បច្ចុប្បន្ននេះ មានទូរស័ព្ទថ្មីៗជាច្រើនត្រូវបានចេញលក់ ប៉ុន្តែអ្នកខ្លះមិនចង់ប្តូរនិងទិញទូរស័ព្ទថ្មីៗនោះទេ ដោយពួកគេនៅតែបន្តប្រើប្រាស់ទូរស័ព្ទចាស់ៗ ក៏ដូចជាចង់ថែរក្សាទូរស័ព្ទរបស់ពួកគេឱ្យនៅតែស្អាត និងនៅតែអាចប្រើប្រាស់បានជារៀងរហូត ទោះបីជាវាហួសសម័យក៏ដោយ។ ដូច្នេះដើម្បីរក្សាទូរស័ព្ទចាស់ៗឱ្យនៅស្អាត និងនៅតែអាចប្រើប្រាស់បានយូរអង្វែង យើងនឹងប្រាប់ពីគន្លឹះសំខាន់ៗដូចខាងក្រោម៖

១.ទុកនៅសីតុណ្ហភាពត្រជាក់៖ ទុកទូរស័ព្ទរបស់អ្នកនៅកន្លែងត្រជាក់ និងស្ងួត ដោយចៀសវាងសីតុណ្ហភាពក្តៅពេក ដោយសារតែវាអាចបំផ្លាញទូរស័ព្ទរបស់អ្នកបាន ហើយវាក៏មិនគួរទុកនៅកន្លែងសើមដែរ។

២.សាកថ្មទូរស័ព្ទជាប្រចាំឱ្យបានត្រឹមត្រូវ៖ ជាធម្មតា ទូរស័ព្ទដៃគឺជាឧបករណ៍មួយដែលមានថ្ម បើមិនយកចិត្តទុកដាក់ទេ វានឹងបង្កបញ្ហាបាន។ ដូច្នេះការថែទាំថ្មជាមូលដ្ឋានគឺសាកថ្មឱ្យបានត្រឹមតែ ៥០ – ៨០% ជាប្រចាំគឺគ្រប់គ្រាន់សម្រាប់ការផ្ទុក និងល្អបំផុតសម្រាប់ការថែរក្សាអាយុថ្មឱ្យវានៅយូរអង្វែង ប្រសិនបើសាក ១០០% ពេញពេកវាអាចធ្វើឱ្យថ្មទូរស័ព្ទឆាប់ខូច។

៣.ជៀសវាងការទុកទូរស័ព្ទរបស់អ្នកនៅក្រោមពន្លឺថ្ងៃ៖ ការទុកទូរស័ព្ទរបស់អ្នកនៅក្រោមពន្លឺថ្ងៃ អាចជះឥទ្ធិពលអវិជ្ជមាន ព្រោះពេលខ្លះកំដៅពីពន្លឺព្រះអាទិត្យនឹងធ្វើឱ្យទូរសព្ទដៃផុយបានយ៉ាងងាយ ហើយឧបករណ៍និងអេក្រង់ក៏កាន់តែយ៉ាប់យ៉ឺនដោយសារតែពន្លឺព្រះអាទិត្យផងដែរ។

៤.ដកថ្មចេញ៖ ប្រសិនបើវាជាទូរស័ព្ទដែលផលិតមុនឆ្នាំ ២០០០ ម៉ូឌែលខ្លះគួរតែដកថ្មចេញ ដោយសារថ្មអាចក្លាយទៅជាកាកសំណល់អេឡិចត្រូនិកផលិតឡើងវិញបាន ខណៈដែលទូរស័ព្ទមិនអាចប្រើប្រាស់បានទៀតឡើយ ដូច្នេះអ្នកគួរតែបោះចោលតាមរបៀបត្រឹមត្រូវ៕

នៅថ្ងៃទី១០ ខែមេសា ឆ្នាំ២០២៤ សារព័ត៌មានបរទេសរាយការណ៍ថា កាលពីពេលថ្មីៗនេះ FinDreams ជាក្រុមហ៊ុនផលិតថ្មរថយន្តអគ្គិសនីរបស់ក្រុមហ៊ុន BYD នឹងដំណើរការថ្មរថយន្ត ប្រភេទ Blade ជំនាន់ទី២ នៅចុងឆ្នាំ២០២៤ ដែលវាមានថាមពលខ្ពស់ គឺសាកម្តង រថយន្តអគ្គិសនីអាចបើកបរបានចម្ងាយ១ពាន់គីឡូម៉ែត្រ ។ លើសពីនេះ ក្រុមហ៊ុននឹងបង្ហាញថ្មថ្មីសម្រាប់រថយន្តអគ្គិសនី នៅខែសីហា ឆ្នាំ២០២៤ ដើម្បីប្រកួតប្រជែងជាមួយរថយន្តប្រើប្រាស់ប្រេងឥន្ធនៈ ។

