ប្រទេសចិន ៖ គេឃើញថា ប្រទេសចិនបានប្រមូលទុកត្បូង ឬវត្ថុមានតម្លៃផ្សេងៗតាំងពីសម័យបុរាណ រហូតមកដល់ពេលបច្ចុប្បន្ន ។ កាលពីសម័យបុរាណ ត្បូងមានតម្លៃច្រើនតែធ្លាក់ក្នុង ក..ណ្តាប់..ដៃ.. របស់មនុស្សមានទ្រព្យសម្បត្តិច្រើន ឬបុគ្គលថ្លៃថ្នូរ ប៉ុន្តែបច្ចុប្បន្ន អ្នកណាក៏ដោយ ក៏អាចក្លាយជាម្ចាស់ត្បូងដ៏មានតម្លៃបានដែរ ហើយពួកគេអាចផ្លាស់ប្តូរជីវិតក្លាយជាសេដ្ឋីត្រឹមតែមួយប៉ព្រិចភ្នែកប៉ុណ្ណោះ បើពួកគេរកឃើញត្បូង ឬវត្ថុមានតម្លៃ ។

ជាក់ស្តែង មានបុរសចំណាស់ម្នាក់រស់នៅខេត្តយូណាន ប្រទេសចិន គាត់បានឡើងលើភ្នំដើម្បីរកអុស និងបរបាញ់សត្វតាមទម្លាប់ ហើយចៃដន្យ គាត់បានដើរជំពប់ថ្មមួយដុំមានរាងប្លែកៗ និងខុសពីថ្មទូទៅ ។ ពេលគាត់មើលថ្មនេះឃើញថា វាដូចគ្នាបេះបិទនឹងសាច់ជ្រូក៣ជាន់ដ៏ធំមួយនៅលើស្មៅ ។ ពីដំបូង គាត់គិតថា មានអ្នកសម្លាប់ជ្រូក រួចយកហើយយកមកបោះចោលនៅទីនេះ ទើបគាត់មិនហ៊ានចាប់វា ប៉ុន្តែនៅពេលដើរទៅមើលជិតៗឃើញថា វាមិនមែនជាគ្រោងឆ្អឹងជ្រូកទេ ។

ដុំថ្មនេះគួរឱ្យចាប់អារម្មណ៍ និងចម្លែកយ៉ាងខ្លាំង ពីព្រោះពណ៌ និងរូបរាងរបស់វាដូចគ្នានឹងសាច់ជ្រូក៣ជាន់ខ្លាំងណាស់ ហើយដោយសារតែគាត់ចង់ដឹង គាត់ក៏សម្រេចចិត្តថា នឹងយកវាទៅផ្ទះ ។ ទោះយ៉ាងណា ដោយសារដុំថ្មនេះធំ និងធ្ងន់ខ្លាំងពេក គាត់ក៏បានស្រែកហៅយុវជនជាច្រើននាក់ក្នុងភូមិឱ្យមកជួយយកដុំថ្មនេះទៅផ្ទះគាត់ ។

ពេលអ្នកភូមិដឹងដំណឹងនេះ ពួកគេបាននាំគ្នាមកមើល ព្រោះចង់ឃើញដោយផ្ទាល់ភ្នែកថា ថ្មសាច់ជ្រូក៣ជាន់មានរូបរាងដូចម្តេច ខណៈអ្នកខ្លះបានធ្វើដំណើរពីតំបន់ឆ្ងាយៗដើម្បីមកមើលថ្មចម្លែកទៀតផង ។ ចំណែកបុរសចំណាស់មានអារម្មណ៍ថា មានក្តីសុខខ្លាំងណាស់ ហើយគាត់រីករាយឱ្យមនុស្សគ្រប់គ្នាចូលមកថ្ម ។ បើទោះជាមានអ្នកសុំទិញថ្មក្នុងតម្លៃខ្ពស់ក្តី ក៏គាត់មិនព្រមលក់ដែរ ព្រោះគិតថា វាមានតម្លៃលើសនេះ ។

រហូតដល់ថ្ងៃមួយ បុរសចំណាស់បានមើលកម្មវិធី «វាយតម្លៃទ្រព្យសម្បត្តិ» របស់ស្ថានីយទូរទស្សន៍ចិន (China Central Television (CCTV) ដែលមានអ្នកជំនាញជួយពិនិត្យមើល និងកាត់ថ្លៃវត្ថុផ្សេងៗ ។ ហេតុនេះ គាត់ក៏សម្រេចចិត្តយកថ្មនេះទៅឱ្យពួកគេជួយកាត់ថ្លៃ បន្ទាប់មក គេក៏យកថ្មនេះឡើងទៅលើវេទិកា ហើយវាបានឱ្យអ្នកជំនាញ និងអ្នកទស្សនាទាំងអស់ភ្ញាក់ផ្អើលយ៉ាងខ្លាំង ពេលដឹងពីតម្លៃរបស់វា ។

