វ៉ាស៊ីនតោន ៖ ប្រធានាធិបតីអាមេរិក លោក Donald Trump បានប្រាប់នាយករដ្ឋមន្ត្រីន័រវេស លោក Jonas Gahr Støre កាលពីថ្ងៃអាទិត្យថា ឥឡូវនេះលោកលែងមានអារម្មណ៍ថាត្រូវគិតគូរពីសន្តិភាពដ៏បរិសុទ្ធអ្វីទៀតហើយ ដោយសារតែគណៈកម្មាធិការណូបែលនៅប្រទេសន័រវេស មិនបានប្រគល់រង្វាន់ណូបែលសន្តិភាពដល់លោក។ នេះបើតាមការចុះផ្សាយរបស់ CNN។

នៅក្នុងលិខិតមួយដែលផ្ញើទៅកាន់លោក Støre នាយករដ្ឋមន្ត្រីន័រវេស, លោក Trump បានឆ្លៀតបន្ថែមនូវចំណុចមួយដែលមានភ្ជាប់អត្ថន័យគំរាមកំហែងម្តងហើយម្តងទៀត ក្នុងការដណ្តើមយកការគ្រប់គ្រងលើកោះ Greenland ទៅនឹងការពិតដែលថាពានរង្វាន់ណូបែលសន្តិភាពមិនបានមកលោក ទាំងដែលលោកចង់បានវាជាយូរមកហើយ។

នៅក្នុងលិខិតនោះ លោក Trump បានសរសេរថា “ដោយមើលទៅឃើញថាប្រទេសន័រវេររបស់អ្នកបានសម្រេចចិត្តមិនផ្តល់ឱ្យខ្ញុំនូវរង្វាន់ណូបែលសន្តិភាពសម្រាប់ការបញ្ឈប់សង្គ្រាមចំនួន ៨ ឬអាចលើសនេះ, ខ្ញុំលែងមានអារម្មណ៍ថាខ្ញុំត្រូវបំពេញកាតព្វកិច្ចសន្តិភាពសុទ្ធសាធទៀតហើយ បើទោះបីវាជារឿងចាំបាច់ក៏ដោយ។ ដូច្នេះឥឡូវនេះ ខ្ញុំនឹងគិតគូរតែពីផលប្រយោជន៍សម្រាប់សហរដ្ឋអាមេរិកតែមួយគត់”។

លោកក៏បញ្ជាក់ឡើងវិញអំពីគោលបំណងចង់គ្រប់គ្រងកោះហ្គ្រីនលែនដែលជាដែនដីពាក់កណ្ដាលស្វយ័តរបស់ប្រទេសដាណឺម៉ាកផងដែរ។ លោកអះអាងថា ដាណឺម៉ាក មិនអាចការពារកោះនេះទល់នឹងការវាតទីរបស់ចិន និងរុស្ស៊ីបានឡើយ ហើយក៏គ្មានឯកសារបញ្ជាក់ជាលាយលក្ខណ៍អក្សរថា កោះនេះគឺជារបស់ដាណឺម៉ាកដែរ ហើយហេតុអ្វីបានជាពួកគេមាន ‘សិទ្ធិជាម្ចាស់’?

គួរជម្រាបថា ហ្គ្រីនឡែន ដែលជាកោះអាកទិកដ៏ធំល្វឹងល្វើយមួយ ត្រូវបានបញ្ចូលទៅក្នុងប្រទេសដាណឺម៉ាកក្នុងឆ្នាំ 1953 ដែលជាផ្នែកមួយនៃចលនារំដោះអាណានិគមពិភពលោកបន្ទាប់ពីសង្គ្រាមលោកលើកទី 2។ ទោះជាយ៉ាងណា សហរដ្ឋអាមេរិក តែងតែបង្ហាញពីមហិច្ចតាចង់បានកោះនេះមកធ្វើជាកម្មសិទ្ធិរបស់ខ្លួនដោយអះអាងថា ពិភពលោកនឹងមិនមានសុវត្ថិភាពនោះទេ លុះត្រាតែអាមេរិកមានការគ្រប់គ្រងទាំងស្រុងនិងពេញលេញទៅលើតំបន់កោះ ហ្គ្រីនឡែន នេះ»៕

