បរទេស៖ ប្រទេសឥណ្ឌូណេស៊ីបានរៀបចំការបោះឆ្នោតដ៏ធំបំផុតរបស់ពិភពលោក នៅថ្ងៃទី១៤ ខែកុម្ភៈ ឆ្នាំ២០២៤ ដែលមានរយៈពេលត្រឹមតែ ១ថ្ងៃប៉ុណ្ណោះ។ បើយោងតាម BNN Bloomberg កាលពីពេលថ្មីៗនេះ បានឱ្យដឹងថា គិតត្រឹមថ្ងៃទី១៤ ដល់ថ្ងៃទី១៨ ខែកុម្ភៈ បុគ្គលិករៀបចំការបោះឆ្នោតឥណ្ឌូនេស៊ីចំនួន ៧១ បាន.បា.ត់.ប.ង់.ជី.វិ.ត ដោយសារការងារហួសកម្លាំង បូករួមនឹងជំងឺប្រចាំកាយដូចជា លើសឈាម និងជំងឺបេះដូង ទើបបណ្តាលឱ្យមានហេតុការណ៍នេះកើតឡើង។លោក Hasyim Asyari ប្រធានគណៈកម្មាធិការជាតិរៀបចំការបោះឆ្នោតឥណ្ឌូនេស៊ី បាននិយាយថា បច្ចុប្បន្នបុគ្គលិក និងអ្នកស្ម័គ្រចិត្តប្រហែល ៤,០០០ នាក់ផ្សេងទៀតកំពុងមានបញ្ហាសុខភាពដោយសារតែអស់កម្លាំងខ្លាំងពេក បន្ទាប់ពីបានជួយរៀបចំការបោះឆ្នោតនៅថ្ងៃទី១៤ ខែកុម្ភៈ។ លោក Hasyim Asyari បានបន្តទៀតថា នេះគឺជាការបោះឆ្នោតដ៏ធំបំផុតមួយក្នុងពិភពលោក ដែលមានអ្នកបោះឆ្នោតឥណ្ឌូនេស៊ីជិត ២០៥ លាននាក់ចូលរួមនៅទូទាំង ៣៨ ខេត្តរបស់ខ្លួន។

ប្រទេសនេះបានប្រមូលផ្តុំអ្នកស្ម័គ្រចិត្តជាង ៥ លាននាក់ទៅធ្វើការនៅការិយាល័យបោះឆ្នោតចំនួន ៨០០,០០០ នៅទូទាំងប្រទេស។ ការបោះឆ្នោតនេះចំណាយពេលត្រឹមតែ ៦ ម៉ោងប៉ុណ្ណោះ ដោយតម្រូវឱ្យអ្នកស្ម័គ្រចិត្តត្រូវតែធ្វើការជាបន្តបន្ទាប់ដើម្បីចែកចាយ រាប់ និងរាយការណ៍សន្លឹកឆ្នោត។ ដំណើរការរាប់សន្លឹកឆ្នោតអាចចំណាយពេលលើសពី ១២ម៉ោង បន្ទាប់ពីការិយាល័យបោះឆ្នោតបិទ។

សម្រាប់លទ្ធផលនៃការរាប់សន្លឹកឆ្នោតជាផ្លូវការវិញនឹងត្រូវប្រកាសនៅថ្ងៃទី ២០ ខែមីនា ឆ្នាំ២០២៤ ខាងមុខនេះ។ បើយោងតាមរបាយការណ៍ លទ្ធផលបោះឆ្នោតក្រៅផ្លូវការរបស់រដ្ឋមន្ត្រីការពារជាតិឥណ្ឌូណេស៊ី លោក Prabowo Subianto បានប្រកាសជ័យជម្នះក្នុងការប្រជែងតំណែងប្រធានាធិបតី បន្ទាប់ពីលទ្ធផលស្ទង់មតិរហ័សពីអង្គការបោះឆ្នោតចំនួនបួន។

