អ្នកវិទ្យាសាស្ត្រលើកឡើងថា ការដាំដើមឈើខុសកន្លែងមានចំណែកធ្វើឱ្យពិភពលោកកាន់តែក្តៅខ្លាំងលើសមុន ហើយអ្នកវិទ្យាសាស្ត្របានបង្ហាញពីទីកន្លែងល្អបំផុតសម្រាប់ដាំដើមឈើ ដើម្បីធ្វើឱ្យពិភពលោកមានអាកាសធាតុត្រជាក់ ។

សារព័ត៌មាន AFP បានរាយការណ៍ពីទីក្រុងប៉ារីស ប្រទេសបារាំង កាលពីថ្ងៃទី២៨ ខែមីនា ឆ្នាំ២០២៤ ថា ដើមឈើទាំងឡាយបានស្រូបយកកាបូនឌីអុកស៊ីត និងជួយស្តារតំបន់ព្រៃឈើខូចខាត ហើយគេអាចដាំកូនឈើដើម្បីបង្កើនផ្ទៃដីព្រៃ ព្រមទាំងជួយប្រឆាំងនឹងការបម្រែបម្រួលអាកាសធាតុផងដែរ ។ ប៉ុន្តែការស្រាវជ្រាវមួយក្នុងទស្សនាវដ្តីឈ្មោះ «Nature Communications» បញ្ជាក់ថា ករណីខ្លះ ចំនួនដើមឈើច្រើនពេកបានធ្វើឱ្យពន្លឺព្រះអាទិត្យចាំងមកលើផ្ទៃផែនដីកាន់តែតិច និងធ្វើឱ្យផែនដីស្រូបយកកំដៅលើសមុនទៅទៀត ។

អ្នកស្រី Susan Cook-Patton អ្នកវិទ្យាសាស្ត្រជាន់ខ្ពស់ផ្នែកស្តារព្រៃឈើ ហើយលោកស្រីបានចូលរួមសរសេរការស្រាវជ្រាវមកពីអង្គការ The Nature Conservancy និយាយថា ៖ «ការដាំដើមឈើនៅតំបន់មួយចំនួន នឹងផ្តល់ផលអវិជ្ជមានសម្រាប់បរិយាកាស» ។

ការពិត បណ្តាអ្នកវិទ្យាសាស្ត្របានជ្រាបហើយថា ការស្តារតំបន់ផ្ទៃដីព្រៃឈើបណ្តាលឱ្យមានការផ្លាស់ប្តូរនៅក្នុង Albedo (ឬបរិមាណវិទ្យុសកម្មព្រះអាទិត្យ ដែលចាំងពីផ្ទៃផែនដី) ប៉ុន្តែពួកគេគ្មានឧបករណ៍ដើម្បីបកស្រាយរឿងនេះទេ ។ រីឯក្រុមអ្នកស្រាវជ្រាវដែលប្រើប្រាស់ផែនទីថ្មីអាចគិតពីការកាត់បន្ថយកំដៅពីដើមឈើ និងកំដៅកើតពី Albedo ជាលើកដំបូង ដោយក្រុមអ្នកស្រាវជ្រាវមើលឃើញថា គម្រោងដាំព្រៃឈើជាច្រើនមិនបានរួមបញ្ចូល Albedo គឺការដាំដើមឈើបានផ្តល់អត្ថប្រយោជន៍ដល់អាកាសធាតុប្រមាណពី២០% ទៅ៨០% ។

អ្នកស្រី Susan Cook-Patton អ្នកវិទ្យាសាស្ត្រជាន់ខ្ពស់ផ្នែកស្តារព្រៃឈើបន្តថា ៖ «នៅមានទីកន្លែងជាច្រើនទៀតសម្រាប់ការស្តារតំបន់ព្រៃឈើឡើងវិញ ហើយវាជាគំនិតល្អសម្រាប់ការទប់ស្កាត់បម្រែបម្រួលអាកាសធាតុ ។ ពួកយើងគ្រាន់តែព្យាយាមជួយឱ្យអ្នកទាំងអស់គ្នារកឃើញតំបន់ទាំងនេះ» ។

