បរទេស៖ កាលពីពេលថ្មីៗនេះ ក្រុមហ៊ុនរថយន្តអគ្គិសនីចិន BYD បានកត់ត្រាការកើនឡើងច្រើនជាង ៨០% នៃប្រាក់ចំណេញសុទ្ធក្នុងឆ្នាំ ២០២៣ បើប្រៀបធៀបទៅនឹងឆ្នាំ ២០២២ គឺកើនឡើងទ្វេដង ចាប់តាំងពី BYD បានទម្លាក់តំណែង Tesla ក្លាយជាក្រុមហ៊ុនលក់រថយន្តអគ្គិសនីដ៏កំពូលរបស់ពិភពលោក។

នៅថ្ងៃទី ២៦ ខែមីនា ឆ្នាំ២០២៤ បើយោងតាម CNN បានឱ្យដឹងថា BYD បានប្រកាសថាប្រាក់ចំណេញសុទ្ធកាលពីឆ្នាំមុនឈានដល់ ៣០ ពាន់លានយន់ (ប្រមាណ ៤.២ ពាន់លានដុល្លារអាមេរិក) ដែលជាកម្រិតខ្ពស់បំផុតមិនធ្លាប់មាន។ ក្រុមហ៊ុនបាននិយាយថា BYD ទទួលបានប្រាក់ចំណេញយ៉ាងច្រើន បើទោះបីជាត្រូវប្រតិបត្តិការក្នុងបរិបទនៃ “បរិយាកាសខាងក្រៅដ៏ស្មុគស្មាញ” ក៏ដោយ។

នៅក្នុងត្រីមាសទី ៤ នៃឆ្នាំ ២០២៣ BYD ក៏បានវ៉ាដាច់ក្រុមហ៊ុន Tesla នៅក្នុងចំនួនរថយន្តអគ្គិសនីដែលលក់ទូទាំងពិភពលោក។ ដូច្នោះហើយ ពួកគេបានលក់រថយន្តច្រើនជាង ៥២៥,៤០០ គ្រឿង ខណៈដែល Tesla លក់រថយន្តបានត្រឹមតែ ៤៨៤,៥០០ គ្រឿងប៉ុណ្ណោះ។ នៅឆ្នាំ ២០២៣ BYD បានលក់រថយន្តចំនួន ៣.០២ លានគ្រឿងនៅទូទាំងពិភពលោក កើនឡើង ៦២% បើធៀបទៅនឹងឆ្នាំ ២០២២។

មូលហេតុដែលរថយន្តចិនវ៉ាដាច់រថយន្តអាមេរិក គឺដោយសារតម្លៃរថយន្តរបស់ BYD គឺទាបជាង Tesla ដែលនេះនឹងជួយពួកគេទាក់ទាញអ្នកទិញជាច្រើន។ រថយន្តថោកបំផុតរបស់ BYD ដែលលក់ក្នុងប្រទេសចិនគឺជាង ១០,០០០ ដុល្លារប៉ុណ្ណោះ។ ទន្ទឹមនឹងនេះ ម៉ូដែលរថយន្តថោកបំផុតរបស់ក្រុមហ៊ុន Tesla មានតម្លៃ ៣៩,០០០ ដុល្លារ។

ទោះជាយ៉ាងណាក៏ដោយ ការប្រកួតប្រជែងដ៏ខ្លាំងក្លា និងសង្រ្គាមតម្លៃកាលពីឆ្នាំមុន ក៏បានប៉ះពាល់ដល់ប្រាក់ចំណេញរបស់ក្រុមហ៊ុនផលិតរថយន្តចិនជាច្រើនផងដែរ។ ទិន្នន័យចុងក្រោយពីសមាគមរថយន្តដឹកអ្នកដំណើរបង្ហាញថា ឧស្សាហកម្មរថយន្តរបស់ប្រទេសបានកត់ត្រាប្រាក់ចំណេញជាមធ្យម ៥% កាលពីឆ្នាំមុន ធ្លាក់ចុះ ១.១% និង ០.៧% បើប្រៀបធៀបទៅនឹងឆ្នាំ ២០២១-២០២២។