សហរដ្ឋអាមេរិក ៖ ឱកាសពិសេសសម្រាប់ដំណើរកម្សាន្តលើអវកាសបានមកដល់ហើយ ពេលក្រុមហ៊ុនអាមេរិកមួយឈ្មោះ Galactic Resources Utilization Space (ឬក្រុមហ៊ុន GRU Space) ទទួលចុះឈ្មោះភ្ញៀវទេសចរដែលចង់ស្នាក់នៅសណ្ឋាគារលើឋានព្រះច័ន្ទជាផ្លូវការ ។ ក្រុមហ៊ុននេះបានកំណត់គោលដៅផ្តល់សេវាកម្មស្នាក់នៅសណ្ឋាគារនៅឆ្នាំ២០៣២ និងតម្រូវឱ្យកក់ប្រាក់ចាប់ពី២៥ម៉ឺនដុល្លារឡើង ។

GRU Space គឺជាក្រុមហ៊ុនអាមេរិកដែលធ្លាប់ចូលរួមក្នុងគម្រោង Y Combinator ឬគម្រោងបង្កបង្កើតដ៏មានឥទ្ធិពល និងទទួលបានជោគជ័យ ហើយក្រុមហ៊ុនធ្លាប់ប្រកាសជួលបន្ទប់ស្នាក់នៅ Airbnb លំដាប់ពិភពលោក នាពេលកន្លងមក ។ ក្រុមហ៊ុននេះត្រូវបានបង្កើតឡើងកាលពីឆ្នាំ២០២៥ ដោយលោក Skyler Chan អាយុ២២ឆ្នាំ គឺជាអតីតនិស្សិតមហាវិទ្យាល័យអគ្គិសនី និងវិទ្យាសាស្ត្រកុំព្យូទ័រនៃសាកលវិទ្យាល័យ California, Berkeley ។

ក្រុមហ៊ុន GRU Space បានបង្ហាញភារកិច្ចសំខាន់ៗចំនួន៣ ក្នុងការដំណើរការសណ្ឋាគារលើឋានព្រះច័ន្ទ រួមមាន ៖

១-នៅឆ្នាំ២០២៩ ៖ ក្រុមហ៊ុននឹងបញ្ជូនឧបករណ៍សាកល្បងតាមយានអវកាសទៅឋានព្រះច័ន្ទ ដែលយានអវកាសនេះជារបស់អង្គការ NASA ដើម្បីសាកល្បងរចនាសម្ព័ន្ធសណ្ឋាគារអាចធន់នឹងកាំរស្មី UV និងសាកល្បងបច្ចេកវិទ្យាការប្រើប្រាស់ប្រយោជន៍ធនធានធម្មជាតិនៅឋានព្រះច័ន្ទ គឺការប្រែក្លាយធូលីនៅឋានព្រះច័ន្ទទៅជាឥដ្ឋដើម្បីយកមកការពារសណ្ឋាគារនាថ្ងៃអនាគត ។

២-នៅឆ្នាំ២០៣១ ៖ នឹងបញ្ជូនគំរូសណ្ឋាគារទៅដំឡើងក្នុងរណ្តៅលើឋានព្រះច័ន្ទ ដែលរណ្តៅនេះមានសីតុណ្ហភាពក្តៅជាងកន្លែងផ្សេង និងជួយការពារវិទ្យុសកម្មដែលបង្កគ្រោះថ្នាក់ពីខាងក្រៅយ៉ាងល្អ ដែលនេះជាការត្រៀមខ្លួនមុនពេលសណ្ឋាគារដំណើរជាផ្លូវការ ។

៣-នៅឆ្នាំ២០៣២ ៖ នឹងបញ្ជូនសណ្ឋាគារដែលសាងសង់រួចរាល់លើផែនដីទៅកាន់ឋានព្រះច័ន្ទ ព្រមទាំងដំណើរការទទួលឱ្យភ្ញៀវស្នាក់នៅជាផ្លូវការក្នុងសណ្ឋាគារឈ្មោះ V1 Hotel ។ សណ្ឋាគារនេះត្រូវបានរចនាឡើងឱ្យមានប្រព័ន្ធការពារសុវត្ថិភាពសម្រាប់ភ្ញៀវស្នាក់នៅម្តងបាន ចំនួន៤នាក់ ហើយសណ្ឋាគារនេះអាចដំណើរការលើឋានព្រះច័ន្ទរហូតដល់១០ឆ្នាំ ។

