ភ្នំជីសូរ ដែលកម្ពស់ ១៣០ម៉ែត្រ ជាភ្នំធម្មជាតិនិងជាទីតាំងប្រវតិ្តសាស្រ្តខ្មែរមួយកន្លែង ស្ថិតក្នុងភូមិស្លាឃុំរវៀង ស្រុកសំរោង ខេត្តតាកែវ។ ខណៈដែលនៅលើភ្នំនេះ មានប្រាសាទដ៏ល្អឯកមួយត្រូវបានសាងសង់តាំងពីមុនប្រាសាទអង្គរវត្តទៀត ដែលគេហៅថា «ប្រាសាទភ្នំជីសូរ» ស្ថាបនាឡើងនាដើមសតវត្សទី១១ ដោយព្រះបាទសូរ្យវរ្ម័នទី១ ព្រះបាទធរណិន្ទ្រវរ្ម័ន និងព្រះបាទសូរ្យវរ្ម័នទី២ ដើម្បីឧទ្ទិសថ្វាយព្រះសិវៈ ក្នុងព្រាហ្មណ៍សាសនា។
ប្រាសាទភ្នំជីសូរ ត្រូវបានគេកំណត់អត្តសញ្ញាណថាជាកេរ្តិ៍មរតកខ្មែរដ៏មានតម្លៃ ដែលគេជឿជាក់ថា ប្រាសាទនេះគឺជាទីតាំងប្រវត្តិសាស្រ្តខ្មែរបុរាណ ព្រោះបានបន្សល់ទុកនូវរយៈសិលាចារឹកមួយចំនួននៅទីនោះ។
តាមការសិក្សាស្រាវជ្រាវតាមសាលាចារឹកនានា «ភ្នំជីសូរ្យ» គឺមានឈ្មោះបុរាណថា «ស្រីសូរ្យបព៌ត ឬ សូរ្យបព៌ត» ដែលមានន័យថា ភ្នំរបស់ព្រះបាទសូរ្យវរ្ម័នទី១។ ខណៈដែលសាលាចារឹកមួយក្នុងចំណាមសាលាចារឹកផ្សេងទៀតលើភ្នំនេះគឺសរសេររៀបរាប់ពីការថ្វាយគ្រឿងសក្ការៈបូជានានា ចំពោះអាទិទេពនៅលើភ្នំជីសូរនេះ។
តាមឯកសារផ្សេងទៀត ខ្នងភ្នំនេះមានឈ្មោះយោគេន្ទ្រាល័យ ឯទីតាំងភូមិស្រុកព័ទ្ធជុំវិញមានឈ្មោះថាយោគេន្ទ្រាបុរៈ ក្រោយមកបានក្លាយឈ្មោះ បារមីសូរ ។ ខណៈប្រជាពលរដ្ឋ សម័យនោះគោរពកោតខ្លាចអំណាចព្រះឥសូរកាន់តែច្រើនឡើងៗ ក៏ក្លាយទៅជា “ជីសូរៗ” រហូតមក ។
ប្រាសាទភ្នំជីសូរបែរមុខទៅទិសខាងកើត មានថែវព័ទ្ធជុំវិញ សាងឡើងដោយថ្មបាយក្រៀមបន្តុបពីលើគ្នា ។ នៅក្នុងថែវគឺមានតួប៉មកណ្តាលមួយ, បណ្ណាល័យ២, តួប៉ម៤ដែលព័ទ្ធជុំវិញតួប៉មកណ្តាល ។ ខណៈតួប៉មនីមួយៗសុទ្ធតែមានការតុបតែង យ៉ាងល្អប្រណីតឆ្លាក់ជារឿងរ៉ាវផ្សេងៗនៅលើផ្តែរទ្វារ, លើសសរពេជ្រ, លើហោជាង, លើសសរផ្អោប ។ រឿងរ៉ាវទាំងអស់ច្រើនឆ្លាក់ទាក់ទងទៅនឹងព្រះឥសូរ និងព្រះវិស្ណុ ។ ក្រៅពីនោះនៅក្នុងតួប្រាសាទមានតម្កល់ លិង្គព្រះឥសូរនិងយោនីព្រះនាងឱមា, ក្បាល “មករ”, “ទ្វារបាល” ដែលសម្រាប់ការគោរពបូជារបស់មនុស្ស នៅក្នុងសម័យមុន ។
ក្រៅពីប្រាសាទភ្នំជីសូរ ក៏នៅមានកូនប្រាសាទល្បីៗចំនួន២ទៀតស្ថិតនៅក្បែរគ្នានោះ ដែលប្រាសាទមួយគឺមានឈ្មោះថា គោបុរៈទី២ ឬប្រាសាទសែនធ្មល់។ គោបុរៈទី២នេះត្រូវបានគេជឿថាជាកន្លែងតម្កល់ព្រះគោ ដែលគោគឺជាយានជំនិះរបស់ព្រះឥសូរនេះឯង ។ ហើយក៏នៅមានកូនប្រាសាទមួយទៀត គឺគោបុរៈទី១ ឬ សែនភូវាំង និងមានទន្លេមួយទៀតដែលគេហៅថា ទន្លេអុំ សម្រាប់មហាក្សត្រយាងទៅអុំទូកកម្សាន្ត និងប្រណាំងទូកកាលពីជំនាន់មុន។ ចំណេរកាលក្រោយមក ក្នុងឆ្នាំ ១៩៦០ គេក៏បានកសាងវិហារមួយទៀត សង់លើខឿនប្រាសាទ សម្រាប់គោរពបូជាផ្សេងៗផងដែរ៕