គួរបញ្ជាក់ដែថា សង្គ្រាមតម្លៃនៅតែមិនបង្ហាញសញ្ញានៃការចុះត្រជាក់ឡើយ។ កាលពីដើមខែនេះ BYD បានកាត់បន្ថយតម្លៃចាប់ផ្តើមនៃម៉ូដែលរថយន្តថោកបំផុតគឺ Seagull ៥% មកត្រឹម ៦៩,៨០០ យន់ (ប្រមាណ ៩,៦៧០ ដុល្លារអាមេរិក)។ ក្រុមហ៊ុនផលិតរថយន្តរបស់ចិនផ្សេងទៀតក៏បានប្រកាសពីការកាត់បន្ថយតម្លៃក្នុងប៉ុន្មានសប្តាហ៍ថ្មីៗនេះផងដែរ រួមមាន Geely, Chery និង XPeng Motors៕

ប្រទេសជប៉ុន៖ កាលពីថ្ងៃទី២៧ ខែមីនា ឆ្នាំ២០២៤ បើយោងតាម Yahoo News បានឱ្យដឹងថា ដើមផ្កាសាគូរ៉ា ដ៏ល្បីបំផុតរបស់ជប៉ុនអាចនឹងបាត់បង់ដោយសារការប្រែប្រួលអាកាសធាតុ នេះមានន័យថា ពូជផ្កាសាគូរ៉ា អាចនឹងផុតពូជនៅក្នុងតំបន់ជាច្រើននៃប្រទេសជប៉ុននៅឆ្នាំ ២១០០។
បើតាមទីភ្នាក់ងារឧតុនិយមជប៉ុនបាននិយាយថា បច្ចុប្បន្នប្រទេសនេះមានសីតុណ្ហភាពជាមធ្យម ១.២៧ អង្សាសេ លើសពីធម្មតា ដែលជាការកត់សម្គាល់រដូវរងាក្តៅបំផុតទីពីររបស់ខ្លួន។ និន្នាការនៃខ្យល់ក្តៅគ្របដណ្តប់លើប្រទេសជប៉ុនបានជះឥទ្ធិពលដល់ដើមសាគូរ៉ា ដ៏ពេញនិយមបំផុតនៅក្នុងប្រទេសជប៉ុន ដែលដាំដុះតាំងពីចុងសតវត្សទី ១៩ មកម្លេះ។

ពូជផ្កាសាគូរ៉ា ត្រូវការរយៈពេលនៃអាកាសធាតុត្រជាក់ដោយមានសីតុណ្ហភាពក្រោម ៥ អង្សាសេ ដើម្បីជំរុញប្រព័ន្ធរបស់ពួកគេ និងបង្កើតផ្កានិទាឃរដូវដ៏ល្បីល្បាញរបស់ពួកគេ។ ប្រសិនបើនិន្នាការនៃការឡើងកំដៅផែនដីនៅតែបន្ត ការស្រាវជ្រាវដែលមានមូលដ្ឋានលើ AI ព្យាករណ៍ថាពូជដើម សាគូរ៉ា អាចប្រឈមនឹងការផុតពូជនៅក្នុងតំបន់ជាច្រើននៃប្រទេសជប៉ុន ដូចជាខេត្ត Miyazaki, Nagasaki និង Kagoshima នៅតំបន់ Kyushu ក្នុងឆ្នាំ ២១០០។

លទ្ធភាពនៃការបាត់ដើមសាគូរ៉ា អាចរំខានយ៉ាងធ្ងន់ធ្ងរដល់ពិធីបុណ្យផ្កាសាគូរ៉ា របស់ Hanami ។ យោងតាមការសិក្សាដាច់ដោយឡែកមួយដោយសាកលវិទ្យាល័យ Kansai ដែលធ្វើឡើងជារៀងរាល់ឆ្នាំចាប់ពីចុងខែមីនាដល់ដើមខែឧសភា បានឱ្យដឹងថា បុណ្យផ្កាសាគូរ៉ា របស់ Hanami គឺជាកត្តាជំរុញដ៏សំខាន់នៃវិស័យទេសចរណ៍ ដោយបង្កើតប្រាក់ចំណូលប្រមាណ ៦១៦ ពាន់លានយ៉េន (ប្រមាណ ៤ ពាន់លានដុល្លារអាមេរិក) នៅឆ្នាំ ២០២៣។