ចំណែកភ្ញៀវទេសចរដែលឡើងទៅស្នាក់នៅក្នុងសណ្ឋាគារ មិនត្រឹមអាចគយគន់ទិដ្ឋភាពខាងក្រៅតាមបង្អួចប៉ុណ្ណោះទេ ថែមទាំងអាចបើកបររថយន្តត្រួតពិនិត្យលើផ្ទៃព្រះច័ន្ទ និងវាយកូនហ្គោលទៀតផង ។

លោក Skyler Chan ម្ចាស់ក្រុមហ៊ុន GRU Space និយាយថា វាជាគម្រោងដ៏ធំដែលធ្វើឱ្យមានការភ្ញាក់ផ្អើល និងផលប៉ះពាល់ខ្លាំងបំផុតក្នុងប្រវត្តិសាស្ត្ររបស់មនុស្ស ។ អ្នកចាប់អារម្មណ៍ចង់ទៅកម្សាន្តលើអវកាស ពេលនេះ ក្រុមហ៊ុនទទួលការកក់ប្រាក់តាមរយៈគេហទំព័រផ្លូវការ ចាប់ពី២៥ម៉ឺនដុល្លារឡើង រីឯតម្លៃស្នាក់នៅសណ្ឋាគារជាក់ស្តែងអាចរហូតដល់ ១០លានដុល្លារអាមេរិកក្នុងម្នាក់ ៕

(ភ្នំពេញ) ៖ នៅព្រឹកថ្ងៃទី១៩ ខែមករា ឆ្នាំ២០២៦ គេសង្កេតឃើញជនជាតិចិនរាប់រយនាក់បាននាំគ្នាឈរតម្រង់ជួរនៅខាងមុខស្ថានទូតចិនប្រចាំនៅកម្ពុជាក្នុងរាជធានីភ្នំពេញ ដើម្បីរៀបចំឯកសារចាកចេញពីកម្ពុជាទៅប្រទេសកំណើតខ្លួនវិញ។ ស្ថានភាពជ្រួលច្របល់នេះ ត្រូវបានគេមើលឃើញថាកើតមានស្របពេលដែលរដ្ឋាភិបាលកម្ពុជា បើកយុទ្ធនាការបង្រ្កាបបទល្មើសឆបោ.កតាមអនឡាញទ្រង់ទ្រាយធំ។

ខណៈដែលជនជាតិចិនកាន់តែច្រើនបានសម្រុករៀបចំឯកសារចាកចេញពីប្រទេសកម្ពុជាក្នុងរយៈពេលប៉ុន្មានថ្ងៃចុងក្រោយនេះ អ្នកនាំពាក្យក្រសួងការបរទេសចិន លោក GUO JIAKUN នៅថ្ងៃទី ១៩ មករានេះ បានប្រកាសពីការតាមដានយ៉ាងយកចិត្តទុកដាក់ ចំពោះពលរដ្ឋខ្លួន និងថា ទូតចិនប្រចាំនៅកម្ពុជា កំពុងធ្វើការជាមួយកម្ពុជា ដើម្បីធានាសុវត្តិភាពជូនពលរដ្ឋចិននៅកម្ពុជាទាំងអស់។

បន្ថែមលើនោះ លោក GUO JIAKUN ក៏បានថ្លែងដែរថា៖ មួយរយៈពេលមកនេះ ភាគីចិន និង កម្ពុជាបានសហការគ្នាយ៉ាងសកម្ម ដើម្បីបង្ក្រាប ONLINE SCAM ហើយសម្រេចបាននូវលទ្ធផលគួរឱ្យកត់សម្គាល់។លោកថា ស្ថានទូតចិនប្រចាំនៅកម្ពុជា កំពុងរក្សាការទំនាក់ទំនង និងសម្របសម្រួលជាមួយភាគីកម្ពុជា ដើម្បីអនុវត្តការងារពាក់ព័ន្ធ។

ទោះជាយ៉ាងណា ជុំវិញមូលហេតុជាក់លាក់អំពីការសម្រុកទៅស្ថានទូតចិនរបស់ពលរដ្ឋចិនដែលរស់នៅក្នុងប្រទេសកម្ពុជានៅពេលនេះ គេមិនបានដឹងច្បាស់នោះទេ ប៉ុន្តែការណ៍នេះត្រូវបានសាធារណជនមើលឃើញថា ស្ថានភាពដ៏ជ្រួលច្របល់របស់ជនជាតិចិនដូចខាងលើនេះ កើតឡើង ក្រោយអាជ្ញាធរកម្ពុជាបានចាប់បញ្ជូនអតីតឧកញ៉ាខ្មែរដើមកំណើតចិន ចេន ហ្ស៊ីទៅឲ្យចិន និងបន្ទាប់ពីរដ្ឋាភិបាលកម្ពុជាបានបើកយុទ្ធនាការបង្រ្កាបចាស់ដៃលើបណ្តាញឧក្រិដ្ឋកម្មអនឡាញនៅទូទាំងប្រទេស។

