉ែកអ៊ឺរ៉ុបភាគច្រើនវិញក៏គេឲ្យតម្លៃទៅលើការតម្រង់ជួរនេះដែរ ព្រោះថាវាជាការគោរពសិទ្ធអ្នកដទៃ រក្សាសណ្តាប់ធ្នាប់នៅកន្លែងទាំងនោះ និងបានបង្ហាញពីសង្គមដែលមានភាពថ្លៃថ្នូរនិងរបៀបរាប់រយ។

ប៉ុន្តែផ្ទុយទៅវិញ ប្រសិនបើសង្គមខ្លះមិនបានយកចិត្តទុកដាក់និងឲ្យតម្លៃទៅលើការឈរជាជួរនោះទេ ប្រាកដណាស់ថានឹងកើតមាននូវភាពគ្មានស.ណ្តាប់ធ្នាប់ ទាំងការរស់នៅ ដេក ដើរ ឈរ អង្គុយ… ក៏ដូចជាការដែលហ៊ានមកកាត់ជួរអ្នកដទៃដោយគ្មានភាពអៀនខ្មាស់។ ជាក់ស្តែង ដូចជាអ្នកបើកបរយាន្តជំនិះមួយចំនួនគឺប្រសេចប្រសាចពេញ.ផ្លូវតែម្តង។ ទាំងនេះគឺបានសបញ្ជាក់អំពីអាកប្បកិរិយានៅក្នុងសង្គមនោះគឺនៅមានកម្រិត.ទាប មិនចេះឲ្យតម្លៃគ្នាក្នុងភាពជាមនុស្ស ដែលវាប្រឈមនឹងការបែក.បាក់សាមគ្គីភាពក្នុងសង្គមនាថ្ងៃអនាគតផងដែរ៕

ប្រទេសចិន ៖ សារព័ត៌មានបរទេសផ្សាយថា មាន YouTuber ជនជាតិចិនដ៏ល្បីល្បាញបានថតវីដេអូជាច្រើនបង្ហាញអំពីជីវិតរបស់ខ្លួន ដែលរស់នៅតាមជនបទស្រុកស្រែចម្ការយ៉ាងសាមញ្ញ និងមានអ្នកតាមដានរហូតដល់២០លាននាក់ ។ មនុស្សភាគច្រើនដែលបានមើលវីដេអូរបស់ YouTuber នេះ ពួកគេក៏ទទួលបានគំនិតផ្សេងៗ និងយកទៅអនុវត្តតាមទៀតផង ។

ក្រោយពី YouTuber ខាងលើបានបង្ហោះវីដេអូមួយចូលក្នុងបណ្តាញសង្គម ដែលបង្ហាញពីជីវិតជាកសិកររស់នៅជនបទជាមួយក្រុមគ្រួសារ និងមានអ្នកចូលមើលរហូតដល់២០លាននាក់ ប៉ុន្តែត្រូវបានអ្នកលេងបណ្តាញសង្គមម្នាក់លើកឡើងថា គ្រប់យ៉ាងដែលគេគ្រប់គ្នាឃើញនេះ គឺជារូបភាពបោកប្រាស់ប៉ុណ្ណោះ ។ អ្នកលេងបណ្តាញសង្គមរូបនេះនិយាយថា YouTuber នេះបានថតវីដេអូកុហកអ្នកមើល ហើយសូម្បីតែគ្រួសារ និងអ្នកជិតខាង ក៏កុហកដែរ ។ ពួកគេមិនមែនជាគ្រួសារ និងអ្នកជិតខាងពិតប្រាកដទេ ។

គូស្នេហ៍ជា YouTuber ដ៏ល្បីល្បាញនេះឈ្មោះ Xiao Chunhua និង Niu Aifang បានថតវីដេអូជាច្រើនបង្ហោះក្នុងបណ្តាញសង្គម ដែលបង្ហាញពីជីវិតរស់នៅបែបសាមញ្ញនៅតំបន់ជនបទឆ្ងាយពីទីប្រជុំជន ។ ពួកគេបានថតវីដេអូបង្ហាញឱ្យគេឃើញថា ពួកគេមានអ្នកជិតខាងដែលមានវ័យចំណាស់, ពួកគេធ្វើផ្ទះពីដុំឥដ្ឋដោយខ្លួនឯង និងចិញ្ចឹមជ្រូក និងគោទៀតផង ។

ហេតុនេះ ធ្វើឱ្យមនុស្សភាគច្រើនតាមដាន និងចូលចិត្តមើលពីការរស់នៅយ៉ាងសាមញ្ញរបស់ពួកគេ ។ លើសពីនេះ ពួកគេក៏បានលក់ទំនិញតាមអនឡាញ និងរកប្រាក់ចំណូលបានរហូតដល់២លានយាន់ឯណោះពីការ Live លក់ទំនិញតាមអនឡាញ ។ ហេតុនេះ ការថតវីដេអូផ្សេងៗរួមផ្សំទាំងការលក់ទំនិញអនឡាញផង ធ្វើឱ្យពួកគេរកប្រាក់ចំណូលបានជាង២៦លានយាន់ ។

ប៉ុន្តែអ្នកលេងបណ្តាញសង្គមម្នាក់បានចែកចាយព័ត៌មានថា អ្នកទាំងពីរនេះមិនមែនជាអ្នកស្រែចម្ការនោះទេ ហើយឈ្មោះ Xiao Chunhua ក៏មិនមែនជាឈ្មោះពិតប្រាកដដែរ ។ ការពិត រូបគេឈ្មោះ Zhang Shui គឺជាម្ចាស់ក្រុមហ៊ុនមួយដែលបានចុះបញ្ជី និងប្រើប្រាស់ដើមទុនរហូតដល់៥ម៉ឺនយាន់ឯណោះ ។ ជីវិតពិតប្រាកដរបស់ពួកគេ គឺជាអ្នកមានទ្រព្យសម្បត្តិស្តុកស្តម្ភ និងរស់នៅបែបស៊ីវិល័យ ។

