ថៃគ្មានជម្រើសផ្សេងឡើយដើម្បីដោះស្រាយបញ្ហារាំងស្ទះការផលិតទំនិញនាំចេញក្រៅប្រទេសតាមផែនការកំណត់ បន្ទាប់ពីពលករខ្មែរបានចាកចេញពីប្រទេសថៃ ក្រោយថៃឈ្លានពា.នមកលើកម្ពុជា ។ ជាលទ្ធផល វិស័យកសិកម្ម សំណង់ ម្ហូបអាហារ ភេសជ្ជៈ ឧស្សាហកម្ម និងការជីករ៉ែ កំពុងតែរងផលប៉ះពាល់ខ្លាំងបំផុតពុំធ្លាប់ជួបប្រទះឡើយ ។ ទំហំនៃការខាតបង់ដ៏ខ្លាំងសម្បើមនេះ បានបង្ខំឱ្យថៃសម្រេចបន្តសុពលភាពប័ណ្ណការងារឱ្យពលករមីយ៉ាន់ម៉ា ឡាវ និងវៀតណាម យ៉ាងតក់ក្រហល់ ព្រោះតែគ្មានវត្តមានកម្លាំងពលករកម្ពុជាចូលរួមអភិវឌ្ឍន៍លើវិស័យទាំងនោះ ។

តាមការចុះផ្សាយរបស់សារព័ត៌មាន Thairath កាលពីថ្ងៃទី២០ ខែកុម្ភៈ ឆ្នាំ២០២៦ ក្រសួងការងារថៃបានសម្រេចបន្តសុពលភាពប័ណ្ណការងាររយៈពេលខ្លីឱ្យពលករមកពី៣ប្រទេស រួមមាន ៖ មីយ៉ាន់ម៉ា ឡាវ និងវៀតណាម សរុបស្មើជាង៣សែន ៧ម៉ឺននាក់ ឱ្យធ្វើការបន្តនៅប្រទេសថៃដោយស្របច្បាប់ដើម្បីកុំឱ្យរាំងស្ទះការផលិតទំនិញ ពីព្រោះប្រទេសថៃកំពុងខ្វះខាតពលករធ្វើការយ៉ាងខ្លាំង ។

កាលពីថ្ងៃទី២០ ខែកុម្ភៈ រដ្ឋមន្ត្រីក្រសួងការងារថៃ អ្នកស្រី Trinuch Thienthong បានធ្វើជាប្រធានកិច្ចប្រជុំគណៈកម្មការគោលនយោបាយគ្រប់គ្រងពលករបរទេស លើកទី២ ប្រចាំឆ្នាំ២០២៦ ដែលមានការចូលរួមពីអ្នកតំណាងក្រុមហ៊ុនឯកជន និងស្ថាប័នសន្តិសុខ ដើម្បីស្វែងរកដំណោះស្រាយឱ្យពលករបរទេសដែលមិនទាន់បញ្ចប់ដំណើរការស្នើសុំបន្តសុពលភាពប័ណ្ណការងារតាមពេលកំណត់ ។

ក្រោយបញ្ចប់ប្រជុំ រដ្ឋមន្ត្រីក្រសួងការងារ អ្នកស្រី Trinuch និយាយថា កិច្ចប្រជុំបានសម្រេចបន្តសុពលភាពប័ណ្ណការងារបណ្តោះអាសន្នឱ្យពលករមីយ៉ាន់ម៉ា ឡាវ និងវៀតណាម គិតចាប់ពីថ្ងៃទី២៤ ខែកុម្ភៈ រហូតដល់ថ្ងៃទី៣១ ខែមីនា ឆ្នាំ២០២៦ ដើម្បីដោះស្រាយបញ្ហារាំងស្ទះការផលិតទំនិញ និងពន្លឿនការស្នើសុំឯកសាររបស់ពលករ ។

បើតាមការលើកឡើងរបស់រដ្ឋមន្ត្រីក្រសួងការងារ ពេលនេះ មានពលករបរទេសរហូតដល់ជាង៣៧ម៉ឺន ៥ពាន់នាក់ (៣៧៥,០៣៨នាក់) កំពុងស្នើសុំបន្តសុពលភាពប័ណ្ណការងារធ្វើការនៅប្រទេសថៃដោយស្របច្បាប់ ក្នុងចំណោមពលករជាង៨សែន ៩ម៉ឺននាក់ ។ បើបណ្តោយឱ្យប័ណ្ណការងារផុតសុពលភាព ពួកគេនឹងក្លាយជាពលករខុសច្បាប់បណ្តាលឱ្យក្រុមហ៊ុនថៃ និងអាជីវកម្មផ្សេងៗខ្វះខាតពលករធ្វើការ ព្រមទាំងប៉ះពាល់ដល់ស្ថិរភាពការងាររបស់ប្រទេសថៃផងដែរ ។

