ឧទ្យានធម្មជាតិ Gardens by the Bay ដ៏ធំនិងល្បីល្បាញប្រចាំប្រទេសសិង្ហបុរី កាលពីថ្ងៃទី ១៧ ខែឧសភា ឆ្នាំ២០២៤ នេះគឺបានបង្ហាញវត្តមានវប្បធម៌-អរិយធម៌ខ្មែរយ៉ាងច្រើនពោរពាសនូវបរិវេនឧទ្យាននោះ។
ការដាក់តាំងបង្ហាញនូវសម្បត្តិអរិយធម៌រាប់ពាន់ឆ្នាំរបស់ខ្មែរដូចជា សំណង់ប្រាសាទអង្គរវត្ត ខ្លោងទ្វារអង្គរធំ ចម្លាក់ទេវតាទាញព្រ័ត្រជាដើម អមជាមួយផ្កាអ័រគីដេដ៏ស្រស់ត្រកាលគួរជាទីទាក់ចិត្តបំផុត។ បន្ថែមពីនេះក៏មានការសម្តែងសិល្បៈវប្បធម៌ខ្មែរ ជារៀងរាល់វេលាម៉ោង ៣ រសៀលផងដែរ។ ការដាក់តាំងបង្ហាញនេះគឺធ្វើឡើងចាប់ពីថ្ងៃទី១៧ ខែឧសភា រហូតដល់ថ្ងៃទី ៨ ខែកញ្ញា ឆ្នាំ ២០២៤ ។
យោងតាមការបង្ហោះពីគេហទំព័រផ្លូវការរបស់ឧទ្យាន Gardens by the Bay គឺបានបង្ហាញពីទិដ្ឋភាពសម្រស់ដ៏ផូរផង់នៃវប្បធម៌និងអរិយធម៌ខ្មែរជាច្រើននៅបរិវេនឧទ្យាននោះ ដោយភ្ជាប់ជាមួយនឹងចំណងជើងថា «មកឈ្វេងយល់អាថ៌កំបាំងនៃប្រាសាទអង្គរវត្ត…តាមរយៈផ្កាអ័រគីដេនៅ Cloud Forest’s Orchid Haven! ស្វែងយល់ពីដើមកំណើតនៃផ្កាអ័រគីដេដ៏គួរឱ្យភ្ញាក់ផ្អើលដែលបង្ហាញខ្លួននៅចំកណ្តាលប្រាសាទអង្គរវត្តអច្ឆរិយៈជាតិខ្មែរ ក៏ដូចជាមានការសម្តែងសិល្បៈវប្បធម៌ខ្មែរ ជារៀងរាល់វេលាម៉ោង ៣ រសៀល»។
ការដាក់តាំងបង្ហាញអត្តសញ្ញាណជាតិខ្មែរនៅក្នុងឧទ្យានដ៏ធំលើកនេះ ដែលជាគេឲ្យឈ្មោះថា Orchids of Angkor Wat មានន័យថា អ័រគីដេនៃប្រាសាទអង្គរវត្ត។ ក្នុងកិច្ចសហការសម្ពោធជាមួយស្ថានទូតកម្ពុជាប្រចាំប្រទេសសិង្ហបុរី ផ្កាអ័រគីដេនៃប្រាសាទអង្គរវត្តក្នុងឧទ្យានប្រៀបបាននឹងឋានសួគ៌នេះ គឺបានបង្កឲ្យមានការចាប់អារម្មណ៍ខ្លាំងលើភាពស្រស់ស្អាតនៃផ្កាអ័រគីដេតំណាងកម្ពុជាតាំងពីបុរាណកាលមក។
គួរបញ្ជាក់ថា ផ្កាអ័រគីដេត្រូវបានអាណាចក្រខ្មែរបុរាណគោរពបូជាថាជានិមិត្តសញ្ញានៃភាពថ្លៃថ្នូរ និងជាសញ្ញាសម្គាល់នៃជំនឿសាសនា ហើយថែមទាំងមានឆ្លាក់ជាប់នៅតាមចម្លាក់នានានៅតាមប្រាសាទអង្គរវត្តទៀតផង៕
