បច្ចុប្បន្ននេះ ដោយសង្កេតឃើញកំណើនជនរង.គ្រោះដោយសារតែការវិនិយោគទទួលបានប្រាក់ចំណេញនៅក្នុងប្រទេសកម្ពុជាបាននឹងកំពុងកើនឡើងជាលំដាប់ មិនថាជាការវិនិយោគដោយផ្ទាល់និងតាមប្រព័ន្ធអនឡាញនោះទេ។ ស្របពេលសេដ្ឋកិច្ចពិភពលោកនូវតែបន្តធ្លាក់ដុន.ដាប វាក៏បានក្លាយទៅជាទុក្ខ.លំបាកទ្វេដងទៅកាន់ប្រជាពលរដ្ឋដែលជាជនរង.គ្រោះ។ ដោយជ្រោលជ្រាបអំពីបញ្ហានេះ ទេសាភិបាលធនាគារជាតិនៃកម្ពុជា ក៏បានធ្វើការលើកឡើងពីគន្លឹះនៃការឆបោក និងជាការក្រើនរំលឹកទៅកាន់សាធារណៈជនទូទៅ។

គំរូនៃការឆបោកមួយតាមប្រព័ន្ធអនឡាញមានសណ្ឋានដូចតទៅ៖ «នេះជាប្រព័ន្ធដែលវាដំណើរការ៖ កិច្ចសន្យាដែលត្រូវបានប្រតិបត្តិគឺ * 3 HOURS * ដែលដើមទុននិងប្រាក់ចំណេញត្រូវបានត្រឡប់មកវិញជាមួយគ្នា… ឧទាហរណ៍ចូលរួម USD 250 ថ្ងៃនេះសូមរងចាំ 3 ម៉ោងដើម្បីរំលាយ / បញ្ចប់កិច្ចសន្យា។ ប៉ាន់ស្មានប្រសិនបើអ្នក ចូលរួម USD 250 អ្នកនឹងទទួលបាន USD 3,000 = សរុបនេះរួមបញ្ចូលដើមទុននិងប្រាក់ចំណេញ»។

ចំណែកគំរូនៃការឆបោកមួយទៀតតាមប្រព័ន្ធអនឡាញគឺ៖
-«ឧទាហរណ៍នៃការវិនិយោគ: ប្រសិនបើអ្នកវិនិយោគ ១០០០ដុល្លារ ថ្ងៃនេះ ក្នុងរយៈពេល ៣ ម៉ោង ប្រាក់នឹងចូលក្នុងគណនីរបស់អ្នកមានតម្លៃ ៧៥០០ដុល្លារ
-ឧទាហរណ៍នៃការចែករំលែកប្រាក់ចំណេញ: ដើមទុន ១០០០ដុល្លារ លទ្ធផលគឺ ៧៥០០ដុល្លារ ប្រាក់ចំណូល ៧៥០០ដុល្លារ ចែកនឹង ៣០% និង ៧០% (មានន័យថាក្រុមហ៊ុន ៣០% = ២២៥០ ដុល្លារ, វិនិយោគិន ៧០% = ៥២៥០ ដុល្លារ, ធានាចំណេញ ៩៩% និងខាត ១% ប៉ុណ្ណោះ)
ឆាប់ឡើង!!! វិនិយោគរួមគ្នា មើលអត្ថប្រយោជន៍សម្រាប់ខ្លួនអ្នក ចាប់អារម្មណ៍ចូលរួម ជជែកជាមួយអ្នកគ្រប់គ្រង»។