គេរំពឹងថា ការផលិតថ្មថ្មីលើកចុងក្រោយសម្រាប់រថយន្តអគ្គិសនី នឹងក្លាយជាថ្មមានថាមពលខ្ពស់បំផុត ហើយក្រុមហ៊ុនអាចកាត់បន្ថយការចំណាយដើមទុនក្នុងការផលិតថ្ម រហូតដល់៣០% ។ ហេតុនេះ វានឹងធ្វើឱ្យការបើកបររថយន្តអគ្គិសនីកាន់តែមានសុវត្ថិភាព, ទំនុកចិត្ត និងមានរយៈពេលប្រើប្រាស់បានយូរផងដែរ ។

នេះចាត់ទុកថា វាជាភាពជោគជ័យមួយរបស់ក្រុមហ៊ុន BYD ផ្នែកផលិតថ្មរថយន្តអគ្គិសនី ពីព្រោះក្រៅពីក្រុមហ៊ុននេះនឹងបំពាក់ថ្មថ្មីជាមួយរថយន្តតម្លៃថោករបស់ខ្លួន ដូចជា ៖ Seagull, Dolphin និង ATTO 3 រួចហើយ គឺក្រុមហ៊ុននឹងលក់ថ្មថ្មីទៅឱ្យក្រុមហ៊ុនផលិតរថយន្តជាច្រើនទៀត ដូចជា ៖ Tesla, Ford, Kia, Hyundai និង Toyota ។

នាយកក្រុមហ៊ុន BYD លោក Wang Chuanfu បានលើកឡើងអំពីការផលិតថ្មថ្មីសម្រាប់រថយន្តអគ្គិសនី ក្នុងអំឡុងពេលកិច្ចប្រជុំពីទំនាក់ទំនងរបាយការណ៍ហិរញ្ញវត្ថុចុងក្រោយថា ថ្មរថយន្តអគ្គិសនី ប្រភេទ Blade ជំនាន់ទី២ នឹងមានទំហំតូចជាង, ទម្ងន់ស្រាលជាង ព្រមទាំងមានភាពធន់ដូចថ្មរថយន្តអគ្គិសនីជំនាន់មុន ។

រីឯ Fast Technology រំពឹងថា ថ្មរថយន្តអគ្គិសនី ប្រភេទ Blade ជំនាន់ទី២ នឹងជួយឱ្យរថយន្តអគ្គិសនីទាំងអស់អាចបើកបរក្នុងចម្ងាយផ្លូវលើសពី១ពាន់គីឡូម៉ែត្រ ហើយកម្លាំងថ្មប្រភេទថ្មីនេះ គឺស្មើគ្នានឹងថ្មប្រភេទ Solid State របស់ IM Motors និងថ្មប្រភេទពាក់កណ្តាល Solid State របស់ NIO ដែលធ្លាប់បានបង្ហាញកាលពីពេលមុន ។

នៅខែមេសា ឆ្នាំ២០២៤ មានពាក្យចចាមអារ៉ាមពីក្រុមហ៊ុន BYD ថា ប្រព័ន្ធដោត DM-i Plug-in Hybrid ជំនាន់ទី៥ របស់ក្រុមហ៊ុន BYD នឹងជួយឱ្យរថយន្តអគ្គិសនីអាចបើកបរក្នុងចម្ងាយផ្លូវឆ្ងាយជាងមុន គឺជិតស្មើ២.០០០គីឡូម៉ែត្រឯណោះ ៕