ការស្រាវជ្រាវខាងលើបង្ហាញថា ប្រទេសជាច្រើនបានតាំងចិត្តដាំដើមឈើរាប់លានដើម ដើម្បីប្រឆាំងនឹងអាកាសធាតុក្តៅខ្លាំង ប៉ុន្តែមិនមែនគ្រប់ការព្យាយាមទាំងអស់នឹងផ្តល់ប្រយោជន៍ដល់ពិភពលោកដូចគ្នាទេ ។ ឧទាហរណ៍ នៅតំបន់ក្តៅហើយសើម ដូចជា ៖ ព្រៃអាម៉ាហ្សូនមានកន្លែងផ្ទុកកាបូនខ្ពស់ និងមានបម្រែបម្រួល Albedo កម្រិតទាប គឺវាជាកន្លែងសម្រាប់ការស្តារតំបន់ព្រៃឈើឡើងវិញ ដែលផ្ទុយនឹងតំបន់វាលស្មៅមានអាកាសធាតុក្តៅ ៕

ប្រទេសវៀតណាម ៖ កាលពីថ្ងៃទី២៩ ខែមីនា ឆ្នាំ២០២៤ សារព័ត៌មាន China Xinhua រាយការណ៍ថា ការិយាល័យគយវៀតណាមប្រកាសថា ប្រាក់ចំណូលបានពីការនាំចេញបន្លែ និងផ្លែឈើរបស់ប្រទេសវៀតណាម នៅត្រីមាសដំបូងនៃឆ្នាំ២០២៤ (គឺចាប់ពីខែមករា រហូតដល់ខែមីនា) ស្មើនឹង១.២៥០លានដុល្លារអាមេរិក ។ នេះជាលើកដំបូងហើយ ដែលប្រាក់ចំណូលការនាំចេញបន្លែ និងផ្លែឈើវៀតណាម កើនឡើងលើស១ពាន់លានដុល្លារអាមេរិកក្នុងត្រីមាសដំបូង ។

បើតាមរបាយការណ៍បញ្ជាក់ថា តួលេខនេះបានឆ្លុះបញ្ចាំងឱ្យឃើញពីការរីកចម្រើនយ៉ាងខ្លាំងក្នុងវិស័យពាណិជ្ជកម្មនាំចេញបន្លែ និងផ្លែឈើរបស់វៀតណាម នាថ្ងៃអនាគត ។ រីឯប្រាក់ចំណូលបានពីការនាំចេញបន្លែ និងផ្លែឈើ ជាពិសេស នៅខែមីនា ឆ្នាំ២០២៤ (ត្រឹមតែ១ខែប៉ុណ្ណោះ) បានកើនឡើងរហូតដល់៤៣៣លានដុល្លារអាមេរិក គឺកើនឡើងជិត៤% បើធៀបពីមួយឆ្នាំទៅមួយឆ្នាំ ។ ចំណែកប្រទេសចិន, កូរ៉េខាងត្បូង, សហរដ្ឋអាមេរិក, ថៃ និងជប៉ុន គឺជាទីផ្សារចម្បងសម្រាប់ការនាំចេញបន្លែ និងផ្លែឈើវៀតណាម ។

មន្ត្រីសមាគមបន្លែ និងផ្លែឈើវៀតណាមលើកឡើងថា ការនាំចេញបន្លែ និងផ្លែឈើកើនឡើងនៅត្រីមាសដំបូងនៃឆ្នាំ២០២៤នេះ គឺបណ្តាលមកពីការនាំចេញផ្លែទុរេនវៀតណាមខុសរដូវកាលកើនឡើង ។ រីឯការបរិភោគផ្លែទុរេនវៀតណាមកើនឡើងនៅប្រទេសថៃ បានធ្វើឱ្យថៃក្លាយជាប្រទេសនាំចូលបន្លែ និងផ្លែឈើវៀតណាម ស្ថិតក្នុងចំណាត់ថ្នាក់ទី៤ ។

