បរទេស៖ ធ្លាប់តែឃើញសត្វបក្សីមានជើងពីរ ស្រាប់តែថ្មីៗនេះអ្នកវិទ្យាសាស្ត្របានប្រទះឃើញបក្សីចម្លែកម្យ៉ាងមានជើងប្រហែល ៦ នៅលើផ្ទៃបឹងដ៏ស្ងប់ស្ងាត់មួយក្នុងប្រទេសអាមេរិកខាងត្បូង ដែលបង្កឱ្យមានការសង្ស័យថា តើសត្វចម្លែកនេះទាក់ទងនឹងការបំពុលបរិស្ថាន ឬវិទ្យុសកម្មនុយក្លេអ៊ែរដែរឬទេ?

កាលពីថ្ងៃទី១២ ខែមីនា ឆ្នាំ២០២៤ យោងតាមសារព័ត៌មានបរទេសមួយបានឱ្យដឹងថា សត្វចម្លែកមួយក្បាល ដែលមានឈ្មោះថា African Jacana បានបង្ហាញខ្លួននៅក្នុងទីក្រុងតូចមួយ បង្កឱ្យមានការភាន់ច្រលំ និងការព្រួយបារម្ភយ៉ាងខ្លាំង។ សត្វនេះមានជើងរាប់សិប ហើយមើលទៅគួរឱ្យខ្លាចណាស់ មនុស្សបានសន្និដ្ឋានអំពីមូលហេតុនៃការលេចចេញរបស់សត្វចម្លែកមានជើងច្រើនប្រភេទនេះ ដោយអ្នកខ្លះនិយាយថា វាជាការប្រែប្រួលដោយសារការបំពុលបរិស្ថាន។

ជាមួយនឹងការអភិវឌ្ឍន៍ខ្លាំងនៃឧស្សាហូបនីយកម្ម ការបំពុលបរិស្ថានកាន់តែធ្ងន់ធ្ងរទៅៗ។ ឧស្ម័នពុលក្នុងបរិយាកាស និងលោហធាតុធ្ងន់នៅក្នុងទឹកបានជះឥទ្ធិពលយ៉ាងខ្លាំងដល់សារពាង្គកាយ។ យោងតាមការស្រាវជ្រាវរបស់អ្នកវិទ្យាសាស្ត្រ សារធាតុសរីរាង្គមួយចំនួនអាចឆ្លងកាត់ការផ្លាស់ប្តូរហ្សែនក្រោមឥទ្ធិពលនៃការបំពុលបរិស្ថាន ដែលនាំឱ្យមានការផ្លាស់ប្តូរមិនធម្មតានៃរចនាសម្ព័ន្ធរាងកាយ។

ទោះជាយ៉ាងណាក៏ដោយ African Jacana មិនមែនជាសត្វចម្លែកនោះទេ វាជាប្រភេទសត្វស្លាបមួយប្រភេទដែលមានពាសពេញទ្វីបអាស៊ី អាហ្រ្វិក អាមេរិកខាងត្បូង និងកណ្តាល ក៏ដូចជាប្រទេសអូស្ត្រាលីផងដែរ។ សត្វនេះមាន ៨ ប្រភេទ ហើយប្រភេទដែលងាយស្រួលសម្គាល់ជាងគេគឺ African Jacana ដោយសារពួកវាមានម្រាមជើងវែង និងស្តើង ដែលអាចឱ្យពួកវាដើរកាត់ស្លឹករុក្ខជាតិទឹក និងបន្លែអណ្តែតទឹកផ្សេងទៀតបានយ៉ាងងាយស្រួល។

គួរបញ្ជាក់ដែរថា បក្សីជើងច្រើន African Jacana នេះកម្រនឹងហោះហើរខ្ពស់ៗណាស់ ហើយភាគច្រើននៃពួកវាគឺចំណាយពេលក្នុងមួយជីវិតរបស់ពួកវានៅលើទឹក។ ដូច្នេះរូបភាពដែលយើងឃើញថាជាសត្វចម្លែកពហុជើងនោះ តាមពិតទៅគឺជាចលនាធម្មតានៃប្រភេទសត្វនេះក្នុងការការពារកូនរបស់វា ពោលគឺដើម្បីដាក់កូនរបស់វានៅក្រោមស្លាបទើបឃើញសត្វនេះមានជើងច្រើន តាមពិតជាជើងរបស់កូនវានោះទេ៕

