សហរដ្ឋអាមេរិក ៖ កាលពីថ្ងៃទី១៩ ខែកុម្ភៈ ឆ្នាំ២០២៤ សារព័ត៌មានបរទេសរាយការណ៍ថា បុគ្គលិករត់តុក្នុងភោជនីយដ្ឋានបានឈរស្រឡាំងកាំង នៅពេលភ្ញៀវឱ្យលុយធីបច្រើនខ្លាំងពេក ខណៈថ្លៃម្ហូបអាហាររបស់ភ្ញៀវអស់តិចតួចប៉ុណ្ណោះ ។ បុគ្គលិករត់តុរូបនេះញីភ្នែកចុះឡើង ព្រោះស្មានថា ភ្ញៀវសរសេរលើសលេខសូន្យមួយខ្ទង់ ប៉ុន្តែភ្ញៀវបានលើកឡើងនូវហេតុផលមួយនេះ ។

កាលពីដើមខែកុម្ភៈ ឆ្នាំ២០២៤ បុគ្គលិករត់តុនៅភោជនីយដ្ឋានមួយកន្លែងនៅរដ្ឋមីឈីហ្គេន សហរដ្ឋអាមេរិក បានភ្ញាក់ផ្អើលយ៉ាងខ្លាំង ក្រោយពីបានជួបភ្ញៀវម្នាក់ចិត្តល្អ ។ បុគ្គលិករត់តុ និយាយថា ភ្ញៀវរូបនេះបានឱ្យលុយធីបដល់អ្នករត់តុ រហូតដល់១ម៉ឺនដុល្លារអាមេរិក ខណៈថ្លៃអាហាររបស់ភ្ញៀវអស់ត្រឹមតែ៣២.៤៣ដុល្លារអាមេរិក ប៉ុណ្ណោះ ។

ចំណែក Tim Sweeney គឺជានាយកគ្រប់គ្រងភោជនីយដ្ឋាន លើកឡើងថា កន្លងមក ខាងភោជនីយដ្ឋានមិនធ្លាប់ជួបភ្ញៀវ ដែលហ៊ានផ្តល់លុយធីបឱ្យយើងក្នុងទឹកប្រាក់យ៉ាងច្រើនបែបនេះទេ ។ ជាធម្មតា ភ្ញៀវភាគច្រើនឱ្យលុយធីបដល់បុគ្គលិកយើង ត្រឹមតែ១០០ដុល្លារអាមេរិក ។ ប៉ុន្តែសម្រាប់ភ្ញៀវម្នាក់នេះវិញ តម្លៃអាហាររបស់ភ្ញៀវអស់ត្រឹមតែ៣២.៤៣ដុល្លារអាមេរិកប៉ុណ្ណោះ ប៉ុន្តែភ្ញៀវបែរជាឱ្យលុយធីបច្រើនជាងតម្លៃអាហារ ។ ហេតុនេះ រូបគាត់ជានាយកគ្រប់គ្រងភោជនីយដ្ឋាន ក៏ប្រញាប់រត់ទៅជជែកជាមួយភ្ញៀវចិត្តល្អ ។

ភ្ញៀវចិត្តល្អដែលបានផ្តល់លុយធីបឱ្យបុគ្គលិករត់តុក្នុងភោជនីយដ្ឋាន ឈ្មោះ «Mark» បានប្រាប់ពីហេតុផលដែលគាត់ផ្តល់រង្វាន់ជាលុយធីបយ៉ាងច្រើននេះថា ៖ «វាជាការផ្តល់កិត្តិយសដល់មិត្តសម្លាញ់របស់ខ្ញុំម្នាក់ ដែលទើបតែទទួលមរណភាព» ។

រីឯបុគ្គលិករត់តុ ប្រាប់ថា ៖ «ភ្ញៀវចិត្តល្អរូបខាងលើបានធ្វើដំណើរមកទីក្រុងនេះ ដើម្បីចូលរួមពិធីបុណ្យសពមិត្តភក្តិរបស់គាត់ ។ ហេតុនេះ គាត់ចង់កាន់ទុក្ខមិត្តភក្តិម្នាក់ដែលទើបតែស្លាប់ ហើយប្រាក់នេះអាចធ្វើឱ្យមនុស្សជាច្រើនទៀតរីករាយ និងស្រស់ថ្លាក្នុងជីវិត» ។

ហាងភោជនីយដ្ឋាន ក៏បានបែងចែកលុយធីបចំនួន១ម៉ឺនដុល្លារអាមេរិក ទៅបុគ្គលិកក្នុងភោជនីយដ្ឋានចំនួន៩នាក់ ដែលពួកគេបានធ្វើការនៅថ្ងៃនោះ ។ ហេតុនេះ បុគ្គលិកម្នាក់ៗទទួលបានប្រាក់ចំនួន១.១០០ដុល្លារអាមេរិក ។

