សហរដ្ឋអាមេរិក៖ ហេតុការណ៍ដែលកើតឡើងកាលពីយប់មិញជាមួយនឹង Facebook, Messengers, Instagram និង Threads បានធ្វើឱ្យម្ចាស់ក្រុមហ៊ុន Meta រងការខាតបង់យ៉ាងខ្លាំង។
កាលពីថ្ងៃទី៥ ខែកុម្ភៈ ឆ្នាំ២០២៤ យោងតាម GB News បានឱ្យដឹងថា បញ្ហាបច្ចេកទេសដែលមិននឹកស្មានដល់មួយបានកើតឡើងជាមួយកម្មវិធីផ្សេងៗជាបន្តបន្ទាប់របស់ក្រុមហ៊ុន Meta ដែលបណ្តាលឱ្យគណនីយរបស់អ្នកប្រើប្រាស់ជាច្រើនជុំវិញពិភពលោកមិនដំណើរការនិងត្រូវបានបិទដោយស្វ័យប្រវត្តិ បើទោះបីជាវាត្រូវបានជួសជុលយ៉ាងឆាប់រហ័សក្នុងរយៈពេល ១ ម៉ោងក៏ដោយ ក៏បញ្ហានេះមិនត្រឹមតែប៉ះពាល់ដល់អ្នកប្រើប្រាស់កម្មវិធីទាំងនេះប៉ុណ្ណោះទេ ប៉ុន្តែថែមទាំងបណ្តាលឱ្យម្ចាស់ក្រុមហ៊ុន Meta លោក Mark Zuckerberg ទទួលរងការខាតបង់យ៉ាងធ្ងន់ធ្ងរផងដែរ។

ជាក់ស្តែង នៅពេលដែលមានឧបទ្ទវហេតុកើតឡើងនោះ តម្លៃភាគហ៊ុនរបស់ក្រុមហ៊ុន Meta ដែលជាសាជីវកម្មនិងជាម្ចាស់កម្មវិធីខាងលើ ស្រាប់តែធ្លាក់ចុះជិត ២% ភ្លាមៗក្នុងវគ្គជួញដូរនៅថ្ងៃទី ៥ ខែមីនា ដែលធ្វើឱ្យមូលធននីយកម្មរបស់ Meta បានថយចុះប្រហែល ២០ ពាន់លានដុល្លារអាមេរិក នេះបើយោងតាមទិន្នន័យរបស់ Forbes។
ការធ្លាក់ចុះ ២% នៃតម្លៃភាគហ៊ុនក៏បណ្តាលឱ្យទ្រព្យសម្បត្តិសុទ្ធរបស់ Mark Zuckerberg ធ្លាក់ចុះប្រហែល ១.៣៧% ស្មើនឹងចំនួនប្រហែល ២.៤ ពាន់លានដុល្លារអាមេរិក។

ហេតុនេះបើយោងតាមទស្សនាវដ្ដី Forbes ទ្រព្យសម្បត្តិបច្ចុប្បន្នរបស់ Mark Zuckerberg មានចំនួនត្រឹមតែ ១៧២.៣ ពាន់លានដុល្លារអាមេរិកប៉ុណ្ណោះ ទោះជាយ៉ាងណា នាយកប្រតិបត្តិផ្នែកបច្ចេកវិទ្យានេះនៅតែកាន់កាប់តំណែងមានជាងគេទី ៤ នៅលើពិភពលោក។
គួរបញ្ជាក់ដែរថា បន្ទាប់ពីការគាំងគេហទំព័ររយៈពេលមួយម៉ោង លោក Mark Zuckerberg បានបង្ហោះសារមួយ ដើម្បីធានាដល់អ្នកប្រើប្រាស់នៅលើបណ្តាញសង្គម X ថា ” រង់ចាំបន្តិចសិន អ្វីៗនឹងត្រូវបានដោះស្រាយ” ទោះជាយ៉ាងណាបច្ចុប្បន្ន កម្មវិធីដែលគ្រប់គ្រងដោយ Meta បានដំណើរការជាធម្មតាវិញហើយ៕

