បរទេស៖ ចាប់តាំងពីដើមខែមករានៃឆ្នាំ ២០២៤ មកឧស្សាហកម្មអាកាសចរណ៍ជប៉ុនបានជួបប្រទះនឹងការប៉ះទង្គិចគ្នាជាច្រើនដងនៅព្រលានយន្តហោះ ដោយឧប្បត្តិហេតុដ៏ធ្ងន់ធ្ងរបំផុតនោះបានកើតឡើងនៅអាកាសយានដ្ឋាន Haneda កាលពីថ្ងៃទី ២ ខែមករា នៅពេលដែលយន្តហោះដឹកអ្នកដំណើររបស់ Japan Airlines និងយន្តហោះឆ្មាំឆ្នេរសមុទ្របានបុកគ្នា បណ្តាលឱ្យមនុស្ស ៥ នាក់ស្លា.ប់និងជាច្រើននាក់ទៀតរងរបួស។ បន្ទាប់មកកាលពីខែកុម្ភៈកន្លងទៅនេះ ក៏មានយន្តហោះដឹកអ្នកដំណើរ All Nippon Airways ពីរគ្រឿងបានបុកគ្នានៅអាកាសយានដ្ឋាន Itami នៃទីក្រុង Osaka ប្រទេសជប៉ុនផងដែរ។

ទោះជាយ៉ាងណាបើយោងតាម The Straits Times កាលពីថ្ងៃទី២៣ ខែឧសភាថ្មីៗនេះ ក៏មានឧប្បត្តិហេតុមួយកើតឡើង រវាងយន្តហោះដឹកអ្នកដំណើរពីររបស់ Japan Airlines បានបុកគ្នា នៅអាកាសយានដ្ឋាន Haneda ក្នុងទីក្រុងតូក្យូ ដែលបណ្តាលឱ្យយន្តហោះទាំងពីរគ្រឿងនេះរងការខូចខាតយ៉ាងធ្ងន់ធ្ងរ។ ហេតុការណ៍នេះបានកើតឡើងកាលពីវេលាម៉ោង ៧ និង ៣០ នាទីព្រឹកនាថ្ងៃទី ២៣ ឧសភា នៅផ្លូវរត់លេខ ១ នៃអាកាសយានដ្ឋានអន្តរជាតិ Haneda ក្នុងទីក្រុងតូក្យូ ។

យោងតាម NHK World Japan នៅពេលដែលជើងហោះហើរលេខ ៥០៣ របស់ Japan Airlines ផ្ទុកមនុស្ស ៣២៨ នាក់រៀបចេញដំណើរទៅកាន់អាកាសយានដ្ឋាន New Chitose ក្នុងទីក្រុង Hokkaido ស្រាប់តែភ្លាមនោះក៏បានបុកជាមួយយន្តហោះរបស់ក្រុមហ៊ុនអាកាសចរណ៍ដូចគ្នាដែលកំពុងចូលចតនៅចំណតក្បែរនោះ។ ការបុកគ្នានេះបានបណ្តាលឱ្យយន្តហោះទាំងពីររងការខូចខាត ប៉ុន្តែសំណាងល្អមិនមានមនុស្សរងរបួសឡើយ។ បន្ទាប់ពីការប៉ះទង្គិចគ្នានេះ ជើងហោះហើរ Japan Airlines ៥០៣ ត្រូវបានលុបចោល។

ខណៈយន្តហោះដែលនៅសេសសល់ទៀតមិនបានដឹកអ្នកដំណើរទេ។ បច្ចុប្បន្នក្រុមហ៊ុនអាកាសចរណ៍ Japan Airlines កំពុងសម្របសម្រួលជាមួយអាជ្ញាធរមូលដ្ឋាន ដើម្បីស៊ើបអង្កេតករណីនេះឱ្យបានលម្អិត។ ក្រុមហ៊ុនអាកាសចរណ៍ Japan Airlines បានសុំទោសចំពោះភាពរអាក់រអួលដែលបានកើតឡើងជាញឹកញាប់ចំពោះអតិថិជន៕

