ប្រទេសថៃ ៖ មហាជនថៃបានផ្ទុះការរិះគន់នារីស្រស់ស្អាតម្នាក់ដើរថតសែលហ្វីពេញផ្លូវ និងមិនខ្លាចរថយន្តបុក ខណៈឪពុករបស់នាង គឺជាអតីតមន្ត្រីយោធាមានមុខមាត់ម្នាក់នៅក្នុងសង្គម ។ ការរិះគន់លើរូបនាង មិនមែនជាលើកដំបូងទេ ពីព្រោះកាលពីពេលមុននេះ មហាជនថៃធ្លាប់បានរិះគន់នាងរួចហើយ ។

ទំព័រហ្វេសប៊ុកឈ្មោះ Red Skull បានបង្ហោះពីនារីខាងលើកំពុងដើរកាន់ដងសែលហ្វីនៅតាមផ្លូវ និងគ្មានខ្លាចរថយន្តបុកបន្តិចឡើយ ។ ទំព័រហ្វេសប៊ុកនេះសរសេរថា ៖ «សួស្តីចាស! មិនប្រាកដចិត្តថា តើអាចធ្វើបែបនេះបានមែនទេ សម្រាប់ការថតរូប? អ្នកនៅក្នុងរូបមានឈ្មោះល្បីល្បាញណាស់ ប្រសិនបើយុវជនបានឃើញហើយ ពួកគេនឹងធ្វើតាម រួចបង្ហោះក្នុង TikTok នោះ វាមិនល្អទេ ។ រីឯម្ចាស់រូបបានសរសេរឆ្លើយតបក្នុង Comments ថា ចេះតែដើរទៅ ហើយអ្នកបើកបរនៅតាមផ្លូវនឹងឈប់ឱ្យនាងដោយខ្លួនឯង ។ នារីរូបនេះមានឈ្មោះបោះសំឡេងខ្លាំងណាស់នៅក្នុង Social ហើយបើមានគ្រោះថ្នាក់នោះ នឹងកាន់តែធ្ងន់ធ្ងរថែមទៀត» ។

ក្រោយពីការបង្ហោះបែបនេះ ធ្វើឱ្យមហាជនថៃចូលមករិះគន់យ៉ាងច្រើន ដោយពួកគេនិយាយថា នារីម្នាក់នេះជាបុគ្គលមានឈ្មោះល្បីល្បាញក្នុងសង្គម ហើយចំនួនអ្នកតាមដាននាងនៅលើ Instagram ជិត១សែននាក់ឯណោះ ។ លើសពីនេះ នាងជាកូនស្រីពៅរបស់អតីតមន្ត្រីយោធាមានមុខមាត់ម្នាក់ ។ ហេតុនេះ ធ្វើឱ្យមហាជនរិះគន់នាងយ៉ាងខ្លាំងពីភាពសាកសម និងសុវត្ថិភាពនៅតាមផ្លូវ ព្រោះខ្លាចមានអ្នកធ្វើតាម ។

ជនជាតិថៃម្នាក់និយាយថា ៖ «នៅពេលដើរឆ្លងកាត់ផ្លូវថ្នល់តាមរូបគំនូសថ្មើរជើង នៅតែត្រូវរថយន្តបុកស្លាប់ជាច្រើននាក់ ហើយនេះដើរថតរូបនៅកណ្តាលផ្លូវដែលមានរថយន្តបើកបរទៀត» ។

ជនជាតិថៃម្នាក់ទៀតថា ៖ «ដើរមិនប្រយ័ត្នរថយន្តសោះ ឬគិតថាខ្លួនឯងមានឈ្មោះល្បី ទើបធ្វើយ៉ាងម៉េចក៏បាន មែនទេ? បើល្បីមែន រឹតតែពុំគួរធ្វើបែបនេះ ។ គួរតែធ្វើជាគំរូល្អដល់អ្នកដទៃ មិនមែនចង់ធ្វើអ្វី ធ្វើស្រេចតែចិត្តទេ ព្រោះគ្រោះថ្នាក់អាចកើតឡើងគ្រប់ពេលវេលា ហើយបើនៅលើផ្លូវបែបនេះទៀត វាកាន់តែមានគ្រោះថ្នាក់ខ្លាំង» ។

