នៅព្រឹកថ្ងៃទី២១ ខែកុម្ភៈ ឆ្នាំ២០២៤នេះ លោកជំទាវអ្នកឧកញ៉ា ម៉ៅ ចំណាន ជាអតីតតារាសម្តែងឈ្មោះស្រីតូច ចំណាន ភរិយារបស់អ្នកឧកញ៉ា គិត ម៉េង ម្ចាស់ក្រុមហ៊ុន រ៉ូយ៉ាល់ គ្រុប ប្រកាសឈរឈ្មោះជាបេក្ខភាពបោះឆ្នោត ប្រធានសមាគមសិល្បៈ។ ការប្រកាសនេះក្នុងថ្ងៃនេះគឺចំថ្ងៃខួបកំណើតរបស់លោកជំទាវអ្នកឧកញ៉ាតែម្តង ខណៈអតីតនាយករដ្ឋមន្រ្តីសម្តេចតេជោ ហ៊ុន សែន ក៏ប្រកាសគាំទ្រការឈរឈ្មោះរបស់អតីតតារាសម្តែងរូបនេះផងដែរ។

«ខ្ញុំសូមសំដែងនូវការគាំទ្រចំពោះ បេក្ខភាពលោកជំទាវម៉ៅ ចំណាន ភរិយាអ្នកឧកញ៉ាគិត ម៉េង ជាប្រធានសមាគមសិល្បៈ។ ប្រសិនលោកជំទាវទទួលបានការគាំទ្រតាមរយៈការបោះឆ្នោតសមាគមនេះមិនមានការលំបាកផ្នែកថវិកាខ្លាំងពេកនោះទេ»។ នេះជាប្រសាសន៍របស់សម្តេចតេជោ ថ្លែងនៅលើបណ្តាញសង្គមព្រឹកថ្ងៃទី២១ ខែកុម្ភៈ នេះ។

គួរបញ្ជាក់ផងដែរថា អតីតតារាសម្តែងល្បីឈ្មោះ ស្រីតូច ចំណាន មានឈ្មោះពិតថា ម៉ៅ សុចំណាន កើតនៅឆ្នាំ១៩៨៣ បច្ចុប្បន្នមានអាយុ៤១ឆ្នាំមានទីកន្លែងកំណើត នៅខេត្តស្វាយរៀង។ លោកជំទាវអ្នកឧកញ៉ា ម៉ៅ ចំណាន បានបោះជំហានចូលប្រឡូកក្នុងវិថីសិល្បៈ ក្នុងអំឡុងឆ្នាំ១៩៩៨ ដោយអាជីពដំបូងជាអ្នកចម្រៀងតាមភោជនីយដ្ឋាន បន្ទាប់មកអតីតអ្នកសិល្បៈរូបនេះមានឱកាសបានចូលសម្តែង ខារ៉ាអូខេ នៅក្នុងផលិតកម្មហង្សមាស ផលិតកម្ម យូធូ និងផលិត ស្ទឹងសង្កែ រហូតបានឡើងកូដក្លាយជាពិធីការិនី ប្រចាំស្ថានីយទូរទស្សន៍ ប៉ុស្តិ៍លេខ៥ផងដែរ ។

ស្របពេលដែលការងារសិល្បៈរបស់ ស្រីតូច ចំណាន មានភាពរីកចម្រើន មានការគាំទ្រជា លំដាប់ស្រាប់តែអតីតតារាសម្តែង និងជាពិធីការិនី រូបនេះបានជួបរឿងអកុសលអាម៉ាសមុខមួយ គឺត្រូវបានក្រុមការងារ ដើរជាន់ជាយរ៉ូប ធ្វើឱ្យរបូតក្នុងអំឡុងពេលដែលនាងកំពុងតែធ្វើជាពិធីការិនីផ្សាយផ្ទាល់ ក្នុងកម្មវិធីមួយរបស់ ស្ថានីយទូរទស្សន៍ប៉ុស្តិ៍លេខ៥ កាលពីអំឡុងឆ្នាំ២០០២-២០០៣ ដោយកាលនោះ នាងនៅមិនទាន់មានជីវភាពធូរធារប៉ុន្មានទេ។