ប្រទេសហ្វីលីពីន ៖ យោងតាមទិន្នន័យផ្លូវការរបស់ប្រទេសហ្វីលីពីនបង្ហាញថា ពលរដ្ឋហ្វីលីពីនបានឆ្លងជំងឺអេដស៍ក្នុង១ថ្ងៃៗស្មើរហូតដល់៥៥នាក់ ហើយភាគច្រើនជាយុវវ័យ ដែលគេចាត់ទុកថា ជាចំនួនខ្ពស់បំផុតក្នុងពិភពលោក ។ ហេតុនេះ ក្រសួងសុខាភិបាលហ្វីលីពីនបានសហការយ៉ាងជិតស្និទ្ធជាមួយក្រសួងអប់រំ ដើម្បីបណ្តុះបណ្តាលឱ្យនិស្សិតឈ្វេងយល់ពីគ្រោះថ្នាក់នៃជំងឺនេះ និងវិធីការពារខ្លួន ។

សារព័ត៌មានស៊ីនហួរបានរាយការណ៍ពីទីក្រុងម៉ានីល ប្រទេសហ្វីលីពីន នៅថ្ងៃទី២៤ ខែឧសភា ឆ្នាំ២០២៤ ថា លោក Teodoro Herbosa រដ្ឋមន្ត្រីក្រសួងសុខាភិបាលហ្វីលីពីនលើកឡើងថា បច្ចុប្បន្ន មានអ្នកឆ្លងជំងឺអេដស៍ (HIV) កើនឡើងយ៉ាងហោចណាស់ ស្មើនឹង៥៥នាក់ក្នុង១ថ្ងៃ ។ នេះចាត់ទុកថា ជាចំនួនខ្ពស់មួយនៅលើពិភពលោក ហើយអ្នកឆ្លងជំងឺនេះច្រើនបំផុត គឺក្រុមយុវវ័យដែលមានអាយុតិចបំផុត គឺ១៥ឆ្នាំ ។

បើទោះជាក្រសួងសុខាភិបាលប៉ាន់ស្មានចំនួនអ្នកឆ្លងជំងឺអេដស៍នៅហ្វីលីពីនថា ស្មើត្រឹមតែ១៣ម៉ឺននាក់នាពេលបច្ចុប្បន្នក្តី គឺចាត់ទុកថាតិចខ្លាំង បើប្រៀបធៀបជាមួយចំនួនពលរដ្ឋហ្វីលីពីន ដែលស្មើរហូតដល់១១០លាននាក់ ។ ប៉ុន្តែចំនួនអ្នកឆ្លងជំងឺអេដស៍ខ្ពស់បែបនេះ គួរឱ្យព្រួយបារម្ភយ៉ាងខ្លាំងសម្រាប់រដ្ឋាភិបាល ។

លោក Teodoro Herbosa រដ្ឋមន្ត្រីក្រសួងសុខាភិបាលសង្កត់ធ្ងន់ថា ត្រូវតែបង្កើនការត្រួតពិនិត្យជំងឺអេដស៍លើក្រុមយុវវ័យ ហើយក្រសួងសុខាភិបាលនឹងទំនាក់ទំនងយ៉ាងជិតស្និទ្ធជាមួយក្រសួងអប់រំ ដើម្បីផ្តល់ទិន្នន័យត្រឹមត្រូវពាក់ព័ន្ធនឹងជំងឺអេដស៍ និងអប់រំយុវវ័យឱ្យចេះវិធីការពារខ្លួន ។

បើតាមស្ថិតិផ្លូវការរបស់ក្រសួងសុខាភិបាលបញ្ជាក់ថា ចំនួនអ្នកឆ្លងជំងឺអេដស៍បានកើនឡើងជារៀងរាល់ខែ គឺកើនឡើងជាមធ្យមពីចំនួន១.០២៧នាក់ក្នុង១ខែ នៅឆ្នាំ២០២១ មកស្មើនឹង១.២៤៥នាក់ក្នុង១ខែ នៅឆ្នាំ២០២២ ។ ចំនួននេះបានកើនឡើងរហូតដល់១.៤៣៨នាក់ក្នុង១ខែកាលពីត្រីមាសទី៤ ឆ្នាំ២០២៣ (ឬចាប់ពីខែតុលា ដល់ខែធ្នូ ឆ្នាំ២០២៣) ។