បុគ្គលិកភោជនីយដ្ឋានម្នាក់ឈ្មោះ Mulik និយាយថា នាងទើបតែបញ្ចប់ការសិក្សានៅសាកលវិទ្យាល័យ Western Michigan ហើយនាងមានគម្រោងថា នឹងយកប្រាក់នេះ (លុយធីបពីភ្ញៀវ) ទៅសងគេវិញ ពីព្រោះនាងបានខ្ចីប្រាក់គេសម្រាប់ចំណាយក្នុងការសិក្សា ៕

កូរ៉េខាងត្បូង៖ បុរសជនជាតិកូរ៉េខាងត្បូងចំនួន ១៦,០០០ នាក់បានជ្រើសរើសមិនធ្វើការដោយចំណាយពេលនៅផ្ទះដើម្បីចិញ្ចឹមកូនរបស់ពួកគេវិញ ដែលនេះគឺជាការកើនឡើងគួរឱ្យកត់សម្គាល់បើប្រៀបធៀបទៅនឹងឆ្នាំមុន។
យោងតាមទិន្នន័យដែលចេញផ្សាយដោយ Statistics Korea កាលពីថ្ងៃទី២១ ខែកុម្ភៈ ឆ្នាំ២០២៤ បានបង្ហាញថានិន្នាការបុរសនៅក្នុងប្រទេសនេះកំពុង “អសកម្មខាងសេដ្ឋកិច្ច” ដែលជាអ្នកមិនធ្វើការ ឬមិនស្វែងរកការងារធ្វើ ដោយហេតុផលចង់ចំណាយពេលវេលាមើលថែកុមារកំពុងកើនឡើងយ៉ាងខ្លាំង។

បើយោងតាមស្ថិតិរបស់ប្រទេសកូរ៉េខាងត្បូង ចំនួនបុរសដែលអសកម្មផ្នែកសេដ្ឋកិច្ចក្នុងឆ្នាំ២០២៣ ដោយលើកឡើងពីការថែទាំកុមារមានចំនួនប្រហែល ១៦,០០០ នាក់ ដែលជាការកត់សម្គាល់ខ្ពស់បំផុតចាប់តាំងពីប្រទេសនេះបានចាប់ផ្តើមប្រមូលទិន្នន័យក្នុងខែមិថុនា ឆ្នាំ១៩៩៩។ តួលេខនេះបានបង្ហាញពីការកើនឡើង ៣៧.៤ ភាគរយពី ១២,០០០ នាក់កាលពីឆ្នាំ ២០២២ ហើយបានកើនឡើងជិត ៣ ដងក្នុងរយៈពេលមួយទសវត្សរ៍ពី ៦,០០០ នាក់ក្នុងឆ្នាំ ២០១៣។

និន្នាការនេះត្រូវបានគេនិយាយថាកើតចេញពីរដ្ឋាភិបាលកូរ៉េបានបង្កើនគោលការណ៍ឈប់សម្រាកលំហែមាតុភាពរបស់ខ្លួនសម្រាប់បុរសនិងស្វាមីក្នុងប្រទេសនេះក៏បានផ្លាស់ប្តូរការគិតអំពីការនៅផ្ទះដើម្បីមើលថែកូនផងដែរ។ ក្នុងចំណោមបុរសដែលជ្រើសរើស នៅផ្ទះដើម្បីមើលថែកូន មានអាយុលើសពី ៤០ឆ្នាំប្រមាណ ៨៤០០នាក់ ស្មើនឹងជាង ៥០% រីឯបុរសប្រហែល ៤,៦០០ នាក់ដែលមានអាយុលើសពី ៣០ ឆ្នាំគឺស្មើនឹងជិត ៣០%។

ជាមួយគ្នានេះដែរ ចំនួនស្ត្រីកូរ៉េដែលមិនធ្វើការ ហើយជ្រើសរើសនៅផ្ទះដើម្បីមើលថែកុមារក្នុងឆ្នាំ ២០២៣ ក៏មានចំនួនច្រើនផងដែរប្រហែល ៨៤០,០០០ នាក់ កើនឡើង ១៤.៧% បើធៀបទៅនឹងឆ្នាំមុន។ ក្នុងនោះស្ត្រីជនជាតិកូរ៉េ ប្រហែល ៤៩៧,០០០ នាក់ដែលមានអាយុលើសពី ៣០ ឆ្នាំជ្រើសរើសនៅផ្ទះដើម្បីមើលថែកូនរបស់ពួកគេដែលស្មើនឹង ៥៩% ។ រីឯក្រុមអាយុខ្ពស់បំផុតទីពីរគឺមានអាយុលើសពី ៤០ ឆ្នាំដែលមានមនុស្ស ២១៩.០០០នាក់ ស្មើនឹង ២៦.១%។

