Tzuyu ឆ្លើយតបផាំងៗក្រោយមានមតិប្រមា.ថរាងកាយនាង

ថ្មីៗនេះអ្នកប្រើប្រាស់អ៊ីនធឺណិតម្នាក់បានផ្ញើសារទៅកាន់ Tzuyu សមាជិក TWICE តាមរយៈកម្មវិធីផ្ញើសារអ្នកគាំទ្រដែលបានបង់ប្រាក់Bubbleដោយសរសេរថា «អ្នកមិនអាចស្រកខ្លាញ់នៅលើជើងរបស់អ្នកបានទេ? សូម្បីតែអ្នករាំបម្រុងក៏ស្គមជាងអ្នកដែរ»។ Tzuyu បានឆ្លើយតបដោយកំប្លែងថា «អរគុណ។ សន្សំលុយរបស់អ្នក ហើយប្រើវាសម្រាប់អ្វីដែលមានប្រយោជន៍»។

នៅពេលដែលរូបភាព Screenshot នៃសារឆ្លើយឆ្លងនេះបានបង្ហោះនៅលើអ៊ីនធឺណិតវាបានរីករាលដាលពាសប្រព័ន្ធផ្សព្វផ្សាយសង្គមហើយរលកនៃការរិះគន់បានផ្ទុះឡើងយ៉ាងឆាប់រហ័ស។ មិនត្រឹមតែ អ្នកគាំទ្រ TWICE ប៉ុណ្ណោះទេ ប៉ុន្តែអ្នកគាំទ្រ K-pop អន្តរជាតិជាទូទៅក៏បាននិយាយប្រឆាំងនឹងមតិយោបល់អវិជ្ជមានដែលតម្រង់ទៅលើ Tzuyu ផងដែរ។
មតិយោបល់នេះបានលេចចេញឡើងបន្ទាប់ពីការប្រគំតន្ត្រីរបស់ TWICE នៅថ្ងៃទី ១៥ ខែកុម្ភៈ នៅពេលដែលវីដេអូនៃការសម្តែងរបស់ Tzuyu ទទួលបានការចាប់អារម្មណ៍នៅក្រៅប្រទេស ដោយមានអ្នកគាំទ្រអន្តរជាតិមួយចំនួនសួរអំពីស្តង់ដារសម្រស់នៅក្នុងប្រទេសកូរ៉េខាងត្បូង។

នៅក្នុងវីដេអូនោះ Tzuyu បានសម្តែងដ៏មានឥទ្ធិពលមួយក្នុងឈុតខ្លីមួយគូជាមួយនឹងស្បែកជើងកវែង។ អ្នកគាំទ្រអន្តរជាតិម្នាក់បានបញ្ចេញមតិថា «ខ្ញុំពិតជាស្អប់ស្តង់ដារសម្រស់កូរ៉េណាស់។ ជើងស្ដើងមែនទេ? នោះជារឿងគួរឱ្យអស់សំណើចណាស់។ គួរតែមានតារាស្រីដូច Tzuyu បន្ថែមទៀត»។

ទស្សនៈនេះគាំទ្ររូបរាងរបស់ Tzuyu ដែលមិនស្របតាមស្តង់ដារ «ស្លីម» នៅក្នុងប្រទេសកូរ៉េខាងត្បូងទេ ប៉ុន្តែផ្ទុយទៅវិញគឺការខិតខំប្រឹងប្រែងដើម្បីរូបរាងដែលមានសុខភាពល្អ និងមានរាងស្អាត។ ហេតុការណ៍នេះបានបង្កឱ្យមានការជជែកវែកញែកម្តងទៀតក្នុងចំណោមសហគមន៍អ្នកគាំទ្រ Kpop ទូទាំងពិភពលោកអំពីស្តង់ដារតឹងរ៉ឹងនៃរូបរាងនៅក្នុងឧស្សាហកម្មកម្សាន្តកូរ៉េខាងត្បូង។

បន្ទាប់ពីការឆ្លើយតបដ៏ស្ងប់ស្ងាត់របស់ Tzuyu អ្នកទស្សនាជាច្រើនបានសម្តែងការគាំទ្ររបស់ពួកគេ។ Tzuyu កើតនៅឆ្នាំ ១៩៩៩ ជាជនជាតិតៃវ៉ាន់។ នាងជាសមាជិកក្មេងជាងគេនៃក្រុមចម្រៀង TWICE។ ចាប់តាំងពីការបង្ហាញខ្លួនលើកដំបូងរបស់នាងក្នុងឆ្នាំ ២០១៥ Tzuyu ត្រូវបានគេសរសើរថាជាសមាជិកដ៏ស្រស់ស្អាតបំផុតម្នាក់របស់ក្រុម ក៏ដូចជាក្រុមនារីដទៃទៀតនៃជំនាន់របស់នាងផងដែរ។ កាលពីខែតុលា ឆ្នាំ២០២៥ Tzuyu រួមជាមួយសមាជិកបីនាក់ផ្សេងទៀតបានសម្តែងយ៉ាងស្វាហាប់នៅក្នុងកម្មវិធី Victoria’s Secret Fashion Show 2025 នៅសហរដ្ឋអាម៉េរិក។

រូបរាងដ៏ទាក់ទាញរបស់ Tzuyu បានទាក់ទាញចំណាប់អារម្មណ៍យ៉ាងខ្លាំងនៅលើបណ្តាញសង្គម។ អាវទ្រនាប់ ដែលលក់រាយក្នុងតម្លៃ ៣៩.៩៥ ដុល្លារ ដែល Tzuyu បានពាក់នោះ បានលក់អស់ភ្លាមៗនៅលើគេហទំព័រផ្លូវការរបស់ Victoria’s Secret នៅក្នុងប្រទេសជប៉ុន ចិន សហរដ្ឋអាម៉េរិក ហ្វីលីពីន និងតំបន់ជាច្រើនទៀត៕