បញ្ហានេះភាគច្រើនទាក់ទងតែពូជសាគូរ៉ា ប៉ុណ្ណោះ ហើយសម្រាប់ពូជផ្សេងទៀតអាចធន់ទ្រាំ ឬសមស្របទៅនឹងអាកាសធាតុក្តៅជាង។ វាដល់ពេលហើយសម្រាប់ប្រជាជនជប៉ុនក្នុងការដាំផ្កាសាគូរ៉ា ជាច្រើនប្រភេទ ហើយបច្ចុប្បន្នដើមផ្កាសាគូរ៉ា មានប្រហែល ៣០០ ប្រភេទផ្សេងទៀតនៅក្នុងប្រទេសជប៉ុន។

បន្ថែមពីលើការប្រែប្រួលអាកាសធាតុ ដើមផ្កាសាគូរ៉ា ដែលជានិមិត្តរូបរបស់ប្រទេសក៏ប្រឈមមុខនឹងការគំរាមកំហែងពីប្រភេទសត្វដែលរាតត្បាតផងដែរ ដូចជាសត្វកណ្ដៀង ដែលបង្កគ្រោះថ្នាក់ដល់ការរស់រានមានជីវិតរបស់ពួកគេ។
គួរបញ្ជាក់ដែរថា ប្រទេសជប៉ុនទើបតែបានជួបប្រទះរដូវរងាក្តៅបំផុតទីពីររបស់ខ្លួនក្នុងកំណត់ត្រា ដោយអាកាសធាតុមិនអាចទាយទុកជាមុនបានឡើយ ទោះជាយ៉ាងណាសព្វថ្ងៃ ការប្រែប្រួលអាកាសធាតុបានប៉ះពាល់ដល់រដូវផ្ការីក កីឡាព្រិល និងលំនាំការធ្វើចំណាកស្រុករបស់សត្វស្វា៕

ប្រទេសថៃ ៖ អ្នករៀបចំព្រឹត្តិការណ៍តន្ត្រីធំៗចំនួន២ លំដាប់ពិភពលោក គឺ Summer Sonic និង Tomorrowland បានប្រកាសថា នឹងរៀបចំព្រឹត្តិការណ៍តន្ត្រីនៅប្រទេសថៃជាលើកដំបូងក្នុងតំបន់អាស៊ាន ។ វាស្របតាមគោលនយោបាយរបស់នាយករដ្ឋមន្ត្រីថៃ លោក Srettha Thavisin ដែលនិយាយថា ចង់ឱ្យប្រទេសថៃមានព្រឹត្តិការណ៍លំដាប់ពិភពលោក ដើម្បីផ្តល់ប្រាក់ចំណូលឱ្យពលរដ្ឋ ។

លោក Chai Watcharong មន្ត្រីនាំពាក្យទីស្តីការនាយករដ្ឋមន្ត្រីថៃលើកឡើងថា តាមគោលនយោបាយរបស់នាយករដ្ឋមន្ត្រីថៃ លោក Srettha Thavisin បានបញ្ជាឱ្យស្ថាប័នពាក់ព័ន្ធផ្តល់ភាពសំខាន់ និងលើកកម្ពស់សក្តានុពលឱ្យប្រទេសថៃរៀបចំព្រឹត្តិការណ៍ល្បីៗលំដាប់ពិភពលោក ដើម្បីជំរុញសកម្មភាពសេដ្ឋកិច្ច និងជំរុញឱ្យប្រទេសថៃក្លាយជាគោលដៅលេចធ្លោក្នុងការរៀបចំព្រឹត្តិការណ៍លំដាប់ពិភពលោក ជាបន្តបន្ទាប់ ។

