បន្ទាប់ពីការចែកចាយវីដេអូរបស់អ្នកផលិតមាទិកាល្បីឈ្មោះ Chom Srey Pach ទៅលើមុខម្ហូបសម្លរម្ជូរហ៊ីង គឺឃើញថាបានរងនូវការវែកញែកពេញបណ្តាញសង្គម ស្របពេលដែលមានទាំងអ្នកគាំទ្រនិងមិនគាំទ្រ។
រដូវវស្សាបានឈានចូលមកដល់ មេឃក៏ចាប់ផ្តើមបង្អូរភ្លៀងមកជាបន្តបន្ទាប់។បន្ថែមពីនេះ វាក៏ជារដូវសត្វបង្កកំណើតក្នុងទឹកបាននឹងកំពុងចាប់ផ្តើមពង ជាមួយគ្នានោះក៏មានកង្កែប ក្អាត់ គីង្គក់ និងសត្វហ៊ីងផងដែរ។ 
បើទោះជាយ៉ាងណា បន្ទាប់ពីវីដេអូរបស់ស្រីផាច បានចែកចាយពីមុខម្ហូបសត្វមួយប្រភេទនេះ ក៏បានមានមតិជាច្រើនបានលើកឡើង អ្នកខ្លះថា វាគឺជាម្ហូបប្រពៃណីខ្មែរ របស់អ្នកស្រុកស្រែចំការ វាជារឿងសាមញ្ញ និងធម្មតាៗទៅហើយ។ល។ ស្របពេលដែលអ្នកខ្លះបាននិយាយថា វាមើលទៅមិនគួរឲ្យចង់បរិភោគទេ គួរតែអភិរក្ស និងមិនគួរបរិភោគសត្វកំពុងពងបែបនេះជាដើម។ល។
ទោះជាយ៉ាងណា មហាជនខ្មែរភាគច្រើននូវតែមានចម្ងល់ថា តើការបរិភោគសត្វហ៊ីងនិងស្របពេលដែលកំពុងតែពងនេះគឺជាខុសច្បាប់នៅក្នុងប្រទេសកម្ពុជាយើងដែរឬយ៉ាងណា?
យោងតាមច្បាប់ស្តីពីព្រៃឈើ ជំពូកទី១០ (ការអភិរក្សសត្វព្រៃ) មាត្រា ៤៨ បានចែងថា ៖ ពពួកសត្វព្រៃគ្រប់ប្រភេទនៅក្នុងព្រះរាជាណាចក្រកម្ពុជាគឺជាសម្បត្តិរបស់រដ្ឋ និងជាសមាសភាគនៃធនធានព្រៃឈើដែលរួមមាន : ពួកថនិកសត្វ បក្សសត្វ ឧរង្គសត្វ ថលជលិកសត្វ បាណកសត្វ និងសត្វឥតឆ្អឹងកងផ្សេងទៀតព្រមទាំង ពង កូនរបស់វា។ ពពួកសត្វព្រៃទាំងអស់នេះស្ថិតនៅក្រោមការគ្រប់គ្រងសិក្សាស្រាវជ្រាវ និងការអភិរក្សដោយរដ្ឋបាល ព្រៃឈើ ដោយមិនរាប់បញ្ចូលត្រី និងសត្វបង្កកំណើតក្នុងទឹក ។
សំណាកសត្វព្រៃ គឺជាសត្វព្រៃដែលស្លាប់ ទោះជានៅខ្លួនទាំងមូល សរីរាង្គក្នុង សរីរាង្គក្រៅ បំណែកឆ្អឹង ឬផលិត ផលកែច្នៃ ត្រូវស្ថិតក្រោមសិទ្ធិគ្រប់គ្រង់របស់រដ្ឋបាលព្រៃឈើ ។
គ្រប់ប្រភេទសត្វព្រៃទាំងអស់ ត្រូវបានបែងចែកជាបីក្រុម គឺ:
១-ក្រុមប្រភេទជិតផុតពូជ
២-ក្រុមប្រភេទមានដោយកម្រ
៣-ក្រុមប្រភេទមានដោយបង្គួរ ។
លក្ខណៈវិនិច្ឆ័យសម្រាប់ចាត់ថ្នាក់ក្រុមនីមួយៗ និងបញ្ជីឈ្មោះប្រភេទសត្វក្នុងក្រុមប្រភេទជិតផុតពូជ និងប្រភេទ មានដោយកម្រដែលអាចប្រែប្រួលទៅតាមតំបន់ត្រូវកំណត់ដោយប្រកាសរបស់ក្រសួងកសិកម្ម រុក្ខាប្រមាញ់ និងនេសាទ តាមសំណើរបស់រដ្ឋបាលព្រៃឈើ ដោយមានការពិគ្រោះយោបល់ជាមួយក្រសួងបរិស្ថាន៕
