បរទេស៖ កាលពីយប់ថ្ងៃទី៥ ខែមីនា ឆ្នាំ២០២៤ មហាសេដ្ឋី Elon Musk បានបង្ហោះរូបភាព meme មួយសន្លឹកនៅលើបណ្តាញសង្គម X របស់គាត់ បន្ទាប់ពីបណ្តាញទំនាក់ទំនងសង្គមរបស់ក្រុមហ៊ុន Meta មិនដំណើរការ ដោយ Musk បានសរសេរថា បណ្តាញសង្គម X ដំណើរការល្អប្រសើរជាងវេទិកា Meta ទ្វេរដង។ នៅម៉ោង ១១: ១៥ នាទីយប់ លោក Musk បានបង្ហោះរូបថតកំប្លែងពីខ្សែភាពយន្ត Penguins of Madagascar ដែលក្នុងនោះនិមិត្តសញ្ញា X ត្រូវបានភ្ជាប់ទៅនឹងតួអង្គមេបញ្ជាការ ខណៈដែលតួអង្គដែលមាននិមិត្តសញ្ញា Instagram, Facebook និង Threads កំពុងបង្ហាញការស្តាប់បង្គាប់បញ្ជា។

នៅក្នុងរូបថតនោះ Musk ក៏បានបញ្ចូលសេចក្តីថ្លែងការណ៍របស់ Andy Stone ដែលជាប្រធានផ្នែកទំនាក់ទំនងនៅ Meta ថា “យើងដឹងថាមនុស្សកំពុងមានការលំបាកក្នុងការប្រើប្រាស់សេវាកម្មរបស់ Meta ដោយឥឡូវនេះយើងកំពុងធ្វើការយ៉ាងលំបាកដើម្បីដោះស្រាយបញ្ហានេះ។ ការបង្ហោះនេះទទួលបានការចូលមើលជាង ២០ លានដងក្នុងរយៈពេលត្រឹមតែមួយម៉ោងប៉ុណ្ណោះ ដោយមាន ២០ ម៉ឺនមតិ និងជាង ៥០ ម៉ឺន Like។ អ្នកនិយមលេងអ៊ីនធឺណិតភាគច្រើនក៏បានឆ្លើយតបជាមួយនឹង memes របស់ Musk ដោយលេងសើចចំពោះបញ្ហា Meta ព្រមទាំងសង្កត់ធ្ងន់លើតួនាទីរបស់ X នៅពេលនេះ។

ការដាច់ភ្លើងរបស់មេតាបានកើតឡើងទូទាំងពិភពលោកក្នុងរយៈពេលប្រហែលពីរម៉ោង។ អ្នកប្រើសេវាបណ្ដាញសង្គមដូចជា Facebook និង Messenger មានគណនីរបស់ពួកគេចេញហើយមិនអាចចូលបានទេ។ ដល់ម៉ោង ១១:២០ យប់ អ្នកខ្លះអាចចូលបានម្តងទៀត ទោះជាយ៉ាងណាក៏ដោយ មនុស្សជាច្រើននៅតែជួបប្រទះនឹងការលំបាកដោយសារហេតុផលដូចជា ភ្លេចពាក្យសម្ងាត់របស់ពួកគេ ខ្វះឧបករណ៍ផ្ទៀងផ្ទាត់ ឬមិនទទួលបានលេខកូដផ្ទៀងផ្ទាត់ជាដើម។

គួរបញ្ជាក់ដែរថា នេះមិនមែនជាលើកទី១ ទេដែល Meta តែងតែសាងកំហុស កាលពីឆ្នាំ ២០២១ កំហុស Meta ស្រដៀងគ្នានេះបានកើតឡើងនៅពេលដែលសេវាកម្មរបស់ក្រុមហ៊ុនជាបន្តបន្ទាប់ មិនអាចចូលដំណើរការបាន នៅលើគ្រប់វេទិកាទាំងអស់ និងក្នុងតំបន់សកលលោកជាច្រើន ដែលមានរយៈពេល ៦ ម៉ោង។ នៅពេលនោះ Meta បាននិយាយថាបញ្ហាគឺបណ្តាលមកពី “កំហុសក្នុងការកំណត់” នៅលើប្រព័ន្ធ។ ហើយនៅឆ្នាំ ២០១៩ កំណែគេហទំព័ររបស់ Facebook ក៏បានបាត់បង់ការតភ្ជាប់រយៈពេល ២៤ ម៉ោងផងដែរ៕