អ្នកជំនាញនិយាយថា វាមិនមែនជាលើកដំបូងទេ ដែលរូបគេបានឃើញដុំថ្មសាច់ជ្រូក៣ជាន់ ប៉ុន្តែរូបគេពុំដែលឃើញថ្មសាច់ជ្រូកណាធំបែបនេះទេ ។ វាជាថ្មធម្មជាតិ១០០% ហើយដោយសារការផ្លាស់ទីផ្នែកធរណីវិទ្យា និងទំនាក់ទំនងជាមួយសារធាតុរ៉ែផ្សេងទៀត ទើបធ្វើឱ្យថ្មនេះមានពណ៌ចម្លែក, មានលក្ខណៈដូចសាច់ជ្រូក៣ជាន់បេះបិទ ទាំងស្បែកជ្រូក, ខ្លាញ់ និងសាច់មិនជាប់ខ្លាញ់ ។ ថ្មនេះមានតម្លៃខ្លាំងណាស់ និងពិបាកស្វែងរកនៅប្រទេសចិន ហើយវាជាសម្បត្តិដ៏មានតម្លៃបំផុត ។

នៅពេលបានឮការលើកឡើងរបស់អ្នកជំនាញបែបនេះ បុរសចំណាស់សប្បាយចិត្តយ៉ាងខ្លាំង ហើយពេលនោះ គាត់ចង់ដឹងពីតម្លៃពិតប្រាកដរបស់ដុំថ្ម ។ ប៉ុន្តែអ្នកជំនាញប្រាប់ថា ថ្មនេះមិនសូវមានអ្នកទិញទេ ព្រោះវាមានតម្លៃខ្ពស់ពេក ។ មុននេះ ធ្លាប់មានអ្នកផ្សេងយកថ្មសាច់ជ្រូក៣ជាន់ដុំតូចៗជាងនេះមកដេញថ្លៃ ដោយសារវាជាសម្បត្តិនៅសម័យរាជវង្សឈីង ហើយតម្លៃនៅពេលនោះ គឺស្មើជាង៩សែនយាន់ សម្រាប់ថ្មសាច់ជ្រូក៣ជាន់មានទំហំតូចៗ ។ រីឯថ្មសាច់ជ្រូក៣ជាន់របស់បុរសចំណាស់វិញ នឹងមានតម្លៃលើសនេះកប់ពពក ព្រោះវាមានទំហំធំ ។

បើទោះជាថ្មរបស់បុរសចំណាស់មានតម្លៃមហាសាលក្តី ក៏គាត់ត្រូវទទួលស្គាល់ថា មានសារមន្ទីរមួយចំនួនប៉ុណ្ណោះដែលយល់ព្រមចំណាយប្រាក់ទិញថ្មរបស់គាត់ទៅបង្ហាញក្នុងសារមន្ទីរ ។ ហេតុនេះ អ្នកជំនាញបានណែនាំទៅកាន់បុរសចំណាស់ថា គាត់អាចលក់វាក្នុងតម្លៃត្រឹមតែ១សែនយាន់ ព្រោះវាជាតម្លៃល្អមួយដែលគាត់អាចលក់បាន ។ បើមិនដូច្នោះទេ គ្មានអ្នកណាម្នាក់ហ៊ានចំណាយប្រាក់ដ៏ច្រើនសន្ធឹកសន្ធាប់ទិញវាទេ ។

ប៉ុន្តែបុរសចំណាស់មិនបានជឿតាមការណែនាំរបស់អ្នកជំនាញទេ ហើយគាត់នៅតែជឿថា បើគាត់រក្សាទុកថ្មនេះយូរប៉ុនណា តម្លៃរបស់វានឹងកើនឡើងខ្ពស់ថែមទៀត ។ គាត់ក៏សម្រេចចិត្តរក្សាទុកថ្មនេះឱ្យកូនចៅរបស់គាត់មើល ពីព្រោះវាអាចមានប្រយោជន៍មហាសាលទៅថ្ងៃអនាគត និងជួយឱ្យកូនចៅអាចយកឈ្នះភាពក្រីក្របាន ៕

ប្រទេសហូឡង់ ៖ គេហទំព័រ New York Post បានរាយការណ៍ពីហេតុការណ៍គួរឱ្យខ្លាចមួយនៅលើយន្តហោះ ក្រោយពីអ្នកដំណើររបស់ក្រុមហ៊ុនអាកាសចរណ៍ Delta Air Lines ដែលធ្វើដំណើរចាកចេញពីទីក្រុង Amsterdam ប្រទេសហូឡង់ ទៅកាន់ទីក្រុង Detroit រដ្ឋ Michigan សហរដ្ឋអាមេរិក កើតការភ្ញាក់ផ្អើលយ៉ាងខ្លាំង ព្រោះនៅសុខៗ ស្រាប់តែមានដង្កូវធ្លាក់ពីកន្លែងដាក់អីវ៉ាន់ផ្នែកខាងលើកៅអីអ្នកដំណើរ ។

