បរទេស៖ ថ្មីៗនេះ Instagram បានបញ្ចេញមុខងារថ្មីមួយដែលមានឈ្មោះថា Nighttime Nude ដែលជាកម្មវិធីផ្ញើសាររំខានដើម្បីដាស់តឿនមនុស្សអាយុក្រោម ១៨ ឱ្យផ្អាកលេងទូរស័ព្ទនៅពេលយប់និងបិទកម្មវិធីហើយចូលគេង។

ក្រុមហ៊ុន Meta ដែលជាក្រុមហ៊ុនមេរបស់ Facebook និង Instagram បានប្រកាសកាលពីថ្ងៃទី១៨ ខែមករាថា កម្មវិធី IG នឹងមានមុខងារថ្មីមួយដំណើរការដោយស្វ័យប្រវត្តិ ដែលកម្មវិធីនេះមានសម្រាប់តែអ្នកអាយុក្រោម ១៨ ឆ្នាំប៉ុណ្ណោះ។ សម្រាប់ក្មេងជំទង់ណាដែលប្រើប្រាស់កម្មវិធី IG នៅពេលយប់ កម្មវិធីនេះនឹងផ្ញើសាររំខានដែលវែងជាង ១០ នាទី ដើម្បីរំលឹកដាស់តឿនឱ្យក្មេងជំទង់បិទកម្មវិធី IG ហើយចូលគេងឱ្យបានគ្រប់គ្រាន់។

ក្រុមហ៊ុនបាននិយាយ គោលបំណងដែលពួកគេបង្កើតកម្មវិធីនេះមក គឺដើម្បីឱ្យអ្នកប្រើប្រាស់របស់ខ្លួន ជាពិសេសក្មេងជំទង់ឱ្យនៅឆ្ងាយពីការប្រើប្រាស់ Instagram ហើយសម្រាក ក៏ដូចជារំលឹកដាស់តឿនថាពេលគេងគឺសំខាន់ណាស់សម្រាប់មនុស្សវ័យក្មេង។ នេះក៏ជាលក្ខណៈពិសេសមួយរបស់វាដែលអនុញ្ញាតឱ្យអ្នកប្រើចាកចេញពីកម្មវិធី និងមិនត្រូវបានរំខានដោយជីវិតឌីជីថល។ លើសពីនេះ វាក៏មានមុខងារ Take a Brake និង Quiet Mode ដែលត្រូវបានរចនាឡើងដើម្បីធ្វើឱ្យកម្មវិធីកាន់តែសម្របខ្លួនទៅនឹងជីវិតពិតផងដែរ។

គួរបញ្ជាក់ដែរថា Instagram គឺជាកម្មវិធីដ៏ល្បីល្បាញមួយដែលមានមនុស្សជាច្រើនជ្រើសរើសប្រើ រួមទាំងក្មេងជំទង់ផងដែរ។ ដូច្នេះហើយកម្មវិធីនេះនឹងជួយឱ្យមនុស្សវ័យជំទង់ខិតខំរៀនសូត្រ ប្រើប្រាស់ជីវិតរបស់ពួកគេឱ្យធ្វើសកម្មភាពផ្សេងទៀត ក៏ដូចជាមានពេលវេលាគ្រប់គ្រាន់នៅជាមួយគ្រួសារ រួមទាំងជួយឱ្យយុវវ័យសម្រាកឱ្យបានគ្រប់គ្រាន់ និងគេងលក់ស្រួលទៀតផង៕

ប្រទេសជប៉ុន៖ បន្ទាប់ពីបរាជ័យអស់ជាច្រើនដង ជប៉ុននៅតែមិនបោះបង់ក្តីស្រមៃខ្លួនឡើយ នៅទីបំផុតយានអវកាសជប៉ុនក៏បានចុះចតដោយជោគជ័យនៅលើឋានព្រះច័ន្ទពិតប្រាកដមែន។ នេះបើយោងតាមទីភ្នាក់ងាររុករកអវកាសជប៉ុន(JAXA) ដែលទើបតែបានប្រកាសថា យាន Smart Lunar Survey Lander (SLIM) របស់ប្រទេសនេះ បានចុះចតដោយជោគជ័យលើផ្ទៃព្រះច័ន្ទនៅម៉ោង ១០:២០ នាទីព្រឹក កាលពីថ្ងៃទី១៩ ខែមករា ឆ្នាំ២០២៤ ដែលនេះគឺជាពេលវេលាប្រវត្តិសាស្ត្រមួយ សម្គាល់ថាជប៉ុនក្លាយជាប្រទេសទី ៥ នៅលើលោក ដែលអាចបញ្ជូនយានអវកាសទៅកាន់ឋានព្រះច័ន្ទដោយជោគជ័យ។

