យោងតាមការស្ទង់មតិមួយបង្ហាញថា នារីសម័យថ្មីភាគច្រើនបានសម្រេចចិត្តទាក់ទងទៅបុរសមុន បើនាងចាប់អារម្មណ៍លើបុរសនោះ ។ នៅទីបំផុត ពួកនាងមានឱកាសសមតាមបំណងរបស់ខ្លួនទៀតផង ។ វាខុសពីសម័យមុន ដែលនារីៗត្រូវរង់ចាំឱ្យបុរសទាក់ទងមកនាងមុន ហើយនាងគ្មានសេចក្តីក្លាហានក្នុងការនិយាយថា ចូលចិត្តទៅកាន់បុរសណាម្នាក់ទេ ។

លទ្ធផលការស្ទង់មតិមួយរបស់អ្នកស្រាវជ្រាវមកពីសាកលវិទ្យាល័យ Webster និងសាកលវិទ្យាល័យ Chicago បង្ហាញថា ស្រ្តីជនជាតិអាមេរិកមិនចង់ឱ្យខ្លួនក្លាយជាអ្នករង់ចាំឱ្យបុរសមកទាក់ទងនាងមុនទេ បើទោះជាទំនៀមទម្លាប់ ឬការគិតរបស់មនុស្សសម័យមុន ហាក់ដូចជាបណ្តុះគំនិតមួយឱ្យគេជឿថា ស្ត្រីត្រូវតែរង់ចាំឱ្យបុរសទាក់ទងមុន ព្រោះមើលទៅ ធ្វើឱ្យនាងគ្មានតម្លៃជាស្ត្រី ។

ផ្ទុយទៅវិញ បច្ចុប្បន្ននេះ ស្ត្រីមានសិទ្ធិស្មើគ្នាជាមួយបុរសដែរ ហើយមិនថាស្ត្រី ឬបុរស គឺជាអ្នកចាប់ផ្តើមមុន វាគ្មានអ្វីខូចខាតទេ ។ ម្យ៉ាងទៀត ការរង់ចាំឱ្យអ្នកណាម្នាក់មកប្រាប់ថា ចូលចិត្ត ឬស្រឡាញ់យើងនោះ ហាក់ដូចជាបានផ្តល់អំណាចទៅឱ្យខាងបុរសច្រើនជាងស្ត្រី ហើយបុរសតែងតែគិតថា ខ្លួនជាអ្នកចាប់ផ្តើមរឿងនេះមុន ឬខ្លួនមានសិទ្ធិជ្រើសរើសមុន ។

ហេតុនេះ ទើបស្រីៗនៅអាមេរិកចាប់ផ្តើមទាក់ទងទៅកាន់បុរសមុន ដើម្បីធ្វើតាមអារម្មណ៍របស់ខ្លួនឯង ។ តាមលទ្ធផលស្ទង់មតិបង្ហាញថា ស្ត្រីអាមេរិក៨៦% បានសម្រេចចិត្តសុំរាប់អានបុរសណាម្នាក់ដែលខ្លួនចូលចិត្ត ហើយពួកនាងមានឱកាសសមបំណងរហូតដល់៧៤% ។ លើសពីនេះ នារីភាគច្រើនបានដឹងពីវិធីសុំរាប់អានបុរស ហើយវិធីទាំងនេះមិនធ្វើឱ្យនាងខូចខាតកេរ្តិ៍ឈ្មោះអ្វីទេ ថែមទាំងមានតម្លៃសម្រាប់ខ្លួនឯងទៀតផង ។

នារីម្នាក់បានចែករំលែកនូវបទពិសោធន៍ផ្ទាល់ខ្លួនដើម្បីសុំរាប់អានបុរសដែលនាងចូលចិត្ត ដោយនាងប្រាប់ថា ជំហានដំបូង នាងចាប់ផ្តើមជជែកជាមួយបុរសនោះឱ្យស្គាល់ពីចំណង់ចំណូលចិត្តជាមុនថា តើបុរសនោះចូលចិត្តអ្វី និងមិនចូលចិត្តអ្វី ។ បន្ទាប់មក នាងក៏ចាប់ផ្តើមជជែកគ្នាកាន់តែច្រើនជាមួយបុរសនោះ ប៉ុន្តែពុំចាំបាច់ហួងហែងខ្លាំងពេកទេ ព្រោះនឹងធ្វើឱ្យបុរសនោះខ្លាច និងចាកចេញពីយើង ។