ហេតុការណ៍នេះបានធ្វើឱ្យយន្តហោះរបស់ក្រុមហ៊ុនអាកាសចរណ៍ Delta Air Lines ត្រូវសម្រេចចិត្តហោះត្រឡប់ក្រោយវិញ និងចុះចតនៅអាកាសយានដ្ឋានក្នុងទីក្រុង Amsterdam ប្រទេសហូឡង់ ដូចដើម ។ សារព័ត៌មានបរទេសរាយការណ៍ថា ត្រីស្អុយនៅលើយន្តហោះ គឺជាមូលហេតុធ្វើឱ្យមានសត្វដង្កូវតាមមកដែរ ។

អ្នកប្រើប្រាស់គេហទំព័រ Reddit ម្នាក់និយាយថា គាត់បានអង្គុយនៅខាងមុខនារីម្នាក់ដែលត្រូវសត្វដង្កូវធ្លាក់លើក្បាល ។ នាងបានប្រាប់បុគ្គលិកបម្រើការលើយន្តហោះថា មានដង្កូវធ្លាក់លើក្បាលនាង ហើយនាងបានឃើញដង្កូវផ្សេងទៀតនៅក្រោមកៅអីអង្គុយទៀតផង ។ នាងមានអារម្មណ៍ថា ខ្ពើមរអើមយ៉ាងខ្លាំងពេលឃើញដង្កូវបែបនេះ ហើយត្រីស្អុយនោះវេចខ្ចប់ដោយក្រដាសកាសែត ។

ក្រៅពីនេះ អ្នកដំណើរនៅលើយន្តហោះបានរិះគន់ម្ចាស់អីវ៉ាន់ថា ពិតជាខ្វះការទទួលខុសត្រូវយ៉ាងខ្លាំងលើអីវ៉ាន់របស់ខ្លួន ហើយធ្វើឱ្យអ្នកដទៃទៀតត្រូវខាតបង់ពេលវេលា ។ ក្រោយមក ខាងយន្តហោះបានរឹបអូសយកអីវ៉ាន់នេះ និងត្រៀមយកទៅដុតកម្ទេចចោល ។ ក្រៅពីនេះ បុគ្គលិកបម្រើការលើយន្តហោះបានជួយគ្នាសម្អាតនៅបរិវេណប្រឡាក់ និងបាញ់ថ្នាំសម្លាប់មេរោគយ៉ាងប្រុងប្រយ័ត្ន ។

ចំណែកអ្នកដំណើរម្នាក់ទៀតនិយាយថា ក្រោយហេតុការណ៍នេះ ក្រុមហ៊ុនអាកាសចរណ៍ Delta Air Lines បានប្រកាសផ្តល់សំណងឱ្យអ្នកដំណើរទាំងអស់សម្រាប់ការចំណាយលើបន្ទប់ស្នាក់នៅ, សំបុត្រយន្តហោះ និងតម្លៃម្ហូបអាហារផងដែរ ៕

ប្រទេសប៉េរូ ៖ បច្ចុប្បន្ន គេឃើញថា សមត្ថកិច្ចនៅប្រទេសប៉េរូ (Peru ជាប្រទេសស្ថិតនៅអាមេរិកខាងត្បូង) បានប្រើប្រាស់វិធីកាន់តែប្លែក ដើម្បី..ប..ង្ក្រា..ប..ជ..នស..ង្ស័យ..ជួ..ញ..ដូរ..ថ្នាំ..ញៀ..ន..ក្នុងថ្ងៃបុណ្យក្តីស្រឡាញ់ ១៤ កុម្ភៈ ។

សារព័ត៌មានបរទេសរាយការណ៍ថា សមត្ថកិច្ចប៉េរូបានស្លៀកពាក់ឈុតខ្លាឃ្មុំ ហើយដើរទៅកាន់អាផាតមិនរបស់ស្ត្រីម្នាក់ដែលសមត្ថកិច្ចសង្ស័យថា នាងជាអ្នកជួញដូរថ្នាំញៀននៅទីក្រុងលិម៉ា ។

សមត្ថកិច្ចរូបនេះបានកាន់ប៉ោងប៉ោងរាងបេះដូង និងប្រអប់សូកូឡា ដើម្បីបង្ហាញពីក្តីស្រឡាញ់ដល់នារីខាងលើ ។ បន្ទាប់មក សមត្ថកិច្ចក៏លុតជង្គង់ចុះក្រោម និងបក់ដៃឱ្យស្ត្រីជួញដូរថ្នាំញៀនដែលពាក់អាវយឺតពណ៌ខ្មៅចុះពីលើអាផាតមិន និងដើរមកជិតគាត់ ។ ស្ត្រីពាក់អាវខ្មៅក៏ដើរមករកគាត់ ព្រោះនាងគិតថា មានមនុស្សប្លែកមុខមក Surprise ក្នុងថ្ងៃបុណ្យក្តីស្រឡាញ់ ។