ជនជាតិថៃម្នាក់ទៀតថា ៖ «តើនារីរូបនេះជាអ្នកណា? អូ! នាងជាកូនមន្ត្រីយោធាមានឋានៈខ្ពង់ខ្ពស់ ទើបនាងហ៊ានធ្វើបែបនេះ» ។ ជនជាតិថៃម្នាក់ទៀតថា ៖ «មិនល្អសោះ បើអ្នកណាមិនបានមើលនាង ឬទាន់ហ្វ្រាំងមិនទាន់ ហើយបុកនាងនោះ គឺខុសអ្នកបុកទៀត, ឈឺខ្លួន និងខាតពេលវេលាព្យាបាល តើកំពុងតែគិតអ្វីហ្នឹង?» ។

ជនជាតិថៃម្នាក់ទៀតថា ៖ «បើមានមនុស្សដើរបែបនេះ ហើយត្រូវឡានបុកនោះ ការពិត ឡានអត់ខុសទេ តែមនុស្សជាអ្នកខុស ព្រោះមកដើរនៅលើផ្លូវដែលមិនមែនជាផ្លូវថ្មើរជើង ។ រីឯម្ចាស់រថយន្តអាចប្តឹងអ្នកដើរពីបទរំលោភច្បាប់ផងដែរ ។ ប៉ុន្តែរថយន្ត និងមនុស្ស គឺរថយន្តមានឱកាសឈ្នះតិចណាស់ ហើយបើអ្នកដើរមានឋានៈខ្ពង់ខ្ពស់ទៀត វានឹងកាន់តែពិបាក» ៕

ប្រទេសថៃ ៖ មន្ទីរពាណិជ្ជកម្មខេត្តស៊ីសាកេត ប្រទេសថៃ បានអញ្ជើញបងប្អូនរស់នៅខេត្តស៊ីសាកេត និងខេត្តនៅជាប់គ្នា មកចូលរួមគាំទ្រកម្មវិធីពិព័រណ៍ផលិតផលមិត្តភាពកម្ពុជា-ថៃ នៅខេត្តស៊ីសាកេត ដែលសុទ្ធតែជាផលិតផលល្បីល្បាញប្រចាំខេត្តស៊ីសាកេត និងផលិតផលល្បីៗរបស់ប្រទេសកម្ពុជា ។

ផលិតផលទាំងនេះនឹងដាក់តាំងបង្ហាញនៅក្នុងកម្មវិធីពិព័រណ៍ផលិតផល «Sisaket Trade Fair 2024»
-ប្រព្រឹត្តទៅចាប់ពីថ្ងៃទី៣០ ខែមករា រហូតដល់ថ្ងៃទី៣ ខែកុម្ភៈ ឆ្នាំ២០២៤
-ចាប់ពីម៉ោង១០:០០ រហូតដល់ម៉ោង២០:០០នាទី
-នៅមុខសាលាខេត្តស៊ីសាកេត

កម្មវិធីពិព័រណ៍ផលិតផលនេះ នឹងមានការរៀបចំកម្មវិធីជាច្រើន ដូចជា ៖
-កម្មវិធីបង្ហាញផលិតផលពីក្រុមហ៊ុនផលិត, សហគ្រិន ស្របតាមស្តង់ដារ GI GAP, ផលិតផល Organic និងផលិតផលជាច្រើនទៀត ចំនួនជាង១០០ស្តង់
-កម្មវិធីចរចា និងចាប់ដៃគូជាមួយក្រុមហ៊ុនអាជីវកម្ម
-កម្មវិធីផលិតផលនាទីមាស គឺការទិញផលិតផលក្នុងកម្មវិធីនេះនឹងទទួលបានមាស និងសម្ភារៈអគ្គិសនី ជារៀងរាល់ថ្ងៃ ។