ជាមួយគ្នានេះ បើយោងតាមការបង្ហោះនៅលើគណនីផ្លូវការរបស់លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា កាលពីថ្ងៃទី២៣ ខែឧសភា ឆ្នាំ២០២៤ នេះបានឲ្យភ្ជាប់មកជាមួយនឹងរូបភាពប៉ុន្មានសន្លឹក អមជាមួយនឹងសារដាស់តឿនទៅកាន់ប្រជាពលរដ្ឋខ្មែរ ដែលមានខ្លឹមសារថា៖ «វិនិយោគ១០០០ដុល្លារ បានមកវិញ ៧៥០០ដុល្លារ ។ ធានាចំណេញ ៩៩% ។ នេះជាការផ្សព្វផ្សាយបោកប្រាស់ តាម គ្រុប តេលេក្រាម telegram ។ សូមបងប្អូនប្រុងប្រយ័ត្ន មុននឹងជឿគេ។ បើងាយៗយ៉ាងនេះ លែងមានអ្នកធ្វើការ រកស៊ីអីទៀតហើយ។ ពួកគេប្រមូលរូប បង់លុយតាមប្រព័ន្ធធនាគារ ដើម្បីជានុយឲ្យឃើញថាមានគេវិនិយោគជាមួយពួកគេ។ តែបើពិនិត្យឲ្យច្បាស់អ្នកទទួលប្រាក់នីមួយៗមានឈ្មោះខុសៗគ្នាទាំងអស់។ បានន័យថាលុយមិនចូលក្រុមហ៊ុនបោកប្រាស់នោះទេ គឺគ្រាន់តែលួចរូបគេមកប្រើ ដោយពេលខ្លះម្ចាស់ខ្លួនមិនទាំងដឹងខ្លួនផង»៕

ប្រទេសចិន ៖ កាលពីឆ្នាំ២០២២ រដ្ឋាភិបាលចិនបានប្រកាសឱ្យបង្កើតសាកលវិទ្យាល័យជាតិសម្រាប់ពលរដ្ឋអាយុច្រើន ហើយការប្រកាសនេះធ្វើឱ្យអ្នកជំនាញជឿថា រដ្ឋាភិបាលមានគោលបំណងដោះស្រាយបញ្ហាកំណើនពលរដ្ឋវ័យចំណាស់ និងផ្តល់ការបណ្តុះបណ្តាលចំណេះដឹងអស់មួយជីវិតដល់ពួកគេ ។ ការមករៀននៅសាកលវិទ្យាល័យធ្វើឱ្យពលរដ្ឋចាស់ៗមានឱកាសបានរៀនសូត្រនូវជំនាញផ្សេងៗដែលពួកគេធ្លាប់បាត់បង់ឱកាស និងមានកម្លាំងចិត្តតស៊ូក្នុងជីវិតបន្តទៀត ។

សាកលវិទ្យាល័យមនុស្សចាស់នឹងរួមបញ្ចូលជាមួយសាកលវិទ្យាល័យទូទៅនៅប្រទេសចិន ហើយមិនត្រឹមតែជាស្ថាប័នអប់រំប៉ុណ្ណោះទេ ប៉ុន្តែជាប្រព័ន្ធការសិក្សាផ្តល់ចំណេះដឹងគ្រប់ផ្នែកទាំងនៅទីក្រុង និងជនបទផងដែរ ។ សាកលវិទ្យាល័យមនុស្សចាស់នឹងទទួលនិស្សិតចាប់ពីអាយុ៦០ឆ្នាំឡើងទៅ ដោយបង្រៀនមុខវិជ្ជាផ្សេងៗ ដូចជា ៖ ជំនាញកុំព្យូទ័រ, តន្ត្រី, ការរាំ, ការថតរូប, ការគូរគំនូរ, កីឡា, ការចម្អិនអាហារ រហូតដល់ការងារសិប្បកម្ម និងជំនាញផ្សេងៗ ។

លោកតាស៊ុន និយាយថា ៖ «អាយុកើនឡើងមិនគួរឱ្យខ្លាចទេ ប៉ុន្តែអ្វីដែលគួរឱ្យខ្លាចនោះ គឺការយល់ព្រមចុះចាញ់ក្នុងជីវិត, ឈប់ដើរទៅមុខ និងបាត់បង់ក្តីសង្ឃឹម» ។ លោកតាបានលើកទឹកចិត្តឱ្យពលរដ្ឋវ័យចំណាស់ផ្សេងទៀតមកចុះឈ្មោះចូលរៀននៅសាកលវិទ្យាល័យ ដើម្បីចូលរួមសកម្មភាពក្នុងសង្គមឱ្យបានច្រើន ។

លោកយាយ ស៊ីន ជៀនឡុង អាយុ៦៥ឆ្នាំ បានសិក្សានៅសាកលវិទ្យាល័យមនុស្សចាស់នៅទីក្រុងអាន់ស៊ីវ ដែលសាកលវិទ្យាល័យនេះបើកតាំងពីឆ្នាំ២០០៤ និយាយថា ៖ «ជីវិតក្រោយពេលចូលនិវត្តន៍របស់ខ្ញុំស្រស់ថ្លាណាស់ ដោយសារខ្ញុំបានមកចូលរៀននៅសាកលវិទ្យាល័យមនុស្សចាស់នេះ» ។