នៅពេលនាងដើរមកដល់មុខសមត្ថកិច្ច សមត្ថកិច្ចក៏បានដោះក្បាលរូបខ្លាឃ្មុំចេញ និងប្រញាប់ចាប់ខ្លួននាងដាក់ខ្នោះភ្លាមៗ ។ បើតាមរូបភាពក្នុងវីដេអូនាពេលក្រោយទៀតបង្ហាញឱ្យឃើញថា ស្ត្រីជនសង្ស័យរូបនេះបានជាប់ខ្នោះដៃ និងត្រូវបានសមត្ថកិច្ចឈ្លៀតឈុតខ្លាឃ្មុំនាំនាងដើរនៅតាមផ្លូវ ។

ចំណែកសមត្ថកិច្ចប្រឆាំងគ្រឿងញៀនមួយក្រុមទៀតបានចូលត្រួតពិនិត្យក្នុងអាផាតមិនដែលនាងស្នាក់នៅ ដើម្បីស្វែងរកថ្នាំញៀន ។ សមត្ថកិច្ចបានរកឃើញថ្នាំញៀនមួយចំនួនដែលនាងលាក់ទុកនៅក្រោមកន្លែងគេង រីឯថ្នាំញៀនខ្លះទៀត នាងបានលាក់នៅលើគម្របលូបង្ហូរទឹកនៅក្រៅផ្ទះ ។

រីឯស្ត្រីជនសង្ស័យម្នាក់ទៀតត្រូវបានសមត្ថកិច្ចចាប់ខ្លួននៅកន្លែងកើតហេតុ និងបញ្ជូនទៅសួរចម្លើយ ។ ស្ត្រីជនសង្ស័យត្រូវបានសមត្ថកិច្ចនាំទៅថតរូបនៅក្បែរតុមួយ ដែលមានប្រអប់សូកូឡារបស់សមត្ថកិច្ចទុកបញ្ឆោតនាង ។

បើតាមទិន្នន័យរបស់ការិយាល័យអង្គការសហប្រជាជាតិសម្រាប់ការទប់ស្កាត់គ្រឿងញៀន និងឧក្រិដ្ឋកម្ម (UNODC) បង្ហាញថា ប៉េរូ គឺជាប្រទេសផលិតកូកាអ៊ីនដ៏ធំបំផុតនៅលើពិភពលោក ដែលទទួលបានចំណូលរាប់លានដុល្លារក្នុង១ឆ្នាំៗ ។ ហេតុនេះ ភ្នាក់ងារអនុវត្តច្បាប់នៅប្រទេសប៉េរូ បានបង្កើនកម្លាំងបង្ក្រាបការជួញដូរថ្នាំញៀនជាបន្តបន្ទាប់ ។

សមត្ថកិច្ចនៅប្រទេសប៉េរូ គឺជាភ្នាក់ងារឈានមុខគេដែលមានស្នាដៃចាប់ខ្លួនជនសង្ស័យជួញដូរថ្នាំញៀន តាមរយៈការប្រើវិធីសាស្ត្រប្លែកៗដើម្បីចាប់ខ្លួនជនសង្ស័យ ។ ក្រៅពីនេះ ក៏មានការសហការពីប្រទេសផ្សេងៗផងដែរ ដើម្បីបង្ក្រាបការជួញដូរថ្នាំញៀនទ្រង់ទ្រាយធំ ។

កាលពីខែមីនា ឆ្នាំ២០២៣ អាជ្ញាធរប៉េរូបានរឹបអូសកូកាអ៊ីនជាង២តោន ដែលជនសង្ស័យបានលាក់ទុកនៅក្រោមឥដ្ឋការ៉ូ ដើម្បីបញ្ជូនទៅប្រទេសតួកគីតាមនាវាខុសច្បាប់ ។ សមត្ថកិច្ចបានចាប់ខ្លួនជនសង្ស័យជួញដូរគ្រឿងញៀននៅកំពង់ផែអែលកាឡៅ ដែលជាកំពង់ផែធំបំផុតរបស់ប្រទេសប៉េរូ ស្ថិតនៅក្រៅទីក្រុងលិម៉ា ។

គេមើលឃើញថា ការបង្ក្រាបបទល្មើសថ្នាំញៀនកាលពីឆ្នាំ២០២៣ គឺជាការបង្ក្រាបដ៏សំខាន់មួយរបស់សមត្ថកិច្ចប្រឆាំងថ្នាំញៀន ខណៈជនល្មើសប្រុងដឹកជញ្ជូនថ្នាំញៀនទៅប្រទេសតួកគីជាលើកដំបូង ប៉ុន្តែត្រូវបានសមត្ថកិច្ចចាប់បានទាន់ពេលវេលា ៕

