ថៃរងនូវភាពអាម៉ាសផ្ទួនៗ ដោយបន្ទាប់ពីសម្ដេចធិបតីបានលាតត្រដាងការពិតប្រាប់ទៅកាន់កាសែត Reuters និង Fox News ឥឡូវនេះស្រាប់តែកាសែត The New York Editorial របស់សហរដ្ឋអាមេរិកមួយទៀត បានលើកឡើងចំៗអំពីប្រទេសថៃទាក់ទងនឹងសកម្មភាពដ៏អមនុស្សធម៌ និងបំពានច្បាប់អន្តរជាតិនៅក្នុងជម្លោះព្រំដែនជាមួយកម្ពុជា ដោយការធ្វើសង្គ្រាមខុសច្បាប់អន្ថរជាតិប្រឆាំងនឹងជនស៊ីវិល។ កាសែតនេះ ថែមទាំងបានហៅប្រទេសថៃ គឺជាប្រទេសមួយដែលបានបំផ្លាញសន្តិសុខក្នុងតំបន់ទាំងស្រុងទៀតផង។

យោងតាមខ្លឹមសារអត្ថបទដែលបានចេញផ្សាយនៅថ្ងៃទី២០ ខែកុម្ភៈ កាសែត The New York Editorial បានរាយការណ៍អំពីពិតជាក់ស្តែងមួយចំនួនថា ប្រទេសថៃបានរំលោភបំពានច្បាប់អន្តរជាតិយ៉ាងធ្ងន់ធ្ងរ តាមរយៈការប្រើប្រាស់កម្លាំងយោធាហួសហេតុ និងអាវុធហាមឃាត់។ តាមទិន្នន័យនេះ ប្រទេសថៃបានប្រើប្រាស់យន្តហោះចម្បាំង F-16 ដើម្បីវាយប្រហារតាមអាកាសជាការសងសឹកទៅនឹងការផ្ទុះមីនដែលបង្ករបួសដល់ទាហានម្នាក់ ដែលទង្វើនេះត្រូវបានអ្នកស៊ើបអង្កេតចាត់ទុកថាជាការឆ្លើយតបដែល ហួសហេតុបំផុត។

តាមប្រភពដដែលនេះ ប្រទេសថៃបានប្រើប្រាស់អាវុធខុសច្បាប់ ដូចជាគ្រាប់បែកចង្កោម ដែលត្រូវបានហាមឃាត់នៅក្នុងប្រទេសជាច្រើន ដោយសារតែផលប៉ះពាល់យ៉ាងធ្ងន់ធ្ងរទៅលើជនស៊ីវិល បានបង្កឱ្យក្មេងប្រុសកម្ពុជាស្លូតត្រង់អាយុ ១០ ឆ្នាំម្នាក់ នៅខេត្តព្រះវិហារបានបាត់បង់ជីវិត។ មិនតែប៉ុណ្ណោះ ថៃបានប្រើប្រាស់យុទ្ធសាស្ត្រផ្លូវចិត្ត ដោយបានចាក់សំឡេងរំខាននៅពេលយប់ម៉ោង៣ទាបភ្លឺ បង្កើតការភ័យខ្លាចដល់ពលរដ្ឋនៅក្នុងតំបន់។ ស្ថានភាពនៅកម្ពុជានៅតែធ្ងន់ធ្ងរ ដោយមានប្រជាជនកម្ពុជាជិត ៩៨.០០០ នាក់នៅតែត្រូវផ្លាស់ទីលំនៅដោយសារតែជម្លោះ។

The New York Editorial បានបង្ហាញពីការសន្និដ្ឋានចុងក្រោយរបស់ខ្លួនយ៉ាងច្បាស់ថា ទោះបីជាការបង្កឱ្យមានវិបត្តិជារឿងមិនល្អ ប៉ុន្តែការបើកការវាយប្រហារដោយខុសច្បាប់ និងការប្រើប្រាស់អាវុធហាមឃាត់លើជនស៊ីវិល គឺជាការរំលោភច្បាប់អន្តរជាតិដែលមិនអាចប្រកែកបាន។ កាសែតអន្តរជាតិមួយនេះ បានហៅសកម្មភាពដែលថៃបានប្រព្រឹត្តថាជាល្បែងនយោបាយ ដោយមានភស្តុតាងបានបង្ហាញថា រដ្ឋាភិបាលថៃបានប្រើប្រាស់បញ្ហាព្រំដែន ធ្វើជាយុទ្ធសាស្ត្រឃោសនាបោះឆ្នោត ដើម្បីទាញយកប្រជាប្រិយភាព និង ការបង្កើតវិបត្តិគឺជារឿងមិនល្អ ប៉ុន្តែការបង្កសង្គ្រាមខុសច្បាប់ប្រឆាំងនឹងជនស៊ីវិល គឺជារឿងអាក្រក់បំផុត៕