គួរបញ្ជាក់ដែរថា បច្ចុប្បន្នរដ្ឋាភិបាលកូរ៉េកំពុងបង្កើនការគាំទ្រដល់មាតាបិតាជាមធ្យោបាយមួយដើម្បីកែលម្អអត្រាកំណើតទាប។ ក្រសួងសមភាពយេនឌ័រ និងគ្រួសារកូរ៉េ បានដាក់ចេញនូវវិធានការជាបន្តបន្ទាប់ ដើម្បីគាំទ្រគ្រួសារដែលមានឪពុកម្តាយទាំងពីរធ្វើការ ដូចជាការបង្កើនសេវាថែទាំកុមារ។ សេវាកម្មនេះនឹងនាំអ្នកមើលថែទាំកុមារដែលមានជំនាញវិជ្ជាជីវៈមកមើលថែទាំកុមារអាយុក្រោម ៣៦ ខែនៅផ្ទះ។

ហើយគ្រួសារដែលមានកូនលើសពី ២ នាក់ និងឪពុកម្តាយទាំងពីរកំពុងធ្វើការក៏ត្រូវបានឧបត្ថម្ភធនមួយផ្នែកដោយរដ្ឋាភិបាលកូរ៉េសម្រាប់ថ្លៃថែទាំកុមារផងដែរ។ ប្រទេសនេះក៏កំពុងសាកល្បងសេវាថែទាំកុមារសង្គ្រោះបន្ទាន់ ដែលអនុញ្ញាតឱ្យឪពុកម្តាយស្វែងរកអ្នកមើលថែទាំទារកយ៉ាងឆាប់រហ័ស ដើម្បីដោះស្រាយបញ្ហាបន្ទាន់នៅកន្លែងធ្វើការ៕

ប្រទេសអេស្ប៉ាញ ៖ កាលពីថ្ងៃទី២១ ខែកុម្ភៈ ឆ្នាំ២០២៤ សារព័ត៌មានបរទេសរាយការណ៍ថា អ្នកប្រើប្រាស់ TikTok ម្នាក់ ជនជាតិអេស្ប៉ាញ បានបង្ហោះវីដេអូមួយក្នុងបណ្តាញសង្គម ដែលធ្វើឱ្យមហាជនរិះគន់នាងយ៉ាងខ្លាំង ។ នារីរូបនេះអះអាងថា នាងអាចព្យាបាលជំងឺភ្នែកឡើងបាយរបស់ខ្លួនបាន ដោយគ្រាន់តែនាងយកទឹកនោមមកបន្តក់ក្នុងភ្នែក ។

ការណែនាំពីការព្យាបាលភ្នែកដោយទឹកនោម ឬព្យាបាលដោយអង្គធាតុរាវ (Urine Therapy) ចាត់ទុកថា វាជាវិធីព្យាបាលដ៏ពេញនិយមមួយក្រៅពីផ្នែកពេទ្យនៅប្រទេសមួយចំនួន ដោយមានការបង្ហាញភស្តុតាងពីការប្រើប្រាស់ទឹកនោមសម្រាប់ព្យាបាលជំងឺភ្នែក ហើយអ្នកជំងឺពុំចាំបាច់ប្រើប្រាស់ថ្នាំពេទ្យនាពេលបច្ចុប្បន្នទេ ។ គេបានព្យាបាលតាមវិធីនេះខុសៗគ្នា ដូចជា ៖ យកទឹកនោមមកជូត និងម៉ាស្សានៅលើស្បែក ឬផឹក ។

នារីជនជាតិអេស្ប៉ាញម្នាក់ឈ្មោះ ស៊ូអាម៉ា ប្រាអ៊ីឡេ និយាយថា នាងអាចប្រើប្រាស់ទឹកនោមរបស់ខ្លួន ដើម្បីព្យាបាលជំងឺភ្នែកឡើងបាយ ។ ចំណែកវីដេអូដែលនាងបានបង្ហោះក្នុងបណ្តាញសង្គម បានធ្វើឱ្យផ្ទុះការរិះគន់យ៉ាងខ្លាំងក្លាពីទង្វើរបស់នាង ក្នុងចំណោមអ្នកបានទស្សនាវីដេអូនេះ ។

នាង ស៊ូអាម៉ា និយាយថា ការប្រើប្រាស់ទឹកនោមក្នុងការព្យាបាលជំងឺនោះ វាល្អជាងការប្រើប្រាស់ថ្នាំពេទ្យនាពេលបច្ចុប្បន្ន ដែលថ្នាំពេទ្យទាំងនេះពោរពេញទៅដោយសារធាតុគីមី ហើយនាងជឿថា ថ្នាំពេទ្យនឹងមានគ្រោះថ្នាក់ដល់រាងកាយ ។ នាងបញ្ជាក់ថា ក្រោយពេលនាងយកទឹកនោមមកបន្តក់ក្នុងភ្នែកជារៀងរាល់ថ្ងៃរួចមក វាបានជួយឱ្យភ្នែកស្រវាំងរបស់នាង ជាសះស្បើយមកធម្មតាវិញ ។

