រូបសំណាកសេះសមុទ្របាញ់ទឹក បានលេចរូបរាងជាផ្លូវការហើយនៅខេត្តកំពត ដែលបាននឹងកំពុងអង្រួនអារម្មណ៍ភ្ញៀវទេសចរ ចង់ទៅកម្សាន្ត និងថតរូប ស្រូបយកខ្យល់អាកាសបរិសុទ្ធ។
ពលរដ្ឋភាគច្រើន ប្រហែលជាស្គាល់ អំពីរូបរាងសេះសមុទ្រ ក៏ប៉ុន្តែប្រហែលជាមិនដឹងពីការពិតមួយចំនួនរបស់សត្វប្រភេទនេះនៅឡើយនោះទេ។
សេះសមុទ្រ (ប្រជានេសាទខ្លះហៅថាត្រីសេះ) ជាប្រភេទត្រីសមុទ្រម្យ៉ាង ដែលមានរូបរាងចម្លែកដូចជាសេះ ហើយហែលបញ្ឈរ ខុសពីប្រភេទត្រីទូទៅ ខណៈត្រីឈ្មោលជាអ្នកពពោះ។
ត្រីនេះ មានទំហំចាប់ពី៦ ទៅ ៣៥សង់ទីម៉ែត្រ និងទម្ងន់ប្រហែល៥០០ក្រាម ពេលពេញវ័យ ហើយវាអាចរស់បានចាប់ពី១ឆ្នាំ រហូតដល់៥ឆ្នាំ តាមប្រភេទតូច និងធំ ខណៈសេះសមុទ្រជាប្រភេទមំសាសីសត្វ ដែលស៊ីសត្វល្អិតដែលរស់នៅក្នុងសមុទ្រជាអាហារ ដូចជាកូនបង្គា។
សេះសមុទ្រនេះ អាចបន្តពូជនៅអាយុចាប់ពីប្រមាណ៧ខែឡើងទៅ ហើយការបន្តពូពុំមានរដូវនោះទេ ខណៈពេលចាប់ផ្តើមបន្តពូជ គឺសេះសមុទ្រញីចាប់ផ្តើមមានពង វាក៏បានផ្ទេរពងទាំងនោះទៅសេះសមុទ្រឈ្មោល ដើម្បីឱ្យសេះសមុទ្រឈ្មោលពពោះបន្ត រហូតដល់កើតជាកូន ហើយបញ្ចេញកូនចេញមកក្រៅ ដែលកូនម្តងៗគឺចន្លោះពី៥០ ទៅ១០០កូន ប៉ុន្តែកូនដែលអាចរីកលូតលាស់រហូតដល់ពេញវ័យគឺមានចំនួនតិចមែនទែន ព្រោះតែវាត្រូវប្រឈមនឹងគ្រោះថ្នាក់នៃប្រភេទត្រីផ្សេងៗដែលស៊ីកូនៗរបស់ពួកវាជាអាហារ។
គួរបញ្ជាក់ផងដែរថា នៅក្នុងរបាយការណ៍កាលពីឆ្នាំ២០២០ នៅដែនសមុទ្រកម្ពុជា សេះសមុទ្រមានប្រហែល ៧ទៅ៨ប្រភេទ៕