ចំណែកក្រសួងឧស្សាហកម្ម និងពាណិជ្ជកម្មវៀតណាមបានព្យាករថា ការនាំចេញបន្លែ និងផ្លែឈើរបស់ប្រទេសវៀតណាម ក្នុងឆ្នាំ២០២៤ទាំងមូល នឹងកើនឡើងរហូតដល់៦.៥០០លានដុល្លារអាមេរិក ។ កាលពីឆ្នាំ២០២៣ ប្រទេសវៀតណាមបានបំបែកកំណត់ត្រាការនាំចេញបន្លែ និងផ្លែឈើក្នុងបរិមាណច្រើនបំផុត ក្នុងនោះប្រាក់ចំណូលបានពីការនាំចេញបន្លែ និងផ្លែឈើនៅឆ្នាំ២០២៣ គឺស្មើជិត៥.៦០០លានដុល្លារអាមេរិក ៕

ថ្មីៗនេះ យោងតាមការចេញផ្សាយរបស់គេហទំព័រអន្តរជាតិ Seasia គឺបានបង្ហាញឲ្យឃើញថា សម្រាប់ឆ្នាំ២០២៤ នេះ កម្ពុជាគឺឈរលើលេខរៀងទី១១៩លើពិភពលោក និងជាប់លេខ៩លើ១១ប្រទេសនៃតំបន់អាស៊ីអាគ្នេយ៍ ដែលប្រជាពលរដ្ឋទទួលបានកម្រិតសុភមង្គលទាប។

ជាមួយគ្នានោះ សិង្ហបុរីបានជាប់ចំណាត់ថ្នាក់លេខ១ នៅអាស៊ីអាគ្នេយ៍ ដែលប្រជាពលរដ្ឋមានសុភមង្គលបំផុតក្នុងតំបន់។ តាមពីក្រោយដោយហ្វីលីពីន បន្ទាប់មកគឺ វៀតណាម ថៃ ម៉ាឡេស៊ី ឥណ្ឌូណេស៊ី ឡាវ មីយ៉ាន់ម៉ា និងកម្ពុជា។ ទោះជាយ៉ាងណា ព្រុយណេនិងទីម័រឡេសតេ គឺមិនត្រូវបានគេចាត់ថ្នាក់នោះទេ។

យោងតាមការស្រាវជ្រាវ ប្រទេសដែលមានសុភមង្គល គឺត្រូវផ្តោតលើកត្តាមួយចំនួនដូចជា៖ ផលិតផលក្នុងស្រុកសរុបសម្រាប់មនុស្សម្នាក់ GDP per Capita , ការទទួលបានការគាំពារពីសង្គម, ការរស់នៅប្រកបដោយស្តង់ដា រួមទាំងអាយុសង្ឃឹមរស់របស់ប្រជាពលរដ្ឋ(មិនសូវមានជំងឺច្រើន) និងអត្រាមានការងារធ្វើខ្ពស់, សេរីភាពនៃការជ្រើសរើសរបស់បុគ្គលម្នាក់ៗ, ភាពសប្បុរស (ប្រជាជនទូទៅដែលមានចិត្តសណ្តោសប្រណីខ្ពស់)និងកម្រិតអំពើពុករលួយនៅទូទាំងផ្ទៃប្រទេស។

ជាមួយគ្នានេះ យោងតាមស្ថិតិមួយទៀតក៏បានចេញផ្សាយថា កម្ពុជាមានភាគរយដែលប្រជាជនកំពុងជួបនឹងវិបត្តិផ្លូវចិត្តខ្ពស់ជាងប្រទេសអាស៊ានផ្សេងទៀត រហូតដល់ ១២% ប្រមាណជាង ២លាននាក់។ ប្រជាពលរដ្ឋខ្មែរបាននឹងកំពុងមានវិបត្តិផ្លូវចិត្តកាន់តែធ្ងន់ធ្ងរទៅ បណ្តាលឲ្យមានការសម្លាប់ខ្លួន ក្រោមរូបភាពផ្សេងៗស្ទើរតែជារៀងរាល់ថ្ងៃ ដែលបណ្តាលមកពីកត្តាមួយចំនួនដូចជាកត្តាសង្គម បំណុល ការរំលោភសិទ្ធមនុស្សជាដើម ដែលនេះបើយោងតាមការសិក្សាស្រាវជ្រាវ៕