ប្រទេសឥណ្ឌូណេស៊ី ៖ សារព័ត៌មានបរទេសបានរាយការណ៍ កាលពីថ្ងៃទី៤ ខែមីនា ឆ្នាំ២០២៤ ថា មន្ត្រីក្រសួងវិនិយោគទុនរបស់ឥណ្ឌូណេស៊ីលើកឡើងថា ប្រទេសឥណ្ឌូណេស៊ីនឹងចាប់ផ្តើមផលិតថ្មរថយន្តអគ្គិសនីជាលើកដំបូង នៅខែមេសា ឆ្នាំ២០២៤ នេះ ។

មន្ត្រីក្រសួងវិនិយោគទុនឥណ្ឌូណេស៊ីបញ្ជាក់ថា ថ្មរថយន្តអគ្គិសនីនេះអាចទ្រទ្រង់ថាមពលខ្ពស់បំផុតរហូតដល់៣០០វ៉ាត់ក្នុង១ម៉ោង ហើយឥណ្ឌូណេស៊ីនឹងអាចផលិតថ្មរថយន្តអគ្គិសនី រហូតដល់៣២លាន៦សែន Cell ក្នុង១ឆ្នាំ ។ ក្រុមហ៊ុន PT HLI Green Power នឹងដំណើរការផលិតថ្មរថយន្តអគ្គិសនី ជាមួយនឹងសមត្ថភាពផលិតអតិបរមា ស្មើរហូតដល់១០ជីហ្គាវ៉ាត់ ។

មន្ត្រីក្រសួងវិនិយោគទុនឥណ្ឌូណេស៊ីបន្តទៀតថា ចាប់ពីខែមេសា ឆ្នាំ២០២៤ តទៅ រោងចក្ររបស់ក្រុមហ៊ុន PT HLI Green Power នឹងចាប់ផ្តើមដំណើរការផលិតថ្មរថយន្តអគ្គិសនី ។ លើសពីនេះ ក្រុមហ៊ុននឹងនាំចេញផលិតផលជាង៩០% ទៅលក់នៅប្រទេសកូរ៉េខាងត្បូង និងឥណ្ឌា ។

យោងតាមទិន្នន័យរបស់ក្រសួងថាមពល និងធនធានរ៉ែ នៅឆ្នាំ២០២០ បញ្ជាក់ថា ឥណ្ឌូណេស៊ីស្ថិតក្នុងចំណោមប្រទេសផលិតនីកែលដ៏ធំបំផុតនៅលើពិភពលោក ហើយឥណ្ឌូណេស៊ី មានរ៉ែនីកែលបម្រុងប្រមាណ៧២លានតោន ស្មើនឹង៥២% នៃបរិមាណរ៉ែនីកែលនៅទូទាំងពិភពលោក ។

រ៉ែនីកែល គឺជាសមាសធាតុផ្សំដ៏សំខាន់របស់ការផលិតថ្មរថយន្តអគ្គិសនី ហើយថ្មរថយន្តអគ្គិសនីនឹងត្រូវកែច្នៃពីវត្ថុធាតុដើមផ្សេងៗ រួមទាំងរ៉ែនីកែល, ម៉ង់ហ្គាណែស, លីចូម និង Cobalt ៕

ពិតណាស់ ជាទូទៅកាសែតភាគច្រើនគឺមានការបោះពុម្ពជារៀងរាល់ថ្ងៃ ដោយចេញផ្សាយនូវព័ត៌មាន ឬព្រឹត្តិការណ៍កើតឡើងផ្សេងៗជាប្រចាំតាមរយៈការចែកចាយផ្ទាល់ ឬតាមបណ្តាញសង្គមនានា។ ទោះជាយ៉ាងណាបើយោងតាម AP កាលពីថ្ងៃទី១ ខែមីនា ឆ្នាំ២០២៤ បានរាយការណ៍រឿងចម្លែកមួយអំពីកាសែតរបស់ស្ថាប័នបារាំងមួយឈ្មោះថា La Bougie du Sapeur ដែលរឿងចម្លែកនោះគឺថាកាសែតនេះបោះពុម្ពចេញផ្សាយព័ត៌មានតែនៅថ្ងៃទី ២៩ ខែកុម្ភៈប៉ុណ្ណោះ ពោលគឺវានឹងបោះពុម្ពរៀងរាល់ ៤ ឆ្នាំម្តង ដែលជាការបោះពុម្ភផ្សាយតែឆ្នាំបង្គ្រប់ប៉ុណ្ណោះ។