លើសពីនេះ ឪពុក-ម្តាយ និងអ្នកជិតខាងដែលគេបានឃើញក្នុងវីដេអូនោះ គឺជាអ្នកសម្តែងទេ ។ ពួកគេបោកប្រាស់ទាំងអស់ គឺដូចជាការថតកុនអីចឹង ហើយពួកគេធ្វើបែបនេះក្នុងគោលបំណងស្វែងរកផលប្រយោជន៍ដាក់ខ្លួនតែប៉ុណ្ណោះ ។

ក្រោយពីការចែកចាយព័ត៌មានការពិតក្នុងបណ្តាញសង្គម បានធ្វើឱ្យអ្នកតាមដានទាំងអស់មិនពេញចិត្តយ៉ាងខ្លាំង ថែមទាំងនិយាយរិះគន់ថា ពួកគេខកចិត្តណាស់ដែល YouTuber ចិនដ៏ល្បីល្បាញធ្វើបែបនេះ កុហកសូម្បីតែឪពុក-ម្តាយ និងអ្នកជិតខាង ។ កន្លងមក មានមនុស្សជាច្រើននាក់បានតាមដានវីដេអូរបស់ពួកគេ ហើយយកគំនិតផ្សេងៗទៅធ្វើតាមទៀតផង ៕

ប្រទេសថៃ៖ តុលាការថៃបានកាត់ទោសបុរសម្នាក់ដែលរិះគន់របបរាជានិយមឱ្យជាប់ពន្ធនាគារ ៥០ ឆ្នាំ ជាការកាត់ទោសធ្ងន់បំផុតមិនធ្លាប់មានក្រោមច្បាប់ប្រមាថព្រះមហាក្សត្រ។

កាលពីថ្ងៃទី១៨ ខែមករា ឆ្នាំ២០២៤ សាលាឧទ្ធរណ៍ក្នុងទីក្រុងឈៀងរ៉ៃ ភាគខាងជើងប្រទេសថៃ បានកាត់ទោសលោក Mongkol Thirakot អាយុ ៣០ឆ្នាំ ពីបទបង្ហោះហ្វេសប៊ុកប្រមាថព្រះរាជវង្ស ដោយសាលាដំបូងបានកាត់ទោសលោក មង្គល ឱ្យជាប់ពន្ធនាគារ ២៨ ឆ្នាំ។ ទោះជាយ៉ាងណា ក្នុងដំណើរការនៃបណ្តឹងឧទ្ធរណ៍ គាត់ត្រូវបានរកឃើញថាមានពិរុទ្ធបទល្មើសបន្ថែមចំនួន ១១។

យោងតាមក្រុមមេធាវីថៃដើម្បីសិទ្ធិមនុស្ស (TLHR) បាននិយាយនៅក្នុងសេចក្តីថ្លែងការណ៍មួយថា សាលាឧទ្ធរណ៍បានកាត់ទោស Mongkol Thirakot ឱ្យជាប់ពន្ធនាគារ ២២ឆ្នាំបន្ថែម តាមមាត្រា ១១២ នៃក្រមព្រហ្មទណ្ឌ ចំពោះការបង្ហោះចំនួន ២៧ លើគណនីហ្វេសប៊ុកផ្ទាល់ខ្លួន បូករួមនឹងទោស ២៨ ឆ្នាំ ដែលតុលាការសាលាដំបូងបានកំណត់កាលពីមុន ដូច្នេះទោសជាប់ពន្ធនាគារសរុបរបស់គាត់គឺ ៥០ ឆ្នាំ។

យោងតាម TLHR នេះគឺជាការកាត់ទោសដាក់ពន្ធនាគារធ្ងន់បំផុតដែលត្រូវបានផ្តល់ឱ្យទាក់ទងនឹងឧក្រិដ្ឋកម្មនៃការប្រមាថព្រះមហាក្សត្រដែលបានបញ្ជាក់នៅក្នុងមាត្រា ១១២ នៃក្រមព្រហ្មទណ្ឌ។ Mongkol Thirakot គឺជាម្ចាស់ហាងលក់សម្លៀកបំពាក់អនឡាញ ត្រូវបានចាប់ខ្លួនកាលពីខែមេសា ឆ្នាំ២០២១ ក្នុងពេលតវ៉ាទាមទារកំណែទម្រង់ព្រះមហាក្សត្រ ក៏ដូចជាផ្តួចផ្តើមគំនិតឱ្យមានការលុបចោលច្បាប់ប្រមាថព្រះមហាក្សត្រកាលពីឆ្នាំ២០២០-២០២១។

គួរបញ្ជាក់ដែរថា ប្រទេសថៃ ជាប្រទេសដែលមានច្បាប់ស្តីពីការប្រមាថព្រះមហាក្សត្រតឹងរ៉ឹងបំផុតក្នុងពិភពលោក។ បន្ទាប់ពីចលនាតវ៉ាឆ្នាំ ២០២០ ប្រទេសនេះរឹតបន្តឹងច្បាប់ប្រមាថព្រះមហាក្សត្រ និងបង្កើនការដោះស្រាយអ្នកបំពាន។ អាជ្ញាធរថៃបានកាត់ទោសសកម្មជនចំនួន ២៥០ នាក់ពីបទរំលោភលើមាត្រា ១១២ និងដាក់គុកមេដឹកនាំចលនាជាច្រើនរួមទាំងមេធាវីសិទ្ធិមនុស្ស Anon Numpa ផងដែរ៕