ដូចគ្នានេះដែរ បើតាមប្រភពមួយចំនួនបានអះអាងថា នៅក្នុងចំណោមពលរដ្ឋចិនដែលបានសម្រុកទៅស្ថានទូតទាំងអស់នោះ គឺភាគច្រើនមិនមាន«លិខិតឆ្លងដែន»ជាប់ខ្លួននោះទេ ដូច្នេះហើយកត្តានេះ បានបង្កជាក្ដីបារម្ភយ៉ាងខ្លាំងសម្រាប់ពួកគេ ដោយខ្លាចថាអាចនឹងត្រូវសមត្ថកិច្ចកម្ពុជាចាប់ឃា.ត់ខ្លួន៕

ប្រទេសថៃ ៖ អគ្គលេខាធិការគណៈកម្មាធិការរៀបចំការបោះឆ្នោតនៅប្រទេសថៃសន្យាស្រាវជ្រាវ និងចាត់វិធានការចំពោះការទិញសន្លឹកឆ្នោត បន្ទាប់ពីបែកធ្លាយគណបក្សនយោបាយនានាផ្តល់ប្រាក់ឱ្យពលរដ្ឋក្នុងម្នាក់រហូតដល់ ៧,៥០០បាត (ឬ ២៤១ដុល្លារ) ដើម្បីទិញសន្លឹកឆ្នោតនៅទូទាំងប្រទេស ដោយគណៈកម្មាធិការចាត់ទុកបញ្ហានេះមិនគួរកើតឡើង និងថា យកប្រាក់មកពាក់ព័ន្ធនឹងលទ្ធផលការបោះឆ្នោតនៅខែកុម្ភៈ ។ នេះបើតាមការចុះផ្សាយរបស់សារព័ត៌មាន Matichon នៅថ្ងៃទី២០ ខែមករា ឆ្នាំ២០២៦ ។

កាលពីថ្ងៃទី១៩ ខែមករា អគ្គលេខាធិការគណៈកម្មាធិការរៀបចំការបោះឆ្នោត លោក ស្វែង ប៊ុនមី បាននិយាយពីលទ្ធផលស្ទង់មតិរបស់គណៈកម្មការស្ថាប័នឯកជន ចំនួន៣ ថា គណបក្សនយោបាយថៃនានាប្រកួតប្រជែងគ្នាផ្តល់ប្រាក់ឱ្យពលរដ្ឋក្នុងម្នាក់រហូតដល់ ៧,៥០០បាត (ឬ ២៤១ដុល្លារ) ដើម្បីទិញសន្លឹកឆ្នោត ដោយលោកចាត់ទុកជាការទទួលខុសត្រូវរបស់គណៈកម្មាធិការរៀបចំការបោះឆ្នោតដែលត្រូវចាត់វិធានការ និងសន្យាមិនឱ្យកើតឡើង ។ កន្លងមក គណៈកម្មាធិការដឹងរឿងនេះ ប៉ុន្តែមិនច្បាស់ពីចំនួនប្រាក់ដែលគណបក្សផ្តល់ឱ្យពលរដ្ឋដើម្បីបោះឆ្នោតឱ្យគណបក្សខ្លួន ។

លោកថា ៖ «បញ្ហានេះមិនគួរកើតឡើងនៅប្រទេសថៃទេ វាជាតួនាទីរបស់គណៈកម្មាធិការរៀបចំការបោះឆ្នោតដែលត្រូវចាត់វិធានការកុំឱ្យប៉ះពាល់ដល់លទ្ធផលការបោះឆ្នោត ឬទប់ស្កាត់មិនឱ្យគណបក្សណាមួយជាប់ឆ្នោតដោយសារការទិញសន្លឹកឆ្នោតពីពលរដ្ឋ ។ គណៈកម្មាធិការនឹងមិនកោះហៅក្រុមហ៊ុនឯកជនដែលស្ទង់មតិពលរដ្ឋមកផ្តល់ព័ត៌មានទេ ពីព្រោះគណៈកម្មាធិការមានតួនាទីទប់ស្កាត់បញ្ហានេះកុំឱ្យកើតឡើង» ។