ប្រធាន JAXA លោក Hiroshi Yamakawa បានបញ្ជាក់ថា កប៉ាល់អាចបញ្ជូនសញ្ញាបន្ទាប់ពីចុះចត។ លោកបាននិយាយថា៖ «ខ្ញុំជឿថានេះជាជំហានដ៏ធំមួយទៅមុខ ទោះយ៉ាងណាក៏ដោយ វាក៏មានបញ្ហាបន្តិចបន្តួចផងដែរទាក់ទងនឹងបន្ទះស្រូបពន្លឺព្រះអាទិត្យ ដូច្នេះប្រតិបត្តិការគឺស្ថិតនៅក្នុងរបៀបសន្សំថ្ម។ បច្ចុប្បន្ននេះ ប៉ារ៉ាម៉ែត្រកំពុងបន្តវាយតម្លៃដោយអ្នកជំនាញ ដើម្បីមើលថាតើពួកគេបានចុះចតនៅទីតាំងត្រឹមត្រូវដូចដែលបានកំណត់ក្នុងផែនការដើមដែរឬទេ។

ទោះជាយ៉ាងណា យានអវកាស SLIM (Smart Lander for Investigating Moon) នៅតែចុះចតដោយមានកំហុស ១០០ ម៉ែត្រ ប៉ុន្តែវាត្រឹមត្រូវជាងយានអវកាសមុនៗដែលមានកំហុសចាប់ពីពីរបីគីឡូម៉ែត្រទៅច្រើនពាន់គីឡូម៉ែត្រ ដោយ SLIM មានបំណងច្បាស់លាស់ក្នុងការចុះចត។

JAXA សង្ឃឹមថាព្រឹត្តិការណ៍នេះនឹងបង្កើតការផ្លាស់ប្តូរដោយជោគជ័យពី “ការចុះចតនៅកន្លែងដែលអាចធ្វើទៅបាន” ទៅ “ចុះចតនៅកន្លែងដែលចង់បាន” សម្រាប់បេសកកម្មរុករកឋានព្រះច័ន្ទនាពេលអនាគត។
គួរបញ្ជាក់ដែរថាយានអវកាស SLIM ត្រូវបានបាញ់បង្ហោះដោយរ៉ុក្កែត H2A នៅថ្ងៃទី ៧ ខែកញ្ញា ឆ្នាំ ២០២៣ ពីមជ្ឈមណ្ឌលអវកាស Tanegashima ក្នុងខេត្ត Kagoshima ភាគនិរតីប្រទេសជប៉ុន៕

កូរ៉េខាងត្បូង៖ រោងចក្រដំបូងបង្អស់របស់កូរ៉េបានកំពុងចាប់ផ្តើមអភិវឌ្ឍបច្ចេកវិទ្យាដើម្បីរួមបញ្ចូលគ្នាលុបបំបាត់ឧស្ម័នកាបូនិកចំនួន ៥០,០០០ តោនក្នុងមួយឆ្នាំ និងផលិតទឹកសាបពីទឹកប្រៃដែលនឹងត្រូវបានសាងសង់ក្នុងពេលឆាប់ៗនេះនៅសួនឧស្សាហកម្ម Daesan ។

ការផលិតទឹកសាបពីទឹកប្រៃដំបូងបង្អស់របស់កូរ៉េមានគោលបំណងសម្អាតការបំពុលមួយចំនួនពីមជ្ឈមណ្ឌលដ៏ធំសម្រាប់ផលិតកម្មគីមីឥន្ធនៈ ពីលើការផ្គត់ផ្គង់ទឹកសាបដល់ឧស្សាហកម្មធុនធ្ងន់នៅក្នុងតំបន់។ នេះបើយោងតាម The Verge ដែលបានចុះផ្សាយកាលពីថ្ងៃទី១៨ ខែមករា ឆ្នាំ២០២៤។