គួរបញ្ជាក់ថា ចាប់តាំងពីមានការប្រកាសពីពលរដ្ឋឆ្លងជំងឺអេដស៍ដំបូងគេក្នុងប្រទេសហ្វីលីពីន កាលពីខែមករា ឆ្នាំ១៩៨៤ រហូតដល់ខែធ្នូ ឆ្នាំ២០២៣ ហ្វីលីពីនមានពលរដ្ឋឆ្លងជំងឺអេដស៍ យ៉ាងហោចណាស់ស្មើនឹង១២៦.៣៧៨នាក់ និងមានពលរដ្ឋស្លាប់ដោយសារជំងឺនេះចំនួន៧.២៣៣នាក់ ៕

បរទេស៖ ស្ត្រីជនជាតិនេប៉ាល់អាយុ ៣០ ឆ្នាំម្នាក់ឈ្មោះ Phunjo Lama បានបំបែកកំណត់ត្រាពិភពលោកសម្រាប់ការឡើងដល់កំពូលភ្នំ Everest កម្ពស់ជាង ៨,៨០០ ម៉ែត្រ ក្នុងរយៈពេលត្រឹមតែ ១៤ ម៉ោង ៣១ នាទីប៉ុណ្ណោះ នេះបើយោងតាមការចុះផ្សាយរបស់ CBS News កាលពីពេលថ្មីៗនេះ។

ភ្នំ Everest ត្រូវបានគេស្គាល់ថាជាភ្នំខ្ពស់ជាងគេបំផុតលើលោក ដោយអ្នកឡើងភ្នំតែងតែចំណាយពេលជាច្រើនថ្ងៃដើម្បីយកឈ្នះលើគោលដៅនេះ ខណៈមានអ្នកខ្លះត្រូវឈប់មួយយប់នៅជំរុំផ្សេងៗដើម្បីសម្រាក និងសម្របខ្លួន។ ប៉ុន្តែសម្រាប់ Lama ដែលជាស្ត្រីតែម្នាក់គត់បានជំនះឡើងភ្នំដោយមិនឈប់សម្រាកទាល់តែសោះ ដោយនាងបានចំណាយពេលត្រឹមតែ ១៤ ម៉ោង ៣១ នាទីដើម្បីឡើងភ្នំ Everest កាលពីថ្ងៃទី២៣ ខែឧសភា ពោលគឺលើសពីកំណត់ត្រាដែលនាងបានកំណត់ក្នុងឆ្នាំ ២០១៨ គឺ ៣៩ ម៉ោង ៦ នាទីទៅទៀត ដែលនេះបានធ្វើឱ្យនាងក្លាយជាស្ត្រីដំបូងគេដែលបានបំបែកឯតទគ្គកម្មឡើងភ្នំ Everest លឿនបំផុតក្នុងពិភពលោក។

ប្រធានការិយាល័យវាលនៃក្រសួងទេសចរណ៍ក្នុងប្រទេសនេប៉ាល់ លោក Khim Lal Gautam បាននិយាយថា Lama បានទៅដល់កំពូលភ្នំ Everest នៅម៉ោង ៦:២៣ នាទីព្រឹកនៅថ្ងៃទី២៣ ខែឧសភា ឆ្នាំ២០២៤ ខណៈដែលនាងបានចេញដំណើរនៅម៉ោង ៣:៥២ រសៀលកាលថ្ងៃទី២២ ឧសភា។ អ្នកឡើងភ្នំម្នាក់បាននិយាយថាអំពីឡាម៉ាថា៖ «នាងពិតជាក្លាហាន និងពូកែតាំងចិត្ត ហ្វឹកហាត់យ៉ាងខ្លាំងដើម្បីឡើងដល់កំពូល»។ កំណត់ត្រារបស់ឡាម៉ាក៏ត្រូវបានចាត់ទុកថាជាការបំផុសគំនិតសម្រាប់អ្នកឡើងភ្នំស្រីនៅប្រទេសនេប៉ាល់ផងដែរ។