លោក Chai Watcharong មន្ត្រីនាំពាក្យទីស្តីការនាយករដ្ឋមន្ត្រីថៃបន្តថា វាជាភាពជោគជ័យមួយដែលបានមកពីលទ្ធផលការងាររបស់រដ្ឋាភិបាលអាណត្តិថ្មី ដោយរដ្ឋាភិ
បាលបានពិភាក្សាជាមួយនាយកក្រុមហ៊ុនពាក់ព័ន្ធនឹងការរៀបចំព្រឹត្តិការណ៍លំដាប់ពិភពលោក រួមទាំងពិភាក្សាជាមួយក្រុមហ៊ុនរថយន្តអគ្គិសនីផងដែរ ។ មន្ត្រីនាំពាក្យរូបនេះបញ្ជាក់ថា ក្រោយពីការរៀបចំព្រឹត្តិការណ៍តន្ត្រីធំៗចំនួន២ លំដាប់ពិភពលោកនៅប្រទេសថៃរួចហើយ ព្រឹត្តិការណ៍លំដាប់ពិភពលោក នឹងរៀបចំនៅប្រទេសថៃជាបន្តបន្ទាប់ទៀត ។

ព្រឹត្តិការណ៍តន្ត្រីលំដាប់ពិភពលោក គឺ Summer Sonic Bangkok 2024 នឹងរៀបចំឡើងចាប់ពីថ្ងៃទី២៤ ដល់ថ្ងៃទី២៥ ខែសីហា ឆ្នាំ២០២៤ នៅទីក្រុងថងថានី ។ វាជាការរៀបចំព្រឹត្តិការណ៍តន្ត្រីលំដាប់ពិភពលោក ជាលើកដំបូងនៅតំបន់អាស៊ាន និងជាការរៀបចំលើកទី២ នៅក្រៅប្រទេសជប៉ុន ។ រីឯព្រឹត្តិការណ៍តន្ត្រីលំដាប់ពិភពលោក មួយទៀតឈ្មោះ Tomorrowland គឺជាព្រឹត្តិការណ៍ចម្រៀង EDM ក៏គ្រោងរៀបចំនៅប្រទេសថៃដូចគ្នាដែរ គឺនៅឆ្នាំ២០២៦ ហើយ Tomorrowland អាចរៀបចំនៅប្រទេសថៃជាបន្តបន្ទាប់ រយៈពេល១០ឆ្នាំ ។

លើសពីនេះ រដ្ឋាភិបាលថៃនឹងជជែកជាមួយអ្នករៀបចំព្រឹត្តិការណ៍លំដាប់ពិភពលោកជាច្រើនទៀត ដោយលោកនាយករដ្ឋមន្ត្រី Srettha Thavisin ថ្លែងថា លោកជឿជាក់លើសក្តានុពលរបស់ប្រទេសថៃគ្រប់ផ្នែក ជាពិសេស គម្រោងហេដ្ឋារចនាសម្ព័ន្ធដែលថៃបានអភិវឌ្ឍន៍រហូតមក ហើយថៃក៏បានធ្វើជាម្ចាស់ផ្ទះដ៏ល្អនាពេលកន្លងមកផងដែរ ។ កត្តាទាំងនេះនឹងធ្វើឱ្យអ្នករៀបចំព្រឹត្តិការណ៍លំដាប់ពិភពលោក ចាប់អារម្មណ៍មកលើថៃ ដើម្បីឱ្យថៃអាចទាក់ទាញភ្ញៀវទេសចរកាន់តែច្រើនមកកម្សាន្តនៅប្រទេសរបស់ខ្លួន ។

កាលពីថ្ងៃទី២៧ ខែមីនា ឆ្នាំ២០២៤ ប្រទេសថៃបានរៀបចំសន្និសីទជាផ្លូវការអំពីព្រឹត្តិការណ៍តន្ត្រីលំដាប់ពិភពលោក ក្រោមអធិបតីភាពរបស់នាយករដ្ឋមន្ត្រីថៃ លោក Srettha Thavisin និងលោកស្រី Paetongtarn Shinawatra ប្រធានគណបក្សភឿថៃ និងជាអនុប្រធានគណៈកម្មការអភិវឌ្ឍន៍ Soft Power ប្រទេសថៃ ។