នៅថ្ងៃពិសេសចុងក្រោយរបស់កម្មវិធីពិព័រណ៍ផលិតផល អ្នកដែលបានមកចូលរួមនឹងទទួលបានខ្សែកមាស ដែលមានតម្លៃជាង៣ម៉ឺនបាត ។ ក្រៅពីនេះ អ្នកចូលរួមនឹងបានជួបជាមួយតារាសម្តែង និងតារាចម្រៀងល្បីៗប្រចាំប្រទេសថៃ ដូចជា ៖

-ថ្ងៃទី៣០ ខែមករា ជួបជាមួយ អ្នកនាង អឺនខាវ៉ាន់ វររ៉ាន់យ៉ា
-ថ្ងៃទី៣១ ខែមករា ជួបជាមួយ អ្នកនាង ថាន់វ៉ា អាសាយ៉ាម
-ថ្ងៃទី១ ខែកុម្ភៈ ជួបជាមួយ លោក ផៃ ផុងសាថន
-ថ្ងៃទី២ ខែកុម្ភៈ ជួបជាមួយ លោក សាន សានស៊ីង
-ថ្ងៃទី៣ ខែកុម្ភៈ ជួបជាមួយ លោក តៅ ភូស៊ីន

កុំភ្លេចណា! ១ឆ្នាំ មានតែម្តងទេ មកជួបគ្នានៅក្នុងកម្មវិធីពិព័រណ៍ផលិតផល «Sisaket Trade Fair 2024» ណាបងប្អូន ៕

កាមេរ៉ា ដែលលាក់ជាធម្មតាមានទំហំតូចណាស់ ហើយអាចលាក់ទុកនៅក្នុងបន្ទប់សណ្ឋាគារ ឬផ្ទះសំណាក់សូម្បីតែរន្ធតូចមួយនៅក្នុងជញ្ជាំងក៏ដោយ។ នៅពេលដែលយើងទៅដើរលេង ឬទៅទស្សនាកន្លែងនានា ពិតណាស់ប្រាកដជាត្រូវជួលបន្ទប់សណ្ឋាគារ ឬបន្ទប់ក្នុងផ្ទះសំណាក់ដើម្បីសម្រាក ប៉ុន្តែយើងមិនដឹងទេថា តើបន្ទប់ទាំងនោះមានបង្កប់កាមេរ៉ាដែរ ឬយ៉ាងណា? ដូច្នេះដើម្បីការពារ ក៏ដូចជាស្វែងរកកាមេរ៉ាដែលលាក់នៅក្នុងសណ្ឋាគារ ឬផ្ទះសំណាក់ អ្នកជំនាញបានណែនាំវិធី ៤ យ៉ាងដូចខាងក្រោម៖

១.ប្រើភ្នែកទទេ៖ ដំបូង អ្នកជំនាញប្រើភ្នែករបស់ពួកគេដើម្បីស្វែងរកកាមេរ៉ាដែលលាក់នៅក្នុងទីតាំងដែលទំនងជាត្រូវបានដំឡើង ដូចជានាឡិការោទិ៍លើតុ ព្រីភ្លើង និងភ្លើងអគ្គិសនីជាដើម។ នៅពេលនោះអ្នកជំនាញបានមើលជុំវិញបន្ទប់ ដោយដំបូងឡើយឃើញថាគ្មានអ្វីចម្លែកទេ។ ក្រោយការស្រាវជ្រាវអស់ ២០ នាទី គាត់ក៏បានរកឃើញកាមេរ៉ាមួយជាប់ក្នុងនាឡិកា ព្រោះនាឡិកាបង្ហាញម៉ោងខុស។