ប្រទេសថៃ ៖ លោក Pipat Ratchakitprakarn រដ្ឋមន្ត្រីក្រសួងការងារថៃលើកឡើងថា ការជំរុញគោលនយោបាយប្រាក់ឈ្នួលអប្បបរមាតាមគោលការណ៍របស់គណៈកម្មការត្រីភាគី ស្មើនឹង៤០០បាតក្នុង១ថ្ងៃនៅទូទាំងប្រទេសថៃក្នុងឆ្នាំ២០២៤ កំពុងតែដំណើរការ ហើយក្រសួងការងារនឹងជំរុញគោលនយោបាយប្រាក់ឈ្នួលអប្បបរមាឱ្យស្មើរហូតដល់៦០០បាតក្នុង១ថ្ងៃ នៅឆ្នាំ២០២៧ ។

លោក Pipat Ratchakitprakarn រដ្ឋមន្ត្រីក្រសួងការងារថៃបញ្ជាក់ថា នៅខែមេសា ឆ្នាំ២០២៤ ការអនុវត្តដំឡើងប្រាក់ឈ្នួលអប្បបរមាស្មើនឹង៤០០បាតក្នុង១ថ្ងៃ បានសាកល្បងនៅតំបន់មួយចំនួនក្នុងខេត្តចំនួន១០ ដែលដំណើរការដោយគណៈកម្មការត្រីភាគី និងអនុវត្តចាប់ពីថ្ងៃទី១៣ ខែមេសា ឆ្នាំ២០២៤ តទៅ ។ ការដំឡើងប្រាក់ឈ្នួលនេះនឹងអនុវត្តជាដំណាក់កាល ដើម្បីឱ្យគ្រប់វិស័យរៀបចំខ្លួនដោះស្រាយផលប៉ះពាល់ផ្សេងៗ ។

លោករដ្ឋមន្ត្រីក្រសួងការងារថ្លែងថា ៖ «យើងនឹងព្យាយាមដំឡើងប្រាក់ឈ្នួលឱ្យពលរដ្ឋតាមមុខរបរនីមួយៗ និងផ្អែកលើលទ្ធភាពរបស់សហគ្រិន ។ ក្រសួងការងារបានប្រជុំត្រីភាគី គឺនិយោជក, និយោជិត និងមន្ត្រីរាជការ កាលពីថ្ងៃទី២៦ ខែមីនា ឆ្នាំ២០២៤ ។ វាជាការសាកល្បងនៅខេត្តចំនួន១០ ហើយយើងបានព្យាយាមធ្វើមួយជំហានម្តងៗ ។ ដូច្នេះ និយោជិត និងស្ថាប័នពាក់ព័ន្ធនឹងបានជ្រាបថា គោលនយោបាយរបស់រដ្ឋាភិបាលអំពីការដំឡើងប្រាក់ឈ្នួលអប្បបរមាដល់ពលរដ្ឋនៅទូទាំងប្រទេសថៃ ចំនួន៤០០បាត គឺជាគោលដៅ» ។

លោករដ្ឋមន្ត្រីក្រសួងការងារសង្កត់ធ្ងន់ថា ក្រសួងការងារបានពិចារណាអំពីការដំឡើងប្រាក់ឈ្នួលឱ្យពលរដ្ឋតាមគោលការណ៍របស់គណៈកម្មការត្រីភាគី ហើយជំហានដំបូង ការដំឡើងប្រាក់ឈ្នួលចំនួន៤០០បាតក្នុង១ថ្ងៃ នឹងអនុវត្តនៅខេត្តចំនួន១០ ប៉ុន្តែសម្រាប់តែតំបន់មួយចំនួនប៉ុណ្ណោះ ។ បន្ទាប់មក ក្រសួងការងារនឹងព្យាយាមដំឡើងប្រាក់ឈ្នួល៤០០បាតក្នុង១ថ្ងៃ ឱ្យបានគ្រប់ខេត្ត-ក្រុងទាំងអស់នៅចុងឆ្នាំ២០២៤ ។

ជំហានបន្ទាប់ ក្រសួងការងារនឹងបន្តដំឡើងប្រាក់ឈ្នួលរហូតដល់៦០០បាតក្នុង១ថ្ងៃ នៅឆ្នាំ២០២៧ ដើម្បីឱ្យស្របតាមគោលនយោបាយរបស់រដ្ឋាភិបាលអាណត្តិថ្មី ដែលធ្លាប់បានលើកឡើងទៅកាន់រដ្ឋសភានាពេលកន្លងមក ៕

