ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជាបានប្រកាសប្រឆាំងដាច់ខាតទៅលើបទចម្រៀងរបស់ឧកញ៉ា ខេមរៈ សិរីមន្ត មួយបទដែលប្រើកាំភ្លើងទឹកមិនចំណេញដល់សេដ្ឋកិច្ចខ្មែរថែមទាំងខាតដល់វប្បធម៌និងសុវត្ថិភាព។ ក្រោយមានការប្រតិកម្មប្រឆាំងទៅលើបទចម្រៀងរបស់ខ្លួន ឧកញ៉ា ខេមរៈ សិរីមន្ត បានលើកឡើងដោយប្រយោលថា បទរបស់លោកមិនមែនជាបទបែបប្រពៃណីទេគឺជាបទបែបសប្បាយៗចង្វាក់បែបទំនើប។ ចំណែកឯ កាំភ្លើងជ័ររបស់ក្មេងៗលេងមានប្រភពមកពីអឺរ៉ុបហើយបានច្នៃដាក់អក្សរអង់គ្លេសថា «I love Cambodia» និងអក្សរខ្មែរថា «ខ្ញុំស្រលាញ់កម្ពុជា»។
កាលពីថ្ងៃទី២៧ ខែមីនា ឆ្នាំ២០២៤ ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានលើកឡើងនៅលើបណ្តាញសង្គមហ្វេកប៊ុកនូវរូបភាពរបស់តារាចម្រៀងឧកញ៉ា ខេមរៈ សិរីមន្ត ភ្ជាប់ជាមួយខ្លឹមសារថា «ខ្ញុំសូមប្រឆាំងដាច់ខាត
វីឌីអូចម្រៀងបែបនេះ នាំភ្លើតភ្លើនប្រើកាំភ្លើងទឹក…! នាំក្មេងៗ ប្រើប្រាស់ភ្លូកទឹកភ្លូកដី មិនចំណេញអីនឹងសេដ្ឋកិច្ចខ្មែរទេ ថែមទាំងខាតខាងវប្បធម៌ និងសុវត្ថិភាពទៀតផង។ ម្យ៉ាងបើ មើលទៅលើសម្លៀកបំពាក់ ក៏យ៉ាប់ដែរ…? ពិចារណាឡើងវិញទៅ!»។
ការលើកឡើងរបស់ អគ្គលេខាធិការរាជបណ្ឌិត្យសភាកម្ពុជា ប្រឆាំងនឹងបទចម្រៀងរបស់ឧកញ៉ា ខេមរៈ សិរីមន្ត ទៅលើការប្រើប្រាស់កាំភ្លើងបាញ់ទឹក និងសំលៀកបំពាក់នេះដែរ នៅយប់ថ្ងៃទី២៧ ខែមីនា ឆ្នាំ២០២៤ ឧកញ៉ា ខេមរៈ សិរីមន្ត បានលើកឡើងដោយប្រយោលនៅលើបណ្តាញសង្គមដែរថា «សូមអរគុណបងប្អូនទាំងអស់គ្នាដែលបានចាប់អារម្មណ៍ MV បទ “ឆ្នាំនឹងសប្បាយខ្លាំង” បទនេះមិនមែនជាបទបែបប្រពៃណីទេគឺជាបទបែបសប្បាយៗចង្វាក់បែបទំនើប តាមសម័យកាលទំនើប។ មួយវិញទៀត យើងបានផ្សាភ្ជាប់ជាមួយនឹងក្អមខ្មែរនិង កាំភ្លើងជ័ររបស់ក្មេងៗលេងមានប្រភពមកពីអឺរ៉ុប ដែលមានលក់ពាសពេញពិភពលោក»។
តារាចម្រៀងមានងារជាឧកញ៉ារូបនេះបានលើកឡើងទៀតថា « យើងបានច្នៃដាក់អក្សរអង់គ្លេសថា “I love Cambodia” និងអក្សរខ្មែរ ថា “ខ្ញុំស្រលាញ់កម្ពុជា” នៅលើកាំភ្លើងផងដែរ សង្ឃឹមថាបងប្អូននឹងរីករាយរាំលេង នាពេលចូលឆ្នាំថ្មីខាងមុខនេះ ហើយខ្ញុំបាទ ក៏មានបទចម្រៀងលក្ខណៈប្រពៃណីជាច្រើនបទទៀតដែលត្រៀមចេញផងដែរ។ ពេញលេងហើយធីមយើង»៕