លោក Srettha Thavisin នាយករដ្ឋមន្ត្រីថៃថ្លែងថា លោករីករាយយ៉ាងខ្លាំងដែលព្រឹត្តិការណ៍តន្ត្រីលំដាប់ពិភពលោក Summer Sonic នឹងរៀបចំនៅប្រទេសថៃជាលើកដំបូង ក្រោមឈ្មោះថា «Summer Sonic Bangkok 2024» ចាប់ពីថ្ងៃទី២៤ ដល់ថ្ងៃទី២៥ ខែសីហា ឆ្នាំ២០២៤ ។ វាជាការរៀបចំឡើងជាលើកដំបូងនៅក្រៅប្រទេសជប៉ុន ខណៈព្រឹត្តិការណ៍តន្ត្រី Summer Sonic នៅជប៉ុនបានទទួលភ្ញៀវទេសចរជាង៣៥ម៉ឺននាក់ក្នុង១ឆ្នាំ ដែលជាយុទ្ធសាស្ត្រសំខាន់ដើម្បីបង្កើនចំនួនភ្ញៀវទេសចរនៅជប៉ុន ។ ហេតុនេះ ប្រទេសថៃនឹងក្លាយជាកន្លែងទេសចរណ៍ស្របតាមចក្ខុវិស័យ Ignite Thailand ដែលបានប្រកាសនាពេលកន្លងមក ។

លោកនាយករដ្ឋមន្ត្រីបន្តថា Summer Sonic នឹងជាឱកាសសម្រាប់តារាថៃដែលស្រឡាញ់តន្ត្រីអាចបង្ហាញសមត្ថភាពទៅកាន់ពិភពលោក រួមទាំងធ្វើឱ្យថៃក្លាយជាកន្លែងទាក់ទាញការប្រគំតន្ត្រីផងដែរ ។ រដ្ឋាភិបាលនឹងគាំទ្រព្រឹត្តិកាណ៍ Summer Sonic Bangkok 2024 ឱ្យទទួលបានជោគជ័យនៅប្រទេសថៃ និងក្លាយជាផ្ទះទី២ ដ៏កក់ក្តៅ ហើយយើងនឹងផ្តល់ភាពងាយស្រួលដល់តារាចម្រៀង និងអ្នកចូលរួមទាំងអស់ ដើម្បីបង្កើតអនុស្សាវរីយ៍ល្អៗ ។ ប្រទេសថៃនឹងទទួលបានភ្ញៀវទេសចររហូតដល់៣៥ម៉ឺននាក់ ដូចការរៀបចំព្រឹត្តិការណ៍តន្ត្រីនៅជប៉ុនដែរ ពីព្រោះវាជាលើកដំបូង ដែលជប៉ុនរៀបចំព្រឹត្តិការណ៍នេះនៅក្រៅប្រទេស ។

ចំណែកលោកស្រី Paetongtarn Shinawatra ប្រធានគណបក្សភឿថៃនិយាយថា លោកស្រីរីករាយខ្លាំងណាស់ ដែលប្រទេសថៃគ្រោងរៀបចំព្រឹត្តិការណ៍តន្ត្រីលំដាប់ពិភពលោក គឺ Summer Sonic នៅខែសីហា ឆ្នាំ២០២៤ ដើម្បីផ្តល់ឱកាសដល់សេដ្ឋកិច្ចថៃ ឬហៅថា Festival Economy ដែលនឹងមានការប្រមូលផ្តុំមនុស្សរាប់ម៉ឺននាក់ទាំងជនជាតិថៃ និងភ្ញៀវទេសចរបរទេស ។ ហេតុនេះ វានឹងជួយជំរុញដល់សេដ្ឋកិច្ចជាច្រើនផ្នែក ដូចជា ៖ ការធ្វើដំណើរ, ការស្នាក់នៅសណ្ឋាគារ, ការលក់ដូរម្ហូបអាហារនៅហាងតូចៗ និងអាជីវកម្មផ្សេងទៀត ៕

ប្រទេសថៃ ៖ បន្ទះឈីប (ឬ Semiconductor) គឺជាឧស្សាហកម្មរីកចម្រើនយ៉ាងឆាប់រហ័ស ពីព្រោះបន្ទះឈីបជាផ្នែកដ៏សំខាន់នៃការផលិតសម្ភារៈអេឡិចត្រូនិកជាច្រើនប្រភេទ ។ បច្ចុប្បន្ន ពិភពលោកបានឈានមកដល់សម័យឌីជីថល និងធ្វើឱ្យមានតម្រូវការប្រើប្រាស់បន្ទះឈីបកាន់តែខ្លាំង រហូតដល់រោងចក្រផលិតមិនទាន់ ។

