ជាការពិតណាស់ នៅកន្លែងធ្វើការ ការប្រាស្រ័យទាក់ទងគ្នាទៅវិញទៅមកគឺជារឿងល្អ ហើយការបើកចំហ ឬការនិយាយប្រាប់មិត្តភក្ដិរួមការងារអំពីខ្លួនអ្នក ក៏ជារឿងល្អដែរពីព្រោះអ្នកនឹងអាចកសាងបណ្ដាញទំនាក់ទំនងការងារកាន់តែទូលំទូលាយ។ ប៉ុន្តែទោះជាយ៉ាងណា រឿងខ្លះក៏មិនគួរនិយាយចេញមកដែរ ព្រោះវាអាចនាំផលអវិជ្ជមានដល់រូបអ្នក។ ដូច្នេះខាងក្រោមនេះ គឺជារឿងមួយចំនួនដែលអ្នកមិនគួរនិយាយអំពីខ្លួនអ្នកនៅកន្លែងធ្វើការ៖

១.រឿងនយោបាយ៖ ការនិយាយរឿងនយោបាយក្នុងកន្លែងធ្វើការគឺមិនល្អនោះទេ ទោះបីជាអ្នកមិនកាន់ជើងខាងណាក៏ដោយ ក៏វាអាចមានបញ្ហាដល់រូបអ្នកដែរ។ មនុស្សម្នាក់ៗប្រកាន់គោលការណ៍ និងជំនឿខុសៗគ្នា ដូច្នេះបើអ្នកមើលស្រាលគោលការណ៍ ឬជំនឿដែលគេប្រកាន់ខ្ជាប់ នោះទំនាក់ទំនងអ្នកនិងមិត្តរួមការងារអាចនឹងមានបញ្ហា។

២.រឿងប្រាក់ខែ៖ ការនិយាយប្រាប់ពីប្រាក់ខែអ្នកឱ្យគេដឹង ឬក៏សួរគេអំពីប្រាក់ខែគឺជារឿងមិនល្អ ដែលវានឹងនាំមកនូវតែភាពអវិជ្ជមានរវាងអ្នកនិងមិត្តរួមការងារអ្នក។ ជាការពិតណាស់ នៅកន្លែងធ្វើការនីមួយៗ គឺមិនមានភាពយុត្តិធម៌ចំពោះរឿងប្រាក់ខែនោះទេ។ ពេលខ្លះ សូម្បីតែមិត្តសម្លាញ់របស់អ្នក នៅពេលដែលអ្នកប្រាប់គ្នាទៅវិញទៅមកអំពីប្រាក់ខែរៀងៗខ្លួនរួច អារម្មណ៍នៃការរាប់អានរបស់អ្នកចំពោះគ្នាអាចនឹងលែងដូចដើម។

៣.រឿងក្នុងបន្ទប់ដេករបស់អ្នកដទៃ៖ នៅកន្លែងធ្វើការ អ្នកគួរជៀសវាងដាច់ខាតការនិយាយអំពីជីវិតផ្លូវភេទ ឬទំនោរផ្លូវភេទរបស់មិត្តរួមការងារ។ គ្មានអ្នកណាម្នាក់សប្បាយចិត្តនឹងស្ដាប់អ្នកនិយាយអំពីជីវិតផ្លូវភេទឯកជនរបស់គេនោះទេ អ្នកអាចគិតអ្វីក៏បានចំពោះអ្នកណាម្នាក់ក៏បាន ប៉ុន្តែទុកតែក្នុងខួរក្បាលអ្នកបានហើយ កុំនិយាយវាអី ព្រោះនឹងនាំមកតែភាពអវិជ្ជមានមកលើរូបអ្នកតែប៉ុណ្ណោះ។