បរទេស៖ កាលពីពេលថ្មីៗនេះ អ្នកស្រាវជ្រាវសុវត្ថិភាព Bitdefender បានរកឃើញភាពងាយរងគ្រោះចំនួនបួននៅក្នុងប្រព័ន្ធប្រតិបត្តិការ WebOS ដែលដំណើរការលើទូរទស្សន៍ឆ្លាតវៃ LG ។
យោងទៅតាម Bitdefender ភាពងាយរងគ្រោះនេះផ្តល់ឱ្យពួក Hacker នូវការចូលប្រើប្រាស់ដោយគ្មានការអនុញ្ញាត និងការគ្រប់គ្រងទៅលើកម្រិតផ្សេងៗគ្នានៅលើទូរទស្សន៍ដែលរងផលប៉ះពាល់ ដូចជាការឆ្លងកាត់ការអនុញ្ញាត ការបង្កើនសិទ្ធិ និងការបញ្ចូលពាក្យបញ្ជា។ ពួក Hacker អាចបង្កើតគណនីបំពានលើឧបករណ៍ដោយប្រើប្រាស់សេវាកម្មដែលដំណើរការនៅលើច្រក ៣០០០/៣០០១ ដែលបច្ចុប្បន្នត្រូវបានប្រើដើម្បីភ្ជាប់ស្មាតហ្វូនជាមួយនឹងលេខកូដ PIN ។ ការធ្វើតេស្តស្កេនអ៊ីនធឺណិតជាមួយឧបករណ៍ស្កេនសុវត្ថិភាព Shodan Report បានបង្ហាញថាឧបករណ៍ LG ប្រហែល ៩១,០០០ គ្រឿងងាយរងគ្រោះ។

ភាពងាយរងគ្រោះទាំងបួនដែលចេញផ្សាយដោយក្រុមស្រាវជ្រាវរួមមាន CVE-2023-6317 ដែលអនុញ្ញាតឱ្យអ្នកវាយប្រហារឆ្លងកាត់យន្តការអនុញ្ញាតរបស់ទូរទស្សន៍ និងបន្ថែមអ្នកប្រើប្រាស់ដោយគ្មានការយល់ព្រម។ CVE-2023-6318 ទទួលបានសិទ្ធិជា root បន្ទាប់ពីប្រតិបត្តិ CVE-2023-6317; ហើយ CVE-2023-6319 OS បញ្ចូលពាក្យបញ្ជា និងការប្រតិបត្តិពាក្យបញ្ជាតាមអំពើចិត្ត; និង CVE-2023-6320 អនុញ្ញាតឱ្យពួក Hacker កេងប្រវ័ញ្ច API ដើម្បីប្រតិបត្តិពាក្យបញ្ជាជាអ្នកប្រើប្រាស់ dbus ដែលជាការអនុញ្ញាតស្រដៀងនឹង root ។

ភាពងាយរងគ្រោះប៉ះពាល់ដល់ WebOS កំណែ 4.9.7 – 5.30.40 ដែលដំណើរការលើស៊េរីទូរទស្សន៍ 43UM7000PLA, WebOS 04.50.51 – 5.5.0 នៅលើ OLED55CXPUA TV, WebOS 0.36.50 – 6.3.3-3OSC 10, OLED និង Web3.3.3.448 85 – 7.3.1-43 នៅលើ OLED48C1PUB, OLED55A23LA ។ Bitdefender បាននិយាយថា ខ្លួនបានរកឃើញភាពងាយរងគ្រោះកាលពីចុងឆ្នាំមុន ហើយបានរាយការណ៍វាទៅ LG ។ ទោះជាយ៉ាងណាក៏ដោយ វាមិនទាន់ដល់ចុងខែមេសាទេ ដែលក្រុមហ៊ុនកូរ៉េបានចេញផ្សាយការអាប់ដេតដំបូងដើម្បីជួសជុលវា។ អ្នកប្រើអាចចូលទៅកាន់ ការកំណត់ > ជំនួយ > អាប់ដេតកម្មវិធី > ពិនិត្យរកបច្ចុប្បន្នភាព។