ហេតុនេះ បន្ទះឈីបមិនអាចបំពេញតម្រូវការប្រើប្រាស់គ្រប់គ្រាន់ទេ ខណៈការផលិតបន្ទះឈីបមានតែក្នុងប្រទេសមួយចំនួនប៉ុណ្ណោះ ។ នៅខែមីនា ឆ្នាំ២០២៤ ថៃបានទទួលដំណឹងល្អ ក្រោយពីអាមេរិកចាប់អារម្មណ៍សាងសង់រោងចក្រផលិតបន្ទះឈីបនៅប្រទេសថៃ ។

លោក Chai Watcharong មន្ត្រីនាំពាក្យទីស្តីការនាយករដ្ឋមន្ត្រីថៃ លើកឡើងថា ក្រោយពីការណាត់ជួបជាមួយក្រុមហ៊ុនជាច្រើន ដែលជាសភានាំចេញរបស់ប្រធានាធិបតីអាមេរិកបានធ្វើដំណើរមកកាន់ប្រទេសថៃ ព្រមទាំងលោកស្រី ជេនណា អេមរ៉េមុនដូ រដ្ឋមន្ត្រីក្រសួងការបរទេសអាមេរិក បានបង្ហាញការចាប់អារម្មណ៍ចូលមកវិនិយោគនៅប្រទេសថៃ ជាពិសេស ឧស្សាហកម្មបន្ទះឈីប ។ អាមេរិក និងថៃ គ្រោងបង្កើតគណៈកម្មការការងារមួយដើម្បីពិភាក្សាអំពីចំណុចលម្អិតបន្តទៀត ។

លោក Chai Watcharong មន្ត្រីនាំពាក្យទីស្តីការនាយករដ្ឋមន្ត្រីថៃបន្តថា តម្រូវការប្រើប្រាស់បន្ទះឈីបបានកើនឡើងខ្លាំង ក្រោយពីពិភពលោកឈានដល់ការប្រើប្រាស់បច្ចេកវិទ្យា ហើយផ្នែកឯកជនអាមេរិកប្រាប់ថា ប្រទេសថៃជាជម្រើសដំបូងគេសម្រាប់ផលិតបន្ទះឈីប ។ អាមេរិកមើលឃើញថា ប្រទេសថៃមានសក្តានុពល និងមានប្រៀបផ្នែកទីតាំង គឺប្រទេសថៃស្ថិតនៅចំណុចកណ្តាលនៃភូមិភាគអាស៊ីអាគ្នេយ៍ ហើយប្រទេសថៃបានប្រកាន់ជំហរកណ្តាល និងមិនពាក់ព័ន្ធជាមួយជម្លោះផ្សេងៗលើពិភពលោក ។

ក្រៅពីនេះ រដ្ឋាភិបាលថៃស្ថិតនៅក្រោមការដឹកនាំរបស់លោក Srettha Thavisin នាយករដ្ឋមន្ត្រីថៃ ក៏បានផ្តល់ភាពសំខាន់លើការកសាងហេដ្ឋារចនាសម្ព័ន្ធ ព្រមទាំងការវិនិយោគអាជីវកម្មបៃតងផងដែរ ដែលជាផ្នែកមួយនៃទស្សនវិស័យរបស់ថៃក្នុងការអភិវឌ្ឍឧស្សាហកម្មទាំង៨ផ្នែក ហើយវាស្របនឹងគោលនយោបាយរបស់អាមេរិក ។

លោក Chai Watcharong បន្តទៀតថា ការបង្កើតគណៈកម្មការការងាររវាងអាមេរិក និងថៃ ដើម្បីចរចាពីការវិនិយោគឧស្សាហកម្មផលិតបន្ទះឈីបនៅថៃ ចាត់ទុកថា គឺជាភាពជោគជ័យសំខាន់មួយទៀតរបស់លោកនាយករដ្ឋមន្ត្រីថៃ និងរដ្ឋាភិបាល ដែលបានទាក់ទាញការវិនិយោគចូលប្រទេសថៃ និងដំណើរការនយោបាយឱ្យស្របនឹងតម្រូវការរបស់ផ្នែកឯកជន ។