ប្រទេសម៉ិកស៊ិក៖ គូស្វាមីភរិយាប្រហែល ១,២០០ គូបានរៀបការរួមគ្នានៅជាយក្រុងម៉ិកស៊ិក ក្នុងព្រឹត្តិការណ៍បុណ្យនៃក្តីស្រឡាញ់ប្រពៃណីមួយនៅទីក្រុង Nezahualcoyotl។

គូស្នេហ៍ជាច្រើនជំនាន់បានរៀបចំពិធីមង្គលការនេះនៅទីលាន Nezahualcoyotl កាលពីថ្ងៃទី ១៤ ខែកុម្ភៈ ឆ្នាំ២០២៤ ដែលប្រពៃណីប្រចាំឆ្នាំនេះត្រូវបានគេហៅថា “matrimonio colectivo” ឬអាពាហ៍ពិពាហ៍ដ៏ធំមួយ។

យោងតាម KPC NEWS បានឱ្យដឹងថា មនុស្សមួយចំនួនជ្រើសរើសទម្រង់នេះដើម្បីសន្សំការចំណាយ ដោយ Rosalin Ruiz អាយុ ២៨ ឆ្នាំបាននិយាយថា “អាពាហ៍ពិពាហ៍ជាធម្មតាមានតម្លៃថ្លៃណាស់” ដូច្នេះទើបនាងសម្រេចរៀបការជាមួយមិត្តប្រុសរបស់នាង Ricardo Reyes អាយុ ៣០ ឆ្នាំនៅក្នុងពិធីមង្គលការរួមគ្នាដ៏ធំនេះតែម្តង។ រីឯ Yosimar Carrasco និង Alejandra Godinez អាយុ ៣៧ ឆ្នាំទាំងពីរនាក់ក៏បានចូលរួមក្នុងពិធីមង្គលការជាក្រុមដោយសង្ឃឹមថានឹងទទួលបាន “បទពិសោធន៍ថ្មីៗនៅក្នុងជីវិតរបស់ពួកគេ” ខណៈពេលដែល Pilar Hernandez និង Susana Inocente អាយុ ៤០ ឆ្នាំទាំងពីរបានមើលឃើញថាវាគឺជាឱកាសពិសេសមួយសម្រាប់គូស្នេហ៍ភេទដូចគ្នា ហើយក៏មាន “សិទ្ធិស្មើគ្នា” ដូចអ្នកដទៃទៀតដែរ ពួកគេក៏សម្រេចរៀបការដោយស្របច្បាប់នៅទីនេះតែម្តង។

គូស្នេហ៍ស្រលាញ់ភេទដូចគ្នា Alejandro និង Carlos បាននិយាយថា “ស្នេហាគ្មានព្រំដែនទេ ហើយយើងពិតជាមានមោទនភាពក្នុងការចូលរួមពិធីមង្គលការដ៏ធំនេះខ្លាំងណាស់”។ ការអបអរសាទរមួយជុំបានបន្លឺឡើងនៅក្នុងទីលាននៅពេល Sonia Cruz ប្រធានការិយាល័យអត្រានុកូលដ្ឋានរបស់រដ្ឋបានបញ្ជាក់ពីការរៀបការរបស់គូស្នេហ៍ដោយស្របច្បាប់ និងបានអញ្ជើញពួកគេឱ្យរាំកម្សាន្ត ក៏ដូចជាថតរូបផ្អែមល្ហែមជាមួយគ្នាទៀតផង។ ពិធីនៅឆ្នាំនេះ ឧបត្ថម្ភដោយការិយាល័យអភិបាលក្រុងក្នុងតំបន់ ហើយក៏បានប្រគល់អំណោយ ទូរទស្សន៍ និងវត្ថុអនុស្សាវរីផ្សេងទៀត ឱ្យទៅគូស្វាមីភរិយាដែលរៀបការនៅទីនេះគ្រប់ៗគ្នាផងដែរ។

Dona Rosa ដែលជាស្ត្រីរៀបការយូរបំផុតនៅអាយុ ៥០ ឆ្នាំ បាននិយាយថា “វាគឺជាការរំលឹកថា ស្នេហាអាចស្ថិតស្ថេរពេញមួយជីវិត ហើយយើងក៏មានមោទនភាពដែលឃើញគូស្នេហ៍វ័យក្មេងជាច្រើនដើរតាមគន្លងរបស់យើង”។ គួរបញ្ជាក់ដែរថា ពិធីមង្គលការដ៏ធំមួយនៅថ្ងៃបុណ្យនៃក្តីស្រឡាញ់ក៏បានធ្វើឡើងក្នុងប្រទេសនីការ៉ាហ្គាផងដែរ ដោយមានគូស្នេហ៍ចំនួន ២០០ គូបានរៀបការនៅលើច្រាំងនៃបឹង Xolotlan របស់ Managua ទៀតផង៕