គួររំលឹកដែរថា ក្នុងអំឡុងពេលបោះឆ្នោតឆ្នាំ ២០១៩ បុគ្គលិករាប់សន្លឹកឆ្នោត ឥណ្ឌូនេស៊ីជាង ៥០០ នាក់ក៏ធ្លាប់បានបាត់បង់ជីវិតផងដែរ ដោយសារអស់កម្លាំងខ្លាំងពេក ដោយបង្ខំឱ្យរដ្ឋាភិបាលកំណត់អាយុ និងតម្រូវឱ្យអ្នកស្ម័គ្រចិត្តពិនិត្យសុខភាពមុនពេលចូលរួមក្នុងការគាំទ្រការបោះឆ្នោត។ ទោះជាយ៉ាងណាក៏ដោយ ការបោះឆ្នោតចុងក្រោយនេះនៅតែឆក់យកជីវិតមនុស្សរាប់សិបនាក់ ទោះបីជារដ្ឋាភិបាលកំណត់អាយុ និងតម្រូវឱ្យអ្នកស្ម័គ្រចិត្តពិនិត្យសុខភាពមុនពេលចូលរួមក្នុងការគាំទ្រការបោះឆ្នោតក៏ដោយ៕

ប្រទេសវៀតណាម ៖ បើតាមរបាយការណ៍ចេញផ្សាយនៅខែកុម្ភៈ ឆ្នាំ២០២៤ ដោយក្រុមហ៊ុនស្រាវជ្រាវ Momentum Works បង្ហាញថា កាលពីឆ្នាំ២០២៣ ចំនួនការកុម្ម៉ង់ទិញម្ហូបអាហារតាមកម្មវិធី App ផ្សេងៗ ដូចជា Grab និង Shopee Food នៅប្រទេសវៀតណាម ស្មើទឹកប្រាក់សរុបចំនួន១ពាន់៤រយលានដុល្លារអាមេរិក ឬស្មើនឹង៣លាន៨សែនដុល្លារអាមេរិកក្នុង១ថ្ងៃ ។

ការកុម្ម៉ង់ម្ហូបអាហារតាម App របស់ពលរដ្ឋវៀតណាម នៅឆ្នាំ២០២៣ បានកើនឡើង៣០% បើធៀបនឹងឆ្នាំ២០២២ ហើយវាកើនឡើងគួរឱ្យកត់សម្គាល់ បើធៀបនឹងប្រទេសផ្សេងៗនៅក្នុងតំបន់អាស៊ីអាគ្នេយ៍ ។ នេះបើតាមការចុះផ្សាយរបស់សារព័ត៌មានបរទេស នៅថ្ងៃទី២០ ខែកុម្ភៈ ឆ្នាំ២០២៤ ។

ទោះយ៉ាងណា តម្លៃការបញ្ជាទិញរបស់វៀតណាម ស្មើនឹងទឹកប្រាក់ចំនួន១ពាន់៤រយលានដុល្លារអាមេរិកនេះ គឺទាបជាងប្រទេសមួយចំនួន ដូចជា ៖
-ម៉ាឡេស៊ី ស្មើនឹង ២ពាន់៤រយលានដុល្លារអាមេរិក
-ហ្វីលីពីន និងសិង្ហបុរី ស្មើនឹង ២ពាន់៥រយលានដុល្លារអាមេរិក
-ថៃ ស្មើនឹង ៣ពាន់៧រយលានដុល្លារអាមេរិក ។

កម្មវិធី Grab និង Shopee Food បានកាន់កាប់ចំណែកទីផ្សារនៃការដឹកជញ្ជូនម្ហូបអាហារនៅប្រទេសវៀតណាម គឺស្មើនឹង៤៧% និង៤៥% តាមលំដាប់ ។ ចំណែកភាគរយនៅសល់៨% ទៀត គឺជារបស់កម្មវិធី GoJek និង BaeMin ហើយកម្មវិធី BaeMin បានផ្អាកដំណើរនៅប្រទេសវៀតណាម តាំងពីចុងឆ្នាំ២០២៣ មកម៉្លេះ ។

