បទថ្មីរបស់ឧកញ៉ា ព្រាប សុវត្ថិ មានចំណងជើងថា «កុលាបមានបន្លា» ដែលជាស្នាដៃនិពន្ធទំនុកច្រៀងដោយ Songha Group សម្រាប់អបអរពិធីបុណ្យចូលឆ្នាំថ្មីហាក់ទទួលបានមតិរិះគន់ពីសាធារណជនអ្នកប្រើប្រាស់បណ្តាញសង្គម។ ការរិះគន់នេះត្រូវបានទស្សនិកជនភាគច្រើនគិតថាលាយប៉ារ៉ូលបទមរតដើមគួរតែផ្តល់ស្នាដៃទៅកាន់អ្នកជំនាន់មុនមិនមែនដាក់តែអ្នកនិពន្ធថ្មីនោះទេ។ អ្នកខ្លះទៀតបានលើកឡើងថាបទចម្រៀងរបស់ឧកញ៉ា ព្រាប សុវត្ថិ ក្នុងទ្រនំបច្ចុប្បន្នហាក់មិនសូវលេចធ្លោជាងផលិតកម្មចាស់។
កាលពីព្រឹកថ្ងៃទី២ មេសា ផលិតកម្មហ្គាឡាក់ស៊ីបានទម្លាក់បទថ្មីរបស់តារាចម្រៀងចាស់វស្សានិងមានងារជាឧកញ៉ា ដែលមានចំណងជើងថា «កុលាបមានបន្លា»។ បទថ្មីនេះនិពន្ធ Melody និងទំនុកច្រៀង ដោយ Songha Group និង និពន្ធបទភ្លេងដោយ Songha ផ្ទាល់។ បទ «កុលាបមានបន្លា» នេះបានយកប៉ារ៉ូលបទចម្រៀងមរតកដើម «ផ្កាល្ហុង» មកកែច្នៃនិងបន្ថែមប៉ារ៉ូលថ្មី។
ទោះយ៉ាងណា មួយបទនេះរបស់ឧកញ៉ា ព្រាប សុវត្ថិ មានការបញ្ចេញមតិប្រតិកម្មច្រើនជាងការសរសើរ។ អ្នកលេងបណ្តាញសង្គមទិកតុក បានចូលទៅបញ្ចេញមតិថា «ស្នាដៃ សង្ហារ អតីត Producer របស់ វណ្ណដា តើសចុះបើបទនេះ វណ្ណដា អ្នកច្រៀង?, បងព្រាបសុវត្ថិ គាត់មិនគួរបន្តច្រៀងទៀតទេគាត់កាន់តែច្រៀងកាន់តែបាត់បង់ប្រជាប្រិយភាព, គាត់លើកបទពីមុនៗគាត់មកច្រៀងឡើងវិញល្បីយកទៅណាមិនអស់។, នៅតែគាំទ្រស្នាដៃចាស់ៗគាត់»។
អ្នកផ្សេងទៀតលើកឡើងថា «និពន្ធទំនុកច្រៀង songha group ? ? ចុះ មរតកដើម ទុកនៅទីណា?, ពុទ្ធោដល់ថ្នាក់នេះ, ចាញ់នៅហង្សមាសដាច់, បទចាស់យកមកធ្វើភ្លេង គួរតែទុកឈ្មោះអ្នកចាស់ឬក៏ដាក់ថាទំនុកភ្លេងឬច្រៀងបែបសម័យបុរាណ»។
ទោះជាយ៉ាងណា ទន្ទឹមនឹងមតិរិះគន់ការយកបទមរតដើម មិនបានដាក់ស្នាដៃអ្នកជំនាន់មុន ក៏មានមតិសាធារណជនមួយចំនួនបានលើកឡើងដែរថា មួយបទនេះពីរោះប្លែក ស្តាប់យូរៗទៅកាន់តែពីរោះ៕