២.ប្រើទូរស័ព្ទដៃ៖ អ្នកជំនាញបានទាញយកកម្មវិធីមួយដែលមានឈ្មោះថា Fing ដែលកម្មវិធីនេះ អាចជូនដំណឹងថាមានកាមេរ៉ាលាក់នៅក្នុងបន្ទប់ ឬមិនមាន ប៉ុន្តែមិនអាចបង្ហាញទីតាំងបានទេ។ ដូច្នេះអ្នកជំនាញបានបើកពិលទូរស័ព្ទរួចរកមើលជុំវិញបន្ទប់ គាត់ក៏បានរកឃើញកាមេរ៉ាចំនួន ៣ ដែលលាក់នៅក្នុងឧបករណ៍ដំឡើង wifi និងបង្កប់នៅក្នុងភ្នែករបស់តុក្កតាខ្លាឃ្មុំ។

៣.ប្រើឧបករណ៍រាវរក៖ ឧបករណ៍រាវរក ឬឧបករណ៍ចាប់ប្រេកង់នឹងរោទិ៍នៅពេលដែលដាក់វាជិតកាមេរ៉ា ប៉ុន្តែវិធីសាស្ត្រនេះមានប្រសិទ្ធភាពនៅពេលដែលកាមេរ៉ាត្រូវបានភ្ជាប់ទៅ wifi ប៉ុណ្ណោះ។ អ្នកជំនាញបាននិយាយថា “ឧបករណ៍ចាប់សញ្ញាមិនអាចរកឃើញប្រសិនបើកាមេរ៉ាប្រើកាតមេម៉ូរីដើម្បីរក្សាទុកទិន្នន័យជំនួសឱ្យការភ្ជាប់វ៉ាយហ្វាយ”។ លើសពីនេះ ឧបករណ៍រាវរកក៏បានរាយការណ៍មិនត្រឹមត្រូវពីរបីដងផងដែរ។

៤.ប្រើឧបករណ៍ចាប់កញ្ចក់៖ ឧបករណ៍នេះនឹងបញ្ចេញពន្លឺអ៊ីនហ្វ្រារ៉េដ ដែលឆ្លុះបញ្ចាំងពីកញ្ចក់កាមេរ៉ា និងបង្ហាញចំណុចក្រហម។ វាត្រូវបានដំណើរការពីចម្ងាយ ដែលអនុញ្ញាតឱ្យអ្នកជំនាញមើលឃើញកាមេរ៉ាពីទូទាំងបន្ទប់តែម្តង។ ភ្លាមនោះអ្នកជំនាញក៏បានរកឃើញកាមេរ៉ាចំនួន ១១ នៅក្នុងបន្ទប់សណ្ឋាគាររបស់គាត់ ដោយគាត់រកឃើញកាមេរ៉ានេះនៅក្នុងប្រអប់ជាលិកា សំណាញ់វ៉ាយហ្វាយ កាបូបស្បែក និងមួយទៀតក្នុងចំណោមឯកសារនៅក្រោមតុ។

គួរបញ្ជាក់ដែរថា អ្នកជំនាញបានរកឃើញកាមេរ៉ាទាំងអស់ចំនួន ១៧ ក្នុងចំណោម ២៧ បន្ទប់ដែលគាត់បានកក់នៅក្នុងសណ្ឋាគារ និងផ្ទះសំណាក។ ហេតុនេះហើយ អ្នកដែលចូលចិត្តដើរផ្សងព្រេងម្នាក់ឯងគួរតែមានការប្រុងប្រយ័ត្នឱ្យបានខ្ពស់ និងគួរតែយល់ដឹងពីរបៀបនៃការស្វែងរកកាមេរ៉ាដែលបង្កប់នៅក្នុងសណ្ឋាគារ ឬផ្ទះសំណាក់ផងដែរ៕

កូរ៉េខាងត្បូង៖ ពិធីបុណ្យស្ទូចត្រីទឹកកក នៅកូរ៉េខាងត្បូង ទាក់ទាញភ្ញៀវទេសចរ មកកំសាន្ត បានច្រើនជាង១លាននាក់ចូលរួម និងរកចំណូលជាង ៧០លានដុល្លារ ត្រឹមរយៈពេលតែ១៥ថ្ងៃប៉ុណ្ណោះ។