លោកយាយមិនព្រមនៅផ្ទះមើលចៅទេ ហើយលោកយាយបានមករៀនរាំ និងច្រៀងចម្រៀងនៅសាកលវិទ្យាល័យមនុស្សចាស់ ដោយលោកយាយប្រាប់ក្រុមគ្រួសារថា គាត់ចង់ស្វែងរកអ្វីដែលចូលចិត្ត ។ បើទោះជាចូលចិត្តការងារសិល្បៈតាំងពីក្មេងក្តី ប៉ុន្តែលោកយាយគ្មានឱកាសបានរៀនផ្នែកនេះទេ ហើយពេលសាកលវិទ្យាល័យមនុស្សចាស់ដំណើរការ ក៏ក្លាយជាឱកាសរបស់គាត់បានរៀនផ្នែកសិល្បៈដែលខ្លួនស្រមៃយូរមកហើយ ។ បច្ចុប្បន្ន លោកយាយជានិស្សិតគោរពវិន័យមកដល់ថ្នាក់មុនគេ និងត្រឡប់ទៅផ្ទះចុងក្រោយគេជានិច្ច ។

បើតាមទិន្នន័យរបស់ការិយាល័យស្ថិតិជាតិបញ្ជាក់ថា នៅឆ្នាំ២០២១ ប្រទេសចិនមានពលរដ្ឋអាយុចាប់ពី៦០ឆ្នាំឡើងទៅ ស្មើជាង២៦៧លាននាក់ ឬស្មើនឹង១៨,៩% នៃពលរដ្ឋសរុប ។ គណៈកម្មការសុខភាពចិនរំពឹងថា ប្រទេសចិននឹងឈានចូលសង្គមមនុស្សចាស់នៅឆ្នាំ២០២៤ និងក្លាយជាសង្គមមនុស្សចាស់ទាំងស្រុងនៅឆ្នាំ២០៣៥ ។

អ្នកជំនាញជឿជាក់ថា ការបង្កើតសាកលវិទ្យាល័យមនុស្សចាស់ គឺជាការដោះស្រាយបញ្ហាកំណើនពលរដ្ឋអាយុច្រើននៅប្រទេសចិន ដោយមនុស្សចាស់នឹងអាចរៀនសូត្រមុខវិជ្ជាផ្សេងៗដោយរីករាយ ព្រមទាំងអភិវឌ្ឍន៍ជំនាញ ឬអាជីពផងដែរ ។

ទោះយ៉ាងណា នេះមិនមែនជាលើកទី១ទេ ដែលចិនបានព្យាយាមបង្កើតសាកលវិទ្យាល័យមនុស្សចាស់ ព្រោះកន្លងមក សាកលវិទ្យាល័យនៅតាមទីក្រុងផ្សេងៗរបស់ចិន ក៏បានបង្រៀនមុខវិជ្ជាសម្រាប់មនុស្សចាស់ផងដែរ ។ ប្រទេសចិនមានសាកលវិទ្យាល័យមនុស្សចាស់ ស្មើជាង៧៦.០០០កន្លែងនៅទូទាំងប្រទេស និងមាននិស្សិតចុះឈ្មោះចូលរៀនស្មើជាង១៤លាននាក់ ៕

Flying Dutchman គឺជាកប៉ាល់ខ្មោច ឬកប៉ាល់បិសាច ដែលត្រូវបានសារព័ត៌មានជាច្រើនចុះផ្សាយនៅលើពិភពលោក ។ គេបាននិយាយពីកប៉ាល់នេះជាលើកដំបូង កាលពីចុងឆ្នាំ១៧០០ ក្នុងសៀវភៅមួយឈ្មោះ Voyage និងទទួលបានការគាំទ្រយ៉ាងច្រើននាសម័យនោះ ហើយចាប់ពីពេលនោះមក រឿងរ៉ាវរបស់កប៉ាល់ខ្មោច ក៏បានផ្សព្វផ្សាយពាសពេញពិភពលោក ។