ក្រៅពីនេះ ការយកចិត្តទុកដាក់លើមនុស្សជាទីស្រឡាញ់របស់យើង គឺជារឿងសំខាន់បំផុត ដូចជា ៖ យើងត្រូវឧស្សាហ៍ផ្ញើសារ ឬទូរស័ព្ទសួរសុខទុក្ខបុរសនោះជាប្រចាំ ។ យើងអាចទិញនំដែលគាត់ចូលចិត្តបរិភោគយកទៅផ្ញើ រួចហើយបបួលគាត់ទៅធ្វើការងារណាំមួយដែលគាត់ចូលចិត្ត ។ បើធ្វើបែបនេះធានាថា មិនយូរទេ បុរសនោះនឹងចូលចិត្តយើងមិនខាន ។

ចំណុចសំខាន់មួយទៀត គឺហាមធ្វើខ្លួនជាម្ចាស់កម្មសិទ្ធិលើបុរសនោះខ្លាំងពេក ព្រោះបុរសមួយចំនួនមិនចូលចិត្តឱ្យនារីណាម្នាក់បង្ហាញថា ខ្លួនជាម្ចាស់កម្មសិទ្ធិខ្លាំងពេកទេ ។ ដូច្នេះ គួរតែរក្សាគម្លាតទំនាក់ទំនងផងដែរ និងកុំឱ្យគេមានអារម្មណ៍ថាមិនស្រួលចិត្ត ទាំងដែលអ្នកទាំងពីរមិនទាន់ជាអ្វីនឹងគ្នា ។

ចុងក្រោយ នារីគួរធ្វើជាអ្នកផ្តល់យោបល់ពេលបុរសនោះមានបញ្ហា ព្រោះមនុស្សគ្រប់គ្នា បើជួបរឿងមិនសប្បាយចិត្ត តែងចង់រៀបរាប់រឿងនេះឱ្យអ្នកដទៃស្តាប់ ។ បើយើងអាចជួយផ្តល់យោបល់ពេលបុរសនោះជួបទុក្ខលំបាកបាន គឺគាត់នឹងងាកមកចាប់អារម្មណ៍លើយើងមិនខាន ។ ហេតុនេះ វាជាឱកាសមួយដែលនារីត្រូវហ៊ានទាក់ទងទៅកាន់បុរសមុន ហើយកុំភ្លេចថា បើមិនទាក់ទងមុនទេ សេចក្តីស្នេហាក៏មិនកើតឡើងដែរ ៕

ចំណូលនៃការនាំចេញទំនិញដូចជា បន្លែផ្លែឈើ គ្រាប់ស្វាយចន្ទី ពោត សណ្តែក ថ្នាំជក់ កៅស៊ូ ឈើ សំណល់អេតចាយ និងឧបករណ៍អេឡិចត្រូនិកមួយចំនួនរបស់កម្ពុជាទៅវៀតណាមបានកើនឡើងរហូតដល់ ១១៦.៦% នៅក្នុងខែមករា នៃឆ្នាំ២០២៤ ដែលសម្រេចបាន ១.៩៧ ពាន់លានដុល្លារអាមេរិក កើនឡើង ២៧% បើធៀបនឹងរយៈពេលដូចគ្នាកាលពីឆ្នាំមុន នេះបើយោងតាមសារព័ត៌មានក្នុងស្រុករបស់វៀតណាមដែលបានចុះផ្សាយកាលពីថ្ងៃទី១៣ ខែកុម្ភៈថ្មីៗនេះ។

