អ្នកមួយចំនួនអាចនឹងពេញចិត្តចំពោះពាក្យថា «កំពូលតារាចម្រៀង» ប៉ុន្តែយ៉ាងណាសម្រាប់ លីម តិចម៉េង មិនចំណូលជាមួយនឹងពាក្យដែលស្តាប់ទៅព្រឺសម្បុរនេះទេថែមទាំងបង្ហាញជាសាធារណៈកុំឱ្យហៅលោកបែបនេះអី។

បើនិយាយទៅដល់ឈ្មោះ លីម តិចម៉េង ទស្សនិកជននឹងនឹកដល់ថាតារាចម្រៀងរូបនេះគឺជាម្ចាស់ពានដែលមានភាពល្បីល្បាញជាងគេមានការគាំទ្រភ្លូកទឹកភ្លូកដី មានអ្នករង់ចាំទស្សនារាប់រយខេនៅលើបណ្តាញសង្គម។ ទោះបីជាសម័យកាលរបស់ខ្លួនបានបញ្ចប់ប៉ុន្តែរាល់ពេលកម្មវិធីប្រគំតន្រ្តីម្តងៗឬឱកាសផ្សេងៗ លីម តិចម៉េង តែងតែទទួលបានកាដូយ៉ាងច្រើនសន្ធឹកសន្ធាប់ពីអ្នកគាំទ្ររបស់ខ្លួន។

ងាកចេញពីសិល្បៈបន្តិចជារឿយៗ លីម តិចម៉េង បាននិយាយច្រើនពាក់ព័ន្ធនឹងបញ្ហាសង្គម កំឡុងពេលមានសង្គ្រាមជាមួយថៃ និងជារឿយៗដាស់ស្មារតីដល់យុវជនខ្មែរឱ្យប្រព្រឹត្តផ្លូវល្អជាទំពាំងល្អសម្រាប់សង្គមជាតិ។ យ៉ាងណាមិញ ទោះបីជាមានកេរ្តី៍ល្អក្នុងអាជីពតែម្ចាស់ពានរូបនេះពុំពេញចិត្តនូវពេលមានគេហៅថា «កំពូលតារាចម្រៀង» ឡើយ។

ម្ចាស់ពាន Cambodian Idol រដូវកាលទី៤បានបង្ហោះសំណេរមួយនៅលើបណ្តាញសង្គមហ្វេកប៊ុកនាថ្ងៃទី១៩ ថា «ខ្ញុំមិនមែនជា « កំពូល តារាចម្រៀង » ទេ ! សុំចិត្ត កុំហៅបែបនេះអី ! មិនមែនប្រកាន់អ្វីទេ តែស្តាប់ឮហើយរន្ធត់ចិត្តណាស់»។ សំណេរនេះដែរអ្នកគាំទ្រក៏បានចូលទៅបញ្ចេញមតិផ្សេងៗជាច្រើន។ កន្លងមកក៏មានអ្នកលេងបណ្តាញសង្គមខ្លះបានបញ្ចេញមតិប្រតិកម្មខ្លះដែរអំពីការហៅរបស់ពិធីករ ពិធីការិនី នៅក្នុងកម្មវិធីដែលហៅតារាកិត្តិយសថា កំពូលតារាចម្រៀង ។ អ្នកខ្លះបញ្ចេញមតិថាការហៅបែបនេះហាក់ដូចជាលើសបន្តិច៕

ស្នេហារវាងហ្វេនទៅកាន់អាយដលបានបង្កឱ្យមានរឿងវែងឆ្ងាយអស់ពីរឿងមួយចូលរឿងមួយរហូតដល់ តារាចម្រៀង សុខ ពិសី ត្រូវចេញមកបកស្រាយ ខណៈ កាក់ ក៏ចេញវីដេអូបន្ថែមទៀតដោយបញ្ជាក់ថាលោកនឹង សុខ ពិសី គឺមិនមានបញ្ហានឹងគ្នាឡើយរាប់អានគ្នាធម្មតាណាស់តែហ្វេនៗប៉ុណ្ណោះដែលមានការជេរប្រមាថប្រកែកគ្នាមិនចេះចប់។

នៅរសៀលថ្ងៃទី១៩ ខែកុម្ភៈ អ្នកបង្កើតមាតិកា កាក់ បានចេញវីដេអូមួយដោយនិយាយថាគ្រប់យ៉ាងសុទ្ធតែមានការយល់ច្រឡំហើយហ្វេនៗមិនគួរជេរលោក នីកូ និងដាក់បន្ទុកដល់ សុខ ពិសី នោះទេ។ កាក់ថា លោក នីកូ មិនខុសនោះទេពីព្រោះនោះគឺជាការងាររបស់គាត់ហើយលោកក៏មិនបានឈឺចិត្តស្អិតទ្រូងលើរឿងនេះដែរ ខណៈ សុខ ពិសី ក៏មិនខុសដូចគ្នាគឺគាត់មិនបានផ្តល់ក្តីសង្ឃឹមឱ្យលោកដូចគ្នាប៉ុន្តែខ្លួនលោកទៅវិញនោះទេដែលផ្តល់ក្តីសង្ឃឹមឱ្យខ្លួនឯង។