បរទេស៖ ប្រាសាទមជ្ឈិមសម័យមួយត្រូវបានគេរកឃើញនៅក្រោមវីឡាឯកជនក្នុងទីក្រុង Vannes ភាគពាយព្យនៃប្រទេសបារាំង ដែលបានសាងសង់ក្នុងសតវត្សទី ១៨ ប៉ុន្តែបច្ចុប្បន្នវិឡានេះត្រូវបានគេកសាង និងជួសជុលធ្វើជាសារមន្ទីរសិល្បៈវិញ។

យោងតាម Heritage Daily ដែលបានចុះផ្សាយនៅថ្ងៃទី២៩ ខែមីនា ឆ្នាំ២០២៤ ថាវីឡាចំណាស់មួយត្រូវបានកម្មកររាប់ស៊ិបនាក់ជួសជុលឡើងវិញដើម្បីសាងសង់ទៅជាសារមន្ទីរសិល្បៈ ស្រាប់តែអំឡុងពេលជីកដី ពួកគេក៏ប្រទះឃើញប្រាសាទដ៏អស្ចារ្យមួយស្ថិតនៅក្រោមដី ក្នុងទីក្រុង Vannes ភាគពាយព្យនៃប្រទេសបារាំង។

នៅយុគសម័យកណ្តាល ទីក្រុង Vannes គឺជាទឹកដីដែលមានប្រវត្តិដ៏សម្បូរបែប អ្នកវិទ្យាសាស្ត្រមកពីវិទ្យាស្ថានជាតិសម្រាប់ការស្រាវជ្រាវបុរាណវត្ថុវិទ្យា (Inrap) បានពិនិត្យយ៉ាងយកចិត្តទុកដាក់លើដីនៅពេលដែលវីឡាចំណាស់នេះ កំពុងត្រូវបានជួសជុលឡើងវិញ ដើម្បីត្រៀមសាងសង់សារមន្ទីរសិល្បៈ។ ក្នុងដំណាក់កាលដំបូងនៃការជីកកកាយ អ្នកស្រាវជ្រាវបានធ្វើការសិក្សាលើទីធ្លារបស់ផ្ទះវីឡា ដែលពួកគេបានរកឃើញជញ្ជាំងការពារប្រាសាទពីរកម្រិត និងគូទឹកដែលមានទីតាំងនៅជម្រៅ ៤ ម៉ែត្រពីលើកម្រិតផ្លូវ។

ប្រាសាទដែលមានអាយុកាលជាង ៦០០ ឆ្នាំនេះត្រូវបានសាងសង់ឡើងនៅចុងសតវត្សទី ១៤ ដោយលោក Jean IV ពីឆ្នាំ១៣៤៥ ដល់ឆ្នាំ១៣៧២ ក្នុងគោលបំណងបង្ហាញពីអំណាចរបស់មនុស្សជំនាន់មុន។ យោងតាមអ្នកជំនាញ ចម្លាក់ថ្មដែលនៅសេសសល់បង្ហាញថាប្រាសាទនេះមានពី ៣ ទៅ ៤ ជាន់ និងជណ្តើរជាច្រើន ដែលជាផ្នែកមួយដែលត្រូវបានអភិរក្សគួរឱ្យកត់សម្គាល់។ ក្រុមការងារក៏បានរកឃើញដាននៅលើថ្មមួយចំនួនដែលត្រូវបានកែច្នៃដើម្បីបិទបាំងជញ្ជាំងតុបតែង និងរចនាសម្ព័ន្ធជំនួយផ្សេងទៀតដូចជាបង្គន់ និងបំពង់បង្ហូរទឹកជាដើម។