ខឹ.ងចិត្តរឿងខ្លួនឯងត្រូវអាម៉ាសមុខផង ឃើញកម្ពុជារីកមុខមាត់លើឆាកអន្តរជាតិផងមិនដឹងគួរធ្វើបែបណាសម បែរជាមកទើសរឿងភ្លើងឆេះព្រៃ! ដោយថ្មីៗនេះអ្នកនាំពាក្យកងទ័ពភូមិន្ទថៃបានចេញសេចក្ដីថ្លែងការណ៍រិះគ.ន់កម្ពុជាអំពីបញ្ហាភ្លើងឆេះព្រៃនៅតំបន់ព្រំដែន ដោយចោ.ទប្រកា.ន់ទាំងគ្មានមូលដ្ឋានថា ករណីភ្លើងឆេះទាំងនោះគឺជាការញុះញង់ ហើយព្រ.មានពីការប្រយុទ្ធគ្នាជាលើកទី៣ ថាអាចនឹងកើតមានប្រសិនបើកម្ពុជាមិនព្រមចាត់វិធានការលើបញ្ហានេះ។

យោងតាមការចុះផ្សាយរបស់សារព័ត៌មានថៃ PPTVHD 36 នៅថ្ងៃទី១៩ ខែកុម្ភៈ បានឲ្យដឹងថា លោកវីនថៃ ស៊ូវ៉ារី អ្នកនាំពាក្យកងទ័ពថៃ បានធ្វើសេចក្ដីថ្លែងការណ៍ស្ដីពីបញ្ហាជាច្រើនទាក់ទងនឹងព្រំដែនថៃ-កម្ពុជា ជាពិសេសបទសម្ភាសន៍របស់នាយករដ្ឋមន្ត្រីកម្ពុជា លោក ហ៊ុន ម៉ាណែត ជាមួយទីភ្នាក់ងារសារព័ត៌មានរ៉យទ័រ។

តាមការលើកឡើងរបស់លោក វីនថៃ៖ លោកបានទទួលរបាយការណ៍ពីយោធាថៃមកថា៖ កន្លងមក មានករណីភ្លើងឆេះព្រៃ កើតមានឡើងនៅតាមព្រំដែនរវាងកម្ពុជា-ថៃ ដែលបានបង្កជាបញ្ហាអគ្គិភ័យជាច្រើនករណី នៅតាមបន្ទាត់ព្រំដែននៃប្រទេសទាំងពីរ»។

ខណៈមិនមានការស៊ើបអង្កេតលម្អិតអំពីប្រភពនៃករណីភ្លើងឆេះព្រៃទាំងនោះច្បាស់លាស់ អ្នកនាំពាក្យរូបនេះបែរជាប្រើពាក្យសម្ដីធ្ងន់ៗបែបគំរាមមកកាន់កម្ពុជាថា៖ « ភាគីកម្ពុជាត្រូវមានចំណាត់ការគ្រប់គ្រង និងប្រុងប្រយ័ត្នឱ្យបានខ្ពស់ទៅលើបញ្ហាភ្លើងឆេះព្រៃនេះ ប្រសិនបើភាគីកម្ពុជា មិនចង់មានសង្គ្រាមជាមួយនឹងថៃជាលើកទីបី»។

ពាក្យសម្តីរបស់អ្នកនាំពាក្យកងទ័ពភូមិន្ទថៃដែលបានសង្កត់ធ្ងន់ដូចខាងលើនេះ បានគូសបញ្ជាក់ថា ប្រទេសថៃហាក់មានគំរោងជាមុនរួចហើយ ក្នុងការវាយដណ្តើមទឹកដីពីកម្ពុជាបន្ថែមទៀត។ ដូចគ្នានេះដែរ ការលើកឡើងខាងលើធ្វើឡើងបន្ទាប់ពីសារព័ត៌មានអន្តរជាតិនានាបានចុះផ្សាយជាបន្តបន្ទាប់នូវរបាយការណ៍ដែលលាតត្រដាងថាយោធាថៃនៅតែកាន់កាប់លើទឹកដីកម្ពុជា បើទោះជាមានបទឈប់បា.ញ់។

