ទំនៀមទម្លាប់ប្រពៃណីរបស់បងប្អូនប្រជាពលរដ្ឋអ្នករស់នៅខេត្តបាត់ដំបង ខណៈជួបគ្រោះរាំងស្ងួត ក្តៅហួតហែង ក៏បាននាំគ្នាបង្ហែរឆ្មារ ដែលគេហៅថានាងម៉េវ ដើម្បីសុំឲ្យមានភ្លៀងធ្លាក់ មានទឹកធ្វើស្រែចំការ និងបានត្រជាក់ត្រជុំក្នុងភូមិស្រុកឡើងវិញ។
ថ្មីៗនេះ វីដេអូចែកចាយពីបណ្តាញសង្គមហ្វេសបុក ដោយគណនីមួយដែលមានឈ្មោះថា Savoeun Louy បានបង្ហាញឲ្យឃើញពីទំនៀមទម្លាប់ហែរឆ្មា ស្មុំទឹកភ្លៀងរបស់បងប្អូនប្រជាពលរដ្ឋមួយក្រុម ស្ថិតនៅឃុំអំពិលប្រាំដើម ស្រុកបវេល ខេត្តបាត់ដំបង កំពុងស្ថិតនៅតាមដងផ្លូវយ៉ាងគគ្រឹកគគ្រេង។
គេសង្កេតឃើញថាមានពលរដ្ឋខ្មែរជាច្រើន ទាំងក្មេងចាស់ប្រុសស្រី បានចូលរួមនៅក្នុងពិធីនោះជាមួយគ្នា អមជាមួយសត្វឆ្មា ១ក្បាលឬ២ក្បាល ដែលទំនងជាត្រូវបានស្ថិតនៅក្នុងទ្រុងលើក្បួនដង្ហែរ ដូចទៅនឹងទំនៀមទម្លាប់ពីមុនៗមក។ ជាមួយគ្នានោះ តាមរយៈវីដេអូ គេគឺបានយកគោយន្តចំនួន២គ្រឿងសម្រាប់ធ្វើជាក្បួនដង្ហែរ ហែរហមដោយអ្នកស្រុកភូមិ និងមានធុងបាស់ដាក់លើគោយន្ត។
បន្ថែមពីនេះ គេក៏ត្រូវជះទឹកស្រោចស្រពឲ្យសើមទៅលើដងផ្លូវ ឬស្រោចលើឆ្មា ឬស្រោចលើអ្នកហែរផងដែរ និងបន្តដំណើរទៅមុខទៀតជាបន្តបន្ទាប់ អមជាមួយនឹងអ្នកកូតទ្រ អ្នកទះស្គរដៃ និងមានចាក់បទនាងម៉ែវជាដើម។
បើតាមទំនៀមទម្លាប់បុរាណ បន្ទាប់ពីដង្ហែរឆ្មាជុំវិញភូមិរួចហើយ គេក៏ត្រូវដង្ហែរចូលខ្ទមអ្នកតា និងប្រទក្សិណជុំវិញខ្ទមនោះចំនួន៣ជុំសិន ហើយក៏ត្រូវយកដង្វាយមានជាមាន់ស្ងោរ ស្រាសរផ្សេងៗមកថ្វាយជូនអ្នកតា ដើម្បីសុំទឹកភ្លៀង គ្រាន់នឹងបានធ្វើស្រែធ្វើចំការ។ ទោះជាយ៉ាង ណា ភាគច្រើនកាលសម័យមុន ឲ្យតែពេលបានធ្វើពិធីនេះរួចស្រេចបាច់ហើយ រមែងមានមេឃងងឹតនិងមានភ្លៀងធ្លាក់ដូចប្រាថ្នាមែន ទើបធ្វើឲ្យទំនៀមទម្លាប់មួយនេះបានបន្តរហូតមកដល់បច្ចុប្បន្ន៕