បន្ទាប់មកអ្នកជំនាញក៏បានរកឃើញ វត្ថុបុរាណជាច្រើនដែលតំណាងឱ្យជីវិតរបស់ម្ចាស់ផ្ទះក្នុងសតវត្សទី ១៥ និងទី ១៦ រួមមានកាក់ កាំបិត ក្បឿង ចានឈើ ប្រដាប់ផ្ទះបាយ និងគ្រឿងអលង្ការមានតម្លៃមួយចំនួន។ ដោយសារស្ថានភាពដីនៅសល់ក្រុមការងារក៏ប្រទះឃើញវត្ថុសំខាន់ៗដូចជាសម្លៀកបំពាក់ ខ្សែស្បែកជើង ម្ជុល ចិញ្ចៀន និងសោទៀតផង។ ការជីកកកាយក៏បានរកឃើញរោងម៉ាស៊ីនកិនស្រូវដែលតភ្ជាប់ទៅតំបន់លំនៅដ្ឋានរបស់ប្រាសាទ និងមានអណ្តូងដ៏ធំមួយដែលចិញ្ចឹមដោយប្រឡាយ ក៏ដូចជាសំណល់នៃស្ពានតភ្ជាប់ប្រាសាទទៅកាន់ប្រាសាទដែលនៅសល់នៅខាងក្រោយទីក្រុងចាស់៕

ប្រទេសថៃ ៖ ក្រោយពីមហាជន រិះគ.ន់ ថា ម្ចាស់ហាងសាច់ជ្រូកឡើងភ្នំមួយកន្លែងវាយបុគ្គលិកមកធ្វើការយឺតយ៉ាវខ្លាំងៗ អ្នកគ្រប់គ្រងហាងបានចេញមុខបកស្រាយជំនួសម្ចាស់ហាងថា ការវាយបុគ្គលិកនេះ គឺជាការ ដា.ក់ទោ.ស ជំនួសឱ្យការកាត់ប្រាក់ខែ ហើយបុគ្គលិកបានយល់ព្រមដោយខ្លួនឯងឱ្យម្ចាស់ហាងវាយពួកគេ ។

នៅចុងខែមីនា ឆ្នាំ២០២៤ អតិថិជនរបស់ហាងសាច់ជ្រូកឡើងភ្នំ បានបង្ហោះវីដេអូមួយចូលក្នុងបណ្តាញសង្គម ហើយធ្វើឱ្យមហាជនរិះគន់យ៉ាងខ្លាំងក្រោយពីឃើញម្ចាស់ហាងសាច់ជ្រូកឡើងភ្នំ បាន ដា.ក់ទោ.ស បុគ្គលិកដោយការវាយខ្លាំងៗជាច្រើនលើក ។ វីដេអូនេះសរសេរថា «ពួកគេជាមនុស្ស» ត្រូវបានមហាជនចែកចាយយ៉ាងឆាប់រហ័សក្នុងបណ្តាញសង្គម ព្រមទាំងបង្ហាញពីទំព័រហ្វេសប៊ុករបស់ម្ចាស់ហាងទៀតផង ។

ក្រោយមក ក្រុមការងារសារព័ត៌មានថៃបានធ្វើដំណើរទៅកាន់ហាងសាច់ជ្រូកឡើងភ្នំនេះ ដែលស្ថិតនៅទីក្រុងប៉ាតាយ៉ា ខេត្តឈុនបុរី ប្រទេសថៃ ហើយក្រុមសារព័ត៌មាន ក៏បានចូលទៅហាងនេះដើម្បីសាកសួររកមូលហេតុពិតប្រាកដពាក់ព័ន្ធនឹងវីដេអូ ដែលត្រូវគេបង្ហោះពេញបណ្តាញសង្គម ។

បើតាមការសាកសួរឱ្យដឹងថា វាជាវីដេអូដែលថតកាលពីព្រឹកថ្ងៃទី២៩ ខែមីនា ឆ្នាំ២០២៤ ដោយម្ចាស់ហាងបានដាក់ទោសបុគ្គលិកដែលមកធ្វើការយឺតយ៉ាវជាច្រើននាទី និងយឺតយ៉ាវអស់ជាច្រើនថ្ងៃជាប់ៗគ្នា ។ រីឯបុគ្គលិកដែលម្ចាស់ហាងដាក់ទោសនេះមានចំនួន៥នាក់ ហើយពេលអតិថិជនឃើញម្ចាស់ហាងវាយបុគ្គលិក ក៏បានថតវីដេអូយកទៅបង្ហោះក្នុងបណ្តាញសង្គម ។