កាសែតបារាំងដ៏ចម្លែកនេះ ភាគច្រើនចេញផ្សាយតែព័ត៌មានដែលពោរពេញទៅដោយពាក្យចចាមអារ៉ាម និងអត្ថាធិប្បាយអំពីព្រឹត្តិការណ៍ក្នុងរយៈពេល ៤ ឆ្នាំកន្លងមកនេះ។ ការបោះពុម្ពឆ្នាំ ២០២៤ នៃកាសែតនេះបានរួមបញ្ចូលអត្ថបទមួយដែលបង្ហាញថាប្រទេសបារាំងមិនត្រូវការសាលារៀនទៀតទេ ដោយសារបញ្ញាសិប្បនិម្មិត។ មួយវិញទៀតគឺថាបារាំងនឹងធ្វើការរុះរើ Eiffel Tower ក្នុងអំឡុងពេលកីឡាអូឡាំពិកទីក្រុងប៉ារីស ដើម្បីកាត់បន្ថយហានិភ័យផ្នែកសន្តិសុខ ហើយអនុញ្ញាតឱ្យ IKEA ជួយរៀបចំវាឡើងវិញ។

ការអត្ថាធិប្បាយរបស់កាសែតនេះបានធ្វើឱ្យមនុស្សភាគច្រើនហួសចិត្ត និងអស់សំណើចជាខ្លាំងអំពីការសរសេរមាតិការប្លែកៗទាំងនេះ ទោះជាយ៉ាងណាក៏ដោយ កាសែតនេះមិនមែនជាកាសែតធ្ងន់ធ្ងរទេ។ ក្រុមហ៊ុនកាសែតបារាំង La Bougie du Sapeur បានបង្កើតឡើងនៅថ្ងៃទី២៩ ខែកុម្ភៈ ឆ្នាំ១៩៨០ ដោយកើតឡើងពីក្រុមមិត្តភ័ក្តិដែលសប្បាយរីករាយជាមួយគ្នាហើយពួកគេក៏ចាប់ផ្តើមមានគំនិតចង់បង្កើតកាសែតមួយដែលនិយាយអំពីរឿងកំប្លែង ឬសរុបព្រឹត្តិការណ៍ក្នុងរយៈពេល ៤ ឆ្នាំកន្លងមកដើម្បីចុះផ្សាយរៀងរាល់ ៤ ឆ្នាំម្តងនិងចំតែថ្ងៃទី២៩ ខែកុម្ភៈប៉ុណ្ណោះ ក្នុងគោលបំណងធ្វើឱ្យប្លែកពីគេ។

និពន្ធនាយកបាននិយាយថា អត្ថបទជាច្រើនប្រហែលជាមិនពិត ហើយវាជាព័ត៌មានចាស់ៗ ប៉ុន្តែនោះជាគោលបំណងរបស់កាសែតនេះដើម្បីធ្វើឱ្យមនុស្សមានអារម្មណ៍ល្អ។ សម្រាប់ការបោះពុម្ពមុនៗ ឬកាលពីបួនឆ្នាំមុន ក្នុងអំឡុងពេលនៃការផ្ទុះឡើងនៃ COVID-19 កាសែត La Bougie du Sapeur លក់បាន ១២០,០០០ ច្បាប់ ហើយ ប្រាក់ចំណូលដែលរកបាននោះ បានបរិច្ចាគដល់អង្គការសប្បុរសធម៌សម្រាប់អ្នកដែលមានបញ្ហាក្នុងការអភិវឌ្ឍន៍ រួមទាំងជំងឺអូទីសឹមផងដែរ៕

ប្រទេសវៀតណាម ៖ ប្រទេសវៀតណាមបានបោះជំហានមួយកម្រិតទៀតក្នុងការពង្រឹងទីផ្សារនាំចេញទុរេនទៅក្រៅប្រទេស ដោយវៀតណាមបានកំណត់គោលដៅស្ថិតក្នុងចំណោមប្រទេសនាំចេញទុរេនទៅក្រៅប្រទេសក្នុងបរិមាណច្រើន ស្មើនឹងតម្លៃរាប់លានដុល្លារអាមេរិក ។ លើសពីនេះ វៀតណាមនឹងទាញយកផលប្រយោជន៍ពីគុណសម្បត្តិនាពេលបច្ចុប្បន្ន និងកែលម្អគុណភាពផ្លែឈើ ដោយរដ្ឋាភិបាលវៀតណាមបានពង្រឹងនូវសក្តានុពលក្នុងវិស័យនេះ ។