បើតាមប្រភពដដែលបានឱ្យដឹងទៀតថា នៅដើមឆ្នាំនេះចំនួនទំនិញកម្ពុជាដែលនាំចេញទៅប្រទេសវៀតណាមបានកើនឡើងដល់ជាង ៣៧៣ លានដុល្លារអាមេរិក (កើនឡើង ១១៦,៦ ភាគរយធៀបនឹងរយៈពេលដូចគ្នាកាលពីឆ្នាំមុន)។ ដូច្នេះហើយ បច្ចុប្បន្នវៀតណាមជាប់ចំណាត់ថ្នាក់លេខ២ បន្ទាប់ពីសហរដ្ឋអាមេរិក និងនាំមុខចិន ជប៉ុន ថៃ… ក្នុងចំណាត់ថ្នាក់ទីផ្សារនាំចេញធំជាងគេរបស់កម្ពុជា។ ក្នុងខែមករា ឆ្នាំ២០២៤ ទំហំនៃការនាំចេញ និងនាំចូលសរុបរបស់កម្ពុជាសម្រេចបានជាង ៤ ពាន់លានដុល្លារអាមេរិក កើនឡើង ១៦,៩% ធៀបនឹងរយៈពេលដូចគ្នាក្នុងឆ្នាំ២០២៣។

យោងតាមលោក លឹម ហេង អនុប្រធានសភាពាណិជ្ជកម្មកម្ពុជា បាននិយាយថា សេដ្ឋកិច្ចពិភពលោកបច្ចុប្បន្នកំពុងងើបឡើងវិញជាបណ្តើរៗ ហើយសមត្ថភាពផលិតក្នុងស្រុកកំពុងកើនឡើង ដែលនេះបានជំរុញការផ្លាស់ប្តូរពាណិជ្ជកម្មរវាងកម្ពុជា និងប្រទេសដៃគូ។ ហេតុនេះហើយ ចំណូលនៃការនាំចេញកើនឡើងដោយសារកត្តាសំខាន់ពីរ៖ ទី១ សមត្ថភាពផលិតក្នុងស្រុកកើនឡើង និងទី២ កម្ពុជាមានទីផ្សារនាំចេញធំ ដោយសារការរីករាយនឹងការអនុគ្រោះពន្ធជាមួយដៃគូមួយចំនួន ក៏ដូចជាកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ដែលកម្ពុជាបានចុះហត្ថលេខាចាប់ផ្តើមចូលជាធរមាន។

អនុប្រធានសភាពាណិជ្ជកម្មកម្ពុជា លោក លឹម ហេង បានបង្ហាញជំនឿថា ចំណូលពាណិជ្ជកម្មនាំចេញរបស់ប្រទេសនឹងបន្តកើនឡើងនៅឆ្នាំ ២០២៤ ដោយសារផលិតផលនាំចេញចម្រុះ គុណភាព និងតម្លៃប្រកួតប្រជែងខ្លាំង។ បច្ចុប្បន្ននេះ ក្រៅពីវាយនភណ្ឌ និងកាត់ដេរ កម្ពុជាក៏ជាប្រទេសនាំចេញផលិតផលកសិកម្ម គ្រឿងអេឡិចត្រូ និងទំនិញសំខាន់ៗជាច្រើនផងដែរ៕

បរទេស៖ ប្រទេសនេប៉ាល់ចេញច្បាប់ថ្មីតម្រូវឱ្យអ្នកឡើងភ្នំ Everest ខ្ចប់កាកសំណល់ ឬលាមកត្រឡប់ទៅវិញ បន្ទាប់ពីពួកគេចុះពីលើភ្នំ សម្រាប់ការចោលសំរាមឱ្យបានត្រឹមត្រូវ ក្នុងគោលបំណងរក្សាបរិស្ថាន អនាម័យ និងសុវត្ថិភាពនៅលើភ្នំ។

កាលពីថ្ងៃទី១០ ខែកុម្ភៈ ឆ្នាំ២០២៤ យោងតាម Nepal Desk បានឱ្យដឹងថា រដ្ឋាភិបាលនេប៉ាល់បានសហការជាមួយក្រុងជនបទ Pasang Lhamu និងអាជ្ញាធរទទួលបន្ទុក Mount Everest ដោយកំណត់ថាអ្នកឡើងភ្នំទាំងអស់ចាប់ពីពេលនេះទៅត្រូវតែទទួលខុសត្រូវលើកាកសំណល់របស់ពួកគេ ដោយប្រមូលសំរាមយកទៅបោះចោលឱ្យបានត្រឹមត្រូវនៅជំរុំមូលដ្ឋាន បន្ទាប់ពីពួកគេចុះពីលើភ្នំវិញ។