នាង ស៊ូអាម៉ា បន្តទៀតថា ដើម្បីឱ្យការព្យាបាលភ្នែករបស់នាងទទួលបានលទ្ធផលល្អបំផុត គឺនាងត្រូវបន្តក់ទឹកនោមក្នុងភ្នែកជារៀងរាល់ថ្ងៃ នៅពេលព្រឹក និងពេលល្ងាច ។ ក្រៅពីនេះ នាងក៏បានយកទឹកនោមខាប់មកបន្តក់ភ្នែកនៅពេលយប់ទៀតផង ។

ក្រោយពីវីដេអូរបស់នាងបានផ្សព្វផ្សាយក្នុង TikTok ធ្វើឱ្យមហាជនរិះគន់នាងយ៉ាងខ្លាំង ហើយពួកគេថែមទាំងបានចែកចាយវីដេអូនេះទៅបណ្តាញសង្គមផ្សេងទៀតផងដែរ ។ មហាជននិយាយថា ការយកទឹកនោមមកបន្តក់ភ្នែកបែបនេះ គឺវាហួសហេតុពេក ហើយមនុស្សទូទៅមិនអាចទទួលយកបានទេ ។ លើសពីនេះ គេពិបាកនឹងជឿណាស់ថា វាអាចព្យាបាលជំងឺភ្នែកបានពិតមែន ។

ក្រៅពីនេះ នៅពុំទាន់មានការស្រាវជ្រាវ ឬភស្តុតាងផ្នែកពេទ្យណាមួយបញ្ជាក់ថា ទឹកនោមពិតជាមានប្រយោជន៍សម្រាប់ការព្យាបាលភ្នែក តាមនាង ស៊ូអាម៉ា លើកឡើងទេ ។ ម្យ៉ាងទៀត វិធីព្យាបាលដោយប្រើប្រាស់ទឹកនោមនេះ បើទោះជាគេចាត់ទុកថា វាជាវិធីព្យាបាលតាមបែបបុរាណនៅប្រទេសមួយចំនួនក្តី ប៉ុន្តែគេមិនបានណែនាំឱ្យប្រើប្រាស់វិធីនេះទេ ព្រោះវាគ្រាន់តែជាជំនឿផ្ទាល់ខ្លួនរបស់បុគ្គលម្នាក់ៗប៉ុណ្ណោះ ៕

ប្រទេសកូរ៉េខាងត្បូង ៖ អ្នកលេងបណ្តាញសង្គមនៅប្រទេសកូរ៉េខាងត្បូងបានរួមគ្នាដាស់តឿនពលរដ្ឋនៅទូទាំងប្រទេស ក៏ដូចជាភ្ញៀវទេសចរបរទេសថា បើពួកគេមកដើរកម្សាន្តនៅកូរ៉េខាងត្បូង ក្នុងខែកុម្ភៈ ឆ្នាំ២០២៤ នេះ គួរតែប្រុងប្រយ័ត្នឱ្យបានខ្ពស់លើបញ្ហាសុខភាព, ការឈឺថ្កាត់ និងចៀសផុតពីគ្រោះថ្នាក់ផ្សេងៗ ។

អ្នកលេងបណ្តាញសង្គមកូរ៉េខាងត្បូងលើកឡើងថា បច្ចុប្បន្ន មិនថាពលរដ្ឋកូរ៉េខាងត្បូង ឬភ្ញៀវទេសចរបរទេសមានប្រាក់ច្រើនប៉ុនណា ឬមានការធានារ៉ាប់រងការធ្វើដំណើរ ដែលគ្របដណ្តប់លើការចំណាយក្នុងករណីរងរបួស គឺពួកគេនឹងទទួលបានសេវាកម្មនៅមន្ទីរពេទ្យមិនល្អប៉ុន្មានទេ ឬពួកគេអាចមិនទទួលបានការព្យាបាលជំងឺទេ នៅកូរ៉េខាងត្បូង ។

នៅដើមខែកុម្ភៈ ឆ្នាំ២០២៤ នៅប្រទេសកូរ៉េខាងត្បូងបានប្រឈមនឹងបញ្ហាក្រុមគ្រូពេទ្យហាត់ការ និងគ្រូពេទ្យទូទៅ នាំគ្នាប្រឆាំងតវ៉ានឹងគោលនយោបាយបង្កើនចំនួនគ្រូពេទ្យយ៉ាងច្រើនរបស់រដ្ឋាភិបាល ។ ហេតុនេះ ទើបធ្វើឱ្យគ្រូពេទ្យទាំងនេះដាក់ពាក្យលាឈប់ពីការងារបន្តិចម្តងៗ ហើយគ្រូពេទ្យមួយចំនួនទៀតមិនមកបំពេញការងាររបស់ខ្លួន ។