ទោះជាយ៉ាងណា ភ័ព្ទព្រេងវាសនារបស់អតីតអ្នកសិល្បៈរូបនេះខ្ពស់ត្រដែងស្ទើរមិនគួរឱ្យជឿកែប្រែវាសនារបស់ខ្លួនយ៉ាងត្រចេះត្រចង់ក្លាយជាឧត្តមភរិយារបស់សេដ្ឋីស្រុកខ្មែរគឺអ្នកឧកញ៉ា គិត ម៉េង ក្រោយពីតស៊ូ អត់ធ្មត់សង្កត់ចិត្តរស់នៅក្នុងស្ថានភាព ជាភរិយាលួចលាក់មិនពេញមុខពេញមាត់ អស់រយៈពេលជាង ១០ឆ្នាំកន្លងមកបានទទួលផ្លែផ្កាដោយអ្នកឧកញ៉ា គិត ម៉េង និងអតីតតារាសម្តែងរូបនេះដឹកដៃគ្នា ចូលរោងការសំពះផ្ទឹម តាមប្រពៃណីខ្មែរ នៅថ្ងៃទី២០ ខែមីនា ឆ្នាំ២០១៥ បន្ទាប់ពីអ្នកទាំងពីរមានកូន៤នាក់( ប្រុសពីរ ស្រីពីរ) ជាមួយគ្នា៕

ថ្មីៗនេះ កម្លាំងប៉ុស្តិ៍នគរបាលរដ្ឋបាលចតុមុខបានធ្វើការហាមឃាត់ដល់អ្នកបើករថយន្តកែច្នៃអគ្គីសនីមួយគ្រឿងដឹកអ្នកដំណើរផឹកស៊ីចល័តតាមដងផ្លូវសាធារណៈ ព្រោះថាបានបង្កភាពអណាធិបតេយ្យនិងប៉ះពាល់ដល់សណ្តាប់ធ្នាប់សង្គម។

យោងតាមការបង្ហោះនៅលើផេកផ្លូវការរបស់ស្នងការដ្ឋាននគរបាលរាជធានីភ្នំពេញ កាលពីថ្ងៃទី២០ ខែកុម្ភៈ ឆ្នាំ២០២៤ ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅត្រង់ចំណុចបណ្តោយផ្លូវសុធារស សង្កាត់ចតុមុខ ខណ្ឌដូនពេញ កម្លាំងប៉ុស្តិ៍នគរបាលរដ្ឋបាលចតុមុខ បានធ្វើការហាមឃាត់អ្នកបើករថយន្តកែច្នៃអគ្គិសនី ដឹកអ្នកដំណើរផឹកស៊ីចល័តតាមដងផ្លូវសាធារណៈមួយគ្រឿង ដោយហេតុថាបានបង្កភាពអណាធិបតេយ្យតាមដងផ្លូវសាធារណៈ និងធ្វើឲ្យប៉ះពាល់ដល់សណ្តាប់ធ្នាប់សង្គម។ កម្លាំងនគរបាលក៏បានអញ្ជើញពួកគេមកកាន់ប៉ុស្តិ៍នគរបាលរដ្ឋបាលចតុមុខ ដើម្បីធ្វើការអប់រំណែនាំ និងឱ្យបញ្ឈប់នូវសកម្មភាពដឹកអ្នកដំណើរផឹកស៊ីចល័តតាមផ្លូវសាធារណៈនោះបន្តទៀត។