យោងតាម Bleeping Computer ទោះបីជាបញ្ហាសុវត្ថិភាពនៅលើទូរទស្សន៍មិនធំដូចនៅលើកុំព្យូទ័រ ឬស្មាតហ្វូនក៏ដោយ ក៏មនុស្សអាក្រក់នៅតែអាចប្រើវាជាចំណុចមួយដើម្បីវាយប្រហារឧបករណ៍ផ្សេងទៀតដែលភ្ជាប់ទៅបណ្តាញដូចគ្នា។ លើសពីនេះ ទូរទស្សន៍ឆ្លាតវៃតែងតែភ្ជាប់ទៅគណនីអនឡាញ ដូច្នេះពួក Hacker អាចលួចគណនីទាំងនេះបាន។ ជាចុងក្រោយ ទូរទស្សន៍អាចត្រូវបានកេងប្រវ័ញ្ចជា botnet (បណ្តាញកុំព្យូទ័រខ្មោច) សម្រាប់ការវាយប្រហារដោយ DDoS ឬដំឡើងកម្មវិធីរុករកប្រាក់ឌីជីថលដោយស្ងៀមស្ងាត់៕

ប្រទេសចិន៖ ក្រៅពីសារីរិកធាតុបុរាណដ៏ល្បីល្បាញ ទីក្រុងប៉េកាំងក៏មានស្នាដៃស្ថាបត្យកម្មទំនើប ដែលអាចធ្វើឱ្យអ្នកទេសចរភ្ញាក់ផ្អើលនៅពេលពួកគេបានទៅទស្សនា។ ក្នុងនាមជាទឹកដីនៃប្រវត្តិសាស្ត្ររាប់ពាន់ឆ្នាំ ជាមួយនឹងតំបន់បេតិកភណ្ឌពិភពលោកចំនួន ៧ ដែលត្រូវបានទទួលស្គាល់ដោយអង្គការយូណេស្កូ ទីក្រុងប៉េកាំងក៏មានស្នាដៃស្ថាបត្យកម្មថ្មីៗ ទំនើបៗ និងប្លែកៗជាច្រើន ដែលសក្តិសមជាគោលដៅសម្រាប់ភ្ញៀវទេសចរដែលចូលចិត្តរបស់ថ្មី និងភាពស្រស់ស្អាត។ ដូច្នេះខាងក្រោមនេះគឺជាគោលដៅល្បីៗចំនួន ៣ ដែលអ្នកមិនគួររំលងពេលទៅទស្សនាទីក្រុងប៉េកាំង៖

១.ពហុកីឡដ្ឋានជាតិ៖ មានទីតាំងនៅក្នុងសួនកីឡាអូឡាំពិកទីក្រុងប៉េកាំង ពហុកីឡដ្ឋានជាតិគឺជាអគារដ៏លេចធ្លោបំផុត ដែលពិភពលោកស្គាល់ថាជាកីឡដ្ឋានសំបុកសត្វស្លាប។ គម្រោងនេះធ្វើឱ្យអ្នកទស្សនាភ្ញាក់ផ្អើលនៅពេលឃើញដំបូង ដោយសារការរចនាដ៏រឹងមាំ និងភាពលេចធ្លោររបស់វា។ លំហយក្សនេះមានរាងដូចកំណាត់ដែករាប់រយដែលត្បាញជាមួយគ្នាដើម្បីបង្កើតជាសំបុកសត្វស្លាបដ៏ធំមួយទល់នឹងផ្ទៃមេឃពណ៌ខៀវ។

ហេតុនេះដើម្បីទៅដល់កីឡដ្ឋាន៖ អ្នកអាចជិះរថភ្លើងក្រោមដីលេខ ៨ ឬខ្សែទី ១៥ ទៅកាន់ស្ថានីយ៍អូឡាំពិចបៃតង រួចជិះឡានក្រុងលេខ ៨២, ៤១៩, ៥៣៨, ឬ ៦៤៥ ទៅកាន់ចំណតពហុកីឡដ្ឋានជាតិខាងកើត។ ដូច្នេះអ្នកអាចដើរលេងកម្សាន្ត និងថតរូបជុំវិញបរិវេណកីឡដ្ឋាន និងឧទ្យានអូឡាំពិកទាំងមូលដោយសេរី ដើម្បីចូលរួមដំណើរកម្សាន្តនៅខាងក្នុងកីឡដ្ឋាន។