ប្រទេសកូរ៉េខាងត្បូង ៖ កាលពីថ្ងៃទី១៥ ខែកុម្ភៈ ឆ្នាំ២០២៤ សារព័ត៌មានបរទេសផ្សាយថា ក្រុមអ្នកស្រាវជ្រាវនៅសាកលវិទ្យាល័យ Yonsei ដែលជាស្ថាប័នអប់រំឈានមុខគេនៅទីក្រុងសេអ៊ូល ប្រទេសកូរ៉េខាងត្បូង បានទទួលជោគជ័យក្នុងការអភិវឌ្ឍ «អង្ករផ្សំសារធាតុសាច់គោ» ។ វាជាប្រភេទអាហារថ្មីមួយមាននិរន្តរភាព ហើយ អាហារនេះអាចជួយដោះស្រាយបញ្ហាកង្វះខាតអាហារ និងបម្រែបម្រួលអាកាសធាតុលើពិភពលោក ។

ក្រុមអ្នកស្រាវជ្រាវបានផ្សព្វផ្សាយរបាយការណ៍ស្តីពីការអភិវឌ្ឍអាហារថ្មីនេះក្នុងទស្សនាវដ្តី Matter កាលពីថ្ងៃទី១៤ ខែកុម្ភៈ ឆ្នាំ២០២៤ ថា គ្រាប់អង្ករទាំងនេះបានដាំដុះនៅក្នុងបន្ទប់ពិសោធន៍ ហើយលទ្ធផលស្រាវជ្រាវដែលពួកគេទទួលបាន គឺគ្រាប់ស្រូវពណ៌ផ្កាឈូកពោរពេញទៅដោយកោសិកាសាច់គោ និងខ្លាញ់ ។ ក្រុមអ្នកស្រាវជ្រាវនិយាយថា វាអាចជាជម្រើសសម្រាប់សាច់សត្វមានតម្លៃថោកជាង និងជាមិត្តជាមួយបរិស្ថានផងដែរ ដោយសារវាបញ្ចេញកាបូនឌីអុកស៊ីតតិចជាងមុន ។

Park So Hyun គឺជាអ្នកចូលរួមសរសេររបាយការណ៍ស្តីពីការអភិវឌ្ឍអង្ករសាច់គោ និយាយថា គ្រាប់អង្ករនេះពោរពេញទៅដោយប្រូតេអ៊ីន និងសារធាតុចិញ្ចឹមរាងកាយដែលយើងត្រូវការ ។ វាជាអង្ករមានតម្លៃអាហារូបត្ថម្ភកម្រិតខ្ពស់ ហើយការបន្ថែមកោសិកាពីសាច់សត្វ អាចបង្កើនតម្លៃអាហារូបត្ថម្ភកាន់តែច្រើនថែមទៀត ។

ក្រុមស្រាវជ្រាវបានយកគ្រាប់ស្រូវមកពិសោធន៍ជាមួយសារធាតុជេឡាទីនពីត្រី ដើម្បីជួយឱ្យកោសិកាសាច់គោជាប់គ្នាជាមួយគ្រាប់ស្រូវ ។ បន្ទាប់មក ពួកគេបានយកវាទៅដាំក្នុងចានរយៈពេល១១ថ្ងៃ ។ ក្រុមអ្នកស្រាវជ្រាវប្រាប់ថា លទ្ធផលទទួលបាននៅដំណាក់កាលចុងក្រោយ គឺវាមានប្រូតេអ៊ីនជាង៨% និងខ្លាញ់ជាង៧% គឺខ្ពស់ជាងគ្រាប់ពូជស្រូវធម្មតា ហើយវាមានសាច់ណែន ប៉ុន្តែងាយបាក់ ។

Park So Hyun និយាយថា ៖ «ការស្រាវជ្រាវលើកនេះនឹងជួយកាត់បន្ថយការបញ្ចេញកាបូនឌីអុកស៊ីតយ៉ាងច្រើន ដោយសារវិធីការផលិតបានជួយកាត់បន្ថយតម្រូវការចិញ្ចឹមសត្វសម្រាប់បរិភោគ ព្រោះការចិញ្ចឹមសត្វត្រូវចំណាយធនធាន និងទឹកជាច្រើន ។ ម្យ៉ាងទៀត វាបំភាយឧស្ម័នផ្ទះកញ្ចក់យ៉ាងច្រើនផងដែរ» ។

របាយការណ៍បញ្ជាក់ថា អង្ករថ្មីនេះនឹងបញ្ចេញកាបូនឌីអុកស៊ីតតិចជាង៦,២៧គីឡូក្រាម ខណៈផលិតកម្មសាច់គោបានបញ្ចេញកាបូនឌីអុកស៊ីតលើសនេះ៨ដង ។ បើអង្ករថ្មីនេះដាក់លក់ជាសាធារណៈ វានឹងជាជម្រើសមួយទៀតដែលអតិថិជននៅកូរ៉េខាងត្បូងអាចជ្រើសរើសអង្ករមានតម្លៃថោក ។ អង្ករថ្មីពណ៌ផ្កាឈូកអាចមានតម្លៃប្រមាណជាង២ដុល្លារអាមេរិកក្នុង១គីឡូក្រាម ខណៈសាច់គោមានតម្លៃប្រមាណ១៥ដុល្លារអាមេរិកក្នុង១គីឡូក្រាម ។