ទោះជាយ៉ាងណាក៏ដោយ បន្ទាប់ពីមានការដាក់បង្ហោះខាងលើនេះ ក៏មានបងប្អូនប្រជាពលរដ្ឋខ្មែរជាច្រើនបានចូលទៅបញ្ចេញមតិដោយលើកនូវហេតុផលសមស្របមួយចំនួន។ អ្នកខ្លះថា «គួរតែកំណត់ផ្លូវតំបន់បើកបរដើម្បីទាក់ទាញភ្ញៀវទេសចរណ៍ដូចប្រទេសថៃ»។ ម្នាក់ទៀតបានលើកឡើងថា«ឡានអគ្គិសនី មានន័យថាជា ឡានបៃតង ជួយដល់បរិស្ថាន បូករួមទាំងការដឹកភ្ញៀវបរទេស ឬជាតិកំសាន្ត គឺជារឿងច្នៃប្រឌិតនាំឲ្យបរទេសមានអនុស្សាវរីយ៍ល្អៗពេលមកលេងប្រទេសយើង ថែមទាំងបានជួយរួមចំណែកបង្កើនចំណូលប្រទេសជាតិទៀត មានអ្វីមិនល្អ?»។ ខណៈម្នាក់ទៀតថា«គួរតែណែនាំ ប្រសិនបើបង្កសំឡេងរំខាន អសណ្តាប់ធ្នាប់ជាដើម និងកែតម្រូវលើផ្លូវណាដែលអាចអោយរត់បាន ដើម្បីជាការទាក់ទាញទេសចរណ៍»៕

កាលពីពេលថ្មីៗនេះ យោងតាមការបង្ហោះនៅលើគេហទំព័រហ្វេសបុក Fairfield Is Where I Live គឺបានបង្ហាញពីគំនូរសិល្បៈវប្បធម៌ខ្មែរដែលបានគូរជិតរួចរាល់ហើយ នៅលើអគារ PCYC ស្ថិតនៅទីក្រុង McBurney Rd Cabramatta ប្រទេសអូស្រ្តាលី។ កាន់តែពិសេសជាងនេះទៅទៀតគំនូរសិល្បៈនេះគឺបានគូរដោយវិចិត្រករខ្មែរម្នាក់ឈ្មោះ Hun Sopheak។

រូបគំនូរនោះទៀតសោតគឺបានឆ្លុះបញ្ចាំងពីវប្បធម៌អរិយធម៌ខ្មែរដ៏ចំណាស់ រួមទាំងរបាំអប្សារានិងប្រាសាទអង្គរវត្តព្រលឹងនៃដូនតាខ្មែរ បានដាក់តាំងបង្ហាញនៅលើផ្ទាំងគំនូរយ៉ាងច្បាស់ៗធំៗស្ថិតនៅចំពីមុខផ្លូវធ្វើដំណើរសាធារណៈនៃប្រទេសអូស្រ្តាលី។ រីឯនៅផ្នែកជំហៀងនៃផ្ទាំងគំនូរជាមួយគ្នានេះ ក៏បានបង្ហាញអំពីគំនូរប្រាសាទព្រះវិហារ ល្ខោនស្បែកធំ រូបរបាំហនុមានសុវណ្ណមច្ឆា ព្រមជាមួយផ្កាតំណាងជាតិខ្មែរគឺផ្ការំដួល។

តាមរយៈស្នាដៃគំនូរទាំងនេះគឺសុទ្ធតែចង្អុលបង្ហាញពីអត្តសញ្ញាណជាតិខ្មែរដែលគេទទួលស្គាល់ជាអន្តរជាតិថា ខ្មែរជាប្រទេសដ៏ចំណាស់រុងរឿង មានវប្បធម៌អរិយធម៌សម្បូរបែបទាំងនៅក្នុងអតីតកាលនិងបច្ចុប្បន្ន ជាពិសេសគឺនឹងទាក់ទាញភ្ញៀវទេសចរអន្តរជាតិដែលចង់មកសិក្សានិងឈ្វែងយល់បន្ថែមទៀតពីសម្បត្តិវប្បធម៌អរិយធម៌ខ្មែរដ៏ថ្កើនថ្កាននៅលើទឹកដីប្រទេសកម្ពុជា។

យោងតាមការបង្ហោះដោយក្រសួងវប្បធម៌និងវិចិត្រសិល្បៈកម្ពុជាក៏បានឲ្យដឹងដែរថា ការគូររូបភាពសិល្បៈវប្បធម៌ខ្មែរ ជាការរួមចំណែកនៃការផ្សព្វផ្សាយសិល្បៈវប្បធម៌ប្រពៃណីខ្មែរយើង ហើយក៏ជាឱកាសមួយក្នុងការអបអរសាទរទិវាវប្បធម៌ជាតិដែលគ្រោងប្រព្រឹត្តទៅនៅថ្ងៃ៣មីនាខាងមុខនេះផងដែរ៕