បទប្បញ្ញត្តិថ្មីនេះត្រូវបានចេញដោយសាលាក្រុង Pasang Lhamu ដែលគ្រប់គ្រងផ្នែកជាច្រើននៃប្រទេសនេប៉ាល់នៃភ្នំអេវឺរ៉េស។ ទោះជាយ៉ាងណា ទាក់ទិននឹងក្លិនស្អុយនៅលើភ្នំ លោក Mingma Sherpa ប្រធានសាលាក្រុងជនបទ Pasang Lhamu បានសម្តែងការព្រួយបារម្ភថា តំបន់នេះអាចនឹងក្លាយជាកន្លែងមិនសូវពេញនិយមដូចមុននោះទេ។ ដោយសារសកម្មភាពរបស់មនុស្សនៅពេលដែលពួកគេស្នាក់នៅលើភ្នំរយៈពេលយូរ នោះសំរាមនានានឹងរលួយបង្កឱ្យមានក្លិនស្អុយខ្លាំង ទោះបីជាពួកគេយកចុះពីលើភ្នំក៏ដោយ ក៏នៅតែមានក្លិនមិនល្អ ដោយសារតែសីតុណ្ហភាពភ្នំត្រជាក់ ដែលបណ្តាលឱ្យក្លិនស្អុយបានយូរ។

Sherpa Tashi សហម្ចាស់ក្រុមហ៊ុន Nepal Seven Summits Treks បាននិយាយថា ការចេញច្បាប់ថ្មីនេះគឺជាការសម្រេចចិត្តត្រឹមត្រូវ ព្រោះការថែរក្សាបរិស្ថាននៅលើភ្នំអេវឺរ៉េសគឺមានសារៈសំខាន់ណាស់។ ប៉ុន្តែទោះជាយ៉ាងណា នេះក៏អាចធ្វើឱ្យការធ្វើដំណើររបស់អតិថិជនកាន់តែពិបាកផងដែរ។ជាទូទៅ នៅស្ថានីយ៍មូលដ្ឋាន (៥,៣៦៤ ម៉ែត្រ) មានតង់បង្គន់ជាច្រើន ដូច្នេះអ្នកឡើងភ្នំអាចប្រើប្រាស់វាបានយ៉ាងងាយស្រួល។ រីឯនៅស្ថានីយ៍ទី១ (កម្ពស់ ៦,០៦៥ ម៉ែត្រ) វិញក្រុមមនុស្សជាច្រើនតែងរៀបចំតង់បង្គន់ដើម្បីឱ្យពួកគេអាច “តាំងទីលំនៅ” ហើយបន្ទាប់មកខ្ចប់វានៅក្នុងថង់មួយរួចយកទៅបោះចោលនៅពេលចុះក្រោម។ ចំពោះស្ថានីយ៍ទី២ ដែលមានកម្ពស់ (៦,៤០០ ម៉ែត្រ) វិញអ្នកឡើងភ្នំជាញឹកញាប់ តែងតែកប់លាមកក្នុងទឹកកក ព្រិល ឬចោលសំរាមកណ្តាលផ្លូវ។

ក្រុមហ៊ុន Waters បាននិយាយថា ស្ថានីយ៍ទី២ ធ្លាប់មានបញ្ហាដោយសារតែកាកសំណល់ទាំងនោះបានបន្តកកកុញនៅក្នុងជ្រោះមិនដែលបាត់ ទើបរដ្ឋាភិបាលសម្រេចចេញច្បាប់ថ្មីនេះ។ គួរបញ្ជាក់ដែរថា កាលពីមុន ប្រទេសនេប៉ាល់តម្រូវឱ្យបុគ្គលិកនៅលើភ្នំជួយសម្អាតសំរាមរបស់អតិថិជននៅពេលចុះពីលើភ្នំ ពួកគេថែមទាំងបានសហការជាមួយម៉ាកល្បីៗជាច្រើនដើម្បីទាក់ទងបញ្ហានេះ។ យោងតាមក្រុមហ៊ុន Waters ជាមួយនឹងបទប្បញ្ញត្តិថ្មីនេះ នឹងតម្រូវឱ្យអតិថិជនទទួលខុសត្រូវសំរាមដោយខ្លួនឯង ទោះជាយ៉ាងណា ដើម្បីជួយអតិថិជនកុំឱ្យមានការលំបាកខ្លាំងក្នុងការប្រមូលសំរាមចុះដោយខ្លួនឯង ក្រុមហ៊ុននឹងប្រមូលផ្តុំបុគ្គលិកឱ្យដឹកជញ្ជូនសំរាមចុះក្រោម ប៉ុន្តែការអនុវត្តបែបនេះសម្រាប់តែស្ថានីយ៍ទី ២ ប៉ុណ្ណោះ៕