ប្រទេសម៉ាឡេស៊ី ៖ អ្នកជំនាញជនជាតិម៉ាឡេស៊ីចាត់ទុកថា ប្រទេសកំពុងអភិវឌ្ឍន៍នានានៅក្នុងតំបន់អាស៊ី រួមទាំងម៉ាឡេស៊ីផងដែរ នឹងទទួលបានផលប្រយោជន៍ផ្សេងៗពីការអភិវឌ្ឍផ្នែកបច្ចេកវិទ្យាក្នុងឧស្សាហកម្មបច្ចេកវិទ្យាកម្រិតខ្ពស់របស់ប្រទេសចិន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៣ ខែមីនា ឆ្នាំ២០២៤ ។

លោក Shankaran Nambiar អ្នកស្រាវជ្រាវជាន់ខ្ពស់នៅវិទ្យាស្ថានស្រាវជ្រាវសេដ្ឋកិច្ចម៉ាឡេស៊ីលើកឡើងថា ប្រទេសចិនបានបង្កើតផលប្រយោជន៍ជាច្រើនក្នុងផ្នែកឧស្សាហកម្មថ្មីៗ ជាពិសេស ផ្នែកបញ្ញាសិប្បនិម្មិត (AI), រថយន្តអគ្គិសនី, Fintech, រថភ្លើងល្បឿនលឿន និងបច្ចេកវិទ្យាជាន់ខ្ពស់ផ្សេងទៀត ។ ហេតុនេះ វាបានបង្កើតតម្រូវការផលិតផលវត្ថុធាតុដើម ឬផលិតផលគ្រប់មុខ ដែលផលិតនៅប្រទេសម៉ាឡេស៊ី ។

លោក Shankaran Nambiar បន្តទៀតថា ប្រទេសចិនមានឋានៈជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី តាំងពីឆ្នាំ២០០៩ មកម៉្លេះ ហើយចិននឹងក្លាយជាប្រទេសជំរុញសេដ្ឋកិច្ចដ៏សំខាន់នៅក្នុងតំបន់ផងដែរ ។

គួរបញ្ជាក់ថា ក្នុងអំឡុងពេលកិច្ចប្រជុំកំពូលពិសេសរវាងអាស៊ាន និងអូស្ត្រាលី នៅទីក្រុង Melbourne ប្រទេសអូស្ត្រាលី នាពេលកន្លងមក នាយករដ្ឋមន្ត្រីម៉ាឡេស៊ី លោក Anwar Ibrahim បានលើកឡើងថា សហរដ្ឋអាមេរិក និងប្រទេសសម្ព័ន្ធមិត្តមួយចំនួន មិនគួររារាំងម៉ាឡេស៊ី ក្នុងការធ្វើសម្ព័ន្ធមិត្តជាមួយចិនទេ ។

ប្រទេសចិនបានរក្សាតំណែងជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី អស់រយៈពេល១៥ឆ្នាំមកហើយ ហើយចិនក៏ជាប្រភពវិនិយោគដ៏សំខាន់របស់ម៉ាឡេស៊ី អស់រយៈពេលជាច្រើនឆ្នាំផងដែរ ។ បើតាមរបាយការណ៍របស់ Kenanga Research បង្ហាញថា តម្រូវការពីទីផ្សារចិននឹងក្លាយជាកម្លាំងដ៏សំខាន់ ដើម្បីជំរុញការរីកចម្រើនផ្នែកនាំចេញរបស់ម៉ាឡេស៊ី នៅឆ្នាំ២០២៤ នេះ ៕

ប្រទេសអង់គ្លេស ៖ កាលពីថ្ងៃទី១៣ ខែមីនា ឆ្នាំ២០២៤ គេហទំព័រ ETtoday បានចុះផ្សាយថា កាលពីពេលថ្មីៗនេះ មាននារីម្នាក់ឈ្មោះ Ravenna Hannili អាយុ២៣ឆ្នាំ មកពីប្រទេសប្រេស៊ីល បានជួបហេតុការណ៍នឹកស្មានមិនដល់មួយ ខណៈនាងបម្រុងធ្វើដំណើរតាមយន្តហោះចាកចេញពីទីក្រុងឡុងដ៍ ប្រទេសអង់គ្លេស ទៅកាន់ប្រទេសប្រេស៊ីល ។ វាបណ្តាលមកពីបុគ្គលិកបម្រើការលើយន្តហោះ (អូតែស) មិនព្រមឱ្យនាងស្លៀកពាក់បែបនេះឡើងយន្តហោះ រហូតដល់ក្លាយជាប្រធានបទធ្វើឱ្យអ្នកលេងបណ្តាញសង្គមជជែកវែកញែកគ្នាយ៉ាងខ្លាំង ។