គេជឿថា កប៉ាល់ខ្មោច «Flying Dutchman» គឺជាកប៉ាល់មួយដែលបើកទៅមកនៅលើផ្ទៃទឹកគ្មានថ្ងៃបញ្ចប់ ឬបើករហូតដល់ពិភពលោករលាយ ។ កប៉ាល់ខ្មោចនឹងបង្ហាញឱ្យមនុស្សម្នាបានឃើញជាញឹកញាប់នៅតំបន់ Cape of Good Hope ។ អ្នកបានឃើញកប៉ាល់នេះនិយាយថា នឹងមានពន្លឺភ្លើងគួរឱ្យខ្មោចចេញពីកប៉ាល់ ហើយនៅលើកប៉ាល់មានអ្នកបើកកប៉ាល់ម្នាក់ស្លៀកពាក់បុរាណនៅឈរបញ្ជាកប៉ាល់ ព្រមទាំងស្រែកខ្លាំងៗគួរឱ្យព្រឺសម្បុរ ។

ចំណែករឿងតំណាលរបស់កប៉ាល់ដ៏អាថ៌កំបាំងនេះ គឺកាលពីសតវត្សរ៍ទី១៧ កប៉ាល់ Flying Dutchman ជាកម្មសិទ្ធិរបស់ក្រុមហ៊ុនឈ្មោះ Dutch East India ។ កប៉ាល់នេះបានដឹកទំនិញផ្សេងៗ និងមានអ្នកបើកកប៉ាល់ឈ្មោះ Van Der Decken ដែលគេប្រាប់ថា លោកជាមនុស្សមានចិត្តឃោរឃៅ និងមិនគោរពសាសនា ឬគោរពទេវតាណាទាំងអស់ ។

នៅឆ្នាំ១៦៨០ លោក Van Der Decken បានបើកកប៉ាល់ Flying Dutchman ព្រមទាំងកម្មករមួយចំនួនទៀតដែលធ្វើការក្នុងកប៉ាល់ ធ្វើដំណើរសំដៅទៅទិសខាងកើត ប៉ុន្តែក្នុងអំឡុងពេលលោកកំពុងបើកកប៉ាល់ត្រឡប់ទៅប្រទេសហូឡង់ ស្រាប់តែមានខ្យល់ព្យុះបោកបក់យ៉ាងខ្លាំង ។

ហេតុនេះ លោក Van Der Decken បានព្យាយាមបើកកប៉ាល់តស៊ូជាមួយខ្យល់ព្យុះដ៏ខ្លាំងក្លានេះអស់រយៈពេលជាច្រើនម៉ោង រហូតដល់ខ្យល់ព្យុះបានបក់កប៉ាល់របស់លោកចេញពីខ្សែទឹក ។ បន្ទាប់មក កប៉ាល់នេះក៏ជ្រុលទៅបុកដុំថ្ម ទើបធ្វើឱ្យលោក Van Der Decken ជាអ្នកបើកកប៉ាល់ និងកម្មកររួមដំណើរទាំងអស់ធ្លាក់ក្នុងមហាសមុទ្រ និងស្លាប់ទាំងអស់ ។

គេជឿថា ខ្យល់ព្យុះនេះគឺបណ្តាលមកពីទេវតាដាក់ទោសលោក Van Der Decken ព្រោះតែលោកមិនគោរពសាសនា និងគ្មានចិត្តមេត្តា ។ ក្នុងអំឡុងពេលលោកកំពុងតស៊ូជាមួយខ្យល់ព្យុះនោះ លោកបានស្រែកខ្លាំងៗថា ៖ «I will round this Cape even if I have to keep sailing until doomsday!» មានន័យថា ៖ «ខ្ញុំនឹងវឹលវល់នៅបរិវេណនេះ រហូតដល់ពិភពលោករលាយ» ។

បើទោះជាបច្ចុប្បន្ន ពេលវេលាបានកន្លងផុតទៅអស់ជាង៣០០ឆ្នាំក៏ដោយ ក៏រឿងរ៉ាវរបស់កប៉ាល់ខ្មោច «Flying Dutchman» ត្រូវបានគេលើកយកមកនិយាយបន្តគ្នា និងយកទៅផលិតជាខ្សែភាពយន្ត ៕