ដោយសារមិនមានភស្តុតាងដើម្បីបញ្ជាក់ថាខ្លួនស្អាតស្អំនិងឆ្លើយតបទៅកាន់របាយការណ៍ដែលនាយករដ្ឋមន្រ្តីកម្ពុជាលើកឡើងក្នុងបទសម្ភាសន៍ជាមួយទីភ្នាក់ងារព័ត៌មានអន្តរជាតិបាន នាយករដ្ឋមន្រ្តីថៃ លោក អានុទីន បានត្រឹមតែដើរគេចអ្នកកាសែតជៀសវាងពីការសួរសំណួរ ចំពេលដែលអ្នកនាំពាក្យកងទ័ព រួមទាំងរដ្ឋមន្រ្តីការបរទេសថៃបានត្រឹមច្រានចោលដោយខ្លីថា «ទាំងនោះគឺជារឿងដែលមិនពិត» ៕

នេះហើយដែលចាស់ៗពីដើមតែងពោលថា «កម្មពៀរមានពិត» ! សុន្ឋិ លឹមថងគុល ដែលយើងទាំងអស់គ្នាស្គាល់ថាជា មេដឹកនាំសកម្មជនជ្រុលនិយមថៃ ធ្លាប់បានប្រកាសក្ដែងៗអំពីមហិច្ចតាចង់វាយដណ្ដើមយកទឹកដីខ្មែរត្រឹមពេលដ៏ខ្លី ឥឡូវនេះមិនទាន់បានសម្រេចក្ដីសម្រៃផង បែរជាត្រូវជួបគ្រោះថ្នាក់នៅក្នុងផ្ទះខ្លួនឯង រអិលដួ.លបោ.កក្បាលចំជ្រុងសរសដេរប៊ិះនឹងអស់បុណ្យ តែចេះសំណាងបានកូនចៅនាំទៅមន្ទីរពេទ្យទាន់ពេល។

យោងតាមការបង្ហោះនៅថ្ងៃទី២០ ខែកុម្ភៈ លើទំព័រផេកហ្វេសប៊ុក “Talking About Everything with Sondhi” បានចែករំលែកថា លោក សុនឌី លឹមថងគុល បានជួបប្រទះគ្រោះថ្នាក់រអិលដួលទាំងព្រឹកព្រលឹមនៅផ្ទះរបស់លោក រហូតបានបែ.កក្បាលខ្លាំងត្រូវការដេរចំនួន ២០ ថ្នេរ។

តាមការរៀបរាប់បន្ថែមរបស់ប្រភពខាងលើ ហេតុការណ៍នេះកើតឡើងនៅពេលលោក សុន្ឋី បានត្រឡប់មកដល់ផ្ទះដូចជាទម្លាប់ប្រចាំថ្ងៃដើម្បីរៀបចំសូត្រធម៌អធិស្ឋានក្រោយមកពីធ្វើការ។ តែទោះយ៉ាងណា គ្រាន់តែឈានជើងចុះពីលើឡាន ហើយដើរឡើងជណ្តើរទៅបានបន្តិច លោក សុនធី មានអារម្មណ៍ដូចជាមាននរណាម្នាក់រុញគាត់ រួចក៏ចាប់ផ្ដើមបាត់បង់លំនឹង និងដួលបោ.កក្បាលទៅនឹងបង្គោលមួយហូរឈា.មស្រោចខ្លួន។