បើតាមទិន្នន័យចុងក្រោយបង្ហាញថា មានគ្រូពេទ្យរហូតដល់ជាង៦.៧០០នាក់ ដែលបំពេញការងារនៅមន្ទីរពេទ្យចំនួន១០០កន្លែងនៅប្រទេសកូរ៉េខាងត្បូង បានដាក់ពាក្យលាឈប់ពីការងាររបស់ខ្លួន ។ ចំណែកគ្រូពេទ្យជាង៧០០នាក់ទៀតមិនមកធ្វើការទេ ដើម្បីតវ៉ាប្រឆាំងនឹងគោលនយោបាយបង្កើនចំនួនគ្រូពេទ្យរបស់រដ្ឋាភិបាល ។

សមាគមគ្រូពេទ្យកូរ៉េខាងត្បូងបញ្ជាក់ថា ចំនួនគ្រូពេទ្យនាពេលបច្ចុប្បន្ន (ឆ្នាំ២០២៤) គឺគ្រប់គ្រាន់សម្រាប់ផ្តល់សេវាកម្មផ្នែកសុខភាពដល់ពលរដ្ឋ ប៉ុន្តែការបង្កើនចំនួនគ្រូពេទ្យ គឺជាការបង្កើនបន្ទុកផ្នែកហិរញ្ញវត្ថុក្នុងប្រព័ន្ធធានារ៉ាប់រងសុខភាព ។

ប៉ុន្តែរដ្ឋាភិបាលកូរ៉េខាងត្បូងយល់ឃើញផ្ទុយពីនេះ ដោយរដ្ឋាភិបាលបញ្ជាក់ថា បច្ចុប្បន្ន នៅប្រទេសកូរ៉េខាងត្បូងប្រឈមនឹងបញ្ហាខ្វះខាតគ្រូពេទ្យ ជាពិសេស នៅតំបន់ជនបទ និងវេជ្ជបណ្ឌិតឯកទេស ។ រដ្ឋាភិបាលបានចេញគោលនយោបាយបង្កើនចំនួនគ្រូពេទ្យនេះ ដោយសារតែបារម្ភពីសុខភាពរបស់ពលរដ្ឋ ។

ចំណែកក្រុមគ្រូពេទ្យដែលមិនឯកភាពនឹងគោលនយោបាយនេះនិយាយថា រដ្ឋាភិបាលមិនបានពិភាក្សាពីការបង្កើននិស្សិតពេទ្យជាមួយពួកគេទេ ។ គ្រូពេទ្យភាគច្រើននិយាយថា គម្រោងបង្កើនចំនួននិស្សិតពេទ្យ នឹងធ្វើឱ្យគុណភាពនៃការសិក្សាផ្នែកពេទ្យ និងការផ្តល់សេវាកម្មផ្នែកពេទ្យ ធ្លាក់ចុះនៅប្រទេសកូរ៉េខាងត្បូង ៕

ប្រទេសចិន៖ កាហ្វេរសជាតិសាច់ជ្រូកដែល Starbucks បានបើកដំណើរការកាលពីពេលថ្មីៗនេះ បានទាក់ទាញការចាប់អារម្មណ៍យ៉ាងខ្លាំងនៅក្នុងប្រទេសចិន ដោយអតិថិជនចិនជាច្រើននាក់បានតម្រង់ជួរទិញយ៉ាងហូរហែរ ហើយពួកគេបាននិយាយថា សម្រាប់រសជាតិវិញគឺពិតជាអស្ចារ្យខ្លាំងណាស់។

យោងតាម Business Insider ដែលបានចុះផ្សាយនៅថ្ងៃទី២១ ខែកុម្ភៈ ឆ្នាំ២០២៤ថា ហាងកាហ្វេ Starbucks បានបើកដំណើរការកាហ្វេរសជាតិសាច់ជ្រូកនៅក្នុងប្រទេសចិន ដើម្បីប្រកួតប្រជែងជាមួយភេសជ្ជៈឡាតេរសជាតិឈីសរបស់ Luckin Coffee ដែលសព្វថ្ងៃកំពុងល្បីល្បាញខ្លាំងក្នុងប្រទេសនេះ។