ទោះយ៉ាងណា ក្រុមអ្នកស្រាវជ្រាវនៅសាកលវិទ្យាល័យ Yonsei មានគម្រោងអភិវឌ្ឍន៍ដំណើរការផលិតអង្ករផ្សំសារធាតុសាច់គោបន្ថែមទៀត មុនពេលដាក់លក់អង្ករនេះនៅលើទីផ្សារ ដើម្បីទទួលបានអង្ករថ្មីផ្តល់នូវអាហារូបត្ថម្ភខ្ពស់ ៕

ប្រទេសចិន៖ ក្រុមអ្នកវិទ្យាសាស្ត្រចិនបានបង្កើតកោសិកាពន្លឺព្រះអាទិត្យស៊ីលីកុនដែលស្តើងបំផុតមិនធ្លាប់មាន អាចបត់បែនបាន និងអាចបំប្លែងពន្លឺទៅជាថាមពលអគ្គីសនីដោយមិនកាត់បន្ថយដំណើរការ។ កោសិកាពន្លឺព្រះអាទិត្យស៊ីលីកុនគឺជាឆ្អឹងខ្នងនៃប្រភពថាមពលពន្លឺព្រះអាទិត្យនៅជុំវិញពិភពលោកដែលមានប្រហែល ៩៥% នៃចំណែកទីផ្សារកោសិកាពន្លឺព្រះអាទិត្យ។ ដោយសារតម្លៃផលិតកម្ម និងទិន្នផលថាមពលធម្មតាថយចុះ ទើបកោសិកាពន្លឺព្រះអាទិត្យកាន់តែមានប្រជាប្រិយភាពខ្លាំងនាពេលបច្ចុប្បន្ននេះ។

ទោះជាយ៉ាងណាក៏ដោយ បច្ចេកវិទ្យានេះជាធម្មតាត្រូវបានប្រើប្រាស់តែនៅកន្លែងដូចជាកសិដ្ឋានថាមពលពន្លឺព្រះអាទិត្យក្រោមដីដែលមានបន្ទះរឹង និងកន្លែងផ្សេងទៀត ដូចជាលំហខាងក្រៅ ទាមទារផ្ទៃកោងជាដើម។ បើយោងតាម China Science and Technology Daily បានឱ្យដឹងថា ក្រុមស្រាវជ្រាវដែលដឹកនាំដោយអ្នកជំនាញនៅសាកលវិទ្យាល័យវិទ្យាសាស្រ្ត និងបច្ចេកវិទ្យា Jiangsu (JUST) បានបង្កើតកោសិកាពន្លឺព្រះអាទិត្យស៊ីលីកុនស្តើងជាងសន្លឹកក្រដាស A4 ទៅទៀត ដែលមានកម្រាស់ត្រឹមតែ ៥០ មីក្រូម៉ែត្រប៉ុណ្ណោះ។

កោសិកាសូឡានេះធ្វើឡើងពីស៊ីលីកុនគ្រីស្តាល់បំពាក់ដោយបន្ទះឈីប semiconductor ដែលវាមានសមត្ថភាពអាចបត់បានដូចក្រដាស ក៏ដូចជាមានប្រយោជន៍សម្រាប់ការដំឡើងនៅលើផ្កាយរណប ឬសម្រាប់កម្មវិធីអវកាសផ្សេងទៀត។ ការធ្វើឱ្យថ្មស៊ីលីកុនស្តើង ក៏ជួយឱ្យផលិតកម្មប្រើប្រាស់សម្ភារៈតិច ដោយហេតុនេះកាត់បន្ថយទម្ងន់ និងការចំណាយលើការពង្រាយ។ ដោយសារតែកោសិកាពន្លឺព្រះអាទិត្យស៊ីលីកុនអាចពត់បានតាមចិត្ត ក្រុមវិទ្យាសាស្ត្រជឿថាពួកវាអាចប្រើសម្រាប់ឧបករណ៍ជាច្រើនប្រភេទទៀតដូចជា យន្តហោះគ្មានមនុស្សបើក ប៉េងប៉ោងខ្យល់ រួមទាំងការប្រើប្រាស់នៅក្នុងលំហអាកាស និងឧបករណ៍ឆ្លាតវៃ។

ទោះជាយ៉ាងណាក៏ដោយ កោសិកាពន្លឺព្រះអាទិត្យស្តើងក៏មានគុណវិបត្តិនៃការកាត់បន្ថយប្រសិទ្ធភាពនៃការបំប្លែងថាមពល (PCE) ផងដែរ។ នេះក៏ជាមូលហេតុចម្បងដែលធ្វើឱ្យថ្មស៊ីលីកុនស្តើងមិនទាន់មានការពេញនិយមខ្លាំង។ ដូច្នេះហើយ បច្ចុប្បន្នអ្នកវិទ្យាសាស្ត្រកំពុងផ្តោតលើការបង្កើតបន្ទះស្រូបពន្លឺព្រះអាទិត្យថ្មីមួយទៀតដែលអាចបត់បែនបាន និងមានប្រសិទ្ធភាពខ្ពស់ជាងមុនផងដែរ៕