អ្នកប្រើប្រាស់បណ្តាញសង្គមទូទាំងពិភពលោកភ្ញាក់ផ្អើលយ៉ាងខ្លាំង នៅពេលបណ្តាញសង្គមពេញនិយមលំដាប់ពិភពលោក មិនដំណើរការ ដូចជា ៖ Facebook, Instagram និង Threads ។ វាបានធ្វើឱ្យអ្នកប្រើប្រាស់បណ្តាញសង្គមទាំងនេះរាប់លាននាក់នៅទូទាំងពិភពលោក រួមទាំងប្រទេសកម្ពុជាផងដែរ មិនអាច Log in ចូលប្រើប្រាស់គណនីរបស់ខ្លួនបានអស់រយៈពេលជាង១ម៉ោង ។

បណ្តាញសង្គមរបស់ក្រុមហ៊ុន Meta រួមមាន ៖ Facebook, Instagram និង Threads បានផ្អាកដំណើរការភ្លាមៗ កាលពីថ្ងៃទី៥ ខែមីនា ឆ្នាំ២០២៤ (ម៉ោងនៅប្រទេសកម្ពុជា) ក្នុងនោះអ្នកប្រើប្រាស់ Facebook ពុំអាច Log in ចូលគណនីរបស់ខ្លួនបានទេ ខណៈអ្នកប្រើប្រាស់ Instagram ក៏ពុំអាចប្រើប្រាស់បានដូចគ្នាដែរ ។ ក្រោយពីបណ្តាញសង្គមទាំងនេះគាំងអស់រយៈពេលជាង១ម៉ោង បណ្តាញសង្គម Facebook និង Instagram ក៏ត្រឡប់មកដំណើរការឡើងវិញតាមធម្មតា ។

ចំណែកក្រុមហ៊ុន Meta លើកឡើងថា ក្រុមហ៊ុនបានជ្រាបពីបញ្ហាដែលធ្វើឱ្យប៉ះពាល់ដល់ការ Log in ចូលប្រើប្រាស់ Facebook ហើយក្រុមការងារជំនាញកំពុងតែព្យាយាមដោះស្រាយបញ្ហានេះឱ្យបានឆាប់រហ័សបំផុត ។ ក្រុមហ៊ុន Meta បន្តថា វាជាកំហុសបច្ចេកទេស ប៉ុន្តែក្រុមហ៊ុនពុំបានបញ្ជាក់ឱ្យបានច្បាស់ថា ការគាំងបណ្តាញសង្គមកើតឡើងដោយសារបញ្ហាអ្វីឱ្យពិតប្រាកដទេ ។

Downdetector គឺជាគេហទំព័រសម្រាប់ត្រួតពិនិត្យបញ្ហារអាក់រអួលរបស់បណ្តាញសង្គម រាយការណ៍ថា កម្មវិធីផ្សេងទៀត ដូចជា ៖ Youtube, Tiktok និង Gmail ក៏បានគាំងដូចគ្នាដែរ ។ រីឯ NetBlocks បញ្ជាក់ថា បញ្ហាបណ្តាញសង្គមគាំងបានធ្វើឱ្យប៉ះពាល់ដល់អ្នកប្រើប្រាស់រាប់លាននាក់នៅទូទាំងពិភពលោក ព្រមៗគ្នា ។

ចំណែកសារព័ត៌មានបរទេសបានផ្សព្វផ្សាយ ដោយយោងតាមការលើកឡើងរបស់អ្នកជំនាញថា បញ្ហានេះអាចបណ្តាលមកពីបណ្តាញសង្គមរបស់ក្រុមហ៊ុន Meta ត្រូវបានគេលួចវាយប្រហារក៏ថាបាន ។ ក្រោយកើតហេតុការណ៍បណ្តាញសង្គមគាំងលើកនេះ បានធ្វើឱ្យតម្លៃភាគហ៊ុនរបស់ក្រុមហ៊ុន Meta ធ្លាក់ចុះ១,៥% ៕

ប្រទេសចិន ៖ វីដេអូមួយបានធ្វើឱ្យមហាជនភ្ញាក់ផ្អើល និង រិះ.គ.ន់ ផងដែរ ក្រោយពីពួកគេបានឃើញរថយន្តកង់៣ ដឹកបាច់ផ្កាយ៉ាងធំធ្វើពីដែកដុសឆ្នាំង ចំនួន៩៩៩ដុំ ។ រថយន្តកង់៣ បានដឹកបាច់ផ្កាដ៏ធំនេះទៅប្រគល់ឱ្យនារីម្នាក់ក្នុងពិធីខួបកំណើត នៅទីក្រុង Nantong ខេត្ត Jiangsu ប្រទេសចិន ។