ក្រៅពីនេះ កម្មវិធី Grab បានកាន់កាប់ចំណែកទីផ្សារខ្ពស់បំផុតនៅប្រទេសជាច្រើនទៀត ដូចជា ៖ ប្រទេសថៃ, ម៉ាឡេស៊ី, ហ្វីលីពីន, សិង្ហបុរី និងឥណ្ឌូណេស៊ី ។ លើសពីនេះ Grab បានក្លាយជាកម្មវិធីឈានមុខគេផ្នែកដឹកជញ្ជូនម្ហូបអាហារក្នុងតំបន់អាស៊ីអាគ្នេយ៍ផងដែរ ដែលតម្លៃការបញ្ជាទិញសរុបរបស់ Grab គឺស្មើនឹង៩ពាន់៤រយលានដុល្លារអាមេរិក ។

តម្លៃការបញ្ជាទិញរបស់ Grab បានវ៉ាដាច់គូប្រជែងផ្សេងទៀត ដូចជា ៖
-Foodpanda ស្មើនឹង ២ពាន់៧រយលានដុល្លារអាមេរិក
-Gojek ស្មើនឹង ១ពាន់៨រយលានដុល្លារអាមេរិក
-Shopee Food ស្មើនឹង ១ពាន់៥រយលានដុល្លារអាមេរិក និង
-Lineman ស្មើនឹង ១ពាន់៣រយលានដុល្លារអាមេរិក ៕

ប្រទេសចិន៖ និស្សិតហុងកុងមួយក្រុមបានផលិតមនុស្សយន្តបោះពុម្ព 3D កម្ពស់ ១៤.១ សង់ទីម៉ែត្រ ដែលមានសមត្ថភាពដើរ លេងបាល់ទាត់ រាំ រួមទាំងអាចហាត់ក្បាច់គុនបានទៀតផង។ វាគឺជាមនុស្សយន្តដែលតូចបំផុតមិនធ្លាប់មាន ហើយក៏ត្រូវបានទទួលស្គាល់ដោយ Guinness World Records ថាជាមនុស្សយន្តតូចបំផុតនៅលើពិភពលោកផងដែរ នេះបើយោងតាម IFL Science ដែលបានចុះកាលពីថ្ងៃទី១៦ ខែកុម្ភៈ ឆ្នាំ២០២៤ ។

មនុស្សយន្តនេះត្រូវបានបង្កើតឡើងដោយនិស្សិតហុងកុងមួយក្រុមនៅសាលា Diocesan Boys’ School ក្នុងគោលបំណងដើម្បីបំពេញតម្រូវការសម្រាប់កំណត់ត្រា មនុស្សយន្តត្រូវតែអាចដើរជើងពីរ និងបង្វិលស្មា កែងដៃ ត្រគាក និងជង្គង់ដូចទៅនឹងមនុស្សពិតៗ ក៏ដូចជាត្រូវបានរចនាឡើងដើម្បីឱ្យមានតម្លៃសមរម្យតាមដែលអាចធ្វើទៅបាន។ បន្ទាប់ពីការរចនាឧបករណ៍ដ៏តូចមួយដោយប្រើកម្មវិធីដែលផ្តល់ដោយមន្ទីរពិសោធន៍មនុស្សយន្តរបស់សាលារួចហើយនោះ ក្រុមនិស្សិតក៏បានបង្កើតបន្ទះតួអាគ្រីលីក និងសមាសធាតុដែលបោះពុម្ពជា 3D ។