៤.ប្រាប់គេពីអតីតកាលមិនល្អរបស់ខ្លួន៖ គួរកុំប្រាប់គេឯងនៅកន្លែងធ្វើការដឹងពីអតីតកាលមិនល្អរបស់អ្នកឱ្យសោះ។ វាមិនចំណេញអ្វីទេ ប៉ុន្តែផ្ទុយទៅវិញ វានឹងនាំឱ្យគេឯងគិតអវិជ្ជមានមកលើរូបអ្នក ដូច្នេះរឿងអតីតកាលមិនល្អរបស់អ្នក ទុកក្នុងចិត្តអ្នកបានហើយ។

៥.ប្រាប់គេឯងថាអ្នកកំពុងរកការងារថ្មី៖ នៅកន្លែងធ្វើការ បើកាលណាគេដឹងថា អ្នកកំពុងរៀបចំគម្រោងចាកចេញ គឺគ្មានហេតុផលអ្វីដែលគេឯងគ្រប់គ្នាគួរចំណាយពេលជាមួយអ្នកនោះទេ។ ជួនកាល អ្នកបរាជ័យក្នុងការទទួលបានការងារថ្មី ដូច្នេះគួរតែកុំប្រាប់គេឯងឱ្យដឹងអី ត្រូវរង់ចាំរហូតដល់ពេលអ្នកបានការងារនោះសិន បើគេដឹងថាអ្នកស្វែងរកការងារថ្មី ប៉ុន្តែបរាជ័យគេលែងចាត់ទុកអ្នកជាមនុស្សសំខាន់ទៀតហើយ៕

បរទេស៖ ក្រុមហ៊ុនផលិតរថយន្ត VinFast របស់វៀតណាម និង BYD របស់ចិនបានរួមគ្នាបញ្ចុះតម្លៃរថយន្តអគ្គិសនីដើម្បីប្រកួតប្រជែងជាមួយប្រទេសឥណ្ឌូណេស៊ីដែលជាទីផ្សាររថយន្តអគ្គិសនីដ៏ធំបំផុតនៅអាស៊ីអាគ្នេយ៍។
កាលពីថ្ងៃទី២០ ខែកុម្ភៈ ឆ្នាំ២០២៤ យោងតាម Nikkei Asia បានឱ្យដឹងថា ប្រទេសឥណ្ឌូណេស៊ីកំពុងក្លាយជាទីផ្សារដ៏សំខាន់បំផុតសម្រាប់ក្រុមហ៊ុនផលិតរថយន្តអគ្គិសនីជាច្រើន ខណៈដែលប្រទេសនេះអះអាងជំហររបស់ខ្លួនថាជាប្រទេសផលិតនីកែលដ៏ធំបំផុតរបស់ពិភពលោក ដែលជាធាតុផ្សំដ៏សំខាន់នៅក្នុងអាគុយរថយន្តអគ្គិសនី។

ជាមួយនឹងប្រជាជនជាង ២៧០ លាននាក់ ឥណ្ឌូនេស៊ីគឺប្រទេសដែលមានប្រជាជនច្រើនជាងគេទី ៤ របស់ពិភពលោកកំពុងឈរឈ្មោះជាទីផ្សាររថយន្តដ៏ធំបំផុតនៅអាស៊ីអាគ្នេយ៍។ នៅឯពិព័រណ៌រថយន្តអន្តរជាតិឥណ្ឌូណេស៊ីដែលកំពុងដំណើរការកាលពីពេលថ្មីៗនេះ ក្រុមហ៊ុន VinFast បានដាក់បង្ហាញរថយន្ត ៥ កៅអីចំនួន ២ ម៉ូដែលគឺ VFe34 ដែលមានតម្លៃប្រហែល ៣០០ លានរូពី (ប្រមាណ ១៩,០០០ ដុល្លារអាមេរិក) និង VF5 មានតម្លៃ ២៥០ លានរូពី (ប្រមាណ ១៦,០០០ ដុល្លារអាមេរិក)។