រដ្ឋមន្ត្រីក្រសួងការងារបានណែនាំឱ្យនាយកដ្ឋានការងារចេញសេចក្តីប្រកាសពីការបន្តសុពលភាពប័ណ្ណការងារឱ្យពលករទាំង៣ប្រទេសជាបន្ទាន់ ដើម្បីដាក់ចូលជារបៀបវារៈក្នុងកិច្ចប្រជុំគណៈរដ្ឋមន្ត្រីពិចារណាឱ្យលឿនបំផុត ។ ការមិនខ្វះខាតកម្លាំងពលកម្ម គឺជាការរក្សាទំនុកចិត្តដល់វិស័យអាជីវកម្ម និងរក្សាប្រព័ន្ធការងារស្របច្បាប់ ។

គួរបញ្ជាក់ថា កិច្ចប្រជុំគណៈកម្មការគោលនយោបាយគ្រប់គ្រងពលករបរទេសនេះ គ្មានការលើកឡើងពីការបន្តសុពលភាពប័ណ្ណការងារឱ្យពលករកម្ពុជាទេ ខណៈកន្លងមក ក្រសួងការងារថៃថា មានពលករកម្ពុជា ជាង១សែននាក់កំពុងធ្វើការនៅប្រទេសថៃ ក្រសួងមិនទាន់សម្រេចចិត្តបញ្ជូនពួកគេត្រឡប់ទៅប្រទេសវិញ ដោយសារត្រូវតាមដានស្ថានការណ៍ប្រទេសជាតិ ។ ទោះយ៉ាងណា រដ្ឋមន្ត្រីក្រសួងការងារ អ្នកស្រី Trinuch ទទួលស្គាល់ថា វិស័យកសិកម្មថៃរងផលប៉ះពាល់យ៉ាងខ្លាំង ប្រសិនបើគ្មានពលករកម្ពុជា ៕

ទំនងជាច្រណែនខ្លាំងហើយមើលទៅ! ប្រទេសថៃពុំទាន់ចូលជាសមាជិកក្រុមប្រឹក្សាសន្តិភាព (Board of Peace) ដែលបង្កើតឡើងដោយលោកប្រធានាធិបតី Donald Trump នៅឡើយទេ និងមើលឃើញថា ខ្លួនបាត់បង់ឱកាស និងបាត់បង់ផលប្រយោជន៍យ៉ាងច្រើនពីការមិនចូលរួម ។ ហេតុនេះ អតីតឯកអគ្គរាជទូតថៃប្រចាំសហរដ្ឋអាមេរិក ណែនាំឱ្យរដ្ឋាភិបាលថៃប្រញាប់ចូលរួមជាសមាជិកក្រុមប្រឹក្សាសន្តិភាពដើម្បីកុំឱ្យចាញ់ប្រៀបកម្ពុជា និងឈានទៅស្និទ្ធស្នាលជាមួយលោក Trump ។

កាលពីថ្ងៃទី២០ ខែកុម្ភៈ ឆ្នាំ២០២៦ សារព័ត៌មាន Thai PBS បានផ្សព្វផ្សាយបទសម្ភាសន៍ជាមួយអតីតឯកអគ្គរាជទូតថៃប្រចាំសហរដ្ឋអាមេរិក លោក Pisan Manawapat ដោយអតីតឯកអគ្គរាជទូតថៃរូបនេះចាត់ទុកកម្ពុជាមានប្រៀបជាងប្រទេសថៃ ដោយសារកម្ពុជាចូលរួមជាសមាជិកក្រុមប្រឹក្សាសន្តិភាព និងស្និទ្ធស្នាលជាមួយលោកប្រធានាធិបតី Donald Trump ។