កាលពីថ្ងៃទី១០ ខែមីនា ឆ្នាំ២០២៤ នាង Ravenna បានបង្ហោះរូបភាពរបស់ខ្លួនក្នុង Instagram និងបង្ហាញឱ្យឃើញពីសម្លៀកបំពាក់ដែលនាងស្លៀកឡើងយន្តហោះនៅថ្ងៃនោះ គឺជាឈុតដ៏សិចស៊ី និងស្រដៀងគ្នាជាមួយឈុតហាត់ប្រាណរបស់ស្ត្រី ។ នាងបានពាក់អាវទ្រនាប់ និងស្លៀកខោខ្លីរឹបជើង ហើយបង្ហាញឱ្យឃើញខ្លួនប្រាណនាងយ៉ាងច្បាស់ ។ នាងបានថតរូបទាំងនេះនៅមុខកញ្ចក់បន្ទប់ទឹកក្នុងអាកាសយានដ្ឋានក្នុងទីក្រុងឡុងដ៍ មុនពេលឡើងលើយន្តហោះ ។

ក្រោយមក ក្នុងអំឡុងពេលនាង Ravenna បម្រុងឡើងលើយន្តហោះ ស្រាប់តែនារីជាបុគ្គលិកបម្រើការលើយន្តហោះម្នាក់ប្រាប់ឱ្យនាងឈប់ ព្រមទាំងប្រាប់ឱ្យនាងទៅផ្លាស់ប្តូរសម្លៀកបំពាក់សិន ទើបបុគ្គលិករូបនេះអនុញ្ញាតឱ្យនាងឡើងយន្តហោះ ដោយសារនាងស្លៀកពាក់ពុំសមរម្យ ។ ពេលនោះ នាង Ravenna មានអារម្មណ៍ភ្ញាក់ផ្អើលយ៉ាងខ្លាំង ហើយនាងក៏ឆ្លើយតបថា គេបានបញ្ជូនវ៉ាលិសសម្លៀកបំពាក់របស់នាងដាក់នៅបាតយន្តហោះអស់ហើយ ហើយនាងមានតែកាបូបតូច១ប៉ុណ្ណោះនៅជាប់ខ្លួន អីចឹង តើឱ្យនាងទៅយកសម្លៀកបំពាក់ពីណាមកផ្លាស់ប្តូរ?

បន្ទាប់មក នាង Ravenna បានសួរទៅកាន់បុគ្គលិកបម្រើការលើយន្តហោះថា ៖ «តើមានអ្វីត្រូវណែនាំខ្ញុំទេ នៅពេលនេះ? តើឱ្យខ្ញុំទៅយកខោអាវពីណាមកស្លៀក?» នៅពេលបុគ្គលិកបម្រើការលើយន្តហោះគ្មានការឆ្លើយតប នាង Ravenna ក៏បានសួរទៀតថា ៖ «តើច្បាប់ចំណុចណារបស់ក្រុមហ៊ុនអាកាសចរណ៍ ដែលចែងថា ខ្ញុំមិនទទួលបានការអនុញ្ញាតឱ្យស្លៀតឈុតហាត់ប្រាណឡើងយន្តហោះ?» ។ នៅទីបំផុត គេក៏អនុញ្ញាតឱ្យនាង Ravenna ជិះយន្តហោះ ដោយពុំចាំបាច់ផ្លាស់ប្តូរសម្លៀកបំពាក់ ហើយនាងក៏បានធ្វើដំណើរទៅដល់ប្រទេសប្រេស៊ីល ។

ទោះយ៉ាងណា ក្រោយពីរឿងរ៉ាវនេះបានចែកចាយនៅក្នុងបណ្តាញសង្គម ធ្វើឱ្យអ្នកលេងបណ្តាញសង្គមប្រកែកគ្នាពីភាពសមរម្យនៃសម្លៀកបំពាក់ដែលនាងស្លៀក ។ មនុស្សមួយចំនួននិយាយថា នាងស្លៀកពាក់បើកចំហរាងកាយខ្លាំងពេក ទើបអូតែសត្រូវធ្វើតាមតួនាទី ខណៈមនុស្សខ្លះទៀតនិយាយថា នាងមិនខុសអ្វីទេ ដោយសារក្រុមហ៊ុនអាកាសចរណ៍គ្មានច្បាប់ច្បាស់លាស់ពាក់ព័ន្ធនឹងការស្លៀកពាក់ ។ ម្យ៉ាងទៀត សម្លៀកបំពាក់របស់នាង ក៏បានឆ្លងកាត់កន្លែងត្រួតពិនិត្យរួចហើយដែរ ហេតុអ្វីបានជាអូតែសបដិសេធមិនឱ្យនាងឡើងយន្តហោះ ៕