ក្រសួងកសិកម្ម និងអភិវឌ្ឍន៍ជនបទវៀតណាមលើកឡើងថា ប្រទេសវៀតណាមមានផ្ទៃដីដាំដុះដំណាំទុរេន ស្មើជាង១១ម៉ឺនហិកតាឯណោះ ដែលបានផ្តល់ទិន្នផលជិតស្មើ៨៥ម៉ឺនតោនក្នុង១ឆ្នាំ ។ ចំណែកតំបន់សំខាន់ៗសម្រាប់ដាំដំណាំទុរេន រួមមាន ៖ តំបន់ខ្ពង់រាបកណ្តាលបានគ្របដណ្តប់ផ្ទៃដី៤៧% នៃផ្ទៃដីដាំទុរេនសរុបរបស់វៀតណាម បន្ទាប់មក គឺតំបន់ដីសណ្តទន្លេមេគង្គ ស្មើនឹង៣០% ព្រមទាំងតំបន់អាគ្នេយ៍ ស្មើនឹង១៩% ។

ការពេញនិយម និងតម្លៃលក់ខ្ពស់នៅក្នុងទីផ្សារនាំចូល បានធ្វើឱ្យការនាំចេញទុរេនរបស់វៀតណាមទៅក្រៅប្រទេស មានតម្លៃខ្ពស់ជាងការនាំចេញដំណាំផ្សេងទៀត ដូចជា ៖ ម្រេច, ផ្លែស្រកានាគ និងជ័រកៅស៊ូ ជាដើម ។ ចំណែកផ្ទៃដីដាំដំណាំវិញបានពង្រីករហូតដល់ជិត២៥% ក្នុង១ឆ្នាំៗ សម្រាប់រយៈពេល៥ឆ្នាំកន្លងមកនេះ ។

នាយកក្រុមហ៊ុន Intimex Group បានបញ្ជាក់ពីប្រាក់ចំណេញបានពីការដាំទុរេនថា ក្រុមហ៊ុនរបស់លោកទទួលបានប្រាក់ចំណេញខ្ពស់ គឺរហូតដល់២ពាន់លានដុងក្នុង១ហិកតា សម្រាប់រយៈពេល១ឆ្នាំ ។ ហេតុនេះ ការដាំទុរេនទទួលបានប្រាក់ចំណេញខ្ពស់ជាងការដាំដំណាំផ្សេងៗ ដូចជា ៖ ដំណាំកាហ្វេ និងម្រេច ៕

បរទេស៖ អត្តពលិកជនជាតិវៀតណាមម្នាក់ឈ្មោះ Nguyen Trung Cuong បានចូលរួមក្នុងការប្រកួតវិញ្ញាសារត់ឆ្លងខេត្តពីខេត្ត Hai Duong ទីខេត្ត Kiep Bac ក្នុងប្រទេសវៀតណាម ប៉ុន្តែស្រាប់តែជួបឧប្បត្តិហេតុដ៏កម្រមួយដោយត្រូវឆ្កែដេញខាំនៅតាមផ្លូវ ធ្វើឱ្យគាត់ព្យាយាមរត់យ៉ាងលឿនរហូតទទួលបានជ័យជំនះលេខ ១ ក្នុងការរត់ប្រណាំងនេះ។