ដើម្បីផលិតទឹកសាបពីទឹកប្រៃបាន អ្នកជំនាញកំពុងព្យាយាមបង្កើតវិធីសាស្រ្តដើម្បីជួយចាប់យកកាបូន កាត់បន្ថយបរិមាណកាបូនដែលនឹងបញ្ចេញទៅក្នុងបរិយាកាស ដែលគេរំពឹងថានឹងជួយយកឧស្ម័ន CO2 ចេញបាន ៥០,០០០ តោនក្នុងមួយឆ្នាំ រួមទាំងច្រោះទឹកអំបិលក្នុងពេលតែមួយ។ ដូច្នេះក្នុងអំឡុងពេលប្រតិបត្តិការក្រុមហ៊ុន DAC អាចផលិតទឹកសាបជាអនុផល ដោយហេតុនេះ រោងចក្រផលិតទឹកសាបពីទឹកប្រៃនៅក្នុងសួនឧស្សាហកម្ម Daesan នឹងរួមចំណែក ៤០% នៃទិន្នផលគីមីឥន្ធនៈរបស់ប្រទេសកូរ៉េ។

គ្រោះរាំងស្ងួតក្នុងប៉ុន្មានឆ្នាំថ្មីៗនេះ បាននាំឱ្យមានការខ្វះខាតទឹកយ៉ាងធ្ងន់ធ្ងរនៅក្នុងតំបន់ និងបង្ខំឱ្យពឹងផ្អែកលើប្រភពទឹកខាងក្រៅ។ ក្រុមហ៊ុនទឹកកូរ៉េ K-water កំពុងសាងសង់រោងចក្រផលិតទឹកស្អាត ដើម្បីបំពេញតម្រូវការទឹក។ ទោះជាយ៉ាងណា ក្នុងនាមជាមជ្ឈមណ្ឌលគីមីឥន្ធនៈ ក្រុមហ៊ុន នឹងបញ្ចេញឧស្ម័នកាបូនិករហូតដល់ ១៧ លានតោនជារៀងរាល់ឆ្នាំ។ ដូច្នេះបច្ចេកវិទ្យា DAC របស់ Capture6 នឹងផ្តល់ឱកាសដើម្បីដោះស្រាយបញ្ហាទាំងពីរក្នុងពេលដំណាលគ្នា។

Capture6 ក៏សង្ឃឹមថានឹងដោះស្រាយបញ្ហាបរិស្ថានអំពីរោងចក្រ desalination ។ ជាធម្មតា ដំណើរការ desalination បង្កើត brine ប្រមូលផ្តុំ ដែលបង្កគ្រោះថ្នាក់ដល់ប្រព័ន្ធអេកូឡូស៊ី នៅពេលបញ្ចេញទៅក្នុងសមុទ្រ។ Capture6 គ្រោងនឹងប្រើប្រាស់ brine ប្រមូលផ្តុំដើម្បីបង្កើតសារធាតុគីមីដូចជា hydrochloric acid និង calcium carbonate ដែលចាំបាច់សម្រាប់សកម្មភាពឧស្សាហកម្មជាច្រើននៅក្នុងប្រទេសកូរ៉េ។ មុននោះ ពួកវាត្រូវបានផលិតជាញឹកញាប់ដោយប្រើឥន្ធនៈហ្វូស៊ីល ហើយនាំចូលមកប្រទេសកូរ៉េ។ តាមរយៈការផលិតវានៅក្នុងស្រុកពីកាកសំណល់នៃដំណើរការមួយផ្សេងទៀត Capture6 នឹងជួយកាត់បន្ថយផលប៉ះពាល់បរិស្ថាននៃសកម្មភាពឧស្សាហកម្មនៅក្នុងតំបន់ជាច្រើន៕

ដំណឹងនៃការរៀបអភិសេករបស់ព្រះអង្គម្ចាស់ម៉ាទីន បានធ្វើឲ្យនារីៗមួយផែនដីខូចចិត្តមិនស្ទើរនោះទេ ព្រោះថាទ្រង់ជាបុរសដែលមានមន្តស្នេហ៍ អង់អាច ក្លាហាន មានសមត្ថភាព ព្រមទាំងជាកូនស្តេចដែលមានឥទ្ធិពលក្នុងតំបន់ និងជាប់ឈ្មោះក្នុងចំណោមមហាសេដ្ឋីពិភពលោកទៀតផង។