ហាងកាហ្វេ Starbucks’ Reserve Roastery នៅទីក្រុងសៀងហៃបានដំណើរការតាំងពីថ្ងៃទី៥ ខែកុម្ភៈ ដោយផ្សព្វផ្សាយភេសជ្ជៈកាហ្វេថ្មី “រួមបញ្ចូលជាមួយទំនៀមទម្លាប់ឆ្នាំថ្មីប្រពៃណីពីការផ្តល់ជូនសាច់ជ្រូកសម្រាប់រដូវកាលចូលឆ្នាំចិន”។ កាហ្វេនេះមានឈ្មោះផ្លូវការជាភាសាអង់គ្លេសគឺ “Lucky Savory Latte” ដែលត្រូវបានដាក់រូបភាពជាមួយនឹងចំណិតសាច់ជ្រូកស្តើងមួយពីលើពែង នឹងមានតម្លៃ ៦៨ យន់ (ប្រមាណ ១០ ដុល្លារអាមេរិក) ក្នុងមួយកែវ។ ហាងកាហ្វេ Starbucks បាននិយាយថា កាហ្វេនេះគឺជាការរួមបញ្ចូលគ្នានៃ espresso និងទឹកជ្រលក់ “Dongpo សាច់ជ្រូក” ដោយបន្ថែមទឹកដោះគោស្ទ្រីមទៅក្នុងភេសជ្ជៈមុននឹងជ្រលក់ជាមួយចំណិតសាច់ជ្រូក braised ពីលើពែង។

កាហ្វេរសជាតិសាច់ជ្រូកបានសាយភាយពាសពេញបណ្តាញសង្គមចិន ដោយមនុស្សភាគច្រើនឆ្ងល់ថាតើវាមានរសជាតិដូចម្តេចហើយវាឆ្ងាញ់ឬអត់? អតិថិជនដែលបានភ្លស់រសជាតិភេសជ្ជៈប្រភេទពិសេសនេះ បាននិយាយថា latte មើលទៅប្លែក ហើយសម្រាប់រសជាតិវិញគឺឆ្ងាញ់មិននឹកស្មានដល់ជាមួយនឹង “រសជាតិផ្អែម ប្រៃដ៏គួរឱ្យចាប់អារម្មណ៍” ដែលរួមបញ្ចូលគ្នានូវក្លិននៃសាច់ និងកាហ្វេគឺអស្ចារ្យណាស់។

អតិថិជនម្នាក់ទៀតក៏បាននិយាយដែថាពួកគេមានការភ្ញាក់ផ្អើលយ៉ាងខ្លាំង និងរីករាយបំផុតចំពោះរសជាតិដ៏ឆ្ងាញ់របស់កាហ្វេ Starbucks នេះ។ ទោះជាយ៉ាងណាក៏ដោយ ក៏មានមតិរិះគន់តិចតួចផងដែរ ដោយអតិថិជនម្នាក់ទៀតបាននិយាយថា កាហ្វេនេះគួរឱ្យខ្ពើមណាស់ វាមានរសជាតិដូចសណ្តែកសៀងដែលមានជាតិ fermented លាយជាមួយនឹងជាតិផ្អែម បើទោះបីជាសាច់ជ្រូកមានរសជាតិឆ្ងាញ់ក៏ដោយ ក៏វាមិនទំនងដែរ៕

ប្រទេសវៀតណាម ៖ វៀតណាម, ឥណ្ឌូណេស៊ី និងម៉ាឡេស៊ី គឺជាប្រទេសដែលបានបញ្ជូននិស្សិតទៅសិក្សាបន្តនៅក្រៅប្រទេសច្រើនបំផុតក្នុងតំបន់អាស៊ាន ។ បើតាមរបាយការណ៍ពី Key Trends in Southeast Asia ប្រចាំឆ្នាំ២០២៤ របស់ក្រុមហ៊ុន Acumen បង្ហាញថា នៅឆ្នាំ២០២៣ មាននិស្សិតជាង៣៥ម៉ឺននាក់ មកពីតំបន់អាស៊ានបានទៅសិក្សាបន្តនៅក្រៅប្រទេស ។

ហេតុនេះ វាធ្វើឱ្យអាស៊ានក្លាយជាតំបន់មួយដែលបានបញ្ជូននិស្សិតទៅសិក្សានៅក្រៅប្រទេសច្រើនបំផុត ស្ថិតក្នុងលំដាប់ទី៣ បន្ទាប់ពីប្រទេសចិន និងឥណ្ឌា ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២១ ខែកុម្ភៈ ឆ្នាំ២០២៤ ។

ចំណែកចំណាត់ថ្នាក់នៅតំបន់អាស៊ានវិញ ប្រទេសវៀតណាមបានទទួលចំណាត់ថ្នាក់ទី១ ដែលមានចំនួននិស្សិតរហូតដល់១៣ម៉ឺន២ពាន់នាក់ ។ បន្ទាប់មក គឺប្រទេសឥណ្ឌូណេស៊ី មាននិស្សិតចំនួន៥៦.០០០នាក់, ម៉ាឡេស៊ី មាននិស្សិតចំនួន៥៦.០០០នាក់ និងថៃ មាននិស្សិតចំនួន៣២.០០០នាក់ ។