អតីតឯកអគ្គរាជទូតថៃ លោក Pisan និយាយថា លោកប្រធានាធិបតី Trump បានរៀបចំសណ្តាប់ធ្នាប់ពិភពលោកជាថ្មី ដោយបង្កើតក្រុមប្រឹក្សាសន្តិភាពជំនួសអង្គការសហប្រជាជាតិ (UN) ហើយលោក Pisan ណែនាំឱ្យរដ្ឋាភិបាលថៃប្រញាប់ចូលជាសមាជិកក្រុមប្រឹក្សាសន្តិភាព ដោយសាររដ្ឋាភិបាលថៃខ្វះខាតជំនាញ មិនយល់ពីអត្ថប្រយោជន៍ដែលទទួលបានដោយសារការបង្កើនភាពស្និទ្ធស្នាលជាមួយលោកប្រធានាធិបតី Trump រដ្ឋាភិបាលថៃថែមទាំងបង្ហាញអាកប្បកិរិយាមិនចូលកៀកជាមួយមេដឹកនាំអាមេរិក ។

បើទោះជាថៃមិនចូលចិត្តអាមេរិក មិនចូលចិត្តលោកប្រធានាធិបតី Trump ក៏ដោយ ប៉ុន្តែដើម្បីផលប្រយោជន៍ ថៃត្រូវតែសហការជាមួយអាមេរិក មុនពេលអាមេរិកសម្រេចចិត្តអ្វីមួយធ្វើឱ្យប៉ះពាល់ថៃ ។ ថៃមិនអាចបញ្ចុះបញ្ចូលលោកប្រធានាធិបតី Trump ទេ ខណៈការចូលជាសមាជិកក្រុមប្រឹក្សាសន្តិភាព គឺជាការបើកឱកាសឱ្យមេដឹកនាំប្រទេសនានា រួមទាំងរដ្ឋមន្ត្រីការបរទេស អាចចូលរួមកិច្ចប្រជុំក្រោមដឹកនាំរបស់លោកប្រធានាធិបតី Trump ជាប្រចាំ ។

តាមការសន្និដ្ឋានរបស់លោក Pisan គឺសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងស្នើឱ្យកិច្ចប្រជុំក្រុមប្រឹក្សាសន្តិភាពដែលនឹងរៀបចំនាពេលបន្ទាប់លើកឡើងពីបញ្ហាវិវាទរវាងកម្ពុជា-ថៃ ប្រសិនបើថៃចូលជាសមាជិកក្រុមប្រឹក្សានេះតាំងពីដំបូង ថៃនឹងអាចទប់ស្កាត់ ឬតបតរវិញភ្លាមៗ ។ ម្យ៉ាងទៀត ការចូលជាសមាជិកក្រុមប្រឹក្សានេះនឹងធ្វើឱ្យថៃមានឱកាសរួមចំណែកស្ថាបនាតំបន់កាហ្សាពីការខូចខាត, អាជីវកម្ម និងក្រុមហ៊ុននាំចេញរបស់ថៃនឹងទទួលប្រយោជន៍ ពីព្រោះមន្ត្រីជួរថ្នាក់ដឹកនាំក្នុងក្រុមប្រឹក្សាសន្តិភាព ក៏មានប្រធានធនាគារពិភពលោកដែរ ហើយលោកប្រធានាធិបតី Trump បានកំណត់ឱ្យប្រធានធនាគារពិភពលោក ចាត់ចែងថវិកាទទួលបានការពីការបរិច្ចាគដើម្បីស្ថាបនាតំបន់កាហ្សា ។

ថៃនឹងធ្វើជាម្ចាស់ផ្ទះរៀបចំកិច្ចប្រជុំជាមួយធនាគារពិភពលោក និងមូលនិធិរូបិយវត្ថុអន្តរជាតិ (IMF) នៅខែតុលា ឆ្នាំ២០២៦ ហើយប្រធានធនាគារពិភពលោកនឹងមកចូលរួមកិច្ចប្រជុំ ហេតុនេះ លោកណែនាំឱ្យរដ្ឋាភិបាលថៃត្រៀមផែនការដើម្បីឱ្យធនាគារពិភពលោកមើលឃើញថា ថៃចង់ចូលរួមចំណែកស្ថាបនាតំបន់កាហ្សាឡើងវិញ ។