កាលពីថ្ងៃទី២១ ខែមករា ឆ្នាំ២០២៤ អ្នករៀបចំពិធីបុណ្យទឹកកក Hwacheon Sancheoneo បាននិយាយថា នៅក្នុងពិធីបុណ្យស្ទូចត្រីទឹកកកនោះមានអ្នកទស្សនាចំនួន ១.០២ លាននាក់បានចូលរួមក្នុងរយៈពេល ១៥ ថ្ងៃកន្លងមកនេះ ជាមួយនឹងភ្ញៀវបរទេសប្រហែល ៣៩,០០០ នាក់។

ពិធីបុណ្យប្រចាំឆ្នាំនេះចាប់ផ្តើមនៅថ្ងៃទី ៦ ខែមករា មានរយៈពេល ២៣ ថ្ងៃនៅក្នុងទីក្រុង Hwacheon ដែលជាទីក្រុងភ្នំក្នុងខេត្ត Gangwon ចម្ងាយ ៩០ គីឡូម៉ែត្រភាគឦសាននៃទីក្រុងសេអ៊ូល និងប្រហែល ២៥ គីឡូម៉ែត្រភាគខាងត្បូងនៃព្រំដែនអន្តរកូរ៉េ។ អ្នកទេសចរបានមកចាប់ត្រីសាម៉ុង Sancheoneo តាមរន្ធដែលកាត់នៅផ្ទៃទន្លេដែលកក ក្រៅពីការនេសាទត្រី salmon អ្នកទស្សនាក៏អាចស្នាក់នៅដើម្បីជិះស្គី សាកល្បងសំលៀកបំពាក់ប៉េងប៉ោង ទស្សនាស្តង់ដែលទាក់ទងនឹងវិទ្យាសាស្ត្រ លេងបាល់ទាត់ទឹកកក និងមើលការបង្ហាញវប្បធម៌រដូវរងាជាសកលជាដើម។

ដូច្នេះហើយ នៅដើមឆ្នាំ២០២៤ ទីក្រុងនេះបានបើកតំបន់រូបចម្លាក់ទឹកកកក្នុងផ្ទះ ដែលសាងសង់ឡើងដោយមានជំនួយពីអ្នកជំនាញមកពីទីក្រុង Harbin ប្រទេសចិន។ ក្រៅពីនេះក៏មានទីលានវាយកូនហ្គោលដែលមានកីឡាករមកពីប្រទេសហ្វាំងឡង់ស្លៀកពាក់ជាសាន់តាក្លូសផងដែរ។ ក្នុងឆ្នាំ ២០១១ ទីភ្នាក់ងារសារព័ត៌មាន CNN បានចុះបញ្ជីពិធីបុណ្យនេះថាជាអច្ឆរិយៈរដូវរងាមួយក្នុងចំណោម ៧ អច្ឆរិយៈនៃពិភពលោក។ នៅដើមឆ្នាំ ២០២៤ កាសែត The New York Times បានហៅព្រឹត្តិការណ៍ប្រពៃណីនៅទីក្រុង Hwacheon ថាជាពិធីបុណ្យមួយក្នុងចំណោមពិធីបុណ្យទាំង ៥ ដែលត្រូវតែទៅទស្សនានៅអាស៊ីក្នុងរដូវរងារ។