កាក់ បន្តថាតាំងពីដើមឡើយលោកមិនអាចបង្ខំ សុខ ពិសី បានទេហើយតារាចម្រៀងរូបនេះបានទុកលោកប្រៀបដូចជាប្អូនប្រុស ហើយបាននិយាយថាបើស្រលាញ់គាត់ ស្រលាញ់ឱ្យដូចជាបងស្រី។ កាក់ ថាលោកនិងសុខ ពិសី គឺធម្មតាមិនមានរឿងអ្វីត្រូវឈ្លោះគ្នាទេ ឈ្លោះតែអ្នកគាំទ្រ ហើយនៅពេលឃើញមានការឈ្លោះប្រកែកគ្នាកាប់ចាក់គ្នាក្នុងខម្មិនលោកក៏ណែនទ្រូងដូចគ្នា។ អ្នកបង្កើតមាតិការរូបនេះលើកឡើងទៀតថា មានផេកភីអ៊ីមួយចំនួនបានយកលោកទៅបង្ហោះបន្តបង្កឱ្យមានការយល់ច្រឡំហើយក៏មានការជេរប្រមាថមកកាន់លោកផងដែរ។

កាក់ បានទទួលស្គាល់ថាលោកពិតជាស្រលាញ់តារាចម្រៀង សុខ ពិសី មែនទែនមិនមែនជាការសម្តែងប៉ុន្តែគាត់មិនបានស្រលាញ់លោកគឺជារឿងគាត់ ប៉ុន្តែបែរជាគាត់ទៅជាអ្នកខុសទៅវិញដែលធ្វើឱ្យលោកជាអ្នកតាមស្រលាញ់មានអារម្មណ៍ថាខុស។ កាក់ បានស្នើសុំឱ្យហ្វេនៗកុំដាក់សម្ពាធដល់តារាចម្រៀង សុខ ពិសី ទោះបីជាគាត់ស្រលាញ់អ្នកណាក៏ដោយជារឿងរបស់គាត់៕

ម៉ាន់ វណ្ណឌី បងប្រុសរបស់តារារ៉េប ម៉ាន់ វណ្ណដា ត្រូវបានអ្នកគាំទ្រសម្លឹងឃើញថាលោកតែងតែគាំទ្រនៅក្បែរប្អូនប្រុសជានិច្ចទោះបីជាស្ថិតនៅក្នុងកាលៈទេសៈណាក៏ដោយ។ ជាក់ស្តែងថ្មីៗនេះ វណ្ណដា ក៏បានបង្ហើបចម្រៀងខ្លីថ្លែងពីជីវិតរបស់ខ្លួនជាមួយនឹងបងប្រុសសំណព្វចិត្តផងដែរ។

ឈានមកដល់ចំណុចមួយដែលខ្ពស់ដូចសព្វថ្ងៃពិតណាស់មនុស្សខ្លះក៏បានចាកចេញពី វណ្ណដា ចំណែកឯអ្នកខ្លះទៀតក៏បានចូលមកក្នុងជីវិត វណ្ណដា មានទាំងថ្មី មានទាំងចាស់ ប៉ុន្តែអ្វីដែលមិនផ្លាស់ប្តូរគឺបងប្រុសរបស់តារារ៉េបរូបនេះនៅតែគាំទ្រប្អូនប្រុសជារៀងដរាប។ ថ្មីៗនេះទស្សនិកជនមានការចាប់អារម្មណ៍ទ្វេដងបន្ទាប់ពី វណ្ណដា បានទម្លាក់វីដេអូចម្រៀងខ្លីជាមួយនឹងបងប្រុសដោយរៀបរាប់ពីអនុស្សាវរីយ៍ធាតុដើមរបស់ខ្លួនជាអ្នកកោសដូងប៉ុន្តែពេលនេះព្រេងវាសនាបានផ្លាស់ប្តូរទាំងស្រុង។

នៅយប់ថ្ងៃទី១៨ ខែកុម្ភៈ វណ្ណដា ស្រាប់តែទម្លាក់ចម្រៀងខ្លី ដោយភ្ជាប់មកជួយនឹងរូបភាពបងប្រុស ជាមួយនឹងចំណងជើងថា « BIG BROTHER, BEST BROTHER»។ នៅក្នុងចម្រៀងខ្លីនេះ វណ្ណដា បាននិយាយរៀបរាប់ថារូបគេនិងបងប្រុសស្តាប់ចម្រៀងហ៊ីបហបតាំងពីរៀនថ្នាក់ទី២ ខណៈបានរៀបរាប់ពីជីវិតផ្លាស់ប្តូរពីអ្នកកោសដូងស្រាប់តែវាសនាផ្លាស់ប្តូរលុយហូរចូលមិនឈប់ឈរ។