នេះសរបញ្ជាក់ឲ្យឃើញថា ការគោរពប្រណិបត្តិព្រះបានត្រឹមតែពាក្យសម្ដីដែលចេញពីមាត់ ប៉ុន្តែក្នុងចិត្តពោរពេញទៅដោយភាពលោ.ភលន់ ការចង់ដណ្ដើម ឬឈ្នានីសអ្នកដទៃ មិននាំឲ្យយើងក្លាយជាមនុស្សមានបុណ្យដែលព្រះតាមថែររក្សានោះទេ។ ជាក់ស្ដែង ដូចជា សុន្ឋិ លីមថងគុល នេះ អស់រយៈពេលជាច្រើនឆ្នាំមកហើយ ប៉ុន្តែបុគ្គលជ្រុលនិយមរូបនេះ នៅតែចិញ្ចឹមចិត្តចង់បានទឹកដីខ្មែរ និងថែមពង្វក់ក្មេងៗថៃជំនាន់ក្រោយឲ្យស្គាល់តែពីប្រវត្តិសាស្រ្តក្លែងក្លាយថែមទៀត។

មិនតែប៉ុណ្ណោះនៅមុនពេលមានការប៉ះទង្គិចគ្នាជាលើកទី២ កាលពីឆ្នាំ២០២៥ មេក្លោងដឹកនាំក្រុមបាតុករបង្កចលាចលរូបនេះ បានប្រកាសនៅកណ្ដាលចំណោមហ្វូងមនុស្សរាប់សែននាក់ថា ប្រសិនបើខ្លួនមានសិទ្ធិអំណាចដឹកនាំប្រទេស នោះខ្លួននឹងចំណាយពេលត្រឹមតែប៉ុន្មានថ្ងៃប៉ុណ្ណើដើម្បីវាយយកកម្ពុជាឲ្យដល់ទីក្រុងភ្នំពេញតែម្ដង។

តែទោះជាយ៉ាងណា ការណ៍នេះវាមិនអាចក្លាយមកជាការពិតបានទេ ហើយវានឹងនៅតែស្ថិតក្នុងការស្រមើស្រមៃរបស់លោក ព្រោះបើគិតមកទល់ពេលនេះលោកកំពុងសម្រាកព្យាបាលក្បាលនៅមន្ទីរពេទ្យនៅឡើយ៕

ពលរដ្ឋអាមេរិកចាប់ផ្តើមចាប់អារម្មណ៍នឹងមនុស្សក្រៅភពឡើងវិញ បន្ទាប់ពីអតីតប្រធានាធិបតីអាមេរិក លោក Barack Obama ផ្តល់សម្ភាសន៍ទៅកាន់ពិធីករក្នុងកម្មវិធី Podcast កាលពីថ្ងៃទី១៤ ខែកុម្ភៈ ឆ្នាំ២០២៦ ថា មនុស្សក្រៅភព (Alien) មានពិតមែន ថែមទាំងទាក់ទងមកផែនដីក្នុងអំឡុងពេលលោកកាន់តំណែង ប៉ុន្តែមានឱកាសតិចណាស់ដែលអាចឃើញពួកគេ ។ រីឯលោកប្រធានាធិបតី Donald Trump មិនជឿពីមនុស្សក្រៅភពទេ ទោះជាមនុស្សជាច្រើនប្រាប់ថា មនុស្សក្រៅភពមានមែន និងធ្លាប់ឃើញយាន UFO ជាច្រើនលើកក៏ដោយ ។

លោកប្រធានាធិបតី Trump បញ្ជាឱ្យរដ្ឋមន្ត្រីក្រសួងការពារជាតិអាមេរិកបញ្ចេញឯកសារពាក់ព័ន្ធនឹងមនុស្សក្រៅភព, យាន UFO និងយាន UAP ដែលពលរដ្ឋទាមទារឱ្យបញ្ចេញឯកសារជាច្រើនឆ្នាំមកនេះ ដោយលោកបង្ហោះសារក្នុងបណ្តាញសង្គម Truth Social នៅថ្ងៃទី២០ ខែកុម្ភៈ នេះថា ដោយសារមានការចាប់អារម្មណ៍ខ្លាំងពីមនុស្សក្រៅភព ទើបលោកបញ្ជាឱ្យរដ្ឋមន្ត្រីក្រសួងការពារជាតិ និងមន្ត្រីពាក់ព័ន្ធ ស្វែងរក និងបញ្ចេញឯកសាររបស់រដ្ឋាភិបាលអាមេរិកសរសេរពីមនុស្សក្រៅភព និងយាន UFO គ្មានអត្តសញ្ញាណផ្សេងៗ ។