បន្ទាប់មក ម៉ូទ័រ servo ដែលផលិតដោយរោងចក្រមួយក៏ត្រូវបានដំឡើង ដែលអនុញ្ញាតឱ្យមនុស្សយន្តអាចផ្លាស់ទីដៃ និងជើងបាន។ មនុស្សយន្តដ៏តូចនេះ ដំណើរការដោយថ្មលីចូមអ៊ីយ៉ុង ៧.៤ វ៉ុល ហើយអាចបញ្ជាពីចម្ងាយដោយប្រើកម្មវិធី ឬតាមរយៈប៊ូតុងនៅលើបន្ទះខាងក្រោយរបស់មនុស្សយន្ត។ បច្ចុប្បន្នក្រុមនិស្សិតទាំងនេះ បានទទួលការកោតសរសើរយ៉ាងខ្លាំង ចំពោះការបង្កើតដ៏ប៉ិនប្រសប់របស់ពួកគេក្នុងការផលិតមនុស្សយន្តដ៏តូចបំផុតរបស់ពិភពលោក។

ក្រុមនិស្សិតបាននិយាយថា មនុស្សយន្តតូចនេះអាចដើរ លេងបាល់ទាត់ រាំ និងអាចហាត់ក្បាច់គុនកុងហ្វូបានទៀតផង។ លើសពីនេះ បន្ថែមពីលើការទទួលស្គាល់ដោយ Guinness World Records ការលើកទឹកចិត្តរបស់ក្រុមក្នុងការបង្កើតមនុស្សយន្តគឺដើម្បីបង្កើតឧបករណ៍សិក្សាដែលមានតម្លៃទាបសម្រាប់ប្រើប្រាស់ក្នុងការអប់រំ STEAM (វិទ្យាសាស្ត្រ បច្ចេកវិទ្យា វិស្វកម្ម សិល្បៈ និងគណិតវិទ្យា)។

តាមរយៈការរចនាមនុស្សយន្តឱ្យតូចតាមដែលអាចធ្វើបាន ពួកគេបាននិយាយថា ការចំណាយលើការផលិតទ្រង់ទ្រាយធំអាចត្រូវបានកាត់បន្ថយ ដោយហេតុនេះធ្វើឱ្យមនុស្សយន្តកាន់តែមានតម្លៃសមរម្យ និងអាចប្រើប្រាស់បានសម្រាប់គ្រួសារក្រីក្រ។ សមាជិកក្រុម Isaac បានបន្តទៀតថា “យើងក៏មានគម្រោងបើកប្រភពកូដនៃការរចនា និងសរសេរកម្មវិធី ដើម្បីបន្តគោលបំណងរបស់យើងក្នុងការលើកកម្ពស់ការអប់រំ STEAM” ផងដែរ៕

វៀតណាម៖ សណ្ឋាគារ Sofitel Legend Metropole និង Four Seasons Resort The Nam Hai របស់ប្រទេសវៀតណាមទទួលបានពិន្ទុខ្ពស់បំផុត ផ្កាយ ៥ នៅក្នុងខ្នាតពានរង្វាន់សណ្ឋាគារ Forbes Travel Guide 2024។
នេះបើយោងតាមមគ្គុទ្ទេសក៍ទេសចរណ៍របស់អាមេរិក Forbes Travel Guide ដែលបានប្រកាសបញ្ជីឈ្មោះសណ្ឋាគារឈានមុខគេលើពិភពលោកក្នុងឆ្នាំ ២០២៤ ក្នុងពិធីប្រគល់ពានរង្វាន់ Star Awards កាលពីពេលថ្មីៗនេះ។

ចំណាត់ថ្នាក់ផ្កាយ ៥ គឺជាចំណាត់ថ្នាក់ខ្ពស់បំផុតរបស់ទស្សនាវដ្ដី Forbes សម្រាប់សណ្ឋាគារដែល “ពិតជាល្អឥតខ្ចោះ ជាមួយនឹងសេវាកម្មលំដាប់ជាន់ខ្ពស់ និងបរិក្ខារទំនើបបំផុត”។ អ្នកតំណាងចំនួន ២រូបនៃសណ្ឋាគារ Sofitel Legend Metropole និង Four Seasons Resort The Nam Hai បាននិយាយថា នេះគឺជា “សណ្ឋាគារដ៏ស្រស់ស្អាតបំផុត បង្កប់នូវសញ្ញាណនៃសតវត្សន៍ និងនាំមកនូវបទពិសោធន៍ដ៏អស្ចារ្យបំផុតដល់ភ្ញៀវទេសចរណ៍”។ សណ្ឋាគារទាំងនេះត្រូវបានចាត់ទុកថាជា “កន្លែងសម្រាកលំហែកាយនៅលើឆ្នេរខ្សាច់សស្អាត” សម្រាប់ភ្ញៀវទេសចរដែលចង់គេចពីភាពអ៊ូអរនៃទីក្រុងឆ្នេរសមុទ្រ Da Nang ។