ការទម្លាក់ចម្រៀងខ្លីៗនេះបានធ្វើឱ្យមតិហ្វេនៗយល់ឃើញថា វណ្ណឌី គឺជាបងប្រុសល្អតែងតែគាំទ្រប្អូនប្រុសជានិច្ច បើទោះបីជាមិនសូវបង្ហាញរូបភាពនៅលើបណ្តាញសង្គមក្តី។

គួរឱ្យដឹងថា វណ្ណដា និង វណ្ណឌី ធ្លាប់បានចេញចម្រៀងជាមួយគ្នាមានចំណងជើងថា «OUT DA MUD»ក្នុងឆ្នាំ ២០២០ ខណៈបងប្រុសរបស់តារារ៉េបរូបនេះធ្លាប់បានបង្ហាញក្នុង MV មួយចំនួនដូចជាបទ «NO DISRESPECT» កាលពីឆ្នាំ២០២៥ជាដើម៕

បន្ទាប់ពីមហាជនបង្ហាញអារម្មណ៍រំភើបចិត្តមានមោទនភាពក្រោយទទួលដំណឹងថា ព្រះនាង ចេណ្ណា ចូលរួមសម្តែងខ្សែភាពយន្តចិនរបស់ IQIYI ពេលនេះទ្រង់បានចូលរួមកម្មវិធីបន្តទៀតនៅឯប្រទេសចិន។ លើសពីនេះព្រះនាង ចេណ្ណា បានបកស្រាយចម្រៀងជាភាសាចិនធ្វើឱ្យមានការចាប់អារម្មណ៍បន្ថែមទៀត។

នៅលើទំព័រហ្វេកប៊ុក ព្រះនាង ចេណ្ណា ដែលជាសិល្បការិនីមួយរូបរបស់កម្ពុជាបានបង្ហោះវីដេអូមួយដោយភ្ជាប់មកជាមួយនឹងការបញ្ជាក់ថា «នេះជាកិត្តិយសមួយ ដែលខ្ញុំបានចូលរួមសម្តែងនៅក្នុងរាត្រីដ៏មានន័យ និងពោរពេញដោយវប្បធម៌តន្ត្រី Hainan Spring Festival Gala ក្នុងខេត្តហៃណាន ប្រទេសចិន»។ ព្រះនាងបានបន្ថែមថាទ្រង់បានបកស្រាយចម្រៀងភាសាចិន «Who Doesn’t Say My Hometown Is Good» ដើម្បីបង្ហាញពីក្ដីស្រឡាញ់ និងមោទនភាពចំពោះស្រុកកំណើត។

វីដេអូមួយនេះបានទាក់ទាញការចាប់អារម្មណ៍ទស្សនិកជនយ៉ាងឆាប់រហ័សនិងបានសាយភាយនៅលើអ៊ីនធឺណិតអមដោយមតិកោតសរសើរជាច្រើន។ គួរឱ្យដឹងថា ជារឿយៗព្រះនាង ចេណ្ណា តែងតែចូលរួមកម្មវិធីនានាជាច្រើននៅឯប្រទេសចិននិងបានកសាងប្រជាប្រិយភាពមានអ្នកគាំទ្រច្រើននៅទីនោះ។ ជាក់ស្តែងកន្លងមកមានហ្វេនៗជនជាតិចិនបានជូនបាច់ផ្កាឱ្យទ្រង់នៅពេលថតកម្មវិធីចប់ផងដែរ។

មិនត្រឹមតែមានកេរ្តិ៍ឈ្មោះនិងកំពុងកសាងមុខមាត់នៅប្រទេសចិនប៉ុណ្ណោះទេទស្សនិកជនក៏រំពឹងថានាថ្ងៃអនាគត ព្រះនាងចេណ្ណា កាន់តែរីកមុខរីកមាត់នៅលើឆាកអន្តរជាតិបន្ថែមទៀតតាមរយៈទេពកោសល្យរបស់ទ្រង់។

គួរឱ្យដឹងថាបទថ្មីចុងក្រោយរបស់ ព្រះនាង ចេណ្ណា មានចំណងជើងថា «សារភាពគ្មានន័យ» ទទួលបានការគាំទ្រយ៉ាងខ្លាំងល្បីល្បាញនៅលើបណ្តាញសង្គមទិកតុកមានអ្នកចូលលេងយ៉ាងច្រើនកុះករ៕