បើយោងតាមសារព័ត៌មានបរទេសមួយ ដែលបានចុះផ្សាយកាលពីពេលថ្មីៗនេះថា អត្តពលិកអាជីពម្នាក់ឈ្មោះ Nguyen Trung Cuong អាយុ ២៤ឆ្នាំ បានចូលរួមក្នុងការប្រកួតវិញ្ញាសារត់ឆ្លងខេត្តចម្ងាយ ១៥ គីឡូម៉ែត្រ ដែលគាត់បានបញ្ចប់ជាលើកដំបូងជាមួយនឹងកំណត់ត្រា ៤៧ នាទីនិង ៣៨ វិនាទី។ ក្នុងការប្រកួតនោះមានអ្នករត់ប្រណាំងអាជីពជាង ៨៥០ នាក់ចូលរួមប្រកួតប្រជែងក្នុងចម្ងាយ ៥ គីឡូម៉ែត្រ ១០ គីឡូម៉ែត្រ និង ១៥ គីឡូម៉ែត្រ រួមទាំងកីឡាករជម្រើសជាតិជាច្រើនផងដែរ។

ខណៈពេលដែល Trung Cuong បានបញ្ចប់ក្នុងចំណាត់ថ្នាក់លេខ ១ ក្នុងវិញ្ញាសា ១៥ គីឡូម៉ែត្រ ក្លាយជាជើងឯករត់ប្រណាំងក្នុងការប្រកួតវិញ្ញាសារត់ឆ្លងខេត្ត លោក Trung Cuong បាននិយាយថា គាត់បានជួបប្រទះបញ្ហាប្រឈមមួយក្នុងអំឡុងពេលប្រកួត ដោយត្រូវឆ្កែមួយក្បាលដេញខាំគាត់នៅតាមផ្លូវ ធ្វើឱ្យគាត់ត្រូវបង្កើនល្បឿន និងភ័យខ្លាចយ៉ាងខ្លាំងដើម្បីរត់ចេញពីចង្កូមដ៏មុតស្រួចរបស់ឆ្កែ រហូតដល់គាត់ឆ្លងកាត់ខ្សែបន្ទាត់ទីបញ្ចប់ និងទទួលបានជ័យជំនះនេះ។

អត្តពលិករូបនេះបានបន្តទៀតថា ផ្លូវឡើងភ្នំនេះស្អាតណាស់ ប៉ុន្តែខ្ញុំមានបញ្ហាបន្តិច ដោយសារត្រូវឆ្កែដេញតាម តែក៏អរគុណដែរ ដែលធ្វើឱ្យខ្ញុំបានឈានដល់ទីបញ្ចប់ជាមួយនឹងកំណត់ត្រា ៤៧ នាទីនិង ៣៨ វិនាទីសម្រាប់ចម្ងាយ ១៥ គីឡូម៉ែត្រ។ ទោះជាយ៉ាងណាក៏ដោយ បើយោងតាមការបង្ហោះវីដេអូតាមអ៊ីនធឺណិត អ្នកនិពន្ធអត្ថបទម្នាក់បានអត្ថាធិប្បាយថា អត្តពលិកនេះឈ្នះដោយការខិតខំប្រឹងប្រែងផ្ទាល់ខ្លួនរបស់គាត់ និងជំនួយរបស់ឆ្កែផងដែរ ទើបគាត់អាចយកឈ្នះនឹងការប្រកួតឆ្លងខេត្តនេះបាន។

គួរបញ្ជាក់ដែរថា កន្លងមកមានករណីមួយចំនួនដែលអត្តពលិកត្រូវឆ្កែដេញតាមពេលចូលរួមក្នុងព្រឹត្តិការណ៍រត់។ កាលពីឆ្នាំមុន អត្តពលិកកេនយ៉ាម្នាក់ឈ្មោះ Robert Kimutai Ngeno បានជួបប្រទះឧបទ្ទវហេតុស្រដៀងគ្នានេះ ខណៈពេលដែលចូលរួមក្នុងការប្រកួតនៅទីក្រុង Buenos Aires ប្រទេសអាហ្សង់ទីន។ ពេលនោះ Ngeno កំពុងនាំមុខគេ ប៉ុន្តែស្រាប់តែត្រូវឆ្កែដេញតាមផ្លូវ ដែលធ្វើឱ្យគាត់ត្រូវប្រឹងប្រែងយ៉ាងខ្លាំងដើម្បីគេចចេញពីឆ្កែ។ ទោះជាយ៉ាងណា ឧបទ្ទវហេតុនេះបានប៉ះពាល់ដល់ចិត្តគាត់ ដូច្នេះនៅទីបញ្ចប់គាត់បានត្រឹមលេខ ៣ ប៉ុណ្ណោះ៕