អ្នកគ្រប់គ្រងហាងនេះបកស្រាយថា ហាងមានច្បាប់ដាក់ទោសដោយឱ្យបុគ្គលិកជ្រើសរើសដោយខ្លួនឯងថា តើពួកគេយល់ព្រមឱ្យហាងកាត់ប្រាក់ខែ ឬឱ្យហាងវាយជំនួសវិញ ករណីបុគ្គលិកមកធ្វើការយឺតយ៉ាវជាច្រើនលើក ។ ដូច្នេះ ការដាក់ទោសនេះក៏ជាការយល់ព្រមពីបុគ្គលិកផងដែរ ព្រោះពួកគេបានចុះហត្ថលេខាយល់ព្រមអនុវត្តតាមច្បាប់នេះអស់ហើយ ។

ម្យ៉ាងទៀត មិនមែនខាងហាងនឹងដាក់ទោសបុគ្គលិកមកធ្វើការយឺតយ៉ាវគ្រប់រូបទេ សូម្បីតែម្ចាស់ហាងក៏ត្រូវដាក់ទោសដោយការវាយបែបនេះដូចគ្នាដែរ បើម្ចាស់ហាងមកធ្វើការយឺត ។ បើមិនដូច្នោះទេ បុគ្គលិកត្រូវយល់ព្រមឱ្យម្ចាស់ហាងកាត់ប្រាក់ខែ ដើម្បីឱ្យមានភាពស្មើគ្នាសម្រាប់បុគ្គលិកគ្រប់រូបដែលមកធ្វើការគោរពតាមពេលវេលា ។

អ្នកស្រី Vayuwadee Bunsan អាយុ៣៣ឆ្នាំ ជាអ្នកគ្រប់គ្រងហាងនេះ បាននិយាយជំនួសម្ចាស់ហាងដែលជាអ្នកវាយបុគ្គលិក ថា ហាងមានច្បាប់ថា នឹងកាត់ប្រាក់ខែបុគ្គលិកមកធ្វើការយឺត ចំនួន៥បាតក្នុង១នាទី ហើយបុគ្គលិកភាគច្រើនមកធ្វើការមិនទាន់ពេលវេលាទេ ។ បើហាងកាត់ប្រាក់ខែបុគ្គលិកមកធ្វើការយឺតឃើញថា ពួកគេនឹងមិនសល់ប្រាក់ខែ ទើបហាងប្តូរពីការកាត់ប្រាក់ខែ មកឱ្យបុគ្គលិកសម្រាកពីការងារចំនួន២សប្តាហ៍វិញ ។

រីឯបុគ្គលិកមិនចង់ឱ្យហាងបញ្ឈប់ការងារពួកគេ២សប្តាហ៍ទេ ដោយសារគ្មានប្រាក់ចាយវាយ ព្រោះពួកគេបានលុយធីប ។ ទោះយ៉ាងណា បុគ្គលិកនៅតែមកធ្វើការយឺតដដែល ហើយហាងក៏ធ្លាប់បណ្តេញពួកគេចេញពីការងារដែរ ប៉ុន្តែនៅតែសុំមកធ្វើការបន្តទៀត ។ ពេលបានមកធ្វើការវិញ ពួកគេមកធ្វើការយឺតយ៉ាវដដែល ទើបហាងសួរបុគ្គលិកថា តើឱ្យហាងដាក់ទោសរបៀបណា? បុគ្គលិកមិនព្រមឱ្យកាត់ប្រាក់ខែ និងមិនព្រមឈប់ពីការងារ២សប្តាហ៍ ពួកគេសុខចិត្តឱ្យហាងដាក់ទោសដោយការវាយវិញ ។

ហេតុនេះ ខាងហាងនិយាយថា បើដាក់ទោសដោយការវាយ តើបុគ្គលិកមិនខឹង មែនទេ? រីឯបុគ្គលិកឆ្លើយថា មិនខឹងទេ ។ បន្ទាប់មក បុគ្គលិកគ្រប់គ្នាក៏ចុះហត្ថលេខាលើលិខិតមួយយល់ព្រមថា បើមកធ្វើការយឺត១០នាទី នឹងឱ្យហាងវាយ១លើក ។ ដូច្នេះ ទើបគេឃើញបុគ្គលិកម្នាក់ត្រូវបានម្ចាស់ហាងវាយជាច្រើនលើក ដោយសារមកធ្វើការយឺតច្រើនថ្ងៃ ហើយសង្សាររបស់បុគ្គលិករូបនេះ ក៏ត្រូវម្ចាស់ហាងវាយដែរ ព្រោះមកយឺតដូចគ្នា ។