ព្រះអង្គម្ចាស់ អាប់ឌុល ម៉ាទីន ដែលត្រូវជារាជទាយាទស្នងរាជបល្ល័ងវេនទី៦នៃខ្សែរាជវង្សប្រទេសព្រុយណេ កាលពីពេលថ្មីៗនេះគឺបានប្រារព្ធពិធីរៀបអភិសេកជាមួយនារីសាមញ្ញជនម្នាក់។ ពិធីរៀបអភិសេករបស់ទ្រង់បានរៀបចំឡើងយ៉ាងអធិកអធមរយៈពេល១០ថ្ងៃជាប់ៗគ្នា គឺចាប់ពីថ្ងៃទី៧ ដល់ ថ្ងៃទី១៦ ខែមករា ឆ្នាំ២០២៤នេះ។

រយៈពេល២ថ្ងៃបន្ទាប់អភិសេករួច យោងទៅលើគណនីផ្លូវការរបស់ព្រះអង្គម្ចាស់អាប់ឌុល ម៉ាទីន ដែលបានដាក់បង្ហោះសារមួយឃ្លានៅលើបណ្តាញសង្គមអមជាមួយនឹងរូបថតមួយសន្លឹកដោយសរសេរថា «ខ្ញុំសញ្ជឹងគិតយ៉ាងច្បាស់ហើយចំពោះបេសកម្មស្វែងរកប្រពន្ធម្នាក់ទៀតរបស់ខ្ញុំ ដែលនាងគឺត្រូវតែជានារីដែលខ្ញុំស្រលាញ់ចេញពីដួងចិត្តប៉ុណ្ណោះ មិនមែនឪពុកម្តាយខ្ញុំជ្រើសរើសឲ្យនោះទេ។ មនោសញ្ចេតនាខ្ញុំនឹងពិសោធន៍សេ្នហាពិតដោយខ្លួនឯង ហើយខ្ញុំសង្ឃឹមយ៉ាងមុតមាំថា នារីម្នាក់នោះគឺមកពីប្រទេសមាឡេស៊ី»។

តាមរយៈការបង្ហោះរបស់ព្រះអង្គ គឺបានធ្វើឲ្យមនុស្សជាច្រើនសន្និដ្ឋានថាពិធីអភិសេកមុននេះ គឺជាការផ្សំផ្គុំ ដែលចាស់ទុំរៀបចំឲ្យប៉ុណ្ណោះ អាចនឹងមិនបានស្រលាញ់គ្នាពិតប្រាកដនោះទេ។ ប៉ុន្តែយ៉ាងណាក៏ដោយ ទ្រង់ទាំង២ក៏បានសេពគប់មើលចិត្តគ្នាអស់រយៈច្រើនឆ្នាំដែរហើយ មុននឹងឈានដល់ពិធីអភិសេកនេះ។ ខណៈអ្នកខ្លះទៀតបានលើកថា ដោយហេតុថាព្រះអង្គម្ចាស់មាទីន គឺជាអ្នកកាន់សាសនាឥស្លាមមួយរូបដែរ ហើយតាមទំនៀមទម្លាប់ឥស្លាម បុរសគឺអាចយកប្រពន្ធបានដល់ទៅ៤នាក់ឯណ្ណោះ។ ដូច្នេះ វាមិនប្លែកនោះទេដែលទ្រង់មានព្រះទ័យចង់យកព្រះជាយាបន្ថែមប៉ុន្មាននាក់ទៀតក៏បាន។

យ៉ាងណាមិញ កូនក្រមុំដែលជាសាមញ្ញជនម្នាក់នេះគឺមានឈ្មោះហៅថា អានីសា ក៏នូវតែជាប្រធានបទក្តៅពេញបណ្តាញសង្គមអ៊ីនធើណែត ខណៈដែលមានទាំងអ្នកពេញចិត្តនិងមិនពេញចិត្តទៅលើរូបនាង រហូតដល់លេចឡើងនូវពាក្យចចាមរាមមួយចំនួនថាថ្លៃបណ្តាការដែលនាងទទួលបានពីព្រះអង្គម្ចាស់ម៉ាទីនត្រឹមតែ ១០០០ដុល្លារព្រុយណេ ប្រមាណនឹង ៧៤៥ ដុល្លារអាមេរិកប៉ុណ្ណោះ៕