នេះជាកំហុសដែលមនុស្សគ្រប់គ្នាបានប្រពឹត្តខុស មិនថាបេក្ខជននាយករដ្ឋមន្ត្រី ពលរដ្ឋ និងគណៈកម្មាធិការរៀបចំការបោះឆ្នោត យើងមិនចង់ឱ្យវាកើតឡើង ពីព្រោះធ្វើឱ្យលទ្ធផលបោះឆ្នោតមិនអាចទទួលយកបាន ។ គណៈកម្មាធិការចង់ឱ្យការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ គ្មានការទិញសន្លឹកឆ្នោត ដើម្បីបង្ហាញពីគុណភាពនៃការបោះឆ្នោត ព្រមទាំងត្រូវការឱ្យពលរដ្ឋទៅបោះឆ្នោតឱ្យបានច្រើន ។

លទ្ធផលការស្ទង់មតិពលរដ្ឋរបស់គណៈកម្មការស្ថាប័នឯកជនចំនួន៣ គួរឱ្យភ្ញាក់ផ្អើល ពេលគណបក្សនយោបាយនានានៅប្រទេសថៃសម្រុកទិញសន្លឹកឆ្នោត ដោយផ្តល់ប្រាក់ឱ្យពលរដ្ឋក្នុងម្នាក់ចំនួន៧,៥០០បាត (សម្រាប់ពលរដ្ឋនៅទីក្រុងបាងកក និងបណ្តាខេត្តក្បែរៗ) ខណៈនៅខេត្តជាច្រើនទៀត គណបក្សបានផ្តល់ប្រាក់ឱ្យពលរដ្ឋក្នុងម្នាក់ ចាប់ពី ៣,០០០បាត ទៅ ៥,០០០បាត ។

ពលរដ្ឋឆ្លើយតបការស្ទង់មតិ ស្មើ៤២% ប្រាប់ថា គណបក្សនានាសម្រុកទិញសន្លឹកឆ្នោតសម្រាប់ការបោះឆ្នោតនៅខែកុម្ភៈ ក្នុងនោះនៅទីក្រុងបាងកក ផ្តល់ប្រាក់ឱ្យពលរដ្ឋច្រើនជាងគេ រហូតដល់ ៧,៥០០បាត ។ ក្រៅពីនេះ ក៏មានការទិញសន្លឹកឆ្នោតយ៉ាងគគ្រឹកគគ្រេងនៅតាមបណ្តាខេត្តភូមិភាគកណ្តាល, ភាគខាងកើត, ភាគខាងជើង, ភាគខាងត្បូង និងភាគឦសានផងដែរ ៕

ប្រទេសថៃ ៖ កើតហេតុមិនឈប់ឈរនៅកន្លែងដដែល! កាលពីវេលាម៉ោង១១ព្រឹក ថ្ងៃទី២០ ខែមករា ឆ្នាំ២០២៦នេះ មានហេតុការណ៍អគ្គិភ័យឆាបឆេះយ៉ាងសន្ធោសន្ធៅនៅក្រោមស្ពានព្រះរ៉ាម២ ខេត្តសមុទ្រសាខន ប្រទេសថៃ ត្រង់កន្លែងតែមួយដែលដងស្ទួច (Crane) បានបាក់រលំកាលពីថ្ងៃទី១៥ ខែមករា កន្លងមក ។ ការសន្និដ្ឋានផ្សេងៗគ្នាត្រូវបានលើកឡើងពីមូលហេតុអគ្គិភ័យ រីឯមូលហេតុពិតប្រាកដរង់ចាំសមត្ថកិច្ចត្រួតពិនិត្យនៅទីតាំងកើតហេតុយ៉ាងលម្អិត ។

សារព័ត៌មាន Khaosod រាយការណ៍ថា នាព្រឹកថ្ងៃទី២០ ខែមករា មានអគ្គិភ័យឆាបឆេះនៅខាងក្រោមស្ពានព្រះរ៉ាម២ ខេត្តសមុទ្រសាខន ស្ថិតនៅកន្លែងតែមួយដែលដងស្ទួច (Crane) បានបាក់រលំកាលពីថ្ងៃទី១៥ ខែមករា ដោយអគ្គិភ័យបានឆេះរាលដាលរហូតដល់២កន្លែងនៅក្បែរគ្នា ។ ហេតុការណ៍នេះបណ្តាលឱ្យកម្មករធ្វើស្ពាន និងអ្នកដំណើរឆ្លងកាត់ភ័យស្លន់ស្លោយ៉ាងខ្លាំង ពីព្រោះមានគ្រោះថ្នាក់ផ្ទួនៗគ្នាពេក ។