ចំពោះក្រុមហ៊ុនចិន BYD វិញក៏បានដាក់បង្ហាញនូវរថយន្តអគ្គិសនី Atto 3 របស់ខ្លួនផងដែរនៅឯការតាំងពិព័រណ៌រថយន្តអន្តរជាតិនៅឥណ្ឌូណេស៊ី ដែលមានតម្លៃ ៥១៥ លានរូពី (ប្រមាណ ៣៣,០០០ ដុល្លារអាមេរិក)។ ទោះជាយ៉ាងណាក៏ដោយ បើយោងតាម Nikkei Asia តម្លៃនេះគឺតិចជាងពាក់កណ្តាលនៃមធ្យមភាគសកលសម្រាប់រថយន្តអគ្គិសនី ប៉ុន្តែវានៅតែមានតម្លៃថ្លៃនៅក្នុងប្រទេសឥណ្ឌូនេស៊ី ដោយសារតែប្រាក់បៀវត្សរ៍ប្រចាំខែរបស់ប្រជាជននៃប្រទេសនេះជាមធ្យមគឺប្រហែល ៣.១៨ លានរូពី (ប្រមាណជាង ២០០ ដុល្លារអាមេរិកប៉ុណ្ណោះ)។

គួរបញ្ជាក់ដែរថា ឥណ្ឌូនេស៊ីគឺជាទីផ្សាររថយន្តដ៏ធំបំផុតនៅអាស៊ីអាគ្នេយ៍។ ដូច្នេះក្រុមហ៊ុន VinFast របស់វៀតណាមគ្រោងនឹងដំឡើងរថយន្តអគ្គិសនីរបស់ខ្លួនចំនួន ៥០,០០០ គ្រឿងនៅឆ្នាំនេះ និង ១០០,០០០ គ្រឿងនៅឆ្នាំក្រោយ។ លោក Zachary Mark Hollis នាយកផ្នែកលក់របស់ VinFast បាននិយាយថា រថយន្តអគ្គិសនីមានអត្ថប្រយោជន៍ជាច្រើនដូចជាមិនចាំបាច់ចាក់សាំង ការថែទាំកាន់តែងាយស្រួល និងស្របតាមនិន្នាការចុងក្រោយបង្អស់៕

សហរដ្ឋអាមេរិក ៖ ការិយាល័យយានយន្តរដ្ឋកាលីហ្វ័រញ៉ា សហរដ្ឋអាមេរិក បានបង្ហាញទិន្នន័យរថយន្តបើកបរដោយស្វ័យប្រវត្តិរបស់ក្រុមហ៊ុនចំនួន៣៨ ដែលបានបើកបរសាកល្បងនៅលើដងផ្លូវជាក់ស្តែងក្នុងរដ្ឋកាលីហ្វ័រញ៉ា ស្មើនឹងចម្ងាយផ្លូវសរុបជិត១៥លានគីឡូម៉ែត្រ ។ គេបានបែងចែកជារថយន្តបើកបរដោយស្វ័យប្រវត្តិទាំងស្រុង ស្មើជាង៥លាន៣សែនគីឡូម៉ែត្រ និងរថយន្តបើកបរដោយស្វ័យប្រវត្តិ ប៉ុន្តែមានភ្នាក់ងារនៅប្រចាំការ ស្មើជាង៩លាន៣សែនគីឡូម៉ែត្រ ។

រថយន្តរបស់ក្រុមហ៊ុនចំនួន៣ រួមមាន ៖ ក្រុមហ៊ុន Cruise, ក្រុមហ៊ុន Waymo និងក្រុមហ៊ុន Apollo បានគ្រប់គ្រងតំណែងជើងឯកកំពូលទាំង៣ ក្នុងចំណោមក្រុមហ៊ុនដែលមានចម្ងាយផ្លូវសាកល្បងច្រើនបំផុត ។ រថយន្តរបស់ក្រុមហ៊ុន Waymo អាចបើកបររហូតដល់៧លាន៨សែនគីឡូម៉ែត្រ បន្ទាប់មក គឺរថយន្តរបស់ក្រុមហ៊ុន Cruise អាចបើកបររហូតដល់៩៣ម៉ឺន៩ពាន់គីឡូម៉ែត្រ និងក្រុមហ៊ុន Zoox អាចបើកបរបាន៧២ម៉ឺន៩ពាន់គីឡូម៉ែត្រ ។