នារីឈ្មោះ Sae Phan អាយុ២៩ឆ្នាំ គឺជាម្ចាស់អាជីវកម្មវាយនភ័ណ្ឌ និងជាអ្នកទទួលបានបាច់ផ្កាដ៏ពិសេសនេះ និយាយថា ម្ចាស់ផ្កានេះ មិនមែនជាស្វាមីរបស់នាងទេ គឺគ្រាន់តែជាបុគ្គលិកស្រីម្នាក់ដែលធ្វើការជាមួយនាង អស់រយៈពេល២ឆ្នាំ ។ ម្យ៉ាងទៀត ដោយសារភាពស្និទ្ធស្នាលជាមួយគ្នា នាងចាត់ទុកថា បុគ្គលិកស្រីរូបនេះ គឺជាប្អូនស្រីបង្កើតរបស់នាង ។

នាង Sae Phan បន្តទៀតថា ថ្ងៃកំណើតរបស់នាង នៅឆ្នាំ២០២៤ គឺត្រូវគ្នាជាមួយពិធីបុណ្យចូលឆ្នាំចិន ។ ហេតុនេះ បុគ្គលិកស្រីរបស់នាងក៏ទាក់ទងទៅហាងលក់ផ្កាជាមុន និងបានទិញដែកដុសឆ្នាំង ចំនួន៩៩៩ដុំ បន្ទាប់មក យកវាទៅឱ្យហាងជួយរៀបចំធ្វើជាបាច់ផ្កា ។ រីឯការចំណាយប្រាក់ទិញដែកដុសឆ្នាំងយកមកធ្វើបាច់ផ្កា និងថ្លៃរៀបចំនោះ គឺអស់ប្រមាណ១៤២ដុល្លារអាមេរិក ។

នាងនិយាយថា ៖ «ខ្ញុំសប្បាយចិត្ត និងភ្ញាក់ផ្អើលខ្លាំងណាស់ ពីព្រោះវាជាអំណោយយ៉ាងពិសេស ។ លើសពីនេះ ដែកដុសឆ្នាំងទាំងនេះអាចប្រើប្រាស់បានយូរ មិនងាយច្រេះ និងក្រៀមស្វិតដូចផ្កាទេ ។ ដូច្នេះ ខ្ញុំអាចរក្សាទុកវាបានយូរ» ។

ក្រោយពីវីដេអូបាច់ផ្កាយក្សបានចែកចាយក្នុងបណ្តាញសង្គម ស្រាប់តែធ្វើឱ្យមហាជនរិះគន់ទៅវិញ ដោយសារអ្នកលេងបណ្តាញសង្គមមួយចំនួនយល់ឃើញថា ម្ចាស់បាច់ផ្កានេះ គឺជាមនុស្សប្រុស ។ ហេតុនេះ បើមនុស្សប្រុសប្រគល់បាច់ផ្កាបែបនេះទៅឱ្យមនុស្សស្រី មានន័យថា មនុស្សប្រុសនោះចង់ប្រាប់ទៅនាងថា នាងត្រូវតែខិតខំធ្វើការងារផ្ទះឱ្យបានច្រើន ។

ប៉ុន្តែនាង Sae Phan ពន្យល់ថា នាង និងបុគ្គលិកស្រី ចូលចិត្តការសប្បាយរីករាយ និងចូលចិត្តធ្វើរឿងកំប្លែងៗច្រើប ហើយអំណោយថ្ងៃកំណើតរបស់នាងសម្រាប់ឆ្នាំ២០២៤ ក៏បានធ្វើពួកនាងអស់សំណើចខ្លាំងផងដែរ ។ ប៉ុន្តែនាងមិនគិតថា បាច់ផ្កាដែកដុសឆ្នាំងរបស់នាង បែរជាធ្វើឱ្យមហាជនយល់ខុសបែបនេះសោះ ៕

ប្រទេសឥណ្ឌា៖ លោក Mukesh Ambani ដែលជាមហាសេដ្ឋីមានទ្រពសម្បត្តិច្រើនជាងគេបំផុតនៅអាស៊ី បានចំណាយប្រាក់ ១២០ លានផោន (ប្រមាណ ១៥១.៩ លានដុល្លារអាមេរិក) ដើម្បីរៀបចំពិធីជប់លៀង Pre-Wedding រយៈពេល ៣ ថ្ងៃពីថ្ងៃទី១ ដល់ថ្ងៃទី៣ ខែមីនាឆ្នាំ ២០២៤ សម្រាប់កូនប្រុសរបស់គាត់ឈ្មោះ Anant និងគូដណ្តឹង Radhika Merchant ។ គូស្នេហ៍មួយគូនេះស្គាល់គ្នាតាំងពីនៅក្មេង ដោយអ្នកទាំងពីរបានទទួលការអប់រំនៅសហរដ្ឋអាមេរិក ។ ការប្រារព្ធពិធីមុនអាពាហ៍ពិពាហ៍របស់ពួកគេ ដែលមានរយៈពេល ៣ ថ្ងៃនេះ បានបង្ហាញប្រធានបទ ព្រឹត្តិការណ៍ និងកូដសំលៀកបំពាក់ចម្រុះ ក៏ដូចជាបង្ហាញភាពលេចធ្លោរបំផុត។