លោកប្រធានាធិបតី Trump បញ្ជាឱ្យរដ្ឋមន្ត្រីក្រសួងការពារជាតិបញ្ចេញឯកសារមនុស្សក្រៅភព គឺបន្ទាប់ពីអតីតប្រធានាធិបតីអាមេរិក លោក Obama ផ្តល់សម្ភាសន៍ទៅកាន់ពិធីករ លោក Brian Tyler Cohen ក្នុងកម្មវិធី Podcast កាលពីថ្ងៃទី១៤ ខែកុម្ភៈ ថា មានមនុស្សក្រៅភពពិតមែន ប៉ុន្តែលោកមិនធ្លាប់ឃើញ ហើយមនុស្សក្រៅភពមិនត្រូវបានលាក់ទុកនៅតំបន់៥១ (Area 51) លើវាលខ្សាច់ក្នុងរដ្ឋ Nevada ដែលជាទីកន្លែងអាថ៌កំបាំងបំផុតរបស់កងទ័ពអាកាសអាមេរិកទេ ។ លោកក៏បដិសេធការលាក់ទុកមនុស្សក្រៅភពនៅក្រោមដីផងដែរ លើកលែងតែមានការឃុបឃិតគ្នាលាក់បាំងព័ត៌មានមិនឱ្យប្រធានាធិបតីអាមេរិកជ្រាប ។

ពេលធ្វើដំណើរទៅប្រទេសហ្សកហ្ស៊ី កាលពីថ្ងៃទី១៩ ខែកុម្ភៈ លោកប្រធានាធិបតី Trump បានផ្តល់សម្ភាសន៍ជាមួយសារព័ត៌មានពីលោក Obama ថាមនុស្សក្រៅភពមានពិតមែន ដោយលោក Trump ថា លោក Obama មិនគួរនិយាយបែបនេះ លោកខុសធ្ងន់ណាស់ ។ រីឯខ្លួនលោកវិញ (Trump) មិនដឹងថាមានមនុស្សក្រៅភពឬអត់ ពីព្រោះគ្មានភស្តុតាងអ្វីទាំងអស់ដែលបញ្ជាក់ពីមនុស្សក្រៅភពរស់នៅក្រៅផែនដី ។

រយៈពេលប៉ុន្មានឆ្នាំចុងក្រោយនេះ មានការចាប់អារម្មណ៍ពីយាន UFO និងយាន UAP បន្ទាប់ពីរដ្ឋាភិបាលអាមេរិកបានត្រួតពិនិត្យរបាយការណ៍ជាច្រើនពីយានរបស់មនុស្សក្រៅភពដែលគ្មានអត្តសញ្ញាណពិតប្រាកដ ខណៈអ្នកខ្លះបារម្ភពីមនុស្សក្រៅភពអាចបង្ហាញខ្លួនក្នុងនាមជាសត្រូវ ក៏បង្ហោះយានមកតាមដានបច្ចេកវិទ្យាទំនើបរបស់អាមេរិក ។

កាលពីខែមីនា ឆ្នាំ២០២៤ មន្ទីរបញ្ចកោណបានផ្សព្វផ្សាយឯកសារមួយថា គ្មានភស្តុតាងបង្ហាញពីយាន UAP គឺជាបច្ចេកវិទ្យាបង្កើតឡើងដោយមនុស្សក្រៅភពទេ ។ ការប្រទះឃើញយានជាច្រើនគួរឱ្យសង្ស័យនោះ គឺអាចគ្រាន់តែជាបាឡុងពិនិត្យអាកាសធាតុ, យន្តហោះស៊ើបការណ៍ និងផ្កាយរណប តែប៉ុណ្ណោះ ។

គួរបញ្ជាក់ថា ពាក្យសម្តីរបស់លោក Obama ដែលថាមនុស្សក្រៅភពបានទាក់ទងមកកាន់មនុស្សលើផែនដីពិតមែនក្នុងអំឡុងពេលលោកកាន់តំណែងជាប្រធានាធិបតីអាមេរិក គឺត្រូវបានសារព័ត៌មាននានាលើពិភពលោក ព្រមទាំងទស្សនាវដ្តីយកទៅផ្សព្វផ្សាយព្រោងព្រាតបណ្តាលឱ្យផ្ទុះការចាប់អារម្មណ៍ជាថ្មី និងសន្និដ្ឋានថា លោក Obama ជ្រាបពីមនុស្សក្រៅភពស្ថិតនៅទីណា ៕