សហរដ្ឋអាមេរិក ៖ សារព័ត៌មានបរទេសបានរាយការណ៍ព័ត៌មានបង្ហាញក្នុងសៀវភៅ «The Return of Great Power» ដែលគេនឹងដាក់លក់ជាសាធារណៈនៅខែមីនា ឆ្នាំ២០២៤ ដោយខ្លឹមសារក្នុងសៀវភៅនេះបានលើកឡើងពាក់ព័ន្ធនឹងអតីតទីប្រឹក្សារបស់លោក ដូណាល់ ត្រាំ ជាបេក្ខជនប្រធានាធិបតីអាមេរិក និងជាអតីតប្រធានាធិបតីអាមេរិក ។

ខ្លឹមសារនៅក្នុងសៀវភៅ «The Return of Great Power» បានសរសេរថា ប្រសិនបើលោក ដូណាល់ ត្រាំ ជាបេក្ខជនប្រធានាធិបតីអាមេរិក អាចយកឈ្នះលើលោក ចូ បៃឌិន ក្នុងការបោះឆ្នោតជ្រើសរើសប្រធានាធិបតីអាមេរិក ដែលនឹងប្រព្រឹត្តឡើងនៅចុងឆ្នាំ២០២៤ នោះ លោក ដូណាល់ ត្រាំ នឹងដកអាមេរិកចេញពីសមាជិកអង្គការសន្ធិសញ្ញាអាត្លង់ទិកខាងជើង (NATO) ។

លោក John Kelly គឺជាឧត្តមសេនីយ៍ចូលនិវត្តន៍ និងធ្លាប់ធ្វើជានាយកគ្រប់គ្រងនៅសេតវិមានអាមេរិកក្នុងសម័យរដ្ឋាភិបាលរបស់លោក ដូណាល់ ត្រាំ លើកឡើងថា លោក ដូណាល់ ត្រាំ ធ្លាប់បាននិយាយអំពីថវិកាយោធារបស់ប្រទេសជាសមាជិកអង្គការ NATO ដែលបានចំណាយ បើធៀបជាមួយអាមេរិក ។

កន្លងមក លោក ដូណាល់ ត្រាំ ធ្លាប់បានបញ្ជាឱ្យមន្ត្រីក្រោមឱវាទរៀបចំឯកសារដកអាមេរិកចេញពីសមាជិកអង្គការ NATO ម្តងហើយ ប៉ុន្តែពេលនោះ មានមតិប្រឆាំងច្រើនជាងមតិគាំទ្រ ទើបធ្វើឱ្យសំណើសុំដកខ្លួនរបស់អាមេរិកចេញពីអង្គការនេះត្រូវច្រានចោល ។

ហេតុនេះ ប្រសិនបើលោក ដូណាល់ ត្រាំ ពិតជាដកអាមេរិកចេញពីសមាជិកអង្គការ NATO មែននោះ ក្រៅពីការអង្រួនកងកម្លាំងអង្គការ NATO ហើយ វានឹងអាចធ្វើឱ្យប៉ះពាល់ដល់កិច្ចសហការផ្នែកយោធារវាងអាមេរិកជាមួយប្រទេសជប៉ុន និងកូរ៉េខាងត្បូង ផងដែរ ៕

ជាការពិតណាស់ថាភពផែនដីរបស់យើងនេះនៅមានអ្វីជាច្រើនដែលនៅតែមិនទាន់បានរុករក ខណៈបច្ចុប្បន្នការស្រាវជ្រាវលើលំហអាកាសសម្រេចបានពាក់កណ្តាលហើយ។ ទោះជាយ៉ាងណា ពិភពបាតសមុទ្រនៅតែជាអាថ៌កំបាំងនិងពិបាកនៅក្នុងការសិក្សាស្រាវជ្រាវជាងគេបំផុតក្នុងចំណោមនោះ។