មហោស្រព Hwacheon បានធ្វើឡើងជាលើកដំបូងក្នុងឆ្នាំ ២០០៣ ហើយបានឈានដល់អ្នកទស្សនាមួយលាននាក់ក្នុងឆ្នាំ ២០០៦។ នៅឆ្នាំ ២០២៤ វិញគឺជាឆ្នាំទី ១៥ ដែលព្រឹត្តិការណ៍នេះត្រូវបានប្រារព្ធឡើង។ ដោយមន្ត្រី Hwacheon បាននិយាយថា ពិធីបុណ្យទឹកកកនេះបានអភិវឌ្ឍទៅជាក្បាលម៉ាស៊ីនសេដ្ឋកិច្ចក្នុងស្រុក ដែលបង្កើតឥទ្ធិពលសេដ្ឋកិច្ចដោយផ្ទាល់ជាង ១០០ ពាន់លានវ៉ុន (ប្រមាណ ៧៤.៩ លានដុល្លារ) ជារៀងរាល់ឆ្នាំ៕

Elon Musk គឺជាមហាសេដ្ឋីពិភពលោកដែលមានទ្រពសម្បត្តិច្រើនជាងគេបំផុតនាពេលបច្ចុប្បន្ននេះ។ គាត់គឺជាស្ថាបនិក ប្រធាននាយកប្រតិបត្តិ និង CTO នៃ SpaceX; Tesla និងក្រមហ៊ុនជាច្រើនទៀត…។ នៅក្នុងបទសម្ភាសន៍ជាមួយ The New York Time លោក Elon Musk បានចែករំលែកថា មុននឹងគាត់ក្លាយជាមហាសេដ្ឋីពិភពលោក គាត់បានអានសៀវភៅចំនួនបួនក្បាលនេះ។

១.សៀវភៅ Foundation៖ នៅក្នុងបទសម្ភាសន៍មួយ Elon Musk ធ្លាប់បាននិយាយថា ជាទូទៅគាត់ចូលចិត្តអាចសៀវភៅ Foundation ខ្លាំងណាស់។ សៀវភៅនេះគឺនិយាយអំពីវិទ្យាសាស្ត្របែបបុរាណ និងប្រឌិតដែលសរសេរដោយអ្នកនិពន្ធ Isaac Asimov គឺជាអ្នកនិពន្ធវិទ្យាសាស្ត្រដ៏អស្ចារ្យបំផុតរបស់គាត់។ រហូតមកដល់បច្ចុប្បន្ន សៀវភៅនេះមានឥទ្ធិពលយ៉ាងធំធេងលើការប្រឌិតបែបវិទ្យាសាស្ត្រតាមរយៈគំនូរចក្រភព Galactic ហើយជារឿងដែលបានបំផុសគំនិតនៃស៊េរីបុរាណផ្សេងទៀតដូចជា Dune និង Star Wars ជាដើម។

២.សៀវភៅ The Lord of the Rings៖ The Lord of the Rings គឺជាសៀវភៅដែលបានបោះពុម្ពពីឆ្នាំ ១៩៥៤-១៩៥៥ ត្រូវបានបែងចែកទៅជា ៦ សៀវភៅ ដែលនិយាយអំពីឆ្នាំដ៏អស្ចារ្យនៃ Middle-earth ក្នុងសង្រ្គាមប្រឆាំងនឹងស្តេចងងឹត Sauron នៃប្រជាជនធម្មជាតិ និងការវិលត្រឡប់មកវិញរបស់ស្តេច។ សៀវភៅនេះទទួលបានជោគជ័យយ៉ាងខ្លាំង ដែលវាត្រូវបានបង្កើតជាខ្សែភាពយន្តដែលមានឈ្មោះដូចគ្នា និងទទួលបានការគាំទ្រពីអ្នកគាំទ្រជាច្រើន ក៏ដូចជាទទួលបានពានរង្វាន់ដ៏ថ្លៃថ្នូជាច្រើនផងដែរ។