វាជាឱកាសការទូតដែលថៃអាចធ្វើបាន ហើយថៃមិនត្រូវប្រកាន់គំនិតក្រុមប្រឹក្សាសន្តិភាពនឹងជំនួសតួនាទីអង្គការសហប្រជាជាតិ និងចង់រក្សាទុកអង្គការសហប្រជាជាតិទេ គួរងាកមកមើលផលប្រយោជន៍វិញ ។ បើចូលរួមក្នុងកិច្ចប្រជុំក្រុមប្រឹក្សាសន្តិភាព ថៃនឹងស្និទ្ធស្នាលជាមួយលោកប្រធានាធិបតី Trump, ស្និទ្ធស្នាលជាមួយមិត្តភក្តិរបស់លោក Trump និងមន្ត្រីជាន់ខ្ពស់ជាច្រើនទៀតដែលមានតំណែងសំខាន់ក្នុងក្រុមប្រឹក្សានេះ ថៃនឹងទទួលបានផលប្រយោជន៍យ៉ាងច្រើន ។ នេះបើតាមការលើកឡើងរបស់អតីតឯកអគ្គរាជទូតថៃប្រចាំសហរដ្ឋអាមេរិក ៕

វាសនាមនុស្សពិតជាមិនអាចមើលឃើញ! លោក Yoon Suk Yeol ដែលធ្លាប់កាន់កាប់មុខតំណែងកំពូលរបស់ប្រទេសកូរ៉េខាងត្បូង ក្នុងនាមជាប្រធានាធិបតី ឥឡូវនេះស្រាប់តែត្រូវបានតុលាការកាត់ទោសឲ្យជាប់ពន្ធនាគារអស់មួយជីវិត បន្ទាប់ពីរកឃើញមានពិរុទ្ធពីបទបះបោរពាក់ព័ន្ធការប៉ុនប៉ងក្នុងខែធ្នូ ឆ្នាំ ២០២៤ ដើម្បីដាក់ចេញច្បាប់អាជ្ញាសឹក។ នេះបើយោងតាមការចេញផ្សាយរបស់ BBC ។

នៅថ្ងៃព្រហស្បតិ៍ ទី១៩ ខែកុម្ភៈ ចៅក្រម លោក Jee Kui-youn បានប្រាប់ដល់អង្គសវនាការថា លោក Yoon បានគប់គិតជាមួយអតីតរដ្ឋមន្ត្រីការពារជាតិ លោក Kim Yong-hyun ដើម្បីបំប្លែងបទបញ្ជាធម្មនុញ្ញដោយការដាក់ពង្រាយកងទ័ពទៅកាន់រដ្ឋសភា។ តាមសាលក្រមរបស់តុលាការ រាល់ការបញ្ជូនទាហានប្រដាប់អាវុធទៅសភា និងការប្រើឧបករណ៍ដើម្បីព្យាយាមចាប់ខ្លួន គឺសុទ្ធតែជាអំពើបះបោរ។

នៅពេលប្រកាសទោសជាប់ពន្ធនាគារអស់មួយជីវិត លោក jee បញ្ជាក់ថា លោក Yoon បានដឹកនាំមន្ត្រី និងកងទ័ពមួយចំនួនធ្វេីសកម្មភាពឧក្រិដ្ឋ នាថ្ងៃទី៣ ខែធ្នូ ឆ្នាំ ២០២៤ ហើយដោយសារតែការប្រកាសច្បាប់អាជ្ញាសឹក នោះថ្លៃចំណាយដ៏សម្បេីមក្នុងសង្គមប្រាកដជានឹងកើតឡើង។

លោក Yoon អាយុ ៦៥ឆ្នាំ បានឈរទាំងទឹកមុខស្លេកស្លាំងនៅក្នុងសវនាការ ខណៈ ដែលសាលក្រមកាត់ទោស ត្រូវបានអាន សម្រាប់រូបលោក និងចុងចោទ ៧នាក់ទៀតរួមទាំង លោក Kim អតីតរដ្ឋមន្ត្រីការពារជាតិ ដែលទទួលទោស ៣០ឆ្នាំ ក៏ដូចជាអតីតមន្ត្រី ប៉ូលិសកំពូលៗ។

ក្រុមមេធាវីការពារក្តីរបស់លោក Yoon នឹងពិភាក្សាថាតើត្រូវប្តឹងឧទ្ធរណ៍លើសេចក្តីសម្រេចនេះឬអត់ ដោយមេធាវីម្នាក់បាននិយាយថា ខ្លួនមិនអើពើលើគោលការណ៍ច្បាប់ដែលមិនផ្អែកលើការរកឃើញភស្តុតាងទាំងស្រុងនោះទេ។