គួរបញ្ជាក់ដែរថា Lama បានឈ្នះកំណត់ត្រា Guinness សម្រាប់ “ស្ត្រីលឿនបំផុតលើពិភពលោកដើម្បីឡើងភ្នំ Everest” នៅក្នុងឆ្នាំ ២០១៨ ដែលកំណត់ត្រានេះក៏ត្រូវបានបំបែកនៅឆ្នាំ ២០២១ ដោយ Ada Tsang Yin hung មកពីទីក្រុងហុងកុង ប្រទេសចិន ដែល Ada បានចាកចេញពី Base Camp នៅម៉ោង ១:២០ ព្រឹក ថ្ងៃទី ២២ ខែឧសភា ឆ្នាំ ២០២១ ហើយបានយកឈ្នះភ្នំ Everest នៅថ្ងៃបន្ទាប់។ នៅឆ្នាំ ២០០៣ អ្នកឡើងភ្នំជនជាតិនេប៉ាល់ម្នាក់ឈ្មោះ Lhakpa Gelu Sherpa ក៏ធ្លាប់ទទួលបានកំណត់ត្រា Guinness ថាជាមនុស្សលឿនបំផុតដែលអាចយកឈ្នះលើភ្នំ Everest ផងដែរ។

មួយថ្ងៃមុនពេល Lama បង្កើតកំណត់ត្រាជាអ្នកឡើងភ្នំស្រីលឿនបំផុតដើម្បីយកឈ្នះលើភ្នំ Everest នៅលើពិភពលោក មគ្គុទ្ទេសក៍ភ្នំដ៏ល្បីល្បាញម្នាក់ទៀតគឺ Kami Rita ក៏បានបង្កើតឯតទគ្គកម្មឡើងភ្នំ Everest ច្រើនជាងគេបំផុតក្នុងពិភពលោកចំនួន ៣០ ដងផងដែរ៕

Ila de Quemada Grande គឺជាកោះមួយស្ថិតនៅប្រទេសប្រេស៊ីល និងនៅឆ្ងាយពីឆ្នេរសមុទ្រ Sao Paulo ប្រមាណ២៣គីឡូម៉ែត្រ ។ កោះនេះត្រូវបានគេដាក់ឈ្មោះថា កោះពស់ (Snake Island) មានន័យថា ជាកោះសម្បូរទៅដោយសត្វពស់មានពិសយ៉ាងច្រើនមហាសាល និងគ្រោះថ្នា.ក់ បំផុតនៅលើពិភពលោក ហើយបច្ចុប្បន្ន គ្មានមនុស្សណាម្នាក់ហ៊ានមកកាន់ទីនេះទេ ក្រៅពីអ្នកស្រាវជ្រាវ ។

អ្នកធ្វើដំណើរទៅកាន់កោះនេះនឹងបានឃើញការបិទស្លាកសរសេរថា «ហាមចូល» ប៉ុន្តែពុំមានភ្ញៀវទេសចរណាម្នាក់ចង់មកលេងនៅកោះនេះទេ ពីព្រោះវាជាកន្លែងសម្បូរទៅដោយពស់តូច-ធំ ហើយភាគច្រើនសុទ្ធតែមានពិសទាំងអស់ ។ កន្លងមក រដ្ឋាភិបាលប្រេស៊ីលបានអនុញ្ញាតឱ្យក្រុមអ្នកវិទ្យាសាស្ត្រមកសិក្សាស្រាវជ្រាវនៅលើកោះពស់ ។

នៅពេលដឹងថា កោះ Ila de Quemada Grande សម្បូរសុទ្ធតែពស់បែបនេះ គ្មានពលរដ្ឋប្រេស៊ីលណាម្នាក់ធ្វើដំណើរមកកាន់ទីនេះទេ ដោយពួកគេនិយាយថា បើទោះជាអាជ្ញាធរពុំបានបិទស្លាក «ហាមចូល» ក្តី ក៏ពួកគេពុំចូលដែរ ។ កោះនេះមានសត្វពស់រស់នៅច្រើនបំផុត និងស្មើជាង១.០០០ពូជដែលបានបង្កើតកូនចៅនៅទីនេះ ហើយក្នុងចំណោមពស់ទាំងនេះ មានពស់ជាច្រើនមានពិសខ្លាំង និងអាចផ្តាច់ជីវិតមនុស្សទៀតផង ។