ចំណែកជប៉ុន និងកូរ៉េខាងត្បូង គឺជាប្រទេសដ៏ពេញនិយមរបស់និស្សិតវៀតណាម ។ ជាក់ស្តែង និស្សិតវៀតណាមបានទៅសិក្សានៅប្រទេសជប៉ុន ស្មើជាង៤៤.១០០នាក់ និងកូរ៉េខាងត្បូង ស្មើជិត២៥.០០០នាក់ ។ ចំណែកសហរដ្ឋអាមេរិក ក៏ជាប្រទេសគោលដៅមួយទៀត ដែលនិស្សិតវៀតណាមបានទៅសិក្សាច្រើនបំផុត ស្មើជាង២៣.១០០នាក់ ។

ក្រៅពីនេះ និស្សិតវៀតណាមបានទៅសិក្សានៅប្រទេសអូស្ត្រាលី ស្មើនឹង១៤.១០០នាក់ និងកាណាដា ស្មើនឹង៩.០០០នាក់ ។ ចំណែកនិស្សិតឥណ្ឌូណេស៊ី, ម៉ាឡេស៊ី និងថៃ ភាគច្រើនទៅសិក្សានៅប្រទេសអង់គ្លេស និងអូស្ត្រាលី ។

ទោះយ៉ាងណា ចិន ក៏ជាប្រទេសគោលដៅពេញនិយមមួយទៀតរបស់និស្សិតនៅតំបន់អាស៊ានផងដែរ ។ បើតាមទិន្នន័យរបស់រដ្ឋាភិបាលចិន នៅឆ្នាំ២០១៩ បង្ហាញថា ប្រទេសចិនបានទទួលនិស្សិតពីប្រទេសថៃ ចំនួន២៨.៦០០នាក់, ឥណ្ឌូណេស៊ី ១៥.០០០នាក់, វៀតណាម ១១.៣០០នាក់ និងម៉ាឡេស៊ី ៩.៥០០នាក់ ។

ហេតុអ្វីបានជាវៀតណាមក្លាយជាប្រទេសបញ្ជូននិស្សិតទៅសិក្សានៅក្រៅប្រទេសច្រើនបំផុត? វាបណ្តាលមកពីកត្តាជាច្រើន រួមមាន ៖ ២៨% នៃចំនួនពលរដ្ឋវៀតណាម គឺមានអាយុចាប់ពី១៦ឆ្នាំ ទៅ៣០ឆ្នាំ ហើយចំនួនការចុះឈ្មោះចូលរៀននៅតាមសាកលវិទ្យាល័យរបស់និស្សិតវៀតណាម បានកើនឡើងពី១០% នៅឆ្នាំ២០០១ មកស្មើនឹង២៩% នៅឆ្នាំ២០២៤ ។ ម្យ៉ាងទៀត ពលរដ្ឋវៀតណាមបានផ្តល់ភាពសំខាន់យ៉ាងខ្លាំងលើការសិក្សាកម្រិតខ្ពស់ ។

បើតាមការស្ទង់មតិរបស់ HSBC នៅឆ្នាំ២០១៨ បង្ហាញថា ការចំណាយប្រាក់ពាក់ព័ន្ធនឹងការរៀនសូត្ររបស់សិស្ស-និស្សិតវៀតណាម គឺមានសមាមាត្រខ្ពស់រហូតដល់៤៧% នៃការចំណាយក្នុងគ្រួសារនីមួយៗ ។

ក្រៅពីនេះ ពលរដ្ឋមានជីវភាពកម្រិតមធ្យមនៅប្រទេសវៀតណាម ក៏មានកំណើនយ៉ាងឆាប់រហ័សផងដែរក្នុងតំបន់អាស៊ាន មានន័យថា ពលរដ្ឋវៀតណាមជាច្រើនគ្រួសារមានប្រាក់គ្រប់គ្រាន់ ដើម្បីបញ្ជូនកូនៗរបស់ពួកគេទៅសិក្សាបន្តនៅក្រៅប្រទេសបន្ថែមទៀត ៕

បរទេស៖ ក្រុមហ៊ុន Apple ត្រូវបានគេរំពឹងថានឹងបញ្ចេញម៉ូដែល Smart Ring ឆាប់ៗនេះ ដែលមានសមត្ថភាពត្រួតពិនិត្យសុខភាព ដើម្បីប្រកួតប្រជែងជាមួយ Galaxy Ring របស់ Samsung។