ប្រទេសថៃ ៖ សារព័ត៌មានថៃរាយការណ៍ថា សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់នៃព្រះមហាក្សត្រ នៃព្រះរាជាណាចក្រកម្ពុជា និងជាអតីតនាយករដ្ឋមន្ត្រីកម្ពុជា ដែលមានភាពជិតស្និទ្ធជាមួយលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ បានធ្វើដំណើរពីប្រទេសកម្ពុជា មកសួរសុខទុក្ខលោក ថាក់ស៊ីន ដោយផ្ទាល់នៅគេហដ្ឋានរបស់លោកក្នុងទីក្រុងបាងកក នៅថ្ងៃទី២១ ខែកុម្ភៈ ឆ្នាំ២០២៤ នាវេលាម៉ោង១០និង៣០នាទីព្រឹក ហើយសម្តេច ហ៊ុន សែន នឹងវិលត្រឡប់ទៅប្រទេសកម្ពុជាវិញ នាវេលាម៉ោង២និង៣០នាទី នាថ្ងៃដដែល ។

ការធ្វើដំណើររបស់សម្តេច ហ៊ុន សែន មកសួរសុខទុក្ខលោក ថាក់ស៊ីន ស៊ីណាវ៉ាត្រា ដល់គេហដ្ឋាននេះ ក្រោយពីលោក ថាក់ស៊ីន អតីតនាយករដ្ឋមន្ត្រីថៃ ទទួលបានការព្យួរទោសពីតុលាការ និងចាកចេញពីមន្ទីរពេទ្យប៉ូលិស ។ លោក ថាក់ស៊ីន បានស្នាក់នៅផ្ទះរបស់ខ្លួន ដែលស្ថិតនៅផ្លូវ ចារ៉ាន់ សានិតវង្ស ៦៩ ក្នុងទីក្រុងបាងកក ។

សម្តេច ហ៊ុន សែន បានបង្ហោះរូបភាពសម្តេចអង្គុយក្នុងយន្តហោះ ព្រមទាំងសរសេរថា ៖ «ខ្ញុំកំពុងធ្វើដំណើរទៅកាន់ទីក្រុងបាងកក ដើម្បីសួរសុខទុក្ខបងធម៌របស់
ខ្ញុំ គឺឯកឧត្តម ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីនៃព្រះរាជាណាចក្រថៃ» ។

ជាមួយគ្នានេះ ប៉ូលិសចរាចរណ៍ប្រចាំស្ថានីយបាងផ្លាត ប្រទេសថៃ បានជួយសម្រួលចរាចរណ៍នៅបរិវេណផ្លូវ ចារ៉ាន់ សានិតវង្ស ៦៩ មុនពេលសម្តេច ហ៊ុន សែន ធ្វើដំណើរមកដល់គេហដ្ឋានរបស់លោក ថាក់ស៊ីន ។ ក្រៅពីនេះ ប៉ូលិសចរាចរណ៍បានយករបាំងមកបិទផ្លូវនៅបរិវេណជុំវិញផងដែរ ខណៈក្រុមអ្នកសារព័ត៌មានថៃរង់ចាំនៅខាងក្រៅ ៕

ជាទូទៅ អ្នកអ៊ុតសម្លៀកបំពាក់ភាគច្រើនតែងតែឈឺក្បាលជាប្រចាំ នៅពេលពួកគេធ្វើឱ្យបាតឆ្នាំងអ៊ុតមានស្នាមខ្មៅ ដោយសារការអ៊ុតសម្លៀកបំពាក់ ។ ហេតុនេះ វាបានបង្កបញ្ហាលំបាកដល់ការអ៊ុតសម្លៀកបំពាក់យ៉ាងខ្លាំង ។ ប៉ុន្តែតើជ្រាបឬទេថា យើងអាចយករបស់នៅជុំវិញខ្លួនមួយចំនួនក្នុងផ្ទះ មកដោះស្រាយបញ្ហានេះបានយ៉ាងងាយស្រួល ។