គួរបញ្ជាក់ថា រដ្ឋអាជ្ញាក៏បានស្វែងរកការកាត់ទោសប្រហារជីវិតក្នុងសំណុំរឿងនេះដែរ ជាមួយការឃ្លាំមើលដិតដល់នៅក្នុងប្រទេសដែលកំពុងបែកបាក់យ៉ាងស៉ីជម្រៅ។ វាគឺជាផលវិបាកបំផុតសម្រាប់កូរ៉េខាងត្បូង ដែលមេដឹកនាំម្នាក់ត្រូវបានបណ្តេញចេញពីអំណាច បង្កជាវិបត្តិនយោបាយជាតិ និងធ្វេីតេស្តទៅលេីភាពធន់នៃលទ្ធិប្រជាធិបតេយ្យ។

ក្រោមច្បាប់បស់កូរ៉េខាងត្បូង មេគំនិតរៀបចំការបះបោរ ត្រូវទទួលទោសអតិបរមា ដោយការប្រហារជីវិត ឬដាក់ពន្ធនាគារអស់មួយជីវិត។ ប្រទេសនេះបានកាត់ទោសប្រហារជីវិតលេីកចុងក្រោយក្នុងឆ្នាំ ២០១៦ ប៉ុន្តែមិនបានកាត់ទោសនរណាម្នាក់ទេចាប់តាំងពីឆ្នាំ ១៩៩៧៕

សម្ព័ន្ធមិត្តដ៏ជិតស្និទ្ធរវាងអង់គ្លេស និងសហរដ្ឋអាមេរិក ចាប់ផ្តើមប្រេះឆាយ៉ាងខ្លាំង បន្ទាប់ពីអង់គ្លេសបដិសេធសំណើរបស់លោកប្រធានាធិបតី Donald Trump ដែលស្នើសុំប្រើប្រាស់មូលដ្ឋានកងទ័ព Diego Garcia នៅប្រទេសអង់គ្លេសដើម្បីវាយប្រ.ហារអ៊ីរ៉ង់ ដោយអង់គ្លេសចាត់ទុកខុសច្បាប់អន្តរជាតិ ជាហេតុធ្វើឱ្យលោកប្រធានាធិបតី Trump ប្រកាសឈប់គាំទ្រកិច្ចព្រមព្រៀងដែលអនុញ្ញាតឱ្យអង់គ្លេសគ្រប់គ្រងប្រជុំកោះ Chagos ។

សារព័ត៌មានបរទេសរាយការណ៍កាលពីថ្ងៃទី២០ ខែកុម្ភៈ ឆ្នាំ២០២៦ ថា នាយករដ្ឋមន្ត្រីអង់គ្លេស លោក Keir Starmer មិនឯកភាពនឹងការស្នើសុំរបស់លោកប្រធានាធិបតី Trump ដែលចង់ប្រើប្រាស់មូលដ្ឋានកងទ័ពរបស់អង់គ្លេសធ្វើជាទីតាំងវាយប្រហារអ៊ីរ៉ង់ទេ ដោយនាយករដ្ឋមន្ត្រីអង់គ្លេសបញ្ជាក់ច្បាស់លាស់ថា ទង្វើនេះបំពានច្បាប់អន្តរជាតិ អាមេរិកត្រូវតែទទួលបានការអនុញ្ញាតពីរដ្ឋាភិបាលអង់គ្លេសជាមុន ទើបអាចប្រើប្រាស់មូលដ្ឋានទ័ពរបស់អង់គ្លេសសម្រាប់វាយប្រហារប្រទេសទី៣ ។

ក្រោយពីអង់គ្លេសបដិសេធសំណើនេះ លោកប្រធានាធិបតី Trump បានបង្ហោះសារក្នុងបណ្តាញសង្គម Truth Social ដោយប្រកាសដកការគាំទ្រកិច្ចព្រមព្រៀងដែលអនុញ្ញាតឱ្យអង់គ្លេសគ្រប់គ្រងប្រជុំកោះ Chagos ហើយប្រគល់ប្រជុំកោះនេះទៅឱ្យប្រទេសម៉ូរីស (Mauritius ស្ថិតនៅអាហ្វ្រិកខាងកើត) គ្រប់គ្រងវិញ ។ លោកថែមទាំងហាមឃាត់អង់គ្លេសមិនត្រូវអនុញ្ញាតឱ្យប្រទេសផ្សេងប្រើប្រាស់មូលដ្ឋានកងទ័ព Diego Garcia ដាច់ខាត ពីព្រោះអាមេរិកចាំបាច់ប្រើប្រាស់មូលដ្ឋានកងទ័ពនេះដើម្បីកុំឱ្យអ៊ីរ៉ង់គំរាមកំហែង ។