កាលពីថ្ងៃទី២១ ខែកុម្ភៈ ឆ្នាំ២០២៤ យោងតាម ET News បានឱ្យដឹងថា ក្រុមហ៊ុន Apple បាននិងកំពុងស្រាវជ្រាវចិញ្ចៀនឆ្លាតវៃជាច្រើនឆ្នាំមកហើយ និងជាម្ចាស់ប៉ាតង់ជាច្រើនដែលទាក់ទងនឹងផលិតផលនេះ។ ទោះជាយ៉ាងណាក៏ដោយ បន្ទាប់ពីលេចធ្លាយព័ត៌មានថា Samsung ហៀបនឹងណែនាំ Galaxy Ring ក្រុមហ៊ុនបច្ចេកវិទ្យារបស់អាមេរិកនេះក៏បានពិចារណាយ៉ាងយកចិត្តទុកដាក់ចំពោះផែនការប្រកាស Apple Ring របស់ខ្លួនផងដែរ និងបានដាក់ពាក្យសុំប៉ាតង់សម្រាប់ឧបករណ៍តាមដានសុខភាពដែលអាចពាក់ម្រាមដៃបាន ដោយគេជឿថាក្រុមហ៊ុនកំពុងរៀបចំផែនការចេញផ្សាយនាពេលខាងមុខនេះ។

បើយោងតាមប្រភពដដែលបានឱ្យដឹងទៀតថា បច្ចុប្បន្នក្រុមហ៊ុន Apple កំពុងត្រួតពិនិត្យសញ្ញាដើម្បីវាយតម្លៃថាតើចិញ្ចៀនឆ្លាតវៃនឹងអាចក្លាយជាជម្រើសជំនួសនាឡិកាឆ្លាតវៃបានដែរឬទេ ដោយសារចិញ្ចៀនអាចពាក់បានយូរ ជាពិសេសសម្រាប់ការត្រួតពិនិត្យក្នុងការគេង។ ទន្ទឹមនឹងនេះដែរ ក្រុមហ៊ុន Samsung ក៏ត្រូវបានគេនិយាយដែរថាគ្រោងនឹងដាក់បង្ហាញ Galaxy Ring នៅក្នុងព្រឹត្តិការណ៍ Galaxy Unpacked នៅចុងខែកក្កដាខាងមុខនេះ រួមជាមួយនឹងស្មាតហ្វូនដែលអាចបត់បាន Galaxy Z Fold6 និង Z Flip6 ។

ផលិតផលនេះគាំទ្រការវាស់កម្រិតអុកស៊ីសែនក្នុងឈាម អេឡិចត្រូតបេះដូង ការត្រួតពិនិត្យការគេង និងជាច្រើនទៀត។ លើសពីនេះ ចិញ្ចៀនក៏អាចគាំទ្រការបង់ប្រាក់ឥតខ្សែ និងការគ្រប់គ្រងឧបករណ៍ឆ្លាតវៃផងដែរ។ Galaxy Ring របស់ Samsung ក៏ត្រូវបានគេនិយាយថាដែរកំពុងស្ថិតក្នុងដំណាក់កាលផលិតគំរូ ហើយត្រូវបានគេរំពឹងថានឹងឈានទៅដល់ការផលិតទ្រង់ទ្រាយធំនៅក្នុងត្រីមាសទីពីរនៃឆ្នាំ ២០២៤ ដោយផលិតផលនេះមាន ៨ ទំហំ និងគាំទ្រ AI ។

គួរបញ្ជាក់ដែរថា បច្ចុប្បន្ននេះ ក៏មានម៉ូដែលចិញ្ចៀនឆ្លាតវៃមួយចំនួននៅលើទីផ្សារផងដែរ ដូចជាចិញ្ចៀន Oura របស់ Amazfit ឬ Helio Ring ជាដើម ដោយទីផ្សារចិញ្ចៀនឆ្លាតវៃសកលអាចនឹងកើនឡើងពី ២០ លានដុល្លារក្នុងឆ្នាំ ២០២៣ ដល់ជិត ២០០ លានដុល្លារក្នុងឆ្នាំ ២០៣១ នេះបើយោងតាមស្ថិតិពី Business Research Insight។ Apple មានវិធីជាច្រើនដើម្បីចូលទៅដល់ផ្នែកទីផ្សារនេះ ឧទាហរណ៍ វាអាចប្រើចិញ្ចៀនដើម្បីគ្រប់គ្រងឧបករណ៍ផ្សេងទៀតដូចជា ស្មាតហ្វូន ប៉ុន្តែអាទិភាពរបស់ក្រុមហ៊ុនគឺការត្រួតពិនិត្យសុខភាព។ ខណៈដែល Samsung ក៏ត្រូវបានគេរំពឹងថានឹងវ៉ាដាច់ដៃគូប្រកួតប្រជែងរបស់ខ្លួន ហើយកំណត់ស្តង់ដារថ្មីសម្រាប់ទីផ្សារចិញ្ចៀនឆ្លាតវៃ៕