បេសកកម្មនាពេលថ្មីៗនេះ ដោយគម្រោង Seabed ២០៣០ បានបង្ហាញវត្តមានរបស់តំបន់មាត់សមុទ្រដ៏ធំសម្បើមចំនួន ៤ ដែលគេហៅថា«ភ្នំក្រោមបាតសមុទ្រ» នៅជុំវិញអាមេរិកខាងត្បូង ដោយបើកព្រំដែនថ្មីសម្រាប់ជីវិតសត្វសមុទ្រ និងជីវចម្រុះ។

ភ្នំក្រោមសមុទ្រទាំងនេះ គឺជាភ្នំភ្លើងដែលផុតពូជអស់ហើយ ជាមួយនឹងកម្ពស់ខ្ពស់បំផុតប្រមាណនឹងជាង ២.៤០០ម៉ែត្រពីបាតសមុទ្រ។ របកគំហើញនេះអាចធ្វើទៅបានដោយការរកឃើញការផ្លាស់ប្តូរបន្តិចបន្តួចនៃកម្ពស់ផ្ទៃមហាសមុទ្រ ដែលជាបាតុភូតបង្កឡើងដោយការទាញទំនាញនៃភ្នំក្រោមទឹកដ៏ធំ។ ការរកឃើញនេះត្រូវបានធ្វើឡើងតាមរយៈផ្កាយរណប ដោយផ្តល់នូវវិធីសាស្រ្តថ្មីនៃការរុករក។

ភ្នំបាតសមុទ្រមានទីតាំងនៅជិតឆ្នេរសមុទ្រនៃប្រទេសប៉េរូ និងឈីលី អំឡុងពេលដែលក្រុមបេសកកម្មធ្វើដំណើរឆ្លងកាត់សមុទ្រប៉ាស៊ីហ្វិកខាងកើត។ កម្ពស់ខ្ពស់បំផុតនៃកំពូលភ្នំថ្មីនេះគឺប្រមាណ ២.៤០០ ម៉ែត្រពីលើបាតសមុទ្រ ដែលវាខ្ពស់ជាងសំណង់អគារខ្ពស់បំផុតលើផែនដីរហូតដល់ទៅបីដង។

អ្វីដែលធ្វើឱ្យតំបន់សមុទ្រទាំងនេះមានការចាប់អារម្មណ៍ជាពិសេសគឺតួនាទីរបស់ភ្នំនេះគឺជា “ចំណុចក្តៅជីវសាស្រ្ត” ។ ភ្នំក្រោមសមុទ្រទាំងនេះនឹងផ្តល់នូវជម្រកសំខាន់ៗសម្រាប់ពពួកសត្វសមុទ្រ ដែលដើរតួជាសំបុកនៃជីវចម្រុះ។ ផ្នែកដ៏ចោតនៃភ្នំទាំងនេះជារឿយៗជាសំណល់នៃភ្នំភ្លើងដែលផុតពូជ និងទាក់ទាញប្រភេទសត្វជាច្រើនប្រភេទ។

គួរបញ្ជាក់ថា របកគំហើញនៃភ្នំបាតសមុទ្រទាំងនេះមិនគ្រាន់តែជាសមិទ្ធិផលភូមិសាស្ត្រប៉ុណ្ណោះទេ ប៉ុន្តែក៏ជាការបោះជំហានយ៉ាងសំខាន់ក្នុងការយល់ដឹងអំពីជីវៈចម្រុះនៃភពផែនដីរបស់យើង។ ជាមួយនឹងការគូសផែនទីនៃភ្នំក្រោមមហាសមុទ្រដែលមិនស្គាល់ពីមុនទាំងនេះ អ្នកស្រាវជ្រាវបានទទួលការយល់ដឹងថ្មីអំពីទម្រង់ជីវិតដ៏ធំទូលាយដែលរស់នៅក្នុងមហាសមុទ្ររបស់យើង៕