៣.សៀវភៅ The Moon Is a Harsh Mistress៖ The Moon Is a Harsh Mistress គឺជាសៀវភៅដែលនិពន្ធដោយជនជាតិអាមេរិក Robert A ប្រាប់អំពីការបះបោរនៃអាណានិគមនៅលើព្រះច័ន្ទប្រឆាំងនឹងអ្នកគ្រប់គ្រងពីផែនដី។ ប្រលោមលោកនេះបង្ហាញ និងពិភាក្សាអំពីឧត្តមគតិនៃលទ្ធិសេរីនិយម ហើយត្រូវបានគេសរសើរចំពោះការបង្ហាញដ៏ល្អឥតខ្ចោះរបស់វាអំពីសង្គមមនុស្សនាពេលអនាគតដែលស្រមៃនៅលើផែនដី និងព្រះច័ន្ទ។ នេះក៏ជាប្រភេទសៀវភៅដែល Musk ស្រឡាញ់ និងស័ក្តិសមនឹងការស្រមៃរបស់គាត់។

៤.សៀវភៅ Stranger in a Strange Land៖ គឺជាប្រលោមលោកដ៏ល្បីល្បាញរបស់អ្នកនិពន្ធជនជាតិអាមេរិក Robert A. Heinlein ដែលបានចេញផ្សាយក្នុងឆ្នាំ ១៩៦១ និង ១៩៦៦ រៀងៗខ្លួន។ Stranger in a Strange Land ប្រាប់ពីរឿងរបស់ Valentine Michael Smith ដែលកើតនៅលើភពអង្គារ និងធំឡើងដោយ Martians បានមកផែនដីកាលពីនៅក្មេង ហើយបានរកឃើញទំនាក់ទំនងរបស់គាត់ទៅនឹងការផ្លាស់ប្តូរចុងក្រោយនៃវប្បធម៌ Terran (ផែនដី)។

គួរបញ្ជាក់ដែរថា ក្នុងចំណោមការងារទាំងអស់ដែល Elon Musk កាន់កាប់និងគ្រប់គ្រងដោយជោគជ័យបំផុតនោះគឺការងារបែបវិទ្យាសាស្ត្រ។ គាត់មានក្តីសុបិន្តនៃយានអវកាស និងការធ្វើដំណើរក្នុងលំហរតាំងពីនៅក្មេងមកម្លេះ ដូច្នេះសៀវភៅដែលធ្វើឱ្យគាត់ជោគជ័យគឺសៀវភៅដែលទាក់ទងនិងវិទ្យាសា្រស្ត្រអវកាស៕

ប្រទេសថៃ ៖ កាលពីថ្ងៃទី២២ ខែមករា ឆ្នាំ២០២៤ សារព័ត៌មានថៃឈ្មោះ «ខាវឆងវ៉ាន់» រាយការណ៍ថា មានក្រុមយុវជនអាយុចាប់ពី១៣ឆ្នាំ ទៅ១៥ឆ្នាំ ប្រើប្រាស់កាំបិតដេញកាប់ភ្ញៀវទេសចរបរទេសក្នុងគោលបំណងប្លន់ប្រាក់ ។ រីឯភ្ញៀវទេសចរដែលរងនូវអំពើហិង្សាពីយុវជន គឺទើបតែបានមកកម្សាន្តនៅប្រទេសថៃត្រឹម២សប្តាហ៍ប៉ុណ្ណោះ ។

បើតាមវីដេអូឃ្លីបបង្ហាញថា ពួកយុវជនបានជិះម៉ូតូដេញកាប់ភ្ញៀវទេសចរបរទេសនៅវេលាម៉ោង៣ទៀបភ្លឺ ហើយករណីនេះមិនមែនទើបតែកើតឡើងលើកដំបូងទេ ។ ហេតុការណ៍យុវជនយកកាំបិតមកកាប់ភ្ញៀវទេសចរដើម្បីប្លន់ទ្រព្យសម្បត្តិនេះ កើតឡើងនៅតំបន់ប៉ាតាយ៉ាខាងត្បូង ។