យើងនឹងនាំអ្នកទាំងអស់គ្នាមកមើលពីគន្លឹះ ដើម្បីដោះស្រាយបញ្ហាស្នាមខ្មៅនៅបាតឆ្នាំងអ៊ុត គឺការប្រើប្រាស់ថ្នាំប៉ារ៉ាសេតាមុល និងថ្នាំដុសធ្មេញ ។ វាជារបស់ប្រើប្រាស់ដែលយើងអាចរកបានយ៉ាងងាយនៅក្នុងផ្ទះ ប៉ុន្តែវាអាចដោះស្រាយបញ្ហាឆ្នាំងអ៊ុត ដែលធ្វើឱ្យយើងឈឺក្បាលបានយ៉ាងមានប្រសិទ្ធភាព ។

គន្លឹះដោះស្រាយបញ្ហាស្នាមខ្មៅ ឬស្នាមឆេះនៅបាតឆ្នាំងអ៊ុតនេះ ជាគន្លឹះងាយស្រួលបំផុត គឺយើងគ្រាន់តែយកថ្នាំប៉ារ៉ាសេតាមុល មកដាក់នៅលើបាតឆ្នាំងអ៊ុតពេលវាកំពុងក្តៅ ដោយប្រើប្រាស់ចង្កឹះឈើសម្រាប់ចាប់ថ្នាំប៉ារ៉ាសេតាមុល និងដុសចុះឡើងៗឱ្យវារលាយ ។ នៅពេលថ្នាំប៉ារ៉ាសេតាមុលរលាយហើយ យើងត្រូវយកក្រដាសជូតមាត់ក្រាស់ៗមកជូតវាចេញពីបាតឆ្នាំងអ៊ុត ពេលនោះ ស្នាមប្រឡាក់ ឬស្នាមឆេះនៅបាតឆ្នាំងអ៊ុត នឹងរលុបបាត់អស់ភ្លាមៗ ។

ក្រៅពីការប្រើប្រាស់ថ្នាំប៉ារ៉ាសេតាមុលហើយ ការប្រើប្រាស់ថ្នាំដុសធ្មេញ ក៏អាចជួយកម្ចាត់ស្នាមប្រឡាក់ ឬស្នាមឆេះនៅលើបាតឆ្នាំងអ៊ុតបានដូចគ្នា ហើយយើងអាចធ្វើបានតាមវិធីតែមួយ ។ ហេតុអ្វីថ្នាំប៉ារ៉ាសេតាមុល អាចកម្ចាត់ស្នាមឆេះនៅបាតឆ្នាំងអ៊ុតយ៉ាងមានប្រសិទ្ធភាព?

សារធាតុគីមីរបស់ថ្នាំប៉ារ៉ាសេតាមុល ឬឈ្មោះតាមវិទ្យាសាស្ត្រ ហៅថា «Acetaminophen» មានចំណុចរលាយ១៧០អង្សារសេ ខណៈឆ្នាំងអ៊ុតបានធ្វើឱ្យសាច់ក្រណាត់ក្តៅ រហូតដល់ប្រមាណពី១៨០អង្សារសេ ទៅ២២០អង្សារសេ វានឹងធ្វើឱ្យថ្នាំប៉ារ៉ាសេតាមុលរលាយបាន ។ នៅពេលថ្នាំនេះរលាយហើយ វានឹងបង្កើតជាសារធាតុថ្មី ដូចជា ៖ សារធាតុ Para-aminophenol ដែលអាចជួយរំលាយស្នាមកខ្វក់នៅលើបាតឆ្នាំងអ៊ុតបាន ។ រីឯសារធាតុក្នុងថ្នាំដុសធ្មេញ ក៏អាចជួយកម្ចាត់ស្នាមប្រឡាក់ ឬស្នាមឆេះនៅបាតឆ្នាំងអ៊ុតបានដូចគ្នា ៕