បើតាមការបញ្ជាក់ពីអាជ្ញាធរប្រេស៊ីលឱ្យដឹងថា ពស់ពូជ Golden Bear Head គឺជាពូជកម្រមួយ ហើយពស់ប្រភេទនេះរស់នៅតែលើកោះ Ila de Quemada Grande មួយប៉ុណ្ណោះ គឺស្មើចាប់ពី២.០០០ក្បាល ទៅ៤.០០០ក្បាល ។ រីឯពិសរបស់វាវិញត្រូវបានគេស្គាល់ថា ជាពិសសាហាវបំផុតនៅលើពិភពលោក ។

កោះនេះសម្បូរពស់មានពិសេសយ៉ាងច្រើនមហាសាល ហើយគ្រាន់តែបរិវេណតូចមួយមានពស់រស់នៅរហូតដល់៥ក្បាល ។ ហេតុនេះ គ្រាន់តែឃើញឈ្មោះកោះធ្វើឱ្យពលរដ្ឋប្រេស៊ីល និងភ្ញៀវទេសចរបរទេសពុំហ៊ានធ្វើដំណើរមកកាន់ទីនេះទេ ។ មហាជនឆ្ងល់ថា តើពស់ទាំងនេះនាំគ្នាទៅប្រមូលផ្តុំនៅលើកោះដោយរបៀបណា? ហើយនៅលើកោះមានចំណីច្រើនសម្រាប់ឱ្យពួកវាស៊ីដែរឬទេ?

កាលពីមុន កោះ Ila de Quemada Grande ធ្លាប់មានផ្ទៃដីជាប់គ្នាជាមួយផ្ទៃដីធំ ប៉ុន្តែដោយសារកម្រិតទឹកកើនឡើងខ្ពស់ ទើបធ្វើឱ្យផ្ទៃដីកោះទាំងមូលត្រូវចែកដាច់ពីផ្ទៃដីធំ ។ រីឯអត្ថន័យរបស់ឈ្មោះកោះ Ila de Quemada Grande បានន័យថា ជាការរុះរើ និងការដុត ព្រោះគេបានព្យាយាមដុតសម្លាប់ពស់ទាំងអស់នៅលើកោះឱ្យផុតពូជ ប៉ុន្តែការព្យាយាមទទួលបរាជ័យ ។

ហេតុនេះ រដ្ឋាភិបាលប្រេស៊ីលបានសម្រេចចិត្តសាងសង់បង្គោលថ្មដ៏ធំមួយ ដើម្បីដាស់តឿនដល់នាវាតូច-ធំ កុំឱ្យបើកមកក្បែរកោះ ។ ប៉ុន្តែមានតែអ្នកជំនាញប៉ុណ្ណោះដែលទទួលការអនុញ្ញាតឱ្យធ្វើដំណើរមកកោះនេះ ដើម្បីស្រាវជ្រាវផ្នែកវិទ្យាសាស្ត្រ ៕

ប្រទេសកូរ៉េខាងត្បូង ៖ មនុស្សភាគច្រើនស្ត្រេសក្នុងការងារ ឬតានតឹងផ្លូវចិត្តខ្លាំងជាមួយបញ្ហាផ្សេងៗដែលចេះតែកើតឡើងក្នុងជីវិត រហូតដល់ពេលខ្លះ ពួកគេគ្មានវិធីដោះស្រាយទេ ។ ហេតុនេះ គុ.ក ក្លែងក្លាយត្រូវបានគេបង្កើតឡើងដើម្បីដោះស្រាយបញ្ហានេះ និងអាចជួយសម្រួលផ្លូវចិត្តផងដែរ បើទោះជាវិធីនេះប្លែកបន្តិច ប៉ុន្តែវាបានកើតឡើងរួចហើយនៅប្រទេសកូរ៉េខាងត្បូង ។