ក្រៅពីនេះ នៅមានរថយន្តរបស់ក្រុមហ៊ុនបច្ចេកវិទ្យាខ្នាតយក្ស គឺក្រុមហ៊ុន Apple បានចូលរួមសាកល្បងបើកបរផងដែរ ដែលមានរថយន្តសាកល្បងចំនួន៦៧គ្រឿង ។ រថយន្តរបស់ក្រុមហ៊ុន Apple បានបើកបរក្នុងចម្ងាយផ្លូវសរុបចំនួន៧២ម៉ឺន៩ពាន់គីឡូម៉ែត្រ ប៉ុន្តែវាជាការបើកបររថយន្តដោយស្វ័យប្រវត្តិ និងមានភ្នាក់ងារចាំត្រួតពិនិត្យ ។

បើទោះជាតួលេខចម្ងាយផ្លូវរបស់រថយន្តបើកបរដោយស្វ័យប្រវត្តិ ស្មើរាប់លានគីឡូម៉ែត្រក្តី ប៉ុន្តែ The Robot Report គឺជាភ្នាក់ងារព័ត៌មានមនុស្សយន្តដ៏ល្បីល្បាញ បានដាស់តឿនថា វាឆាប់រហ័សពេកហើយ ដែលគេសន្និដ្ឋានថា បច្ចេកវិទ្យាបើកបររថយន្តដោយស្វ័យប្រវត្តិនេះមានសុវត្ថិភាព ពីព្រោះរបាយការណ៍នេះមិនបានបង្ខំឱ្យក្រុមហ៊ុននានាបង្ហាញពីចំនួនគ្រោះថ្នាក់ ឬបង្ហាញពីចំណុចដែលរថយន្តមិនអាចសម្រេចចិត្ត ឬរថយន្តសម្រេចចិត្តខុសឆ្គង ។

លើសពីនេះ ការិយាល័យយានយន្តរដ្ឋកាលីហ្វ័រញ៉ា ក៏ពុំបានកំណត់លក្ខខណ្ឌគ្រោះថ្នាក់ឱ្យបានច្បាស់លាស់ ទើបធ្វើឱ្យចំនួនគ្រោះថ្នាក់ស្មើជាង៦.៥៧០លើក នៅឆ្នាំ២០២៣ អាចតិចជាងចំនួនគ្រោះថ្នាក់ពិតប្រាកដ ។

ហេតុនេះ ការិយាល័យយានយន្តរដ្ឋកាលីហ្វ័រញ៉ា គួរតែផ្អាកចេញលិខិតអនុញ្ញាតឱ្យបើកបរសាកល្បងសម្រាប់រថយន្តណា ដែលជារបស់ក្រុមហ៊ុនមិនផ្ញើរបាយការណ៍គ្រោះថ្នាក់ក្នុងពេលបើកបរ ។ នេះឆ្លុះបញ្ចាំងឱ្យឃើញពីសារៈសំខាន់ផ្នែកសុវត្ថិភាព ហើយបច្ចេកវិទ្យាបើកបររថយន្តដោយស្វ័យប្រវត្តិត្រូវតែទទួលបានការអភិវឌ្ឍ និងកែលម្អបន្តទៀត មុនពេលរដ្ឋកាលីហ្វ័រញ៉ា អនុញ្ញាតឱ្យរថយន្តទាំងនេះផ្តល់សេវាកម្មបើកបរនៅតាមផ្លូវជាក់ស្តែង ៕