លោក Phacharaphon Sidaprom អាយុ១៨ឆ្នាំ ជាបុគ្គលិកម្នាក់ដែលត្រូវម្ចាស់ហាងវាយក្នុងវីដេអូ និយាយថា ម្ចាស់ហាងវាយបែបនេះដោយសារខ្លួនមកធ្វើការយឺត គឺម្ចាស់ហាងវាយពី៧លើក ទៅ៨លើក ប៉ុន្តែមិនឈឺចាប់ទេ ។ លោកមិនខឹងម្ចាស់ហាងទេ ព្រោះយើងបានព្រមព្រៀងគ្នាហើយដើម្បីកុំឱ្យហាងកាត់ប្រាក់ខែ ប៉ុន្តែលោកចង់ឱ្យមហាជនយល់ថា ម្ចាស់ហាងធ្វើតាមច្បាប់ប៉ុណ្ណោះ ។

ចំណែកអ្នកស្រី Natthawadee Komonwanit អាយុ២២ឆ្នាំ ជាបុគ្គលិកម្នាក់ទៀតនិយាយថា ម្ចាស់ហាងជាមនុស្សល្អ ប៉ុន្តែបុគ្គលិកចាប់ផ្តើមមកធ្វើការយឺតជាញឹកញាប់ ទើបម្ចាស់ហាងហៅមកដាស់តឿន និងឱ្យជ្រើសរើសយកការកាត់ប្រាក់ខែ ឬឱ្យហាងវាយ ហើយបុគ្គលិកក៏ជ្រើសយកការវាយ ។ ម្ចាស់ហាងជាមនុស្សចិត្តល្អ និងស្រឡាញ់បុគ្គលិកដូចក្រុមគ្រួសាររបស់ខ្លួន ហើយសូមមហាជនកុំបង្ហោះវីដេអូរិះគន់ម្ចាស់ហាងអី ពីព្រោះបុគ្គលិកយល់ព្រមខ្លួនឯង ។

គួរបញ្ជាក់ថា ហាងសាច់ជ្រូកឡើងភ្នំនេះ មានបុគ្គលិកសរុបចំនួន៣០នាក់ ហើយបុគ្គលិកបានយល់ព្រមឱ្យហាងដាក់ទោសបុគ្គលិកមកធ្វើការយឺតគ្រប់រូប ។ រីឯការដាក់ទោសនៅថ្ងៃណានោះ គឺអាស្រ័យលើម្ចាស់ហាង ហើយពេលខ្លះ ហាងក៏មិនបានដាក់ទោសដែរ ដោយបុគ្គលិកធ្វើការនៅទីនេះជាលក្ខណៈគ្រួសារ ៕

បរទេស៖ ក្រុមហ៊ុនបច្ចេកវិទ្យាយក្សរបស់ចិន Huawei Technologies បានកត់ត្រាប្រាក់ចំណេញរបស់ខ្លួនក្នុងឆ្នាំ ២០២៣ កើនឡើងច្រើនទ្វេដងបើធៀបទៅនឹងឆ្នាំ២០២២ ខណៈក្រុមហ៊ុន Apple បានកត់ត្រាការថយចុះចំណែកទីផ្សាររហូតដល់ ១៥% ទៅ ២០%។