អ្នកឃើញហេតុការណ៍លើកឡើងថា ដោយសារភ្ញៀវទេសចរបរទេសតបតវិញ ទើបយុវជនទាំងនេះយកកាំបិតដេញកាប់ ប៉ុន្តែអ្នកឃើញហេតុការណ៍បាននាំគ្នាមកជួយជនបរទេស ទើបក្រុមយុវជនរត់គេចអស់ ។ រីឯជនបរទេសបានជិះម៉ូតូដេញតាមក្រុមចោរក្មេងៗប្រកិតគ្នា ហើយសមត្ថកិច្ចប្រចាំក្រុងប៉ាតាយ៉ា ចាប់បានចោរក្មេងម្នាក់នៅតាមផ្លូវ ។ ក្រោយមក សមត្ថកិច្ចចាប់បានចោរក្មេងផ្សេងទៀត សរុបចំនួន៥នាក់ ។

សមត្ថកិច្ចបានប្រមូលវត្ថុតាងពីក្រុមចោរ ដែលពួកគេប្រើប្រាស់សម្រាប់កាប់ភ្ញៀវទេសចរបរទេស ។ តាមរយៈការសួរចម្លើយបង្ហាញថា ចោរក្មេងៗដែលមានអាយុចាប់ពី១៣ឆ្នាំ ទៅ១៥ឆ្នាំ ប្រាប់ថា ពីដំបូង ពួកគេបានជិះម៉ូតូដើរលេងនៅក្រុងប៉ាតាយ៉ា ហើយបានជួបសិស្សច្បងម្នាក់ឈ្មោះ មេច អាយុ១៧ឆ្នាំ និងម្នាក់ទៀតឈ្មោះ ប៊ិន អាយុ១៦ឆ្នាំ ហើយសិស្សច្បងទាំង២នាក់ក៏បានបបួលពួកគេប្លន់ភ្ញៀវទេសចរបរទេស ។

មុនកើតហេតុការណ៍យុវជនទាំងនេះដេញកាប់ភ្ញៀវទេសចរបរទេសខាងលើ គឺរយៈពេល១ម៉ោងមុន ពួកគេបានទើបតែធ្វើសកម្មភាពប្លន់ប្រាក់ពីភ្ញៀវទេសចរម្នាក់បានសម្រេច និងទទួលបានប្រាក់ចំនួន១.៤០០បាត ។ ក្រោយមក ពួកគេយកប្រាក់នេះមកចែកគ្នាចំនួន៧នាក់ គឺម្នាក់ៗទទួលបានប្រាក់២០០បាត ។ ប៉ុន្តែដោយសារប្រាក់តិចតួចពេក ពួកគេក៏នាំគ្នាជិះម៉ូតូប្លន់ភ្ញៀវទេសចរបរទេសបន្ថែមទៀត ហើយប្លន់មិនទាន់សម្រេចផង ស្រាប់តែភ្ញៀវទេសចរដេញតាម និងមានអ្នកនៅក្បែរនោះជួយភ្ញៀវទេសចរផងដែរ ។

សមត្ថកិច្ចលើកឡើងថា ពុំទាន់បានចោទប្រកាន់យុវជនទាំង៥នាក់នេះនៅឡើយទេ ពីព្រោះត្រូវធ្វើតាមលក្ខខណ្ឌសម្រាប់យុវជនជាមុនសិន ។ ប៉ុន្តែសមត្ថកិច្ចនឹងតាមចាប់ខ្លួនយុវជនចំនួន២នាក់ទៀតដែលបានរត់គេចខ្លួន គឺឈ្មោះ មេច និង ប៊ិន មកដាក់ទោសឱ្យបាន ។

ពលរដ្ឋលើកឡើងថា ករណីនេះបានធ្វើឱ្យខូចកេរ្តិ៍ឈ្មោះដល់ទីក្រុងទេសចរណ៍ប៉ាតាយ៉ា និងក្លាយជាទីកន្លែងគ្មានសុវត្ថិភាពសម្រាប់ភ្ញៀវទេសចរ ហើយពួកគេបានសំណូមពរឱ្យស្ថាប័នពាក់ព័ន្ធរកដំណោះស្រាយផង បើមិនដូច្នោះទេ គ្មានអ្នកណាហ៊ានមកលេងប៉ាតាយ៉ាទេ ៕