កន្លងមក ក្រសួងការបរទេសអាមេរិកបានប្រកាសគាំទ្រកិច្ចព្រមព្រៀងប្រគល់ប្រជុំកោះ Chagos ឱ្យអង់គ្លេសគ្រប់គ្រង ប៉ុន្តែអ្នកនាំពាក្យសេតវិមាន អ្នកស្រី Karoline Leavitt បែរជាបដិសេធនឹងការគាំទ្រនេះ ដោយអះអាងថា ការបង្ហោះសាររបស់លោកប្រធានាធិបតី Trump លើបណ្តាញសង្គម គឺជាគោលនយោបាយផ្លូវការរបស់រដ្ឋាភិបាលអាមេរិកមិនគាំទ្រអង់គ្លេសគ្រប់គ្រងប្រជុំកោះ ។

គួរបញ្ជាក់ថា អាមេរិកបានដាក់សម្ពាធអ៊ីរ៉ង់យ៉ាងខ្លាំងក្នុងកិច្ចចរចាគ្នាពីអាវុធនុយក្លេអ៊ែរនៅទីក្រុងហ្សឺណែវ ប្រទេសស្វីស ហើយអាមេរិកមានផែនការប្រើប្រាស់មូលដ្ឋានកងទ័ព Diego Garcia និងមូលដ្ឋានទ័ពអាកាស Fairford នៅប្រទេសអង់គ្លេស ដើម្បីធ្វើជាទីតាំងបើកការវាយប្រហារអ៊ីរ៉ង់ ប្រសិនបើការចរចាបរាជ័យ ។

អាមេរិក និងអ៊ីរ៉ង់ ទំនងជាគេចមិនផុតពីការផ្ទុះសង្គ្រា.មទេ ពីព្រោះការចរចាជាច្រើនលើកមិនទទួលបានលទ្ធផល ។ មន្ត្រីរដ្ឋាភិបាលអាមេរិកជាច្រើនរូបបង្ហើបប្រាប់សារព័ត៌មានថា កងទ័ពអាមេរិកប្រុងប្រៀបខ្លួនរួចរាល់ហើយដើម្បីវាយប្រ.ហារអ៊ីរ៉ង់នាចុងសប្តាហ៍នេះ គឺរង់ចាំតែបញ្ជាពីលោកប្រធានាធិបតី ប៉ុណ្ណោះក្នុងឋានៈជាមេបញ្ជាការកងទ័ព បន្ទាប់ពីអាមេរិកបញ្ជូននាវាចម្បាំង យន្តហោះចម្បាំង កងទ័ពរាប់ពាន់នាក់ និងសម្ភារៈកងទ័ពជាច្រើនសន្ធឹកសន្ធាប់ទៅតំបន់មជ្ឈិមបូព៌ា ៕

V សមាជិក BTS បានចេញមុខមកនិយាយផ្ទាល់ខ្លួនបន្ទាប់ពីសារឯកជនរវាងលោកនិង Min Hee Jin ទាក់ទងនឹងការចោទប្រកាន់ថា ILLIT លួចចម្លងស្នាដៃរបស់ NewJeans ដោយខុសច្បាប់ត្រូវបានលេចធ្លាយ។

នៅថ្ងៃទី២០ ខែកុម្ភៈ ប្រព័ន្ធផ្សព្វផ្សាយកូរ៉េខាងត្បូងមួយបានទាក់ទាញចំណាប់អារម្មណ៍ទៅលើព័ត៌មានលម្អិតថ្មីៗដែលប្រមូលបានពីឯកសារតុលាការនៅក្នុងបណ្តឹងរវាងក្រុមហ៊ុន HYBE Group និង Min Hee Jin អតីតនាយកប្រតិបត្តិ ADOR យោងតាមឯកសារ ភាគីរបស់ Min Hee Jin បានដាក់សារ KakaoTalk ដែលបានឆ្លើយឆ្លងគ្នារវាងនាង និងតារាចម្រៀងជាភស្តុតាងទៅកាន់តុលាការ ហើយតុលាការបានទទួលយកសារទាំងនោះជាភស្តុតាងដែលមានសុពលភាព ដែលបង្ហាញថាមានមតិមួយថា ILLIT មានភាពស្រដៀងគ្នាទៅនឹង NewJeans។ នៅក្នុងសារនោះ V បានប្រាប់ Min Hee Jin ថា«តែងតែមានការលួចចម្លងជានិច្ច វាមិនដែលឈប់កើតឡើងទេ។ អូយ… ត្រូវហើយ។ ខ្ញុំក៏បានឃើញវាដែរ ហើយគិតថា ‘អា៎ នេះស្រដៀងគ្នាណាស់»។សារនេះបាននាំឱ្យមនុស្សជាច្រើនជឿថា V គាំទ្រជំហររបស់ Min Hee Jin លើការចោទប្រកាន់ការលួចចម្លងរបស់ NewJeans ដោយខុសច្បាប់។