បើប្រៀបធៀបទៅនឹងអាស៊ីអាគ្នេយ៍ វៀតណាមជាប់ចំណាត់ថ្នាក់ទី ៤ ក្នុងចំនួនសណ្ឋាគារលំដាប់ផ្កាយ ៥ បន្ទាប់ពីប្រទេសឥណ្ឌូនេស៊ី (ដែលមានសណ្ឋាគារផ្កាយ៥ ចំនួន៤) សិង្ហបុរី (សណ្ឋាគារចំនួន ៤) និងប្រទេសថៃ (សណ្ឋាគារចំនួន ៣) ។ ដើម្បីទទួលបានរង្វាន់ដ៏កំពូលនេះ បេក្ខជនត្រូវឆ្លងកាត់លក្ខណៈវិនិច្ឆ័យចំនួន ៩០០ ដែលកំណត់ដោយគណៈកម្មាធិការរៀបចំអន្តរជាតិ។ សម្រាប់ប្រភេទសណ្ឋាគារ លក្ខណៈវិនិច្ឆ័យរួមមានប្លង់ដែលជួយភ្ញៀវកែលម្អគុណភាពនៃការគេង និងជ្រើសរើសអាហារ រួមជាមួយភេសជ្ជៈដែលមានសុខភាពល្អ បូករួមនឹងអាកប្បកិរិយារបស់បុគ្គលិក ក៏ដូចជាបទពិសោធន៍របស់អតិថិជនក៏ជាលក្ខខណ្ឌចាំបាច់ផងដែរ។

ពិន្ទុសរុបសម្រាប់ចំណាត់ថ្នាក់កន្លែងស្នាក់នៅគឺ ៧០% ផ្អែកលើសេវាកម្ម និង ៣០% អាស្រ័យលើគុណភាព និងលក្ខខណ្ឌនៃគ្រឿងបរិក្ខារ។ ការវាយតម្លៃផ្កាយ ៥ គឺខ្ពស់បំផុតបន្ទាប់មកដោយចំណាត់ថ្នាក់ផ្កាយ ៤ នឹងមិនមានចំណាត់ថ្នាក់ទាបជាងនេះទេ។ ដោយអ្នកជំនាញមកពីជាង ៨០ ប្រទេសបានកក់បន្ទប់ដោយសម្ងាត់ និងស្នាក់នៅពីរយប់ដូចអ្នកទេសចរធម្មតាក្នុងឆ្នាំ ២០២៣ ដើម្បីវាយតម្លៃ និងបោះឆ្នោតលើគោលដៅនានា។

គួរបញ្ជាក់ដែរថា ពានរង្វាន់ប្រចាំឆ្នាំនេះមានតាំងពីឆ្នាំ ១៩៥៨ ដើម្បីផ្តល់កិត្តិយសដល់សណ្ឋាគារ ភោជនីយដ្ឋាន ស្ប៉ា និងទូកក្តោងនៅក្នុងប្រទេសជាង ៨០ ជុំវិញពិភពលោក។ Forbes Travel ក៏ជាស្ថាបនិកនៃប្រព័ន្ធវាយតម្លៃផ្កាយប្រាំសម្រាប់ឧស្សាហកម្មសណ្ឋាគារ ហើយត្រូវបានគេចាត់ទុកថាជាប្រព័ន្ធវាយតម្លៃដ៏មានកិត្យានុភាពបំផុតមួយនៅក្នុងពិភពលោក៕