អ្នកឧកញ៉ា ឡេង ណាវ៉ាត្រា ពេលនេះបរាជ័យការឈរឈ្មោះធ្វើជាប្រធានសមាគមសិល្បករខ្មែរក្រោយពីលោកទទួលយកសំណើរបស់សម្តេចតេជោ ហ៊ុនសែន បន្ទាប់ពីសម្តេចយកមតិប្រជាពលរដ្ឋជាធំដែលមហាជនសំណូមពរទៅសម្តេចមិនចង់ឱ្យលោកឈរឈ្មោះនោះទេ។ ទន្ទឹមនឹងនេះ សំឡេងប្រជាពលរដ្ឋទាំងរងគ្រោះនិងមិនរងគ្រោះក្តីទទូចចង់ឱ្យអ្នកឧកញ៉ា ឡេង ណាវ៉ាត្រា ពន្លឿនការសងសង់ផ្ទះរបស់ពួកគេឱ្យបានកាន់តែឆាប់រហ័ស។

កាលពីល្ងាចថ្ងៃទី២០ ខែកុម្ភៈ អ្នកឧកញ៉ា ឡេង ណាវ៉ាត្រា បានប្រកាសនៅលើបណ្តាញសង្គមរបស់ខ្លួនតែម្តងដោយលោកនិយាយថាប្រសិនជាមានការគាំទ្រលោកនឹងឈរឈ្មោះធ្វើជាបេក្ខភាពប្រធានសមាគមសិល្បៈថ្មី ខណៈមហាជនភាគច្រើនបង្ហាញការមិនគាំទ្រលោកនោះទេ លើកឡើងតែអ្នកក្នុងចង្កោមក្រុមហ៊ុនលោកផ្ទាល់រួមមានឧកញ៉ា ខេមរៈ សិរីមន្ត ជាដើម។

ទន្ទឹមនឹងការប្រកាសឈរឈ្មោះនេះមុនដំបូង សម្តេចតេជោ ហ៊ុន សែន ក៏បង្ហាញការគាំទ្រពីបំណងរបស់អ្នកឧកញ៉ា ឡេង ណាវ៉ាត្រា ដូចគ្នា ប៉ុន្តែមហាជនបានសម្រុកចូលទៅបញ្ចេញមតិលើការបង្ហោះរបស់សម្តេចមិនគាំទ្រឱ្យអ្នកឧកញ៉ា ឈរឈ្មោះនោះទេ ដោយចង់ឱ្យអ្នកឧកញ៉ា ឡេង ណាវ៉ាត្រា គិតគូររឿងធ្វើផ្ទះឱ្យអតិថិជនជាមុនសិន ពេលវេលានេះមិនទាន់សមស្របឱ្យលោកមកដឹកនាំសិល្បៈនោះឡើយ។ ដោយមើលឃើញពីមតិយោបល់ប្រជាពលរដ្ឋជាធំ សម្តេចក៏បានស្នើឱ្យអ្នកឧកញ៉ា ឡេង ណាវ៉ាត្រា ដកបេក្ខភាពចេញសិន ទុកលទ្ធភាពឱ្យអ្នកផ្សេងធ្វើជាប្រធានសមាគមសិនរង់ចាំពេលក្រោយក៏មិនយឺតពេលដែរ។ការប្រកាសដ៏ខ្ពង់ខ្ពស់របស់សម្តេច បានធ្វើឱ្យប្រជាពលរដ្ឋបង្ហាញអារម្មណ៍សប្បាយចិត្តឡើងវិញដែលសម្តេចតេជោ យកគំនិតប្រជាពលរដ្ឋជាធំ ខណៈអ្នកឧកញ៉ា ឡេង ណាវ៉ាត្រា ក៏គោរពតាមការសម្រេចចិត្តរបស់សម្ដេចតេជោ ផងដែរ។

ទន្ទឹមនឹងនេះប្រជាពលរដ្ឋដែលបានទិញផ្ទះពីបុរី ឡេង ណាវ៉ាត្រា ហើយមិនទាន់ទទួលបានផ្ទះក៏ទទូចទៅកាន់ខាងក្រុមហ៊ុន ពន្លឿនលើការសាងសង់ផ្ទះរបស់ពួកគេឱ្យកាន់តែឆាប់រហ័សផងដែរដោយអតិថិជនដូចជាតារាកំប្លែង កាតុ ជាដើមអះអាងថាបង់ផ្តាច់ជិត៣បីឆ្នាំហើយនៅមិនទាន់ទទួលបានផ្ទះនៅឡើយ៕