ប្រទេសកូរ៉េខាងត្បូងបានបង្កើតគុកក្លែងក្លាយមួយឈ្មោះថា «គុកសេរីភាព» ដែលអ្នកជាប់គុកនៅទីនេះនឹងទទួលបានការផ្តល់សេវាកម្មប្លែកៗ ហើយធានាថា ពេលចេញពីគុកវិញ ពួកគេនឹងអាចកាត់បន្ថយការតានតឹងផ្លូវចិត្តអស់ជាមិនខាន ថែមទាំងទទួលបានវិញ្ញាបនបត្រទៀតផង ។

គុកសេរីភាពនេះស្ថិតនៅទីក្រុង Hongcheon ដែលបង្កើតឡើងដើម្បីជួយសង្គ្រោះមនុស្សម្នាទាំងឡាយដែលកំពុងតែអស់សង្ឃឹមក្នុងជីវិត, ចុះចាញ់, ធុញទ្រាន់ និងអស់ថាមពលធ្វើការ ដើម្បីធ្វើឱ្យពួកគេមានអារម្មណ៍ស្ងប់ និងដោះស្រាយបញ្ហាក្នុងជីវិតឡើងវិញ ។

នៅផ្នែកខាងក្នុងគុកសេរីភាពនេះ គឺមានបន្ទប់ឃុំឃាំងសរុបចំនួន២៨បន្ទប់ ហើយបន្ទប់នីមួយៗមានទំហំតូចល្មម និងមានបន្ទប់ទឹកក្នុងនោះផងដែរ ។ ប៉ុន្តែបន្ទប់ឃុំឃាំងទាំងនេះគ្មានកញ្ចក់ និងគ្មាននាឡិកាទេ ។

ក្នុងបន្ទប់ឃុំឃាំងរបស់គុកសេរីភាព គឺមានលក្ខណៈដូចគ្នានឹងគុកពិតប្រាកដដែរ ដូចជា ៖ មានត្រឹមតែតុតូចមួយ, សៀវភៅសរសេរ, កាំសៀវឆុងទឹកតែ និងកម្រាលសម្រាប់សម្រាក ។ រីឯម្ហូបអាហារនៅក្នុងគុកនេះវិញ គឺសមរម្យ និងសាមញ្ញ ដូចជា ៖ ដំឡូងចំហុយ និងនំផ្លែចេក ។

បើទោះវាជាគុកក្លែងក្លាយក្តី ប៉ុន្តែអ្នកទោសនៅទីនេះត្រូវតែគោរពច្បាប់យ៉ាងតឹងរ៉ឹង គឺគ្រប់គ្នាត្រូវស្លៀកពាក់ឯកសណ្ឋានអ្នកទោសជានិច្ច ។ លើសពីនេះ ពួកគេគ្មានសិទ្ធិលេងទូរស័ព្ទដៃ និងហាមជជែកជាមួយអ្នកទោសផ្សេងទៀតដាច់ខាត ។ នេះអាចនិយាយបានថា បើបានជាប់គុកនៅទីនេះ អ្នកនឹងបានចំណាយពេលវេលាជាមួយខ្លួនឯងយ៉ាងពេញលេញបំផុត ។

នៅពេលដល់ថ្ងៃដោះលែងឱ្យចេញពីគុក អ្នកទោសគ្រប់រូបនឹងទទួលបានវិញ្ញាបនបត្រទុកដាស់តឿនសតិថា ពេលមួយ ពួកគេធ្លាប់បាននៅដាច់ដោយឡែកពីសង្គម ដែលសម្បូរទៅដោយភាពរញ៉េរញ៉ៃ ។ ពលរដ្ឋកូរ៉េខាងត្បូងដែលបានសាកល្បងជាប់គុកនៅទីនេះប្រាប់ថា ពួកគេទទួលបាននូវបទពិសោធន៍ថ្មីមួយ ហើយការធ្វើជាអ្នកទោសអាចល្អប្រសើរជាងការអង្គុយធ្វើការពេញមួយថ្ងៃ បើទោះជាមន្ត្រីគុកបានប្រមូលទូរស័ព្ទដៃពីពួកគេក្តី ៕