២.សារមន្ទីរជាតិ៖ គម្រោងដ៏ធំដែលមានទីតាំងនៅទីលានធានអាន សារមន្ទីរជាតិនៃប្រទេសចិនគឺជាកន្លែងទាក់ទាញភ្ញៀវទេសចរជាច្រើនជុំវិញពិភពលោក ប្រសិនបើអ្នកចំណាយពេលប្រហែល ២-៣ ម៉ោងទៅទស្សនាសារមន្ទីរ អ្នកនឹងឃើញពិភពលោកទាំងមូលបង្ហាញនៅក្នុងរចនាសម្ព័ន្ធដ៏អស្ចារ្យ។ សារមន្ទីរនេះក៏មានកន្លែងសម្រាប់ភ្ញៀវទទួលទានអាហារ និងសម្រាកផងដែរ ដោយមានតម្លៃត្រឹមតែពីរបីយ័នប៉ុណ្ណោះសម្រាប់អាហារថ្ងៃត្រង់ ហើយអ្នកក៏អាចទិញទំនិញនៅក្នុងហាងសារមន្ទីរផងដែរ។

៣.ផ្ទះល្ខោនជាតិ៖ មានទីតាំងនៅកណ្តាលទីក្រុងប៉េកាំង ចម្ងាយ ២ គីឡូម៉ែត្រពីទីក្រុងហាមឃាត់ មជ្ឈមណ្ឌលជាតិសម្រាប់ការសម្តែងសិល្បៈមិនត្រូវបានភ្ញៀវទេសចរច្រើនមកទស្សនាទេ ព្រោះវាអាចត្រូវបានគិតខុសថាគ្រាន់តែជាកន្លែងសម្រាប់សម្តែងសិល្បៈប៉ុណ្ណោះ។ តាមពិតទៅ រោងមហោស្រពនេះគឺជាកន្លែងទាក់ទាញសម្រាប់អ្នកចូលចិត្តស្ថាបត្យកម្ម ការថតរូប តន្ត្រី និងសម្រាប់អ្នកចូលចិត្តសិក្សាប្រវត្តិសាស្ត្រ។

រោងមហោស្រពនេះមានទីតាំងស្ថិតនៅក្នុងទីធ្លាធំមួយ ដែលមានពិដានកំពស់រាប់សិបម៉ែត្រ បន្ទះឈើ ប្រសព្វគ្នាជាមួយនឹងព័ត៌មានលម្អិតតុបតែងលោហធាតុជាច្រើន។ ពីច្រករបៀងវែងៗ យ៉រដែលមើលពីលើសាលធំ រហូតដល់ជណ្តើរយន្តដ៏ប្រណិត ទាំងអស់ត្រូវបានតុបតែងយ៉ាងល្អឥតខ្ចោះ។ មិនត្រឹមតែមានសាលប្រជុំធំៗជាច្រើនសម្រាប់ការសម្តែងល្ខោនអូប៉េរ៉ា និងការប្រគុំតន្ត្រីប៉ុណ្ណោះទេ ប៉ុន្តែក៏មានភោជនីយដ្ឋាន ហាងកាហ្វេ ហាងតន្ត្រី វិចិត្រសាល និងសូម្បីតែសារមន្ទីរអំពីប្រវត្តិសាស្ត្រល្ខោនចិន និងពិភពលោកក៏មានផងដែរ៕

ប្រទេសថៃ ៖ ស្ថាប័នស្រាវជ្រាវ KKP Research បានចេញរបាយការណ៍មួយលើកឡើងអំពីឧបសគ្គនានាដែលឧស្សាហកម្មរថយន្តថៃត្រូវប្រឈមមុខ ដោយសារការវិនិយោគរបស់ចិនពុំផ្តល់លទ្ធផលល្អដល់ប្រទេសថៃទេ ។ របាយការណ៍នេះបញ្ជាក់ថា ការវិនិយោគរបស់ក្រុមហ៊ុនផលិតរថយន្តចិន នឹងធ្វើឱ្យប៉ះពាល់ដល់ឧស្សាហកម្មរថយន្តថៃក្នុងរយៈពេលវែង ហើយថៃនឹងពុំទទួលបានផលប្រយោជន៍ពីចិន ។

ស្ថាប័នស្រាវជ្រាវ KKP Research បានលើកឡើងនូវវិធានការចំនួន៦ចំណុច ដើម្បីឱ្យរដ្ឋាភិបាលថៃត្រៀមអនុវត្ត នៅពេលឧស្សាហកម្មរថយន្តថៃត្រូវប្រឈមមុខជាមួយឧបសគ្គ ៖