បើយោងតាម CNBC ដែលបានចុះផ្សាយកាលពីថ្ងៃទី២៩ ខែមីនា ឆ្នាំ២០២៤ ថាក្រុមហ៊ុនបច្ចេកវិទ្យា Huawei Technologies ទើបតែបានកត់ត្រាកំណើនលឿនបំផុតរបស់ខ្លួនក្នុងរយៈពេល ៤ ឆ្នាំកាលពីឆ្នាំមុន ជាមួយនឹងការងើបឡើងវិញនៃផ្នែកឧបករណ៍ និងកំណើនពីអាជីវកម្មថ្មីៗដូចជាគ្រឿងបន្លាស់រថយន្តឆ្លាតវៃ។ ប្រាក់ចំណូលរបស់ក្រុមហ៊ុន Huawei ក្នុងឆ្នាំ ២០២៣ បានកើនឡើង ៩.៦៣% ដល់ ៧០៤.២ ពាន់លានយន់ (ស្មើនឹង ៩៧.៤៨ ពាន់លានដុល្លារអាមេរិក) ដោយផ្នែកឧបករណ៍ប្រើប្រាស់បានរួមចំណែកច្រើនបំផុតក្នុងតួលេខនេះ កើនឡើង ១៧.៣% ដល់ ២៥១.៤៩ ពាន់លានយន់។

ដូច្នេះប្រាក់ចំណេញសុទ្ធក្នុងឆ្នាំ ២០២៣ របស់ក្រុមនេះបានកើនឡើង ១៤៤.៥% ដល់ ៨៧ ពាន់លានយន់ (ប្រមាណ ១,២ ពាន់លានដុល្លារអាមេរិក) ដែលប្រាក់ចំណេញសុទ្ធបានកើនឡើងទ្វេដងធៀបនឹងឆ្នាំមុនដល់ ១២.៣៥% ។ ហេតុនេះហើយ គិតត្រឹមចុងខែកញ្ញា ឆ្នាំ ២០២៣ ក្រុមហ៊ុន Huawei បានជាប់ចំណាត់ថ្នាក់ទី ៥ ទាក់ទងនឹងចំណែកទីផ្សារនៅក្នុងប្រទេសចិន ដោយចំណែកទីផ្សាររបស់ក្រុមហ៊ុននេះបានកើនឡើងពី ១០% នៅក្នុងត្រីមាសទីមួយ និង ១៤% នៅក្នុងត្រីមាសទីបី ផ្ទុយទៅវិញ Apple បានកត់ត្រាការថយចុះចំណែកទីផ្សារពី ២០% ទៅ ១៥%។

គួរបញ្ជាក់ដែរថា Huawei ធ្លាប់ជាក្រុមហ៊ុនផលិតស្មាតហ្វូនដ៏ធំបំផុតរបស់ពិភពលោក ប៉ុន្តែបានបាត់បង់តំណែងនេះនៅពេលដែលវាត្រូវបានសហរដ្ឋអាមេរិកដាក់ទណ្ឌកម្មក្នុងរយៈពេលប៉ុន្មានឆ្នាំចុងក្រោយនេះ ដោយមន្ត្រីអាមេរិកនិយាយថា ក្រុមហ៊ុន Huawei គំរាមកំហែងដល់សន្តិសុខជាតិ ហើយចិនអាចប្រើប្រាស់ឧបករណ៍របស់ក្រុមហ៊ុនសម្រាប់ធ្វើចារកម្ម។ ប៉ុន្តែរហូតមកដល់ពេលនេះក្រុមហ៊ុន Huawei បានបដិសេធការចោទប្រកាន់ទាំងនេះ ហើយកំពុងព្យាយាមកែលម្អជំហររបស់ខ្លួននៅក្នុងទីក្រុងវ៉ាស៊ីនតោន។

ទោះបីជាបច្ចុប្បន្នក្រុមហ៊ុន Huawei មិនបានបំបែកប្រាក់ចំណូលតាមផ្នែកឧបករណ៍ប្រើប្រាស់ក៏ដោយ ក៏អាជីវកម្មស្មាតហ្វូននៅតែកត់ត្រាការត្រឡប់មកវិញនៃក្រុមហ៊ុនបច្ចេកវិទ្យាយក្សរបស់ចិន។ នៅក្នុងខែសីហា ឆ្នាំ ២០២៣ ក្រុមហ៊ុននេះស្រាប់តែបញ្ចេញស្មាតហ្វូនស៊េរី Mate60 ដោយប្រើបន្ទះឈីបដែលបង្កើតដោយខ្លួនឯង។ នេះជាការវិលត្រឡប់របស់ Huawei ទៅកាន់ផ្នែកស្មាតហ្វូនលំដាប់ខ្ពស់បន្ទាប់ពីមានការលំបាកជាច្រើនឆ្នាំ៕