បន្ទាប់ពីដឹងថាសារក្នុង KakaoTalk របស់ខ្លួនបានដាក់ជូនតុលាការជាភស្តុតាង V បាននិយាយចេញមកភ្លាមៗនៅលើ Instagram ដើម្បីពន្យល់ពីស្ថានការណ៍។
V បាននិយាយថា «នោះគ្រាន់តែជាផ្នែកមួយនៃការសន្ទនាធម្មតារវាងខ្ញុំ និងអ្នកស្គាល់គ្នាម្នាក់ ដែលយើងទាំងពីរនាក់កំពុងបង្ហាញពីការយល់ចិត្ត។ ខ្ញុំមិនមានបំណងយល់ស្រប ឬចូលខាងភាគីណាមួយឡើយ»។ តារាចម្រៀងរូបនេះបានបន្ថែមថា «ខ្ញុំពិតជាខ្មាសអៀនណាស់ដែលការសន្ទនានេះត្រូវបានប្រើជាភស្តុតាងដោយគ្មានការយល់ព្រមពីខ្ញុំ»។

មិនយូរប៉ុន្មាន ក្រុមហ៊ុនគ្រប់គ្រងរបស់ BTS គឺ Big Hit Music ក៏បានចេញសេចក្តីថ្លែងការណ៍មួយផងដែរថា «សាររបស់ V គ្រាន់តែបង្ហាញពីការយល់ចិត្តនៅក្នុងការសន្ទនាឯកជនប៉ុណ្ណោះ មិនមែនជាការយល់ស្របជាមួយនឹងសេចក្តីថ្លែងការណ៍ជាក់លាក់ណាមួយដែលធ្វើឡើងដោយ Min Hee Jin នោះទេ»។ សមាជិក BTS រូបនេះក៏មិនសប្បាយចិត្តដែរ ដែលខ្លឹមសារនៃការសន្ទនាផ្ទាល់ខ្លួនរបស់ពួកគេត្រូវបានប្រើប្រាស់ជាភស្តុតាងនៅក្នុងដំណើរការតុលាការដោយគ្មានការយល់ព្រមពីពួកគេ។

គួរឱ្យដឹងថានៅពេលដែល Min Hee Jin ជានាយកប្រតិបត្តិនៃ ADOR នាងដើរតួជាអ្នកផលិតទូទៅសម្រាប់អាល់ប៊ុមទោលដំបូងរបស់ V ដែលចេញផ្សាយក្នុងឆ្នាំ ២០២៣ ដោយត្រួតពិនិត្យទិដ្ឋភាពផ្សេងៗរួមមានតន្ត្រី ក្បាច់រាំ ការរចនា និងការផ្សព្វផ្សាយ។ បន្ទាប់ពីចូលបម្រើកងទ័ពរួច V នៅតែទាក់ទងជាមួយ Min Hee Jin។ នៅក្នុងបទសម្ភាសន៍មួយ Min Hee Jin បាននិយាយសរសើរ V ដោយហៅថាជាប្រភពនៃការលើកទឹកចិត្តដ៏អស្ចារ្យ។
Min Hee Jin ក៏បានបង្ហើបផងដែរថា V បានផ្ញើក្តីនឹករលឹកដល់នាងក្នុងអំឡុងពេលដ៏លំបាកដែលនាងបានឆ្លងកាត់នៅ HYBE Corporation។ នៅថ្ងៃកំណើតរបស់ Min Hee Jin V បានផ្ញើសារអបអរសាទរនៅព្រឹកព្រលឹម ទោះបីជាលោកកំពុងបម្រើការងារក្នុងជួរកងទ័ពក៏ដោយ៕