គេជឿថា កិច្ចសហការនេះនឹងធ្វើឱ្យឧស្សាហកម្មផលិតបន្ទះឈីបរបស់ថៃរឹងមាំ រួមទាំងទាក់ទាញឱ្យមានការវិនិយោគផ្នែកឧស្សាហកម្មផ្សេងទៀតនាថ្ងៃអនាគត ដើម្បីធ្វើឱ្យប្រាក់វិនិយោគហូរចូលក្នុងសេដ្ឋកិច្ចថៃ ។ លើសពីនេះ វានឹងជួយលើកកម្ពស់ជំនាញការងារពលរដ្ឋថៃ និងការប្រកួតប្រជែងរបស់ថៃបន្ថែមទៀតក្នុងឧស្សាហកម្មពាក់ព័ន្ធ ។

មុននេះ រដ្ឋមន្ត្រីក្រសួងពាណិជ្ជកម្មអាមេរិកបានលើកឡើងក្នុងអំឡុងពេលធ្វើដំណើរមកប្រទេសថៃថា អាមេរិកនឹងបង្កើនការវិនិយោគនៅប្រទេសថៃបន្ថែមទៀត ដោយរដ្ឋមន្ត្រីក្រសួងពាណិជ្ជកម្មអាមេរិកសង្កត់ធ្ងន់ថា ថៃនឹងទទួលបានផលប្រយោជន៍យ៉ាងខ្លាំង ក្រោយពីអាមេរិកវិនិយោគបង្កើតរោងចក្រផលិតបន្ទះឈីបនៅថៃ ។

នៅខែមីនា ឆ្នាំ២០២៤ រដ្ឋមន្ត្រីក្រសួងពាណិជ្ជកម្មអាមេរិកបានថ្លែងក្នុងអំឡុងពេលចូលជួបសមាជិកសភាពាណិជ្ជកម្មអាមេរិកនៅប្រទេសថៃ ដើម្បីជំរុញទំនាក់ទំនងសេដ្ឋកិច្ចរវាងអាមេរិក និងថៃ ដោយបញ្ជាក់ថា អាមេរិកនឹងជំរុញការវិនិយោគបន្ថែមទៀតនៅក្រុមប្រទេសឥណ្ឌូ-ប៉ាស៊ីហ្វិក ខណៈបច្ចុប្បន្ន មានសមាជិក១៤ប្រទេស ជាពិសេស ការវិនិយោគផលិតបន្ទះឈីប ។ អាមេរិកមើលឃើញថា បន្ទះឈីបមានតម្រូវការខ្ពស់បំផុតនៅលើពិភពលោក ដោយសារការរីកចម្រើនបច្ចេកវិទ្យាគ្រប់ផ្នែក ។

គេចាត់ទុកថា បន្ទះឈីប គឺជាផ្នែកដ៏សំខាន់សម្រាប់ផលិតសម្ភារៈអេឡិចត្រូនិកផ្សេងៗ ដូចជា ៖ សម្ភារៈអគ្គិសនី, រថយន្ត និងឧបករណ៍បច្ចេកវិទ្យា ។ វាជាឧស្សាហកម្មមួយរីកលូតលាស់យ៉ាងឆាប់រហ័សក្នុងរយៈពេលជាច្រើនឆ្នាំកន្លងមក ។ កន្លងមក រដ្ឋាភិបាលថៃប្រកាសថា ប្រទេសថៃមានសក្តានុពលសម្រាប់បង្កើតរោងចក្រផលិតបន្ទះឈីប ដោយសារថៃមានធនធានមនុស្ស, ការរៀបចំផ្នែកឧស្សាហកម្ម រួមទាំងទំនាក់ទំនងយ៉ាងល្អជាមួយប្រទេសផ្សេងៗ ។ ហេតុនេះ ប្រទេសថៃគឺជាទីតាំងដ៏ល្អសម្រាប់ការវិនិយោគបន្ទះឈីប ៕