១-រដ្ឋាភិបាលថៃត្រូវយកចិត្តទុកដាក់លើបញ្ហាតម្លៃរថយន្ត ដោយសាររថយន្តអគ្គិសនីរបស់ ចិននឹងធ្វើឱ្យប៉ះពាល់ដល់ឧស្សាហកម្មផលិតរថយន្តថៃ ដោយសារក្រុមហ៊ុនចិនមានសមត្ថភាពផលិតរថយន្តអគ្គិសនីលើសលប់ ហើយចិនអាចលក់រថយន្តអគ្គិសនីក្នុងតម្លៃថោកជាងរថយន្តអគ្គិសនីរបស់ប្រទេសផ្សេង ។

២-រថយន្តអគ្គិសនីចិនមិនត្រឹមតែប៉ះពាល់ដល់ទីផ្សាររថយន្តឯកជនថៃប៉ុណ្ណោះទេ ប៉ុន្តែវានឹងប៉ះពាល់ដល់ទីផ្សាររថយន្តមួយបាំងកន្លះរបស់ថៃផងដែរ ដែលថៃឧស្សាហកម្មរថយន្តថៃផ្អែកលើទីផ្សាររថយន្តមួយបាំងកន្លះ ។

កន្លងមក ប្រទេសចិនបាននាំចេញរថយន្តទៅក្រៅប្រទេស ក្នុងនោះរថយន្ត៧០% គឺជារថយន្តមួយបាំងកន្លះ ហើយរថយន្តមួយបាំងកន្លះរបស់ចិនអាចដណ្តើមចំណែកទីផ្សាររហូតដល់៨% ពីប្រទេសអូស្ត្រាលី ក្នុងរយៈពេលពី២ឆ្នាំ ទៅ៣ឆ្នាំ ។ ហេតុនេះ រថយន្តមួយបាំងកន្លះរបស់ថៃនឹងបាត់បង់ចំណែកទីផ្សារ ដូចរថយន្តអូស្ត្រាលីដែរ ។

៣-ក្រុមហ៊ុនរថយន្តចិនមកវិនិយោគផលិតរថយន្តនៅប្រទេសថៃ ពួកគេអាចមានគោលដៅប្រើប្រាស់ប្រទេសថៃសម្រាប់ធ្វើជាទីតាំងផលិតនាំចេញទៅក្រៅប្រទេស ច្រើនជាងការផលិតរថយន្តសម្រាប់លក់ក្នុងប្រទេសថៃ ។

៤-ផលប្រយោជន៍ផ្សេងៗដែលប្រទេសថៃនឹងទទួលបានពីការផលិតរថយន្តអគ្គិសនីរបស់ក្រុមហ៊ុនចិនអាចទាបជាងរថយន្តទូទៅ ដោយសារត្រូវពឹងផ្អែកលើការនាំចូលគ្រឿងបន្លាស់សំខាន់ៗពីក្រៅប្រទេស ។

៥-ស្ថាប័នស្រាវជ្រាវ KKP Research បានស្នើឱ្យរដ្ឋាភិបាលថៃយកចិត្តទុកដាក់លើការអភិវឌ្ឍសក្តានុពលបច្ចេកវិទ្យារបស់ក្រុមហ៊ុនផលិតរថយន្តថៃ និងត្រួតពិនិត្យវិធានការគាំទ្ររថយន្តអគ្គិសនី ដើម្បីកុំឱ្យប៉ះពាល់ដល់ទីផ្សាររថយន្តថៃ ។

៦-ការវិនិយោគរបស់ក្រុមហ៊ុនផលិតរថយន្តចិននៅប្រទេសថៃ នឹងធ្វើឱ្យរោងចក្រផលិតរថយន្តក្នុងស្រុកបិទទ្វារជាបន្តបន្ទាប់ ប្រសិនបើរដ្ឋាភិបាលថៃគ្មានវិធានការដោះស្រាយជាមួយការវិនិយោគរបស់ចិនទេនោះ ។ ជាក់ស្តែង រថយន្តជប៉ុនបានបាត់បង់ចំណែកទីផ្សារ រហូតដល់ជាង១០% ក្នុងរយៈពេលត្រឹមតែ១ឆ្នាំប៉ុណ្ណោះ ហើយថៃនឹងបាត់បង់ចំណែកទីផ្សារដូចគ្នាដែរ ៕