នៅក្នុងកម្មវិធីដ៏អស្ចារ្យនោះក៏មានបុគ្គលល្បីៗរបស់ពិភពលោកមួយចំនួនចូលរួមផងដែរ ដូចជា នាយកប្រតិបត្តិ Meta លោក Mark Zuckerberg កូនស្រីរបស់អតីតប្រធានាធិបតីអាមេរិក Donald Trump អ្នកស្រី Ivanka Trump និងស្ថាបនិកក្រុមហ៊ុន Microsoft លោក Bill Gates រួមជាមួយនឹងការបង្ហាញខ្លួនរបស់តារាចម្រៀង R&B Rihanna នៅក្នុងព្រឹត្តិការណ៍ដែលធ្វើឡើងនៅទីក្រុង Jamnagar ប្រទេសឥណ្ឌា។

បើយោងតាមប្រភពជិតស្និទ្ធមួយបានឱ្យដឹងថា សម្រាប់ព្រឹត្តិការណ៍ដ៏ប្រណីតដែលគ្រប់គ្រងដោយក្រុមសណ្ឋាគារលំដាប់កំពូលនៅក្នុងប្រទេសឥណ្ឌា ត្រូវបានគេជឿថា ចំណាយអស់ ២០ លានផោន។ រីឯថវិកាដែលនៅសេសសល់ត្រូវបានបម្រុងទុកសម្រាប់ផ្តល់ឱ្យបុគ្គលិកជាច្រើននាក់ និងក្រុមចុងភៅចំនួន ២១ នាក់មកពីទីក្រុង Indore របស់ប្រទេសឥណ្ឌា ដែលបានរៀបចំមុខម្ហូបចំនួន ២,៥០០ មុខយ៉ាងទូលំទូលាយដែលរួមមានម្ហូបឥណ្ឌា ម៉ិកស៊ិក ចិន និងអឺរ៉ុប។

លើសពីនេះការរៀបចំកន្លែងស្នាក់នៅដ៏ប្រណិតនៅជិត Jamnagar សម្រាប់ភ្ញៀវកិត្តិយសប្រហែល ១,០០០ នាក់ គឺជាការចំណាយមួយផ្សេងទៀត។ ដូច្នេះការចំណាយរយៈពេល ៣ ថ្ងៃនៃពិធីជប់លៀង Pre-Wedding នេះគឺចំណាយអស់ ១២០ លានផោន (ប្រមាណ ១៥១.៩ លានដុល្លារអាមេរិក) នេះបើយោងតាមប្រភព AFP។ ទន្ទឹមនឹងនេះ បើយោងតាមប្រភពដែលស្គាល់ពីគ្រួសារ Ambani បានលើកឡើងថា ការចំណាយសរុបអាចនឹងកើនឡើងបន្ថែមទៀត ដោយសារពិធីមង្គលការនាពេលខាងមុខដែលគ្រោងធ្វើនៅខែកក្កដា នៅទីក្រុងបុមបៃ។

ដើម្បីរំលឹកដល់ពិធីមង្គលការនាពេលខាងមុខគ្រួសារ Ambanis ក៏បានសាងសង់ប្រាសាទហិណ្ឌូនៅ Jamnagar ដូចដែលបានបង្ហាញនៅក្នុងការបង្ហោះដោយ Reliance Foundation ដែលជាផ្នែកនៃអាជីវកម្មគ្រួសាររបស់ពួកគេនៅលើប្រព័ន្ធផ្សព្វផ្សាយសង្គម។ គួរបញ្ជាក់ដែរថា គិតត្រឹមថ្ងៃទី៤ ខែមីនា ឆ្នាំ២០២៤ ទស្សនាវដ្ដី Forbes បានចុះបញ្ជីទ្រព្យសម្បត្តិរបស់ Mukesh Ambani ចំនួន ១១៧ ពាន់លានដុល្លារអាមេរិក ដែលធ្វើឱ្យគាត់ក្លាយជាអ្នកមានបំផុតនៅអាស៊ី និងជាមហាសេដ្ឋីទីប្រាំបួនរបស់ពិភពលោក៕