ប្រទេសចិន៖ កាលពីថ្ងៃទី១៩ ខែមករា ឆ្នាំ២០២៤ មន្ត្រីក្រសួងឧស្សាហកម្ម និងបច្ចេកវិទ្យាព័ត៌មាន (MIIT) បាននិយាយថា ប្រទេសចិនបាននាំចេញរថយន្តសរុបចំនួន ៤.៩១ លានគ្រឿងក្នុងឆ្នាំ ២០២៣ ដែលរំពឹងថានឹងក្លាយជាក្រុមហ៊ុននាំចេញរថយន្តដ៏ធំបំផុតរបស់ពិភពលោកនៅឆ្នាំ ២០២៤ នេះ។
យោងតាម Xinhua បានឱ្យដឹងទៀតថា បច្ចុប្បន្នការនាំចេញរថយន្តបានឈានដល់កម្រិតថ្មីមួយ ហើយរថយន្តថាមពលថ្មីដែលផលិតដោយប្រទេសចិន បានផ្តល់ជម្រើសចម្រុះសម្រាប់អ្នកប្រើប្រាស់ទូទាំងពិភពលោក។

អនុរដ្ឋមន្ត្រី Xin Guobin បាននិយាយថា ការនាំចេញរថយន្តរបស់ប្រទេសចិនបានកើនឡើង ៥៧.៩ ភាគរយកាលពីឆ្នាំមុន ជាមួយនឹងការនាំចេញរថយន្តថាមពលថ្មីបានកើនឡើង ៧៧.៦ ភាគរយពីមួយឆ្នាំទៅមួយឆ្នាំដល់ ១.២ លានគ្រឿង។ ដូច្នេះទិសដៅនាំចេញរថយន្តសំខាន់ៗរបស់ប្រទេសចិនរួមមានអឺរ៉ុបខាងលិច និងខាងត្បូង អាស៊ីអាគ្នេយ៍ ជាពិសេសបែលហ្ស៊ិក អេស្ប៉ាញ ចក្រភពអង់គ្លេស និងប្រទេសថៃ។

លោក Xin បានគូសបញ្ជាក់ថា ការផលិតរថយន្តគឺជាឧស្សាហកម្មសសរស្តម្ភដ៏សំខាន់សម្រាប់ប្រទេសចិន ដោយនិយាយថា មានចំណុចភ្លឺជាច្រើននៅក្នុងវិស័យនេះកាលពីឆ្នាំមុន។ លោកបាននិយាយទៀតថា ផលិតផលនេះគឺប្រកបដោយភាពច្នៃប្រឌិត ជាពិសេសផលិតផល NEV ត្រូវបានដាក់ចេញ ហើយក្លាយជាការពេញនិយមនៅលើប្រព័ន្ធផ្សព្វផ្សាយសង្គម។

គួរបញ្ជាក់ដែរថា ទិន្នន័យឧស្សាហកម្មនៅដើមខែនេះបានបង្ហាញថា ទិន្នផលរថយន្ត និងការលក់របស់ប្រទេសចិនទាំងពីរបានឆ្លងផុតកម្រិត ៣០ លានក្នុងឆ្នាំ ២០២៣ ដោយរក្សាបានតំណែងកំពូលក្នុងពិភពលោករយៈពេល ១៥ ឆ្នាំជាប់ៗគ្នា។ សម្រាប់ឆ្នាំ ២០២៤ វិញសមាគមឧស្សាហកម្មបានប៉ាន់ប្រមាណថាទាំងទិន្នផល និងការលក់រថយន្តរបស់ប្រទេសចិនត្រូវបានព្យាករណ៍ថានឹងកើនឡើង ៣ ភាគរយពីមួយឆ្នាំទៅមួយឆ្នាំដល់ ៣១ លានគ្រឿង ខណៈដែលរថយន្តអគ្គិសនីទំនើប NEVs ទំនងជាកើនឡើង ២០ ភាគរយនៅឆ្នាំនេះ៕