លើសពីនេះ មានផ្សែងខ្មៅហុយឡើងលើលាយឡំជាមួយផ្កាភ្លើង ដែលធ្វើឱ្យភ្នាក់ងារពន្លត់អគ្គិភ័យ និងភ្នាក់ងារសង្គ្រោះបន្ទាន់ប្រញាប់គ្រប់គ្រងស្ថានការណ៍ ដោយបិទការចរាចរតាមដងផ្លូវដើម្បីសុវត្ថិភាពអ្នកដំណើរ និងមិនឱ្យអ្នកពាក់ព័ន្ធមកក្បែរទីតាំងកើតហេតុ ។

បើតាមការត្រួតពិនិត្យបឋមរបស់សមត្ថកិច្ច គឺអគ្គិភ័យនេះអាចបណ្តាលមកពីវត្ថុអ្វីមួយធ្លាក់លើគ្រឿងម៉ាស៊ីនមានប្រេងឥន្ធនៈក្នុងការដ្ឋានសាងសង់ស្ពាននៅខាងក្រោម ហើយពេលប្រេងឥន្ធនៈត្រូវកំដៅថ្ងៃខ្លាំង ក៏ឆេះរាលដាលតែម្តង ។ ប៉ុន្តែការសន្និដ្ឋានផ្សេងទៀតថា អគ្គិភ័យបណ្តាលមកពីបុគ្គលិកក្រុមហ៊ុន Italian-Thai កាត់ដែកចេញពីគំនរបាក់បែកនៅកន្លែងកើតហេតុ ។

ហេតុការណ៍នេះពុំបណ្តាលឱ្យមនុស្សរងរបួស និងស្លាប់ទេ ។ សមត្ថកិច្ច អ្នកជំនាញ និងវិស្វករស្ពាន កំពុងត្រួតពិនិត្យយ៉ាងលម្អិតដើម្បីរកមូលហេតុពិតប្រាកដ និងវាយតម្លៃសុវត្ថិភាពនៅការដ្ឋានសាងសង់ស្ពានព្រះរ៉ាម២ ដើម្បីការពារមិនឱ្យគ្រោះថ្នាក់ដដែលនេះកើតឡើងនាថ្ងៃអនាគត ។

គួរបញ្ជាក់ថា ទីតាំងនេះ គឺជាកន្លែងដែលដងស្ទួច (Crane) បានបាក់រលំកាលពីថ្ងៃទី១៥ ខែមករា ឆ្នាំ២០២៦ កន្លងមក ដែលបណ្តាលឱ្យមនុស្សបាត់បង់ជីវិត ចំនួន២នាក់ និងរងរបួសជាច្រើននាក់ ។ មុនពេលបាក់ដងស្ទួច និងអគ្គិភ័យ ស្ពានព្រះរ៉ាម២ធ្លាប់កើតហេតុការណ៍បាក់ស្ពានសង្កត់រថយន្តអ្នកដំណើរដែលបើកបរឆ្លងកាត់ជាបន្តបន្ទាប់ ហើយពលរដ្ឋថៃបានអំពាវនាវឱ្យស្ថាប័នពាក់ព័ន្ធដោះស្រាយបញ្ហានេះយូរមកហើយ ។

ពលរដ្ឋថៃលើកឡើងថា ព្រះរ៉ាម២ គឺជាផ្លូវមរណៈ ហេតុអ្វីហេតុការណ៍អាក្រក់ចេះតែកើតឡើងផ្ទួនៗគ្នានៅប្រទេសថៃបែបនេះ? វាហាក់ដូចជាមានអ្នកណាម្នាក់ធ្វើឱ្យផ្លូវនេះកើតគ្រោះថ្នាក់ម្តងហើយម្តងទៀត ។ វាជាហេតុការណ៍ចៃដន្យខ្លាំងពេក ពិតជាគួរឱ្យចម្លែកណាស់ ដែលធ្វើឱ្យនឹកឃើញដល់គ្រោះរញ្ជួយដីនៅទីក្រុងបាងកក នាពេលកន្លងមក ៕