ប្រទេសចិន ៖ សារព័ត៌មានបរទេសបានចុះផ្សាយពីរឿងរ៉ាវដែលកំពុងល្បីល្បាញក្នុងបណ្តាញសង្គមនៅប្រទេសចិន ពេលអតិថិជនម្នាក់បង្ហោះពីបទពិសោធន៍ការទិញទំនិញតាមអនឡាញរបស់ខ្លួន ។ អតិថិជនម្នាក់នេះបានកុម្ម៉ង់ទិញទុរេនតាមអនឡាញ ប៉ុន្តែនាងខកបំណងយ៉ាងខ្លាំងនៅពេលបើកប្រអប់ទុរេនមើលដឹងថា ហាងលក់ទុរេនបោកប្រាស់នាង ។ រីឯអ្នកលេងបណ្តាញសង្គមឃើញវិញអស់សំណើចយ៉ាងខ្លាំងចំពោះការព្យាយាមរបស់អ្នកលក់ ។

នារីទិញទុរេនបានបង្ហោះនៅក្នុង Weibo ជាបណ្តាញសង្គមពេញនិយមបំផុតនៅប្រទេសចិនថា នៅពេលនាងទទួលបានប្រអប់ទុរេនដែលគេដឹកយកមកឱ្យដល់ផ្ទះ នាងក៏ប្រញាប់បើកប្រអប់មើលភ្លាមៗ ។ នាងរំភើបយ៉ាងខ្លាំង ពីព្រោះគិតថា នឹងបានបរិភោគទុរេនដែលជាផ្លែឈើនាងចូលចិត្តបំផុត ។

ប៉ុន្តែនៅពេលបើកប្រអប់ទុរេនរួច អ្វីដែលនាងឃើញធ្វើឱ្យនាងភ្ញាក់ផ្អើលយ៉ាងខ្លាំង ព្រោះផ្លែឈើនោះមានរាងមូលធំ និងមានបន្លាស្រដៀងទុរេនដែរ ។ ប៉ុន្តែពេលពិនិត្យមើលកាន់តែជិតទើបដឹងថា ផ្លែឈើនៅក្នុងប្រអប់នេះមិនមែនជាទុរេនទេ ការពិត វាជាក្រូចថ្លុង ដែលអ្នកលក់បោកប្រាស់ម្នាក់នេះយកគ្រាប់ផ្កាឈូករ័ត្នមកដោតនៅខាងក្រៅឱ្យដូចបន្លាទុរេន ។

ទោះយ៉ាងណា បើទោះជានាងត្រូវបានអ្នកលក់អនឡាញបោកប្រាស់ក្តី ប៉ុន្តែនាងអស់សំណើចពីការព្យាយាមរបស់អ្នកលក់អនឡាញ ។ ក្រោយមក នាងក៏បានថតរូប និងផ្ញើឱ្យមិត្តភក្តិមើល ព្រមទាំងសរសេររឿងរ៉ាវរបស់នាងនៅតាមបណ្តាញសង្គម ដើម្បីឱ្យដឹងថា ទំនិញបញ្ជូនមកឱ្យអតិថិជនខុសពីការកុម្ម៉ង់ ។

រឿងរ៉ាវរបស់នាងត្រូវបានគេចែកចាយក្នុងបណ្តាញសង្គមយ៉ាងច្រើន និងធ្វើឱ្យអ្នកលេងបណ្តាញសង្គមរិះគន់យ៉ាងខ្លាំង ក្នុងនោះអ្នកលេងបណ្តាញសង្គមម្នាក់និយាយថា ៖ «តើហាងចង់លក់ទុរេនតែ១ផ្លែនេះ ហើយបិទហាងតែម្តងឬយ៉ាងណា?» ។ អ្នកលេងបណ្តាញសង្គមម្នាក់ទៀតថា ៖ «តើវាជាទុរេន ឬជាមេរោគកូវីដ-១៩ ពូជថ្មី?» ។

ក្រៅពីនេះ អ្នកខ្លះទៀតនិយាយថា ៖ «សូមសរសើរពីភាពល្អិតល្អន់របស់ម្ចាស់ហាងទុរេន ដោយសារចំណាយពេលមកអង្គុយដោតគ្រាប់ផ្កាឈូករ័ត្នលើផ្លែក្រូចថ្លុង» ។ អ្នកខ្លះទៀតថា ៖ «ទិញទុរេនបានក្រូចថ្លុង ព្រមទាំងគ្រាប់ផ្កាឈូករ័ត្នជាច្រើនគ្រាប់ តើចំណេញអត់?» ៕